ໝາກໄມ້

ໂດຍ ແອວເດີ ນຽວ ແອວ ແອນເດີເຊັນ

ແຫ່ງກຸ່ມອັກຄະສາວົກສິບສອງ

ໃຫ້ຕັ້ງຕາຕັ້ງໃຈສະເໝີ ຢູ່ທີ່ພຣະຜູ້ຊ່ວຍໃຫ້ລອດ ພຣະເຢຊູຄຣິດ ແລະ ຄວາມສຸກນິລັນດອນ ທີ່ມີມາພຽງແຕ່ຜ່ານທາງພຣະອົງເທົ່ານັ້ນ.

ຂ້າພະເຈົ້າຮູ້ວ່າ ທ່ານກຳລັງຄິດຫຍັງຢູ່! ພຽງແຕ່ຜູ້ປາໄສອີກຄົນໜຶ່ງ ແລ້ວເຮົາຈະໄດ້ຍິນຈາກປະທານແນວສັນ. ໂດຍທີ່ຫວັງໃຫ້ທ່ານຕັ້ງໃຈຟັງຈັກສອງສາມນາທີ ຂະນະທີ່ເຮົາລໍຖ້າຟັງສາດສະດາທີ່ຮັກແພງຂອງເຮົາ, ຂ້າພະເຈົ້າຈຶ່ງໄດ້ເລືອກເອົາຫົວຂໍ້ທີ່ໜ້າສົນໃຈມາກ່າວ: ນັ້ນຄື ໝາກໄມ້.

ພ້ອມດ້ວຍສີສັນ, ເນື້ອ, ແລະ ຄວາມຫວານຂອງໝາກແບຣີ, ໝາກກ້ວຍ, ໝາກໂມ, ແລະ ໝາກມ່ວງ, ຫລື ໝາກໄມ້ທີ່ແປກໆຢ່າງອື່ນ ເຊັ່ນ ໝາກແຕງໜາມ ຫລື ໝາກພິລາ, ກໍໄດ້ເປັນໝາກໄມ້ທີ່ຖືວ່າເປັນອາຫານທີ່ແຊບຂະໜາດ ມາເປັນເວລາດົນນານແລ້ວ.

ໃນຊ່ວງການປະຕິບັດສາດສະໜາກິດຢູ່ໃນໂລກຂອງພຣະອົງ, ພຣະຜູ້ຊ່ວຍໃຫ້ລອດໄດ້ປຽບທຽບໝາກໄມ້ດີໃສ່ກັບສິ່ງທີ່ມີຄຸນຄ່ານິລັນດອນ. ພຣະອົງໄດ້ກ່າວວ່າ, “ພວກເຈົ້າຈະຮູ້ຈັກຄົນເຫລົ່ານີ້ດ້ວຍການກະທຳຂອງເຂົາ.”¹ “ຕົ້ນໄມ້ດີຍ່ອມເກີດໝາກດີ.”² ພຣະອົງໄດ້ຊຸກຍູ້ເຮົາໃຫ້ເຕົ້າໂຮມ “ຜົນລະປູກໄວ້ສຳລັບຊີວິດນິລັນດອນ.”³

ໃນຄວາມຝັນທີ່ແຈ້ງຊັດ ທີ່ເຮົາທຸກຄົນຮູ້ຈັກດີ ຢູ່ໃນພຣະຄຳພີມໍມອນ, ສາດສະດາລີໄຮ ໄດ້ເຫັນຕົວເອງຢູ່ໃນ “ຄວາມມືດ ແລະ ຄວາມເສົ້າໝອງຂອງຖິ່ນແຫ້ງແລ້ງກັນດານ.” ຢູ່ທີ່ນັ້ນມີ ອ່າງນ້ຳສົກກະປົກ, ໝອກແຫ່ງຄວາມມືດ, ທາງແປກປະຫລາດ, ແລະ ທາງຕ້ອງຫ້າມ, ພ້ອມທັງມີຮາວເຫລັກ⁴ ຍາວຢຽດ ຢູ່ໃນເສັ້ນທາງທີ່ຄັບ ແລະ ແຄບ ຊຶ່ງນຳໄປສູ່ຕົ້ນໄມ້ທີ່ສວຍງາມຕົ້ນໜຶ່ງ ຊຶ່ງ “ໝາກ [ຂອງມັນເຮັດໃຫ້] ຄົນເປັນສຸກ.” ໃນການເລົ່າຄວາມຝັນ, ລີໄຮໄດ້ກ່າວວ່າ, “ພໍ່ໄດ້ … ຮັບສ່ວນໝາກໄມ້. … ມັນຫວານທີ່ສຸດເໜືອກວ່າທຸກຢ່າງທີ່ພໍ່ເຄີຍກິນມາ. [ແລະ] ຈິດວິນຍານຂອງພໍ່ເຕັມໄປດ້ວຍ ຄວາມຊື່ນຊົມຢ່າງໃຫຍ່ຫລວງ.” ໝາກໄມ້ນີ້ ເປັນສິ່ງທີ່ “ເພິ່ງປາດຖະໜາ [ຫລາຍກວ່າ] ໝາກໄມ້ອື່ນໃດທັງສິ້ນ”⁵

