ລະມັດລະວັງ ກັບ ບໍ່ເອົາໃຈໃສ່
ໃນເມື່ອອິດທິພົນຂອງໂລກນັບມື້ນັບຮັບເອົາຄວາມຊົ່ວຮ້າຍ, ເຮົາຕ້ອງກ້າວໄປໜ້າດ້ວຍຄວາມພາກພຽນເຕັມທີ່ ເພື່ອຈະຄົງຢູ່ຢ່າງໝັ້ນຄົງ ໃນເສັ້ນທາງທີ່ນຳໄປສູ່ພຣະຜູ້ຊ່ວຍໃຫ້ລອດຂອງເຮົາຢ່າງປອດໄພ.
ຄັ້ງໜຶ່ງຂ້າພະເຈົ້າໄດ້ເຫັນປ້າຍຢູ່ປ່ອງຢ້ຽມຮ້ານຄ້າແຫ່ງໜຶ່ງມີຄຳວ່າ, “ຄວາມສຸກ, $15.00 ດອນລາ.” ຂ້າພະເຈົ້າຢາກຮູ້ວ່າຕົວເອງຈະຊື້ຄວາມສຸກນັ້ນໄດ້ຫລາຍເທົ່າໃດດ້ວຍເງິນ $15 ດອນລາ ຂ້າພະເຈົ້າກໍເລີຍເຂົ້າໄປໃນຮ້ານ. ສິ່ງທີ່ຂ້າພະເຈົ້າໄດ້ເຫັນກໍຄື ເຄື່ອງເອ້ເລັກໆນ້ອຍໆ ແລະ ຂອງລະລຶກລາຄາຖືກໆ—ບໍ່ມີຈັກຢ່າງທີ່ຂ້າພະເຈົ້າເຫັນ ຈະນຳຄວາມສຸກຕາມທີ່ປ້າຍໄດ້ອ້າງເຖິງມາໃຫ້ເລີຍ. ຕະຫລອດຫລາຍປີທີ່ຜ່ານມາ, ຂ້າພະເຈົ້າໄດ້ຄິດຫລາຍເທື່ອກ່ຽວກັບປ້າຍນັ້ນ ແລະ ວ່າມັນງ່າຍເທົ່າໃດທີ່ຈະຊອກຫາຄວາມສຸກໃນສິ່ງຂອງລາຄາຖືກ ຫລື ໃຫ້ຄວາມສຸກພຽງຊົ່ວຄາວ. ໃນຖານະສະມາຊິກຂອງ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ, ເຮົາໄດ້ຮັບພອນທີ່ຈະຮູ້ວິທີ ແລະ ບ່ອນທີ່ຈະພົບເຫັນຄວາມສຸກທີ່ແທ້ຈິງນັ້ນ. ຈະພົບເຫັນມັນໄດ້ໃນການດຳລົງຊີວິດຢ່າງລະມັດລະວັງ ຕາມພຣະກິດຕິຄຸນທີ່ພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ ໄດ້ຈັດຕັ້ງຂຶ້ນມາ, ແລະ ໃນການພະຍາຍາມທີ່ຈະກາຍເປັນເໝືອນດັ່ງພຣະອົງຫລາຍຂຶ້ນ.
