ພະລັງທີ່ຈະເອົາຊະນະຜູ້ປໍລະປັກ

ໂດຍ ແອວເດີ ພີເຕີ ເອັມ ຈອນສັນ

ແຫ່ງສາວົກເຈັດສິບ

ເຮົາຈະພົບເຫັນສັນຕິສຸກ, ຈື່ຈຳວ່າເຮົາເປັນໃຜ, ແລະ ເອົາຊະນະຄວາມຮູ້ສຶກໃນສຳນວນສາມຢ່າງ ຂອງຜູ້ປໍລະປັກໄດ້ແນວໃດ?

ອ້າຍເອື້ອຍນ້ອງທັງຫລາຍ, ຂໍຂອບໃຈສຳລັບການກາຍຜູ້ຕິດຕາມທີ່ແທ້ຈິງຂອງພຣະເຢຊູຄຣິດຂອງທ່ານ, ແລະ ການຊ່ວຍຄົນອື່ນໃຫ້ກາຍເປັນຄືກັນ, ແລະ ຊື່ນຊົມກັບພອນຂອງພຣະວິຫານທີ່ສັກສິດ. ຂໍຂອບໃຈສຳລັບຄວາມດີງາມຂອງທ່ານ. ທ່ານດີແທ້ໆ; ທ່ານງົດງາມແທ້ໆ.

ຂ້າພະເຈົ້າອະທິຖານວ່າ ເຮົາຈະຮັບຮູ້ອິດທິພົນທີ່ ຢືນຢັນ ຂອງພຣະວິນຍານບໍລິສຸດ ໃນເມື່ອເຮົາເຂົ້າໃຈຢ່າງເຕັມທີ່ ວ່າເຮົາເປັນລູກຂອງພຣະເຈົ້າ. ໃບ “ຄອບຄົວ: ການປະກາດຕໍ່ໂລກ” ກ່າວວ່າ: “ມະນຸດທຸກຄົນ—ຊາຍ ແລະ ຍິງ—ໄດ້ຖືກສ້າງຂຶ້ນຕາມຮູບຮ່າງລັກສະນະຂອງພຣະເຈົ້າ. ແຕ່ລະຄົນກໍເປັນບຸດ ຫລື ທິດາທາງວິນຍານ ທີ່ຮັກຫອມຂອງພຣະບິດາມານດາເທິງສະຫວັນ ແລະ ເມື່ອເປັນເຊັ່ນນັ້ນ, ເຮົາແຕ່ລະຄົນຈຶ່ງມີທຳມະຊາດແຫ່ງສະຫວັນ ແລະ ມີຈຸດໝາຍປາຍທາງ.”¹ ເຮົາເປັນ “ວິນຍານທີ່ໂປດປານ ຜູ້ທີ່ຖືກຮັກສາໄວ້ ເພື່ອໃຫ້ອອກມາໃນຄວາມສົມບູນແຫ່ງເວລາ ເພື່ອມີສ່ວນໃນການວາງຮາກຖານຂອງວຽກງານອັນຍິ່ງໃຫຍ່ ໃນຍຸກສຸດທ້າຍ.”² ປະທານຣະໂຊ ເອັມ ແນວສັນ ໄດ້ປະກາດວ່າ: “ທ່ານໄດ້ຖືກສິດສອນຢູ່ໃນໂລກວິນຍານ ເພື່ອກະກຽມທ່ານສຳລັບສິ່ງໃດກໍຕາມ ແລະ ທຸກສິ່ງທີ່ທ່ານຈະໄດ້ປະເຊີນ ໃນຊ່ວງສຸດທ້າຍຂອງຍຸກສຸດທ້າຍນີ້ (ເບິ່ງ ຄ&ພ 138:56). ຄຳສອນນີ້ກໍຍັງຄົງຢູ່ພາຍໃນຕົວທ່ານ!”³

ທ່ານເປັນບຸດ ແລະ ທິດາທີ່ຖືກເລືອກຂອງພຣະເຈົ້າ. ທ່ານມີພະລັງທີ່ຈະເອົາຊະນະຜູ້ປໍລະປັກ. ເຖິງຢ່າງໃດກໍຕາມ, ຜູ້ປໍລະປັກກໍຮັບຮູ້ວ່າທ່ານເປັນໃຜ. ມັນຮູ້ເຖິງມໍລະດົກແຫ່ງສະຫວັນຂອງທ່ານ ແລະ ສະແຫວງຫາທີ່ຈະຈຳກັດສັກກະຍະພາບແຫ່ງໂລກ ແລະ ແຫ່ງສະຫວັນຂອງທ່ານ ໂດຍການນຳໃຊ້ຄວາມຮູ້ສຶກໃນສຳນວນສາມຢ່າງຕໍ່ໄປນີ້.

