ຢ່າຫລອກລວງຂ້າພະເຈົ້າ
ເມື່ອເຮົາເຊື່ອຟັງພຣະບັນຍັດຂອງພຣະເຈົ້າ, ເຮົາຈະຖືກນຳພາໄປໃນເສັ້ນທາງທີ່ຖືກຕ້ອງສະເໝີ ແລະ ຈະບໍ່ຖືກຫລອກລວງ.
ມື້ນີ້, ຂ້າພະເຈົ້າຂໍສະເໜີຄຳແນະນຳສຳລັບທຸກຄົນ, ໂດຍສະເພາະ ພວກເຈົ້າ ທີ່ເປັນຄົນລຸ້ນໃໝ່—ເດັກນ້ອຍຊັ້ນປະຖົມໄວ, ຊາຍໜຸ່ມ, ແລະ ຍິງໜຸ່ມ. ປະທານຣະໂຊ ເອັມ ແນວສັນ ສາດສະດາຂອງພຣະຜູ້ເປັນເຈົ້າໃນວັນເວລາຂອງເຮົາຮັກພວກເຈົ້າຫລາຍ—ເຖິງຂະໜາດທີ່ເພິ່ນໄດ້ກ່າວກັບພວກເຈົ້າຫລາຍໆຄົນ ຢູ່ໃນກອງປະຊຸມໃຫ້ຄຳດົນໃຈສຳລັບຊາວໜຸ່ມ ທີ່ຖ່າຍທອດປີກາຍນີ້ ໃນຫົວຂໍ້ “ຄວາມຫວັງຂອງອິດສະຣາເອນ.”1 ພວກເຮົາໄດ້ຍິນປະທານແນວສັນ ເອີ້ນພວກເຈົ້າເລື້ອຍໆວ່າ— “ຄວາມຫວັງຂອງອິດສະຣາເອນ,” ຄົນລຸ້ນໃໝ່ ແລະ ອະນາຄົດຂອງສາດສະໜາຈັກທີ່ຟື້ນຟູຂອງພຣະເຢຊູຄຣິດ.
ເພື່ອນໜຸ່ມຂອງຂ້າພະເຈົ້າທັງຫລາຍ, ຂ້າພະເຈົ້າຈະເລີ່ມຕົ້ນດ້ວຍການແບ່ງປັນເລື່ອງເລົ່າກ່ຽວກັບຄອບຄົວສອງເລື່ອງ.
ໝາດາວເມຊຽນ 102 ໂຕ
ເມື່ອຫລາຍປີກ່ອນ, ຂ້າພະເຈົ້າໄດ້ກັບເຖິງບ້ານຈາກການທຳງານ ແລະ ຕົກຕະລຶງເມື່ອໄດ້ເຫັນນອກເຮືອນເຕັມໄປດ້ວຍສີຂາວ—ທັງພື້ນ, ປະຕູກະລ້າ, ແລະ ຝາເຮືອນ ທີ່ເປັນດິນຈີ່ສີແດງ. ຂ້າພະເຈົ້າກໍໄດ້ເຂົ້າໄປເບິ່ງໃກ້ໆ ແລະ ເຫັນວ່ານ້ຳສີຍັງປຽກຢູ່. ນ້ຳສີໄດ້ຢາຍເປັນທາງ ພາໄປຫາຫລັງບ້ານ, ສະນັ້ນ ຂ້າພະເຈົ້າຈຶ່ງຕາມຮອຍໄປ. ຢູ່ຫລັງບ້ານ, ຂ້າພະເຈົ້າໄດ້ເຫັນລູກຊາຍອາຍຸຫ້າປີ ກຳລັງແລ່ນໄລ່ໝາຂອງພວກເຮົາຢູ່ ພ້ອມດ້ວຍແປງນ້ຳສີ ຢູ່ໃນມື. ເຄິ່ງໜຶ່ງຂອງໝາແລບຣາດໍ ສີດຳຂອງພວກເຮົາ ໄດ້ຖືກທາເປັນສີຂາວ!
“ເຈົ້າກຳລັງເຮັດຫຍັງຢູ່?” ຂ້າພະເຈົ້າໄດ້ຖາມດ້ວຍສຽງທີ່ຕື່ນເຕັ້ນ.
ລູກຊາຍໄດ້ຢຸດ, ຫລຽວເບິ່ງຂ້າພະເຈົ້າ, ໄດ້ຫລຽວເບິ່ງໝາ, ແລ້ວຫລຽວເບິ່ງແປງນ້ຳສີທີ່ຍ້ອຍຢູ່, ແລະ ເວົ້າວ່າ, “ເຮົາຢາກໃຫ້ມັນ ເບິ່ງຄືໝາດ່າງຢູ່ໃນໜັງ—ເລື່ອງ ໝາດາວເມຊຽນ 101 ໂຕຫັ້ນນ່າ.”