ຄວາມໝາຍກ່ຽວກັບຕົ້ນໄມ້ ແລະ ໝາກໄມ້

ຕົ້ນໄມ້ຕົ້ນນີ້ ພ້ອມທັງໝາກໄມ້ປະເສີດຂອງມັນ ເປັນຕົວແທນໃຫ້ສິ່ງໃດ? ມັນເປັນຕົວແທນໃຫ້ “ຄວາມຮັກຂອງພຣະເຈົ້າ”⁶ ແລະ ປະກາດແຜນແຫ່ງການໄຖ່ທີ່ໜ້າອັດສະຈັນຂອງພຣະບິດາເທິງສະຫວັນຂອງເຮົາ. “ເພາະວ່າ ພຣະເຈົ້າຮັກໂລກຫລາຍທີ່ສຸດ ຈົນໄດ້ປະທານພຣະບຸດອົງດຽວຂອງພຣະອົງ ເພື່ອທຸກຄົນທີ່ວາງໃຈເຊື່ອໃນພຣະບຸດນັ້ນຈະບໍ່ຈິບຫາຍ ແຕ່ມີຊີວິດອັນຕະຫລອດໄປເປັນນິດ.”⁷

ໝາກໄມ້ປະເສີດນີ້ ໝາຍເຖິງພອນທີ່ປະເສີດຂອງການຊົດໃຊ້ ອັນຫາທີ່ປຽບບໍ່ໄດ້ຂອງພຣະຜູ້ຊ່ວຍໃຫ້ລອດ. ບໍ່ພຽງແຕ່ເຮົາຈະມີຊີວິດຄືນອີກ ຫລັງຈາກຊ່ວງມະຕະ, ແຕ່ຜ່ານທາງສັດທາໃນພຣະເຢຊູຄຣິດ, ການກັບໃຈຂອງເຮົາ, ແລະ ການຮັກສາພຣະບັນຍັດຂອງເຮົາ, ເຮົາຈະໄດ້ຮັບການໃຫ້ອະໄພຈາກບາບຂອງເຮົາ ແລະ ເຮົາຈະໄດ້ຢືນຢູ່ຢ່າງສະອາດ ແລະ ບໍລິສຸດ ຢູ່ຕໍ່ພຣະພັກຂອງພຣະບິດາ ແລະ ພຣະບຸດຂອງພຣະອົງໃນມື້ໜຶ່ງ.

ການຮັບສ່ວນໝາກໄມ້ຈາກຕົ້ນໄມ້ນັ້ນ ກໍໝາຍຄວາມວ່າ ເຮົາໄດ້ຮັບເອົາພິທີການ ແລະ ພັນທະສັນຍາຂອງພຣະກິດຕິຄຸນທີ່ຟື້ນຟູ—ໄດ້ຮັບບັບຕິສະມາ, ຮັບເອົາຂອງປະທານແຫ່ງພຣະວິນຍານບໍລິສຸດ, ແລະ ເຂົ້າໄປໃນບ້ານຂອງພຣະຜູ້ເປັນເຈົ້າ ເພື່ອຮັບເອົາຂອງປະທານສັກສິດ ພ້ອມດ້ວຍອຳນາດຈາກເບື້ອງບົນ. ຜ່ານທາງພຣະຄຸນຂອງພຣະເຢຊູຄຣິດ ແລະ ໂດຍການຮັກສາພັນທະສັນຍາຂອງເຮົາ, ເຮົາຈະໄດ້ຮັບຄຳສັນຍາທີ່ວັດແທກບໍ່ໄດ້ ຂອງການໄດ້ຢູ່ກັບຄອບຄົວທີ່ຊອບທຳຂອງເຮົາຕະຫລອດຊົ່ວນິລັນດອນ.⁸

ຈຶ່ງບໍ່ເປັນໜ້າສົງໃສເລີຍ ທີ່ທູດສະຫວັນໄດ້ບັນຍາຍໝາກໄມ້ນັ້ນວ່າ “ເປັນທີ່ປິຕິຍິນດີທີ່ສຸດແກ່ຈິດວິນຍານ.”⁹ ມັນເປັນແບບນັ້ນແທ້ໆ!

