ການກະກຽມສຳລັບການສະເດັດກັບຄືນມາຂອງພຣະຜູ້ເປັນເຈົ້າ

ໂດຍ ແອວເດີ ດີ ທອດ ຄຣິສໂຕເຟີສັນ

ແຫ່ງກຸ່ມອັກຄະສາວົກສິບສອງ

ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ໄດ້ຮັບອຳນາດ ແລະ ໄດ້ຮັບການມອບໝາຍພິເສດ ໃຫ້ສາມາດບັນລຸການກະກຽມທີ່ຈຳເປັນ ສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ.

ສອງອາທິດໜ້ານີ້, ເຮົາກໍຈະສະເຫລີມສະຫລອງວັນອີດສະເຕີແລ້ວ. ການຟື້ນຄືນພຣະຊົນຢືນຢັນເຖິງຄວາມເປັນພຣະເຈົ້າຂອງພຣະເຢຊູຄຣິດ ແລະ ເຖິງຄວາມເປັນຈິງຂອງພຣະເຈົ້າອົງເປັນພຣະບິດາ. ຄວາມຄິດຂອງເຮົາຫັນໄປຫາພຣະຜູ້ຊ່ວຍໃຫ້ລອດ, ແລະ ເຮົາໄຕ່ຕອງ “ພຣະຊົນຊີບອັນຫາທີ່ປຽບບໍ່ໄດ້ຂອງພຣະອົງ ແລະ ຄຸນນະທຳອັນເປັນນິດແຫ່ງການເສຍສະລະຊົດໃຊ້ຂອງພຣະອົງ.”¹ ຂ້າພະເຈົ້າຫວັງວ່າ ເຮົາຈະຄິດກ່ຽວກັບການສະເດັດກັບຄືນມາຂອງພຣະອົງຄືກັນ ເມື່ອ “ພຣະອົງຈະປົກຄອງເປັນມະຫາກະສັດ ແລະ … ຈອມເຈົ້ານາຍ.”²

ດົນນານມາແລ້ວ ຢູ່ໃນເມືອງບວຍອາໂນສ໌ ແອເຣສ໌, ປະເທດອາກຊັງຕິນ, ຂ້າພະເຈົ້າໄດ້ໄປຮ່ວມກອງປະຊຸມກັບບັນດາຜູ້ນຳພາສາດສະໜາຕ່າງໆ. ເຫັນໄດ້ວ່າ ພວກເພິ່ນທຸກຄົນກໍມີຄວາມຮັກຕໍ່ເພື່ອນມະນຸດດ້ວຍກັນຫລາຍທີ່ສຸດ. ພວກເພິ່ນມີຈຸດປະສົງທີ່ຈະຊ່ວຍບັນເທົາຄວາມທຸກທໍລະມານ ແລະ ຊ່ວຍເຫລືອຜູ້ຄົນໃຫ້ມີຊີວິດດີຂຶ້ນ ຈາກການຖືກກົດຂີ່ຂົ່ມເຫັງ ແລະ ຈາກຄວາມທຸກຍາກລຳບາກ. ຂ້າພະເຈົ້າຄິດເຖິງການຊ່ວຍເຫລືອມະນຸດສະທຳ ທີ່ສາດສະໜາຈັກນີ້ໄດ້ກະທຳ, ຮ່ວມທັງໂຄງການຕ່າງໆທີ່ຮ່ວມມືກັບກຸ່ມນັບຖືສາດສະໜາອື່ນໆ ທີ່ມາຮ່ວມກອງປະຊຸມນັ້ນ. ຂ້າພະເຈົ້າຮູ້ສຶກກະຕັນຍູສຳລັບນ້ຳໃຈອັນກວ້າງຂວາງ ຂອງສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ທີ່ຊ່ວຍໃຫ້ການຮັບໃຊ້ເໝືອນດັ່ງພຣະຄຣິດເຊັ່ນນັ້ນ ເປັນໄປດ້ວຍດີ.

ໃນນາທີນັ້ນເອງ, ພຣະວິນຍານບໍລິສຸດໄດ້ຢືນຢັນສອງຢ່າງຕໍ່ຂ້າພະເຈົ້າ. ຢ່າງທີໜຶ່ງ, ວຽກງານຂອງການປະຕິບັດສາດສະໜາກິດ ເພື່ອສະໜອງຄວາມຕ້ອງການທາງໂລກ ແມ່ນສຳຄັນ ແລະ ຕ້ອງດຳເນີນຕໍ່ໄປ. ຢ່າງທີສອງແມ່ນ ສິ່ງທີ່ບໍ່ໄດ້ຄາດຄິດ, ແຕ່ມີພະລັງ ແລະ ແຈ່ມແຈ້ງ. ມັນແມ່ນ: ການຮັບໃຊ້ທີ່ເກີນກວ່າຄວາມບໍ່ເຫັນແກ່ຕົວ, ມັນສຳຄັນຫລາຍທີ່ສຸດ ເພື່ອກະກຽມໂລກສຳລັບການສະເດັດມາຄັ້ງທີສອງຂອງອົງພຣະເຢຊູຄຣິດເຈົ້າ.

ເມື່ອພຣະອົງສະເດັດມາ, ການກົດຂີ່ຂົ່ມເຫັງ ແລະ ຄວາມບໍ່ຍຸດຕິທຳ ບໍ່ພຽງແຕ່ຈະມີໜ້ອຍລົງເທົ່ານັ້ນ; ແຕ່ມັນຈະໝົດໄປ.

