ຄຳນຳ

ຄຳສອນ ແລະ ພັນທະສັນຍາເປັນການຮວບຮວມຂອງການເປີດເຜີຍອັນສູງສົ່ງ ແລະ ການປະກາດທີ່ດົນໃຈ ຊຶ່ງມອບໃຫ້ເພື່ອການສ້າງຕັ້ງ ແລະ ເປັນຂໍ້ບັງຄັບຂອງອານາຈັກຂອງພຣະເຈົ້າຢູ່ເທິງແຜ່ນດິນໂລກ ໃນຍຸກສຸດທ້າຍ. ເຖິງແມ່ນສ່ວນໃຫຍ່ຂອງພາກຕ່າງໆຈະເຈາະຈົງໃສ່ສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ແຕ່ຂ່າວສານ, ຄຳເຕືອນ, ແລະ ຄຳແນະນຳ ແມ່ນເພື່ອຜົນປະໂຫຍດຂອງມະນຸດຊາດທັງປວງ ແລະ ບັນຈຸການເຊື້ອເຊີນທຸກຜູ້ຄົນຢູ່ທຸກແຫ່ງຫົນໃຫ້ຟັງສຸລະສຽງຂອງອົງພຣະເຢຊູຄຣິດເຈົ້າ, ກ່າວຕໍ່ພວກເຂົາສຳລັບຄວາມຢູ່ເຢັນເປັນສຸກຝ່າຍໂລກຂອງພວກເຂົາ ແລະ ຄວາມລອດອັນເປັນນິດຂອງພວກເຂົາ.

ການເປີດເຜີຍສ່ວນໃຫຍ່ຢູ່ໃນການຮວບຮວມນີ້ ແມ່ນໄດ້ຮັບຜ່ານທາງໂຈເຊັບ ສະມິດ ຜູ້ລູກ ສາດສະດາ ແລະ ປະທານຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍຄົນທຳອິດ. ການເປີດເຜີຍ ສ່ວນອື່ນໆໄດ້ຖືກພິມອອກມາຜ່ານທາງຜູ້ສືບຕຳແໜ່ງຂອງເພິ່ນຢູ່ໃນຝ່າຍປະທານ (ເບິ່ງ ຄພ 135, 136, ແລະ 138, ແລະ ຂໍ້ປະກາດຢ່າງເປັນທາງການ 1 ແລະ 2).

ພຣະຄຳພີຄຳສອນ ແລະ ພັນທະສັນຍາ ເປັນເຫລັ້ມໜຶ່ງໃນໜັງສືມາດຕະຖານຂອງສາດສະໜາຈັກ ຊຶ່ງຮວມຢູ່ກັບພຣະຄຣິສຕະທຳຄຳພີທີ່ສັກສິດ, ພຣະຄຳພີມໍມອນ, ແລະ ພຣະຄຳພີໄຂ່ມຸກອັນລ້ຳຄ່າ. ເຖິງຢ່າງໃດກໍຕາມ, ຄຳສອນ ແລະ ພັນທະສັນຍາ ເປັນໜັງສືພິເສດ ເພາະມັນບໍ່ແມ່ນການແປຂອງບັນທຶກບູຮານ, ແຕ່ມີທີ່ມາຈາກສະໄໝປະຈຸບັນ ແລະ ຖືກມອບໃຫ້ໂດຍພຣະເຈົ້າ ຜ່ານທາງສາດສະດາທີ່ຖືກເລືອກໄວ້ຂອງພຣະອົງ ສຳລັບການຟື້ນຟູວຽກງານທີ່ສັກສິດ ແລະ ການສ້າງຕັ້ງອານາຈັກຂອງພຣະເຈົ້າ ຢູ່ເທິງແຜ່ນດິນໂລກໃນວັນເວລານີ້. ໃນການເປີດເຜີຍ, ເຮົາໄດ້ຍິນສຸລະສຽງອັນອ່ອນໂຍນແຕ່ໜັກແໜ້ນຂອງອົງພຣະເຢຊູຄຣິດເຈົ້າ, ກ່າວອີກເທື່ອໜຶ່ງໃນຍຸກສະໄໝຂອງຄວາມສົມບູນແຫ່ງເວລາ; ແລະ ວຽກງານທີ່ໄດ້ເລີ່ມຕົ້ນໃນນັ້ນ ເປັນການຕຽມຕໍ່ການສະເດັດມາຄັ້ງທີສອງຂອງພຣະອົງ, ໃນການບັນລຸຄວາມສຳເລັດ ແລະ ເພື່ອໃຫ້ສອດຄ່ອງຕາມຖ້ອຍຄຳຂອງສາດສະດາທີ່ສັກສິດທັງຫລາຍ ນັບແຕ່ການເລີ່ມຕົ້ນຂອງໂລກ.

