ຫວັງເພິ່ງພຣະເຢຊູຄຣິດ

ໂດຍ ແອວເດີ ຄິມ ບີ ຄະລາກ

ແຫ່ງສາວົກເຈັດສິບ

ຖ້າຫາກເຮົາຫວັງເພິ່ງພຣະເຢຊູຄຣິດ, ພຣະອົງຈະຊ່ວຍເຮົາດຳລົງຊີວິດຕາມພັນທະສັນຍາຂອງເຮົາ ແລະ ຂະຫຍາຍການເອີ້ນຂອງເຮົາ ໃນຖານະແອວເດີໃນອິດສະຣາເອນ.

ຂະນະທີ່ພຣະເຢຊູໄດ້ຍ່າງໄປຕາມທາງໃກ້ເມືອງກາເປນາອູມ¹ ທີ່ອັ່ງອໍໄປດ້ວຍຜູ້ຄົນບຽດພຣະອົງໄປ, ມີຍິງຄົນໜຶ່ງທີ່ປ່ວຍໜັກ ເປັນເວລາ 12 ປີ ໄດ້ເດ່ມືອອກໄປຈັບບາຍແຄມເສື້ອຄຸມຂອງພຣະອົງ. ທັນໃດນັ້ນນາງກໍຫາຍດີຈາກພະຍາດ.²

ພຣະຄຳພີບັນທຶກວ່າ ເມື່ອພຣະເຢຊູຮູ້ສຶກວ່າ, “[ລິດເດດໄດ້] ຊວ່ານອອກຈາກ [ພຣະອົງ],”³ “ຈຶ່ງອວ່າຍໜ້າມາທາງປະຊາຊົນ”⁴ ແລະ “ໄດ້ຫລຽວໄປອ້ອມໆ … ເພື່ອຊອກເບິ່ງວ່າຜູ້ໃດເປັນຜູ້ເຮັດ.”⁵ “ເມື່ອເຫັນວ່າຈະເຊື່ອງຕົວບໍ່ໄດ້ແລ້ວ ຍິງຄົນນັ້ນຈຶ່ງເຂົ້າມາຫາ,”⁶ ນາງ “ໄດ້ຂາບລົງທີ່ຕີນຂອງພຣະອົງ, ແລະ ເວົ້າຄວາມຈິງທັງໝົດສູ່ພຣະອົງຟັງ.”⁷

“ພຣະອົງໄດ້ກ່າວແກ່ນາງວ່າ, ລູກຍິງເອີຍ, ສັດທາຂອງເຈົ້າໄດ້ເຮັດໃຫ້ເຈົ້າຫາຍດີແລ້ວ; ຈົ່ງໄປເປັນສຸກເທີ້ນ.”⁸

ພຣະເຢຊູໄດ້ໂຜດນາງ. ນາງໄດ້ຫາຍດີທາງຮ່າງກາຍ, ແຕ່ເມື່ອພຣະເຢຊູໄດ້ຫັນມາເຫັນນາງ, ນາງໄດ້ປະກາດເຖິງສັດທາຂອງນາງໃນພຣະອົງ ແລະ ພຣະອົງໄດ້ປິ່ນປົວໃຈຂອງນາງ.⁹ ພຣະອົງໄດ້ກ່າວແກ່ນາງດ້ວຍຄວາມຮັກ, ໄດ້ໃຫ້ນາງໝັ້ນໃຈວ່າ ພຣະອົງຮັບຮູ້, ແລະ ໄດ້ອວຍພອນນາງດ້ວຍຄວາມສຸກຂອງພຣະອົງ.¹⁰