ຂ້າພະເຈົ້າຮັກໝາຂອງພວກເຮົາ. ຂ້າພະເຈົ້າຄິດວ່າ ມັນກໍດີຢູ່ແລ້ວ, ແຕ່ລູກຊາຍຂອງຂ້າພະເຈົ້າ ຢາກໃຫ້ມັນເປັນພັນອື່ນ.
ແມວຂາວດຳ
ເລື່ອງທີສອງແມ່ນກ່ຽວກັບພໍ່ລຸງທວດ ໂກຼເວີ ຜູ້ໄດ້ອາໄສຢູ່ໃນຊົນນະບົດ, ໄກຈາກເມືອງໃຫຍ່. ພໍ່ລຸງ ໂກຼເວີ ໄດ້ເຖົ້າແກ່ຫລາຍ. ພວກເຮົາຄິດວ່າ ພວກລູກຊາຍຂອງພວກເຮົາຄວນໄປພົບພໍ່ລຸງກ່ອນເພິ່ນຊິເສຍຊີວິດ. ສະນັ້ນ, ໃນຕອນບ່າຍມື້ໜຶ່ງ, ພວກເຮົາຈຶ່ງໄດ້ຂັບລົດເປັນໄລຍະໄກ ໄປຢາມເພິ່ນ. ພວກເຮົາໄດ້ນັ່ງລົມກັນ ແລະ ໄດ້ແນະນຳພວກລູກຊາຍຂອງພວກເຮົາໃຫ້ເພິ່ນຮູ້ຈັກ. ບໍ່ດົນຈາກນັ້ນ, ລູກຊາຍສອງຄົນຂອງພວກເຮົາ ອາຍຸ ຫ້າ ແລະ ຫົກ ປີ ຢາກອອກໄປຫລິ້ນຢູ່ຂ້າງນອກ.
ພໍ່ລຸງ ໂກຼເວີ, ເມື່ອໄດ້ຍິນຄຳຂໍຮ້ອງຂອງພວກເຂົາ, ຈຶ່ງໄດ້ກົ້ມໜ້າລົງໄປໃກ້ໆໜ້າພວກເຂົາ. ດ້ວຍໃບໜ້າທີ່ເຖົ້າແກ່ ແລະ ບໍ່ຄຸ້ນເຄີຍ ຈຶ່ງເຮັດໃຫ້ພວກເຂົາຕື່ນຕົກໃຈ. ເພິ່ນໄດ້ເວົ້າກັບພວກເຂົາ, ໃນນ້ຳສຽງທີ່ຈິງຈັງ, “ລະວັງເດີ—ມີໂຕເໝັນຫລາຍ.” ເມື່ອໄດ້ຍິນແນວນັ້ນ, ລີຊາ ແລະ ຂ້າພະເຈົ້າ ກໍຍິ່ງຕົກໃຈກວ່າເກົ່າ, ພວກເຮົາເປັນຫ່ວງວ່າ ພວກເຂົາຊິຖືກໂຕເໝັນສີດນ້ຳເໝັນໃສ່! ບໍ່ດົນພວກລູກຊາຍກໍໄດ້ອອກໄປຫລິ້ນ ຂະນະທີ່ພວກເຮົາຢ້ຽມຢາມກັນຕໍ່.
ແລ້ວເມື່ອພວກເຮົາກຳລັງຊິຂຶ້ນລົດກັບບ້ານ, ຂ້າພະເຈົ້າໄດ້ຖາມພວກເຂົາວ່າ, “ພວກເຈົ້າເຫັນໂຕເໝັນບໍ?” ຄົນໜຶ່ງໄດ້ຕອບວ່າ, “ບໍ່, ພວກເຮົາບໍ່ເຫັນໂຕເໝັນ, ແຕ່ເຫັນແມວດຳ ທີ່ມີສີຂາວຢູ່ກາງຫລັງ!”
ຜູ້ຫລອກລວງທີ່ເກັ່ງກ້າ
ເລື່ອງທີ່ກ່າວມານັ້ນກ່ຽວກັບເດັກນ້ອຍທີ່ໄຮ້ດຽງສາ ທີ່ຄົ້ນພົບບາງສິ່ງກ່ຽວກັບຊີວິດ ແລະ ຄວາມເປັນຈິງ ເຮັດໃຫ້ເຮົາແຕ່ລະຄົນຍິ້ມອອກມາ, ແຕ່ມັນກໍເປັນການສະແດງອອກເຖິງແນວຄິດທີ່ເລິກຊຶ້ງກວ່ານັ້ນ.
ຢູ່ໃນເລື່ອງທຳອິດ, ລູກຊາຍຂອງພວກເຮົາມີໝາທີ່ສວຍງາມເປັນສັດລ້ຽງ; ແຕ່ລາວໄດ້ເອົາກະປ໋ອງນ້ຳສີອອກໄປ ພ້ອມດ້ວຍແປງທາສີ ຕັ້ງໃຈທີ່ຈະປ່ຽນໝາໃຫ້ເປັນດັ່ງທີ່ລາວວາດພາບໃນຄວາມຄິດຂອງລາວ.
