ພະຍານ, ກຸ່ມຖານະປະໂລຫິດແຫ່ງອາໂຣນ, ແລະ ຫ້ອງຮຽນກຸ່ມຍິງໜຸ່ມ

ໂດຍ ປະທານຣະໂຊ ເອັມ ແນວສັນ

ການປ່ຽນແປງທີ່ພວກເຮົາຈະປະກາດໃນເວລານີ້ ຈະຊ່ວຍກຸ່ມຊາຍໜຸ່ມ ແລະ ກຸ່ມຍິງໜຸ່ມ ໃຫ້ພັດທະນາສັກກະຍະພາບສ່ວນຕົວທີ່ສັກສິດຂອງເຂົາເຈົ້າ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າດີໃຈຫລາຍທີ່ໄດ້ມາຮ່ວມກັບທ່ານ ໃນກອງປະຊຸມໃຫຍ່ສາມັນມື້ນີ້. ໃນຕົ້ນອາທິດນີ້, ໄດ້ມີການປະກາດຕໍ່ສະມາຊິກຂອງສາດສະໜາຈັກ ເລື່ອງການປ່ຽນແປງນະໂຍບາຍ ກ່ຽວກັບຜູ້ທີ່ສາມາດຮັບໃຊ້ເປັນພະຍານ ຢູ່ໃນພິທີການບັບຕິສະມາ ແລະ ການຜະນຶກ. ຂ້າພະເຈົ້າຂໍເນັ້ນສາມຈຸດເຫລົ່ານັ້ນ.

ໃນການບັບຕິສະມາແທນຜູ້ທີ່ລ່ວງລັບໄປແລ້ວ ຈະໃຫ້ຜູ້ໃດເປັນພະຍານກໍໄດ້ ທີ່ມີໃບຮັບຮອງເຂົ້າພຣະວິຫານທີ່ໃຊ້ການໄດ້, ລວມທັງໃບຮັບຮອງເຂົ້າພຣະວິຫານທີ່ຊົ່ວຄາວ.
ສະມາຊິກຄົນໃດກໍໄດ້ ທີ່ໄດ້ຮັບຂອງປະທານສັກສິດແລ້ວ ພ້ອມທັງມີໃບຮັບຮອງເຂົ້າພຣະວິຫານທີ່ໃຊ້ການໄດ້ ສາມາດຮັບໃຊ້ເປັນພະຍານ ສຳລັບພິທີການຜະນຶກຜູ້ທີ່ຍັງມີຊີວິດຢູ່ ແລະ ການຜະນຶກແທນ.
ສະມາຊິກຂອງສາດສະໜາຈັກຄົນໃດກໍໄດ້ ທີ່ໄດ້ຮັບບັບຕິສະມາແລ້ວ ສາມາດຮັບໃຊ້ເປັນພະຍານ ຢູ່ທີ່ພິທີການບັບຕິສະມາສຳລັບຜູ້ທີ່ຍັງມີຊີວິດຢູ່. ການປ່ຽນແປງນີ້ແມ່ນກ່ຽວກັບການບັບຕິສະມາທັງໝົດ ທີ່ຢູ່ນອກພຣະວິຫານ.

ການປ່ຽນແປງນະໂຍບາຍເຫລົ່ານີ້ ແມ່ນເປັນໄປຕາມລະບຽບການ. ຄຳສອນພື້ນຖານ ແລະ ພັນທະສັນຍາ ຍັງເໝືອນເດີມ. ມັນມີປະສິດທິພາບເທົ່າທຽມກັນ ໃນພິທີການທັງໝົດ. ການປ່ຽນແປງດັ່ງກ່າວ ຄວນສົ່ງເສີມຄອບຄົວໃຫ້ມີສ່ວນຮ່ວມ ໃນພິທີການເຫລົ່ານີ້.

ຂ້າພະເຈົ້າຂໍກ່າວກັບທ່ານ ໃນເວລານີ້ ເພື່ອແຈ້ງໃຫ້ຮູ້ກ່ຽວກັບການປ່ຽນແປງ ທີ່ກ່ຽວຂ້ອງກັບຊາວໜຸ່ມຂອງພວກເຮົາ ແລະ ຜູ້ນຳຂອງເຂົາເຈົ້າ.