ອ້າຍນ້ອງທັງຫລາຍ, ໃນຖານະຜູ້ດຳລົງຖານະປະໂລຫິດທີ່ສັກສິດ, ເຮົາຢູ່ໃນວຽກງານແຫ່ງຄວາມລອດ. ໃນປີແລ້ວນີ້, ພຣະຜູ້ເປັນເຈົ້າໄດ້ມອບການເປັນຜູ້ນຳຂອງວຽກງານນີ້ ໃຫ້ແກ່ແອວເດີ ໃນອິດສະຣາເອນ.¹¹ ເຮົາໄດ້ຮັບຄຳສັ່ງທີ່ດົນໃຈຈາກພຣະຜູ້ເປັນເຈົ້າ—ທຳງານຮ່ວມກັບບັນດາເອື້ອຍນ້ອງຂອງເຮົາ, ເຮົາຕ້ອງປະຕິບັດສາດສະໜາກິດໃນວິທີທາງທີ່ສັກສິດກວ່າ, ເລັ່ງການເຕົ້າໂຮມອິດສະຣາເອນ ຢູ່ທັງສອງຟາກມ່ານ, ຈັດຕັ້ງບ້ານເຮືອນໃຫ້ເປັນບ່ອນຫລົບໄພແຫ່ງສັດທາ ແລະ ເປັນບ່ອນຮຽນຮູ້ພຣະກິດຕິຄຸນ, ແລະ ຕຽມໂລກສຳລັບການສະເດັດມາຄັ້ງທີສອງຂອງພຣະເຢຊູຄຣິດ.¹²

ຄືກັນກັບໝົດທຸກສິ່ງ, ພຣະຜູ້ຊ່ວຍໃຫ້ລອດໄດ້ສະແດງໃຫ້ເຮົາເຫັນວິທີທາງ: ເຮົາຕ້ອງຫວັງເພິ່ງພຣະເຢຊູຄຣິດ ແລະ ຮັບໃຊ້ພຣະອົງ ດັ່ງທີ່ພຣະອົງໄດ້ຫວັງເພິ່ງພຣະບິດາຂອງພຣະອົງ ແລະ ຮັບໃຊ້ພຣະບິດາ.¹³ ພຣະຜູ້ຊ່ວຍໃຫ້ລອດໄດ້ກ່າວໃນທາງນີ້ ກັບສາດສະດາໂຈເຊັບວ່າ:

ໃຫ້ຫວັງເພິ່ງພຣະອົງໃນຄວາມນຶກຄິດທຸກຢ່າງ; ບໍ່ໃຫ້ສົງໄສ, ບໍ່ໃຫ້ຢ້ານກົວ.

ໃຫ້ເບິ່ງຮອຍແຜທີ່ຖືກແທງຢູ່ຂ້າງຂອງພຣະອົງ, ແລະ ຮອຍຕະປູຢູ່ໃນພຣະຫັດ ແລະ ພຣະບາດຂອງພຣະອົງນຳອີກ; ໃຫ້ຮັກສາພຣະບັນຍັດຂອງພຣະອົງ, ແລະ ພວກເພິ່ນຈະໄດ້ຮັບອານາຈັກສະຫວັນເປັນມູນມໍລະດົກ.¹⁴

ໃນໂລກກ່ອນຊ່ວງມະຕະ, ພຣະເຢຊູໄດ້ສັນຍາກັບພຣະບິດາຂອງພຣະອົງວ່າ ພຣະອົງຈະເຮັດຕາມພຣະປະສົງຂອງພຣະບິດາຂອງພຣະອົງ ແລະ ຈະເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ. ເມື່ອພຣະບິດາຂອງພຣະອົງໄດ້ຖາມວ່າ, ພຣະອົງຄວນສົ່ງຜູ້ໃດໄປ?¹⁵ ພຣະເຢຊູໄດ້ຕອບວ່າ:

ພຣະອົງຢູ່ທີ່ນັ້ນ ແລະ ເຕັມພຣະໄທທີ່ຈະໄປ.¹⁶

ພຣະອົງຈະເຮັດຕາມພຣະປະສົງຂອງພຣະບິດາ.¹⁷

ຕະຫລອດພຣະຊົນຊີບມະຕະຂອງພຣະອົງ, ພຣະເຢຊູໄດ້ເຮັດຕາມຄຳສັນຍາ. ພຣະອົງໄດ້ສອນຄຳສອນຂອງພຣະບິດາຂອງພຣະອົງດ້ວຍຄວາມຖ່ອມຕົວ, ດ້ວຍຄວາມອ່ອນໂຍນ, ແລະ ດ້ວຍຄວາມຮັກ ແລະ ພຣະອົງໄດ້ເຮັດວຽກງານຂອງພຣະບິດາຂອງພຣະອົງດ້ວຍອຳນາດ ແລະ ສິດອຳນາດ ທີ່ພຣະບິດາຂອງພຣະອົງໄດ້ມອບໃຫ້ແກ່ພຣະອົງ.¹⁸