ພຣະຜູ້ເປັນເຈົ້າກ່າວວ່າ ໝາປ່າຈະຢູ່ກັບລູກແກະ, ເສືອດາວຈະນອນຢູ່ກັບແກະ, ແລະ ລູກງົວກັບລູກສິງຈະຫາກິນຢູ່ນຳກັນ, ແລະ ເດັກນ້ອຍຈະເປັນຜູ້ລ້ຽງມັນ. …

ມັນຈະບໍ່ທຳຮ້າຍ ຫລື ທຳລາຍໄປທົ່ວພູເຂົາອັນສັກສິດຂອງເຮົາ; ເພາະວ່າແຜ່ນດິນໂລກຈະເຕັມໄປດ້ວຍຄວາມຮູ້ກ່ຽວກັບເລື່ອງຂອງພຣະຜູ້ເປັນເຈົ້າຄືກັນກັບນ້ຳປົກຄຸມທະເລ.³

ຄວາມທຸກຍາກລຳບາກ ແລະ ຄວາມທຸກທໍລະມານ ຈະບໍ່ພຽງແຕ່ມີໜ້ອຍລົງເທົ່ານັ້ນ; ແຕ່ມັນຈະຫາຍໄປ:

“ພວກເຂົາຈະບໍ່ອຶດເຂົ້າຢາກນ້ຳອີກຕໍ່ໄປຈັກເທື່ອ, ຕາເວັນ ຫລື ແສງແດດທີ່ເຈີດຈ້າ ຈະບໍ່ເຜົາໄໝ້ພວກເຂົາ.

“ເພາະພຣະເມສານ້ອຍທີ່ປະທັບຢູ່ທ່າມກາງພຣະບັນລັງນັ້ນ ຈະເປັນຜູ້ລ້ຽງຂອງພວກເຂົາ. ພຣະອົງຈະນຳພວກເຂົາໄປເຖິງບໍ່ນ້ຳພຸແຫ່ງຊີວິດ: ແລະ ພຣະເຈົ້າຈະເຊັດນ້ຳຕາທຸກຢົດຈາກຕາຂອງພວກເຂົາ.”⁴

ແມ່ນແຕ່ຄວາມເຈັບປວດ ແລະ ຄວາມໂສກເສົ້າເພາະການຕາຍ ກໍຈະບໍ່ມີອີກ.

ພຣະຜູ້ເປັນເຈົ້າໄດ້ກ່າວວ່າ ໃນວັນນັ້ນ ເດັກແດງທາລົກຈະບໍ່ຕາຍຈົນກວ່າເຂົາຈະແກ່ເຖົ້າ; ແລະ ຊີວິດຂອງເຂົາຈະເປັນດັ່ງອາຍຸຂອງຕົ້ນໄມ້;

ແລະ ເມື່ອເຂົາຕາຍ, ເຂົາຈະບໍ່ຫລັບໄປ, ນັ້ນໝາຍເຖິງໃນດິນ, ແຕ່ຈະຖືກປ່ຽນໄປໃນພິບຕາດຽວ, ແລະ ຈະຖືກຍົກຂຶ້ນໄປ, ແລະ ຄວາມພັກຜ່ອນຂອງເຂົາຈະຮຸ່ງເຫລື້ອມ.⁵

ແມ່ນແລ້ວ, ຂໍໃຫ້ເຮົາຈົ່ງເຮັດທຸກສິ່ງທີ່ເຮົາສາມາດເຮັດໄດ້ ເພື່ອບັນເທົາຄວາມທຸກທໍລະມານ ແລະ ຄວາມໂສກເສົ້າ ໃນເວລານີ້, ແລະ ໃຫ້ເຮົາອຸທິດຕົນຫລາຍກວ່າເກົ່າ ໃນການກະກຽມສິ່ງຈຳເປັນສຳລັບວັນນັ້ນ ເມື່ອຄວາມເຈັບປວດ ແລະ ສິ່ງຊົ່ວຮ້າຍຈະໝົດໄປ, ເມື່ອພຣະຄຣິດຈະປົກຄອງແຜ່ນດິນໂລກເອງ ແລະ ວ່າແຜ່ນດິນໂລກ … ຈະໄດ້ຮັບລັດສະໝີພາບແຫ່ງສຸຂະເສີມຂອງມັນ.⁶ ມັນຈະເປັນວັນແຫ່ງການໄຖ່ ແລະ ການພິພາກສາ. ອະດີດຄຸນພໍ່ແຫ່ງ ເດີແຮມ, ດຣ ເອັນ ທີ ວະໄຣ້, ໄດ້ບັນຍາຍຢ່າງເໝາະສົມ ເຖິງຄວາມສຳຄັນຂອງການຊົດໃຊ້, ການຟື້ນຄືນພຣະຊົນ, ແລະ ການຕັດສິນຂອງພຣະຄຣິດ ໃນການເອົາຊະນະຄວາມບໍ່ຍຸດຕິທຳ ແລະ ເຮັດໃຫ້ທຸກສິ່ງຖືກຕ້ອງ.

