ການປ່ຽນແປງເພື່ອເພີ່ມຄວາມເຂັ້ມແຂງໃຫ້ແກ່ຊາວໜຸ່ມ

ໂດຍ ແອວເດີ ຄວິນຕິນ ແອວ ຄຸກ

ແຫ່ງກຸ່ມອັກຄະສາວົກສິບສອງ

ຊາຍໜຸ່ມ ແລະ ຍິງໜຸ່ມຫລາຍຄົນຈະລຸກຂຶ້ນປະເຊີນໜ້າກັບການທ້າທາຍ ແລະ ຢູ່ໃນເສັ້ນທາງແຫ່ງພັນທະສັນຍາ ເພາະການເອົາໃຈໃສ່ຢ່າງໃກ້ຊິດນີ້ ຕໍ່ຊາວໜຸ່ມຂອງພວກເຮົາ.

ຂອບໃຈຫລາຍໆ, ປະທານແນວສັນທີ່ຮັກແພງ, ສຳລັບການນຳພາໂດຍການເປີດເຜີຍທີ່ໜ້າປິຕິຍິນດີນັ້ນ ກ່ຽວກັບ ພະຍານຢູ່ທີ່ພິທີບັບຕິສະມາ ແລະ ສຳລັບການຊີ້ນຳທີ່ທ່ານມອບໝາຍໃຫ້ພວກເຮົາແບ່ງປັນ ເພື່ອຊ່ວຍເພີ່ມຄວາມເຂັ້ມແຂງໃຫ້ແກ່ຊາວໜຸ່ມ ແລະ ພັດທະນາສັກກະຍະພາບທີ່ສັກສິດຂອງເຂົາເຈົ້າ.

ກ່ອນທີ່ຂ້າພະເຈົ້າຈະກ່າວກ່ຽວກັບການປ່ຽນແປງເຫລົ່ານັ້ນ, ພວກເຮົາຂໍສະແດງຄວາມຮູ້ບຸນຄຸນດ້ວຍຄວາມຈິງໃຈ ສຳລັບການຕອບຮັບຂອງສະມາຊິກໃນວິທີທີ່ເກີນຄາດໝາຍ ຕໍ່ການພັດທະນາທີ່ຕໍ່ເນື່ອງໃນການຟື້ນຟູພຣະກິດຕິຄຸນ. ຕາມທີ່ປະທານ ແນວສັນ ໄດ້ແນະນຳປີກາຍນີ້, ຊ່ຳກັບວ່າທ່ານໄດ້ກິນຢາວິຕາມິນ ເນາະ!¹

ທ່ານໄດ້ສຶກສາປຶ້ມ ຈົ່ງຕາມເຮົາມາ ຢູ່ທີ່ບ້ານ² ດ້ວຍຄວາມຊື່ນຊົມ. ທ່ານກໍໄດ້ຮັບເອົາການປ່ຽນແປງຢູ່ທີ່ໂບດນຳອີກ. ສະມາຊິກໃນກຸ່ມແອວເດີ ແລະ ເອື້ອຍນ້ອງສະມາຄົມສະຕີສົງເຄາະ ກໍໄດ້ເປັນນ້ຳໜຶ່ງໃຈດຽວກັນ ໃນການເຮັດວຽກງານແຫ່ງຄວາມລອດ.³

ພວກເຮົາມີຄວາມກະຕັນຍູຢ່າງລົ້ນເຫລືອ.⁴ ພວກເຮົາກໍກະຕັນຍູຫລາຍຕໍ່ຊາວໜຸ່ມຂອງພວກເຮົາໂດຍສະເພາະ ທີ່ຍັງເຂັ້ມແຂງ ແລະ ຊື່ສັດເໝືອນເດີມ.

ຊາວໜຸ່ມຂອງພວກເຮົາມີຊີວິດຢູ່ໃນຊ່ວງເວລາທີ່ໜ້າຕື່ນເຕັ້ນ ແຕ່ກໍມີການທ້າທາຍນຳອີກ. ມີຫລາຍສິ່ງຫລາຍຢ່າງໃຫ້ເລືອກ ຫລາຍກວ່າທີ່ຜ່ານມາ. ຍົກຕົວຢ່າງ: ມືຖືທີ່ທັນສະໄໝ ກໍມີຂໍ້ມູນທີ່ສຳຄັນ ແລະ ເຊີດຊູໃຈ ຈົນໜ້າເຫລືອເຊື່ອ, ລວມທັງປະຫວັດຄອບຄົວ ແລະ ພຣະຄຳພີທີ່ສັກສິດ. ກົງກັນຂ້າມ, ມັນກໍມີເລື່ອງທີ່ໂງ່ຈ້າ, ຜິດສິນທຳ, ແລະ ຊົ່ວຮ້າຍ ບັນຈຸຢູ່ໃນນັ້ນຄືກັນ ຊຶ່ງບໍ່ເຄີຍເປີດເຜີຍມາກ່ອນ.

