ການເປັນພາກສ່ວນໂດຍພັນທະສັນຍາ

ໂດຍ ແອວເດີ ແກຣິດ ດັບເບິນຢູ ກອງ

ແຫ່ງກຸ່ມອັກຄະສາວົກສິບສອງ

ການເປັນພາກສ່ວນກັບພຣະເຈົ້າ ແລະ ການເດີນໄປນຳກັນແລະກັນ ຢູ່ໃນເສັ້ນທາງແຫ່ງພັນທະສັນຍາຂອງພຣະອົງ ຄືການໄດ້ຮັບພອນ ຈາກການເປັນພາກສ່ວນໂດຍພັນທະສັນຍາ.

ອ້າຍເອື້ອຍນ້ອງທີ່ຮັກແພງ, ມີເລື່ອງເລົ່າກ່ຽວກັບເດັກນ້ອຍຊັ້ນປະຖົມໄວຄົນໜຶ່ງທີ່ກຳລັງຮຽນອະທິຖານ. “ຂອບພຣະໄທສຳລັບໂຕ ກ, ໂຕ ຂ, … ໂຕ ຊ.” ອະທິຖານຕໍ່ອີກວ່າ, “ຂອບພຣະໄທສຳລັບໂຕ ຫ, ອ, ຮ. ໂອ້ ພຣະບິດາເທິງສະຫວັນ, ຂອບພຣະໄທສຳລັບເລກ 1, ເລກ 2.” ຄູສອນຊັ້ນປະຖົມໄວເປັນຫ່ວງນຳລາວ ແຕ່ກໍລໍຖ້າ. ລາວເວົ້າວ່າ, “ຂອບພຣະໄທສຳລັບເລກ 5, ເລກ 6—ແລະ ຂອບພຣະໄທສຳລັບຄູສອນຊັ້ນປະຖົມໄວຂອງຂ້ານ້ອຍ. ເພິ່ນເປັນຄົນດຽວເທົ່ານັ້ນ ທີ່ປ່ອຍໃຫ້ຂ້ານ້ອຍອະທິຖານຈົນຈົບ.”

ພຣະບິດາເທິງສະຫວັນໄດ້ຍິນຄຳອະທິຖານຂອງເດັກນ້ອຍແຕ່ລະຄົນແທ້ໆ. ດ້ວຍຄວາມຮັກທີ່ບໍ່ມີຂອບເຂດ, ພຣະອົງໄດ້ຊັກຊວນເຮົາໃຫ້ມາເຊື່ອ ແລະ ມາເປັນພາກສ່ວນໂດຍພັນທະສັນຍາ.

ໂລກນີ້ເຕັມໄປດ້ວຍພາບມາຍາ, ພາບລວງຕາ, ມືອັນວ່ອງໄວ. ຫລາຍຢ່າງເບິ່ງຄືວ່າບໍ່ຖາວອນ ແລະ ບໍ່ເລິກຊຶ້ງ. ເມື່ອເຮົາບໍ່ສົນໃຈກັບສິ່ງທີ່ປິດບັງ, ການລໍ້ລວງ, ຄວາມຕິຊົມຂອງຝູງຊົນ, ກໍໝາຍຄວາມວ່າ ເຮົາສະແຫວງຫາສິ່ງທີ່ດີກວ່າ ຂອງໂຫລໆ, ຄວາມສຳພັນທີ່ແບບຊົ່ວຄາວ, ຫລື ການສະແຫວງຫາຜົນປະໂຫຍດສ່ວນຕົວທາງໂລກ. ໂຊກດີທີ່ຍັງມີວິທີທີ່ຈະເອົາຊະນະສິ່ງເຫລົ່ານີ້ໄດ້ຢູ່.

ເມື່ອເຮົາເຮັດຕາມພຣະບັນຍັດຂອງພຣະເຈົ້າ ທີ່ຈະຮັກພຣະອົງ ແລະ ຜູ້ຄົນທີ່ຢູ່ອ້ອມຮອບເຮົາ ໂດຍການເຮັດພັນທະສັນຍາ, ເຮົາໄດ້ເຮັດ ບໍ່ແມ່ນໃນຖານະຄົນແປກໜ້າ ຫລື ແຂກບ້ານ ແຕ່ໃນຖານະລູກຂອງພຣະອົງຢູ່ທີ່ບ້ານ.¹ ຄວາມຂັດແຍ້ງກໍຍັງມີສືບຕໍ່ໃນປະຈຸບັນ. ໃນການປະຖິ້ມຝ່າຍໂລກ ເພື່ອການເປັນພາກສ່ວນຜ່ານທາງພັນທະສັນຍາ, ເຮົາຈະພົບເຫັນ ແລະ ກາຍເປັນຜູ້ມີ²—ອິດສະລະ, ມີຊີວິດຊີວາ, ຈິງແທ້—ແລະ ກຳນົດຄວາມສຳພັນທີ່ສຳຄັນທີ່ສຸດຂອງເຮົາ. ການເປັນພາກສ່ວນໂດຍພັນທະສັນຍາ ຄືການເຮັດ ແລະ ຮັກສາຄຳສັນຍາທີ່ໜັກແໜ້ນຕໍ່ພຣະເຈົ້າ ແລະ ຕໍ່ກັນແລະກັນ ຜ່ານທາງພິທີການທີ່ສັກສິດ, ຊຶ່ງເຊື້ອເຊີນອຳນາດຂອງຄວາມເປັນເໝືອນດັ່ງພຣະເຈົ້າ ເພື່ອສະແດງໃຫ້ປະຈັກໃນຊີວິດຂອງເຮົາ.³ ເມື່ອເຮົາເຮັດພັນທະສັນຍາດ້ວຍທັງໝົດທີ່ເຮົາເປັນຢູ່, ເຮົາຈະສາມາດກາຍເປັນຫລາຍກວ່າທີ່ເຮົາເປັນຢູ່. ການເປັນພາກສ່ວນໂດຍພັນທະສັນຍາ ມອບສະຖານທີ່, ເລື່ອງລາວ, ຄວາມສາມາດທີ່ຈະກາຍເປັນ ໃຫ້ແກ່ເຮົາ. ມັນຜະລິດສັດທາໃຫ້ແກ່ຊີວິດ ແລະ ຄວາມລອດ.⁴