ພວກຂ້າພະເຈົ້າມີເພື່ອນຮັກຄົນໜຶ່ງ ທີ່ເປັນຜູ້ຂັບລົດໄຟ. ມື້ໜຶ່ງໃນຂະນະທີ່ລາວໄດ້ຂັບລົດໄຟຢູ່ຕາມເສັ້ນທາງ, ລາວໄດ້ເຫັນລົດຄັນໜຶ່ງຢຸດຢູ່ໃນລາງລົດໄຟຢູ່ຂ້າງໜ້າ. ໃນທັນໃດນັ້ນ ລາວກໍໄດ້ຮູ້ວ່າລົດຄັນນັ້ນຕິດຂັດ ແລະ ອອກຈາກລາງລົດໄຟບໍ່ໄດ້. ລາວໄດ້ໃສ່ເບກສຸກເສີນທັນທີ, ທີ່ຢຸດເບກຂອງຕູ້ລົດໄຟທຸກຕູ້ທີ່ຢູ່ໃນລາງ ມີຄວາມຍາວປະມານໜຶ່ງສ່ວນສາມໄມ (1.2 ກິໂລແມັດ), ມີນ້ຳໜັກປະມານ 6,500 ໂຕນ (5,900 ເມດຕຼິກຕັນ). ບໍ່ມີໂອກາດທີ່ເປັນໄປໄດ້ເລີຍ ທີ່ລົດໄຟຈະຢຸດໄດ້ກ່ອນມັນຈະຕຳລົດຄັນນັ້ນ, ແລະ ມັນກໍໄດ້ຕຳ. ໂຊກດີສຳລັບຜູ້ຄົນທີ່ຢູ່ໃນລົດຄັນນັ້ນ, ເຂົາເຈົ້າໄດ້ຍິນສຽງໝາກຫວີດເຕືອນ ແລະ ໄດ້ໜີອອກຈາກລົດໄປກ່ອນແຮງກະແທກນັ້ນ. ໃນຂະນະທີ່ຜູ້ຂັບລົດໄຟໄດ້ເວົ້າລົມນຳເຈົ້າໜ້າທີ່ຕຳຫລວດ ຜູ້ສືບສວນຢູ່ນັ້ນ, ຜູ້ຍິງທີ່ໃຈຮ້າຍຄົນໜຶ່ງໄດ້ເຂົ້າໄປຫາເຂົາເຈົ້າ. ນາງໄດ້ຮ້ອງໃສ່ວ່າ ນາງໄດ້ເຫັນເຫດການທັງໝົດ ແລະ ແລ້ວໄດ້ເປັນພະຍານວ່າ ຜູ້ຂັບລົດໄຟບໍ່ໄດ້ ພະຍາຍາມ ທີ່ຈະຫລົບຫລີກລົດຄັນນັ້ນເລີຍ!
ແນ່ນອນວ່າ, ຖ້າວ່າຜູ້ຂັບລົດໄຟຫລົບຫລີກ ແລະ ອອກຈາກລາງເພື່ອຫລີກເວັ້ນຈາກອຸປະຕິເຫດນັ້ນໄດ້, ລາວ ແລະ ຕູ້ລົດໄຟທັງໝົດກໍຈະຕົກລາງໝົດເລີຍ ແລະ ຄວາມກ້າວໜ້າຂອງລົດໄຟຖ້ຽວນັ້ນກໍຈະຢຸດສະຫງັກທັນທີ. ໂຊກດີສຳລັບຊາຍຜູ້ນັ້ນ, ລາງລົດໄຟເສັ້ນນັ້ນໄດ້ຮັກສາລໍ້ລົດໄຟໄວ້ໄດ້ຢ່າງແໜ້ນດີ ເພື່ອນຳລົດໄຟໄປສູ່ຈຸດໝາຍປາຍທາງຂອງມັນ ບໍ່ວ່າຈະມີສິ່ງກີດຂວາງຢູ່ໃນເສັ້ນທາງກໍຕາມ. ໂຊກດີສຳລັບເຮົາ, ເຮົາກໍຢູ່ໃນລາງຄືກັນ, ເສັ້ນທາງແຫ່ງພັນທະສັນຍາ ທີ່ເຮົາໄດ້ໃຫ້ຄຳໝັ້ນສັນຍາວ່າຈະຄົງຢູ່ ຕອນເຮົາຮັບບັບຕິສະມາ ເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ. ເຖິງວ່າເປັນບາງຄັ້ງບາງຄາວ ເຮົາຈະປະເຊີນກັບອຸບປະສັກຕາມເສັ້ນທາງ, ເສັ້ນທາງນີ້ຈະຊ່ວຍເຮົາໃຫ້ກ້າວໄປໜ້າສູ່ຈຸດໝາຍປາຍທາງນິລັນດອນທີ່ລ້ຳຄ່າຂອງເຮົາ ຖ້າຫາກເຮົາຢຶດໝັ້ນຢູ່ໃນນັ້ນຢ່າງໝັ້ນຄົງ.