ໂຈເຊັບ ສະມິດ ຜູ້ລູກ ເກີດໃນວັນທີ 23 ເດືອນທັນວາ, 1805, ໃນເມືອງຊາໂຣນ, ເຂດວິນເຊີ, ລັດເວີໝ້ອນ. ຄາວຍັງນ້ອຍ, ເພິ່ນໄດ້ຍ້າຍໄປຢູ່ເມືອງໜຶ່ງ ຊຶ່ງປະຈຸບັນນີ້ເອີ້ນວ່າ ແມນເຈດສະເຕີ ນຳຄອບຄົວຂອງເພິ່ນ, ໃນພາກຕາເວັນຕົກ ຂອງລັດນິວຢອກ. ໃນຂະນະທີ່ເພິ່ນອາໄສຢູ່ທີ່ນັ້ນ ໃນລະດູໃບໄມ້ປົ່ງຂອງປີ 1820, ຕອນເພິ່ນມີອາຍຸໄດ້ສິບສີ່ປີ, ເພິ່ນໄດ້ເຫັນພາບທີ່ມາໃຫ້ເຫັນຄັ້ງທຳອິດ, ໃນປະສົບການນັ້ນ ພຣະເຈົ້າ, ພຣະບິດາຜູ້ສະຖິດນິລັນດອນ, ແລະ ພຣະບຸດຂອງພຣະອົງ ພຣະເຢຊູຄຣິດ ໄດ້ມາຢ້ຽມຢາມເພິ່ນ. ໃນພາບນັ້ນ ເພິ່ນຖືກບອກວ່າ ສາດສະໜາຈັກທີ່ແທ້ຈິງຂອງພຣະເຢຊູຄຣິດ ທີ່ໄດ້ຖືກຈັດຕັ້ງຂຶ້ນໃນສະໄໝພຣະຄຳພີໃໝ່, ແລະ ຊຶ່ງໄດ້ປະຕິບັດຄວາມສົມບູນຂອງພຣະກິດຕິຄຸນ ບໍ່ມີຢູ່ເທິງແຜ່ນດິນໂລກອີກແລ້ວ. ການສະແດງໃຫ້ປະຈັກ ອັນສູງສົ່ງຢ່າງອື່ນໆໄດ້ເກີດຂຶ້ນຫລັງຈາກນັ້ນ ຊຶ່ງເພິ່ນໄດ້ຮັບການສິດສອນໂດຍເຫລົ່າທູດ; ມັນຖືກສະແດງແກ່ເພິ່ນວ່າ ພຣະເຈົ້າມີວຽກງານພິເສດໃຫ້ເພິ່ນເຮັດຢູ່ເທິງແຜ່ນດິນໂລກ ແລະ ວ່າ ຜ່ານເພິ່ນສາດສະໜາຈັກຂອງພຣະເຢຊູຄຣິດຈະຖືກຟື້ນຟູສູ່ແຜ່ນດິນໂລກ.

