“ວັນທີ 15–21 ເດືອນກໍລະກົດ: ‘ຄຸນນະທຳແຫ່ງພຣະຄຳຂອງພຣະເຈົ້າ.’ ແອວມາ 30–31,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີມໍມອນ 2024 (2024)
“ວັນທີ 15–21 ເດືອນກໍລະກົດ. ແອວມາ 30–31,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2024 (2024)
All Things Denote There Is a God (Alma and Korihor) [ທຸກສິ່ງທຸກຢ່າງຊີ້ໃຫ້ເຫັນວ່າ ມັນມີພຣະເຈົ້າ (ແອວມາ ແລະ ໂຄຣິຫໍ)], ໂດຍ ວາວເຕີ ເຣນ
ວັນທີ 15–21 ເດືອນກໍລະກົດ: “ຄຸນນະທຳແຫ່ງພຣະຄຳຂອງພຣະເຈົ້າ”
ແອວມາ 30–31
ເລື່ອງລາວຢູ່ໃນ ແອວມາ 30–31 ສະແດງໃຫ້ເຫັນຢ່າງແຈ່ມແຈ້ງເຖິງພະລັງຂອງຖ້ອຍຄຳ—ສຳລັບທາງຊົ່ວ ແລະ ສຳລັບທາງດີ. “ຄວາມຍົກຍ້ອງ” ແລະ “ຄຳເວົ້າທີ່ຮຸນແຮງຫລາຍຂຶ້ນ” ຂອງຄູສອນປອມຊື່ ໂຄຣິຫໍ ໄດ້ເປັນຜົນຮ້າຍທີ່ຈະນຳພາ “ຈິດວິນຍານຫລາຍດວງລົງໄປສູ່ຄວາມພິນາດ” (ແອວມາ 30:31, 47). ຄ້າຍຄືກັນນັ້ນ, ຄຳສອນຂອງຜູ້ຄັດຄ້ານຊາວນີໄຟຄົນໜຶ່ງຊື່ ໂຊຣຳ ກໍໄດ້ນຳພາຄົນທັງກຸ່ມລົງ “ໄປສູ່ຄວາມຜິດພາດອັນໃຫຍ່ຫລວງ” ແລະ “ບິດເບືອນທາງຂອງພຣະຜູ້ເປັນເຈົ້າ” (ແອວມາ 31:9, 11).
ກົງກັນຂ້າມ, ແອວມາມີສັດທາທີ່ບໍ່ຫວັ່ນໄຫວວ່າ ພຣະຄຳຂອງພຣະເຈົ້າຈະມີ “ຜົນທີ່ມີອຳນາດແກ່ຈິດໃຈຂອງຜູ້ຄົນຍິ່ງກວ່າດາບ, ຫລື ເໜືອກວ່າສິ່ງໃດໆ” (ແອວມາ 31:5). ຖ້ອຍຄຳຂອງແອວມາສະແດງເຖິງຄວາມຈິງນິລັນດອນ ແລະ ການເອີ້ນຫາອຳນາດຂອງພຣະເຢຊູຄຣິດເພື່ອລະງັບສຽງຂອງ ໂຄຣິຫໍ (ເບິ່ງ ແອວມາ 30:39–50), ແລະ ມັນໄດ້ເຊື້ອເຊີນພອນຂອງພຣະອົງໃຫ້ມາສູ່ຜູ້ທີ່ໄປກັບເພິ່ນ ເພື່ອພາຊາວໂຊຣຳກັບຄືນມາຫາຄວາມຈິງ (ເບິ່ງ ແອວມາ 31:31–38). ນີ້ແມ່ນຕົວຢ່າງອັນມີຄ່າສຳລັບຜູ້ທີ່ຕິດຕາມພຣະຄຣິດໃນສະໄໝນີ້ ເມື່ອຂ່າວສານປອມເປັນເລື່ອງທຳມະດາ. ເຮົາສາມາດພົບຄວາມຈິງ ໂດຍການໄວ້ວາງໃຈໃນ “ຄຸນນະທຳແຫ່ງພຣະຄຳຂອງພຣະເຈົ້າ”, ເໝືອນດັ່ງທີ່ແອວມາໄດ້ເຮັດ (ແອວມາ 31:5).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
ຜູ້ປໍລະປັກພະຍາຍາມຫລອກລວງເຮົາດ້ວຍຄຳສອນເທັດ.
