ພຣະກິດຕິຄຸນທີ່ແທ້ຈິງ, ບໍລິສຸດ, ແລະ ລຽບງ່າຍຂອງພຣະເຢຊູຄຣິດ
ການຮັກພຣະເຈົ້າ ແລະ ຮັກເພື່ອນບ້ານຂອງເຮົາ ເປັນຮາກຖານຂອງຄຳສອນ ຂອງການປະຕິບັດສາດສະໜາກິດ; ການເຮັດໃຫ້ບ້ານເຮືອນເປັນສູນກາງຮຽນຮູ້, ໂດຍມີສາດສະໜາຈັກສະໜັບສະໜູນ; ການນະມັດສະການໃນວັນຊະບາໂຕ; ແລະ ການເຮັດວຽກງານແຫ່ງຄວາມລອດ.
ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ, ມັນຍາກສຳລັບຂ້າພະເຈົ້າ ທີ່ຈະເຊື່ອວ່າ ເມື່ອ 71 ປີກ່ອນ, ໃນປີ 1948, ຂ້າພະເຈົ້າໄດ້ເປັນຜູ້ສອນສາດສະໜາຢູ່ປະເທດອັງກິດ ແລະ ເມື່ອ 44 ປີກ່ອນ ບາບາຣາ ແລະ ຂ້າພະເຈົ້າ ໄດ້ພາຄອບຄົວໄປ ການາດາ ຕອນຂ້າພະເຈົ້າເປັນປະທານເຂດເຜີຍແຜ່ ການາດາ ໂທຣອນໂທ. ຂະນະຮັບໃຊ້ຢູ່ທີ່ນັ້ນ ໃນເດືອນເມສາ ປີ 1976, ຂ້າພະເຈົ້າໄດ້ຖືກເອີ້ນໃຫ້ເປັນສາວົກເຈັດສິບ ໃນກຸ່ມທີໜຶ່ງ, ແລະ ຢ່າງທີ່ບໍ່ໄດ້ຄາດຄິດ ໃນປີ 1985, ຂ້າພະເຈົ້າໄດ້ຖືກເອີ້ນໃຫ້ເປັນອັກຄະສາວົກສິບສອງ. ການເອີ້ນທີ່ຜ່ານມາ ມີວັນກຳນົດໃຫ້ຮັບໃຊ້ ແລະ ຖືກປົດ, ແຕ່ຕຳແໜ່ງອັກຄະສາວົກສິບສອງຂອງຂ້າພະເຈົ້າ ຕ້ອງຮັບໃຊ້ຕະຫລອດຊີວິດ; ເຖິງຢ່າງໃດກໍຕາມ, ຂ້າພະເຈົ້າອະທິຖານໃຫ້ວັນນັ້ນມາເຖິງ ເມື່ອຂ້າພະເຈົ້າໄດ້ສຳເລັດວຽກງານທັງໝົດທີ່ພຣະຜູ້ເປັນເຈົ້າ ຕ້ອງການໃຫ້ຂ້າພະເຈົ້າເຮັດໃຫ້ຮຽບຮ້ອຍ.
ເມື່ອຄິດກ່ຽວກັບ 43 ປີ ທີ່ໄດ້ຮັບໃຊ້ ເປັນເຈົ້າໜ້າທີ່ຊັ້ນຜູ້ໃຫຍ່ ແລະ ໄດ້ຮັບສິດທິພິເສດ ເພື່ອປະຕິບັດສາດສະໜາກິດຕໍ່ລູກໆຂອງພຣະບິດາເທິງສະຫວັນ, ຂ້າພະເຈົ້າຮູ້ວ່າ ພຣະອົງປະສົງໃຫ້ລູກໆທຸກຄົນຂອງພຣະອົງ, ພົບຄວາມສະຫງົບ, ຄວາມຊື່ນຊົມ, ແລະ ຄວາມສຸກ ໃນຊີວິດຂອງເຂົາເຈົ້າ.
ສາດສະດາລີໄຮ ໄດ້ສອນວ່າ, “ຊາຍ [ແລະ ຍິງ] ເປັນຢູ່ກໍເພື່ອພວກເຂົາຈະໄດ້ມີຄວາມສຸກ.”1 ມີຫລາຍເຫດຜົນວ່າເປັນຫຍັງເຮົາຈຶ່ງບໍ່ມີຄວາມສະຫງົບ, ບໍ່ມີຄວາມຊື່ນຊົມ, ແລະ ບໍ່ມີຄວາມສຸກ ຢູ່ໃນຊີວິດນີ້, ພ້ອມທັງມີຄວາມທຸກຍາກລຳບາກ, ສົງຄາມ, ໄພທຳມະຊາດ, ແລະ ບັນຫາເລື່ອງການງານ ທີ່ບໍ່ຄາດຄິດ, ບັນຫາເລື່ອງສຸຂະພາບ, ແລະ ບັນຫາຄວາມສຳພັນໃນຄອບຄົວນຳອີກ.