ເມື່ອເວລາຜ່ານໄປ, ໂຈເຊັບ ສະມິດ ໄດ້ແປ ແລະ ພິມພຣະຄຳພີມໍມອນດ້ວຍຄວາມຊ່ວຍເຫລືອຈາກສະຫວັນ. ໃນເວລາດຽວກັນເພິ່ນກັບອໍລີເວີ ຄາວເດີຣີ ໄດ້ຖືກແຕ່ງຕັ້ງສູ່ຖານະປະໂລຫິດແຫ່ງອາໂຣນໂດຍໂຢຮັນບັບຕິສະໂຕ ໃນເດືອນພຶດສະພາ 1829 (ເບິ່ງ ຄພ 13), ແລະ ບໍ່ດົນຈາກນັ້ນ ພວກເພິ່ນກໍໄດ້ ຖືກແຕ່ງຕັ້ງສູ່ຖານະປະໂລຫິດແຫ່ງເມນຄີເສເດັກໂດຍເປໂຕ, ຢາໂກໂບ, ແລະ ໂຢຮັນ ອັກຄະສາວົກໃນສະໄໝບູຮານ (ເບິ່ງ ຄພ 27:12). ການແຕ່ງຕັ້ງອື່ນໆໄດ້ເກີດຂຶ້ນຫລັງຈາກນັ້ນ ຊຶ່ງໃນນັ້ນຂໍກະແຈແຫ່ງຖານະປະໂລຫິດໄດ້ຖືກມອບໃຫ້ໂດຍໂມເຊ, ເອລີຢາ, ອີລາຍ, ແລະ ສາດສະດາໃນສະໄໝບູຮານຫລາຍທ່ານ (ເບິ່ງ ຄພ 110; 128:18, 21). ການແຕ່ງຕັ້ງດັ່ງກ່າວ, ຕາມຈິງແລ້ວ, ເປັນການຟື້ນຟູສິດອຳນາດອັນສູງສົ່ງໃຫ້ແກ່ມະນຸດຢູ່ເທິງແຜ່ນດິນໂລກ. ໃນວັນທີ 6 ເດືອນເມສາ, 1830, ພາຍໃຕ້ການນຳພາຈາກສະຫວັນ, ສາດສະດາໂຈເຊັບ ສະມິດ ໄດ້ຈັດຕັ້ງສາດສະໜາຈັກຂຶ້ນ, ແລະ ດັ່ງນັ້ນສາດສະໜາຈັກທີ່ແທ້ຈິງຂອງພຣະເຢຊູຄຣິດຈຶ່ງດຳເນີນອີກເທື່ອໜຶ່ງເປັນສະຖາບັນໃນທ່າມກາງມະນຸດ, ດ້ວຍສິດອຳນາດເພື່ອສິດສອນພຣະກິດຕິຄຸນ ແລະ ປະຕິບັດພິທີການແຫ່ງຄວາມລອດ. (ເບິ່ງ ຄພ 20 ແລະ ໄຂ່ມຸກອັນລ້ຳຄ່າ, ໂຈເຊັບ ສະມິດ—ປະຫວັດ 1.)

ການເປີດເຜີຍທີ່ສັກສິດເຫລົ່ານີ້ໄດ້ຮັບເປັນຄຳຕອບຕໍ່ຄຳອະທິຖານ, ໃນເວລາທີ່ຈຳເປັນ, ແລະ ອອກມາຈາກສະຖານະການຂອງຊີວິດຈິງທີ່ກ່ຽວພັນກັບຜູ້ຄົນແທ້ໆ. ສາດສະດາ ແລະ ເພື່ອນຮ່ວມງານຂອງເພິ່ນໄດ້ສະແຫວງຫາການນຳພາອັນສູງສົ່ງ, ແລະ ການເປີດເຜີຍເຫລົ່ານີ້ເປັນພະຍານວ່າ ພວກເພິ່ນໄດ້ຮັບມັນ. ໃນການເປີດເຜີຍ, ເຮົາເຫັນການຟື້ນຟູ ແລະ ການເປີດພຣະກິດຕິຄຸນຂອງພຣະເຢຊູຄຣິດໃຫ້ເຫັນ ແລະ ການນຳເຂົ້າສູ່ຍຸກສະໄໝຂອງຄວາມສົມບູນແຫ່ງເວລາ. ໃນການເປີດເຜີຍນີ້ ກໍໄດ້ສະແດງໃຫ້ເຫັນ ເຖິງການເຄື່ອນຍ້າຍໄປທາງທິດຕາເວັນຕົກນຳອີກຂອງສາດສະໜາຈັກຈາກລັດນິວຢອກ ແລະ ລັດເພັນໂຊເວເນຍ ຫາລັດໂອໄຮໂອ, ຫາລັດມີເຊີຣີ, ຫາລັດອິລິນອຍ, ແລະ ໃນທີ່ສຸດທ້າຍ ຫາອ່າວອັນກວ້າງໃຫຍ່ໃນພາກຕາເວັນຕົກຂອງອາເມຣິກາ ແລະ ຄວາມທຸກຍາກລຳບາກຢ່າງໜັກຂອງໄພ່ພົນຂອງພຣະເຈົ້າ ໃນຄວາມພະຍາຍາມທີ່ຈະສ້າງຊີໂອນຂຶ້ນເທິງແຜ່ນດິນໂລກໃນສະໄໝປະຈຸບັນ.