ຢູ່ໃນເລື່ອງທີສອງ, ສອງອ້າຍນ້ອງບໍ່ຮູ້ເຖິງສິ່ງອັນຕະລາຍທີ່ພວກເຂົາຈະປະເຊີນ ຕອນພົບໂຕເໝັນ. ໂດຍທີ່ບໍ່ຮູ້ຈັກວ່າພວກເຂົາໄປເຈິເອົາສິ່ງໃດ, ພວກເຂົາອາດໂຊກບໍ່ດີ. ເລື່ອງເຫລົ່ານີ້ແມ່ນການເບິ່ງຜິດ—ສັນນິຖານວ່າສິ່ງທີ່ແທ້ຈິງ ເປັນສິ່ງອື່ນ. ໃນແຕ່ລະກໍລະນີ, ຜົນສະທ້ອນແມ່ນເລັກນ້ອຍ.
ເຖິງຢ່າງໃດກໍຕາມ, ຫລາຍຄົນໃນທຸກວັນນີ້ ກໍຍັງດີ້ນລົນກັບບັນຫາແບບນີ້ຄືກັນ ທີ່ໃຫຍ່ໂຕກວ່າ. ເຂົາເຈົ້າອາດບໍ່ສາມາດເຫັນຢ່າງແຈ້ງຊັດ ໃນສິ່ງທີ່ມັນເປັນຢູ່, ຫລື ບໍ່ພໍໃຈກັບຄວາມຈິງ. ຍິ່ງໄປກວ່ານັ້ນ, ທຸກວັນນີ້ມັນມີອິດທິພົນທີ່ເຈດຕະນາທີ່ຈະພາເຮົາໜີໄປຈາກຄວາມຈິງທີ່ບໍ່ປ່ຽນແປງ. ການຫລອກລວງ ແລະ ຄວາມຕົວະເຫລົ່ານີ້ ແມ່ນເກີນກວ່າການເບິ່ງຜິດ ແລະ ສ່ວນຫລາຍຈະມີຜົນສະທ້ອນທີ່ຮ້າຍແຮງ, ບໍ່ແມ່ນເລັກນ້ອຍ.
ຊາຕານ, ບິດາຂອງຄວາມຕົວະ ແລະ ຜູ້ຫລອກລວງທີ່ຍິ່ງໃຫຍ່, ຈະເຮັດໃຫ້ເຮົາສົງໃສສິ່ງທີ່ມັນເປັນຢູ່ ແລະ ບໍ່ສົນໃຈກັບຄວາມຈິງນິລັນດອນ ຫລື ປ່ຽນບາງສິ່ງໃຫ້ເປັນໜ້າເພິ່ງພໍໃຈຫລາຍກວ່າເກົ່າ. “ມັນໄດ້ເຮັດສົງຄາມກັບໄພ່ພົນຂອງພຣະເຈົ້າ”2 ແລະ ໄດ້ໃຊ້ເວລາເຖິງພັນປີ ເພື່ອຄິດໄລ່ ແລະ ເຝິກຝົນຄວາມສາມາດ ທີ່ຈະຊັກຊວນລູກໆຂອງພຣະອົງ ໃຫ້ເຊື່ອວ່າ ຄວາມດີ ເປັນຄວາມຊົ່ວ ແລະ ຄວາມຊົ່ວເປັນຄວາມດີ.
ມັນໄດ້ສ້າງຊື່ສຽງໃຫ້ຕົວມັນເອງ ເລື່ອງການເຮັດໃຫ້ມະນຸດຍອມຮັບວ່າ ໂຕເໝັນເປັນພຽງໂຕແມວ ຫລື ໂດຍການທາສີໃສ່, ກໍສາມາດປ່ຽນໝາ ແລບຣາດໍ ເປັນໝາ ດາວເມຊຽນ ໄດ້ທັນທີ!
ບັດນີ້ ໃຫ້ເຮົາມາເບິ່ງຕົວຢ່າງ ຂອງຫລັກທຳຢ່າງດຽວກັນນີ້ ທີ່ມີຢູ່ໃນພຣະຄຳພີ ຕອນທີ່ໂມເຊ ສາດສະດາຂອງພຣະຜູ້ເປັນເຈົ້າ ໄດ້ປະເຊີນກັບບັນຫາທີ່ຄືກັນນີ້ ໜ້າຕໍ່ໜ້າ. “ໃນເວລາທີ່ໄດ້ພາໂມເຊຂຶ້ນໄປຍັງພູທີ່ສູງທີ່ສຸດ[;] … ເພິ່ນໄດ້ເຫັນພຣະເຈົ້າໜ້າຕໍ່ໜ້າ, ແລະ ເພິ່ນໄດ້ເວົ້າລົມກັບພຣະອົງ.”3 ພຣະເຈົ້າໄດ້ສິດສອນໂມເຊກ່ຽວກັບເອກະລັກນິລັນດອນຂອງເພິ່ນ. ເຖິງແມ່ນໂມເຊເປັນມະນຸດ ແລະ ບໍ່ດີພ້ອມທຸກຢ່າງ, ແຕ່ພຣະເຈົ້າໄດ້ສິດສອນວ່າ ໂມເຊເປັນ “ເໝືອນພຣະອົງດຽວທີ່ຖືກຳເນີດຂອງເຮົາ; ແລະ ພຣະອົງດຽວທີ່ຖືກຳເນີດຂອງເຮົາ … ຈະເປັນພຣະຜູ້ຊ່ວຍໃຫ້ລອດ.”4
ສະຫລຸບແລ້ວ, ໃນພາບນິມິດທີ່ໜ້າອັດສະຈັນນີ້, ໂມເຊໄດ້ເຫັນພຣະເຈົ້າ, ແລະ ເພິ່ນໄດ້ຮຽນຮູ້ບາງສິ່ງທີ່ສຳຄັນ ກ່ຽວກັບຕົວເພິ່ນເອງ: ເພິ່ນໄດ້ເປັນ ບຸດຂອງພຣະເຈົ້າແທ້ໆ.