ການຫລອກລວງ
ການລົບກວນ
ການທໍ້ຖອຍໃຈ

ການຫລອກລວງ

ຜູ້ປໍລະປັກໄດ້ໃຊ້ເຄື່ອງມືຂອງການຫລອກລວງໃນວັນເວລາຂອງໂມເຊ. ພຣະຜູ້ເປັນເຈົ້າໄດ້ປະກາດຕໍ່ໂມເຊວ່າ:

“ຈົ່ງເບິ່ງ, ເຈົ້າເປັນບຸດຂອງເຮົາ. …

“ເຮົາມີວຽກງານຢ່າງໜຶ່ງສຳລັບເຈົ້າ, … ແລະ ເຈົ້າຈະເໝືອນພຣະອົງດຽວທີ່ຖືກຳເນີດຂອງເຮົາ.”⁴

ບໍ່ດົນຫລັງຈາກພາບນິມິດທີ່ຮຸ່ງໂລດ, ຊາຕານໄດ້ພະຍາຍາມທີ່ຈະຫລອກລວງໂມເຊ. ຖ້ອຍຄຳທີ່ມັນໃຊ້ແມ່ນໜ້າສົນໃຈ: “ໂມເຊ, ບຸດມະນຸດ, ຈົ່ງນະມັດສະການເຮົາ.”⁵ ການຫລອກລວງນັ້ນບໍ່ພຽງແຕ່ຢູ່ໃນການຊັກຊວນໃຫ້ນະມັດສະການຊາຕານເທົ່ານັ້ນ, ແຕ່ໃນວິທີທີ່ມັນໄດ້ບັນຍາຍເຖິງໂມເຊ ວ່າເປັນບຸດມະນຸດນຳອີກ. ຂໍໃຫ້ຈຳໄວ້ວ່າ, ພຣະຜູ້ເປັນເຈົ້າໄດ້ບອກໂມເຊ ວ່າເພິ່ນເປັນບຸດຂອງພຣະເຈົ້າ, ຖືກສ້າງຂຶ້ນມາຕາມຮູບຮ່າງລັກສະນະຂອງພຣະອົງດຽວທີ່ຖືກກຳເນີດ.

ຜູ້ປໍລະປັກກໍບໍ່ໄດ້ລົດລະໃນຄວາມພະຍາຍາມຂອງມັນທີ່ຈະຫລອກລວງໂມເຊ, ແຕ່ໂມເຊກໍໄດ້ຕໍ່ຕ້ານວ່າ: “ຈົ່ງໄປຈາກຂ້າພະເຈົ້າ, ຊາຕານ, ເພາະວ່າພຣະເຈົ້າອົງດຽວນີ້ເທົ່ານັ້ນທີ່ຂ້າພະເຈົ້າຈະນະມັດສະການ, ຊຶ່ງເປັນພຣະເຈົ້າແຫ່ງລັດສະໝີພາບ.”⁶ ໂມໂຊຈື່ຈຳໄດ້ວ່າ ເພິ່ນເປັນໃຜ—ເປັນບຸດຂອງພຣະເຈົ້າ.

ພຣະຄຳຂອງພຣະຜູ້ເປັນເຈົ້າກໍກ່ຽວຂ້ອງກັບທ່ານ ແລະ ຂ້າພະເຈົ້າ. ເຮົາຖືກສ້າງຂຶ້ນມາຕາມຮູບຮ່າງລັກສະນະຂອງພຣະເຈົ້າ, ແລະ ພຣະອົງມີວຽກງານໃຫ້ເຮົາເຮັດ. ຜູ້ປໍລະປັກພະຍາຍາມທີ່ຈະຫລອກລວງໂດຍການເຮັດໃຫ້ເຮົາລືມວ່າເຮົາເປັນໃຜແທ້ໆ. ຖ້າຫາກເຮົາບໍ່ເຂົ້າໃຈວ່າເຮົາເປັນໃຜ, ແລ້ວມັນຍາກທີ່ຈະຮັບຮູ້ຜູ້ຄົນທີ່ເຮົາຈະກາຍເປັນ.