ພາກຕົ້ນຫລາຍໆພາກກ່ຽວຂ້ອງກັບເລື່ອງລາວການແປ ແລະ ການພິມພຣະຄຳພີມໍມອນ (ເບິ່ງ ພາກ 3, 5, 10, 17, ແລະ 19). ພາກຕໍ່ຈາກນັ້ນບາງພາກ ສະທ້ອນເຖິງວຽກງານຂອງສາດສະດາໂຈເຊັບ ສະມິດ ໃນການເຮັດວຽກງານການແປທີ່ໄດ້ຮັບການດົນໃຈສຳລັບພຣະຄຣິສຕະທຳຄຳພີ, ຊຶ່ງໃນລະຫວ່າງນັ້ນໄດ້ຮັບພາກທີ່ມີຄຳສອນອັນສຳຄັນຫລາຍໆພາກ (ເບິ່ງ, ຍົກຕົວຢ່າງ, ພາກ 37, 45, 73, 76, 77, 86, 91, ແລະ 132, ແຕ່ລະພາກມີຄວາມສຳພັນໂດຍກົງກັບການແປພຣະຄຣິສຕະທຳຄຳພີ).

ໃນການເປີດເຜີຍ, ຄຳສອນຂອງພຣະກິດຕິຄຸນໄດ້ຖືກສະເໜີພ້ອມດ້ວຍຄຳອະທິບາຍກ່ຽວກັບເລື່ອງລາວອັນເປັນພື້ນຖານເຊັ່ນທຳມະຊາດຂອງຝ່າຍພຣະເຈົ້າ, ຕົ້ນກຳເນີດຂອງມະນຸດ, ຄວາມຈິງແທ້ຂອງຊາຕານ, ຈຸດປະສົງຂອງຄວາມເປັນມະຕະ, ຄວາມຈຳເປັນໃນການເຊື່ອຟັງ, ຄວາມຈຳເປັນໃນການກັບໃຈ, ການທຳງານຂອງພຣະວິນຍານສັກສິດ, ພິທີການ ແລະ ການປະຕິບັດທີ່ກ່ຽວຂ້ອງກັບຄວາມລອດ, ຊາຕາກຳຂອງແຜ່ນດິນໂລກ, ສະພາບອະນາຄົດຂອງມະນຸດຫລັງຈາກການຟື້ນຄືນຊີວິດ ແລະ ການພິພາກສາ, ຄວາມເປັນນິລັນດອນຂອງຄວາມສຳພັນຂອງການແຕ່ງງານ, ແລະ ທຳມະຊາດນິລັນດອນຂອງຄອບຄົວ. ເຊັ່ນດຽວກັນ, ການຄ່ອຍໆເຜີຍໂຄງສ້າງການບໍລິຫານງານຂອງສາດສະໜາຈັກຈາກການເອີ້ນອະທິການ, ຝ່າຍປະທານສູງສຸດ, ສະພາອັກຄະສາວົກສິບສອງ, ແລະ ສາວົກເຈັດສິບ ແລະ ການຈັດຕັ້ງຕຳແໜ່ງໜ້າທີ່ຄວບຄຸມ ແລະ ກຸ່ມອື່ນໆ. ທ້າຍສຸດ ປະຈັກພະຍານທີ່ໃຫ້ໄວ້ເຖິງພຣະເຢຊູຄຣິດ—ຄວາມສັກສິດຂອງພຣະອົງ, ຄວາມເດຊານຸພາບຂອງພຣະອົງ, ຄວາມດີພ້ອມທຸກຢ່າງຂອງພຣະອົງ, ຄວາມຮັກຂອງພຣະອົງ, ແລະ ອຳນາດແຫ່ງການໄຖ່ຂອງພຣະອົງ—ເຮັດໃຫ້ໜັງສືເຫລັ້ມນີ້ລ້ຳຄ່າສຳລັບຄອບຄົວມະນຸດ ແລະ “ມີຄ່າຫລາຍກວ່າຄວາມຮັ່ງມີຂອງທັງແຜ່ນດິນໂລກ” (ເບິ່ງ ຫົວຂໍ້ ຂອງ ຄພ 70).