ການທ້າທາຍທີ່ຈະເປັນຄົນຈິງໃຈສະເໝີ

ດັ່ງທີ່ເຮົາທຸກຄົນໄດ້ຮຽນຮູ້, ແມ່ນແຕ່ຫລັງຈາກໄດ້ກິນໝາກໄມ້ປະເສີດຂອງພຣະກິດຕິຄຸນທີ່ຟື້ນຟູແລ້ວ, ການເປັນຄົນຈິງໃຈ ແລະ ຊື່ສັດສະເໝີຕໍ່ອົງພຣະເຢຊູຄຣິດເຈົ້າ ກໍຍັງເປັນເລື່ອງຍາກທີ່ຈະເຮັດຢູ່. ດັ່ງທີ່ເຮົາໄດ້ຍິນຫລາຍເທື່ອຢູ່ໃນກອງປະຊຸມນີ້, ເຮົາຈະປະເຊີນກັບສິ່ງລົບກວນ ແລະ ການຫລອກລວງ, ຄວາມສັບສົນ ແລະ ຄວາມວຸ້ນວາຍ, ສິ່ງລໍ້ໃຈ ແລະ ການລໍ້ລວງຢູ່ສະເໝີ ຊຶ່ງພະຍາຍາມດຶງເຮົາໄປຈາກພຣະຜູ້ຊ່ວຍໃຫ້ລອດ ແລະ ຄວາມສຸກ ແລະ ຄວາມສວຍງາມທີ່ເຮົາໄດ້ປະສົບ ໃນການຕິດຕາມພຣະອົງ.

ເປັນເພາະຄວາມຍາກລຳບາກນີ້, ຄວາມຝັນຂອງລີໄຮ ກໍຮ່ວມດ້ວຍສິ່ງເຕືອນໃຈນຳອີກ! ຢູ່ຟາກແມ່ນ້ຳ ມີອາຄານກວ້າງຂວາງ ພ້ອມທັງຜູ້ຄົນໃນທຸກໄວ ທີ່ກຳລັງຊີ້ມືເຍາະເຍີ້ຍ ແລະ ຫົວຂວັນຜູ້ຕິດຕາມພຣະເຢຊູຄຣິດຢູ່.

ຜູ້ຄົນຢູ່ໃນອາຄານຫລັງນັ້ນໄດ້ເຍາະເຍີ້ຍ ແລະ ຫົວຂວັນ ຜູ້ທີ່ຮັກສາພຣະບັນຍັດ, ຫວັງວ່າຈະເຮັດໃຫ້ເສື່ອມເສຍ ແລະ ເຍາະເຍີ້ຍສັດທາຂອງເຂົາເຈົ້າ ໃນພຣະເຢຊູຄຣິດ ແລະ ໃນພຣະກິດຕິຄຸນຂອງພຣະອົງ. ແລະ ເປັນເພາະຄຳເວົ້າໂຈມຕີ ດ້ວຍຄວາມສົງໃສ ແລະ ການດູຖູກຜູ້ທີ່ເຊື່ອ, ບາງຄົນທີ່ໄດ້ຊີມໝາກໄມ້ແລ້ວ ກໍເລີ່ມຕົ້ນຮູ້ສຶກອັບອາຍ ເນື່ອງດ້ວຍພຣະກິດຕິຄຸນທີ່ເຂົາເຈົ້າໄດ້ຮັບເອົາ. ການລໍ້ລວງຜິດໆຂອງໂລກ ໄດ້ລໍ້ໃຈເຂົາເຈົ້າ; ເຂົາເຈົ້າໄດ້ໜີໄປຈາກຕົ້ນໄມ້ ແລະ ໝາກໄມ້ ແລະ, ພຣະຄຳພີກ່າວວ່າ, “ຕົກລົງໄປໃນທາງຕ້ອງຫ້າມ ແລະ ສູນຫາຍໄປ.”¹⁰

ຢູ່ໃນໂລກຂອງເຮົາທຸກວັນນີ້, ພະນັກງານກໍ່ສ້າງຂອງຜູ້ປໍລະປັກ ກຳລັງທຳງານລ່ວງເວລາ, ເພື່ອເລັ່ງການຕໍ່ເຕີມໃສ່ອາຄານໃຫຍ່ ແລະ ກວ້າງຂວາງຫລັງນັ້ນ. ອາຄານດັ່ງກ່າວໄດ້ຂະຫຍາຍກວ້າງຂ້າມແມ່ນ້ຳ, ຫວັງເຂົ້າໄປໃນບ້ານເຮືອນຂອງເຮົາ, ຂະນະທີ່ຜູ້ຊີ້ມື ແລະ ຜູ້ເຍາະເຍີ້ຍຮ້ອງສະນັ່ນ ທັງເວັນ ແລະ ຄືນ ຢູ່ໃນລຳໂພງອິນເຕີເນັດ.¹¹