ເພິ່ນກ່າວວ່າ: “ພຣະເຈົ້າໄດ້ຕັ້ງວັນໜຶ່ງໄວ້ ຊຶ່ງໃນວັນນັ້ນ ພຣະອົງຈະໃຫ້ໂລກໄດ້ຮັບການພິພາກສາຢ່າງຖືກຕ້ອງ ໂດຍຜູ້ໜຶ່ງທີ່ຖືກກຳນົດໄວ້ແລ້ວ—ແລະ ໃນເລື່ອງນີ້ ພຣະອົງໃຫ້ທຸກຄົນແນ່ໃຈໄດ້ ໂດຍການໃຫ້ຊາຍຜູ້ນີ້ຟື້ນຄືນຊີວິດ. ຄວາມຈິງກ່ຽວກັບພຣະເຢຊູຄຣິດແຫ່ງນາຊາເຣັດ, ແລະ ໂດຍສະເພາະກ່ຽວກັບການຟື້ນຄືນພຣະຊົນຂອງພຣະອົງຈາກຄວາມຕາຍ, ເປັນຮາກຖານຂອງຄວາມແນ່ນອນໃຈວ່າ ໂລກມະນຸດບໍ່ໄດ້ເປັນເລື່ອງບັງເອີນ. ມັນບໍ່ໄດ້ສັບສົນໃນທີ່ສຸດ; ວ່າເມື່ອເຮົາມີຄວາມຍຸດຕິທຳໃນປະຈຸບັນ ເຮົາບໍ່ໄດ້ເສຍເວລາພະຍາຍາມຄ້ຳຈູນຕຶກສູງທີ່ຈະລົ້ມລົງໃນທີ່ສຸດ, ຫລື ແປງລົດທີ່ໃຊ້ການບໍ່ໄດ້ອີກແລ້ວ. ເມື່ອພຣະເຈົ້າໄດ້ໂຜດພຣະເຢຊູຈາກຄວາມຕາຍ, ນັ້ນແມ່ນເຫດການນ້ອຍໜຶ່ງ ຊຶ່ງໃນນັ້ນ ເຫດການພິພາກສາທີ່ໃຫຍ່ໂຕໃນທີ່ສຸດ ໄດ້ຖືກສະຫລຸບໄວ້, ຄືກັນກັບເມັດພືດ, ເມັດພືດ … ແຫ່ງຄວາມຫວັງສູງສຸດ. ພຣະເຈົ້າໄດ້ປະກາດ ໃນທາງທີ່ມີພະລັງວ່າ ພຣະເຢຊູແຫ່ງນາຊາເຣັດ ເປັນພຣະເມຊີອາ. … ໃນຄວາມກົງກັນຂ້າມຫລາຍທີ່ສຸດໃນປະຫວັດສາດ, [ພຣະເຢຊູ] ເອງ ໄດ້ຖືກຕັດສິນຢ່າງໂຫດຮ້າຍ ແລະ ບໍ່ຍຸດຕິທຳ ຊຶ່ງເປັນເຄື່ອງໝາຍ ແລະ ລວມຄວາມໂຫດຮ້າຍ ແລະ ຄວາມບໍ່ຍຸດຕິທຳທັງໝົດຂອງປະຫວັດສາດເຂົ້າກັນ, ເພື່ອທົນກັບຄວາມວຸ້ນວາຍ, ຄວາມມືດມົວ, ຄວາມໂຫດຮ້າຍ, ຄວາມບໍ່ຍຸດຕິທຳນັ້ນ ດ້ວຍພຣະອົງເອງ, ແລະ ເຮັດໃຫ້ອຳນາດຂອງມັນໝົດໄປ.”⁷

ໃນຂະນະທີ່ຂ້າພະເຈົ້າໄປຮ່ວມກອງປະຊຸມໃນເມືອງບວຍອາໂນສ໌ ແອເຣສ໌ ທີ່ຂ້າພະເຈົ້າໄດ້ກ່າວມານັ້ນ, ພຣະວິນຍານໄດ້ເຮັດໃຫ້ຂ້າພະເຈົ້າເຫັນແຈ້ງວ່າ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ໄດ້ຮັບອຳນາດ ແລະ ໄດ້ຮັບການມອບໝາຍພິເສດ ໃຫ້ສາມາດບັນລຸການກະກຽມທີ່ຈຳເປັນ ສຳລັບການສະເດັດມາຄັ້ງທີສອງຂອງພຣະຜູ້ເປັນເຈົ້າ; ຕາມຈິງແລ້ວ, ມັນໄດ້ຖືກຟື້ນຟູສຳລັບຈຸດປະສົງນັ້ນເອງ. ມີບ່ອນໃດແດ່ທີ່ທ່ານສາມາດຊອກເຫັນຜູ້ຄົນທີ່ຮັບເອົາສະໄໝປະຈຸບັນ ດັ່ງທີ່ຖືກທຳນາຍໄວ້ວ່າເປັນ “ຍຸກສະໄໝແຫ່ງຄວາມສົມບູນຂອງເວລາ,” ຊຶ່ງໃນນັ້ນ ພຣະເຈົ້າມີຈຸດປະສົງ ທີ່ຈະ “ຮວບຮວມສິ່ງສາລະພັດໄວ້ໃນພຣະຄຣິດ”?⁸ ຖ້າທ່ານຊອກບໍ່ເຫັນຢູ່ໃນນີ້ ໃນກຸ່ມຝູງຊົນຜູ້ຕັ້ງໃຈທີ່ຈະບັນລຸສິ່ງທີ່ຈຳເປັນຕ້ອງເຮັດໃຫ້ສຳເລັດ ສຳລັບທັງຄົນເປັນ ແລະ ຄົນຕາຍ ເພື່ອກະກຽມສຳລັບວັນນັ້ນ, ຖ້າຫາກທ່ານຊອກບໍ່ເຫັນຢູ່ໃນນີ້ ໃນກຸ່ມອົງການທີ່ເຕັມໃຈສະລະເວລາ ແລະ ຊັບສິບຢ່າງຫລວງຫລາຍ ເພື່ອເຕົ້າໂຮມ ແລະ ກະກຽມຜູ້ຄົນແຫ່ງພັນທະສັນຍາ ເພື່ອຕ້ອນຮັບພຣະຜູ້ເປັນເຈົ້າ, ແລ້ວທ່ານຄົງຫາບໍ່ພົບຢູ່ບ່ອນໃດອີກແລ້ວ.

