ຄຳປາໄສປິດກອງປະຊຸມ

ໂດຍ ປະທານຣະໂຊ ເອັມ ແນວສັນ

ຂໍໃຫ້ເຮົາຈົ່ງອຸທິດຖວາຍ ແລະ ອຸທິດຊີວິດຂອງເຮົາຄືນໃໝ່ ທີ່ຈະຮັບໃຊ້ພຣະເຈົ້າ ແລະ ລູກໆຂອງພຣະອົງ—ຢູ່ທັງສອງຟາກມ່ານ.

ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າທັງຫລາຍ, ເມື່ອເຮົາມາເຖິງທ້າຍຂອງກອງປະຊຸມແຫ່ງປະຫວັດສາດນີ້, ພວກເຮົາຂອບພຣະໄທພຣະຜູ້ເປັນເຈົ້າສຳລັບການດົນໃຈ ແລະ ການປົກປ້ອງຂອງພຣະອົງ. ຂ່າວສານໄດ້ໃຫ້ການແນະນຳ ແລະ ການເສີມສ້າງທາງວິນຍານໃຫ້ແກ່ເຮົາ.

ຫົວຂໍ້ຕ່າງໆກໍບໍ່ໄດ້ຖືກມອບໝາຍໃຫ້ແກ່ຜູ້ກ່າວປາໄສ. ພວກເພິ່ນແຕ່ລະຄົນໄດ້ອະທິຖານ ເພື່ອທູນຂໍການເປີດເຜີຍສ່ວນຕົວ ໃນການກະກຽມຂ່າວສານຂອງພວກເພິ່ນ. ສຳລັບຂ້າພະເຈົ້າແລ້ວ, ມັນເປັນເລື່ອງອັດສະຈັນທີ່ຫົວຂໍ້ປາໄສຕ່າງໆ ຂອງພວກເພິ່ນເຂົ້າກັນໄດ້ດີຫລາຍ. ໃນຂະນະທີ່ທ່ານສຶກສາຄຳປາໄສເຫລົ່ານີ້, ຂໍໃຫ້ສະແຫວງຫາເພື່ອຈະຮຽນຮູ້ ສິ່ງທີ່ພຣະຜູ້ເປັນເຈົ້າພະຍາຍາມຈະສອນ ທ່ານ ຜ່ານທາງຜູ້ຮັບໃຊ້ຂອງພຣະອົງ.

ສຽງເພງກໍມ່ວນອອນຊອນ. ພວກເຮົາກະຕັນຍູຫລາຍສຳລັບນັກດົນຕີທັງຫລາຍ ຜູ້ທີ່ໄດ້ປະສົມປະສານພອນສະຫວັນຂອງເຂົາເຈົ້າ ເພື່ອຈະນຳພຣະວິນຍານຂອງພຣະຜູ້ເປັນເຈົ້າ ເຂົ້າມາສະຖິດຢູ່ໃນທຸກໆພາກກອງປະຊຸມ. ແລະ ພຣະອົງກໍໄດ້ປະທານພອນໃຫ້ແກ່ຄຳອະທິຖານ ແລະ ຜູ້ມາຮ່ວມກອງປະຊຸມ ໃນທຸກໆພາກ. ແນ່ນອນວ່າ, ກອງປະຊຸມກໍໄດ້ເປັນຄວາມຊື່ນຊົມທາງວິນຍານອີກຄັ້ງສຳລັບເຮົາທຸກຄົນ.