ປະທານແນວສັນ ໄດ້ອະທິບາຍວ່າ, “ຜູ້ປໍລະປັກໄດ້ເພີ່ມກຳລັງຢ່າງຫລວງຫລາຍ ເພື່ອລົບກວນປະຈັກພະຍານ ແລະ ຂັດຂວາງວຽກງານຂອງພຣະຜູ້ເປັນເຈົ້າ.”¹² ຂໍໃຫ້ເຮົາຈົ່ງຈື່ຈຳຄຳເວົ້າຂອງລີໄຮທີ່ວ່າ: “ພວກເຮົາບໍ່ໄດ້ຫົວຊາພວກເຂົາເລີຍ.”¹³

ເຖິງແມ່ນເຮົາບໍ່ຈຳເປັນຕ້ອງຢ້ານ, ແຕ່ເຮົາກໍຕ້ອງລະວັງ. ໃນບາງຄັ້ງ, ບາງສິ່ງທີ່ນ້ອຍໆ ກໍສາມາດປ່ຽນແປງຄວາມສົມດູນທາງວິນຍານຂອງເຮົາໄດ້. ຢ່າປ່ອຍໃຫ້ຄຳຖາມຂອງທ່ານ, ຄຳດູຖູກຂອງຄົນອື່ນ, ໝູ່ເພື່ອນທີ່ບໍ່ມີສັດທາ, ຫລື ຄວາມຜິດພາດທີ່ໂຊກຮ້າຍ ແລະ ຄວາມຜິດຫວັງ ພາທ່ານໜີໄປຈາກພອນທີ່ຫວານ, ບໍລິສຸດ, ແລະ ເປັນທີ່ເພິ່ງພໍໃຈຂອງຈິດວິນຍານ ທີ່ມາຈາກໝາກໄມ້ປະເສີດຂອງຕົ້ນນັ້ນ. ໃຫ້ຕັ້ງຕາຕັ້ງໃຈສະເໝີ ຢູ່ທີ່ພຣະຜູ້ຊ່ວຍໃຫ້ລອດ ພຣະເຢຊູຄຣິດ ແລະ ຄວາມສຸກນິລັນດອນ ທີ່ມີມາພຽງແຕ່ຜ່ານທາງພຣະອົງເທົ່ານັ້ນ.

ສັດທາຂອງເຈສັນ ຮອລ໌

ໃນເດືອນມິຖຸນາຜ່ານມານີ້, ແຄທີ ພັນລະຍາຂອງຂ້າພະເຈົ້າ ແລະ ຂ້າພະເຈົ້າໄດ້ໄປຮ່ວມງານສົ່ງສະການຂອງທ້າວເຈສັນ ຮອລ໌. ຕອນລາວເສຍຊີວິດ, ລາວມີອາຍຸໄດ້ 48 ປີ ແລະ ຮັບໃຊ້ເປັນປະທານກຸ່ມແອວເດີ.

ຕໍ່ໄປນີ້ແມ່ນຖ້ອຍຄຳຂອງທ້າວເຈສັນ ກ່ຽວກັບເຫດການໜຶ່ງ ທີ່ໄດ້ປ່ຽນແປງຊີວິດຂອງລາວ:

“[ຕອນອາຍຸ 15 ປີ] ຂ້ານ້ອຍ [ໄດ້] ຖືກອຸປະຕິເຫດໃນການກະໂດດນ້ຳ. … ຂ້ານ້ອຍກະດູກຄໍຫັກ ແລະ ກໍເປັນອຳມະພາດແຕ່ເອິກລົງໄປ. ຂ້ານ້ອຍເຄື່ອນຍ້າຍຂາບໍ່ໄດ້ ແລະ ແຂນກໍເໜັງຕີງໄດ້ໜ້ອຍໜຶ່ງ. ຂ້ານ້ອຍບໍ່ສາມາດຍ່າງ, ຢືນ, … ຫລື ກິນເອງ. ຂ້ານ້ອຍພໍຫາຍໃຈ ແລະ ເວົ້າໄດ້ໜ້ອຍໜຶ່ງ.”¹⁴