ການລົບກວນ

ຜູ້ປໍລະປັກກໍພະຍາຍາມທີ່ຈະລົບກວນເຮົາໃຫ້ຫັນໜີຈາກພຣະຄຣິດ ແລະ ເສັ້ນທາງແຫ່ງພັນທະສັນຍາຂອງພຣະອົງ. ແອວເດີ ຣອນໂນ ເອ ແຣັສ໌ແບນ ໄດ້ແບ່ງປັນຂໍ້ຄວາມດັ່ງຕໍ່ໄປນີ້ວ່າ: “ຄວາມປາດຖະໜາຂອງຜູ້ປໍລະປັກແມ່ນ ຢາກກີດກັນເຮົາຈາກພະຍານຕ່າງໆທາງວິນຍານ, ກົງກັນຂ້າມ ຄວາມປາດຖະໜາຂອງພຣະຜູ້ເປັນເຈົ້າແມ່ນ ທີ່ຈະໃຫ້ຄວາມຮູ້ແຈ້ງ ແລະ ໃຫ້ເຮົາມີພາກສ່ວນໃນວຽກງານຂອງພຣະອົງ.”⁷

ໃນວັນເວລາຂອງເຮົາ, ມັນມີການລົບກວນຢ່າງຫລວງຫລາຍ, ລວມທັງ ທວີດເທີ, ເຟສບຸກ, ເກມທີ່ເໝືອນຈິງ, ແລະ ອື່ນໆອີກຫລາຍຢ່າງ. ຄວາມກ້າວໜ້າທາງດ້ານເທັກໂນໂລຈີກໍໜ້າປະຫລາດໃຈ, ແຕ່ຖ້າຫາກເຮົາບໍ່ລະວັງໃຫ້ດີ, ມັນສາມາດລົບກວນເຮົາຈາກການບັນລຸສັກກະຍະພາບແຫ່ງສະຫວັນຂອງເຮົາໄດ້. ການນຳໃຊ້ສິ່ງເຫລົ່ານີ້ຢ່າງຖືກຕ້ອງສາມາດນຳພະລັງຈາກສະຫວັນມາໃຫ້ ແລະ ອະນຸຍາດໃຫ້ເຮົາເປັນພະຍານເຖິງສິ່ງມະຫັດສະຈັນ ຂະນະທີ່ເຮົາສະແຫວງຫາທີ່ຈະເຕົ້າໂຮມອິດສະຣາເອນ ທີ່ກະຈັດກະຈາຍໄປ ຢູ່ທັງສອງຟາກມ່ານ.

ຂໍໃຫ້ເຮົາຈົ່ງລະມັດລະວັງ ແລະ ບໍ່ລະເລີຍໃນການໃຊ້ເທັກໂນໂລຈີ.⁸ ຂໍໃຫ້ສະແຫວງຫາວິທີທີ່ເທັກໂນໂລຈີ ຈະສາມາດນຳເຮົາໃຫ້ເຂົ້າໃກ້ພຣະຜູ້ຊ່ວຍໃຫ້ລອດຫລາຍກວ່າເກົ່າ ແລະ ຊ່ວຍໃຫ້ເຮົາສຳເລັດວຽກງານຂອງພຣະອົງ ຂະນະທີ່ເຮົາກະກຽມສຳລັບການສະເດັດມາຄັ້ງທີສອງຂອງພຣະອົງ.

ການທໍ້ຖອຍໃຈ

ສຸດທ້າຍ, ຜູ້ປໍລະປັກຢາກໃຫ້ເຮົາທໍ້ຖອຍໃຈ. ເຮົາອາດທໍ້ຖອຍໃຈເມື່ອເຮົາປຽບທຽບຕົວເຮົາເອງກັບຄົນອື່ນ ຫລື ຮູ້ສຶກວ່າບໍ່ດີພໍຕາມຄວາມຄາດຫວັງຂອງຄົນອື່ນ, ລວມທັງຄວາມຄາດຫວັງຂອງເຮົາເອງ.