ຕົ້ນເດີມ ການເປີດເຜີຍໄດ້ຖືກບັນທຶກໄວ້ໂດຍ ຜູ້ຂຽນຂອງໂຈເຊັບ ສະມິດ, ແລະ ສະມາຊິກຂອງສາດສະໜາຈັກ ໄດ້ເອົາໜັງສືດັ່ງກ່າວ ທີ່ຂຽນດ້ວຍມືໄປໃຫ້ກັນອ່ານ ດ້ວຍຄວາມກະຕືລືລົ້ນ. ເພື່ອສ້າງບັນທຶກຖາວອນ, ຜູ້ຂຽນຈຶ່ງໄດ້ຈັດພິມການເປີດເຜີຍເຫລົ່ານີ້ເປັນປຶ້ມບັນທຶກຕົ້ນສະບັບ, ຊຶ່ງຜູ້ນຳຂອງສາດສະໜາຈັກ ໄດ້ໃຊ້ໃນການຕຽມການເປີດເຜີຍສຳລັບການພິມ. ໂຈເຊັບ ແລະ ໄພ່ພົນຂອງພຣະເຈົ້າໃນສະໄໝເລີ່ມຕົ້ນ ໄດ້ນັບຖືການເປີດເຜີຍໃນແບບດຽວກັນກັບເຂົາເຈົ້ານັບຖືສາດສະໜາຈັກວ່າ: ດຳລົງຢູ່, ປ່ຽນແປງເລື້ອຍໄປ, ແລະ ຂຶ້ນຢູ່ກັບການຫລໍ່ຫລອມ ດ້ວຍການເປີດເຜີຍເພີ່ມເຕີມ. ເຂົາເຈົ້າຍັງຮັບຮູ້ວ່າ ອາດມີຂໍ້ຄວາມທີ່ຜິດໂດຍບໍ່ເຈດຕະນາ ໃນຂັ້ນຕອນຂອງການເຮັດສຳເນົາ ແລະ ຕຽມສຳລັບການຈັດພິມ. ດັ່ງນັ້ນ, ໃນກອງປະຊຸມໃຫຍ່ ປີ 1831 ສາດສະໜາຈັກ ຈຶ່ງໄດ້ຂໍໃຫ້ ໂຈເຊັບ ສະມິດ “ດັດແປງຂໍ້ຄວາມທີ່ຜິດ ຫລື ຄວາມຜິດເຫລົ່ານັ້ນ ຊຶ່ງເພິ່ນອາດພົບເຫັນໂດຍຜ່ານທາງພຣະວິນຍານສັກສິດ.”

ຫລັງຈາກການເປີດເຜີຍໄດ້ຖືກທົບທວນ ແລະ ດັດແປງແລ້ວ, ສະມາຊິກຂອງສາດສະໜາຈັກ ໃນລັດມີເຊີຣີ ຈຶ່ງໄດ້ເລີ່ມຕົ້ນພິມປຶ້ມທີ່ຊື່ວ່າ A Book of Commandments for the Government of the Church of Christ, (ແປວ່າ ໜັງສືພຣະບັນຍັດສຳລັບການປົກຄອງສາດສະໜາຈັກຂອງພຣະຄຣິດ) ຊຶ່ງບັນຈຸການເປີດເຜີຍຊ່ວງທຳອິດຂອງສາດສະດາ. ຄວາມພະຍາຍາມເທື່ອທຳອິດ ທີ່ຈະພິມການເປີດເຜີຍເຫລົ່ານີ້ ໄດ້ສິ້ນສຸດລົງ, ເຖິງຢ່າງໃດກໍຕາມ, ເມື່ອກຸ່ມອັນຕະພານໄດ້ທຳລາຍໂຮງພິມຂອງໄພ່ພົນຂອງພຣະເຈົ້າໃນເຂດແຈ໊ກສັນ ໃນວັນທີ 20 ເດືອນກໍລະກົດ, 1833.