ຢູ່ໃນ ແອວມາ 30, ໂຄຣິຫໍຖືກເອີ້ນວ່າ “ຜູ້ຕໍ່ຕ້ານພຣະຄຣິດ” (ຂໍ້ທີ 6). ຜູ້ຕໍ່ຕ້ານພຣະຄຣິດ ແມ່ນຜູ້ໃດກໍຕາມ ຫລື ສິ່ງໃດກໍຕາມ ທີ່ຕໍ່ຕ້ານພຣະເຢຊູຄຣິດ ແລະ ພຣະກິດຕິຄຸນຂອງພຣະອົງຢ່າງເປີດເຜີຍ ຫລື ຢ່າງລັບໆ. ຂໍ້ໃດໃນ ແອວມາ 30:6–31 ທີ່ສະແດງວ່າ ໂຄຣິຫໍເໝາະສົມກັບຄຳບັນຍາຍນີ້? ການສຶກສາຄຳສອນເທັດຂອງໂຄຣິຫໍ ສາມາດຊ່ວຍໃຫ້ທ່ານຮູ້ຈັກ ແລະ ປະຕິເສດຄຳສອນທີ່ຄ້າຍຄືກັນນີ້. ກິດຈະກຳດັ່ງຕໍ່ໄປນີ້ ອາດຊ່ວຍໃນການສຶກສາຂອງທ່ານໄດ້:
-
ບົດຮຽນໃດແດ່ທີ່ໃຊ້ສິ່ງຂອງ ທີ່ທ່ານສາມາດຄິດອອກ ເພື່ອໃຫ້ເຂົ້າໃຈຄວາມແຕກຕ່າງລະຫວ່າງຄຳສອນຂອງພຣະຜູ້ຊ່ວຍໃຫ້ລອດ ແລະ ການຮຽນແບບທີ່ຈອມປອມຂອງຊາຕານໄດ້ດີຂຶ້ນ? ບາງຕົວຢ່າງຄື ເຫຍື່ອທີ່ໃຊ້ລໍ້ປາ, ເງິນປອມ, ແລະ ການໂຄສະນາປອມ. ທ່ານຈະສາມາດຮູ້ໄດ້ແນວໃດວ່າ ສິ່ງໃດສິ່ງໜຶ່ງປອມ? ທ່ານຈະຮູ້ຈັກຄວາມຈິງໄດ້ແນວໃດ?
-
ໃຫ້ພິຈາລະນາເຮັດລາຍການຫລັກຄຳສອນເທັດຂອງໂຄຣິຫໍໄດ້ສິດສອນຢູ່ໃນ ແອວມາ 30:6–31. ຄຳສອນໃດຂອງລາວທີ່ອາດເປັນທີ່ໜ້າດຶງດູດໃນສະໄໝນີ້? (ເບິ່ງ ແອວມາ 30:12–18, 23–28). ການຍອມຮັບແນວຄິດເຊັ່ນນັ້ນ ສາມາດສົ່ງຜົນອັນຕະລາຍຫຍັງແດ່? ຂ່າວສານປອມໃດແດ່ທີ່ຜູ້ປໍລະປັກໃຊ້ເພື່ອພະຍາຍາມທີ່ຈະຫລອກລວງທ່ານໃນສະໄໝນີ້?