ຕອນຂ້າພະເຈົ້າໄດ້ເລີ່ມຕົ້ນໂຄງການສຶກສາລະດັບປະລິນຍາເອກ, ຂ້າພະເຈົ້າໄດ້ຮູ້ສຶກທໍ້ຖອຍໃຈ. ໂຄງການນັ້ນຮັບເອົາພຽງແຕ່ນັກສຶກສາສີ່ຄົນໃນປີນັ້ນ, ແລະ ຄົນອື່ນໆກໍສະຫລາດຫລັກແຫລມຫລາຍ. ເຂົາເຈົ້າໄດ້ມີຄະແນນທີ່ສູງກວ່າ ແລະ ມີປະສົບການໃນຕຳແໜ່ງຫົວໜ້ວຄວບຄຸມ, ແລະ ເຂົາເຈົ້າມີຄວາມໝັ້ນໃຈສູງໃນຄວາມສາມາດຂອງຕົນ. ຫລັງຈາກສອງອາທິດໃນໂຄງການນັ້ນ, ຄວາມຮູ້ສຶກທໍ້ຖອຍໃຈ ແລະ ຄວາມສົງໃສກໍໄດ້ເລີ່ມເຂົ້າມາເຮັດໃຫ້ຂ້າພະເຈົ້າອຸກອັ່ງໃຈ, ຂ້າພະເຈົ້າເກືອບທົນບໍ່ໄຫວ.

ຂ້າພະເຈົ້າໄດ້ຕັດສິນໃຈວ່າ ຖ້າຫາກຂ້າພະເຈົ້າຈະສຳເລັດໂຄງການນີ້ໄດ້ພາຍໃນສີ່ປີ, ຂ້າພະເຈົ້າຄວນອ່ານພຣະຄຳພີມໍມອນໃຫ້ຈົບທຸກໆເທີມ. ແຕ່ລະວັນຂະນະທີ່ຂ້າພະເຈົ້າໄດ້ອ່ານ, ຂ້າພະເຈົ້າໄດ້ຮັບຮູ້ການປະກາດຂອງພຣະຜູ້ຊ່ວຍໃຫ້ລອດທີ່ວ່າ ພຣະວິນຍານບໍລິສຸດຈະສອນຂ້າພະເຈົ້າເຖິງທຸກສິ່ງ ແລະ ຈະນຳທຸກສິ່ງມາສູ່ຄວາມຊົງຈຳຂອງຂ້າພະເຈົ້າ.⁹ ມັນໄດ້ຢືນຢັນອີກວ່າ ຂ້າພະເຈົ້າເປັນບຸດຂອງພຣະເຈົ້າ, ເຕືອນໃຈຂ້າພະເຈົ້າວ່າ ບໍ່ໃຫ້ປຽບທຽບຕົວເອງກັບຄົນອື່ນ, ແລະ ໃຫ້ຂ້າພະເຈົ້າມີຄວາມໝັ້ນໃຈ ໃນບົດບາດແຫ່ງສະຫວັນຂອງຂ້າພະເຈົ້າ ທີ່ຈະປະສົບຜົນສຳເລັດ.¹⁰

ເພື່ອນທີ່ຮັກແພງທັງຫລາຍຂອງຂ້າພະເຈົ້າ, ຢ່າປ່ອຍໃຫ້ຄົນໃດມາລັກເອົາຄວາມສຸກຂອງທ່ານໄປ. ຢ່າປຽບທຽບຕົວເອງກັບຄົນອື່ນ. ຂໍໃຫ້ຈື່ຈຳພຣະຄຳແຫ່ງຄວາມຮັກຂອງພຣະຜູ້ຊ່ວຍໃຫ້ລອດ ທີ່ວ່າ: “ເຮົາມອບ “ສັນຕິສຸກ ໄວ້ກັບພວກເຈົ້າ, ເປັນ ສັນຕິສຸກ ຂອງເຮົາ, ທີ່ເຮົາມອບໃຫ້ພວກເຈົ້າ, ສັນຕິສຸກທີ່ເຮົາໃຫ້ນັ້ນ: ບໍ່ເໝືອນສັນຕິສຸກທີ່ໂລກໃຫ້. ຢ່າວຸ້ນວາຍ ເປັນທຸກໃຈ, ແລະ ຢ່າສູ່ຢ້ານ.”¹¹