ຮູບພາບ

ຫລັກສູດການເຮັດໃຫ້ບ້ານເຮືອນເປັນສູນກາງ

ຮູບພາບ

ກິດຈະກຳຂອງຊາວໜຸ່ມ

ເພື່ອຊ່ວຍຊາວໜຸ່ມຂອງພວກເຮົາໃຫ້ເລືອກໃຊ້ສິ່ງເຫລົ່ານີ້ຢ່າງຖືກຕ້ອງ, ສາດສະໜາຈັກຈຶ່ງໄດ້ຈັດຕັ້ງໂຄງການລິເລີ່ມສາມຢ່າງ ທີ່ເລິກຊຶ້ງ ແລະ ເຂົ້າໃຈງ່າຍ. ຢ່າງທຳອິດ, ຫລັກສູດໄດ້ຖືກດັດແປງໃຫ້ດີຂຶ້ນກວ່າເກົ່າ ແລະ ຂະຫຍາຍໄປເຖິງບ້ານເຮືອນ. ຢ່າງທີສອງ, ໂຄງການສຳລັບເດັກນ້ອຍ ແລະ ຊາວໜຸ່ມ ຊຶ່ງຮ່ວມດ້ວຍກິດຈະກຳທີ່ໜ້າສົນໃຈ ແລະ ການພັດທະນາສ່ວນຕົວ ໄດ້ຖືກນຳສະເໜີ ໃນວັນອາທິດແລ້ວນີ້ ໂດຍປະທານຣະໂຊ ເອັມ ແນວສັນ, ປະທານເອັມ ຣະໂຊ ບາເລີດ, ແລະ ເຈົ້າໜ້າທີ່ສາມັນ. ໂຄງການລິເລີ່ມຢ່າງທີສາມ ແມ່ນການປ່ຽນແປງການຈັດຕັ້ງ ເພື່ອເຮັດໃຫ້ກຸ່ມຊາວໜຸ່ມ ເປັນຈຸດສຸມຂອງອະທິການ ແລະ ຜູ້ນຳຄົນອື່ນໆ. ຈຸດສຸມນີ້ຈະເປັນທາງວິນຍານທີ່ມີພະລັງ ແລະ ຊ່ວຍຊາວໜຸ່ມຂອງພວກເຮົາ ໃຫ້ກາຍເປັນກອງທັບຊາວໜຸ່ມ ທີ່ປະທານແນວສັນ ໄດ້ຂໍຮ້ອງເຂົາເຈົ້າໃຫ້ກາຍເປັນ.

ແບບແຜນທີ່ກ່ຽວພັນກັນ

ໂຄງການເຫລົ່ານີ້, ພ້ອມທັງສິ່ງທີ່ໄດ້ປະກາດໄປແລ້ວ ລະຫວ່າງເມື່ອບໍ່ຫລາຍປີຜ່ານມານີ້, ແມ່ນກ່ຽວພັນກັນ. ການປ່ຽນແປງແຕ່ລະຢ່າງ ກໍເປັນພາກສ່ວນທີ່ສຳຄັນຂອງແບບແຜນທີ່ກ່ຽວພັນກັນ ເພື່ອເປັນພອນໃຫ້ແກ່ໄພ່ພົນ ແລະ ກະກຽມເຂົາເຈົ້າເພື່ອພົບກັບພຣະເຈົ້າ.

ພາກສ່ວນໜຶ່ງຂອງແບບແຜນ ແມ່ນກ່ຽວກັບຄົນລຸ້ນໃໝ່. ຊາວໜຸ່ມຂອງພວກເຮົາໄດ້ຖືກຂໍໃຫ້ຮັບເອົາໜ້າທີ່ຮັບຜິດຊອບເປັນສ່ວນຕົວ ໃນໄວເຍົາ—ໂດຍທີ່ພໍ່ແມ່ ແລະ ຜູ້ນຳບໍ່ໄດ້ເຮັດແທນ ໃນສິ່ງທີ່ຊາວໜຸ່ມສາມາດເຮັດໄດ້ດ້ວຍຕົວເອງ.⁵