ພາບນິມິດເຖິງຕົ້ນໄມ້ແຫ່ງຊີວິດ ສະແດງໃຫ້ເຮົາເຫັນວ່າຜົນກະທົບຂອງຄວາມບໍ່ເອົາໃຈໃສ່ ສາມາດນຳເຮົາໃຫ້ອອກນອກເສັ້ນທາງແຫ່ງພັນທະສັນຍານັ້ນໄດ້ແນວໃດ. ຂໍໃຫ້ພິຈາລະນາວ່າ ຮາວເຫລັກ ແລະ ທາງຄັບ ແລະ ແຄບ, ຫລື ເສັ້ນທາງແຫ່ງພັນທະສັນຍາ, ນຳໄປ ເຖິງ ຕົ້ນໄມ້ແຫ່ງຊີວິດໂດຍກົງ, ບ່ອນທີ່ພອນທັງໝົດທີ່ພຣະຜູ້ຊ່ວຍໃຫ້ລອດຂອງເຮົາ ແລະ ການຊົດໃຊ້ຂອງພຣະອົງ ມີໄວ້ໃຫ້ຜູ້ທີ່ຊື່ສັດ. ໃນພາບນິມິດນັ້ນເຮົາກໍໄດ້ເຫັນແມ່ນ້ຳສາຍໜຶ່ງ ທີ່ເປັນຕົວແທນຂອງຄວາມສົກກະປົກຂອງໂລກ. ພຣະຄຳພີບັນຍາຍວ່າແມ່ນ້ຳສາຍນີ້ “ໄຫລໄປ” ຕາມເສັ້ນທາງພຽງແຕ່ໄຫລໄປ “ໃກ້ໆ” ຕົ້ນໄມ້, ແຕ່ບໍ່ໄດ້ໄປ ເຖິງ ຕົ້ນໄມ້ນັ້ນ. ໂລກກໍເຕັມໄປດ້ວຍສິ່ງລົບກວນຫລາຍຢ່າງ ທີ່ສາມາດຫລອກລວງແມ່ນແຕ່ຜູ້ທີ່ຖືກເລືອກໄວ້, ເຮັດໃຫ້ເຂົາເຈົ້າບໍ່ເອົາໃຈໃສ່ຕໍ່ການດຳລົງຊີວິດຕາມພັນທະສັນຍາຂອງເຂົາເຈົ້າ—ທີ່ນຳເຂົາເຈົ້າໄປໃກ້ຕົ້ນໄມ້, ແຕ່ບໍ່ໄດ້ໄປ ເຖິງ ຕົ້ນໄມ້ນັ້ນ. ຖ້າຫາກເຮົາບໍ່ລະມັດລະວັງ ໃນການດຳລົງຊີວິດຕາມພັນທະສັນຍາຂອງເຮົາຢ່າງເຄັ່ງຄັດ, ຄວາມພະຍາຍາມຂອງເຮົາແບບບໍ່ເອົາໃຈໃສ່ ກໍອາດນຳເຮົາໄປສູ່ເສັ້ນທາງທີ່ຕ້ອງຫ້າມ ຫລື ເຂົ້າຮ່ວມກັບຜູ້ຄົນທີ່ໄດ້ເຂົ້າໄປໃນອາຄານໃຫຍ່ ແລະ ກວ້າງຂວາງນັ້ນແລ້ວ. ຖ້າຫາກເຮົາບໍ່ລະມັດລະວັງ, ເຮົາອາດຈົມລົງໄປໃນຄວາມເລິກ ຂອງແມ່ນ້ຳສົກກະປົກສາຍນັ້ນກໍໄດ້.1
