Wase 39
Ciqoma o Nifai na Kaukauwa Levu
Sa lako yani ki nona vale o Nifai, ni vakasamataka voli na ka a vakaraitaka vua na Turaga kei na nodra caka ca na Nifaiti. Sa rarawa o koya ena vuku ni nodra caka ca.
Sa vosa vei Nifai na Turaga ka vakacaucautaki koya ni talairawarawa tu ka cakacaka vakaukauwa voli me vakatavulica na kosipeli.
E sa soli vei Nifai na kaukauwa me cakava na ka cava ga . Sa kila tu na Turaga ni na vakayagataka vakadodonu o koya na kaukauwa oqo.
A tukuna vei Nifai na Turaga me vakaroti ira na Nifaiti ni kevaka era sega ni veivutuni, era na vakarusai. Sa lako kusarawa sara o Nifai me vakaroti ira na tamata.
Era sega ni vakabauti Nifai na Nifaiti. Era saga me ra viritaki koya ki na vale ni veivesu, ia sa taqomaki koya na kaukauwa ni Kalou.
Sa cauraka na vosa ni Kalou o Nifai kivei ira kecega na Nifaiti.
Ia sa yaco mera caka ca vakalevu sara na tamata ka tekivu veivala vakai ira.
Sa masulaka o Nifai na dausiga, ni nuitaka tu ena vakamalumalumutaki ira na Nifaiti na leqa ni kakana ka vukei ira mera veivutuni.
Sa basika na dausiga. E sa sega na uca, sa mamaca mai na qele ka ra sega ni tubu rawa na itei. Era sa muduka na vala na tamata.
Era sa viakana na Nifaiti, ka mate sara e vuqa vei ira. Sa tekivu me ra nanuma na Turaga kei na veika a vakavuvulitaka vei ira o Nifai, o ira na a bula.
Era sa veivutunitaka na tamata na nodra ivalavala ca ka qai vakamasuta na turaga ni lewa mera kerei Nifai me muduka na dausiga. Era sa lako vei Nifai na turaga ni lewa.
Ni raica o Nifai ni ra sa yalomalumalumu ka veivutuni tu na tamata, sa kerea vua na Turaga o koya me muduka na dausiga.
E sa sauma na masu i Nifai na Turaga, ka sa tekivu tau na uca. Sega ni dede na kena tubu tale na itei. Era sa vakalagilagia na Kalou na tamata ka kila tu ni sa dua na parofita levu o Nifai.
Sa lewena na Lotu e levu na Nifaiti. Sa yaco mera vutuniyau, ka sa tubu na nodra koro. Sa yaco na tiko sautu ena vanua.
Era qai ravuti ira na Nifaiti eso na Nifaiti ka a tomani ira taumada na Leimanaiti.
Era a saga na Nifaiti me ra vakadruka na nodra meca, ka ra sa daubutako tu i Ketianitoni, ka sega ni rawa baleta ni ra sa mai caka ca tale o ira vakai ira.
Ni ra sa yalododonu na Nifaiti, sa vakalougatataki ira na Turaga. Ni ra sa dokadoka ka guilecava na Turaga, sa solia vei ira o koya na leqa eso me vukei ira me ra nanumi koya.