ສະນັ້ນ ເຮົາຈະເຮັດແນວໃດ? ເຮົາຈະພົບເຫັນສັນຕິສຸກນີ້, ຈື່ຈຳວ່າເຮົາເປັນໃຜ, ແລະ ເອົາຊະນະຄວາມຮູ້ສຶກໃນສຳນວນສາມຢ່າງຂອງຜູ້ປໍລະປັກໄດ້ແນວໃດ?

ທຳອິດ, ຂໍໃຫ້ຈື່ຈຳວ່າ ພຣະບັນຍັດຂໍ້ໃຫຍ່ ແລະ ຂໍ້ຕົ້ນ ແມ່ນທີ່ຈະຮັກພຣະເຈົ້າດ້ວຍສຸດໃຈ, ພະລັງ, ຄວາມນຶກຄິດ, ແລະ ກຳລັງຂອງເຮົາ.¹² ທຸກສິ່ງທີ່ເຮົາເຮັດລົງໄປຄວນຖືກກະຕຸ້ນໂດຍຄວາມຮັກທີ່ເຮົາມີໃຫ້ແກ່ພຣະອົງ ແລະ ພຣະບຸດຂອງພຣະອົງ. ເມື່ອເຮົາພັດທະນາຄວາມຮັກທີ່ເຮົາມີໃຫ້ແກ່ພວກພຣະອົງ ໂດຍການຮັກສາພຣະບັນຍັດຂອງພວກພຣະອົງ, ແລ້ວຄວາມສາມາດຂອງເຮົາທີ່ຈະຮັກຕົນເອງ ແລະ ຮັກຄົນອື່ນ ຈະເພີ່ມທະວີຂຶ້ນ. ເຮົາຈະເລີ່ມຮັບໃຊ້ຄອບຄົວ, ໝູ່ເພື່ອນ, ແລະ ເພື່ອນບ້ານ ເພາະເຮົາຈະເຫັນເຂົາເຈົ້າດັ່ງທີ່ພຣະຜູ້ຊ່ວຍໃຫ້ລອດເຫັນເຂົາເຈົ້າ—ໃນຖານະບຸດ ແລະ ທິດາຂອງພຣະເຈົ້າ.¹³

ສອງ, ຂໍໃຫ້ອະທິຖານຫາພຣະບິດາໃນພຣະນາມຂອງພຣະເຢຊູຄຣິດທຸກໆວັນ, ທຸກໆວັນ, ທຸກໆວັນ.¹⁴ ຜ່ານທາງການອະທິຖານ ເຮົາສາມາດຮູ້ສຶກເຖິງຄວາມຮັກຂອງພຣະເຈົ້າ ແລະ ສະແດງຄວາມຮັກຂອງເຮົາທີີ່ມີໃຫ້ແກ່ພຣະອົງ. ຜ່ານທາງການອະທິຖານ ເຮົາສະແດງຄວາມກະຕັນຍູ ແລະ ທູນຂໍພະລັງ ແລະ ຄວາມກ້າຫານ ທີ່ຈະຍອມຕໍ່ພຣະປະສົງຂອງພຣະເຈົ້າ ແລະ ໄດ້ຮັບການຊີ້ນຳ ແລະ ການນຳພາໃນທຸກສິ່ງ.

ຂ້າພະເຈົ້າຂໍຊຸກຍູ້ທ່ານໃຫ້ “ອະທິຖານ ຫາພຣະບິດາດ້ວຍສຸດພະລັງແຫ່ງໃຈ, ເພື່ອທ່ານຈະເຕັມໄປດ້ວຍຄວາມຮັກນີ້, … ເພື່ອທ່ານຈະໄດ້ກາຍເປັນບຸດ [ແລະ ທິດາ] ຂອງພຣະເຈົ້າ; ເພື່ອວ່າເມື່ອພຣະອົງສະເດັດມາ ເຮົາຈະ ເປັນ ເໝືອນດັ່ງພຣະອົງ.”¹⁵