ໃຫ້ຟັງຢ່າງລະມັດລະວັງເຖິງສິ່ງທີ່ໄດ້ເກີດຂຶ້ນ ໃນທ້າຍພາບນິມິດທີ່ປະເສີດນັ້ນ. “ແລະ ເຫດການໄດ້ບັງເກີດຂຶ້ນຄື … ຊາຕານໄດ້ມາລໍ້ລວງເພິ່ນ,” ໂດຍກ່າວວ່າ: ໂມເຊ, ບຸດມະນຸດ, ຈົ່ງນະມັດສະການເຮົາ!”5 ໂມເຊໄດ້ຕອບຢ່າງກ້າຫານວ່າ: “ທ່ານເປັນໃຜ? ເພາະຈົ່ງເບິ່ງ ຂ້າພະເຈົ້າເປັນບຸດຂອງ ພຣະເຈົ້າ, ເປັນເໝືອນພຣະອົງດຽວທີ່ຖືກຳເນີດຂອງພຣະອົງ; ແລະ ລັດສະໝີພາບຂອງ ທ່ານ ຢູ່ໃສ, ທີ່ຂ້າພະເຈົ້າຈະນະມັດສະການ ທ່ານ?”6
ໃນອີກຄຳໜຶ່ງ, ໂມເຊໄດ້ເວົ້າວ່າ, “ທ່ານຫລອກລວງຂ້າພະເຈົ້າບໍ່ໄດ້, ເພາະຂ້າພະເຈົ້າຮູ້ວ່າ ຂ້າພະເຈົ້າເປັນໃຜ. ຂ້າພະເຈົ້າໄດ້ຖືກສ້າງຂຶ້ນຕາມຮູບລັກສະນະຂອງພຣະເຈົ້າ. ທ່ານບໍ່ມີຄວາມສະຫວ່າງ ແລະ ລັດສະໝີພາບຂອງພຣະອົງ. ສະນັ້ນ ເປັນຫຍັງຂ້າພະເຈົ້າຈຶ່ງຈະນະມັດສະການທ່ານ ຫລື ຕົກເປັນເຫຍື່ອຂອງການຫລອກລວງຂອງທ່ານ?”
ບັດນີ້ໃຫ້ເຮົາມາຟັງຄຳຕອບຕໍ່ໄປຂອງໂມເຊ. ເພິ່ນປະກາດວ່າ, “ຈົ່ງອອກໄປຈາກບ່ອນນີ້ເສຍ, ຊາຕານ; ຢ່າຫລອກລວງຂ້າພະເຈົ້າ.”7
ມີຫລາຍສິ່ງທີ່ເຮົາສາມາດຮຽນຮູ້ຈາກຄຳຕອບທີ່ກ້າຫານຂອງໂມເຊ ຕໍ່ການລໍ້ລວງຂອງຜູ້ປໍລະປັກ. ຂ້າພະເຈົ້າຂໍເຊື້ອເຊີນພວກເຈົ້າໃຫ້ຕອບໃນແບບດຽວກັນນັ້ນ ເມື່ອພວກເຈົ້າຮູ້ສຶກຖືກລໍ້ລວງ. ໃຫ້ກ່າວກັບສັດຕູຂອງຈິດວິນຍານຂອງພວກເຈົ້າວ່າ: “ໃຫ້ໜີໄປ! ເຈົ້າ ບໍ່ ມີລັດສະໝີພາບ. ຢ່າມາລໍ້ລວງ ຫລື ຕົວະຂ້ອຍ! ເພາະຂ້ອຍຮູ້ວ່າ ຂ້ອຍເປັນລູກຂອງພຣະເຈົ້າ. ແລະ ຂ້ອຍຈະເອີ້ນຫາພຣະເຈົ້າສະເໝີ ເພື່ອຂໍຄວາມຊ່ວຍເຫລືອ.”
ຜູ້ປໍລະປັກຈະບໍ່ຍອມເຊົາຫລອກລວງ ແລະ ເຊົາເຮັດໃຫ້ເຮົາເສື່ອມເສຍຢ່າງງ່າຍດາຍ. ມັນບໍ່ໄດ້ເຊົາງ່າຍໆກັບໂມເຊ, ແຕ່ມັນຢາກໃຫ້ໂມເຊລືມວ່າ ເພິ່ນເປັນໃຜແທ້ໆ.