ແຕ່ເຖິງແມ່ນເຮົາບໍ່ສາມາດຄວບຄຸມສະຖານະການພາຍນອກ ທີ່ກະທົບກະເທືອນກັບຊີວິດຂອງເຮົາ ຢູ່ໃນໂລກນີ້, ແຕ່ເມື່ອເຮົາພະຍາຍາມກາຍເປັນສານຸສິດທີ່ຊື່ສັດຂອງອົງພຣະເຢຊູຄຣິດເຈົ້າ, ແລ້ວເຮົາຈະສາມາດພົບຄວາມສະຫງົບ, ຄວາມຊື່ນຊົມ, ແລະ ຄວາມສຸກໄດ້ ເຖິງແມ່ນໂລກນີ້ຈະເຕັມໄປດ້ວຍບັນຫາຢູ່ອ້ອມຮອບເຮົາກໍຕາມ.
ລູກຄົນໜຶ່ງຂອງຂ້າພະເຈົ້າ ເຄີຍເວົ້າວ່າ “ພໍ່ເອີຍ, ລູກບໍ່ຮູ້ວ່າ ລູກຊິທົນກັບມັນໄດ້ບໍ.” ຂ້າພະເຈົ້າຈຶ່ງໄດ້ຕອບວ່າ, “ພຣະບິດາເທິງສະຫວັນພຽງແຕ່ຂໍຮ້ອງເຮົາ ໃຫ້ເຮັດຈົນສຸດຄວາມສາມາດ ໄປແຕ່ລະວັນກໍພໍແລ້ວ.” ອ້າຍເອື້ອຍນ້ອງທັງຫລາຍ, ຈົ່ງເຮັດຈົນສຸດຄວາມສາມາດໄປແຕ່ລະວັນ, ແລະ ບໍ່ດົນ ທ່ານຈະຮູ້ວ່າ ພຣະບິດາເທິງສະຫວັນຮູ້ຈັກທ່ານ ແລະ ວ່າພຣະອົງຮັກທ່ານ. ແລະ ເມື່ອທ່ານຮູ້ແນວນັ້ນ—ຮູ້ແນວນັ້ນແທ້ໆ—ແລ້ວຊີວິດຂອງທ່ານຈະມີຈຸດປະສົງ ແລະ ມີຄວາມໝາຍທີ່ແທ້ຈິງ, ແລະ ທ່ານຈະເຕັມໄປດ້ວຍຄວາມຊື່ນຊົມ ແລະ ຄວາມສະຫງົບ.
ໃນຖານະທີ່ເປັນແສງສະຫວ່າງໃຫ້ແກ່ໂລກ, ພຣະຜູ້ຊ່ວຍໃຫ້ລອດໄດ້ກ່າວວ່າ, “ທຸກຄົນທີ່ເຊື່ອໃນເຮົາ ຈະບໍ່ຢູ່ໃນຄວາມມືດ.”2
ພຣະເຢຊູຄຣິດຄືພຣະນາມຊຶ່ງພຣະບິດາປະທານໃຫ້, ແລະ ບໍ່ມີພຣະນາມອື່ນອີກທີ່ປະທານໃຫ້ ຊຶ່ງໂດຍພຣະນາມນັ້ນມະນຸດຈະລອດໄດ້;
ດັ່ງນັ້ນ, ຊາຍ [ແລະ ຍິງ] ທຸກຄົນ ຈະຕ້ອງຮັບເອົາພຣະນາມໄວ້ກັບຕົນ ຊຶ່ງພຣະບິດາປະທານໃຫ້.3
ພຣະຄຳພີສອນເຮົາວ່າ ຊາຕານຢາກພາເຮົາໄປສູ່ຄວາມມືດ. ມັນພະຍາຍາມຈົນສຸດຄວາມສາມາດ ເພື່ອປິດບັງຄວາມສະຫວ່າງ ແລະ ຄວາມຈິງ ຂອງພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ. ດັ່ງທີ່ລີໄຮໄດ້ສອນລູກໆຂອງເພິ່ນ, ມານ “ສະແຫວງຫາເພື່ອມະນຸດທັງປວງຈະໄດ້ເສົ້າສະຫລົດໃຈຄືກັນກັບມັນ.”4 