ຫລັງຈາກໄດ້ຍິນເລື່ອງໂຮງພິມໃນລັດມີເຊີຣີຖືກທຳລາຍ, ໂຈເຊັບ ສະມິດ ແລະ ຜູ້ນຳຄົນອື່ນໆຂອງສາດສະໜາຈັກ ຈຶ່ງໄດ້ຕຽມຈັດພິມການເປີດເຜີຍ ຢູ່ໃນເມືອງເຄີດແລນ, ລັດໂອໄຮໂອ. ໃນການດັດແປງຂໍ້ຄວາມທີ່ຜີດຄືນໃໝ່, ໃນການອະທິບາຍຂໍ້ຄວາມໃຫ້ແຈ່ມແຈ້ງກວ່າເກົ່າ, ແລະ ໃນການຮັບຮູ້ຄວາມກ້າວໜ້າ ໃນສາດສະໜາຈັກ ເລື່ອງຄຳສອນ ແລະ ການຈັດຕັ້ງ, ໂຈເຊັບ ສະມິດ ຈຶ່ງໄດ້ເປັນຜູ້ຄວບຄຸມການແກ້ໄຂການເປີດເຜີຍບາງຕອນ ເພື່ອຕຽມມັນສຳລັບການພິມ ໃນປີ 1835 ເປັນປຶ້ມຊື່ວ່າ Doctrine and Covenants of the Church of the Latter Day Saints (ຄຳສອນ ແລະ ພັນທະສັນຍາ ຂອງ ສາດສະໜາຈັກຂອງໄພ່ພົນຍຸກສຸດທ້າຍ). ໂຈເຊັບ ສະມິດ ໄດ້ອະນຸມັດໃຫ້ຈັດພິມ ຄຳສອນ ແລະ ພັນທະສັນຍາ ອີກຊຸດສະບັບ, ຊຶ່ງໄດ້ຖືກຈັດພິມ ຫລັງຈາກສາດສະດາໄດ້ຖືກຂ້າ ບໍ່ພຽງເທົ່າໃດເດືອນ ໃນປີ 1844.

ໄພ່ພົນຍຸກສຸດທ້າຍລຸ້ນທຳອິດ ໄດ້ນັບຖື ແລະ ຖືວ່າການເປີດເຜີຍ ເປັນຂ່າວສານຈາກພຣະເຈົ້າ. ໃນໂອກາດໜຶ່ງ ໃນທ້າຍປີ 1831, ແອວເດີຂອງສາດສະໜາຈັກຫລາຍຄົນ ໄດ້ສະແດງປະຈັກພະຍານຢ່າງໜັກແໜ້ນວ່າ ພຣະຜູ້ເປັນເຈົ້າໄດ້ເປັນພະຍານແກ່ຈິດວິນຍານຂອງເຂົາເຈົ້າ ເຖິງຄວາມຈິງຂອງການເປີດເຜີຍດັ່ງກ່າວ. ປະຈັກພະຍານນັ້ນ ໄດ້ຖືກພິມຢູ່ໃນ ຄຳສອນ ແລະ ພັນທະສັນຍາ ຊຸດສະບັບ 1835 ເປັນປະຈັກພະຍານທີ່ຂຽນໂດຍ ອັກຄະສາວົກສິບສອງ ທີ່ວ່າ:

ປະຈັກພະຍານຂອງ
ອັກຄະສາວົກສິບສອງທີ່ມີຕໍ່ຄວາມຈິງຂອງ
ໜັງສືຄຳສອນ ແລະ ພັນທະສັນຍາ

ປະຈັກພະຍານຂອງພະຍານທີ່ມີຕໍ່ໜັງສືພຣະບັນຍັດຂອງພຣະຜູ້ເປັນເຈົ້າ, ຊຶ່ງພຣະບັນຍັດເຫລົ່ານີ້ພຣະອົງໄດ້ມອບໃຫ້ແກ່ສາດສະໜາຈັກຂອງພຣະອົງຜ່ານໂຈເຊັບ ສະມິດ, ຜູ້ລູກ, ຜູ້ໄດ້ຖືກແຕ່ງຕັ້ງໂດຍສຽງຂອງສາດສະໜາຈັກເພື່ອຈຸດປະສົງນີ້:

ສະນັ້ນ ພວກເຮົາຈຶ່ງຮູ້ສຶກເຕັມໃຈທີ່ຈະສະແດງປະຈັກພະຍານຕໍ່ທົ່ວໂລກຂອງມະນຸດຊາດ, ຕໍ່ມະນຸດສະໂລກທັງໝົດຂອງຜືນແຜ່ນດິນໂລກ, ວ່າພຣະຜູ້ເປັນເຈົ້າໄດ້ເປັນພະຍານແກ່ຈິດວິນຍານຂອງພວກເຮົາ, ຜ່ານທາງພຣະວິນຍານບໍລິສຸດ ຊຶ່ງສາຍສ່ອງມາຍັງພວກເຮົາ, ວ່າພຣະບັນຍັດເຫລົ່ານີ້ໄດ້ຖືກມອບໃຫ້ໂດຍການດົນໃຈຈາກພຣະເຈົ້າ, ແລະ ເປັນປະໂຫຍດສຳລັບມະນຸດທັງປວງ ແລະ ເປັນຄວາມຈິງແທ້ໆ.