ຄືກັນກັບຕອນທີ່ເດັກນ້ອຍຮ້ອງໄຫ້ໂວຍວາຍ, “ຊາຕານໄດ້ຮ້ອງຂຶ້ນດ້ວຍສຽງອັນດັງ, ແລະ ໄດ້ເວົ້າແບບໃຈຮ້າຍຢູ່ເທິງຜືນແຜ່ນດິນ, ແລະ ໄດ້ບັນຊາ, ໂດຍກ່າວວ່າ: ເຮົາຄື ພຣະອົງດຽວທີ່ຖືກຳເນີດ, ຈົ່ງນະມັດສະການເຮົາ.”8
ໃຫ້ເຮົາມາທົບທວນ. ພວກເຈົ້າໄດ້ຍິນບໍວ່າ ມັນຫາກໍໄດ້ເວົ້າຫຍັງ? “ເຮົາຄື ພຣະອົງດຽວທີ່ຖືກຳເນີດ. ຈົ່ງນະມັດສະການ ເຮົາ!”
ຜູ້ຫລອກລວງທີ່ເກັ່ງກ້າໄດ້ເວົ້າວ່າ, ຕາມຈິງແລ້ວ “ບໍ່ຕ້ອງເປັນຫ່ວງ; ເຮົາຊິບໍ່ທຳຮ້າຍເຈົ້າດອກ—ເຮົາບໍ່ແມ່ນໂຕເໝັນ; ເຮົາເປັນພຽງແມວຂາວດຳທີ່ໄຮ້ດຽງສາເທົ່ານັ້ນ.”
ແລ້ວໂມເຊໄດ້ເອີ້ນຫາພຣະເຈົ້າ ແລະ ໄດ້ຮັບກຳລັງຈາກສະຫວັນ. ເຖິງແມ່ນວ່າຜູ້ປໍລະປັກສັ່ນສາຍ ແລະ ແຜ່ນດິນໄຫວ, ແຕ່ໂມເຊ ກໍບໍ່ໄດ້ຍິນຍອມ. ຄຳເວົ້າຂອງເພິ່ນແມ່ນແນ່ນອນ ແລະ ແຈ່ມແຈ້ງ. “ຈົ່ງໄປຈາກຂ້າພະເຈົ້າ, ຊາຕານ,” ເພິ່ນໄດ້ປະກາດ, “ເພາະວ່າພຣະເຈົ້າອົງດຽວນີ້ເທົ່ານັ້ນທີ່ຂ້າພະເຈົ້າຈະນະມັດສະການ, ຊຶ່ງເປັນພຣະເຈົ້າແຫ່ງລັດສະໝີພາບ.”9
ໃນທີ່ສຸດ, ມັນ “ໄດ້ອອກໄປ … ພົ້ນໜ້າຂອງໂມເຊ.”10
ຫລັງຈາກພຣະຜູ້ເປັນເຈົ້າໄດ້ມາປະກົດ ແລະ ໃຫ້ພອນແກ່ໂມເຊແລ້ວ ເພາະການເຊື່ອຟັງຂອງເພິ່ນ, ພຣະຜູ້ເປັນເຈົ້າໄດ້ກ່າວວ່າ:
“ເຈົ້າເປັນສຸກແລ້ວ, ໂມເຊ, … ເຈົ້າຈະຖືກເຮັດໃຫ້ເຂັ້ມແຂງຫລາຍກວ່າແມ່ນ້ຳທັງຫລາຍ. …
“ແລະ ເບິ່ງແມ, ເຮົາຢູ່ນຳເຈົ້າ, ແມ່ນແຕ່ຈົນເຖິງທີ່ສຸດຂອງວັນເວລາຂອງເຈົ້າ.”11
ຄວາມສາມາດຂອງໂມເຊ ທີ່ສາມາດຕ້ານທານກັບຜູ້ປໍລະປັກ ເປັນຕົວຢ່າງທີ່ແຈ່ມແຈ້ງ ແລະ ດົນໃຈສຳລັບເຮົາແຕ່ລະຄົນ, ບໍ່ວ່າເຮົາຈະຢູ່ໃນໄວໃດກໍຕາມ. ມັນເປັນຂ່າວສານທີ່ມີພະລັງ ສຳລັບພວກເຈົ້າໂດຍສະເພາະ—ທີ່ຈະຮູ້ຈັກສິ່ງທີ່ຈະເຮັດ ເມື່ອມັນພະຍາຍາມຫລອກລວງພວກເຈົ້າ. ເພາະພວກເຈົ້າ, ຄືກັນກັບໂມເຊ, ກໍໄດ້ຮັບພອນຫລາຍດ້ວຍຄວາມຊ່ວຍເຫລືອຈາກສະຫວັນ.