ການປະກາດ

ມື້ນີ້ ພວກເຮົາຂໍປະກາດການປ່ຽນແປງການຈັດຕັ້ງສຳລັບຊາວໜຸ່ມ ໃນລະດັບຫວອດ ແລະ ລະດັບສະເຕກ. ດັ່ງທີ່ປະທານແນວສັນ ໄດ້ອະທິບາຍ, ຊິດສະເຕີ ບອນນີ ເອັຈ ຄໍດອນ ຈະກ່າວເຖິງການປ່ຽນແປງສຳລັບກຸ່ມຍິງໜຸ່ມ ໃນຕອນແລງນີ້. ຈຸດປະສົງໜຶ່ງຂອງການປ່ຽນແປງ ທີ່ຂ້າພະເຈົ້າຈະກ່າວຕໍ່ໄປນີ້ ແມ່ນເພື່ອເພີ່ມຄວາມເຂັ້ມແຂງໃຫ້ແກ່ຜູ້ດຳລົງ, ໃຫ້ແກ່ກຸ່ມ, ແລະ ໃຫ້ແກ່ຝ່າຍປະທານກຸ່ມຖານະປະໂລຫິດແຫ່ງອາໂຣນ. ການປ່ຽນແປງນີ້ ຈະເຮັດໃຫ້ການປະຕິບັດຂອງເຮົາສອດຄ່ອງກັບ ຄຳສອນ ແລະ ພັນທະສັນຍາ 107:15, ທີ່ອ່ານວ່າ, “ຝ່າຍອະທິການເປັນຝ່າຍປະທານຂອງຖານະປະໂລຫິດ [ແຫ່ງອາໂຣນ] ນີ້, ຖືຂໍກະແຈ ຫລື ສິດອຳນາດຂອງຖານະປະໂລຫິດດັ່ງກ່າວ.”

ໜ້າທີ່ຢ່າງໜຶ່ງຂອງອະທິການຕາມພຣະຄຳພີແມ່ນ ເພື່ອຄວບຄຸມ ແລະ ນັ່ງຢູ່ໃນສະພາກັບພວກເຂົາ, ເພື່ອສິດສອນໜ້າທີ່ໃຫ້ພວກເຂົາ.⁶ ນອກເໜືອຈາກນີ້ແລ້ວ, ທີ່ປຶກສາທີໜຶ່ງໃນຝ່າຍອະທິການ ຈະມີໜ້າທີ່ຮັບຜິດຊອບສະເພາະຕໍ່ກຸ່ມຄູສອນ ແລະ ທີ່ປຶກສາທີສອງຕໍ່ກຸ່ມມັກຄະນາຍົກ.

ຕາມນັ້ນ, ເພື່ອໃຫ້ສອດຄ່ອງກັບການເປີດເຜີຍຢູ່ໃນ ຄຳສອນ ແລະ ພັນທະສັນຍາ, ຝ່າຍປະທານກຸ່ມຊາຍໜຸ່ມ ໃນລະດັບຫວອດຈະຖືກຍົກເລີກ. ອ້າຍນ້ອງທີ່ຊື່ສັດເຫລົ່ານີ້ ໄດ້ເຮັດຄວາມດີຢ່າງຫລວງຫລາຍ, ແລະ ພວກເຮົາຂໍສະແດງຄວາມຂອບໃຈນຳເຂົາເຈົ້າ.

ມັນເປັນຄວາມຫວັງຂອງພວກເຮົາທີ່ຈະໃຫ້ຝ່າຍອະທິການ ເນັ້ນໜັກ ແລະ ເອົາໃຈໃສ່ຕໍ່ໜ້າທີ່ຮັບຜິດຊອບຖານະປະໂລຫິດຂອງກຸ່ມຊາຍໜຸ່ມ ແລະ ຊ່ວຍເຂົາເຈົ້າໃນໜ້າທີ່ກຸ່ມຂອງເຂົາເຈົ້າ. ຜູ້ໃຫຍ່ທີ່ມີຄວາມສາມາດ ທີ່ເປັນຜູ້ໃຫ້ຄຳແນະນຳກຸ່ມຊາຍໜຸ່ມ ຈະຖືກເອີ້ນໃຫ້ເປັນຜູ້ຊ່ວຍຝ່າຍປະທານກຸ່ມຖານະປະໂລຫິດແຫ່ງອາໂຣນ ແລະ ຝ່າຍອະທິການ ໃນໜ້າທີ່ຂອງພວກເພິ່ນ.⁷ ພວກເຮົາໝັ້ນໃຈວ່າ ຊາຍໜຸ່ມ ແລະ ຍິງໜຸ່ມຫລາຍຄົນຈະລຸກຂຶ້ນປະເຊີນໜ້າກັບການທ້າທາຍ ແລະ ຢູ່ໃນເສັ້ນທາງແຫ່ງພັນທະສັນຍາ ເພາະການເອົາໃຈໃສ່ຢ່າງໃກ້ຊິດນີ້ ຕໍ່ຊາວໜຸ່ມຂອງພວກເຮົາ.