ໃນການກ່າວຕໍ່ສາດສະໜາຈັກ ໃນປີ 1831, ພຣະຜູ້ເປັນເຈົ້າໄດ້ປະກາດວ່າ:

ຂໍກະແຈຂອງອານາຈັກຂອງພຣະເຈົ້າໄດ້ຖືກມອບໃຫ້ແກ່ມະນຸດຢູ່ເທິງແຜ່ນດິນໂລກ, ແລະ ຈາກບ່ອນນັ້ນພຣະກິດຕິຄຸນຈະຂະຫຍາຍອອກໄປ ຈົນເຖິງທີ່ສຸດຂອງແຜ່ນດິນໂລກ, ຄືກັນກັບຫີນກ້ອນໜຶ່ງຊຶ່ງແຕກອອກມາເອງຈາກໜ້າຜາ ໂດຍບໍ່ມີຜູ້ໃດເຮັດ ຈະກິ້ງອອກໄປຈົນເຕັມແຜ່ນດິນໂລກ. …

ຈົ່ງເອີ້ນຫາພຣະຜູ້ເປັນເຈົ້າ, ເພື່ອວ່າອານາຈັກຂອງພຣະອົງຈະຂະຫຍາຍອອກໄປເທິງແຜ່ນດິນໂລກ, ເພື່ອວ່າຜູ້ອາໄສໃນນັ້ນຈະໄດ້ຮັບມັນ, ແລະ ຕຽມພ້ອມສຳລັບວັນເວລາທີ່ຈະມາເຖິງ, ຊຶ່ງໃນເວລານັ້ນບຸດມະນຸດຈະລົງມາຈາກຟ້າສະຫວັນ, ຫຸ້ມຫໍ່ດ້ວຍຄວາມຮຸ່ງເຫລື້ອມແຫ່ງລັດສະໝີພາບຂອງພຣະອົງ, ເພື່ອພົບກັບອານາຈັກຂອງພຣະເຈົ້າ ຊຶ່ງຕັ້ງຢູ່ເທິງແຜ່ນດິນໂລກ.⁹

ເຮົາຈະເຮັດສິ່ງໃດ ເພື່ອກະກຽມໃນເວລານີ້ ສຳລັບວັນນັ້ນ? ເຮົາສາມາດກະກຽມຕົວເອງດ້ວຍກັນ; ເຮົາສາມາດເຕົ້າໂຮມຜູ້ຄົນແຫ່ງພັນທະສັນຍາຂອງພຣະຜູ້ເປັນເຈົ້າ; ແລະ ເຮົາສາມາດຊ່ວຍໄຖ່ຄວາມລອດທີ່ສັນຍາໄວ້ “ກັບບັນພະບຸລຸດ,” ຂອງເຮົາ.¹⁰ ທຸກສິ່ງຢ່າງນີ້ຕ້ອງເກີດຂຶ້ນໃນລະດັບໃຫຍ່ໂຕ ກ່ອນພຣະຜູ້ເປັນເຈົ້າຈະສະເດັດກັບມາອີກ.

ສິ່ງທຳອິດ, ແລະ ຈຳເປັນສຳລັບການສະເດັດກັບຄືນມາຂອງພຣະຜູ້ເປັນເຈົ້າ ແມ່ນສະພາບຢູ່ເທິງໂລກຂອງຜູ້ຄົນ ທີ່ຖືກກະກຽມໄວ້ ເພື່ອຕ້ອນຮັບພຣະອົງ ເວລາພຣະອົງສະເດັດມາ. ພຣະອົງໄດ້ກ່າວວ່າ ຜູ້ທີ່ມີຊີວິດຢູ່ເທິງໂລກ ໃນວັນນັ້ນ, ຈາກຕ່ຳຕ້ອຍທີ່ສຸດ ຫາຍິ່ງໃຫຍ່ທີ່ສຸດ, … ຈະເຕັມໄປດ້ວຍຄວາມຮູ້ເລື່ອງພຣະຜູ້ເປັນເຈົ້າ, ແລະ ຈະເຫັນກັບຕາ, ແລະ ຈະເປັ່ງສຽງຂອງພວກເຂົາ, ແລະ ດ້ວຍສຽງຈະຮ້ອງເພງໃໝ່ນີ້ນຳກັນ, ມີຄວາມວ່າ. … ພຣະຜູ້ເປັນເຈົ້າໄດ້ເຕົ້າໂຮມທຸກສິ່ງໄວ້ໃນບ່ອນດຽວ. ພຣະຜູ້ເປັນເຈົ້າໄດ້ນຳຊີໂອນຄືນມາອີກຈາກເບື້ອງບົນ. ພຣະຜູ້ເປັນເຈົ້າໄດ້ນຳຊີໂອນຄືນມາຈາກຂ້າງລຸ່ມ.¹¹