“‘ໂອ້ ພຣະບິດາ [ຜູ້ສະຖິດຢູ່ໃນສະຫວັນ],’ ຂ້ານ້ອຍອ້ອນວອນພຣະອົງ, ‘ຂໍໃຫ້ຂ້ານ້ອຍສາມາດໃຊ້ມືຂອງຂ້ານ້ອຍໄດ້ດ້ວຍເທີ້ນ, ເທົ່ານັ້ນຂ້ານ້ອຍກໍພໍໃຈແລ້ວ. ຈົ່ງເມດຕາຂ້ານ້ອຍດ້ວຍເທີ້ນ. …

“… ‘ໂອ້ ພຣະບິດາເຈົ້າ, ຂ້ານ້ອຍຍ່າງບໍ່ໄດ້ກໍບໍ່ເປັນຫຍັງ, ແຕ່ຂ້ານ້ອຍ [ອະທິຖານ] ຂໍໃຫ້ສາມາດໃຊ້ມືໄດ້.’”¹⁵

ທ້າວເຈສັນ ກໍຍັງບໍ່ສາມາດໃຊ້ມືຂອງລາວ. ທ່ານຄິດວ່າ ສຽງຈາກອາຄານໃຫຍ່ນັ້ນຈະເປັນແບບໃດ? “ເຈສັນ ຮອລ໌, ພຣະເຈົ້າບໍ່ໄດ້ຍິນຄຳອະທິຖານຂອງເຈົ້າ! ຖ້າຫາກພຣະເຈົ້າ ເປັນພຣະເຈົ້າແຫ່ງຄວາມຮັກ, ເປັນຫຍັງພຣະອົງຈຶ່ງປະເຈົ້າໄວ້ແບບນີ້? ເປັນຫຍັງຈຶ່ງມີສັດທາໃນພຣະຄຣິດ?” ເຈສັນ ຮອລ໌ ໄດ້ຍິນສຽງຂອງພວກເຂົາ ແຕ່ລາວບໍ່ໄດ້ຫົວຊາ. ກົງກັນຂ້າມ ລາວໄດ້ຊື່ນຊົມຢູ່ກັບໝາກໄມ້ຂອງຕົ້ນນັ້ນ. ສັດທາຂອງລາວໃນພຣະເຢຊູຄຣິດ ບໍ່ເຄີຍຫວັ່ນໄຫວ. ລາວໄດ້ຮຽນຈົບຈາກມະຫາວິທະຍາໄລ ແລະ ໄດ້ແຕ່ງງານກັບນາງໂຄເລັດ ໂຄແມນ ຢູ່ໃນພຣະວິຫານ ໂດຍບອກວ່ານາງເປັນເນື້ອຄູ່ຂອງລາວ.¹⁶ ຫລັງຈາກໄດ້ແຕ່ງງານກັນເປັນເວລາ 16 ປີ, ການມະຫັດສະຈັນອີກຢ່າງໜຶ່ງໄດ້ເກີດຂຶ້ນ, ທ້າວໂຄແມນ ລູກຊາຍທີ່ປະເສີດຂອງເຂົາເຈົ້າໄດ້ເກີດມາ.

ເຂົາເຈົ້າພັດທະນາສັດທາຂອງເຂົາເຈົ້າໄດ້ແນວໃດ? ນາງໂຄເລັດ ໄດ້ອະທິບາຍວ່າ: “ພວກຂ້ານ້ອຍໄວ້ວາງໃຈໃນແຜນຂອງພຣະເຈົ້າ. ແລະ ມັນໃຫ້ຄວາມຫວັງແກ່ພວກຂ້ານ້ອຍ. ພວກຂ້ານ້ອຍຮູ້ວ່າ [ໃນມື້ໜຶ່ງ] ເຈສັນຈະຫາຍດີເປັນປົກກະຕິ. … ພວກຂ້ານ້ອຍຮູ້ວ່າ ພຣະເຈົ້າໄດ້ຈັດຕຽມພຣະຜູ້ຊ່ວຍໃຫ້ລອດໄວ້ໃຫ້ພວກຂ້ານ້ອຍ, ຊຶ່ງການເສຍສະລະຊົດໃຊ້ຂອງພຣະອົງ ຊ່ວຍໃຫ້ພວກຂ້ານ້ອຍສາມາດດຳເນີນໄປໜ້າ ຂະນະທີ່ພວກຂ້ານ້ອຍຢາກຍອມແພ້.”¹⁷