ສາມ, ຂໍໃຫ້ອ່ານ ແລະ ສຶກສາພຣະຄຳພີມໍມອນທຸກໆວັນ, ທຸກໆວັນ, ທຸກໆວັນ.¹⁶ ການສຶກສາພຣະຄຳພີມໍມອນຂອງຂ້າພະເຈົ້າມັກຈະດີຂຶ້ນເລື້ອຍໆ ເມື່ອຂ້າພະເຈົ້າອ່ານມັນດ້ວຍຄຳຖາມຢູ່ໃນໃຈ. ເມື່ອເຮົາອ່ານດ້ວຍຄຳຖາມ, ເຮົາສາມາດໄດ້ຮັບການເປີດເຜີຍ ແລະ ຮັບຮູ້ວ່າ ສາດສະດາໂຈເຊັບ ສະມິດ ໄດ້ກ່າວຄວາມຈິງ ເມື່ອເພິ່ນໄດ້ປະກາດວ່າ, “ພຣະຄຳພີມໍມອນ [ເປັນ] ໜັງສືທີ່ຖືກຕ້ອງທີ່ສຸດໃນໂລກ ເໜືອກວ່າໜັງສືໃດໆ, … ແລະ ມະນຸດທຸກຄົນ [ທັງຊາຍ ແລະ ຍິງຈະ] ເຂົ້າໃກ້ພຣະເຈົ້າຫລາຍກວ່າເກົ່າ ໂດຍການປະຕິບັດຕາມຄຳສັ່ງສອນຂອງໜັງສືນີ້, ຫລາຍກວ່າປະຕິບັດຕາມໜັງສືເຫລັ້ມອື່ນໆ.”¹⁷ ພຣະຄຳພີມໍມອນບັນຈຸພຣະຄຳຂອງພຣະຄຣິດ ແລະ ຊ່ວຍເຮົາໃຫ້ຈື່ຈຳວ່າ ເຮົາເປັນໃຜ.

ທ້າຍສຸດ, ຂໍໃຫ້ຮັບສ່ວນສິນລະລຶກດ້ວຍການອະທິຖານທຸກໆອາທິດ, ທຸກໆອາທິດ, ທຸກໆອາທິດ. ມັນແມ່ນຜ່ານທາງພັນທະສັນຍາ ແລະ ພິທີການຂອງຖານະປະໂລຫິດ, ລວມທັງສິນລະລຶກ, ທີ່ອຳນາດຂອງຄວາມເປັນເໝືອນພຣະເຈົ້າ ຈະສະແດງໃຫ້ປະຈັກຢູ່ໃນຊີວິດຂອງເຮົາ.¹⁸ ແອວເດີ ເດວິດ ເອ ແບ໊ດນາ ໄດ້ສິດສອນວ່າ: “ພິທີສິນລະລຶກເປັນການເຊື້ອເຊີນທີ່ສັກສິດ ແລະ ຊ້ຳເກົ່າ ເພື່ອໃຫ້ກັບໃຈຢ່າງຈິງໃຈ ແລະ ເກີດໃໝ່ທາງວິນຍານ. ພຽງແຕ່ການຮັບສ່ວນສິນລະລຶກເທົ່ານັ້ນ, ຈະບໍ່ປົດບາບ. ແຕ່ຖ້າຫາກເຮົາກະກຽມ ແລະ ມີສ່ວນຮ່ວມໃນພິທີການທີ່ສັກສິດນີ້ ດ້ວຍໃຈອັນຊອກຊ້ຳ ແລະ ວິນຍານທີ່ສຳນຶກຜິດ, ແລ້ວເຮົາຈະໄດ້ຮັບຕາມທີ່ຖືກສັນຍາໄວ້ວ່າ ເຮົາຈະມີພຣະວິນຍານຂອງພຣະຜູ້ເປັນເຈົ້າສະຖິດຢູ່ນຳ ຕະຫລອດເວລາ.”¹⁹