ພຣະເຢຊູໄດ້ມອບພຣະໄທຂອງພຣະອົງໃຫ້ແກ່ພຣະບິດາຂອງພຣະອົງ. ພຣະອົງໄດ້ກ່າວວ່າ:

“ເຮົາຮັກພຣະບິດາ.”¹⁹

“ເຮົາເຮັດຕາມພຣະປະສົງຂອງພຣະອົງຢູ່ສະເໝີ.”²⁰

“ເຮົາມາ … ບໍ່ແມ່ນເພື່ອເຮັດຕາມໃຈຂອງຕົນເອງ ແຕ່ເພື່ອເຮັດຕາມພຣະປະສົງຂອງ [ພຣະບິດາ, ຜູ້ທີ່] ໄດ້ໃຊ້ເຮົາມາ.”²¹

ໃນຄວາມທຸກທໍລະມານຂອງພຣະອົງ ທີ່ເຄັດເຊມາເນ, ພຣະອົງໄດ້ອະທິຖານວ່າ, “ແຕ່ຢ່າງໃດກໍຕາມ ຂໍຢ່າໃຫ້ເປັນໄປຕາມຄວາມປາດຖະໜາຂອງລູກ, ແຕ່ຂໍໃຫ້ເປັນໄປຕາມຄວາມປະສົງຂອງພຣະບິດາ.”²²

ເມື່ອພຣະຜູ້ເປັນເຈົ້າເອີ້ນແອວເດີໃນອິດສະຣາເອນ “ໃຫ້ຫວັງເພິ່ງເຮົາໃນຄວາມນຶກຄິດທຸກຢ່າງ” ແລະ “ຈົ່ງເບິ່ງຮອຍແຜ” ໃນພຣະຫັດຂອງພຣະອົງທີ່ຟື້ນພຣະຊົນ, ມັນເປັນການເອີ້ນໃຫ້ຫັນໜີຈາກຄວາມບາບ ແລະ ຈາກໂລກ ແລະ ຫັນມາຫາພຣະອົງ ແລະ ຮັກ ແລະ ເຊື່ອຟັງພຣະອົງ. ມັນເປັນການເອີ້ນໃຫ້ສິດສອນຄຳສອນຂອງພຣະອົງ ແລະ ເຮັດວຽກງານຂອງພຣະອົງໃນວິທີທາງຂອງພຣະອົງ. ສະນັ້ນ, ມັນຈຶ່ງເປັນການເອີ້ນໃຫ້ໄວ້ວາງໃຈທັງໝົດໃນພຣະອົງ, ຍອມມອບຄວາມປະສົງ ແລະ ໃຈຂອງເຮົາໃຫ້ແກ່ພຣະອົງ, ແລະ ຜ່ານທາງອຳນາດແຫ່ງການໄຖ່ຂອງພຣະອົງ ກາຍເປັນເໝືອນດັ່ງພຣະອົງ.²³

ອ້າຍນ້ອງທັງຫລາຍ, ຖ້າຫາກເຮົາຫວັງເພິ່ງພຣະເຢຊູຄຣິດ, ພຣະອົງຈະອວຍພອນເຮົາ ໃຫ້ເປັນແອວເດີໃນອິດສະຣາເອນ ຂອງພຣະອົງ —ຖ່ອມຕົວ, ອ່ອນນ້ອມ, ສອນງ່າຍ, ແລະ ເຕັມໄປດ້ວຍຄວາມຮັກຂອງພຣະອົງ.²⁴ ແລະ ເຮົາຈະນຳຄວາມຊື່ນຊົມ ແລະ ພອນຂອງພຣະກິດຕິຄຸນຂອງພຣະອົງ ແລະ ສາດສະໜາຈັກຂອງພຣະອົງມາໃຫ້ຄອບຄົວ ແລະ ອ້າຍເອື້ອຍນ້ອງຂອງເຮົາ ຢູ່ທັງສອງຟາກມ່ານ.