ຖ້າຫາກວຽກງານ ແລະ … ລັດສະໝີພາບຂອງພຣະບິດາເທິງສະຫວັນ ຄືການກໍ່ໃຫ້ເກີດຄວາມເປັນອະມະຕະ ແລະ ຊີວິດນິລັນດອນຂອງ [ຊາຍ ແລະ ຍິງ],5 ແລ້ວວຽກງານຂອງລູຊິເຟີ ກໍຄືການກໍ່ໃຫ້ເກີດຄວາມຈິບຫາຍອັນບໍ່ສິ້ນສຸດ ສຳລັບລູກໆຂອງພຣະເຈົ້າ. ບາບ ແລະ ການລ່ວງລະເມີດ ເຮັດໃຫ້ແສງສະຫວ່າງຂອງພຣະຄຣິດດັບລົງ ໃນຊີວິດຂອງເຮົາ. ສະນັ້ນແລ້ວ ເປົ້າໝາຍຂອງເຮົາຄື ທີ່ຈະໄດ້ຮັບແສງສະຫວ່າງຂອງພຣະຄຣິດໃຫ້ຫລາຍທີ່ສຸດ, ເພື່ອຈະໄດ້ມີຄວາມສະຫງົບ, ຄວາມຊື່ນຊົມ, ແລະ ຄວາມສຸກ.
ເປັນເວລາ 18 ເດືອນ ຜ່ານມາແລ້ວ, ພຣະຜູ້ເປັນເຈົ້າໄດ້ດົນໃຈສາດສະດາ ແລະ ອັກຄະສາວົກຂອງພຣະອົງ ໃຫ້ດຳເນີນການປ່ຽນແປງຫລາຍຢ່າງທີ່ດີເລີດ. ເຖິງຢ່າງໃດກໍຕາມ, ຂ້າພະເຈົ້າກໍຍັງເປັນຫ່ວງຢ້ານວ່າຈຸດປະສົງທາງວິນຍານ ຂອງການປ່ຽນແປງເຫລົ່ານີ້ ຈະສູນເສຍໄປກັບຄວາມຕື່ນເຕັ້ນນຳການປ່ຽນແປງນັ້ນ.
ໂຈເຊັບ ແອັຟ ສະມິດ ໄດ້ກ່າວວ່າ: “ພຣະກິດຕິຄຸນທີ່ແທ້ຈິງ, ບໍລິສຸດ, ແລະ ລຽບງ່າຍຂອງພຣະເຢຊູຄຣິດ ໄດ້ຖືກຟື້ນຟູແລ້ວ. ເຮົາມີໜ້າທີ່ຮັບຜິດຊອບ ທີ່ຈະຮັກສາມັນໄວ້ຢູ່ເທິງແຜ່ນດິນໂລກ.”6 ເພິ່ນໄດ້ກ່າວຕື່ມວ່າ ພຣະກິດຕິຄຸນທີ່ແທ້ຈິງ, ບໍລິສຸດ, ແລະ ລຽບງ່າຍແມ່ນ “ຄຳສອນຊ່ວຍໃຫ້ລອດຂອງພຣະຄຣິດ.”7
ຢູ່ໃນຫລັກແຫ່ງຄວາມເຊື່ອ, ສາດສະດາໂຈເຊັບ ສະມິດ ໄດ້ສອນວ່າ “ຜ່ານທາງການຊົດໃຊ້ຂອງພຣະຄຣິດ ມະນຸດຊາດທັງປວງຈະລອດໄດ້ ໂດຍການປະຕິບັດຕາມກົດ ແລະ ພິທີການແຫ່ງພຣະກິດຕິຄຸນ.”8