ທ່ານຄົງຈື່ໄດ້ວ່າ ຂ້າພະເຈົ້າໄດ້ເຊື້ອເຊີນຊາວໜຸ່ມຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ໃຫ້ເຂົ້າຮ່ວມກອງທັບຊາວໜຸ່ມຂອງພຣະຜູ້ເປັນເຈົ້າ ເພື່ອມີສ່ວນຮ່ວມໃນອຸດົມການທີ່ຍິ່ງໃຫຍ່ທີ່ສຸດ ຢູ່ໃນໂລກທຸກວັນນີ້—ນັ້ນຄື ການເຕົ້າໂຮມອິດສະຣາເອນ.¹ ຂ້າພະເຈົ້າໄດ້ເຊື້ອເຊີນຊາວໜຸ່ມຂອງພວກເຮົາ ເພາະເຂົາເຈົ້າມີພອນສະຫວັນພິເສດ ໃນການເອື້ອມອອກໄປຫາຄົນອື່ນ ແລະ ແບ່ງປັນສິ່ງທີ່ເຂົາເຈົ້າເຊື່ອ ໃນວິທີທາງທີ່ໜ້າເຊື່ອຖືໄດ້. ອຸດົມການເຕົ້າໂຮມເປັນພາກສ່ວນຈຳເປັນຂອງການຊ່ວຍກະກຽມໂລກນີ້ ແລະ ຜູ້ຄົນທັງຫລາຍ ສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ.

ໃນແຕ່ລະຫວອດ, ກອງທັບຊາວໜຸ່ມຈະຖືກນຳພາໂດຍອະທິການ, ຜູ້ຮັບໃຊ້ທີ່ອຸທິດຕົນຂອງພຣະຜູ້ເປັນເຈົ້າ. ໜ້າທີ່ຮັບຜິດຊອບທຳອິດ ແລະ ສຳຄັນທີ່ສຸດຂອງເພິ່ນຄື ທີ່ຈະດູແລຊາຍໜຸ່ມ ແລະ ຍິງໜຸ່ມ ຂອງຫວອດເພິ່ນ. ອະທິການ ແລະ ທີ່ປຶກສາຂອງເພິ່ນ ຈະຄວບຄຸມວຽກງານຂອງກຸ່ມຖານະປະໂລຫິດແຫ່ງອາໂຣນ ແລະ ຫ້ອງຮຽນກຸ່ມຍິງໜຸ່ມ ຢູ່ໃນຫວອດ.

ການປ່ຽນແປງທີ່ພວກເຮົາຈະປະກາດໃນເວລານີ້ ຈະຊ່ວຍກຸ່ມຊາຍໜຸ່ມ ແລະ ກຸ່ມຍິງໜຸ່ມ ໃຫ້ພັດທະນາສັກກະຍະພາບສ່ວນຕົວທີ່ສັກສິດຂອງເຂົາເຈົ້າ. ພວກເຮົາກໍຢາກເພີ່ມຄວາມເຂັ້ມແຂງໃຫ້ແກ່ກຸ່ມຖານະປະໂລຫິດແຫ່ງອາໂຣນ ແລະ ຫ້ອງຮຽນກຸ່ມຍິງໜຸ່ມນຳອີກ ແລະ ສະໜັບສະໜູນອະທິການ ແລະ ຜູ້ນຳຜູ້ໃຫຍ່ຄົນອື່ນໆ ຂະນະທີ່ເຂົາເຈົ້າຮັບໃຊ້ຄົນລຸ້ນໃໝ່.

ບັດນີ້ ແອວເດີ ຄວິນຕິນ ແອວ ຄຸກ ຈະກ່າວເຖິງການປ່ຽນແປງ ທີ່ກ່ຽວຂ້ອງກັບກຸ່ມຊາຍໜຸ່ມ. ແລະ ຕອນແລງມື້ນີ້, ຢູ່ໃນກອງປະຊຸມພາກສະຕີ, ຊິດສະເຕີ ບອນນີ ເອັຈ ຄໍດອນ, ປະທານອົງການຍິງໜຸ່ມສາມັນ, ຈະກ່າວເຖິງການປ່ຽນແປງທີ່ກ່ຽວຂ້ອງກັບກຸ່ມຍິງໜຸ່ມ.

ຝ່າຍປະທານສູງສຸດ ແລະ ອັກຄະສາວົກສິບສອງ ໄດ້ເປັນນ້ຳໜຶ່ງໃຈດຽວກັນໃນການຮັບຮອງ ໂຄງການເຫລົ່ານີ້ ເພື່ອເພີ່ມຄວາມເຂັ້ມແຂງໃຫ້ແກ່ຊາວໜຸ່ມຂອງພວກເຮົາ. ພວກເຮົາຮັກເຂົາເຈົ້າຫລາຍ ແລະ ກໍອະທິຖານເພື່ອເຂົາເຈົ້າ! ເຂົາເຈົ້າເປັນ “ຄວາມຫວັງຂອງອິດສະຣາເອນ, ກອງທັບຊີໂອນ, ເຜົ່າພັນຂອງວັນທີ່ສັນຍາ.”² ພວກເຮົາຂໍສະແດງຄວາມໝັ້ນໃຈຫລາຍທີ່ສຸດໃນກຸ່ມຊາວໜຸ່ມຂອງພວກເຮົາ ແລະ ສະແດງຄວາມຮູ້ບຸນຄຸນຕໍ່ເຂົາເຈົ້າ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.