ພວກເຮົາຂໍມອບປະຈັກພະຍານນີ້ຕໍ່ໂລກ, ໂດຍທີ່ພຣະຜູ້ເປັນເຈົ້າເປັນຜູ້ຊ່ວຍຂອງພວກເຮົາ; ແລະ ໂດຍຜ່ານພຣະຄຸນຂອງພຣະເຈົ້າອົງເປັນພຣະບິດາ, ແລະ ພຣະບຸດຂອງພຣະອົງ, ພຣະເຢຊູຄຣິດ, ທີ່ພວກເຮົາໄດ້ຮັບອະນຸຍາດໃຫ້ມີສິດທິພິເສດນີ້ໃນການສະແດງປະຈັກພະຍານຕໍ່ໂລກ, ຊຶ່ງໃນການນີ້ພວກເຮົາປິຕິຍິນດີຢ່າງຫລວງຫລາຍ, ໂດຍອະທິຖານຫາພຣະຜູ້ເປັນເຈົ້າສະເໝີເພື່ອລູກຫລານມະນຸດຈະໄດ້ຮັບຜົນປະໂຫຍດໂດຍການນີ້.

ລາຍຊື່ຂອງອັກຄະສາວົກສິບສອງມີດັ່ງນີ້:

ທອມມັສ ບີ ມາສ໌
ເດວິດ ດັບເບິນຢູ ແພດເຕັນ
ບຣິກຳ ຢັງ
ຮີເບີ ຊີ ຄິມໂບ
ອໍສັນ ຮາຍດ໌
ວິວລຽມ ອີ ມັກລີລິນ
ພາລີ ພີ ພະແຣັດ
ລຸກ ແອັສ ຈອນສັນ
ວິວລຽມ ສະມິດ
ອໍສັນ ພະແຣັດ
ຈອນ ແອັຟ ບອຍຕັນ
ໄລມັນ ອີ ຈອນສັນ

ໃນການພິມ ຄຳສອນ ແລະ ພັນທະສັນຍາ ຄັ້ງຕໍ່ໆໄປ, ການເປີດເຜີຍ ຫລື ເລື່ອງລາວອື່ນໆທີ່ບັນທຶກໄວ້ໄດ້ຖືກຕື່ມໃສ່ນຳ, ດັ່ງທີ່ໄດ້ຮັບ ແລະ ຖືກຮັບຮູ້ຈາກການຊຸມນຸມ ຫລື ກອງປະຊຸມໃຫຍ່ຂອງສາດສະໜາຈັກ. ຊຸດສະບັບ 1876, ຊຶ່ງຕຽມໂດຍ ແອວເດີ ອໍສັນ ພະແຣັດ ພາຍໃຕ້ການຊີ້ນຳຂອງ ບຣິກຳ ຢັງ, ໄດ້ຖືກຮຽບຮຽງການເປີດເຜີຍ ຕາມວັນເດືອນປີ ຂອງເຫດການທີ່ເກີດຂຶ້ນ ແລະ ໄດ້ຕື່ມເຕີມຫົວຂໍ້ໃໝ່ໃສ່ນຳ ພ້ອມດ້ວຍຄຳນຳກ່ຽວກັບປະຫວັດສາດ.

ໂດຍເລີ່ມຕົ້ນຈາກສະບັບທີ່ພິມໃນປີ 1835, ບົດຮຽນເຈັດບົດກ່ຽວກັບວິຊາການສາດສະໜາກໍໄດ້ຖືກຮວມໃສ່ນຳ; ຊື່ວ່າ Lectures on Faith (ຄຳບັນຍາຍເລື່ອງສັດທາ). ສິ່ງເຫລົ່ານີ້ໄດ້ຖືກຈັດຕຽມໄວ້ເພື່ອໃຊ້ຢູ່ໃນໂຮງຮຽນຂອງສາດສະດາໃນເມືອງເຄີດແລນ, ລັດໂອໄຮໂອ, ຈາກປີ 1834 ເຖິງປີ 1835. ເຖິງແມ່ນວ່າຈະມີປະໂຫຍດໃນຄຳສອນ ແລະ ຄຳແນະນຳ, ຄຳບັນຍາຍເຫລົ່ານີ້ໄດ້ຖືກຕັດອອກຈາກຄຳສອນ ແລະ ພັນທະສັນຍານັບຕັ້ງແຕ່ສະບັບພິມໃນປີ 1921 ເພາະວ່າມັນບໍ່ໄດ້ຖືກມອບໃຫ້ ຫລື ສະເໜີເປັນການເປີດເຜີຍຕໍ່ທັງສາດສະໜາຈັກ.