ໃນແບບແຜນທີ່ດົນໃຈຂອງພຣະຜູ້ເປັນເຈົ້າ, ອະທິການມີໜ້າທີ່ຮັບຜິດຊອບຕໍ່ທຸກຄົນຢູ່ໃນຫວອດ. ເພິ່ນເປັນພອນໃຫ້ແກ່ພໍ່ແມ່ຂອງຊາວໜຸ່ມ ທັງຊາວໜຸ່ມດ້ວຍ. ອະທິການຄົນໜຶ່ງໄດ້ພົບເຫັນວ່າ ຂະນະທີ່ເພິ່ນເວົ້າລົມກັບຊາຍໜຸ່ມຄົນໜຶ່ງຜູ້ທີ່ມີບັນຫາເລື່ອງການເບິ່ງຮູບພາບລາມົກ, ເພິ່ນຈະສາມາດຊ່ວຍເຫລືອຊາຍໜຸ່ມຄົນນັ້ນ ໃນການກັບໃຈຂອງລາວໄດ້ ພຽງແຕ່ເມື່ອເພິ່ນຊ່ວຍພໍ່ແມ່ຂອງລາວໃຫ້ປະພຶດດ້ວຍຄວາມຮັກ ແລະ ຄວາມເຂົ້າໃຈ. ການປິ່ນປົວຂອງຊາຍໜຸ່ມ ກໍເປັນການປິ່ນປົວຂອງຄອບຄົວລາວຄືກັນ ແລະ ເປັນໄປໄດ້ຜ່ານທາງອະທິການ ທີ່ທຳງານເພື່ອຕາງໜ້າໃຫ້ຄອບຄົວທັງໝົດ. ຕອນນີ້ ຊາຍໜຸ່ມຄົນນັ້ນໄດ້ກາຍເປັນຜູ້ດຳລົງຖານະປະໂລຫິດແຫ່ງເມນຄີເສເດັກທີ່ມີຄ່າຄວນ ແລະ ເປັນຜູ້ສອນສາດສະໜາເຕັມເວລາ.

ດັ່ງທີ່ເລື່ອງນີ້ແນະນຳ, ການປ່ຽນແປງເຫລົ່ານີ້ຈະ:

ຊ່ວຍອະທິການ ແລະ ທີ່ປຶກສາຂອງເພິ່ນ ໃຫ້ສຸມໃສ່ໜ້າທີ່ຮັບຜິດຊອບຫລັກຂອງພວກເພິ່ນ ຕໍ່ຊາວໜຸ່ມ ແລະ ເດັກນ້ອຍຊັ້ນປະຖົມໄວ.
ວາງອຳນາດ ແລະ ໜ້າທີ່ຂອງຖານະປະໂລຫິດແຫ່ງອາໂຣນໄວ້ຢູ່ທີ່ຈຸດໃຈກາງຊີວິດສ່ວນຕົວ ແລະ ເປົ້າໝາຍຂອງຊາຍໜຸ່ມ.

ການປ່ຽນແປງເຫລົ່ານີ້ກໍຍັງ:

ເນັ້ນໜັກເຖິງໜ້າທີ່ຮັບຜິດຊອບຂອງຝ່າຍປະທານກຸ່ມຖານະປະໂລຫິດແຫ່ງອາໂຣນ ແລະ ການລາຍງານໂດຍກົງຕໍ່ຝ່າຍອະທິການຂອງເຂົາເຈົ້ານຳອີກ.
ຈູງໃຈຜູ້ນຳຜູ້ໃຫຍ່ ໃຫ້ເປັນຜູ້ຊ່ວຍ ແລະ ເປັນຜູ້ແນະນຳຂອງຝ່າຍປະທານກຸ່ມຖານະປະໂລຫິດແຫ່ງອາໂຣນ ໃນການຂະຫຍາຍອຳນາດ ແລະ ສິດອຳນາດຂອງຕຳແໜ່ງຂອງເຂົາເຈົ້າ.