ຫລັກທຳຂໍ້ທຳອິດຂອງພຣະກິດຕິຄຸນ ແມ່ນການມີສັດທາໃນອົງພຣະເຢຊູຄຣິດເຈົ້າ, ການກັບໃຈ, ການບັບຕິສະມາ, ຂອງປະທານແຫ່ງພຣະວິນຍານບໍລິສຸດ, ແລະ ການອົດທົນຈົນເຖິງທີ່ສຸດ. ໄຣຮຳ ອ້າຍຂອງເພິ່ນ ໄດ້ສອນວ່າ: “ຈົ່ງສັ່ງສອນມັນລຶ້ມຄືນຫລາຍໆເທື່ອ ວ່າ: ທ່ານຈະເຫັນວ່າ ວັນແລ້ວວັນເລົ່າ ແນວຄິດໃໝ່ ແລະ ຄວາມເຂົ້າໃຈໃໝ່ ກ່ຽວກັບສິ່ງເຫລົ່ານັ້ນ ຈະຖືກເປີດເຜີຍແກ່ທ່ານ. ທ່ານສາມາດຂະຫຍາຍຄວາມ … ເພື່ອຈະໄດ້ເຂົ້າໃຈຢ່າງແຈ່ມແຈ້ງ. ແລ້ວທ່ານຈະສາມາດຊ່ວຍໃຫ້ຜູ້ຄົນທີ່ທ່ານສອນ ເຂົ້າໃຈຫລາຍຂຶ້ນ.”9
ວິທີທີ່ດີທີ່ສຸດ ສຳລັບເຮົາ ທີ່ຈະເຫັນຈຸດປະສົງທາງວິນຍານຂອງສາດສະໜາຈັກ ຄືການດຳລົງຊີວິດຕາມພຣະກິດຕິຄຸນທີ່ແທ້ຈິງ, ບໍລິສຸດ, ແລະ ລຽບງ່າຍຂອງພຣະຄຣິດ ແລະ ນຳໃຊ້ພຣະບັນຍັດທີ່ຍິ່ງໃຫຍ່ສອງຂໍ້ ຂອງພຣະຜູ້ຊ່ວຍໃຫ້ລອດນຳອີກ ທີ່ວ່າ ຈົ່ງຮັກພຣະຜູ້ເປັນເຈົ້າອົງເປັນພຣະເຈົ້າຂອງເຈົ້າດ້ວຍສຸດໃຈຂອງເຈົ້າ. … ຈົ່ງຮັກມະນຸດເໝືອນຮັກຕົນເອງ.10
ການເຊື່ອຟັງພຣະບັນຍັດທີ່ຍິ່ງໃຫຍ່ສອງຂໍ້ນີ້ ຈະຊ່ວຍເຮົາໃຫ້ມີຄວາມສະຫງົບ ແລະ ຄວາມຊື່ນຊົມຫລາຍຂຶ້ນ. ເມື່ອເຮົາຮັກ ແລະ ຮັບໃຊ້ພຣະຜູ້ເປັນເຈົ້າ ແລະ ຮັກ ແລະ ຮັບໃຊ້ເພື່ອນບ້ານຂອງເຮົາ, ແລ້ວເຮົາຈະຮູ້ສຶກມີຄວາມສຸກແບບທຳມະຊາດຫລາຍຂຶ້ນ ຊຶ່ງບໍ່ສາມາດມາສູ່ເຮົາໄດ້ ໃນທາງອື່ນ ທີ່ດີກວ່ານີ້.
ການຮັກພຣະເຈົ້າ ແລະ ຮັກເພື່ອນບ້ານຂອງເຮົາ ເປັນຄຳສອນຂັ້ນພື້ນຖານຂອງການປະຕິບັດສາດສະໜາກິດ; ການເຮັດໃຫ້ບ້ານເຮືອນເປັນສູນກາງ ໂດຍມີສາດສະໜາຈັກສະໜັບສະໜູນເລື່ອງການຮຽນຮູ້; ການນະມັດສະການທາງວິນຍານໃນວັນຊະບາໂຕ; ແລະ ວຽກງານແຫ່ງຄວາມລອດຂອງທັງສອງຟາກມ່ານ ຊຶ່ງສະໜັບສະໜູນໂດຍສະມາຄົມສະຕີສົງເຄາະ ແລະ ກຸ່ມແອວເດີ. ທັງໝົດນີ້ແມ່ນອີງຕາມພຣະບັນຍັດແຫ່ງສະຫວັນ ເພື່ອໃຫ້ຮັກພຣະເຈົ້າ ແລະ ຮັກເພື່ອນບ້ານຂອງເຮົາ. ມີສິ່ງອື່ນໃດບໍ ທີ່ທຳມະດາ, ຂັ້ນພື້ນຖານ, ແລະ ລຽບງ່າຍໄປກວ່ານີ້?
