ພາກທີ 62
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ, ຢູ່ແຄມຝັ່ງແມ່ນ້ຳມີເຊີຣີ ທີ່ເມືອງຊາຣິຕັນ, ລັດມີເຊີຣີ, ວັນທີ 13 ເດືອນສິງຫາ, 1831. ໃນມື້ນີ້ສາດສະດາ ແລະ ກຸ່ມຂອງເພິ່ນ, ຜູ້ພວມເດີນທາງຈາກເມືອງອິນດີເພັນເດັນສ໌ ຫາ ເມືອງເຄີດແລນ, ໄດ້ພົບກັບແອວເດີຫລາຍຄົນຜູ້ພວມເດີນທາງໄປຫາແຜ່ນດິນຊີໂອນ, ແລະ, ຫລັງຈາກໄດ້ທັກທາຍກັນດ້ວຍຄວາມຊື່ນຊົມແລ້ວ, ກໍໄດ້ຮັບການເປີດເຜີຍນີ້.
1–3, ປະຈັກພະຍານໄດ້ຖືກບັນທຶກໄວ້ໃນສະຫວັນ; 4–9, ແອວເດີຕ້ອງເດີນທາງ ແລະ ສັ່ງສອນຕາມການພິຈາລະນາ ແລະ ດັ່ງທີ່ໄດ້ຮັບການຊີ້ນຳຈາກພຣະວິນຍານ.
1 ຈົ່ງເບິ່ງ, ແລະ ຈົ່ງເຊື່ອຟັງ, ໂອ້ ພວກເຈົ້າແອວເດີຂອງສາດສະໜາຈັກຂອງເຮົາ, ພຣະຜູ້ເປັນເຈົ້າອົງເປັນພຣະເຈົ້າຂອງພວກເຈົ້າໄດ້ກ່າວ, ແມ່ນແຕ່ພຣະເຢຊູຄຣິດ, ຜູ້ ວິງວອນແທນພວກເຈົ້າ, ຜູ້ຮູ້ຈັກຄວາມອ່ອນແອຂອງມະນຸດ ແລະ ຮູ້ຈັກວິທີ ຊ່ວຍເຫລືອຄົນທີ່ຖືກ ລໍ້ລວງ.
2 ແລະ ຕາມຄວາມຈິງແລ້ວ ສາຍຕາຂອງເຮົາຈ້ອງມອງຜູ້ຄົນທີ່ຍັງບໍ່ໄດ້ຂຶ້ນໄປຫາແຜ່ນດິນຊີໂອນເທື່ອ; ດັ່ງນັ້ນ ພາລະກິດຂອງພວກເຈົ້າຍັງບໍ່ທັນສຳເລັດ.
3 ເຖິງຢ່າງໃດກໍຕາມ, ພວກເຈົ້າໄດ້ຮັບພອນແລ້ວ, ເພາະ ປະຈັກພະຍານຊຶ່ງພວກເຈົ້າໄດ້ສະແດງ ຖືກ ບັນທຶກໄວ້ຢູ່ໃນສະຫວັນ ເພື່ອໃຫ້ເຫລົ່າທູດເບິ່ງ; ແລະ ເຂົາເຈົ້າມີຄວາມປິຕິຍິນດີນຳພວກເຈົ້າ, ແລະ ບາບຂອງພວກເຈົ້າໄດ້ຖືກອະໄພໃຫ້ແລ້ວ.
4 ແລະ ບັດນີ້ຈົ່ງເດີນທາງຕໍ່ໄປ. ຈົ່ງໄປເຕົ້າໂຮມກັນຢູ່ແຜ່ນດິນ ຊີໂອນ; ແລະ ຈົ່ງຮ່ວມຊຸມນຸມ ແລະ ປິຕິຍິນດີນຳກັນ, ແລະ ຖວາຍສິນລະລຶກແດ່ພຣະຜູ້ສູງສຸດ.
5 ແລະ ຈາກນັ້ນໃຫ້ພວກເຈົ້າກັບຄືນໄປກ່າວຄຳພະຍານ, ແທ້ຈິງແລ້ວ, ແມ່ນແຕ່ພ້ອມກັນທຸກຄົນ, ຫລື ເປັນຄູ່ໆ, ດັ່ງທີ່ພວກເຈົ້າເຫັນວ່າດີ, ມັນບໍ່ສຳຄັນສຳລັບເຮົາ; ຂໍພຽງແຕ່ໃຫ້ຊື່ສັດ, ແລະ ປະກາດຂ່າວອັນໜ້າຊື່ນຊົມແກ່ຜູ້ອາໄສຂອງແຜ່ນດິນໂລກ, ຫລື ທ່າມກາງບ່ອນຊຸມນຸມຂອງຄົນຊົ່ວ.
6 ຈົ່ງເບິ່ງ, ເຮົາ, ພຣະຜູ້ເປັນເຈົ້າ, ໄດ້ພາພວກເຈົ້າມາຮ່ວມກັນເພື່ອຄຳສັນຍາຈະສຳເລັດຜົນ, ເພື່ອວ່າຄົນຊື່ສັດໃນບັນດາພວກເຈົ້າຈະຖືກຮັກສາໄວ້ ແລະ ປິຕິຍິນດີນຳກັນໃນແຜ່ນດິນມີເຊີຣີ. ເຮົາ, ພຣະຜູ້ເປັນເຈົ້າ, ສັນຍາກັບຄົນທີ່ຊື່ສັດ ແລະ ກ່າວເທັດບໍ່ໄດ້.
7 ເຮົາ, ພຣະຜູ້ເປັນເຈົ້າ, ເຕັມໃຈ, ຖ້າຫາກຄົນໃດຄົນໜຶ່ງໃນບັນດາພວກເຈົ້າຢາກຂີ່ມ້າ, ຫລື ຂີ່ລໍ, ຫລື ຂີ່ລົດມ້າ, ຄົນໆນັ້ນຈະໄດ້ຮັບພອນນີ້, ຖ້າຫາກເຂົາຮັບມັນຈາກພຣະຫັດຂອງພຣະຜູ້ເປັນເຈົ້າ, ດ້ວຍໃຈທີ່ ຮູ້ບຸນຄຸນໃນທຸກສິ່ງ.
8 ສິ່ງເຫລົ່ານີ້ຂຶ້ນຢູ່ກັບພວກເຈົ້າທີ່ຈະເຮັດ ອີງຕາມການພິຈາລະນາ ແລະ ດັ່ງທີ່ໄດ້ຮັບການຊີ້ນຳຈາກພຣະວິນຍານ.
9 ຈົ່ງເບິ່ງ, ອານາຈັກເປັນຂອງພວກເຈົ້າ. ແລະ ຈົ່ງເບິ່ງ, ແລະ ເບິ່ງແມ, ເຮົາ ຢູ່ກັບຄົນທີ່ຊື່ສັດສະເໝີໄປ. ແມ່ນເປັນດັ່ງນັ້ນ. ອາແມນ.