ປະທານຣະໂຊ ເອັມ ແນວສັນ ໄດ້ເອີ້ນເຮົາໃຫ້ຫວັງເພິ່ງພຣະເຢຊູຄຣິດ ໃນທາງນີ້: “ບໍ່ມີສິ່ງໃດທີ່ງ່າຍ ຫລື ອັດຕະໂນມັດ ກ່ຽວກັບການກາຍເປັນສານຸສິດທີ່ມີພະລັງເຊັ່ນນີ້. ຄວາມຕັ້ງໃຈຂອງເຮົາຕ້ອງຍຶດໝັ້ນຢູ່ທີ່ພຣະຜູ້ຊ່ວຍໃຫ້ລອດ ແລະ ພຣະກິດຕິຄຸນຂອງພຣະອົງ. ມັນຮຽກຮ້ອງຄວາມພະຍາຍາມທາງຈິດໃຈ ທີ່ຈະຫວັງເພິ່ງພຣະອົງ ໃນ ທຸກ ຄວາມຄິດ. ແຕ່ເມື່ອເຮົາເຮັດເຊັ່ນນັ້ນ, ຄວາມສົງໄສ ແລະ ຄວາມຢ້ານກົວຂອງເຮົາ ຈະຜ່າຍໜີໄປ.”²⁵

ຍຶດໝັ້ນ ເປັນຄຳທີ່ມີພະລັງ. ມັນໝາຍຄວາມວ່າ ເປັນການຈັບໃຫ້ແໜ້ນ, ເປັນການຍຶດໄວ້ຢ່າງໝັ້ນຄົງ.²⁶ ເຮົາຕັ້ງໃຈທີ່ຈະຍຶດໝັ້ນໃນພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ ໂດຍການດຳລົງຊີວິດຕາມພັນທະສັນຍາຂອງເຮົາ.

ເມື່ອເຮົາດຳລົງຊີວິດຕາມພັນທະສັນຍາຂອງເຮົາ, ມັນຈະເປັນອິດທິພົນຕໍ່ທຸກສິ່ງທີ່ເຮົາເວົ້າ ແລະ ເຮັດ. ເຮົາດຳລົງຊີວິດຕາມພັນທະສັນຍາ²⁷ ເຕັມໄປດ້ວຍການກະທຳດ້ວຍສັດທາທຸກມື້ ທີ່ເອົາໃຈໃສ່ຕໍ່ພຣະເຢຊູຄຣິດ: ອະທິຖານຈາກໃຈ ໃນພຣະນາມ ຂອງພຣະອົງ, ຊື່ນຊົມຢູ່ກັບພຣະຄຳ ຂອງພຣະອົງ, ຫັນໄປຫາ ພຣະອົງ ເພື່ອການກັບໃຈຈາກບາບຂອງເຮົາ, ແລະ ຮັກສາພຣະບັນຍັດ ຂອງພຣະອົງ, ຮັບສ່ວນສິນລະລຶກ ແລະ ຮັກສາວັນຊະບາໂຕທີ່ສັກສິດ ຂອງພຣະອົງ, ນະມັດສະການໃນພຣະວິຫານ ຂອງພຣະອົງ ເລື້ອຍໆ ເທົ່າທີ່ເຮົາສາມາດເຮັດໄດ້, ແລະ ໃຊ້ຖານະປະໂລຫິດທີ່ສັກສິດ ຂອງພຣະອົງ ເພື່ອຮັບໃຊ້ລູກໆຂອງພຣະອົງ.

ການກະທຳແຫ່ງພັນທະສັນຍາທີ່ອຸທິດຕົນເຫລົ່ານີ້ ຈະເປີດຈິດໃຈເຮົາຕໍ່ອຳນາດຂອງພຣະຜູ້ຊ່ວຍໃຫ້ລອດ ແລະ ເຮັດໃຫ້ອິດທິພົນຂອງພຣະວິນຍານບໍລິສຸດສັກສິດ. ພຣະຜູ້ຊ່ວຍໃຫ້ລອດໄດ້ປ່ຽນລັກສະນະຂອງເຮົາເທື່ອລະບັນທັດ, ເຮົາກໍມີຄວາມເຫລື້ອມໃສຫລາຍຂຶ້ນໃນພຣະອົງ ແລະ ພັນທະສັນຍາຂອງເຮົາກໍເກີດມີຊີວິດຊີວາຢູ່ໃນໃຈເຮົາ.²⁸