-
ແອວມາໄດ້ເຮັດຫຍັງເພື່ອກ່າວໂຕ້ຕອບຄຳສອນຂອງໂຄຣິຫໍດ້ວຍຄວາມຈິງ? (ເບິ່ງ ແອວມາ 30:31–54). ທ່ານຈະສາມາດໃຊ້ຫລັກທຳດຽວກັນນີ້ໃນຊີວິດຂອງທ່ານໄດ້ແນວໃດ?
ເຊັ່ນດຽວກັບແອວມາ, ສາດສະດາ ແລະ ອັກຄະສາວົກສະໄໝໃໝ່ ຊ່ວຍໃຫ້ເຮົາຮູ້ຈັກຄວາມແຕກຕ່າງລະຫວ່າງຄວາມຈິງ ແລະ ຄຳຕົວະຂອງຊາຕານ. ຄຳແນະນຳໃດທີ່ທ່ານພົບເຫັນໃນຂ່າວສານເຫລົ່ານີ້: Gary E. Stevenson, “Deceive Me Not” (Liahona, Nov. 2019, 00–00); Dallin H. Oaks “Be Not Deceived” (Liahona, Nov. 2004, 00).
ເບິ່ງ Gospel Topics, “Seek Truth and Avoid Deception,” ຫ້ອງສະໝຸດພຣະກິດຕິຄຸນ; “ບອກມາ ສັດຈະຄືຫຍັງ?,” ເພງສວດ ແລະ ເພງຂອງເດັກນ້ອຍ, 34 ນຳອີກ.
Korihor Confronts Alma [ໂຄຣິຫໍປະເຊີນໜ້າກັບແອວມາ], ໂດຍ ຣໍເບີດ ທີ ແບແຣັດ
ທຸກສິ່ງທຸກຢ່າງເປັນພະຍານເຖິງພຣະເຈົ້າ.
ຫລາຍຄົນສະໄໝນີ້ເຊື່ອວ່າ ບໍ່ມີພຣະເຈົ້າ. ທ່ານພົບເຫັນຫຍັງໃນ ແອວມາ 30:39–46 ທີ່ຊ່ວຍໃຫ້ທ່ານຮູ້ວ່າ ພຣະເຈົ້າມີຈິງ? ແມ່ນຫຍັງທີ່ຂັດຂວາງເຮົາບໍ່ໃຫ້ຮູ້ຈັກພຣະອົງ? ປະຈັກພະຍານອື່ນໃດອີກແດ່ທີ່ພຣະເຈົ້າໄດ້ມອບໃຫ້ທ່ານ ວ່າພຣະອົງຊົງພຣະຊົນຢູ່?
ຜູ້ປໍລະປັກບໍ່ສະໜັບສະໜູນບໍລິວານຂອງມັນ.
ທ່ານຮຽນຮູ້ຫຍັງແດ່ຈາກ ແອວມາ 30:56–60 ກ່ຽວກັບວິທີທີ່ມານກະທຳກັບບໍລິວານຂອງມັນ? ທ່ານສາມາດເຮັດຫຍັງໄດ້ແດ່ ເພື່ອປົກປ້ອງບ້ານເຮືອນຂອງທ່ານຈາກອິດທິພົນຂອງມານ?
ເບິ່ງ ແອວມາ 36:3 ນຳອີກ.
ພຣະຄຳຂອງພຣະເຈົ້າມີພະລັງທີ່ຈະນຳພາຜູ້ຄົນໄປສູ່ຄວາມຊອບທຳ.
ບັນຫາຂອງຊາວໂຊຣຳ ທີ່ແຍກຕົວອອກໄປຈາກຊາວນີໄຟ ສຳລັບບາງຄົນອາດເບິ່ງຄືວ່າ ມັນຕ້ອງໄດ້ແກ້ໄຂບັນຫາທາງການເມືອງ ແລະ ການທະຫານ (ເບິ່ງ ແອວມາ 31:1–4). ແຕ່ແອວມາໄດ້ຮຽນໄວ້ວາງໃຈໃນ “ຄຸນນະທຳແຫ່ງພຣະຄຳຂອງພຣະເຈົ້າ” (ແອວມາ 31:5). ທ່ານຮຽນຮູ້ຫຍັງແດ່ຈາກ ແອວມາ 31:5 ກ່ຽວກັບພະລັງຂອງພຣະຄຳຂອງພຣະເຈົ້າ? (ເບິ່ງ ເຮັບເຣີ 4:12; 1 ນີໄຟ 15:23–24; 2 ນີໄຟ 31:20; ຢາໂຄບ 2:8; ຮີລາມັນ 3:29–30 ນຳອີກ).