ໃນການກ່າວຢູ່ໃນງານສົ່ງສະການຂອງທ້າວເຈສັນ, ທ້າວໂຄແມນ ອາຍຸ 10 ປີ ໄດ້ເວົ້າວ່າ ພໍ່ຂອງລາວໄດ້ສິດສອນລາວວ່າ: “ພຣະບິດາເທິງສະຫວັນ [ມີ] ແຜນສຳລັບພວກຂ້ານ້ອຍ, ຊີວິດຢູ່ໃນໂລກນີ້ຈະດີຂະໜາດ, ແລະ ພວກຂ້ານ້ອຍຈະສາມາດຢູ່ນຳກັນເປັນຄອບຄົວ. … ແຕ່ … ພວກຂ້ານ້ອຍຕ້ອງຜ່ານຜ່າສິ່ງທີ່ຍາກກ່ອນ ແລະ ພວກຂ້ານ້ອຍຈະເຮັດຄວາມຜິດ.”

ທ້າວໂຄແມນ ໄດ້ເວົ້າຕື່ມວ່າ: “ພຣະບິດາເທິງສະຫວັນໄດ້ສົ່ງພຣະເຢຊູ ພຣະບຸດຂອງພຣະອົງມາສູ່ໂລກ. ພາລະກິດຂອງພຣະອົງແມ່ນເປັນຜູ້ທີ່ດີພ້ອມ. ເພື່ອປິ່ນປົວຜູ້ຄົນ. ເພື່ອຮັກເຂົາເຈົ້າ. ແລະ ເພື່ອຮັບທຸກທໍລະມານແທນຄວາມເຈັບປວດ, ຄວາມໂສກເສົ້າ, ແລະ ຄວາມຜິດບາບຂອງເຮົາທຸກຄົນ. ແລ້ວ ພຣະອົງໄດ້ສິ້ນພຣະຊົນເພື່ອເຮົາ.” ທ້າວໂຄແມນ ໄດ້ເວົ້າຕື່ມວ່າ, “ເພາະພຣະອົງໄດ້ເຮັດສິ່ງນີ້, ພຣະເຢຊູຈຶ່ງຮູ້ຈັກວ່າຂ້ານ້ອຍຮູ້ສຶກແນວໃດ ໃນເວລານີ້.

“ສາມວັນຫລັງຈາກພຣະເຢຊູໄດ້ສິ້ນພຣະຊົນ, ພຣະອົງ … ໄດ້ຟື້ນຄືນພຣະຊົນ ພ້ອມດ້ວຍພຣະກາຍທີ່ສົມບູນ. ສິ່ງນີ້ສຳຄັນຕໍ່ຂ້ານ້ອຍ ເພາະຂ້ານ້ອຍຮູ້ວ່າ … ຮ່າງກາຍຂອງ [ພໍ່ຂ້ານ້ອຍ] ຈະສົມບູນ ແລະ ພວກຂ້ານ້ອຍຈະໄດ້ຢູ່ນຳກັນເປັນຄອບຄົວ.”

ທ້າວໂຄແມນ ໄດ້ສະຫລຸບວ່າ: “ທຸກຄືນ ນັບແຕ່ຂ້ານ້ອຍເກີດມາ, ພໍ່ຂ້ານ້ອຍໄດ້ເວົ້າກັບຂ້ານ້ອຍວ່າ, ‘ພໍ່ຮັກລູກເດີ, ພຣະບິດາເທິງສະຫວັນຮັກລູກ, ແລະ ລູກກໍເປັນເດັກດີ.’”¹⁸

ຄວາມສຸກມີມາເພາະພຣະເຢຊູຄຣິດ

ປະທານຣະໂຊ ເອັມ ແນວສັນ ໄດ້ບັນຍາຍເຖິງເຫດຜົນທີ່ຄອບຄົວ ຮອລ໌ ຮູ້ສຶກມີຄວາມສຸກ ແລະ ມີຄວາມຫວັງ. ເພິ່ນໄດ້ກ່າວວ່າ:

“ຄວາມສຸກທີ່ເຮົາຮູ້ສຶກ ບໍ່ຂຶ້ນກັບສະຖານະການໃນຊີວິດຂອງເຮົາ ແຕ່ມັນຂຶ້ນກັບວ່າ ເຮົາເອົາໃຈໃສ່ຕໍ່ສິ່ງໃດ ໃນຊີວິດຂອງເຮົາ.