ຄຳສັນຍາທີ່ເຮົາໄດ້ເຮັດນຳພຣະບິດາເທິງສະຫວັນ ກາຍເປັນຫີນສີລາຂອງຄວາມຕັ້ງໃຈທີ່ແຂງແກ່ນ, ເປັນຄວາມປາດຖະໜາທີ່ເລິກຊຶ້ງຂອງເຮົາ. ຄຳສັນຍາຂອງພຣະບິດາເທິງສະຫວັນ ເຮັດໃຫ້ເຮົາເຕັມໄປດ້ວຍຄວາມກະຕັນຍູ ແລະ ຄວາມຊື່ນຊົມ.²⁹ ພັນທະສັນຍາຂອງເຮົາຈະເຊົາເປັນກົດບັງຄັບ ທີ່ເຮົາຈະເຮັດຕາມ ແລະ ຈະກາຍເປັນຫລັກທຳທີ່ຊົງຮັກ ທີ່ດົນໃຈ ແລະ ນຳພາເຮົາ ແລະ ໃຫ້ເຮົາມີຄວາມຕັ້ງໃຈທີ່ຈະຍຶດໝັ້ນໃນພຣະເຢຊູຄຣິດ.³⁰

ການກະທຳດ້ວຍຄວາມອຸທິດຕົນເຫລົ່ານີ້ ແມ່ນມີສຳລັບທຸກຄົນ, ທັງຄົນໜຸ່ມ ແລະ ຄົນແກ່. ພວກເຈົ້າຊາຍໜຸ່ມ ຜູ້ດຳລົງຖານະປະໂລຫິດແຫ່ງອາໂຣນ, ທຸກສິ່ງທີ່ຂ້າພະເຈົ້າໄດ້ກ່າວມາໃນຄ່ຳຄືນນີ້ ແມ່ນກ່ຽວຂ້ອງກັບພວກເຈົ້າ. ຂ້າພະເຈົ້າຂອບພຣະໄທພຣະເຈົ້າສຳລັບພວກເຈົ້າ. ພວກເຈົ້າເຮັດພິທີການ ແລະ ພັນທະສັນຍາສັກສິດ ທີ່ມີໃຫ້ສຳລັບໄພ່ພົນຍຸກສຸດທ້າຍຫລາຍລ້ານຄົນ ໃນທຸກອາທິດ. ເມື່ອພວກເຈົ້າຈັດຕຽມ, ໃຫ້ພອນ, ຫລື ຢາຍສິນລະລຶກ; ປະຕິບັດສາດສະໜາກິດ, ຮັບບັບຕິສະມາຢູ່ໃນພຣະວິຫານ; ເຊື້ອເຊີນໝູ່ເພື່ອນໃຫ້ມາຮ່ວມກິດຈະກຳ; ຫລື ຊ່ວຍກູ້ສະມາຊິກໃນກຸ່ມຂອງພວກເຈົ້າ, ພວກເຈົ້າໄດ້ເຮັດວຽກງານແຫ່ງຄວາມລອດ. ພວກເຈົ້າກໍຫວັງເພິ່ງພຣະເຢຊູຄຣິດ ແລະ ດຳລົງຊີວິດຕາມພັນທະສັນຍາຂອງພວກເຈົ້າ ໃນແຕ່ລະວັນຄືກັນ. ຂ້າພະເຈົ້າສັນຍາກັບພວກເຈົ້າວ່າ ຖ້າຫາກພວກເຈົ້າເຮັດແນວນີ້, ພວກເຈົ້າຈະໄດ້ເປັນຜູ້ຮັບໃຊ້ທີ່ພຣະຜູ້ເປັນເຈົ້າໄວ້ວາງພຣະໄທ ໃນເວລານີ້ ແລະ, ໃນອະນາຄົດ, ຈະໄດ້ເປັນແອວເດີໃນອິດສະຣາເອນ.

