ພາກທີ 59
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ, ໃນຊີໂອນ, ເຂດແຈ໊ກສັນ, ລັດມີເຊີຣີ, ວັນທີ 7 ເດືອນສິງຫາ, 1831. ກ່ອນບັນທຶກການເປີດເຜີຍນີ້, ແຜ່ນດິນໄດ້ຖືກອຸທິດຖວາຍ, ດັ່ງທີ່ພຣະຜູ້ເປັນເຈົ້າໄດ້ແນະນຳໄວ້, ແລະ ສະຖານທີ່ສຳລັບການສ້າງພຣະວິຫານໃນອະນາຄົດໄດ້ຖືກອຸທິດ. ໃນມື້ທີ່ໄດ້ຮັບການເປີດເຜີຍນີ້, ພໍລີ ໄນ້ ພັນລະຍາຂອງໂຈເຊັບ ໄນ້, ຜູ້ພໍ່, ໄດ້ເສຍຊີວິດໄປ, ເປັນສະມາຊິກຄົນທຳອິດ ທີ່ໄດ້ເສຍຊີວິດໃນຊີໂອນ. ສະມາຊິກໃນສະໄໝເລີ່ມຕົ້ນໄດ້ອະທິບາຍລັກສະນະຂອງການເປີດເຜີຍນີ້ວ່າເປັນ “ຄຳແນະນຳແກ່ໄພ່ພົນຂອງພຣະເຈົ້າເຖິງວິທີຮັກສາວັນຊະບາໂຕ ແລະ ເຖິງວິທີຖືສິນອົດເຂົ້າ ແລະ ອະທິຖານ.”
1–4, ໄພ່ພົນຂອງພຣະເຈົ້າທີ່ຊື່ສັດໃນຊີໂອນຈະໄດ້ຮັບພອນ; 5–8, ເຂົາເຈົ້າຕ້ອງຮັກ ແລະ ຮັບໃຊ້ພຣະຜູ້ເປັນເຈົ້າ ແລະ ຮັກສາພຣະບັນຍັດຂອງພຣະອົງ; 9–19, ໂດຍການຮັກສາວັນຂອງພຣະຜູ້ເປັນເຈົ້າໃຫ້ສັກສິດ, ໄພ່ພົນຂອງພຣະເຈົ້າໄດ້ຮັບພອນທາງຮ່າງກາຍ ແລະ ທາງວິນຍານ; 20–24, ຄົນຊອບທຳໄດ້ຮັບສັນຍາວ່າຈະມີສັນຕິສຸກຢູ່ໃນໂລກນີ້ ແລະ ຊີວິດນິລັນດອນຢູ່ໃນໂລກທີ່ຈະມາເຖິງ.
1 ຈົ່ງເບິ່ງ, ພຣະຜູ້ເປັນເຈົ້າໄດ້ກ່າວ, ຄົນທີ່ຂຶ້ນມາຫາແຜ່ນດິນນີ້ເພາະການທີ່ ເຫັນແກ່ລັດສະໝີພາບຂອງເຮົາແຕ່ຢ່າງດຽວ, ຕາມຄຳບັນຊາຂອງເຮົາ ຍ່ອມເປັນສຸກ.
2 ເພາະຄົນທີ່ມີຊີວິດຢູ່ຈະໄດ້ຮັບແຜ່ນດິນໂລກເປັນ ມູນມໍລະດົກ, ແລະ ຄົນທີ່ ຕາຍໄປແລ້ວ ຈະໄດ້ພັກຜ່ອນຈາກວຽກງານທັງໝົດຂອງພວກເຂົາ, ແລະ ວຽກງານຂອງພວກເຂົາຈະຕິດຕາມພວກເຂົາໄປ; ແລະ ພວກເຂົາຈະໄດ້ຮັບ ມົງກຸດໃນ ຜາສາດຂອງພຣະບິດາຂອງເຮົາ, ຊຶ່ງເຮົາໄດ້ຕຽມໄວ້ໃຫ້ພວກເຂົາແລ້ວ.
3 ແທ້ຈິງແລ້ວ, ຄົນທີ່ຕີນຂອງເຂົາຢືນຢູ່ເທິງແຜ່ນດິນຊີໂອນ, ຜູ້ທີ່ເຊື່ອຟັງຕໍ່ພຣະກິດຕິຄຸນຂອງເຮົາຍ່ອມເປັນສຸກ; ເພາະເຂົາຈະໄດ້ຮັບສິ່ງທີ່ດີຂອງແຜ່ນດິນໂລກເປັນລາງວັນ, ແລະ ມັນຈະນຳອອກມາ ດ້ວຍກຳລັງຂອງມັນ.
4 ແລະ ພວກເຂົາຈະໄດ້ຮັບການສວມມົງກຸດດ້ວຍພອນຈາກເບື້ອງເທິງນຳອີກ, ແທ້ຈິງແລ້ວ, ແລະ ດ້ວຍບັນຍັດທີ່ບໍ່ແມ່ນໜ້ອຍ, ແລະ ດ້ວຍ ການເປີດເຜີຍໃນເວລາທີ່ເໝາະສົມຂອງມັນ—ເຂົາເຫລົ່ານັ້ນທີ່ ຊື່ສັດ ແລະ ພາກພຽນຕໍ່ໜ້າເຮົາ.