“ເມື່ອເຮົາເຮັດໃຫ້ຊີວິດຂອງເຮົາເອົາໃຈໃສ່ຕໍ່ແຜນແຫ່ງຄວາມລອດຂອງພຣະເຈົ້າ, … ແລະ ພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ, ເຮົາສາມາດຮູ້ສຶກເຖິງຄວາມສຸກໄດ້ ບໍ່ວ່າແມ່ນຫຍັງຈະເກີດຂຶ້ນ—ຫລື ບໍ່ເກີດຂຶ້ນກໍຕາມ—ໃນຊີວິດຂອງເຮົາ. ຄວາມສຸກມາຈາກພຣະອົງ ແລະ ເພາະພຣະອົງ. ພຣະອົງເປັນແຫລ່ງຂອງຄວາມສຸກທັງໝົດ. …

“ຖ້າຫາກເຮົາເບິ່ງໄປທາງໂລກ … , ເຮົາຈະບໍ່ຮູ້ຈັກຄວາມສຸກນັ້ນເລີຍ. … [ຄວາມສຸກ] ເປັນຂອງປະທານທີ່ມາຈາກຄວາມພະຍາຍາມຢ່າງຕັ້ງໃຈ ທີ່ຈະດຳລົງຊີວິດທີ່ຊອບທຳ, ຕາມວິທີທີ່ພຣະເຢຊູຄຣິດໄດ້ສອນ.”¹⁹

ຄຳສັນຍາຂະນະທີ່ທ່ານຫວນກັບ

ຖ້າຫາກທ່ານບໍ່ໄດ້ຮັບສ່ວນໝາກໄມ້ຈາກຕົ້ນໄມ້ນັ້ນດົນແລ້ວ, ຈົ່ງຮູ້ໄວ້ວ່າ ພຣະພາຫາ (ແຂນ) ຂອງພຣະຜູ້ຊ່ວຍໃຫ້ລອດຍັງເດ່ອອກມາຫາທ່ານຢູ່. ພຣະອົງໄດ້ກວັກເອົາທ່ານດ້ວຍຄວາມຮັກວ່າ, “ຈົ່ງກັບໃຈ ແລະ ມາຫາເຮົາ.”²⁰ ໝາກໄມ້ຂອງພຣະອົງມີຢູ່ຢ່າງຫລວງຫລາຍ ແລະ ມັນສຸກຢູ່ສະເໝີ. ທ່ານຈະຫາຊື້ມັນບໍ່ໄດ້ດ້ວຍເງິນ, ແລະ ທຸກຄົນທີ່ຢາກໄດ້ມັນດ້ວຍຄວາມຈິງໃຈ ຈະບໍ່ຖືກປະຕິເສດ.²¹

ຖ້າຫາກທ່ານປາດຖະໜາທີ່ຈະຫວນກັບຄືນມາຫາຕົ້ນໄມ້ ແລະ ຮັບສ່ວນໝາກໄມ້ອີກ, ຈົ່ງເລີ່ມຕົ້ນດ້ວຍການອະທິຖານຫາພຣະບິດາເທິງສະຫວັນຂອງທ່ານ. ໃຫ້ເຊື່ອໃນພຣະເຢຊູຄຣິດ ແລະ ໃນອຳນາດຂອງການເສຍສະລະຊົດໃຊ້ຂອງພຣະອົງ. ຂ້າພະເຈົ້າສັນຍາກັບທ່ານວ່າ ເມື່ອທ່ານຫວັງເພິ່ງພຣະຜູ້ຊ່ວຍໃຫ້ລອດ “ໃນຄວາມນຶກຄິດທຸກຢ່າງ,”²² ແລ້ວໝາກໄມ້ຂອງຕົ້ນນັ້ນຈະເປັນຂອງທ່ານຄືນອີກ, ແຊບທີ່ສຸດ, ປິຕິຍິນດີທີ່ສຸດແກ່ຈິດວິນຍານຂອງທ່ານ, “ເປັນສິ່ງທີ່ຍິ່ງໃຫຍ່ທີ່ສຸດໃນຂອງປະທານຈາກພຣະເຈົ້າ.”²³