ຂະນະທີ່ທ່ານສຶກສາ ແອວມາ 31, ທ່ານສາມາດພົບເຫັນຄວາມຈິງຂອງພຣະກິດຕິຄຸນອື່ນໃດອີກແດ່ ທີ່ໃຊ້ໄດ້ໃນປະສົບການຊີວິດຂອງທ່ານ? ຍົກຕົວຢ່າງ:
-
ທ່ານເຄີຍເຫັນພຣະຄຳຂອງພຣະເຈົ້ານຳພາຜູ້ຄົນໃຫ້ເຮັດໃນສິ່ງທີ່ດີແນວໃດ? (ເບິ່ງ ຂໍ້ທີ 5).
-
ປຽບທຽບທ່າທີ, ຄວາມຮູ້ສຶກ, ແລະ ການກະທຳຂອງແອວມາກ່ຽວກັບຜູ້ອື່ນ (ເບິ່ງ ຂໍ້ທີ 34–35) ກັບຂອງຊາວໂຊຣຳ (ເບິ່ງ ຂໍ້ທີ 17–28). ທ່ານຈະສາມາດເປັນເໝືອນດັ່ງແອວມາຫລາຍຂຶ້ນໄດ້ແນວໃດ?
-
ທ່ານພົບເຫັນຫຍັງແດ່ ຢູ່ໃນ ແອວມາ 31:30–38 ທີ່ສາມາດຊ່ວຍຄົນທີ່ໂສກເສົ້າກັບບາບຂອງຄົນອື່ນ?
ເພາະພຣະເຢຊູຄຣິດ, ທຸກຄົນສາມາດປ່ຽນແປງ.
ໃຫ້ສັງເກດເບິ່ງກຸ່ມຜູ້ຄົນທີ່ແອວມາໄດ້ພາໄປກັບເພິ່ນເພື່ອສິດສອນພຣະກິດຕິຄຸນໃຫ້ແກ່ຊາວໂຊຣຳ (ເບິ່ງ ແອວມາ 31:6). ທ່ານຮຽນຮູ້ຫຍັງແດ່ກ່ຽວກັບຊີວິດຂອງຜູ້ຄົນເຫລົ່ານີ້ໃນ ໂມໄຊຢາ 27:8–37; 28:4; ແອວມາ 10:1–6; 11:21–25; 15:3–12. ອາດມີຂ່າວສານໃດແດ່ສຳລັບທ່ານໃນປະສົບການຂອງພວກເຂົາ?
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
ພຣະຄຳພີມໍມອນເຕືອນເຮົາກ່ຽວກັບຄຳສອນເທັດ.
-
ໃຫ້ພິຈາລະນາສະແດງວັດຖຸບາງຢ່າງ (ເຊັ່ນ ເງິນ ຫລື ອາຫານ) ແລະ ຂອງຫລິ້ນຮຽນແບບຂອງວັດຖຸເຫລົ່ານີ້. ສິ່ງນີ້ອາດພາໄປສູ່ການສົນທະນາກ່ຽວກັບວິທີຮູ້ຈັກຄວາມແຕກຕ່າງລະຫວ່າງສິ່ງຂອງທີ່ເປັນຂອງແທ້ ແລະ ສິ່ງຂອງທີ່ເປັນຂອງປອມ. ແລ້ວທ່ານກໍສາມາດຊ່ວຍລູກໆຂອງທ່ານລະບຸຄຳຕົວະ ຫລື ຄຳສອນເທັດຈາກ ແອວມາ 30:12–18 ທີ່ໂຄຣິຫໍໄດ້ສິດສອນກ່ຽວກັບພຣະເຈົ້າ. ໃນ ແອວມາ 30:32–35, ແອວມາໄດ້ໂຕ້ຕອບຄຳຕົວະເຫລົ່ານັ້ນວ່າແນວໃດ? ເຮົາຮຽນຮູ້ຫຍັງແດ່ຈາກຕົວຢ່າງຂອງເພິ່ນ?