ໃນສະໄໝບູຮານ, ພຣະເຈົ້າໄດ້ເອົາເມືອງຊີໂອນທີ່ຊອບທຳ ໄປໄວ້ກັບພຣະອົງ.¹² ກົງກັນຂ້າມ, ໃນຍຸກສຸດທ້າຍ ຊີໂອນໃໝ່ຈະຕ້ອນຮັບພຣະຜູ້ເປັນເຈົ້າ ເວລາພຣະອົງສະເດັດກັບຄືນມາ.¹³ ຊີໂອນຄື ຜູ້ທີ່ມີໃຈບໍລິສຸດ, ຜູ້ຄົນທີ່ມີໃຈດຽວ ແລະ ມີຄວາມຄິດດຽວ, ຢູ່ນຳກັນໃນຄວາມຊອບທຳ ໂດຍທີ່ບໍ່ມີຄົນໃດຍາກຈົນ ຢູ່ໃນບັນດາພວກເຂົາ.¹⁴ ສາດສະດາໂຈເຊັບ ສະມິດ ໄດ້ກ່າວວ່າ, “ເຮົາຕ້ອງສ້າງຊີໂອນຂຶ້ນ ໃຫ້ເປັນເມືອງທີ່ຍິ່ງໃຫຍ່ທີ່ສຸດ.”¹⁵ ເຮົາສ້າງຊີໂອນຢູ່ໃນບ້ານເຮືອນ, ໃນຫວອດ, ໃນສາຂາ, ແລະ ໃນສະເຕກຂອງເຮົາ ຜ່ານທາງຄວາມເປັນອັນໜຶ່ງອັນດຽວກັນ, ຄວາມເປັນເໝືອນດັ່ງພຣະເຈົ້າ, ແລະ ຄວາມໃຈບຸນ.¹⁶

ເຮົາຕ້ອງຮັບຮູ້ວ່າ ການສ້າງສາຊີໂອນ ເກີດຂຶ້ນໃນວັນເວລາທີ່ວຸ້ນວາຍ—ວັນແຫ່ງພຣະພິໂລດ, ວັນແຫ່ງການເຜົາໄໝ້, ວັນແຫ່ງການອ້າງວ້າງ, ແຫ່ງການຮ້ອງໄຫ້, ແຫ່ງການຄວນຄາງ, ແລະ ແຫ່ງການເສົ້າສະຫລົດໃຈ; ແລະ ດັ່ງລົມບ້າໝູ ມັນຈະເກີດຂຶ້ນທົ່ວຜືນແຜ່ນດິນໂລກ, ພຣະຜູ້ເປັນເຈົ້າໄດ້ກ່າວ.¹⁷ ດັ່ງນັ້ນ, ການເຕົ້າໂຮມເຂົ້າໃນສະເຕກ ຈຶ່ງກາຍເປັນການປົກປ້ອງ, ແລະ ເພື່ອເປັນບ່ອນຫລົບໄພຈາກພະຍຸ, ແລະ ຈາກພຣະພິໂລດເມື່ອມັນຈະຖອກເທລົງມາ ໂດຍສຸດພະລັງເທິງແຜ່ນດິນໂລກ.¹⁸

ຄືກັນກັບໃນສະໄໝບູຮານ, ເຮົາ “ຊຸມນຸມກັນຢູ່ເລື້ອຍໆ, ເພື່ອຖືສິນອົດເຂົ້າ ແລະ ເພື່ອອະທິຖານ ແລະ ເພື່ອສົນທະນາກັນກ່ຽວກັບຄວາມຜາສຸກຂອງຈິດວິນຍານ [ຂອງພວກເຮົາ]. ແລະ … ເພື່ອຮັບສ່ວນເຂົ້າຈີ່ ແລະ [ນ້ຳ], ດ້ວຍຄວາມລະນຶກເຖິງອົງພຣະເຢຊູຄຣິດເຈົ້າ.”¹⁹ ດັ່ງທີ່ປະທານຣະໂຊ ເອັມ ແນວສັນ ໄດ້ອະທິບາຍຢູ່ໃນກອງປະຊຸມໃຫຍ່ສາມັນ ເດືອນຕຸລາ ແລ້ວນີ້ວ່າ, “ຈຸດປະສົງຂອງສາດສະໜາຈັກ ເປັນເວລາດົນນານ ແມ່ນເພື່ອຮັບໃຊ້ສະມາຊິກທຸກຄົນ ໃຫ້ມີສັດທາຫລາຍຂຶ້ນໃນອົງພຣະເຢຊູຄຣິດເຈົ້າ ແລະ ໃນການຊົດໃຊ້ຂອງພຣະອົງ, ເພື່ອຮັບໃຊ້ເຂົາເຈົ້າ ໃນການເຮັດ ແລະ ຮັກສາພັນທະສັນຍາຂອງເຂົາເຈົ້ານຳພຣະເຈົ້າ ແລະ ເພື່ອໃຫ້ມີຄວາມເຂັ້ມແຂງ ແລະ ຜະນຶກຄອບຄົວຂອງເຂົາເຈົ້າເຂົ້າກັນ.”²⁰ ສະນັ້ນ, ເພິ່ນຈຶ່ງເນັ້ນໜັກເຖິງຄວາມສຳຄັນຂອງພັນທະສັນຍາທີ່ເຮັດໃນພຣະວິຫານ, ວັນຊະບາໂຕທີ່ສັກສິດ, ການຊື່ນຊົມໃນພຣະກິດຕິຄຸນທຸກວັນ, ບ້ານເຮືອນທີ່ເປັນສູນກາງ, ແລະ ສະໜັບສະໜູນໂດຍຫລັກສູດອັນດຽວກັນນັ້ນ ຢູ່ທີ່ໂບດ. ເຮົາຢາກຮູ້ກ່ຽວກັບພຣະຜູ້ເປັນເຈົ້າ, ແລະ ເຮົາຢາກຮູ້ຈັກພຣະຜູ້ເປັນເຈົ້າ.²¹