ຍັງມີວິທີທາງທີ່ຈະເຮັດທຸກສິ່ງດ້ວຍຄວາມລະມັດລະວັງ ແລະ ວິທີທາງທີ່ບໍ່ເອົາໃຈໃສ່, ຮ່ວມທັງການດຳລົງຊີວິດຕາມພຣະກິດຕິຄຸນ. ເມື່ອເຮົາພິຈາລະນາຄຳໝັ້ນສັນຍາຂອງເຮົາ ຕໍ່ພຣະຜູ້ຊ່ວຍໃຫ້ລອດ, ເຮົາກໍລະມັດລະວັງຢູ່ບໍ ຫລື ວ່າບໍ່ເອົາໃຈໃສ່? ເປັນເພາະທຳມະຊາດມະຕະຂອງເຮົາ, ບາງເທື່ອເຮົາກໍຫາຂໍ້ແກ້ຕົວສຳລັບການປະພຶດຂອງເຮົາ, ທີ່ບາງເທື່ອກໍອ້າງເຖິງການກະທຳຂອງເຮົາວ່າຢູ່ໃນ ສີໝົ່ນ, ຫລື ກຳລັງປະປົນສິ່ງທີ່ດີເຂົ້າກັບສິ່ງທີ່ບໍ່ດີ ບໍ່ແມ່ນບໍ? ທຸກໆເທື່ອທີ່ເຮົາເວົ້າວ່າ, “ເຖິງຢ່າງໃດກໍຕາມ” “ຍົກເວັ້ນເສຍແຕ່,” ຫລື “ແຕ່ວ່າ” ເມື່ອມັນກ່ຽວກັບການເຮັດຕາມຄຳແນະນຳຂອງສາດສະດາຜູ້ນຳຂອງເຮົາ ຫລື ການດຳລົງຊີວິດຕາມພຣະກິດຕິຄຸນຢ່າງລະມັດລະວັງ, ຕາມຄວາມຈິງແລ້ວ ເຮົາກໍເວົ້າວ່າ, “ຄຳແນະນຳນັ້ນບໍ່ກ່ຽວກັບຂ້ອຍ.” ເຮົາຈະແກ້ຕົວຫລາຍເທົ່າໃດກໍໄດ້, ແຕ່ຄວາມຈິງກໍຄື, ບໍ່ມີທາງຖືກ ທີ່ຈະເຮັດສິ່ງທີ່ຜິດ!
ຫົວຂໍ້ຄຳຂວັນຂອງຊາວໜຸ່ມສຳລັບປີ 2019 ແມ່ນມາຈາກ ໂຢຮັນ 14:15, ບ່ອນທີ່ພຣະຜູ້ເປັນເຈົ້າສັ່ງສອນວ່າ: “ຖ້າຫາກພວກເຈົ້າຮັກເຮົາ, ພວກເຈົ້າກໍຈະເຊື່ອຟັງກົດບັນຍັດຂອງເຮົາ.” ຖ້າເຮົາຮັກພຣະອົງດັ່ງທີ່ເຮົາປະກາດວ່າຮັກ, ເຮົາຈະສາມາດສະແດງຄວາມຮັກນັ້ນ ໂດຍການເປັນຄົນທີ່ລະມັດລະວັງຫລາຍຂຶ້ນ ໃນການດຳລົງຊີວິດຕາມພຣະບັນຍັດຂອງພຣະອົງໄດ້ບໍ?