ໃນຄຳສອນ ແລະ ພັນທະສັນຍາ ສະບັບເປັນພາສາອັງກິດ ຊຸດສະບັບ 1981, ມີເອກະສານສາມສະບັບ ທີ່ໄດ້ຖືກຕື່ມໃສ່ ເປັນເທື່ອທຳອິດ. ນັ້ນຄື ພາກທີ, 137 ແລະ 138, ຊຶ່ງບອກເຖິງເລື່ອງລາວກ່ຽວກັບຄວາມລອດຂອງຄົນຕາຍ, ແລະ ຂໍ້ປະກາດຢ່າງເປັນທາງການ 2, ຊຶ່ງປະກາດວ່າ ສະມາຊິກຜູ້ຊາຍທຸກຄົນຂອງສາດສະໜາຈັກທີ່ມີຄ່າຄວນ ສາມາດໄດ້ຮັບການແຕ່ງຕັ້ງ ສູ່ຖານະປະໂລຫິດ ໂດຍບໍ່ແຍກແຍະເຊື້ອຊາດ ແລະ ຜິວພັນ.

ຂໍ້ຄວາມທີ່ຜິດຜ່ານມາ ກໍໄດ້ຖືກດັດແປງ ຢູ່ໃນ ຄຳສອນ ແລະ ພັນທະສັນຍາ ຊຸດໃໝ່ແຕ່ລະຊຸດ ແລະ ຂໍ້ມູນໃໝ່ກໍໄດ້ຖືກຕື່ມໃສ່, ໂດຍສະເພາະ ຢູ່ໃນຫົວຂໍ້ພາກປະຫວັດສາດ. ຊຸດລ່າສຸດໃນປະຈຸບັນ ມີທັງວັນທີ ແລະ ຊື່ຂອງສະຖານທີ່ ແລະ ຂໍ້ຄວາມທີ່ຜິດ ກໍໄດ້ຖືກດັດແປງ. ການປ່ຽນແປງເຫລົ່ານີ້ໄດ້ກະທຳຂຶ້ນເພື່ອເຮັດໃຫ້ເນື້ອຫາສອດຄ່ອງກັບຂໍ້ມູນຂອງປະຫວັດສາດ ທີ່ຖືກຕ້ອງຫລາຍທີ່ສຸດ. ຈຸດເດັ່ນອື່ນໆຂອງສະບັບລ່າສຸດນີ້ ແມ່ນຮ່ວມດ້ວຍແຜນທີ່ ທີ່ປັບປຸງໃໝ່ ຊຶ່ງສະແດງໃຫ້ເຫັນສະຖານທີ່ສຳຄັນຕ່າງໆ ບ່ອນທີ່ໄດ້ຮັບການເປີດເຜີຍ, ພ້ອມທັງ ຮູບພາບໃໝ່ ຂອງສະຖານທີ່ປະຫວັດສາດຂອງສາດສະໜາຈັກ, ຂໍ້ອ້າງອີງໃສ່ກັບພຣະຄຳພີ, ຫົວພາກ, ແລະ ບົດສະຫລຸບເນື້ອຫາຂອງເລື່ອງ, ທຸກຢ່າງໄດ້ຖືກຈັດໄວ້ເພື່ອຊ່ວຍເຫລືອຜູ້ອ່ານໃຫ້ເຂົ້າໃຈ ແລະ ປິຕິຍິນດີໃນຂ່າວສານຂອງພຣະຜູ້ເປັນເຈົ້າຕາມທີ່ໄດ້ໃຫ້ໄວ້ໃນຄຳສອນ ແລະ ພັນທະສັນຍາ. ຂໍ້ມູນສຳລັບຫົວພາກ ໄດ້ຖືກຄັດລອກເອົາມາຈາກ ຕົ້ນສະບັບຂອງປະຫວັດສາດຂອງສາດສະໜາຈັກ ແລະ ຈາກ History of the Church (ປະຫວັດສາດຂອງສາດສະໜາຈັກ) ທີ່ຈັດພິມແລ້ວ (ຮ່ວມກັນ ຢູ່ໃນຫົວພາກ ແມ່ນກ່າວເຖິງປະຫວັດຂອງໂຈເຊັບ ສະມິດ) ແລະ ໃນ Joseph Smith Papers (ເອກະສານຂອງໂຈເຊັບ ສະມິດ).