5 ດັ່ງນັ້ນ, ເຮົາຈຶ່ງມອບບັນຍັດຂໍ້ໜຶ່ງໃຫ້ແກ່ພວກເຂົາ, ໂດຍກ່າວດັ່ງນີ້: ຈົ່ງ ຮັກພຣະຜູ້ເປັນເຈົ້າອົງເປັນພຣະເຈົ້າຂອງເຈົ້າດ້ວຍສຸດ ໃຈຂອງເຈົ້າ, ດ້ວຍສຸດພະລັງ, ຄວາມຄິດ, ແລະ ກຳລັງຂອງເຈົ້າ; ແລະ ໃນພຣະນາມຂອງພຣະເຢຊູຄຣິດ ໃຫ້ເຈົ້າ ຮັບໃຊ້ພຣະອົງ.
6 ຈົ່ງຮັກ ເພື່ອນມະນຸດເໝືອນຮັກຕົນເອງ. ຢ່າ ລັກ; ທັງຢ່າ ຫລິ້ນຊູ້, ທັງຢ່າ ຂ້າຄົນ, ຫລື ເຮັດສິ່ງໃດໆທີ່ຄ້າຍຄືກັນນັ້ນ.
7 ຈົ່ງ ຂອບພຣະໄທພຣະຜູ້ເປັນເຈົ້າອົງເປັນພຣະເຈົ້າຂອງເຈົ້າໃນທຸກສິ່ງ.
8 ຈົ່ງຖວາຍ ເຄື່ອງບູຊາແດ່ພຣະຜູ້ເປັນເຈົ້າອົງເປັນພຣະເຈົ້າຂອງເຈົ້າໃນ ຄວາມຊອບທຳ, ແມ່ນແຕ່ດ້ວຍໃຈທີ່ຊອກຊ້ຳ ແລະ ວິນຍານທີ່ສຳນຶກຜິດ.
9 ແລະ ເພື່ອວ່າເຈົ້າຈະສາມາດຮັກສາຕົນເອງໃຫ້ ປາດສະຈາກມົນທິນຂອງໂລກໄດ້ຫລາຍກວ່າເກົ່າ, ຈົ່ງໄປຍັງບ້ານແຫ່ງການອະທິຖານ ແລະ ຖວາຍສິນລະລຶກຂອງເຈົ້າໃນ ວັນສັກສິດຂອງເຮົາ;
10 ເພາະຕາມຈິງແລ້ວ ນີ້ຄືມື້ທີ່ກຳນົດໄວ້ໃຫ້ເຈົ້າເພື່ອພັກຜ່ອນຈາກວຽກງານຂອງເຈົ້າ, ແລະ ເພື່ອ ສະແດງຄວາມຈົງຮັກພັກດີແດ່ພຣະຜູ້ສູງສຸດ;
11 ເຖິງຢ່າງໃດກໍຕາມ ຈົ່ງຖວາຍຄຳປະຕິຍານຂອງເຈົ້າໃນຄວາມຊອບທຳທຸກມື້ ແລະ ທຸກເວລາ;
12 ແຕ່ຈົ່ງຈື່ຈຳໄວ້ວ່າໃນມື້ນີ້, ວັນຂອງພຣະຜູ້ເປັນເຈົ້າ, ຈົ່ງຖວາຍ ເຄື່ອງບູຊາຂອງເຈົ້າ ແລະ ສິນລະລຶກຂອງເຈົ້າແດ່ພຣະຜູ້ສູງສຸດ, ສາລະພາບບາບຂອງເຈົ້າຕໍ່ອ້າຍນ້ອງຂອງເຈົ້າ, ແລະ ຕໍ່ພຣະພັກຂອງພຣະຜູ້ເປັນເຈົ້າ.
13 ແລະ ໃນມື້ນີ້ ຈົ່ງຢ່າເຮັດສິ່ງອື່ນ, ພຽງແຕ່ໃຫ້ອາຫານຂອງເຈົ້າຖືກຈັດຕຽມດ້ວຍໃຈທີ່ເຫັນແກ່ພຣະອົງເທົ່ານັ້ນ ເພື່ອວ່າການ ຖືສິນອົດເຂົ້າຂອງເຈົ້າຈະສົມບູນ, ຫລື ອີກຄຳໜຶ່ງ, ເພື່ອ ຄວາມຊື່ນຊົມຂອງເຈົ້າຈະເຕັມປ່ຽມ.
14 ຕາມຈິງແລ້ວ, ນີ້ເປັນການຖືສິນອົດເຂົ້າ ແລະ ການອະທິຖານ, ຫລື ອີກຄຳໜຶ່ງ, ການປິຕິຍິນດີ ແລະ ການອະທິຖານ.