ການດຳລົງຊີວິດຕາມພຣະກິດຕິຄຸນ ບໍ່ໄດ້ໝາຍຄວາມວ່າ ການເປັນຄົນເຄັ່ງຄັດ ຫລື ເປັນເຈົ້າລະບຽບ. ມັນໝາຍຄວາມວ່າ ການມີຄວາມສົມຄວນໃນຄວາມຄິດ ແລະ ການປະພຶດຂອງເຮົາ ໃນຖານະທີ່ເປັນສານຸສິດຂອງພຣະເຢຊູຄຣິດ. ໃນຂະນະທີ່ເຮົາຄິດໄຕ່ຕອງຄວາມແຕກຕ່າງລະຫວ່າງຄວາມລະມັດລະວັງ ແລະ ຄວາມບໍ່ເອົາໃຈໃສ່ ໃນການດຳລົງຊີວິດຂອງເຮົາຕາມພຣະກິດຕິຄຸນ, ຕໍ່ໄປນີ້ຄືຄວາມຄິດໃຫ້ເຮົາພິຈາລະນາ:
ເຮົາລະມັດລະວັງ ໃນການນະມັດສະການໃນວັນຊະບາໂຕຂອງເຮົາ ແລະ ໃນການກະກຽມທີ່ຈະຮັບສ່ວນສິນລະລຶກແຕ່ລະອາທິດບໍ?
ເຮົາລະມັດລະວັງໃຫ້ດີຂຶ້ນ ໃນການອະທິຖານ ແລະ ການສຶກສາພຣະຄຳພີຂອງເຮົາ ຫລື ມີສ່ວນຮ່ວມຢ່າງຈິງຈັງໃນໂຄງການ ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວຫລາຍຂຶ້ນບໍ?
ເຮົາລະມັດລະວັງ ໃນການນະມັດສະການຂອງເຮົາໃນພຣະວິຫານ, ແລະ ເຮົາດຳລົງຊີວິດຕາມພັນທະສັນຍາທີ່ເຮົາໄດ້ເຮັດຕອນຮັບບັບຕິສະມາ ແລະ ໃນພຣະວິຫານຢ່າງລະມັດລະວັງ ແລະ ຢ່າງຕັ້ງໃຈບໍ? ເຮົາລະມັດລະວັງໃນການປະກົດຕົວ ແລະ ການນຸ່ງຖືຢ່າງສຸພາບຮຽບຮ້ອຍ, ໂດຍສະເພາະໃນສະຖານທີ່ ແລະ ສະຖານະການທີ່ສັກສິດບໍ? ເຮົາລະມັດລະວັງຢູ່ບໍ ໃນວິທີທີ່ເຮົານຸ່ງຖືເສື້ອຜ້າສັກສິດຂອງເຮົາ? ຫລື ວ່າເຄື່ອງນຸ່ງຖືທີ່ໂລກນິຍົມກຳນົດທ່າທີ ທີ່ບໍ່ເອົາໃຈໃສ່ຫລາຍກວ່າບໍ?
ເຮົາລະມັດລະວັງຢູ່ບໍ ໃນວິທີທີ່ເຮົາປະຕິບັດສາດສະໜາກິດຕໍ່ຄົນອື່ນ ແລະ ໃນວິທີທີ່ເຮົາປະຕິບັດໜ້າທີ່ການເອີ້ນຂອງເຮົາໃນສາດສະໜາຈັກ, ຫລື ວ່າເຮົາເມີນເສີຍ ຫລື ບໍ່ເອົາໃຈໃສ່ໃນການເອີ້ນຂອງເຮົາທີ່ຈະຮັບໃຊ້?
ເຮົາລະມັດລະວັງຢູ່ບໍ ຫລື ວ່າບໍ່ເອົາໃຈໃສ່ກັບສິ່ງທີ່ເຮົາອ່ານ ແລະ ສິ່ງທີ່ເຮົາເບິ່ງໃນໂທລະທັດ ແລະ ໃນເຄື່ອງມືຖືຂອງເຮົາ? ເຮົາລະມັດລະວັງຢູ່ບໍ ກັບຄຳວາຈາຂອງເຮົາ? ຫລື ວ່າເຮົາຍອມຮັບເອົາຄວາມບໍ່ສຸພາບ ແລະ ຄວາມຫຍາບຄາຍບໍ?