ຕາມທີ່ເຫັນ, ການປ່ຽນແປງເຫລົ່ານີ້ ບໍ່ໄດ້ລົດໜ້າທີ່ຮັບຜິດຊອບຂອງຝ່າຍອະທິການໃຫ້ໜ້ອຍລົງສຳລັບ ກຸ່ມຍິງໜຸ່ມ. ດັ່ງທີ່ປະທານແນວສັນ ຫາກໍໄດ້ສິດສອນວ່າ, “ໜ້າທີ່ຮັບຜິດຊອບທຳອິດ ແລະ ສຳຄັນທີ່ສຸດ [ຂອງອະທິການ] ຄື ທີ່ຈະດູແລຊາຍໜຸ່ມ ແລະ ຍິງໜຸ່ມ ຂອງຫວອດເພິ່ນ.”⁸

ອະທິການທີ່ເຮົາຮັກ ຜູ້ທຳງານຢ່າງຂະຫຍັນ ຈະບັນລຸໜ້າທີ່ຮັບຜິດຊອບນີ້ໄດ້ແນວໃດ? ດັ່ງທີ່ທ່ານຈື່ໄດ້, ໃນປີ 2018 ກຸ່ມຖານະປະໂລຫິດແຫ່ງເມນຄີເສເດັກ ໄດ້ຖືກປ່ຽນແປງ ເພື່ອໃຫ້ທຳງານຮ່ວມກັບສະມາຄົມສະຕີສົງເຄາະຢ່າງໃກ້ຊິດ ເພື່ອວ່າກຸ່ມແອວເດີ ແລະ ສະມາຄົມສະຕີສົງເຄາະ, ພາຍໃຕ້ການຊີ້ນຳຂອງອະທິການ, ຈະຊ່ວຍແບ່ງເບົາໜ້າທີ່ຮັບຜິດຊອບອັນສຳຄັນ ຊຶ່ງແຕ່ກ່ອນອະທິການໄດ້ໃຊ້ເວລານຳຫລາຍ. ໜ້າທີ່ຮັບຜິດຊອບເຫລົ່ານີ້ແມ່ນລວມທັງວຽກງານເຜີຍແຜ່ ແລະ ວຽກງານພຣະວິຫານ ແລະ ປະຫວັດຄອບຄົວ ຢູ່ໃນຫວອດ⁹—ພ້ອມທັງ ການປະຕິບັດສາດສະໜາກິດຕໍ່ສະມາຊິກຂອງຫວອດ.

ຮູບພາບ

ໜ້າທີ່ຮັບຜິດຊອບຂອງອະທິການ

ອະທິການ ບໍ່ສາມາດ ມອບໝາຍໜ້າທີ່ຮັບຜິດຊອບ, ດັ່ງເຊັ່ນ ການເພີ່ມຄວາມເຂັ້ມແຂງໃຫ້ແກ່ຊາວໜຸ່ມ, ການເປັນຜູ້ຕັດສິນທົ່ວໄປ, ການດູແລຄົນຂັດສົນ, ແລະ ການດູແລຝ່າຍການເງິນ ແລະ ວຽກການຝ່າຍໂລກ ໃຫ້ຄົນອື່ນດູແລແທນ. ເຖິງຢ່າງໃດກໍຕາມ, ສິ່ງເຫລົ່ານີ້ແມ່ນໜ້ອຍກວ່າທີ່ເຮົາເຄີຍເຂົ້າໃຈໃນອະດີດ. ດັ່ງທີ່ ແອວເດີ ແຈັບຟະຣີ ອາ ຮໍແລນ ໄດ້ອະທິບາຍປີກາຍນີ້ ຕອນປະກາດກ່ຽວກັບການປ່ຽນແປງຕໍ່ກຸ່ມຖານະປະໂລຫິດແຫ່ງເມນຄີເສເດັກ ທີ່ວ່າ: “ແນ່ນອນ, ອະທິການຍັງຄົງເປັນຜູ້ຄວບຄຸມກຸ່ມມະຫາປະໂລຫິດຂອງຫວອດຢູ່. ການປ່ຽນແປງໃໝ່ນີ້ [ຂອງກຸ່ມແອວເດີ ແລະ ສະມາຄົມສະຕີສົງເຄາະ] ຈະໃຫ້ອະທິການສາມາດຄວບຄຸມວຽກງານຂອງຖານະປະໂລຫິດແຫ່ງເມນຄີເສເດັກ ແລະ ສະມາຄົມສະຕີສົງເຄາະ ໂດຍທີ່ບໍ່ຕ້ອງເຮັດວຽກໃຫ້ທັງສອງກຸ່ມນີ້.”¹⁰