ພັນທະສັນຍາທີ່ສູງສົ່ງ ຈະກາຍເປັນແຫລ່ງຂອງຄວາມຮັກຕໍ່ພຣະເຈົ້າ ແລະ ຈາກພຣະເຈົ້າ ແລະ ຕໍ່ກັນແລະກັນ ແລະ ກັບກັນແລະກັນດັ່ງນັ້ນ. ພຣະເຈົ້າ, ພຣະບິດາເທິງສະຫວັນຂອງເຮົາ, ຮັກເຮົາ ຫລາຍກວ່າທີ່ເຮົາຮັກ ຫລື ຮູ້ຈັກຕົວເອງ. ສັດທາໃນພຣະເຢຊູຄຣິດ ແລະ ການປ່ຽນແປງສ່ວນຕົວ (ການກັບໃຈ) ຈະນຳຄວາມເມດຕາ, ພຣະຄຸນ, ການໃຫ້ອະໄພ ມາໃຫ້ເຮົາ. ສິ່ງເຫລົ່ານີ້ຈະບັນເທົາຄວາມເຈັບປວດ, ຄວາມເປົ່າປ່ຽວດຽວດາຍ, ຄວາມບໍ່ທ່ຽງທຳ ທີ່ເຮົາປະເຊີນຢູ່ໃນຊ່ວງມະຕະນີ້. ໂດຍທີ່ເປັນພຣະເຈົ້າ, ພຣະບິດາເທິງສະຫວັນຂອງເຮົາ ປະສົງໃຫ້ເຮົາຮັບເອົາຂອງປະທານອັນຍິ່ງໃຫຍ່ທີ່ສຸດຂອງພຣະເຈົ້າ—ນັ້ນຄື ຄວາມຊື່ນຊົມ, ຊີວິດນິລັນດອນຂອງພຣະອົງ.⁵

ພຣະເຈົ້າຂອງເຮົາ ແມ່ນພຣະເຈົ້າແຫ່ງພັນທະສັນຍາ. ໂດຍທຳມະຊາດແລ້ວ, ພຣະອົງ “ຮັກສາພັນທະສັນຍາ ແລະ ສະແດງຄວາມເມດຕາ.”⁶ ພັນທະສັນຍາຂອງພຣະອົງຍືນຍົງ “ຕາບໃດທີ່ເວລາ [ຍັງ] ເຫລືອຢູ່, ຫລື ໂລກຍັງຕັ້ງຢູ່, ຫລື [ຍັງ] ມີຄົນຜູ້ດຽວເຫລືອຢູ່ໃນຜືນແຜ່ນດິນໂລກທີ່ຈະຊ່ວຍໃຫ້ລອດ.”⁷ ເຮົາບໍ່ໄດ້ຖືກຄາດໝາຍໃຫ້ເດີນໄປໃນຄວາມບໍ່ແນ່ນອນ ແລະ ໃນຄວາມສົງໃສ ຢູ່ໃນຊ່ວງມະຕະນີ້, ແຕ່ເພື່ອໃຫ້ປິຕິຍິນດີ ໃນການທະນຸຖະໜອມຄວາມສຳພັນຂອງພັນທະສັນຍາ ທີ່ “ແຂງແກ່ນຫລາຍກວ່າເຊືອກແຫ່ງຄວາມຕາຍ.”⁸