ປຶ້ມນ້ອຍຊື່ ສຳລັບຄວາມເຂັ້ມແຂງຂອງຊາວໜຸ່ມ ບັນຈຸມາດຕະຖານທີ່, ເມື່ອເຮັດຕາມຢ່າງລະມັດລະວັງ, ຈະນຳພອນຢ່າງຫລວງຫລາຍມາໃຫ້ ແລະ ຊ່ວຍເຮົາໃຫ້ຄົງຢູ່ໃນເສັ້ນທາງແຫ່ງພັນທະສັນຍາ. ເຖິງແມ່ນວ່າປຶ້ມນີ້ຖືກຂຽນຂຶ້ນສຳລັບຜົນປະໂຫຍດຂອງຊາວໜຸ່ມ, ແຕ່ມາດຕະຖານຂອງມັນບໍ່ໝົດອາຍຸ ເມື່ອເຮົາອອກຈາກໂຄງການຊາຍໜຸ່ມ ແລະ ຍິງໜຸ່ມ. ມັນກ່ຽວພັນກັບເຮົາແຕ່ລະຄົນ ທຸກໆເວລາ. ການທົບທວນມາດຕະຖານເຫລົ່ານີ້ ອາດກະຕຸ້ນເຖິງວິທີທາງອື່ນ ທີ່ເຮົາຈະສາມາດລະມັດລະວັງໄດ້ດີກວ່າ ໃນການດຳລົງຊີວິດຂອງເຮົາຕາມພຣະກິດຕິຄຸນ.
ເຮົາຈະບໍ່ຫລຸດມາດຕະຖານຂອງເຮົາໃຫ້ຕ່ຳລົງ ເພື່ອໃຫ້ເຂົ້າກັບ ຫລື ເຮັດໃຫ້ຄົນອື່ນຮູ້ສຶກສະບາຍໃຈ. ເຮົາເປັນສານຸສິດຂອງພຣະເຢຊູຄຣິດ, ແລະ ດັ່ງນັ້ນເຮົາກໍມີພາກສ່ວນໃນການຍົກຄົນອື່ນຂຶ້ນ, ຍົກເຂົາເຈົ້າຂຶ້ນສູ່ບ່ອນ ທີ່ສູງກວ່າ, ສັກສິດຫລາຍກວ່າ ບ່ອນທີ່ເຂົາເຈົ້າຈະສາມາດໄດ້ຮັບພອນຢ່າງຫລວງຫລາຍຄືກັນ.
ຂ້າພະເຈົ້າຂໍເຊື້ອເຊີນເຮົາແຕ່ລະຄົນ ໃຫ້ສະແຫວງຫາການຊີ້ນຳຈາກພຣະວິນຍານບໍລິສຸດ ເພື່ອຈະຮູ້ວ່າມີການປັບປຸງໃດແດ່ທີ່ເຮົາຕ້ອງເຮັດໃນຊີວິດຂອງເຮົາ ເພື່ອຈະສອດຄ່ອງກັບພັນທະສັນຍາຂອງເຮົາຢ່າງລະມັດລະວັງຫລາຍຂຶ້ນ. ຂ້າພະເຈົ້າຂໍອ້ອນວອນກັບທ່ານວ່າ ຢ່າຕິຕຽນຄົນອື່ນທີ່ກຳລັງເດີນທາງໄປໃນເສັ້ນທາງດຽວກັນນີ້. “ເພາະວ່າການຕັດສິນນັ້ນເປັນຂອງເຮົາ, ພຣະຜູ້ເປັນເຈົ້າໄດ້ກ່າວ.”2 ເຮົາແຕ່ລະຄົນກໍຢູ່ໃນຂັ້ນຕອນຂອງການເຕີບໂຕ ແລະ ການປ່ຽນແປງ.