ຍົກຕົວຢ່າງ, ປະທານສະມາຄົມສະຕີສົງເຄາະ ແລະ ປະທານກຸ່ມແອວເດີ, ຕາມທີ່ຖືກມອບໝາຍ, ສາມາດຮັບເອົາບົດບາດທີ່ສູງກວ່າ ໃນການໃຫ້ຄຳແນະນຳແກ່ຜູ້ໃຫຍ່—ເຊັ່ນດຽວກັນກັບປະທານກຸ່ມຍິງໜຸ່ມ ສາມາດໃຫ້ຄຳແນະນຳແກ່ຍິງໜຸ່ມ. ຂະນະທີ່ອະທິການເປັນຄົນດຽວເທົ່ານັ້ນທີ່ສາມາດຮັບໃຊ້ເປັນຜູ້ຕັດສິນທົ່ວໄປ, ສ່ວນຜູ້ນຳຄົນອື່ນໆເຫລົ່ານີ້ ກໍສາມາດຮັບເອົາການເປີດເຜີຍຈາກສະຫວັນໄດ້ ເພື່ອຊ່ວຍກັບການທ້າທາຍຕ່າງໆ ທີ່ບໍ່ຈຳຕ້ອງເຂົ້າຫາຜູ້ຕັດສິນທົ່ວໄປ ຫລື ໃນສິ່ງທີ່ບໍ່ກ່ຽວພັນກັບການຂົ່ມເຫັງໃດໆ.¹¹

ແຕ່ກໍບໍ່ໄດ້ໝາຍຄວາມວ່າ ຍິງໜຸ່ມບໍ່ສາມາດ ຫລື ບໍ່ຄວນເວົ້າລົມກັບອະທິການ ຫລື ພໍ່ແມ່ຂອງເຂົາເຈົ້າ. ຈຸດສຸມຂອງພວກເພິ່ນແມ່ນຊາວໜຸ່ມ! ແຕ່ມັນໝາຍຄວາມວ່າ ຜູ້ນຳກຸ່ມຍິງໜຸ່ມອາດເປັນຜູ້ທີ່ເໝາະສົມຫລາຍທີ່ສຸດ ທີ່ຈະສະໜອງຄວາມຕ້ອງການຂອງຍິງໜຸ່ມແຕ່ລະຄົນ. ຝ່າຍອະທິການກໍມີຄວາມເປັນຫ່ວງເປັນໃຍກັບຍິງໜຸ່ມ ເທົ່າໆກັບຊາຍໜຸ່ມ, ແຕ່ພວກເຮົາຮັບຮູ້ເຖິງພະລັງທີ່ມາຈາກຜູ້ນຳກຸ່ມຍິງໜຸ່ມທີ່ເຂັ້ມແຂງ, ຫ້າວຫັນ, ເອົາໃຈໃສ່, ຮັກ, ແລະ ໃຫ້ຄຳແນະນຳ, ໂດຍທີ່ບໍ່ກ້າວກ່າຍບົດບາດຂອງຝ່າຍປະທານຫ້ອງ ແຕ່ຊ່ວຍຊາວໜຸ່ມໃຫ້ບັນລຸບົດບາດຂອງເຂົາເຈົ້າ.

ຊິດສະເຕີ ຄໍດອນ ຈະກ່າວເຖິງການປ່ຽນແປງເພີ່ມເຕີມທີ່ໜ້າຕື່ນເຕັ້ນ ສຳລັບກຸ່ມຍິງໜຸ່ມ ໃນຕອນແລງນີ້. ເຖິງຢ່າງໃດກໍຕາມ, ຂ້າພະເຈົ້າຂໍປະກາດວ່າ ຕໍ່ໄປນີ້ ປະທານກຸ່ມຍິງໜຸ່ມຂອງຫວອດ ຈະລາຍງານ ແລະ ປຶກສາຫາລືກັບອະທິການຂອງຫວອດໂດຍກົງ. ແຕ່ຜ່ານມາ, ການມອບໝາຍນີ້ ສາມາດໃຫ້ທີ່ປຶກສາເປັນຜູ້ເຮັດແທນໄດ້, ນັບຈາກນີ້ໄປ, ໜ້າທີ່ຮັບຜິດຊອບກຸ່ມຍິງໜຸ່ມໂດຍກົງ ຈະຕົກຢູ່ທີ່ຜູ້ດຳລົງຂໍກະແຈຄວບຄຸມຫວອດ. ປະທານສະມາຄົມສະຕີສົງເຄາະ ຈະລາຍງານຕໍ່ອະທິການໂດຍກົງຢູ່ຄືເກົ່າ.¹²