ການດຳລົງຊີວິດຕາມພຣະກິດຕິຄຸນທີ່ແທ້ຈິງ, ບໍລິສຸດ, ແລະ ລຽບງ່າຍຈະຊ່ວຍເຮົາໃຫ້ມີເວລາຫລາຍຂຶ້ນ ເພື່ອໄປຢ້ຽມຢາມແມ່ໝ້າຍ, ພໍ່ໝ້າຍ, ເດັກກຳພ້າ, ຄົນທີ່ໂດດດ່ຽວ, ຄົນທີ່ເຈັບປ່ວຍ, ແລະ ຄົນທີ່ຍາກຈົນ. ເຮົາຈະພົບຄວາມສະຫງົບ, ຄວາມຊື່ນຊົມ, ແລະ ຄວາມສຸກ ໃນຊີວິດຂອງເຮົາ ເມື່ອເຮົາຮັບໃຊ້ພຣະຜູ້ເປັນເຈົ້າ ແລະ ເພື່ອນບ້ານຂອງເຮົາ.
ການປ່ຽນແປງໃນວັນຊະບາໂຕ ທີ່ເນັ້ນໃຫ້ບ້ານເຮືອນເປັນສູນກາງ, ໂດຍມີສາດສະໜາຈັກສະໜັບສະໜູນ ເລື່ອງການຮຽນຮູ້ ແລະ ການສຶກສາພຣະກິດຕິຄຸນ ເປັນໂອກາດໃຫ້ເຮົາເອົາໃຈໃສ່ ແລະ ອຸທິດຕົນຕໍ່ພຣະເຈົ້າ ຢູ່ໃນບ້ານເຮືອນຂອງເຮົາ. ມີສິ່ງອື່ນໃດບໍ ທີ່ລຽບງ່າຍ, ທຳມະດາ, ເລິກຊຶ້ງໄປກວ່ານີ້? ອ້າຍເອື້ອຍນ້ອງທັງຫລາຍ, ທ່ານເຫັນແລ້ວບໍວ່າ ການຮຽນຮູ້ ແລະ ການສິດສອນພຣະກິດຕິຄຸນ ຢູ່ໃນຄອບຄົວຂອງເຮົາ ເປັນວິທີທາງທີ່ສຳຄັນ ໃນການພົບຄວາມຊື່ນຊົມ ແລະ ຄວາມສຸກ ໃນຊີວິດຂອງເຮົາ?
ເມື່ອກ່າວເຖິງວັນຊະບາໂຕ, ພຣະຜູ້ຊ່ວຍໃຫ້ລອດໄດ້ກ່າວວ່າ ເພາະນີ້ຄືມື້ທີ່ກຳນົດໄວ້ໃຫ້ເຮົາເພື່ອພັກຜ່ອນຈາກວຽກງານຂອງເຮົາ, ແລະ ເພື່ອສະແດງຄວາມຈົງຮັກພັກດີແດ່ພຣະຜູ້ສູງສຸດ.11 ພຣະອົງໄດ້ກ່າວຕື່ມວ່າ ເພື່ອຄວາມຊື່ນຊົມຂອງເຮົາຈະເຕັມປ່ຽມ … ຜ່ານທາງການປິຕິຍິນດີ ແລະ ການອະທິຖານ … ເຮົາຄວນເຮັດສິ່ງເຫລົ່ານີ້ດ້ວຍຄວາມຂອບພຣະໄທ, ດ້ວຍໃຈ ແລະ ໃບໜ້າທີ່ຊື່ນບານ, … ແລະ ດ້ວຍຄວາມຍິນດີໃນໃຈ ແລະ ໃບໜ້າທີ່ຊື່ນບານ.12
ໃຫ້ເຮົາສັງເກດເບິ່ງຄຳສຳຄັນຢູ່ໃນການເປີດເຜີຍນີ້: ຄວາມຊື່ນຊົມ, ຄວາມປິຕິຍິນດີ, ຄວາມຂອບພຣະໄທ, ໃຈທີ່ຊື່ນບານ, ຄວາມຍິນດີ ໃນໃຈ, ແລະ ໃບໜ້າທີ່ຊື່ນບານ. ຟັງແລ້ວຄືວ່າ ການນະມັດສະການໃນວັນຊະບາໂຕ ຈະນຳຮອຍຍິ້ມມາໃຫ້ເຮົາ.