ພຣະບັນຍັດ ແລະ ພອນ
ພວກເຈົ້າຈະຊອກຫາຄວາມຊ່ວຍເຫລືອຈາກສະຫວັນໄດ້ຢູ່ໃສ, ຄືກັນກັບໂມເຊ, ແລະ ບໍ່ຖືກຫລອກລວງ ຫລື ຍອມຕໍ່ການລໍ້ລວງ? ແຫລ່ງທີ່ແຈ່ມແຈ້ງສຳລັບຄວາມຊ່ວຍເຫລືອຈາກສະຫວັນ ໄດ້ຖືກຢືນຢັນໃນຍຸກສະໄໝນີ້ ໂດຍພຣະຜູ້ເປັນເຈົ້າເອງ ເມື່ອພຣະອົງໄດ້ປະກາດວ່າ: “ດັ່ງນັ້ນ, ເຮົາພຣະຜູ້ເປັນເຈົ້າ, ໂດຍທີ່ຮູ້ເຖິງຄວາມເສຍຫາຍທີ່ຈະມາສູ່ ຜູ້ອາໄສຂອງແຜ່ນດິນໂລກ, ຈຶ່ງໄດ້ເອີ້ນຜູ້ຮັບໃຊ້ຂອງເຮົາ ໂຈເຊັບ ສະມິດ, ຜູ້ລູກ, ແລະ ໄດ້ກ່າວກັບລາວຈາກສະຫວັນ, ແລະ ມອບບັນຍັດໃຫ້ລາວ.”12 ໂດຍທີ່ໃຊ້ສັບງ່າຍໆ, ເຮົາອາດເວົ້າວ່າ ພຣະຜູ້ເປັນເຈົ້າ, ຜູ້ຮູ້ຈັກ “ທີ່ສຸດຕັ້ງແຕ່ຕົ້ນ,”13 ຮູ້ຈັກຄວາມຫຍຸ້ງຍາກໃດໜຶ່ງໂດຍສະເພາະຂອງວັນເວລາຂອງເຮົາ. ສະນັ້ນ, ພຣະອົງຈຶ່ງມີວິທີທາງທີ່ຈະຕ້ານທານກັບການທ້າທາຍ ແລະ ການລໍ້ລວງ, ຊຶ່ງຫລາຍຢ່າງມາຈາກອິດທິພົນຂອງການຫລອກລວງໂດຍກົງຂອງຜູ້ປໍລະປັກ ແລະ ການໂຈມຕີຂອງມັນ.
ວິທີແມ່ນລຽບງ່າຍ. ຜ່ານທາງຜູ້ຮັບໃຊ້ຂອງພຣະອົງ, ພຣະເຈົ້າກ່າວກັບເຮົາ, ລູກໆຂອງພຣະອົງ, ແລະ ມອບພຣະບັນຍັດໃຫ້ເຮົາ. ເຮົາສາມາດເວົ້າຂໍ້ຄວາມເຫລົ່ານັ້ນ ທີ່ຂ້າພະເຈົ້າຫາກໍອ້າງເຖິງ ໃນແບບໃໝ່ວ່າ, “ເຮົາ ພຣະຜູ້ເປັນເຈົ້າ … ໄດ້ເອີ້ນຜູ້ຮັບໃຊ້ຂອງເຮົາ [ປະທານຣະໂຊ ເອັມ ແນວສັນ], ແລະ ໄດ້ກ່າວກັບເພິ່ນຈາກສະຫວັນ, ແລະ ໄດ້ມອບພຣະບັນຍັດໃຫ້ເພິ່ນ.” ຊ່າງເປັນຄວາມຈິງທີ່ປະເສີດແທ້ໆນໍ?
ຂ້າພະເຈົ້າເປັນພະຍານຢ່າງໜັກແໜ້ນວ່າ ພຣະຜູ້ເປັນເຈົ້າໄດ້ກ່າວກັບໂຈເຊັບ ສະມິດ ຈາກສະຫວັນແທ້ໆ, ເລີ່ມຕົ້ນຈາກພາບທີ່ມາໃຫ້ເຫັນຄັ້ງທຳອິດ. ພຣະອົງກໍໄດ້ກ່າວກັບປະທານແນວສັນ ໃນວັນເວລາຂອງເຮົາຄືກັນ. ຂ້າພະເຈົ້າເປັນພະຍານວ່າ ພຣະເຈົ້າຕິດຕໍ່ກັບສາດສະດາທັງຫລາຍໃນອະດີດ ແລະ ໄດ້ມອບພຣະບັນຍັດໃຫ້ພວກເພິ່ນ ເພື່ອພາລູກໆຂອງພຣະອົງໄປສູ່ຄວາມສຸກໃນຊີວິດນີ້ ແລະ ສູ່ລັດສະໝີພາບໃນຊີວິດໜ້າ.