ໃນລະດັບສາມັນ ແລະ ລະດັບສະເຕກ, ພວກເຮົາຈະມີຝ່າຍປະທານອົງການຊາຍໜຸ່ມຢູ່ຄືເກົ່າ. ໃນລະດັບສະເຕກ, ສະມາຊິກສະພາສູງຈະເປັນປະທານອົງການຊາຍໜຸ່ມ¹³ ແລະ, ພ້ອມດ້ວຍສະມາຊິກສະພາສູງທີ່ຖືກມອບໝາຍຕໍ່ອົງການຍິງໜຸ່ມ ແລະ ອົງການປະຖົມໄວ, ຈະເປັນພາກສ່ວນໃນຄະນະກຳມະການຂອງຖານະປະໂລຫິດແຫ່ງອາໂຣນ–ອົງການຍິງໜຸ່ມຂອງສະເຕກ. ອ້າຍນ້ອງເຫລົ່ານີ້ຈະທຳງານຮ່ວມກັບຝ່າຍປະທານອົງການຍິງໜຸ່ມຂອງສະເຕກ ໃນຄະນະກຳມະການນີ້. ໂດຍມີທີ່ປຶກສາຂອງປະທານສະເຕກເປັນປະທານຄະນະກຳມະການ, ຄະນະກຳມະການນີ້ຈະເພີ່ມຄວາມສຳຄັນ ເພາະລາຍການ ແລະ ກິດຈະກຳຫລາຍຢ່າງ ໃນໂຄງການລິເລີ່ມໃໝ່ສຳລັບເດັກນ້ອຍ ແລະ ຊາຍໜຸ່ມ ຈະຢູ່ໃນລະດັບສະເຕກ.

ສະມາຊິກສະພາສູງເຫລົ່ານີ້, ພາຍໃຕ້ການຊີ້ນຳຂອງຝ່າຍປະທານສະເຕກ, ສາມາດຮັບໃຊ້ເປັນແຫລ່ງຊ່ວຍເຫລືອແກ່ອະທິການ ແລະ ກຸ່ມຖານະປະໂລຫິດແຫ່ງອາໂຣນ ໃນທາງທີ່ຄ້າຍຄືກັນກັບ ການບໍລິການທີ່ສະມາຊິກສະພາສູງຈັດຫາໃຫ້ກຸ່ມແອວເດີຂອງຫວອດ.

ໃນເລື່ອງທີ່ກ່ຽວຂ້ອງ, ສະມາຊິກສະພາສູງອີກຄົນໜຶ່ງຈະຮັບໃຊ້ເປັນປະທານໂຮງຮຽນວັນອາທິດຂອງສະເຕກ ແລະ, ເມື່ອຈຳເປັນ, ສາມາດຮັບໃຊ້ຢູ່ໃນຄະນະກຳມະການຖານະປະໂລຫິດແຫ່ງອາໂຣນ–ອົງການຍິງໜຸ່ມຂອງສະເຕກ.¹⁴

ການປ່ຽນແປງການຈັດຕັ້ງເພີ່ມເຕີມ ຈະຖືກອະທິບາຍຕື່ມອີກ ຢູ່ໃນຂໍ້ມູນທີ່ສົ່ງໄປໃຫ້ຜູ້ນຳ. ການປ່ຽນແປງເຫລົ່ານີ້ແມ່ນລວມທັງ:

ການປະຊຸມຄະນະກຳມະການຊາວໜຸ່ມຂອງຝ່າຍອະທິການ ຈະປ່ຽນເປັນ ສະພາຊາວໜຸ່ມຂອງຫວອດ.
ຄຳວ່າ “ກິດຈະກຳຮ່ວມກຸ່ມ” ຈະປ່ຽນເປັນ “ກິດຈະກຳກຸ່ມຍິງໜຸ່ມ,” “ກິດຈະກຳກຸ່ມຖານະປະໂລຫິດແຫ່ງອາໂຣນ,” ຫລື “ກິດຈະກຳຂອງຊາວໜຸ່ມ” ຊຶ່ງຈະຖືກຈັດຂຶ້ນອາທິດລະເທື່ອ ໃນບ່ອນທີ່ເປັນໄປໄດ້.
ເງິນງົບປະມານສຳລັບກິດຈະກຳຂອງຊາວໜຸ່ມໃນຫວອດ ຈະຖືກແບ່ງປັນໃຫ້ຢ່າງສະເໝີພາບ ລະຫວ່າງກຸ່ມຊາຍໜຸ່ມ ແລະ ກຸ່ມຍິງໜຸ່ມ ອີງຕາມຈຳນວນຂອງຊາວໜຸ່ມໃນແຕ່ລະອົງການ. ເງິນທຶນຈຳນວນທີ່ພຽງພໍຈະມີໃຫ້ສຳລັບກິດຈະກຳຂອງອົງການປະຖົມໄວ.
ໃນທຸກລະດັບ—ຫວອດ, ສະເຕກ, ແລະ ສາມັນ—ພວກເຮົາຈະໃຊ້ຄຳວ່າ “ອົງການ” ແທນຄຳວ່າ “ອົງການຊ່ວຍເຫລືອ.” ບຸກຄົນທີ່ນຳພາສະມາຄົມສະຕີສົງເຄາະສາມັນ, ອົງການຊາຍໜຸ່ມສາມັນ, ອົງການຍິງໜຸ່ມສາມັນ, ອົງການປະຖົມໄວສາມັນ, ແລະ ໂຮງຮຽນວັນອາທິດສາມັນ ຈະຖືກເອີ້ນວ່າ “ເຈົ້າໜ້າທີ່ສາມັນ.” ບຸກຄົນທີ່ນຳພາອົງການໃນລະດັບຫວອດ ແລະ ສະເຕກ ຈະຖືກເອີ້ນວ່າ “ເຈົ້າໜ້າທີ່ຫວອດ” ແລະ “ເຈົ້າໜ້າທີ່ສະເຕກ.”¹⁵

ການປ່ຽນແປງທີ່ປະກາດໃນມື້ນີ້ ສາມາດເລີ່ມຕົ້ນ ທັນທີທີ່ສາຂາ, ຫວອດ, ທ້ອງຖິ່ນ, ແລະ ສະເຕກ ພ້ອມແລ້ວ ແຕ່ຄວນເລີ່ມຕົ້ນບໍ່ໃຫ້ກາຍວັນທີ 1 ເດືອນມັງກອນ, 2020. ການປ່ຽນແປງເຫລົ່ານີ້, ເມື່ອລວມ ແລະ ປະສົມປະສານເຂົ້າກັບການປ່ຽນແປງທີ່ຜ່ານມາ, ຈະເປັນຕົວແທນໃຫ້ແກ່ຄວາມພະຍາຍາມທາງວິນຍານ ແລະ ການຈັດຕັ້ງ ທີ່ໃຫ້ສອດຄ່ອງກັບຄຳສອນ ເພື່ອເປັນພອນ ແລະ ເປັນຄວາມເຂັ້ມແຂງໃຫ້ແກ່ຊາຍ ແລະ ຍິງທຸກຄົນ, ຜູ້ໃຫຍ່, ຊາວໜຸ່ມ, ແລະ ເດັກນ້ອຍ, ເພື່ອຊ່ວຍກັນເຮັດຕາມຕົວຢ່າງຂອງພຣະຜູ້ຊ່ວຍໃຫ້ລອດ, ພຣະເຢຊູຄຣິດ, ຂະນະທີ່ເຮົາເດີນໄປໃນເສັ້ນທາງແຫ່ງພັນທະສັນຍາ.

ອ້າຍເອື້ອຍນ້ອງທີ່ຮັກແພງ, ຂ້າພະເຈົ້າສັນຍາ ແລະ ເປັນພະຍານວ່າ ການປ່ຽນແປງທີ່ສົມບູນແບບເຫລົ່ານີ້, ພາຍໃຕ້ການຊີ້ນຳຂອງປະທານ ແລະ ສາດສະດາ, ຣະໂຊ ເອັມ ແນວສັນ, ຈະເສີມພະລັງ ແລະ ເພີ່ມຄວາມເຂັ້ມແຂງໃຫ້ແກ່ສະມາຊິກທຸກຄົນຂອງສາດສະໜາຈັກ. ຊາວໜຸ່ມຂອງເຮົາຈະມີສັດທາຫລາຍກວ່າເກົ່າໃນພຣະຜູ້ຊ່ວຍໃຫ້ລອດ, ໄດ້ຮັບການປົກປ້ອງຈາກການລໍ້ລວງຂອງຜູ້ປໍລະປັກ, ແລະ ສາມາດປະເຊີນກັບການທ້າທາຍໃນຊີວິດໄດ້. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.