ພິທີການ ແລະ ພັນທະສັນຍາຂອງພຣະເຈົ້າ ແມ່ນຄືກັນໝົດສຳລັບທຸກຄົນ ໃນເລື່ອງເງື່ອນໄຂ ແລະ ໃຫ້ໂອກາດແກ່ທຸກຄົນ. ໃນຄວາມເປັນທຳຂອງພຣະເຈົ້າ, ທຸກຄົນໃນທຸກແຫ່ງຫົນ ແລະ ໃນທຸກໄວ ສາມາດຮັບພິທີການຊ່ວຍໃຫ້ລອດໄດ້. ສາມາດໃຊ້ອຳເພີໃຈ—ບຸກຄົນສາມາດເລືອກທີ່ຈະຮັບເອົາພິທີການ ທີ່ສະເໜີມອບໃຫ້. ພິທີການຂອງພຣະເຈົ້າມີປ້າຍບອກທາງ ຢູ່ໃນເສັ້ນທາງແຫ່ງພັນທະສັນຍາຂອງພຣະອົງ. ເຮົາເອີ້ນແຜນຂອງພຣະເຈົ້າ ເພື່ອນຳລູກໆຂອງພຣະອົງກັບບ້ານວ່າ ແຜນແຫ່ງການໄຖ່, ແຜນແຫ່ງຄວາມລອດ, ແຜນແຫ່ງຄວາມສຸກ. ການໄຖ່, ຄວາມລອດ, ຄວາມສຸກລະດັບຊັ້ນສູງ ແມ່ນເປັນໄປໄດ້ ເພາະພຣະເຢຊູຄຣິດ “ຜູ້ໄດ້ເຮັດໃຫ້ເກີດການຊົດໃຊ້ທີ່ສົມບູນ.”⁹

ທຳອິດ, ການເປັນພາກສ່ວນໂດຍພັນທະສັນຍາ ເຈາະຈົງຢູ່ທີ່ພຣະເຢຊູຄຣິດ ວ່າເປັນ “ຜູ້ກາງຝ່າຍພັນທະສັນຍາໃໝ່.”¹⁰ ທຸກສິ່ງສາມາດທຳງານດ້ວຍກັນ ເພື່ອຄວາມດີຂອງເຮົາ ເມື່ອເຮົາຖືກ “ຊຳລະໃຫ້ບໍລິສຸດໃນພຣະຄຣິດ … ໃນພັນທະສັນຍາຂອງພຣະບິດາ.”¹¹ ພອນທີ່ດີທຸກຢ່າງ ທີ່ຖືກສັນຍາໄວ້ຈະມາສູ່ຜູ້ທີ່ຍຶດໝັ້ນໃນສັດທາຈົນເຖິງທີ່ສຸດ. “ສະພາບຄວາມສຸກຂອງຄົນທີ່ຮັກສາພຣະບັນຍັດຂອງພຣະເຈົ້າ” ຄືການ “ໄດ້ຮັບພອນທຸກຢ່າງທັງຝ່າຍໂລກ ແລະ ຝ່າຍວິນຍານ,” ແລະ ຈະ “ໄດ້ຢູ່ກັບພຣະເຈົ້າໃນ … ຄວາມສຸກທີ່ບໍ່ມີວັນສິ້ນສຸດ.”¹²

ເມື່ອເຮົາໃຫ້ກຽດແກ່ພັນທະສັນຍາຂອງເຮົາ, ແລ້ວບາງເທື່ອເຮົາອາດຈະຮູ້ສຶກວ່າ ມີເຫລົ່າທູດຢູ່ໃກ້. ແລະ ພວກເພິ່ນຈະຢູ່ໃກ້ເຮົາ—ຄືຜູ້ທີ່ເຮົາຮັກ ແລະ ຜູ້ທີ່ເປັນພອນແກ່ເຮົາ ຈາກຟາກມ່ານເບື້ອງນີ້ ແລະ ຜູ້ທີ່ຮັກເຮົາ ແລະ ຜູ້ທີ່ເປັນພອນແກ່ເຮົາ ຈາກຟາກມ່ານເບື້ອງນັ້ນ.

ເມື່ອບໍ່ດົນມານີ້ ຊິດສະເຕີ ກອງ ແລະ ຂ້າພະເຈົ້າໄດ້ເຫັນການເປັນພາກສ່ວນໂດຍພັນທະສັນຍາ ທີ່ລະອຽດອ່ອນທີ່ສຸດ ຢູ່ໂຮງໝໍແຫ່ງໜຶ່ງ. ພໍ່ໜຸ່ມຄົນໜຶ່ງຕ້ອງໄດ້ຜ່າຕັດໝາກໄຂ່ຫລັງ. ຄອບຄົວຂອງລາວໄດ້ຮ້ອງໄຫ້, ຖືສິນອົດເຂົ້າ, ແລະ ອະທິຖານ ຂໍໃຫ້ໄດ້ຮັບໝາກໄຂ່ຫລັງ. ເມື່ອໄດ້ຍິນວ່າ ມີຄົນບໍລິຈາກໝາກໄຂ່ຫລັງ, ພັນລະຍາຂອງລາວ ໄດ້ເວົ້າຄ່ອຍໆວ່າ, “ຂ້ອຍຫວັງວ່າ ຄອບຄົວນັ້ນບໍ່ເປັນຫຍັງ.” ການເປັນພາກສ່ວນໂດຍພັນທະສັນຍາ ຄື, ໃນຖ້ອຍຄຳຂອງອັກຄະສາວົກໂປໂລ, “ດ້ວຍສັດທາຂອງພວກເຮົາທັງສອງຝ່າຍນັ້ນຈະໄດ້ໜູນໃຈຊຶ່ງກັນແລະກັນ.”¹³