ເມື່ອເຮົາປະຕິບັດສາດສະໜາກິດ ໃນວິທີທາງທີ່ສູງກວ່າ ແລະ ສັກສິດກວ່າ, ຂໍໃຫ້ຄິດສະເໝີວ່າ ການທັກທາຍທຸກຄົນທີ່ມາຮ່ວມການປະຊຸມໂບດຂອງເຮົາ, ໂດຍສະເພາະສະມາຊິກໃໝ່ ແລະ ຜູ້ມາຢ້ຽມຢາມ ມີຄວາມສຳຄັນຫລາຍຂະໜາດໃດ. ເຮົາທຸກຄົນຄວນມັກຮ້ອງເພງສວດ ແລະ ຟັງຂໍ້ຄວາມໃນຄຳອະທິຖານສຳລັບສິນລະລຶກຢ່າງຕັ້ງໃຈ ດ້ວຍຫົວໃຈ ແລະ ດ້ວຍຄວາມຄິດທີ່ເປີດກວ້າງ.
ປະຈັກພະຍານແຫ່ງສັດທາ ໃນກອງປະຊຸມຖືສິນອົດເຂົ້າ ແລະ ສະແດງປະຈັກພະຍານ ຖືກນຳພາໂດຍຄົນໜຶ່ງໃນຝ່າຍອະທິການ, ຜູ້ແບ່ງປັນປະຈັກພະຍານບຶດໜຶ່ງ ເຖິງແຜນແຫ່ງຄວາມສຸກ ແລະ ເຖິງພຣະກິດຕິຄຸນທີ່ແທ້ຈິງ, ບໍລິສຸດ, ແລະ ລຽບງ່າຍຂອງພຣະຄຣິດ. ທຸກຄົນຄວນເຮັດຕາມຕົວຢ່າງນັ້ນ. ເຮົາຕ້ອງຈື່ຈຳວ່າ ມີບ່ອນອື່ນອີກທີ່ເໝາະສົມສຳລັບການບອກເລົ່າເລື່ອງລາວຕ່າງໆ ຫລື ກ່ຽວກັບການເດີນທາງພະຈົນໄພຂອງເຮົາ. ເມື່ອເຮົາຮັກສາປະຈັກພະຍານຂອງເຮົາໃຫ້ລຽບງ່າຍ ກ່ຽວກັບພຣະກິດຕິຄຸນຂອງພຣະຄຣິດ, ແລ້ວພຣະອົງຈະຕໍ່ອາຍຸທາງວິນຍານຂອງເຮົາ ເມື່ອເຮົາແບ່ງປັນປະຈັກພະຍານໃຫ້ກັນແລະກັນ.
ການປະຕິບັດສາດສະໜາກິດທີ່ມີປະສິດທິພາບ ແມ່ນເຫັນໄດ້ຢ່າງແຈ້ງຊັດ ດ້ວຍຄວາມຮັກທີ່ເຮົາມີຕໍ່ພຣະເຈົ້າ ແລະ ເພື່ອນບ້ານຂອງເຮົາ. ເວົ້າງ່າຍໆ, ເຮົາປະຕິບັດສາດສະໜາກິດ ເພາະເຮົາຮັກພຣະບິດາເທິງສະຫວັນ ແລະ ຮັກລູກໆຂອງພຣະອົງ. ຄວາມມຸ່ງໝັ້ນຂອງເຮົາທີ່ຈະປະຕິບັດສາດສະໜາກິດ ຈະປະສົບຄວາມສຳເລັດໄດ້ຫລາຍ ຖ້າຫາກເຮົາຮັກສາການປະຕິບັດສາດສະໜາກິດຂອງເຮົາ ໃຫ້ລຽບງ່າຍ. ສິ່ງທີ່ເຮັດໃຫ້ເຮົາມີຄວາມຊື່ນຊົມຫລາຍທີ່ສຸດ ແມ່ນມາຈາກສິ່ງທີ່ລຽບງ່າຍໃນຊີວິດ ສະນັ້ນ ເຮົາບໍ່ຕ້ອງຕື່ມຫລາຍສິ່ງໃສ່ກັບການປ່ຽນແປງທີ່ເຮົາໄດ້ຮັບ ເພື່ອເສີມສ້າງສັດທາ ແລະ ປະຈັກພະຍານໃຫ້ເຂັ້ມແຂງ ໃນໃຈຂອງລູກໆຂອງພຣະເຈົ້າ.