ອ້າຍນ້ອງທັງຫລາຍ, ຂ້າພະເຈົ້າຮູ້ວ່າ ທັງໝົດນີ້ ຟັງແລ້ວອາດເປັນຕາທໍ້ຖອຍໃຈ. ແຕ່ຈົ່ງຈື່ຈຳພຣະຄຳເຫລົ່ານີ້ຂອງພຣະຜູ້ຊ່ວຍໃຫ້ລອດ ທີ່ວ່າ: “ເຮົາບໍ່ໄດ້ຢູ່ຜູ້ດຽວ, ເພາະພຣະບິດາສະຖິດຢູ່ກັບເຮົາ.”³¹ ເຮົາກໍຄືກັນ. ເຮົາບໍ່ໄດ້ຢູ່ຜູ້ດຽວ. ອົງພຣະເຢຊູຄຣິດເຈົ້າ ແລະ ພຣະບິດາເທິງສະຫວັນຮັກເຮົາ, ແລະ ພວກພຣະອົງສະຖິດຢູ່ກັບເຮົາ.³² ເພາະພຣະເຢຊູໄດ້ຫວັງເພິ່ງພຣະບິດາຂອງພຣະອົງ ແລະ ສຳເລັດການເສຍສະລະຊົດໃຊ້ທີ່ຍິ່ງໃຫຍ່, ເຮົາກໍສາມາດຫວັງເພິ່ງພຣະເຢຊູຄຣິດ ດ້ວຍຄວາມໝັ້ນໃຈວ່າ ພຣະອົງຈະຊ່ວຍເຫລືອເຮົາ.

ບໍ່ມີໃຜໃນພວກເຮົາທີ່ດີພ້ອມ. ບາງເທື່ອເຮົາກໍຄ້າງຄາ. ເຮົາຖືກລົບກວນ ຫລື ທໍ້ຖອຍໃຈ. ເຮົາສະດຸດລົ້ມ. ແຕ່ຖ້າຫາກເຮົາຫວັງເພິ່ງພຣະເຢຊູຄຣິດດ້ວຍໃຈທີ່ປ່ຽນແປງ, ແລ້ວພຣະອົງຈະຍົກເຮົາຂຶ້ນ, ໃຫ້ອະໄພແກ່ເຮົາ, ແລະ ປິ່ນປົວຫົວໃຈເຮົາ. ພຣະອົງອົດທົນ ແລະ ເມດຕາກະລຸນາ; ຄວາມຮັກທີ່ໄຖ່ຂອງພຣະອົງບໍ່ເຄີຍສິ້ນສຸດ ແລະ ບໍ່ເຄີຍເຮັດໃຫ້ຜິດຫວັງ.³³ ພຣະອົງຈະຊ່ວຍເຮົາດຳລົງຊີວິດຕາມພັນທະສັນຍາຂອງເຮົາ ແລະ ຂະຫຍາຍການເອີ້ນຂອງເຮົາ ໃນຖານະແອວເດີໃນອິດສະຣາເອນ.

ແລະ ພຣະບິດາຈະອວຍພອນເຮົາ ດ້ວຍທຸກສິ່ງທີ່ຈຳເປັນຕໍ່ການບັນລຸຈຸດປະສົງຂອງພຣະອົງ—“ສິ່ງທັງປວງ … ທັງໃນສະຫວັນ ແລະ ເທິງແຜ່ນດິນໂລກ, ຊີວິດ ແລະ ຄວາມສະຫວ່າງ, ພຣະວິນຍານ ແລະ ອຳນາດ, ໄດ້ຖືກສົ່ງອອກໄປໂດຍພຣະປະສົງຂອງພຣະບິດາຜ່ານພຣະເຢຊູຄຣິດ, ພຣະບຸດຂອງພຣະອົງ.”³⁴

ເມື່ອຄວາມສະຫວ່າງ ແລະ ອຳນາດແຫ່ງສະຫວັນ ຫລັ່ງໄຫລມາສູ່ຊີວິດຂອງເຮົາ, ການມະຫັດສະຈັນ ສາມຢ່າງຈະເກີດຂຶ້ນ:

ຢ່າງທຳອິດ, ເຮົາສາມາດເຫັນ! ຜ່ານທາງການເປີດເຜີຍ ເຮົາເລີ່ມຕົ້ນເຫັນ ດັ່ງທີ່ພຣະເຢຊູໄດ້ເຫັນຜູ້ຍິງຄົນນັ້ນ: ຜ່ານທາງນອກເຂົ້າໄປເຖິງຫົວໃຈ.³⁵ ເມື່ອເຮົາເຫັນດັ່ງທີ່ພຣະເຢຊູເຫັນ, ພຣະອົງຈະອວຍພອນເຮົາ ໃຫ້ມີຄວາມຮັກຕໍ່ຄົນທີ່ເຮົາຮັບໃຊ້ ດ້ວຍຄວາມຮັກຂອງພຣະອົງ. ດ້ວຍຄວາມຊ່ວຍເຫລືອຂອງພຣະອົງ, ຜູ້ທີ່ເຮົາຮັບໃຊ້ ຈະເຫັນພຣະຜູ້ຊ່ວຍໃຫ້ລອດ ແລະ ຮູ້ສຶກເຖິງຄວາມຮັກຂອງພຣະອົງ.³⁶

ຢ່າງທີສອງ, ເຮົາມີອຳນາດຂອງຖານະປະໂລຫິດ! ເຮົາມີສິດອຳນາດ ແລະ ອຳນາດທີ່ຈະກະທຳໃນພຣະນາມຂອງພຣະເຢຊູຄຣິດ ເພື່ອ “ໃຫ້ພອນ, ນຳພາ, ປົກປ້ອງ, ເພີ່ມຄວາມເຂັ້ມແຂງ, ແລະ ປິ່ນປົວຄົນອື່ນ” ແລະ ນຳການມະຫັດສະຈັນມາໃຫ້ຜູ້ທີ່ເຮົາຮັກ ແລະ ຮັກສາການແຕ່ງງານ ແລະ ຄອບຄົວຂອງເຮົາ ໃຫ້ປອດໄພ.³⁷

ຢ່າງທີສາມ, ພຣະເຢຊູຄຣິດໄປກັບເຮົາ! ເຮົາໄປໃສ, ພຣະອົງກໍຈະໄປດ້ວຍ. ເວລາເຮົາສອນ, ພຣະອົງກໍຈະສອນດ້ວຍ. ເວລາເຮົາປອບໂຍນ, ພຣະອົງກໍຈະປອບໂຍນດ້ວຍ. ເວລາເຮົາໃຫ້ພອນ, ພຣະອົງຈະໃຫ້ພອນດ້ວຍ.³⁸

ອ້າຍນ້ອງທັງຫລາຍ, ເຮົາບໍ່ມີເຫດຜົນທີ່ຈະປິຕິຍິນດີບໍ? ເຮົາມີ! ເຮົາດຳລົງຖານະປະໂລຫິດທີ່ສັກສິດຂອງພຣະເຈົ້າ! ເມື່ອເຮົາຫວັງເພິ່ງພຣະເຢຊູຄຣິດ, ດຳລົງຊີວິດຕາມພັນທະສັນຍາຂອງເຮົາ, ແລະ ຕັ້ງໃຈຍຶດໝັ້ນໃນພຣະອົງ, ເຮົາຈະເຂົ້າຮ່ວມກັບບັນດາເອື້ອຍນ້ອງ ແລະ ປະຕິບັດສາດສະໜາກິດ ໃນວິທີທາງທີ່ສັກສິດກວ່າ, ເຕົ້າໂຮມອິດສະຣາເອນທີ່ກະຈັດກະຈາຍໄປ ຢູ່ທັງສອງຟາກມ່ານ, ເພີ່ມຄວາມເຂັ້ມແຂງໃຫ້ແກ່ຄອບຄົວ ແລະ ຜະນຶກຄອບຄົວເຂົ້າກັນ, ແລະ ຕຽມໂລກສຳລັບການສະເດັດມາຄັ້ງທີສອງຂອງອົງພຣະເຢຊູຄຣິດເຈົ້າ. ມັນຈະເກີດຂຶ້ນ. ຂ້າພະເຈົ້າຂໍເປັນພະຍານເຖິງສິ່ງນີ້.

ຂ້າພະເຈົ້າຂໍປິດດ້ວຍຄຳອະທິຖານຈາກໃຈ, ວ່າເຮົາທຸກຄົນ, ແຕ່ລະຄົນ, ຈະຫວັງເພິ່ງພຣະເຢຊູຄຣິດ ໃນທຸກຄວາມຄິດ. ຢ່າສົງໄສ. ຢ່າສູ່ຢ້ານ. ໃນພຣະນາມຂອງພຣະເຢຊູຄຣິດ, ອາແມນ.