ໃນລະຫວ່າງເສັ້ນທາງຂອງຊີວິດ, ເຮົາອາດໝົດສັດທາໃນພຣະເຈົ້າ, ແຕ່ພຣະອົງບໍ່ເຄີຍໝົດສັດທາໃນຕົວເຮົາ. ດັ່ງທີ່ເຄີຍເປັນມາ, ແສງໄຟຢູ່ໜ້າບ້ານຂອງພຣະອົງ ຍັງຮຸ່ງແຈ້ງສະເໝີ. ພຣະອົງເຊື້ອເຊີນເຮົາໃຫ້ມາຫາ ຫລື ກັບມາສູ່ພັນທະສັນຍາ ທີ່ໝາຍເສັ້ນທາງຂອງພຣະອົງ. ພຣະອົງຄອຍຖ້າ ພ້ອມແລ້ວທີ່ຈະຕ້ອນຮັບເຮົາ, ແມ່ນແຕ່ຕອນທີ່ເຮົາ “ຍັງຢູ່ຫ່າງໄກ.”¹⁴ ເມື່ອເຮົາເບິ່ງດ້ວຍຕາແຫ່ງສັດທາ ຊອກຫາແບບແຜນ, ຈຸດສູງສຸດ, ຫລື ປະສົບການຂອງເຮົາ, ແລ້ວເຮົາຈະສາມາດເຫັນພຣະເມດຕາທີ່ລະອຽດອ່ອນຂອງພຣະອົງ ແລະ ການຊຸກຍູ້, ໂດຍສະເພາະໃນການທົດລອງ, ຄວາມໂສກເສົ້າ, ແລະ ໃນການທ້າທາຍຂອງເຮົາ, ຕະຫລອດທັງເວລາທີ່ເຮົາມີຄວາມສຸກ. ເຖິງຢ່າງໃດກໍຕາມ ຈະມີຫລາຍເທື່ອ ທີ່ເຮົາຈະສະດຸດ ຫລື ລົ້ມລົງ, ຖ້າຫາກເຮົາຫຍັບເຂົ້າໃກ້ພຣະອົງເລື້ອຍໆ, ພຣະອົງຈະຊ່ວຍເຫລືອເຮົາ, ເທື່ອລະບາດກ້າວ.

ສອງ, ພຣະຄຳພີມໍມອນເປັນຫລັກຖານຂອງການເປັນພາກສ່ວນໂດຍພັນທະສັນຍາ ທີ່ເຮົາສາມາດສຳພັດໄດ້ດ້ວຍມື. ພຣະຄຳພີມໍມອນເປັນເຄື່ອງມືທີ່ຖືກສັນຍາໄວ້ ສຳລັບການເຕົ້າໂຮມລູກໆຂອງພຣະເຈົ້າ, ທີ່ຖືກທຳນາຍວ່າເປັນພັນທະສັນຍາໃໝ່.¹⁵ ເມື່ອເຮົາອ່ານພຣະຄຳພີມໍມອນ, ດ້ວຍຕົວເອງ ແລະ ກັບຄົນອື່ນໆ, ບໍ່ວ່າຈະອ່ານໃນໃຈ ຫລື ອ່ານອອກສຽງ, ເຮົາກໍສາມາດທູນຖາມພຣະເຈົ້າ “ດ້ວຍໃຈຈິງ, ດ້ວຍເຈດຕະນາອັນແທ້ຈິງ, ໂດຍມີສັດທາໃນພຣະຄຣິດ,” ແລະ ຮັບເອົາຄວາມແນ່ນອນໃຈຈາກພຣະເຈົ້າ ໂດຍອຳນາດຂອງພຣະວິນຍານບໍລິສຸດ ວ່າພຣະຄຳພີມໍມອນຈິງແທ້.¹⁶ ສິ່ງນີ້ແມ່ນຮ່ວມດ້ວຍຄວາມແນ່ນອນໃຈວ່າ ພຣະເຢຊູຄຣິດ ຄືພຣະຜູ້ຊ່ວຍໃຫ້ລອດຂອງເຮົາ, ວ່າໂຈເຊັບ ສະມິດ ເປັນສາດສະດາແຫ່ງການຟື້ນຟູ, ແລະ ສາດສະໜາຈັກຂອງພຣະຜູ້ເປັນເຈົ້າ ກໍຖືກເອີ້ນຕາມພຣະນາມຂອງພຣະອົງ—ນັ້ນຄື ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.¹⁷