ບໍ່ຈຳເປັນຕ້ອງຫາຫຍັງມາເພິ່ມໃຫ້ຫຍຸ້ງຍາກ ໂດຍຈັດການປະຊຸມຕື່ມອີກ, ມີຄວາມຄາດໝາຍຕື່ມອີກ, ຫລື ມີເງື່ອນໄຂຕື່ມອີກ. ໃຫ້ເຮັດແບບລຽບງ່າຍ. ໃນຄວາມລຽບງ່າຍນັ້ນ ທ່ານຈະພົບຄວາມສະຫງົບ, ຄວາມຊື່ນຊົມ, ແລະ ຄວາມສຸກ ທີ່ຂ້າພະເຈົ້າໄດ້ກ່າວຜ່ານມາ.
ເປັນເວລາຫລາຍປີ ຈຸດປະສົງຂອງຜູ້ນຳຂອງສາດສະໜາຈັກ, ດັ່ງທີ່ລະບຸໄວ້ຢູ່ໃນປຶ້ມ Handbook 2, ບົ່ງບອກເຖິງຄວາມແຈ່ມແຈ້ງ ແລະ ຄວາມລຽບງ່າຍ, ຊຶ່ງຂ້າພະເຈົ້າຂໍອ້າງເຖິງ ມີຄວາມວ່າ:
“ຜູ້ນຳຊຸກຍູ້ສະມາຊິກທຸກຄົນ ໃຫ້ຮັບເອົາພິທີການທີ່ຈຳເປັນຂອງຖານະປະໂລຫິດ, ຮັກສາພັນທະສັນຍາທີ່ກ່ຽວຂ້ອງ, ແລະ ເໝາະສົມສຳລັບຄວາມສູງສົ່ງ ແລະ ຊີວິດນິລັນດອນ. …
“ຜູ້ໃຫຍ່: ຊຸກຍູ້ຜູ້ໃຫຍ່ແຕ່ລະຄົນໃຫ້ມີຄ່າຄວນ ທີ່ຈະຮັບເອົາພິທີການຂອງພຣະວິຫານ. ສອນຜູ້ໃຫຍ່ທຸກຄົນໃຫ້ຊອກຫາບັນພະບຸລຸດຂອງເຂົາເຈົ້າ ແລະ ກະທຳພິທີການຂອງພຣະວິຫານແທນເຂົາເຈົ້າ.
“ຊາວໜຸ່ມ: ຊ່ວຍຕຽມຊາຍໜຸ່ມແຕ່ລະຄົນ ໃຫ້ໄດ້ຮັບຖານະປະໂລຫິດແຫ່ງເມນຄີເສເດັກ, ຮັບເອົາພິທີການຂອງພຣະວິຫານ, ແລະ ມີຄ່າຄວນທີ່ຈະຮັບໃຊ້ເຜີຍແຜ່ເຕັມເວລາ. ຊ່ວຍຕຽມຍິງໜຸ່ມແຕ່ລະຄົນ ໃຫ້ມີຄ່າຄວນທີ່ຈະເຮັດ ແລະ ຮັກສາພັນທະສັນຍາທີ່ສັກສິດ ແລະ ຮັບເອົາພິທີການຂອງພຣະວິຫານ. ເພີ່ມຄວາມເຂັ້ມແຂງໃຫ້ແກ່ຊາວໜຸ່ມ ຜ່ານທາງການມີສ່ວນຮ່ວມໃນກິດຈະກຳທີ່ເປັນປະໂຫຍດ.
“ສະມາຊິກທຸກຄົນ: ໃຫ້ຊ່ວຍຜູ້ນຳຖານະປະໂລຫິດ ແລະ ຜູ້ນຳອົງການຊ່ວຍເຫລືອ, ສະພາຫວອດ, ຜູ້ສອນສາດສະໜາເຕັມເວລາ ແລະ ຂອງຫວອດ, ແລະ ສະມາຊິກຮ່ວມມືກັນ ໃນຄວາມພະຍາຍາມທີ່ສົມດູນ ເພື່ອຊ່ວຍເຫລືອບຸກຄົນ, ເພີ່ມຄວາມເຂັ້ມແຂງໃຫ້ແກ່ຄອບຄົວ ແລະ ໜ່ວຍຂອງສາດສະໜາຈັກ, ເພີ່ມກິດຈະກຳຖານະປະໂລຫິດ, ແລະ ເຕົ້າໂຮມອິດສະຣາເອນຜ່ານທາງການປ່ຽນໃຈເຫລື້ອມໃສ, ການຮັກສາໄວ້, ແລະ ການນຳກັບຄືນມາເຂັ້ມແຂງ. ສິດສອນສະມາຊິກໃຫ້ຈັດຫາເພື່ອຕົວເອງ ແລະ ຄອບຕົວຂອງຕົນ ແລະ ຊ່ວຍເຫລືອຄົນຍາກຄົນ ແລະ ຄົນຂັດສົນ ໃນວິທີທາງຂອງພຣະຜູ້ເປັນເຈົ້າ.”13