ທຸກສິ່ງທຸກຢ່າງເປັນພະຍານເຖິງພຣະເຈົ້າ.
-
ແອວມາໄດ້ເວົ້າກ່ຽວກັບວ່າ ສິ່ງທີ່ຢູ່ໃນສະຫວັນ ແລະ ຢູ່ເທິງແຜ່ນດິນໂລກເປັນພະຍານວ່າ ພຣະເຈົ້າຊົງພຣະຊົນຢູ່ແນວໃດ. ຖ້າເປັນໄປໄດ້, ໃຫ້ຍ່າງຢູ່ທາງນອກກັບລູກໆຂອງທ່ານ ຫລື ຢືນຢູ່ປ່ອງຢ້ຽມຂະນະທີ່ທ່ານອ່ານ ແອວມາ 30:44. ຂໍໃຫ້ພວກເຂົາຊີ້ບອກເຖິງສິ່ງທີ່ພວກເຂົາເຫັນ ທີ່ຊ່ວຍໃຫ້ພວກເຂົາຮູ້ວ່າພຣະເຈົ້າມີຈິງ ແລະ ວ່າພຣະເຈົ້າຮັກພວກເຂົາ. ພວກເຂົາຍັງສາມາດແຕ້ມຮູບສິ່ງທີ່ພວກເຂົາຄົ້ນພົບນຳອີກ (ເບິ່ງ ໜ້າກິດຈະກຳຂອງອາທິດນີ້).
-
ຂະນະທີ່ທ່ານ ແລະ ລູກໆຂອງທ່ານຮ້ອງເພງ “ໂອ້ພຣະບິດາ” (ເພງສວດ ແລະ ເພງຂອງເດັກນ້ອຍ, 46), ໃຫ້ສົ່ງໝາກບານ ຫລື ສິ່ງຂອງອື່ນໄປອ້ອມໆ. ໃຫ້ຢຸດເພງເປັນໄລຍະໆ ແລະ ຂໍໃຫ້ລູກຜູ້ທີ່ກຳລັງຖືສິ່ງຂອງຢູ່ແບ່ງປັນສິ່ງໜຶ່ງທີ່ພຣະບິດາເທິງສະຫວັນໄດ້ສ້າງ ທີ່ລາວຮູ້ສຶກຮູ້ບຸນຄຸນຕໍ່.
ເດັກນ້ອຍຮຽນຮູ້ຜ່ານທາງພາບ. ພາບຈະຊ່ວຍໃຫ້ລູກໆຂອງທ່ານເຂົ້າໃຈໄດ້ດີຂຶ້ນ ແລະ ຈື່ເປັນເວລາດົນນານກ່ຽວກັບສິ່ງທີ່ພວກເຂົາຖືກສິດສອນ. ກິດຈະກຳສຳລັບເດັກນ້ອຍຢູ່ໃນໂຄງຮ່າງນີ້ ສ່ວນໃຫຍ່ຈະແນະນຳພາບໃຫ້ໃຊ້. ໃຫ້ພິຈາລະນາເອົາພາບດຽວກັນໃຫ້ເບິ່ງອີກໃນອະນາຄົດ ເພື່ອຊ່ວຍລູກໆຂອງທ່ານໃຫ້ຈື່ສິ່ງທີ່ພວກເຂົາໄດ້ຮຽນຮູ້.
ພຣະຄຳຂອງພຣະເຈົ້າມີອຳນາດ.