ພຣະເຈົ້າຍັງສືບຕໍ່ປະທານພຣະບັນຍັດໃຫ້ສາດສະດາທີ່ມີຊີວິດຢູ່ຂອງເຮົາ ໃນປະຈຸບັນ. ມີຫລາຍຕົວຢ່າງເຊັ່ນ—ບ້ານເຮືອນເປັນສູນກາງ, ໂດຍມີສາດສະໜາຈັກສະໜັບສະໜູນ ໃຫ້ຄວາມສົມດູນໃນການສິດສອນພຣະກິດຕິຄຸນ; ການປ່ຽນແປງການສອນປະຈຳບ້ານ ແລະ ການຢ້ຽມສອນ ໃຫ້ເປັນການປະຕິບັດສາດສະໜາກິດ; ການປ່ຽນແປງວິທີການເລື່ອງພຣະວິຫານ ແລະ ພິທີການ; ແລະ ໂຄງການສຳລັບເດັກນ້ອຍ ແລະ ຊາວໜຸ່ມ. ຂ້າພະເຈົ້າປະຫລາດໃຈກັບພຣະກະລຸນາທິຄຸນ ແລະ ຄວາມເຫັນອົກເຫັນໃຈຂອງພຣະບິດາເທິງສະຫວັນທີ່ຊົງຮັກ ແລະ ພຣະບຸດຂອງພຣະອົງ, ພຣະເຢຊູຄຣິດ, ຜູ້ໄດ້ຟື້ນຟູສາດສະໜາຈັກຂອງພຣະອົງ ຢູ່ເທິງແຜ່ນດິນໂລກຄືນໃໝ່ ແລະ ໄດ້ເອີ້ນສາດສະດາ ໃນວັນເວລາຂອງເຮົາ. ການຟື້ນຟູພຣະກິດຕິຄຸນຂອງພຣະເຢຊູຄຣິດໄດ້ລົບລ້າງວັນເວລາ ອັນຕະລາຍ ດ້ວຍ ຄວາມສົມບູນ ແຫ່ງເວລາ.
ຄວາມຊົ່ວຮ້າຍບໍ່ເຄີຍເປັນຄວາມສຸກເລີຍ
ການເຊື່ອຟັງພຣະບັນຍັດທີ່ມອບໃຫ້ແກ່ສາດສະດາຂອງເຮົາ ບໍ່ພຽງແຕ່ເປັນສິ່ງສຳຄັນ ໃນການຫລີກເວັ້ນຈາກອິດທິພົນຂອງຜູ້ຫລອກລວງເທົ່ານັ້ນ, ແຕ່ຍັງເປັນການປະສົບກັບຄວາມຊື່ນຊົມ ແລະ ຄວາມສຸກທີ່ຍາວນານນຳອີກ. ສູດນີ້ຈາກສະຫວັນ ແມ່ນລຽບງ່າຍ: ຄວາມຊອບທຳ, ຫລື ການເຊື່ອຟັງຕໍ່ພຣະບັນຍັດ, ນຳພອນມາໃຫ້, ແລະ ພອນນຳຄວາມສຸກ, ຫລື ຄວາມຊື່ນຊົມມາໃຫ້ຊີວິດຂອງເຮົາ.
ເຖິງຢ່າງໃດກໍຕາມ, ໃນວິທີດຽວກັນກັບທີ່ຜູ້ປໍລະປັກໄດ້ພະຍາຍາມຫລອກລວງໂມເຊ, ມັນກໍພະຍາຍາມຫລອກລວງພວກເຈົ້າຄືກັນ. ມັນໄດ້ທຳທ່າເປັນບາງສິ່ງທີ່ມັນບໍ່ໄດ້ເປັນສະເໝີມາ. ມັນໄດ້ພະຍາຍາມປິດບັງທາດແທ້ຂອງມັນສະເໝີມາ. ມັນປະກາດວ່າ ການເຊື່ອຟັງຈະເຮັດໃຫ້ພວກເຈົ້າທຸກທໍລະມານ ແລະ ວ່າການເຊື່ອຟັງຈະເຮັດໃຫ້ພວກເຈົ້າບໍ່ມີຄວາມສຸກ.
ພວກເຈົ້າສາມາດບອກໄດ້ບໍ ເຖິງອຸບາຍທີ່ຈະຫລອກລວງສອງສາມຢ່າງຂອງຜູ້ປໍລະປັກ? ຍົກຕົວຢ່າງ, ຜູ້ປໍລະປັກປິດບັງຜົນຮ້າຍຂອງຢາເສບຕິດ ແລະ ເຄື່ອງດື່ມ ໂດຍການແນະນຳວ່າ ມັນຊິເຮັດໃຫ້ມີຄວາມສຸກ. ຜູ້ປໍລະປັກພາເຮົາເຂົ້າຫາສິ່ງທີ່ເປັນທາງລົບ ຢູ່ໃນສື່ສານມວນຊົນ, ລວມທັງການປຽບທຽບຕົວເອງໃສ່ກັບຄົນອື່ນ ແລະ ຄວາມເປັນຈິງຂອງອຸດົມຄະຕິ. ນອກເໜືອຈາກນັ້ນ, ຜູ້ປໍລະປັກຍັງລວງຕາດ້ວຍສິ່ງອັນຕະລາຍຢູ່ໃນອອນລາຍນຳອີກ ດັ່ງເຊັ່ນຮູບພາບລາມົກ, ການເວົ້າຂູ່ເຂັນຄົນອື່ນ, ແລະ ໂຄສະນາສິ່ງທີ່ບໍ່ມີມູນຄວາມຈິງ ເພື່ອກໍ່ໃຫ້ເກີດຄວາມສົງໃສ ແລະ ຄວາມຢ້ານກົວໃນຈິດໃຈ ແລະ ຄວາມຄິດຂອງເຮົາ. ຜູ້ປໍລະປັກຈະສື່ມໃສ່ຫູແບບສະຫລາດແກມໂກງວ່າ, “ເຮັດຕາມເຮົາ, ແລ້ວເຈົ້າຈະມີຄວາມສຸກຢ່າງແນ່ນອນ.”