ການຮັບໃຊ້ຂອງຂ້າພະເຈົ້າໃນສາດສະໜາຈັກ ໄດ້ເປັນພອນໃຫ້ແກ່ຂ້າພະເຈົ້າ ດ້ວຍປະສົບການທີ່ໜ້າອັດສະຈັນໃຈ ແລະ ທາງວິນຍານທີ່ພິເສດ. ຂ້າພະເຈົ້າເປັນພະຍານວ່າ ພຣະຜູ້ເປັນເຈົ້າຊີ້ນຳສາດສະໜາຈັກຂອງພຣະອົງ ແລະ ບັນລຸຈຸດປະສົງຂອງພຣະອົງ. ຂ້າພະເຈົ້າໄດ້ຮັບການຊີ້ນຳຈາກສະຫວັນ ເກີນກວ່າຄວາມສາມາດຂອງຂ້າພະເຈົ້າ. ສຳລັບຂ້າພະເຈົ້າແລ້ວ ຄວາມຊື່ນຊົມທີ່ໄດ້ຮັບຈາກການດຳລົງຊີວິດຕາມພຣະກິດຕິຄຸນມາຈາກການເອົາໃຈໃສ່ຕໍ່ຄຳສອນ ແລະ ພຣະກິດຕິຄຸນທີ່ແທ້ຈິງ, ບໍລິສຸດ, ແລະ ລຽບງ່າຍຂອງພຣະເຢຊູຄຣິດ.
ຂ້າພະເຈົ້າໄດ້ຮັບໃຊ້ພາຍໃຕ້ຂໍກະແຈ ແລະ ການຊີ້ນຳຂອງສາດສະດາ ແລະ ປະທານຂອງສາດສະໜາຈັກ ຫົກ ທ່ານ ນັບຈາກ ສະເປັນເຊີ ດັບເບິນຢູ ຄິມໂບ ເຖິງ ຣະໂຊ ເອັມ ແນວສັນ. ຂ້າພະເຈົ້າເປັນພະຍານວ່າ ເພິ່ນແຕ່ລະຄົນໄດ້ເປັນສາດສະດາທີ່ຖືກເລືອກ ຂອງພຣະເຈົ້າ. ພວກເພິ່ນໄດ້ສິດສອນຄຳສອນທີ່ສຳຄັນໃຫ້ແກ່ເຮົາ ກ່ຽວກັບສາດສະໜາຈັກ ແລະ ພຣະກິດຕິຄຸນ ແລະ ຄຳສອນຂອງພຣະຄຣິດ. ປະທານແນວສັນ ກໍກຳລັງນຳພາວຽກງານຂອງພຣະຜູ້ເປັນເຈົ້າໄປໜ້າ ຢ່າງວ່ອງໄວ. ຂ້າພະເຈົ້າເວົ້າວ່າ “ຢ່າງວ່ອງໄວ” ເພາະ ເພິ່ນເປັນອັກຄະສາວົກຄົນດຽວ ທີ່ອາຍຸສູງກວ່າຂ້າພະເຈົ້າ, ແລະ ຂ້າພະເຈົ້າກໍຕາມເພິ່ນໄປບໍ່ທັນຢູ່ແລ້ວ! ຂ້າພະເຈົ້າເປັນພະຍານວ່າ ຂໍກະແຈຂອງຖານະປະໂລຫິດ ແລະ ອຳນາດຂອງການເປັນສາດສະດາຂອງພຣະເຈົ້າ ໄດ້ຢູ່ກັບເພິ່ນ. ປະທານແນວສັນ ສິດສອນພຣະກິດຕິຄຸນທີ່ແທ້ຈິງ, ບໍລິສຸດ, ແລະ ລຽບງ່າຍຂອງພຣະເຢຊູຄຣິດ. ຂ້າພະເຈົ້າເປັນພະຍານວ່າ ພຣະເຢຊູ ຄືພຣະຄຣິດ, ແລະ ນີ້ແມ່ນສາດສະໜາຈັກຂອງພຣະອົງ—ຊຶ່ງຂ້າພະເຈົ້າ ເປັນພະຍານເຖິງດ້ວຍຄວາມຖ່ອມຕົວ ໃນພຣະນາມຂອງພຣະເຢຊູຄຣິດ, ອາແມນ.