-
ທ່ານຈະສາມາດຊ່ວຍລູກໆຂອງທ່ານໃຫ້ເຂົ້າໃຈວ່າ ພຣະຄຳຂອງພຣະເຈົ້ານັ້ນ ມີອຳນາດເໜືອກວ່າ “ສິ່ງໃດໆ” ໄດ້ແນວໃດ? (ແອວມາ 31:5). ໃຫ້ພິຈາລະນາຂໍໃຫ້ພວກເຂົາຄິດເຖິງສິ່ງໃດສິ່ງໜຶ່ງ ຫລື ຄົນໃດຄົນໜຶ່ງທີ່ມີອຳນາດ, ຫລື ເອົາຮູບຂອງບາງສິ່ງທີ່ມີອຳນາດໃຫ້ເບິ່ງ. ແມ່ນຫຍັງທີ່ເຮັດໃຫ້ມັນມີອຳນາດ? ອ່ານ ແອວມາ 31:5 ນຳກັນ, ແລະ ຖາມລູກໆຂອງທ່ານເຖິງສິ່ງທີ່ພວກເຂົາຄິດວ່າຂໍ້ນີ້ໝາຍເຖິງ. ແບ່ງປັນປະສົບການກ່ຽວກັບຕອນທີ່ພຣະຄຳຂອງພຣະເຈົ້າມີອິດທິພົນຕໍ່ທ່ານ.
ພຣະບິດາເທິງສະຫວັນໄດ້ຍິນຄຳອະທິຖານຂອງເຮົາ.
-
ສະຫລຸບໂດຍຫຍໍ້ກ່ຽວກັບເລື່ອງລາວຂອງແອວມາ ແລະ ຊາວໂຊຣຳ, ໂດຍໃຊ້ຂໍ້ພຣະຄຳພີຈາກ ແອວມາ 31:8–35 (ເບິ່ງ “ບົດທີ 28: ຊາວໂຊຣຳ ແລະ ແຣມີອຳທຳ,” ເລື່ອງພຣະຄຳພີມໍມອນ, 78–80 ນຳອີກ). ຊ່ວຍໃຫ້ລູກໆຂອງທ່ານລະບຸສິ່ງທີ່ຊາວໂຊຣຳໄດ້ກ່າວໃນຄຳອະທິຖານຂອງພວກເຂົາ (ເບິ່ງ ແອວມາ 31:15–18) ຂະນະທີ່ພວກເຂົາຊ່ວຍທ່ານສ້າງຫໍແຣມີອຳທຳ ດ້ວຍທ່ອນໄມ້ ຫລື ກ້ອນຫີນ. ອະທິບາຍວ່າ ນີ້ບໍ່ແມ່ນວິທີທີ່ພວກເຮົາຄວນອະທິຖານ. ຂະນະທີ່ທ່ານ ແລະ ລູກໆຂອງທ່ານເວົ້າກ່ຽວກັບວິທີທີ່ພວກເຮົາຄວນອະທິຖານ, ໃຫ້ພວກເຂົາເອົາທ່ອນໄມ້ ຫລື ກ້ອນຫີນອອກເທື່ອລະອັນ. ບາງເທື່ອ ພວກເຂົາອາດເກັບກ້ອນຫີນກ້ອນໜຶ່ງໄວ້ຂ້າງຕຽງ ເພື່ອເປັນສິ່ງເຕືອນໃຈພວກເຂົາໃຫ້ຈື່ທີ່ຈະອະທິຖານ ທຸກໆເຊົ້າ ແລະ ແລງ. ພວກເຂົາອາດມັກທີ່ຈະທາສີປະດັບກ້ອນຫີນຂອງພວກເຂົາ.
ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.
ໃຈຂອງຊາວໂຊຣຳ “ໄຝ່ຝັນໃນການອວດອ້າງ, ແລະ ໃນຄວາມທະນົງຕົວຂອງພວກເຂົາ” (ແອວມາ 31:25).