ພຣະຄຳພີມໍມອນກ່າວແກ່ທ່ານ ໂດຍພັນທະສັນຍາຂອງສະໄໝບູຮານ ແລະ ສະໄໝໃໝ່ ຈາກຜູ້ທີ່ເປັນລູກຫລານຂອງລີໄຮ, “ລູກຫລານຂອງສາດສະດາ.”¹⁸ ບັນພະບຸລຸດຂອງທ່ານໄດ້ຮັບພັນທະສັນຍາທີ່ຖືກສັນຍາໄວ້ ວ່າທ່ານ, ເຊື້ອສາຍຂອງພວກເພິ່ນ, ຈະຮັບຮູ້ ສຽງຈາກຂີ້ຝຸ່ນ ຢູ່ໃນພຣະຄຳພີມໍມອນ.¹⁹ ສຽງນັ້ນທີ່ທ່ານຮູ້ສຶກ ຂະນະທີ່ທ່ານອ່ານ ເປັນພະຍານຕໍ່ທ່ານວ່າ ທ່ານເປັນ “ລູກຫລານແຫ່ງພັນທະສັນຍາ”²⁰ ແລະ ພຣະເຢຊູຄຣິດ ເປັນຜູ້ລ້ຽງທີ່ດີຂອງທ່ານ.

ພຣະຄຳພີມໍມອນເຊື້ອເຊີນເຮົາແຕ່ລະຄົນ, ໃນຖ້ອຍຄຳຂອງແອວມາ, ໃຫ້ເຂົ້າ “ເຮັດພັນທະສັນຍາກັບ [ພຣະຜູ້ເປັນເຈົ້າ], ວ່າ [ເຮົາ] ຈະຮັບໃຊ້ພຣະອົງ ແລະ ຮັກສາພຣະບັນຍັດຂອງພຣະອົງ, ເພື່ອພຣະອົງຈະໄດ້ທຸ້ມເທພຣະວິນຍານຂອງພຣະອົງລົງມາເທິງ [ເຮົາ] ຢ່າງຫລວງຫລາຍຍິ່ງຂຶ້ນ.”²¹ ເມື່ອເຮົາຢາກປ່ຽນແປງໃຫ້ດີຂຶ້ນກວ່າເກົ່າ—ດັ່ງທີ່ຜູ້ໜຶ່ງໄດ້ກ່າວ, “ໃຫ້ເຊົາໂສກເສົ້າ ແລ້ວກັບມາເປັນຄົນມີຄວາມສຸກ”—ແລ້ວເຮົາຈະສາມາດເປີດໃຈຮັບການຊີ້ນຳ, ຄວາມຊ່ວຍເຫລືອ, ແລະ ພະລັງ. ເຮົາສາມາດເຮັດພັນທະສັນຍາທີ່ຈະເປັນພາກສ່ວນກັບພຣະເຈົ້າ ແລະ ຜູ້ຄົນທີ່ຊື່ສັດ ແລະ ຮັບເອົາພອນທີ່ສັນຍາໄວ້ ຢູ່ໃນຄຳສອນຂອງພຣະຄຣິດ²²—ໃນເວລານີ້.

ສິດອຳນາດ ແລະ ອຳນາດຂອງຖານະປະໂລຫິດທີ່ຟື້ນຟູ ເພື່ອເປັນພອນໃຫ້ແກ່ລູກໆຂອງພຣະອົງທຸກຄົນ ເປັນພາກສ່ວນທີສາມຂອງການເປັນພາກສ່ວນໂດຍພັນທະສັນຍາ. ໃນຍຸກນີ້, ໂຢຮັນບັບຕິສະໂຕ ແລະ ອັກຄະສາວົກເປໂຕ, ຢາໂກໂບ, ແລະ ໂຢຮັນ ໄດ້ມາ ໃນຖານະຜູ້ສົ່ງຂ່າວທີ່ສູງສັກ ຈາກພຣະເຈົ້າ ເພື່ອຟື້ນຟູສິດອຳນາດຖານະປະໂລຫິດຂອງພຣະອົງ.²³ ຖານະປະໂລຫິດຂອງພຣະເຈົ້າ ແລະ ພິທີການຂອງພຣະອົງ ເຮັດໃຫ້ຄວາມສຳພັນຢູ່ໃນໂລກສຳຄັນຂຶ້ນ ແລະ ສາມາດຜະນຶກຄວາມສຳພັນຂອງພັນທະສັນຍາຢູ່ໃນສະຫວັນ.²⁴