ເລື່ອງລາວທີ່ບອກເລົ່າໃນພຣະຄຳພີມໍມອນ ກ່ຽວກັບຊາວອາມລິໄຊຜູ້ປະຖິ້ມຄວາມເຊື່ອ ກໍເປັນເລື່ອງທີ່ໜ້າສົນໃຈສຳລັບຂ້າພະເຈົ້າ. ເພື່ອເປັນວິທີທີ່ຈະບົ່ງບອກຄົນອື່ນວ່າພວກເຂົາບໍ່ໄດ້ພົວພັນກັບພຣະເຢຊູຄຣິດ ແລະ ສາດສະໜາຈັກຂອງພຣະອົງອີກຕໍ່ໄປ, ພວກເຂົາໄດ້ມີເຄື່ອງໝາຍທີ່ເປັນສີແດງຢູ່ເທິງໜ້າຜາກຂອງພວກເຂົາ ເພື່ອໃຫ້ທຸກຄົນເຫັນ.3 ໃນທາງກົງກັນຂ້າມ, ແລະ ໃນຖານະສານຸສິດຂອງພຣະເຢຊູຄຣິດ, ເຮົາໝາຍຕົວເຮົາເອງແນວໃດ? ຄົນອື່ນຈະເຫັນເງົາຂອງພຣະອົງໃນໃບໜ້າຂອງເຮົາໄດ້ງ່າຍ ແລະ ວ່າເຮົາເປັນຜູ້ແທນໃຜ ໂດຍວິທີທີ່ເຮົາດຳລົງຊີວິດຂອງເຮົາຢ່າງລະມັດລະວັງບໍ?
ໃນຖານະຜູ້ຄົນແຫ່ງພັນທະສັນຍາ, ເຮົາກໍຕ້ອງເຂົ້າຮ່ວມປະປົນພົວພັນຢູ່ກັບຄົນອື່ນໃນໂລກນີ້. ເຮົາຖືກເອີ້ນວ່າ “ຜູ້ຄົນພິເສດ”4—ນັ້ນກໍຊ່າງເປັນຄຳຍ້ອງຍໍທີ່ດີແທ້ໆ! ໃນເມື່ອອິດທິພົນຂອງໂລກນັບມື້ນັບຮັບເອົາຄວາມຊົ່ວຮ້າຍ, ເຮົາຕ້ອງກ້າວໄປໜ້າດ້ວຍຄວາມພາກພຽນເຕັມທີ່ ເພື່ອຈະຄົງຢູ່ຢ່າງໝັ້ນຄົງ ໃນເສັ້ນທາງທີ່ນຳໄປສູ່ພຣະຜູ້ຊ່ວຍໃຫ້ລອດຂອງເຮົາຢ່າງປອດໄພ, ເຮັດໃຫ້ໄລຍະທາງລະຫວ່າງການດຳລົງຊີວິດຂອງເຮົາ ຕາມພັນທະສັນຍາ ແລະ ອິດທິພົນຂອງໂລກຫ່າງໄກກັນໄປເລື້ອຍໆ.
ເມື່ອຂ້າພະເຈົ້າຫວນຄິດໄຕ່ຕອງເຖິງການມີຄວາມສຸກທີ່ຍາວນານ, ຂ້າພະເຈົ້າຮັບຮູ້ວ່າ ບາງເທື່ອເຮົາກໍເຫັນຕົວເອງຢູ່ໃນສີໝົ່ນ (ລະຫວ່າງຄວາມມືດ ແລະ ຄວາມສະຫວ່າງ). ໝອກແຫ່ງຄວາມມືດແມ່ນຫລີກລ້ຽງບໍ່ໄດ້ ໃນຂະນະທີ່ເຮົາເດີນໄປຕາມເສັ້ນທາງແຫ່ງພັນທະສັນຍາ. ການລໍ້ລວງ ແລະ ຄວາມບໍ່ເອົາໃຈໃສ່ ສາມາພາເຮົາອອກນອກເສັ້ນທາງຂອງເຮົາໂດຍບໍ່ຮູ້ຕົວ ເຂົ້າໄປສູ່ຄວາມມືດຂອງໂລກ ແລະ ໄກຈາກເສັ້ນທາງແຫ່ງພັນທະສັນຍາ. ສຳລັບເວລາທີ່ສິ່ງນີ້ອາດເກີດຂຶ້ນໄດ້, ສາດສະດາທີ່ຮັກແພງຂອງເຮົາ, ປະທານຣະໂຊ ເອັມ ແນວສັນ, ໄດ້ຊຸກຍູ້ເຮົາໃຫ້ກັບຄືນສູ່ເສັ້ນທາງແຫ່ງພັນທະສັນຍາ ແລະ ໃຫ້ກັບຄືນໄວໆ. ຂ້າພະເຈົ້າກະຕັນຍູຫລາຍ ສຳລັບຂອງປະທານແຫ່ງການກັບໃຈ ແລະ ອຳນາດແຫ່ງການຊົດໃຊ້ຂອງພຣະຜູ້ຊ່ວຍໃຫ້ລອດຂອງເຮົາ.