ຖ້ອຍຄຳທີ່ຖືກຂຽນຫລາຍສັດຕະວັດມາແລ້ວ ໂດຍສາດສະດາຂອງພຣະຄຳພີມໍມອນ ຍັງກ່ຽວຂ້ອງກັບວັນເວລາຂອງເຮົາຢູ່ ໂດຍສະເພາະ: “ຄວາມຊົ່ວຮ້າຍ ບໍ່ເຄີຍ ເປັນຄວາມສຸກເລີຍ.”14 ຂໍໃຫ້ເຮົາຈົ່ງຮູ້ຈັກການຫລອກລວງຂອງຊາຕານ ຕາມທາດແທ້ຂອງມັນ. ຂໍໃຫ້ເຮົາຈົ່ງສາມາດຕ້ານທານ ແລະ ຮູ້ຈັກຄວາມຕົວະ ແລະ ອິດທິພົນຂອງຜູ້ທີ່ສະແຫວງຫາທີ່ຈະທຳລາຍຈິດວິນຍານຂອງເຮົາ ແລະ ລັກເອົາຄວາມສຸກໃນປະຈຸບັນ ແລະ ລັດສະໝີພາບໃນອະນາຄົດຂອງເຮົາໄປ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ເຮົາຕ້ອງຊື່ສັດ ແລະ ກ້າຫານຕໍ່ໄປ, ເພາະມັນເປັນພຽງທາງດຽວເທົ່ານັ້ນ ທີ່ຈະສາມາດເບິ່ງຄວາມຈິງອອກ ແລະ ໄດ້ຍິນສຸລະສຽງຂອງພຣະຜູ້ເປັນເຈົ້າຜ່ານທາງຜູ້ຮັບໃຊ້ຂອງພຣະອົງ. “ເພາະວ່າພຣະວິນຍານກ່າວດ້ວຍຄວາມຈິງ ແລະ ບໍ່ຕົວະ. … ເລື່ອງເຫລົ່ານີ້ຈຶ່ງຖືກສະແດງໃຫ້ປະຈັກແກ່ພວກເຮົາຢ່າງແຈ່ມແຈ້ງ, ເພື່ອຄວາມລອດຂອງຈິດວິນຍານຂອງພວກເຮົາ. ເພາະພຣະເຈົ້າໄດ້ຮັບສັ່ງເລື່ອງເຫລົ່ານີ້ກັບສາດສະດາໃນສະໄໝກ່ອນມາແລ້ວ.”15 ເຮົາເປັນໄພ່ພົນຂອງພຣະຜູ້ເປັນເຈົ້າອົງຊົງລິດອຳນາດຍິ່ງໃຫຍ່, ເປັນຄວາມຫວັງຂອງອິດສະຣາເອນ! ເມື່ອໄພຮຸກຮານ “ເຮົານັ້ນຈະຫລີກຕໍ່ສູ້ບໍ? ບໍ່! … ຍອມຕາມພຣະບັນຊາ, ຈິດວິນຍານ, ໃຈ, ເຮົາຈະຍຶດໝັ້ນສັດຊື່ໄປບໍ່ວາຍ.”16
ຂ້າພະເຈົ້າເປັນພະຍານເຖິງ ພຣະຜູ້ບໍລິສຸດຂອງອິດສະຣາເອນ—ແມ່ນແຕ່ພຣະນາມຂອງພຣະເຢຊູຄຣິດ. ຂ້າພະເຈົ້າເປັນພະຍານເຖິງຄວາມຮັກ, ຄວາມຈິງ, ແລະ ຄວາມຊື່ນຊົມຂອງພຣະອົງ ທີ່ເຮັດໃຫ້ເປັນໄປໄດ້ ໂດຍການເສຍສະລະອັນບໍ່ມີຂອບເຂດ ແລະ ເປັນນິດຂອງພຣະອົງ. ເມື່ອເຮົາເຊື່ອຟັງພຣະບັນຍັດຂອງພຣະອົງ, ເຮົາຈະຖືກນຳພາໄປໃນເສັ້ນທາງທີ່ຖືກຕ້ອງ ແລະ ຈະບໍ່ຖືກຫລອກລວງ. ໃນພຣະນາມອັນສັກສິດຂອງພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ອາແມນ.