ຄວາມມຸ່ງໝັ້ນຕົ້ນຕໍໃນການສ້າງຊີໂອນ ແມ່ນເພື່ອເຕົ້າໂຮມຜູ້ຄົນແຫ່ງພັນທະສັນຍາຂອງພຣະຜູ້ເປັນເຈົ້າ ທີ່ກະຈັດກະຈາຍເປັນເວລາດົນນານ.²² “ພວກເຮົາເຊື່ອໃນການຮ່ວມກັນແທ້ໆຂອງເຊື້ອສາຍອິດສະຣາເອນ ແລະ ໃນການກັບຄືນມາຂອງຄົນສິບເຜົ່າ.”²³ ທຸກຄົນທີ່ຈະກັບໃຈ, ເຊື່ອໃນພຣະຄຣິດ, ແລະ ຮັບບັບຕິສະມາ ເປັນຜູ້ຄົນແຫ່ງພັນທະສັນຍາຂອງພຣະອົງ.²⁴ ອົງພຣະຜູ້ເປັນເຈົ້າເອງໄດ້ທຳນາຍວ່າ ກ່ອນພຣະອົງຈະສະເດັດກັບຄືນມາ, ພຣະກິດຕິຄຸນຈະຖືກສັ່ງສອນຢູ່ທົ່ວໂລກ²⁵ ເພື່ອກູ້ຜູ້ຄົນຂອງພຣະອົງ, ຜູ້ເປັນເຊື້ອສາຍອິດສະຣາເອນ,²⁶ “ແລະ ເມື່ອນັ້ນທີ່ສຸດຈະມາເຖິງ.”²⁷ ຄຳທຳນາຍຂອງເຢເຣມີຢາກຳລັງເກີດເປັນຈິງ ທີ່ວ່າ:

“ເມື່ອເວລານັ້ນມາເຖິງ ປະຊາຊົນຈະບໍ່ກ່າວຕໍ່ໄປວ່າ ພຣະຜູ້ເປັນເຈົ້າທີ່ຊົງພຣະຊົນຢູ່ ໄດ້ນຳປະຊາຊົນອິດສະຣາເອນອອກມາຈາກປະເທດເອຢິບ;

“ແຕ່ຈະເວົ້າວ່າ ພຣະຜູ້ເປັນເຈົ້າທີ່ຊົງພຣະຊົນຢູ່ ໄດ້ນຳປະຊາຊົນອິດສະຣາເອນອອກມາຈາກດິນແດນທາງທິດເໜືອ ແລະ ອອກມາຈາກປະເທດຕ່າງໆ ທີ່ພຣະອົງໄດ້ເຮັດໃຫ້ພວກເຂົາກະຈັດກະຈາຍໄປນັ້ນ: ເຮົາຈະນຳພວກເຂົາກັບຄືນມາສູ່ດິນແດນເດີມຂອງພວກເຂົາ ຄືດິນແດນຊຶ່ງເຮົາໄດ້ໃຫ້ແກ່ບັນພະບຸລຸດຂອງພວກເຂົານັ້ນ.”²⁸