ເມື່ອເຮົາຮັບສ່ວນສິນລະລຶກຢ່າງຖ່ອມໃຈ, ເຮົາຈື່ຈຳຄວາມທຸກທໍລະມານຂອງພຣະເຢຊູ ຢູ່ໃນສວນສັກສິດ ທີ່ເອີ້ນວ່າ ເຄັດເຊມາເນ ແລະ ການເສຍສະລະຂອງພຣະອົງຢູ່ເທິງໄມ້ກາງແຂນ. ເຮົາສະແດງຄວາມກະຕັນຍູຕໍ່ພຣະບິດາ ທີ່ໄດ້ສົ່ງພຣະບຸດອົງດຽວທີ່ຖືກຳເນີດຂອງພຣະອົງ, ພຣະຜູ້ໄຖ່ຂອງເຮົາມາ, ແລະ ສະແດງຄວາມເຕັມໃຈຂອງເຮົາ ທີ່ຈະຮັກສາພຣະບັນຍັດຂອງພຣະອົງ ແລະ ລະນຶກເຖິງພຣະອົງຕະຫລອດເວລາ.²⁰ ມີຄວາມຮູ້ແຈ້ງທາງວິນຍານທີ່ກ່ຽວພັນກັບສິນລະລຶກ—ມັນເປັນເລື່ອງສ່ວນຕົວ, ມັນມີພະລັງ, ແລະ ມັນຈຳເປັນ.

ເພື່ອນທັງຫລາຍຂອງຂ້າພະເຈົ້າ, ຂ້າພະເຈົ້າສັນຍາວ່າ ຂະນະທີ່ເຮົາພະຍາຍາມຈົນສຸດໃຈຂອງເຮົາ, ຈົ່ງອະທິຖານໃນພຣະນາມຂອງພຣະເຢຊູຄຣິດ, ສຶກສາພຣະຄຳພີມໍມອນ, ແລະ ຮັບສ່ວນສິນລະລຶກດ້ວຍຄຳອະທິຖານ, ແລ້ວເຮົາຈະມີຄວາມສາມາດ, ພ້ອມດ້ວຍຄວາມເຂັ້ມແຂງຂອງພຣະຜູ້ເປັນເຈົ້າ, ທີ່ຈະເອົາຊະນະຍຸດທະວິທີ ການຫລອກລວງ ຂອງຜູ້ປໍລະປັກ, ເພື່ອເຮັດໃຫ້ ການລົບກວນ ໜ້ອຍລົງ ທີ່ຈຳກັດສັກກະຍະພາບແຫ່ງສະຫວັນຂອງ, ແລະ ຕໍ່ຕ້ານ ການທໍ້ຖອຍໃຈ ທີ່ເຮັດໃຫ້ຄວາມສາມາດຂອງເຮົາມີໜ້ອຍ ທີ່ຈະຮູ້ສຶກເຖິງຄວາມຮັກຂອງພຣະບິດາເທິງສະຫວັນຂອງເຮົາ ແລະ ພຣະບຸດຂອງພຣະອົງ. ເຮົາຈະເຂົ້າໃຈ ຢ່າງເຕັມທີ່ ວ່າເຮົາເປັນໃຜ ໃນຖານະບຸດ ແລະ ທິດາຂອງພຣະເຈົ້າ.

ອ້າຍເອື້ອຍນ້ອງທັງຫລາຍ, ຂ້າພະເຈົ້າຂໍແບ່ງປັນຄວາມຮັກຂອງຂ້າພະເຈົ້າໃຫ້ທ່ານ ແລະ ປະກາດພະຍານຂອງຂ້າພະເຈົ້າແກ່ທ່ານ ວ່າຂ້າພະເຈົ້າຮູ້ວ່າ ພຣະບິດາເທິງສະຫວັນຊົງພຣະຊົນຢູ່ ແລະ ວ່າພຣະເຢຊູ ຄືພຣະຄຣິດ. ຂ້າພະເຈົ້າຮັກພວກພຣະອົງ. ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ເປັນອານາຈັກຂອງພຣະເຈົ້າຢູ່ເທິງແຜ່ນດິນໂລກ. ເຮົາມີ ການກຳນົດແຫ່ງສະຫວັນ ທີ່ຈະເຕົ້າໂຮມອິດສະຣາເອນ ແລະ ກະກຽມໂລກສຳລັບການສະເດັດມາຄັ້ງທີສອງຂອງພຣະເມຊີອາ. ໃນພຣະນາມຂອງພຣະເຢຊູຄຣິດ, ອາແມນ.