ຖານະປະໂລຫິດສາມາດເປັນພອນ ນັບຈາກມື້ເກີດ ຈົນເຖິງມື້ຕາຍ—ຈາກການຕັ້ງຊື່ໃຫ້ແອນ້ອຍ ຈົນເຖິງການສວດພອນອຸທິດຫລຸມສົບ. ພອນຂອງຖານະປະໂລຫິດ ປິ່ນປົວ, ປອບໂຍນ, ແນະນຳ. ພໍ່ຄົນໜຶ່ງໄດ້ໃຈຮ້າຍໃຫ້ລູກຊາຍ ຈົນກະທັ້ງຄວາມຮັກແຫ່ງການໃຫ້ອະໄພໄດ້ເກີດຂຶ້ນ ຂະນະທີ່ລາວໄດ້ມອບພອນຂອງຖານະປະໂລຫິດ ດ້ວຍຄວາມອ່ອນນ້ອມໃຫ້ລູກຊາຍຂອງລາວ. ໂດຍທີ່ເປັນສະມາຊິກຂອງສາດສະໜາຈັກຄົນດຽວໃນຄອບຄົວ, ຍິງໜຸ່ມຄົນໜຶ່ງຫວັ່ນໄຫວກ່ຽວກັບຄວາມຮັກຂອງພຣະເຈົ້າ ຈົນກະທັ້ງນາງໄດ້ຮັບພອນຂອງຖານະປະໂລຫິດທີ່ດົນໃຈ. ຕະຫລອດທົ່ວໂລກ, ປິຕຸທີ່ດີເລີດໄດ້ກະກຽມທາງວິນຍານ ເພື່ອມອບປິຕຸພອນ. ຂະນະທີ່ປິຕຸວາງມືໃສ່ເທິງຫົວຂອງທ່ານ, ເພິ່ນຮູ້ສຶກ ແລະ ສະແດງຄວາມຮັກຂອງພຣະເຈົ້າທີ່ມີຕໍ່ທ່ານ ໃຫ້ແກ່ທ່ານ. ເພິ່ນປະກາດເຊື້ອສາຍຂອງທ່ານ ຢູ່ໃນເຊື້ອສາຍອິດສະຣາເອນ. ເພິ່ນກ່າວພອນຈາກພຣະຜູ້ເປັນເຈົ້າ. ໂດຍທີ່ເປັນຄົນຊ່າງຄິດຕາມປົກກະຕິ, ພັນລະຍາຂອງປິຕຸຄົນໜຶ່ງໄດ້ບອກຂ້າພະເຈົ້າເຖິງວິທີທີ່ນາງກັບຄອບຄົວໄດ້ເຊື້ອເຊີນພຣະວິນຍານໃຫ້ມາສະຖິດຢູ່ນຳ, ໂດຍສະເພາະໃນວັນທີ່ສາມີຂອງນາງໄດ້ມອບປິຕຸພອນ.

ສຸດທ້າຍ, ພອນຂອງການເປັນພາກສ່ວນໂດຍພັນທະສັນຍາມາເຖິງ ເມື່ອເຮົາເຮັດຕາມສາດສະດາຂອງພຣະຜູ້ເປັນເຈົ້າ ແລະ ປິຕິຍິນດີໃນການດຳລົງຊີວິດຕາມພັນທະສັນຍາໃນພຣະວິຫານ, ລວມທັງໃນການແຕ່ງງານ. ການແຕ່ງງານໂດຍພັນທະສັນຍາກາຍເປັນສິ່ງສັກສິດ ແລະ ນິລັນດອນ ເມື່ອເຮົາເລືອກໃຫ້ຄວາມສຸກຂອງຄູ່ຄອງ ແລະ ຄອບຄົວຂອງເຮົາ ມາກ່ອນຄວາມສຸກຂອງເຮົາເອງ. ເມື່ອ “ຂ້ອຍ” ກາຍເປັນ “ພວກເຮົາ,” ແລ້ວພວກເຮົາຈະເຕີບໂຕນຳກັນ. ພວກເຮົາຈະເຖົ້າແກ່ນຳກັນ; ພວກເຮົາຈະໜຸ່ມໄປໜ້ານຳກັນ. ເມື່ອພວກເຮົາເປັນພອນໃຫ້ກັນແລະກັນ ຕະຫລອດຊີວິດ ໂດຍການບໍ່ຄິດແຕ່ນຳຕົວເອງ, ແລ້ວພວກເຮົາຈະພົບເຫັນຄວາມຫວັງ ແລະ ຄວາມຊື່ນຊົມທີ່ໜ້າເພິ່ງພໍໃຈ ໃນຊ່ວງການເວລາ ແລະ ນິລັນດອນ.

ເຖິງແມ່ນວ່າສະພາບການຈະແຕກຕ່າງກັນ, ເມື່ອເຮົາເຮັດທຸກສິ່ງທີ່ເຮົາສາມາດເຮັດໄດ້, ເຮັດໃຫ້ດີທີ່ສຸດ, ແລະ ທູນຂໍ ແລະ ສະແຫວງຫາຄວາມຊ່ວຍເຫລືອຈາກພຣະອົງຕະຫລອດເວລານັ້ນ, ພຣະຜູ້ເປັນເຈົ້າຈະຊີ້ນຳເຮົາ, ໃນເວລາ ແລະ ໃນວິທີທາງຂອງພຣະອົງ, ໂດຍພຣະວິນຍານບໍລິສຸດ.²⁵ ພັນທະສັນຍາຂອງການແຕ່ງງານເປັນການຜູກມັດຂອງຜູ້ເຮັດດ້ວຍຄວາມສະໝັກໃຈ—ເປັນຄຳເຕືອນຂອງພຣະເຈົ້າ ແລະ ເປັນການໃຫ້ກຽດຕໍ່ອຳເພີໃຈ ແລະ ພອນຂອງຄວາມຊ່ວຍເຫລືອຂອງພຣະອົງ ເມື່ອເຮົາສະແຫວງຫາມັນນຳກັນ.