ປະທານແນວສັນ ໄດ້ກ່າວເນັ້ນຫລາຍເທື່ອວ່າ “ການເຕົ້າໂຮມນັ້ນ ເປັນສິ່ງສຳຄັນທີ່ສຸດ ທີ່ກຳລັງເກີດຂຶ້ນ ຢູ່ໃນໂລກ ທຸກວັນນີ້. ບໍ່ມີສິ່ງອື່ນໃດທີ່ໃຫຍ່ໂຕໄປກວ່ານີ້, ບໍ່ມີສິ່ງໃດທີ່ສຳຄັນໄປກວ່ານີ້, ບໍ່ມີສິ່ງໃດທີ່ສະຫງ່າງາມໄປກວ່ານີ້. ແລະ ຖ້າຫາກທ່ານເລືອກທີ່ຈະເຮັດ, … ທ່ານສາມາດເປັນພາກສ່ວນທີ່ຍິ່ງໃຫຍ່ໄດ້.”²⁹ ໄພ່ພົນຍຸກສຸດທ້າຍ ເຄີຍເປັນຜູ້ຄົນທີ່ມັກເຜີຍແຜ່ມາຕະຫລອດ. ຫລາຍຮ້ອຍພັນຄົນ ກໍໄດ້ຕອບຮັບການເອີ້ນໃຫ້ໄປເຜີຍແຜ່ ນັບຕັ້ງແຕ່ຕອນຕົ້ນຂອງການຟື້ນຟູ; ປະຈຸບັນນີ້ ກໍມີຫລາຍສິບພັນຄົນ ທີ່ກຳລັງຮັບໃຊ້ຢູ່. ແລະ, ດັ່ງທີ່ ແອວເດີ ຄວິນຕິນ ແອວ ຄຸກ ຫາກໍໄດ້ສອນ, ວ່າເຮົາ ທຸກຄົນ ສາມາດເປັນພາກສ່ວນໃນວິທີທາງທີ່ລຽບງ່າຍ ແລະ ທຳມະດາ, ດ້ວຍຄວາມຮັກ, ເຊື້ອເຊີນຄົນອື່ນໃຫ້ມາຮ່ວມກັບເຮົາທີ່ໂບດ, ໃຫ້ມາຫລິ້ນບ້ານເຮົາ, ກາຍເປັນພາກສ່ວນໃນກຸ່ມຂອງເຮົາ. ການຈັດພິມພຣະຄຳພີມໍມອນ ເປັນເຄື່ອງໝາຍບອກວ່າ ການເຕົ້າໂຮມໄດ້ເລີ່ມຕົ້ນແລ້ວ.³⁰ ພຣະຄຳພີມໍມອນເອງ ກໍເປັນເຄື່ອງມືໃນການເຕົ້າໂຮມ ແລະ ການຊ່ວຍໃຫ້ປ່ຽນໃຈເຫລື້ອມໃສ.

ສິ່ງທີ່ຈຳເປັນຕໍ່ການກະກຽມສຳລັບການສະເດັດມາຄັ້ງທີສອງ ແມ່ນຄວາມມຸ່ງໝັ້ນແຫ່ງການໄຖ່ອັນຍິ່ງໃຫຍ່ ແທນບັນພະບຸລຸດຂອງເຮົາ. ພຣະຜູ້ເປັນເຈົ້າໄດ້ສັນຍາວ່າ ຈະສົ່ງສາດສະດາເອລີຢາ ມາກ່ອນການສະເດັດມາຄັ້ງທີສອງ, “ວັນອັນຍິ່ງໃຫຍ່ ແລະ ໜ້າຢ້ານກົວຂອງພຣະຜູ້ເປັນເຈົ້າ,”³¹ ເພື່ອ “ເປີດເຜີຍ … ຖານະປະໂລຫິດ” ແລະ ປູກຝັງຄຳສັນຍາທີ່ໄດ້ເຮັດກັບພໍ່ໄວ້ໃນໃຈລູກ.³² ເອລີຢາກໍໄດ້ມາຕາມຄຳສັນຍາ. ມື້ທີ່ເພິ່ນມາແມ່ນ ວັນທີ 3 ເດືອນເມສາ, 1836; ບ່ອນທີ່ເພິ່ນມາຫາແມ່ນ ພຣະວິຫານເຄີດແລນ. ໃນບ່ອນນັ້ນ ແລະ ໃນເວລານັ້ນ, ເພິ່ນໄດ້ມອບຖານະປະໂລຫິດ, ຂໍກະແຈສຳລັບການໄຖ່ຄົນຕາຍ ແລະ ການຜູກມັດສາມີ, ພັນລະຍາ, ແລະ ຄອບຄົວ ໃນທຸກລຸ້ນເຂົ້າກັນ ຂ້າມຜ່ານການເວລາ ແລະ ຕະຫລອດຊົ່ວນິລັນດອນ.³³ ປາດສະຈາກສິ່ງນີ້, ຈຸດປະສົງຂອງການສ້າງຈະບໍ່ປະສົບຄວາມສຳເລັດ, ແລະ ຖ້າເປັນເຊັ່ນນັ້ນ, ແຜ່ນດິນໂລກຈະຖືກສາບແຊ່ງ ຫລື “ຖືກທຳລາຍໃຫ້ໝົດສິ້ນ.”³⁴

ຢູ່ທີ່ກອງປະຊຸມສຳລັບຊາວໜຸ່ມ ກ່ອນການອຸທິດພຣະວິຫານໂຣມ ອີຕາລີ, ຊາຍໜຸ່ມ ແລະ ຍິງໜຸ່ມຫລາຍພັນຄົນທີ່ໄປຮ່ວມ ໄດ້ສະແດງບັດລາຍຊື່ຂອງບັນພະບຸລຸດຂອງຕົນຕໍ່ປະທານແນວສັນ. ເຂົາເຈົ້າພ້ອມແລ້ວທີ່ຈະເຂົ້າໄປໃນພຣະວິຫານ ເພື່ອຮັບບັບຕິສະມາແທນບັນພະບຸລຸດເຫລົ່ານັ້ນ ທັນທີທີ່ພຣະວິຫານເປີດບໍລິການ. ມັນເປັນເວລາທີ່ເປັນຕາຍິນດີຫລາຍ, ແຕ່ມັນກໍເປັນພຽງຕົວຢ່າງໜຶ່ງ ເຖິງຄວາມມຸ່ງໝັ້ນທີ່ເລັ່ງດ່ວນ ໃນການສະຖາປະນາຊີໂອນ ສຳລັບລຸ້ນທີ່ໄດ້ຈາກໄປກ່ອນແລ້ວ.

