ພາກທີ 118
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ, ທີ່ເມືອງຟາແວັດ, ລັດມີເຊີຣີ, ວັນທີ 8 ເດືອນກໍລະກົດ, 1838, ໃນການຕອບຕໍ່ຄຳອ້ອນວອນທີ່ວ່າ, “ໂອ້ ພຣະຜູ້ເປັນເຈົ້າ, ຂໍຈົ່ງສະແດງພຣະປະສົງຂອງພຣະອົງແກ່ພວກຂ້າພຣະອົງກ່ຽວກັບອັກຄະສາວົກສິບສອງດ້ວຍເທີ້ນ.”
1–3, ພຣະຜູ້ເປັນເຈົ້າຈະຈັດຫາໃຫ້ຄອບຄົວຂອງອັກຄະສາວົກສິບສອງ; 4–6, ຕຳແໜ່ງວ່າງໃນສະພາອັກຄະສາວົກສິບສອງຖືກບັນຈຸໃຫ້ເຕັມ.
1 ຕາມຄວາມຈິງແລ້ວ, ພຣະຜູ້ເປັນເຈົ້າໄດ້ກ່າວດັ່ງນີ້: ໃຫ້ຈັດກອງປະຊຸມໃຫຍ່ໂດຍທັນທີ; ໃຫ້ຈັດຕັ້ງອັກຄະສາວົກສິບສອງ; ແລະ ໃຫ້ກຳນົດຊາຍບາງຄົນ ເຂົ້າແທນທີ່ຄົນທີ່ຕົກໄປ.
2 ໃຫ້ຜູ້ຮັບໃຊ້ຂອງເຮົາ ທອມມັສ ຄົງຢູ່ຕໍ່ໄປຊົ່ວໄລຍະໜຶ່ງໃນແຜ່ນດິນຊີໂອນ, ເພື່ອປະກາດຄຳຂອງເຮົາ.
3 ໃຫ້ຜູ້ທີ່ເຫລືອຢູ່ສັ່ງສອນຕໍ່ໄປນັບຕັ້ງແຕ່ຊົ່ວໂມງນັ້ນ, ແລະ ຖ້າຫາກພວກເຂົາຈະເຮັດການນີ້ດ້ວຍຄວາມຕ່ຳຕ້ອຍໃນໃຈ, ດ້ວຍຄວາມອ່ອນໂຍນ ແລະ ຖ່ອມຕົວ, ແລະ ດ້ວຍ ຄວາມອົດກັ້ນ, ແລ້ວເຮົາ, ພຣະຜູ້ເປັນເຈົ້າ, ຈະໃຫ້ຄຳສັນຍາແກ່ພວກເຂົາວ່າ ເຮົາຈະຈັດຫາໃຫ້ຄອບຄົວຂອງພວກເຂົາ; ແລະ ປະຕູທີ່ມີປະສິດທິພາບຈະເປີດໄວ້ໃຫ້ພວກເຂົາ, ນັບແຕ່ນີ້ເປັນຕົ້ນໄປ.
4 ແລະ ລະດູໃບໄມ້ປົ່ງໜ້ານີ້ ໃຫ້ພວກເຂົາອອກເດີນທາງຂ້າມນ້ຳອັນກວ້າງໃຫຍ່, ແລະ ຢູ່ທີ່ນັ້ນ ໃຫ້ປ່າວປະກາດພຣະກິດຕິຄຸນຂອງເຮົາ, ຄວາມສົມບູນຂອງມັນ, ແລະ ກ່າວເປັນພະຍານເຖິງນາມຂອງເຮົາ.
5 ໃຫ້ພວກເຂົາໄປຈາກໄພ່ພົນຂອງເຮົາໃນເມືອງຟາແວັດ, ໃນວັນທີຊາວຫົກຂອງເດືອນເມສາໜ້າ, ຈາກບ່ອນທີ່ຈະສ້າງບ້ານຂອງເຮົາ, ພຣະຜູ້ເປັນເຈົ້າໄດ້ກ່າວ.
6 ໃຫ້ຜູ້ຮັບໃຊ້ຂອງເຮົາ ຈອນ ເທເລີ, ແລະ ຜູ້ຮັບໃຊ້ຂອງເຮົາ ຈອນ ອີ ເພຈ໌ ນຳອີກ, ແລະ ຜູ້ຮັບໃຊ້ຂອງເຮົາ ວິວເຝີດ ວູດຣັບ ນຳອີກ, ແລະ ຜູ້ຮັບໃຊ້ຂອງເຮົາ ວິວເລີດ ຣິເຈີສ໌ ນຳອີກ, ຖືກກຳນົດສູ່ຕຳແໜ່ງຂອງຄົນທີ່ຕົກໄປ, ແລະ ໃຫ້ແຈ້ງການກຳນົດຂອງພວກເຂົານັ້ນຢ່າງເປັນທາງການ.