ມັນເປັນໄປບໍ່ໄດ້ທີ່ຈະດຳລົງຊີວິດທີ່ດີພ້ອມ. ມີມະນຸດພຽງຄົນດຽວເທົ່ານັ້ນ ທີ່ສາມາດດຳລົງຊີວິດຢ່າງດີພ້ອມໄດ້ ຕອນອາໄສຢູ່ເທິງໂລກຊັ້ນຕ່ຳນີ້. ມະນຸດຄົນນັ້ນກໍແມ່ນພຣະເຢຊູຄຣິດ. ເຖິງແມ່ນວ່າເຮົາອາດບໍ່ດີພ້ອມ, ອ້າຍເອື້ອຍນ້ອງທັງຫລາຍ, ເຮົາກໍເປັນຄົນທີ່ມີຄ່າຄວນໄດ້: ມີຄ່າຄວນທີ່ຈະຮັບສ່ວນສິນລະລຶກ, ມີຄ່າຄວນທີ່ຈະໄດ້ຮັບພອນຂອງພຣະວິຫານ, ແລະ ມີຄ່າຄວນທີ່ຈະໄດ້ຮັບການເປີດເຜີຍສ່ວນຕົວ.
ກະສັດເບັນຢາມິນໄດ້ເປັນພະຍານເຖິງພອນ ແລະ ຄວາມສຸກ ທີ່ມາສູ່ຜູ້ທີ່ຕິດຕາມພຣະຜູ້ຊ່ວຍໃຫ້ລອດໄປຢ່າງລະມັດລະວັງ ວ່າ: “ຂ້າພະເຈົ້າປາດຖະໜາໃຫ້ພວກທ່ານ ພິຈາລະນາເຖິງສະພາບອັນເປັນພອນ ແລະ ຄວາມສຸກຂອງຄົນທີ່ຮັກສາພຣະບັນຍັດຂອງພຣະເຈົ້າ. ເພາະຈົ່ງເບິ່ງ, ເຂົາໄດ້ຮັບພອນທຸກຢ່າງ ທັງຝ່າຍໂລກ ແລະ ຝ່າຍວິນຍານ; ແລະ ຖ້າຫາກເຂົາອົດທົນຢ່າງຊື່ສັດຈົນເຖິງທີ່ສຸດແລ້ວ, ເຂົາຈະຖືກຮັບເຂົ້າສູ່ສະຫວັນ, ແລ້ວເຂົາຈະໄດ້ຢູ່ກັບພຣະເຈົ້າໃນສະພາບແຫ່ງຄວາມສຸກທີ່ບໍ່ມີວັນສິ້ນສຸດ.”5
ຈະຊື້ຄວາມສຸກດ້ວຍເງິນ $15 ດອນລາໄດ້ບໍ? ບໍ່, ຊື້ບໍ່ໄດ້. ຄວາມສຸກທີ່ເລິກຊຶ້ງ ແລະ ຍາວນານມີມາໄດ້ໂດຍການດຳລົງຊີວິດຕາມພຣະກິດຕິຄຸນຂອງພຣະເຢຊູຄຣິດ ຢ່າງຕັ້ງອົກຕັ້ງໃຈ ແລະ ຢ່າງລະມັດລະວັງ. ໃນພຣະນາມຂອງພຣະເຢຊູຄຣິດ, ອາແມນ.