ໃນຂະນະທີ່ເຮົາພະຍາຍາມເປັນຄົນຂະຫຍັນ ໃນການສ້າງສາຊີໂອນ, ຮ່ວມທັງການເປັນພາກສ່ວນໃນການເຕົ້າໂຮມຜູ້ທີ່ຖືກເລືອກໄວ້ຂອງພຣະຜູ້ເປັນເຈົ້າ ແລະ ການໄຖ່ຄົນຕາຍ, ເຮົາຄວນຢຸດບຶດໜຶ່ງເພື່ອຈື່ຈຳວ່າ ມັນເປັນວຽກງານຂອງພຣະຜູ້ເປັນເຈົ້າ ແລະ ພຣະອົງກຳລັງກະທຳມັນຢູ່. ພຣະອົງເປັນເຈົ້າຂອງສວນອະງຸ່ນ, ແລະ ເຮົາເປັນຜູ້ຮັບໃຊ້ຂອງພຣະອົງ. ພຣະອົງຂໍໃຫ້ເຮົາອອກແຮງງານຢູ່ໃນສວນອະງຸ່ນ ດ້ວຍສຸດກຳລັງຂອງເຮົາ ເປັນ “ເທື່ອສຸດທ້າຍ,” ແລະ ພຣະອົງກໍອອກແຮງງານຮ່ວມກັບເຮົາ.³⁵ ຖ້ອຍຄຳທີ່ເໝາະສົມຫລາຍກວ່ານີ້ແມ່ນ ພຣະອົງໄດ້ອະນຸຍາດໃຫ້ເຮົາອອກແຮງງານຮ່ວມກັບພຣະອົງ. ດັ່ງທີ່ໂປໂລໄດ້ກ່າວວ່າ, “ເຮົາເປັນຜູ້ປູກ, ອາໂປໂລເປັນຜູ້ຫົດນ້ຳ; ແຕ່ແມ່ນພຣະເຈົ້າທີ່ເປັນຜູ້ເຮັດໃຫ້ໃຫຍ່ຂຶ້ນ.”³⁶ ແມ່ນພຣະອົງທີ່ຈະເລັ່ງວຽກງານຂອງພຣະອົງ ເມື່ອເຖິງເວລາ.³⁷ ໂດຍການໃຊ້ແຮງທີ່ເຮົາຍອມຮັບວ່າ ຍັງບໍ່ດີພ້ອມ “ວິທີນ້ອຍໆ” ຂອງເຮົາ, ພຣະຜູ້ເປັນເຈົ້າຈະເຮັດໃຫ້ເກີດສິ່ງທີ່ຍິ່ງໃຫຍ່.³⁸

ຍຸກທີ່ຍິ່ງໃຫຍ່ ແລະ ສຸດທ້າຍນີ້ ກຳລັງຂະຫຍາຍອອກໄປເລື້ອຍໆ ໄປສູ່ຄວາມຍິ່ງໃຫຍ່ທີ່ສຸດຂອງມັນ—ຊີໂອນຢູ່ເທິງໂລກ, ໄດ້ລວມເຂົ້າກັບຊີໂອນຈາກເບື້ອງບົນ ໃນເວລາໃກ້ເຖິງການສະເດັດກັບຄືນມາຂອງພຣະຜູ້ຊ່ວຍໃຫ້ລອດ ໃນຄວາມຮຸ່ງເຫລື້ອມ. ສາດສະໜາຈັກຂອງພຣະເຢຊູຄຣິດ ຖືກມອບໝາຍໃຫ້ກະກຽມ—ແລະ ກຳລັງກະກຽມ—ໂລກສຳລັບວັນນັ້ນ. ແລະ ສະນັ້ນ, ບຸນອີດສະເຕີນີ້, ຂໍໃຫ້ເຮົາຈົ່ງສະເຫລີມສະຫລອງການຟື້ນຄືນພຣະຊົນຂອງພຣະເຢຊູຄຣິດແທ້ໆ ແລະ ທຸກສິ່ງທີ່ບອກໄວ້ລ່ວງໜ້າເຖິງ: ການສະເດັດກັບຄືນມາຂອງພຣະອົງ ເພື່ອປົກຄອງເປັນເວລາໜຶ່ງພັນປີແຫ່ງຄວາມສະຫງົບສຸກ, ການພິພາກສາທີ່ຊອບທຳ ແລະ ຄວາມຍຸດຕິທຳທີ່ດີພ້ອມສຳລັບທຸກຄົນ, ຄວາມເປັນອະມະຕະຂອງທຸກຄົນທີ່ເຄີຍມີຊີວິດຢູ່ໃນໂລກນີ້, ແລະ ຄຳສັນຍາທີ່ຈະມີຊີວິດນິລັນດອນ. ການຟື້ນຄືນພຣະຊົນຂອງພຣະຄຣິດ ເປັນການຮັບປະກັນທີ່ດີທີ່ສຸດ ທີ່ວ່າທຸກສິ່ງຈະຖືກເຮັດໃຫ້ຖືກຕ້ອງ. ຂໍໃຫ້ເຮົາຈົ່ງຕັ້ງໃຈສ້າງສາຊີໂອນ ເພື່ອໃຫ້ວັນນັ້ນມາເຖິງໄວໆ. ໃນພຣະນາມຂອງພຣະເຢຊູຄຣິດ, ອາແມນ.