ຜົນຂອງການເປັນພາກສ່ວນໂດຍພັນທະສັນຍາ ຕະຫລອດຫລາຍລຸ້ນຄົນໃນຄອບຄົວ ສາມາດຮູ້ສຶກໄດ້ຢູ່ໃນບ້ານເຮືອນ ແລະ ໃນໃຈຂອງເຮົາ. ຂ້າພະເຈົ້າຂໍເລົ່າຈາກປະສົບການສ່ວນຕົວ ເພື່ອເປັນຕົວຢ່າງ.

ຕອນຊິດສະເຕີ ກອງ ແລະ ຂ້າພະເຈົ້າຕົກຫລຸມຮັກ ແລະ ຄິດທີ່ຈະແຕ່ງງານ, ຂ້າພະເຈົ້າໄດ້ຮຽນຮູ້ກ່ຽວກັບອຳເພີໃຈ ແລະ ການຕັດສິນໃຈ. ຊົ່ວໄລຍະໜຶ່ງ, ພວກເຮົາໄດ້ເຂົ້າໂຮງຮຽນ ສຶກສາຢູ່ໃນສອງປະເທດ ແລະ ສອງທະວີບຕ່າງກັນ. ນີ້ເປັນເຫດຜົນທີ່ຂ້າພະເຈົ້າສາມາດເວົ້າໄດ້ແທ້ໆວ່າ ຂ້າພະເຈົ້າໄດ້ຮັບປະລິນຍາເອກ ໃນຝ່າຍປະຊາສຳພັນລະຫວ່າງປະເທດ.

ຕອນຂ້າພະເຈົ້າໄດ້ທູນຖາມວ່າ, “ພຣະບິດາເທິງສະຫວັນ, ຂ້ານ້ອຍຄວນແຕ່ງງານກັບນາງສູສັນຫລືບໍ່?” ຂ້າພະເຈົ້າໄດ້ຮູ້ສຶກສະຫງົບ. ແຕ່ມັນແມ່ນຕອນຂ້າພະເຈົ້າໄດ້ຮຽນອະທິຖານດ້ວຍໃຈຈິງວ່າ, “ພຣະບິດາເທິງສະຫວັນ, ຂ້ານ້ອຍຮັກນາງສູສັນ ແລະ ຢາກແຕ່ງງານກັບນາງ. ຂ້ານ້ອຍສັນຍາວ່າ ຂ້ານ້ອຍຈະເປັນສາມີ ແລະ ເປັນພໍ່ທີ່ດີທີ່ສຸດທີ່ຂ້ານ້ອຍສາມາດເປັນໄດ້”—ຕອນຂ້າພະເຈົ້າໄດ້ລົງມືກະທຳ ແລະ ຕັດສິນໃຈທີ່ດີທີ່ສຸດ, ໃນຕອນນັ້ນແຫລະ ທີ່ຂ້າພະເຈົ້າໄດ້ຮັບການຢືນຢັນທາງວິນຍານທີ່ແຮງກ້າ.

ບັດນີ້ ແຜນລຳດັບຄອບຄົວກອງ ແລະ ຄອບຄົວລິນເສ, ເລື່ອງລາວ, ແລະ ຮູບພາບຕ່າງໆໃນ FamilySearch ຊ່ວຍພວກເຮົາໃຫ້ຄົ້ນພົບ ແລະ ເຊື່ອມໂຍງເຂົ້າກັນ ຜ່ານທາງປະສົບການໃນຊີວິດຂອງການເປັນພາກສ່ວນໃນພັນທະສັນຍາຂອງຫລາຍລຸ້ນຄົນ.²⁶ ສຳລັບພວກເຮົາແລ້ວ, ບັນພະບຸລຸດທີ່ມີກຽດແມ່ນລວມທັງ:

ແມ່ຕູ້ທວດ ອາລີສ ບະລາວເອີ ແບງເກີເທີ, ຜູ້ທີ່ຖືກຂໍແຕ່ງງານສາມເທື່ອໃນວັນດຽວກັນ, ຕໍ່ຈາກນັ້ນໄດ້ຂໍໃຫ້ສາມີຂອງນາງເຮັດເຄື່ອງຈັກນັ່ງຖີບ ປັ່ນນ້ຳມັນເບີ ເພື່ອວ່ານາງຈະໄດ້ປັ່ນນ້ຳມັນເບີ, ຖັກແສ່ວ, ແລະ ອ່ານປຶ້ມ ໃນເວລາດຽວກັນ.