15 ແລະ ຕາບໃດທີ່ເຈົ້າເຮັດສິ່ງເຫລົ່ານີ້ດ້ວຍ ຄວາມຂອບພຣະໄທ, ດ້ວຍ ໃຈ ແລະ ໃບໜ້າ ທີ່ຊື່ນບານ, ບໍ່ແມ່ນ ດ້ວຍສຽງ ຫົວເຮຮາ, ເພາະນີ້ເປັນບາບ, ແຕ່ດ້ວຍຄວາມຍິນດີໃນໃຈ ແລະ ໃບໜ້າທີ່ຊື່ນບານ—
16 ແທ້ຈິງແລ້ວ ເຮົາກ່າວວ່າ ຕາບໃດທີ່ເຈົ້າເຮັດສິ່ງນີ້, ຄວາມສົມບູນຂອງແຜ່ນດິນໂລກຈະເປັນຂອງເຈົ້າ, ສັດໃນທົ່ງ ແລະ ນົກໃນອາກາດ, ແລະ ສິ່ງທີ່ໄຕ່ຂຶ້ນຕົ້ນໄມ້ ແລະ ຍ່າງຢູ່ເທິງແຜ່ນດິນໂລກ;
17 ແທ້ຈິງແລ້ວ, ແລະ ສະໝຸນໄພ, ແລະ ສິ່ງທີ່ດີ ຊຶ່ງເກີດຈາກແຜ່ນດິນໂລກ, ບໍ່ວ່າຈະເປັນເພື່ອອາຫານ ຫລື ເພື່ອເຄື່ອງນຸ່ງຫົ່ມ, ຫລື ເພື່ອບ້ານເຮືອນ, ຫລື ເພື່ອເລົ້າ, ຫລື ເພື່ອສວນໝາກໄມ້, ຫລື ເພື່ອສວນຜັກ, ຫລື ເພື່ອສວນອະງຸ່ນ;
18 ແທ້ຈິງແລ້ວ, ທຸກສິ່ງທີ່ເກີດຈາກ ແຜ່ນດິນໂລກ, ໃນລະດູຂອງມັນ, ໄດ້ເກີດຂຶ້ນເພື່ອເປັນປະໂຫຍດ ແລະ ເພື່ອການໃຊ້ສອຍຂອງມະນຸດ, ທັງເພື່ອເປັນສິ່ງປະທັບຕາ ແລະ ຍິນດີໃນໃຈນຳອີກ;
19 ແທ້ຈິງແລ້ວ, ເພື່ອເປັນອາຫານ ແລະ ເປັນເຄື່ອງນຸ່ງຫົ່ມ, ເພື່ອລົດຊາດ ແລະ ເພື່ອກິ່ນ, ເພື່ອເພີ່ມກຳລັງໃຫ້ຮ່າງກາຍ ແລະ ເພື່ອເຮັດໃຫ້ຈິດວິນຍານມີຊິວິດຊີວາ.
20 ແລະ ມັນເປັນສິ່ງພໍພຣະໄທຕໍ່ພຣະເຈົ້າທີ່ພຣະອົງໄດ້ປະທານສິ່ງເຫລົ່ານີ້ທັງໝົດໃຫ້ແກ່ມະນຸດ; ເພາະທຸກສິ່ງໄດ້ຖືກສ້າງຂຶ້ນເພື່ອໃຫ້ໃຊ້ສອຍ, ດ້ວຍການພິຈາລະນາ, ບໍ່ໃຫ້ເກີນຂອບເຂດ, ທັງບໍ່ແມ່ນໂດຍການຂົ່ມຂູ່ກັນ.
21 ແລະ ບໍ່ມີສິ່ງໃດທີ່ມະນຸດຈະເຮັດໃຫ້ພຣະເຈົ້າ ຂຸ່ນເຄືອງ, ຫລື ເຮັດໃຫ້ພຣະອົງພຣະພິໂລດຕໍ່ຜູ້ໃດ, ຍົກເວັ້ນແຕ່ຜູ້ທີ່ ບໍ່ສາລະພາບວ່າພຣະຫັດຂອງພຣະອົງຢູ່ໃນທຸກສິ່ງທັງປວງ, ແລະ ບໍ່ເຊື່ອຟັງຕໍ່ພຣະບັນຍັດຂອງພຣະອົງ.
22 ຈົ່ງເບິ່ງ, ນີ້ເປັນໄປຕາມກົດ ແລະ ຕາມສາດສະດາ; ດັ່ງນັ້ນ, ຢ່າລົບກວນເຮົາອີກກ່ຽວກັບເລື່ອງນີ້.
23 ແຕ່ຈົ່ງຮຽນຮູ້ວ່າ ຄົນທີ່ເຮັດວຽກງານແຫ່ງ ຄວາມຊອບທຳຈະໄດ້ຮັບ ລາງວັນຂອງເຂົາ, ແມ່ນແຕ່ ສັນຕິສຸກໃນໂລກນີ້, ແລະ ຊີວິດນິລັນດອນໃນໂລກທີ່ຈະມາເຖິງ.
24 ເຮົາ, ພຣະຜູ້ເປັນເຈົ້າ, ກ່າວມັນໄວ້ດັ່ງນີ້, ແລະ ພຣະວິນຍານໄດ້ເປັນພະຍານ. ອາແມນ.