Wase 1
Eda Taura Vakacava na iVola i Momani
Ni se qai yabaki 14 o Josefa Simici, e levu na Lotu era kaya ni ra dina, ka sega ni kila o koya ocei vei ira me lewena.
Dua na siga e wilika o Josefa na Jemesa 1:5 ena iVolatabu: “Kevaka e dua vei kemudou sa lailai vua na vuku, me kerea vua na Kalou.” E gadreva me kila o Josefa se lotu cava e dina, sa qai nanuma me kerea vua na Kalou.
Ena dua na mataka ni vula itubutubu a lako ko Josefa ki na veikau volekata nodratou vale ka masu.
Ni sa tekiduru ka tekivu masu, sa tovolea o Setani me tarovi koya. Sa masu vakaukauwa o Josefa, ka kerea vua na Tamada Vakalomalagi na veivuke.
Sa lako mai na Tamada Vakalomalagi kei Jisu Karisito vei Josefa ena dua na duru ni rarama. A dusi Jisu Karisito na Tamada Vakalomalagi ka kaya: “Oqo na Luvequ Lomani. Mo Rogoci Koya!”
E taroga o Josefa se lotu cava me lewena. E kaya o Jisu vei koya me kakua ni lewena e dua vei ira, ni ra sa cala kecega.
Ni a tukuna ki na so na tamata o Josefa na veika e raica ka rogoca, era dredrevaki koya. Era vakacacani koya o ira na iliuliu ni veimatalotu.
Sa sivi e tolu na yabaki. Ena dua na bogi sa masu o Josefa me vosoti na nona ivalavala ca ka me kila na ka me cakava.
E dua na agilosi a yacana o Moronai e a rairai ka tukuna vei Josefa baleta e dua na ivola ka volai tu ena peleti koula. E a vakadewataka o Josefa na peleti oqo ki na vosa Vakavalagi.
Ni sa lako o Moronai, a vakasamataka o Josefa na veika sa tukuna vua o Moronai. A lesu tale mai vakarua ena bogi oya o Moronai.
Ena siga ka tarava a lako ko Josefa ki na delana o Kumora, na vanua a raica o koya ena raivotu. E kea a raica kina e dua na vatu levu. A laveta cake na vatu oya ena dua na kau.
Ena ruku ni vatu e dua na kato vatu. Ni rai yani ki na loma ni kato vatu, a raica o Josefa na peleti koula.
A rairai mai o Moronai ka tukuna vei Josefa me kakua ni taura na peleti ia me na qai lesu mai ena siga vata ga e veiyabaki me va na yabaki. Ena veigauna yadua e lako yani o Josefa, e vakavulici koya tiko o Moronai.
Ni oti e va na yabaki sa vakatarai o Josefa me kauta na peleti koula. A vakayagataka na Urimi kei na Cumimi me vakadewataka eso vei ira.
Era vukei Josefa na daunivolavola ni ra vola na veika e vakadewataka o koya mai na peleti koula.
E kauta yani na vosa sa vakadewataki ni vosa ki na dua na misini ni Tabaivola ko Josefa ka taura tiko bulia e dua na ivola.
iTukutuku ni Lotu,1: 282
Na ivola e vakatokai na iVola i Momani. E tukuna vei ira na tamata era a bula mai Amerika e vuqa na yabaki sa oti. E tukuna talega me baleti Jisu Karisito, na luve ni Kalou.