ພໍ່ຕູ້ທວດ ລອຍ ຄະເວ້ ຈາ ໄດ້ເຈ່ຍເອົາລູກ ແລະ ຈູງໂຕລໍທີ່ຕ່າງສິ່ງຂອງສອງສາມຢ່າງ ເດີນຂ້າມທົ່ງພູເຂົາໄຟ ຢູ່ເກາະໃຫຍ່ຂອງລັດຮາວາຍ. ຄວາມຕັ້ງໃຈ ແລະ ການເສຍສະລະຂອງຫລາຍລຸ້ນຄົນຂອງຄອບຄົວ ຈາ ໄດ້ເປັນພອນໃຫ້ແກ່ຄອບຄົວຂອງພວກເຮົາໃນທຸກວັນນີ້.

ແມ່ຕູ້ ແມຣີ ອາລີສ ພາລ໌ ລິນເຊ ໄດ້ຖືກປະໄວ້ໃຫ້ລ້ຽງລູກນ້ອຍຫ້າຄົນ ເມື່ອສາມີຂອງເພິ່ນ ແລະ ລູກຊາຍກົກ ໄດ້ເສຍຊີວິດໄປແບບກະທັນຫັນ ໃນເວລາທີ່ໄລ່ເລ່ຍກັນ. ໂດຍທີ່ເປັນແມ່ໝ້າຍເປັນເວລາ 47 ປີ, ແມ່ຕູ້ໄດ້ລ້ຽງດູຄອບຄົວຂອງເພິ່ນ ດ້ວຍຄວາມຮັກທີ່ສະໜັບສະໜູນຈາກຜູ້ນຳ ແລະ ສະມາຊິກໃນທ້ອງຖິ່ນ. ໃນຊ່ວງເວລາຫລາຍປີເຫລົ່ານັ້ນ, ແມ່ຕູ້ໄດ້ສັນຍາກັບພຣະຜູ້ເປັນເຈົ້າວ່າ ຖ້າຫາກພຣະອົງຈະຊ່ວຍເຫລືອເພິ່ນ, ເພິ່ນຈະບໍ່ຈົ່ມຈັກເທື່ອ. ພຣະຜູ້ເປັນເຈົ້າໄດ້ຊ່ວຍເຫລືອເພິ່ນ. ເພິ່ນກໍບໍ່ເຄີຍຈົ່ມເລີຍ.

ອ້າຍເອື້ອຍນ້ອງທີ່ຮັກແພງ, ໂດຍໄດ້ຮັບການເປັນພະຍານຈາກພຣະວິນຍານບໍລິສຸດ, ທຸກສິ່ງທຸກຢ່າງທີ່ດີ ແລະ ເປັນຊົ່ວນິລັນດອນ ແມ່ນເຈາະຈົງຢູ່ໃນຄວາມເປັນຈິງທີ່ດຳລົງຢູ່ຂອງພຣະເຈົ້າ, ພຣະບິດາຜູ້ສະຖິດນິລັນດອນຂອງເຮົາ, ແລະ ພຣະບຸດຂອງພຣະອົງ, ພຣະເຢຊູຄຣິດ, ແລະ ການຊົດໃຊ້ຂອງພຣະອົງ. ພຣະຜູ້ເປັນເຈົ້າຂອງເຮົາ, ພຣະເຢຊູຄຣິດ, ຄືຜູ້ເປັນກາງ ໃນພັນທະສັນຍາໃໝ່ນີ້. ການເປັນພະຍານເຖິງພຣະເຢຊູຄຣິດ ຄືຈຸດປະສົງຂອງພັນທະສັນຍາ ຂອງພຣະຄຳພີມໍມອນ.²⁷ ໂດຍຄຳສາບານ ແລະ ພັນທະສັນຍາ, ສິດອຳນາດທີ່ຟື້ນຟູຂອງຖານະປະໂລຫິດຂອງພຣະເຈົ້າ ຈຶ່ງມີເຈດຕະນາໃຫ້ເປັນພອນແກ່ລູກທຸກຄົນຂອງພຣະເຈົ້າ, ລວມທັງຜ່ານທາງການແຕ່ງງານໂດຍພັນທະສັນຍາ, ຄອບຄົວຫລາຍລຸ້ນຄົນ, ແລະ ພອນສ່ວນຕົວ.

ພຣະຜູ້ຊ່ວຍໃຫ້ລອດຂອງເຮົາປະກາດວ່າ, “ເຮົາຄືອາລະຟາ ແລະ ໂອເມຄາ, ພຣະຄຣິດອົງເປັນພຣະຜູ້ເປັນເຈົ້າ; ແທ້ຈິງແລ້ວ, ເຮົານີ້ແຫລະຄືຜູ້ນັ້ນ, ເປັນຕົ້ນ ແລະ ທີ່ສຸດ, ເປັນພຣະຜູ້ໄຖ່ຂອງໂລກ.”²⁸

ພຣະອົງໄດ້ຢູ່ກັບເຮົາໃນຕອນຕົ້ນ, ໃນການເປັນພາກສ່ວນໂດຍພັນທະສັນຍາທັງໝົດ, ຈົນເຖິງທີ່ສຸດ. ຂ້າພະເຈົ້າເປັນພະຍານໃນພຣະນາມອັນສັກສິດຂອງພຣະເຢຊູຄຣິດ, ອາແມນ.