ແອວເດີ ແອນເດີເຊັນ ກັບໄພ່ພົນຊາວປອກຕຸຍການ ຢູ່ທີ່ການອຸທິດພຣະວິຫານ ລີສເບັນ

ສາມອາທິດຜ່ານມານີ້, ຂ້າພະເຈົ້າໄດ້ເຫັນພາບອັນສົມບູນແບບຂອງການຊື່ນຊົມກັບໝາກໄມ້ຂອງພຣະຜູ້ຊ່ວຍໃຫ້ລອດ, ຂະນະທີ່ ແຄທີ ກັບຂ້າພະເຈົ້າໄດ້ໄປຮ່ວມການອຸທິດພຣະວິຫານ ລີສເບັນ ປອກຕຸຍການ. ຄວາມຈິງຂອງການຟື້ນຟູພຣະກິດຕິຄຸນ ໄດ້ເປີດຕໍ່ປະເທດປອກຕຸຍການ ໃນປີ 1975 ເມື່ອເສລີພາບເລື່ອງສາດສະໜາໄດ້ຖືກອະນຸຍາດ. ໄພ່ພົນທີ່ດີເລີດຫລາຍຄົນ ຜູ້ໄດ້ຊີມໝາກໄມ້ຕອນຍັງບໍ່ມີສະມາຊິກຫລາຍເທື່ອ, ບໍ່ມີຕຶກໂບດເທື່ອ, ແລະ ບໍ່ມີພຣະວິຫານຕັ້ງຢູ່ໃກ້ກວ່າ 1,000 ໄມ (1,600 ກິໂລແມັດ) ໄດ້ປິຕິຍິນດີກັບພວກເຮົາ ຊຶ່ງບັດນີ້ໝາກໄມ້ປະເສີດນັ້ນ ມີຢູ່ໃນບ້ານຂອງພຣະຜູ້ເປັນເຈົ້າ ໃນເມືອງລີສເບັນ, ປະເທດປອກຕຸຍການ. ຂ້າພະເຈົ້າໃຫ້ກຽດ ແລະ ນັບຖືໄພ່ພົນຍຸກສຸດທ້າຍເຫລົ່ານີ້ ຜູ້ໄດ້ຍຶດໝັ້ນຢູ່ທີ່ພຣະຜູ້ຊ່ວຍໃຫ້ລອດ.

ພຣະຜູ້ຊ່ວຍໃຫ້ລອດໄດ້ກ່າວວ່າ, “ພວກທີ່ຍັງຢູ່ໃນເຮົາ ແລະ ເຮົາຢູ່ໃນເຂົາ ຈະເກີດຜົນຫລາຍ; ດ້ວຍວ່າບໍ່ມີເຮົາແລ້ວ ພວກທ່ານເຮັດຫຍັງບໍ່ໄດ້.”²⁴

ໃນຄຳປາໄສມື້ເຊົ້ານີ້ ຕໍ່ສະມາຊິກຂອງສາດສະໜາຈັກຕະຫລອດທົ່ວໂລກ, ປະທານແນວສັນ ໄດ້ກ່າວວ່າ, “ອ້າຍເອື້ອຍນ້ອງທັງຫລາຍ, ທ່ານເປັນແບບຢ່າງທີ່ມີຊີວິດຢູ່ຂອງໝາກຜົນທີ່ມາຈາກການເຮັດຕາມຄຳສອນຂອງພຣະເຢຊູຄຣິດ.” ແລ້ວເພິ່ນໄດ້ກ່າວຕື່ມວ່າ: “ຂໍຂອບໃຈທ່ານຫລາຍໆ! ຂ້າພະເຈົ້າຮັກທ່ານທັງຫລາຍ!”²⁵

ພວກເຮົາຮັກທ່ານ, ປະທານແນວສັນ.

ຂ້າພະເຈົ້າເປັນພະຍານເຖິງອຳນາດແຫ່ງການເປີດເຜີຍ ທີ່ຢູ່ກັບສາດສະດາທີ່ຮັກແພງຂອງເຮົາ. ເພິ່ນເປັນສາດສະດາຂອງພຣະເຈົ້າ. ເຊັ່ນດຽວກັບລີໄຮໃນສະໄໝບູຮານ, ປະທານຣະໂຊ ເອັມ ແນວສັນ ໄດ້ກວັກເອົາເຮົາ ແລະ ຄອບຄົວທັງໝົດຂອງພຣະເຈົ້າ ໃຫ້ມາ ແລະ ຮັບເອົາໝາກໄມ້ຈາກຕົ້ນນັ້ນ. ຂໍໃຫ້ເຮົາຈົ່ງຖ່ອມຕົວ ແລະ ມີຄວາມເຂັ້ມແຂງທີ່ຈະເຮັດຕາມຄຳແນະນຳຂອງເພິ່ນ.

ຂ້າພະເຈົ້າເປັນພະຍານຢ່າງຖ່ອມຕົວວ່າ ພຣະເຢຊູຄຣິດເປັນພຣະບຸດຂອງພຣະເຈົ້າ. ຄວາມຮັກຂອງພຣະອົງ, ອຳນາດຂອງພຣະອົງ, ແລະ ພຣະຄຸນຂອງພຣະອົງ ນຳທຸກສິ່ງທີ່ມີຄ່າອັນຍາວນານມາໃຫ້. ຂ້າພະເຈົ້າເປັນພະຍານ ໃນພຣະນາມຂອງພຣະເຢຊູຄຣິດ, ອາແມນ.