ພວກເຮົາຫວັງ ແລະ ອະທິຖານວ່າ ບ້ານເຮືອນຂອງສະມາຊິກແຕ່ລະຄົນ ຈະກາຍເປັນທີ່ຫລົບໄພແຫ່ງສັດທາແທ້ໆ, ບ່ອນທີ່ພຣະວິຍານຂອງພຣະຜູ້ເປັນເຈົ້າຈະປະທັບຢູ່ໄດ້. ເຖິງແມ່ນວ່າຈະມີການຂັດແຍ້ງຢູ່ອ້ອມຂ້າງເຮົາກໍຕາມ, ບ້ານເຮືອນຂອງເຮົາກໍສາມາດກາຍເປັນສະຖານທີ່ແຫ່ງສະຫວັນ, ບ່ອນທີ່ການສຶກສາ, ການອະທິຖານ, ແລະ ສັດທາຈະສາມາດຮ່ວມເຂົ້າກັນດ້ວຍຄວາມຮັກ. ເຮົາສາມາດກາຍເປັນສານຸສິດຂອງພຣະຜູ້ເປັນເຈົ້າໄດ້ແທ້ໆ, ປົກປ້ອງ ແລະ ອອກຮັບແທນພຣະອົງ ບໍ່ວ່າເຮົາຈະຢູ່ບ່ອນໃດກໍຕາມ.

ຈຸດປະສົງຂອງພຣະເຈົ້າຄວນເປັນຈຸດປະສົງຂອງເຮົາ. ພຣະອົງປະສົງໃຫ້ລູກໆຂອງພຣະອົງ ເລືອກ ທີ່ຈະກັບຄືນໄປຫາພຣະອົງ, ພ້ອມແລ້ວ, ເໝາະສົມ, ໄດ້ຮັບຂອງປະທານສັກສິດແລ້ວ, ໄດ້ຜະນຶກຮຽບຮ້ອຍ, ແລະ ຊື່ສັດຕໍ່ພັນທະສັນຍາທີ່ໄດ້ເຮັດໃນພຣະວິຫານ.

ໃນປະຈຸບັນນີ້ ເຮົາມີພຣະວິຫານທີ່ໄດ້ຮັບການອຸທິດແລ້ວ ຢູ່ດ້ວຍກັນ 162 ແຫ່ງ. ແຫ່ງຕ່າງໆໃນຕອນຕົ້ນກໍຄົງຢູ່ເປັນເຄື່ອງໝາຍເຖິງສັດທາ ແລະ ວິໄສທັດຂອງຜູ້ບຸກເບີດທີ່ຮັກແພງຂອງເຮົາ. ພຣະວິຫານແຕ່ລະແຫ່ງ ທີ່ພວກເພິ່ນໄດ້ກໍ່ສ້າງຂຶ້ນ ກໍເປັນຜົນທີ່ມາຈາກການເສຍສະລະ ແລະ ຄວາມພະຍາຍາມທີ່ໃຫຍ່ຫລວງສ່ວນຕົວ. ແຕ່ລະແຫ່ງກໍຄົງຢູ່ເປັນສົມບັດທີ່ປະເສີດລ້ຳ ຈາກຄວາມສຳເລັດຜົນຂອງຜູ້ບຸກເບີກ.

ເຮົາມີຄວາມຮັບຜິດຊອບອັນສັກສິດ ທີ່ຈະດູແລຮັກສາມັນໄວ້. ດັ່ງນັ້ນ, ອີກບໍ່ດົນ ພຣະວິຫານລຸ້ນບຸກເບີກເຫລົ່ານີ້ ກໍຈະໄດ້ຮັບການສ້ອມແປງໃໝ່ ແລະ ປັບປຸງເປັນຊ່ວງໄລຍະໜຶ່ງ ແລະ, ສຳລັບບາງແຫ່ງ, ກໍຈະໄດ້ຮັບການປັບປຸງຢ່າງຫລວງຫລາຍ. ຈະພະຍາຍາມຮັກສາ ຈຸດເດັ່ນພິເສດທີ່ຖືກຕ້ອງທາງປະຫວັດສາດ ຂອງພຣະວິຫານແຕ່ລະແຫ່ງ ບ່ອນທີ່ເປັນໄປໄດ້, ຈະຮັກສາຄວາມສວຍງາມທີ່ດົນໃຈ ແລະ ຝີມືພິເສດຂອງລຸ້ນຄົນທີ່ໄດ້ລ່ວງລັບໄປດົນນານແລ້ວ.

ລາຍລະອຽດສຳລັບພຣະວິຫານ ເຊັ້ນໂຈດ ຢູທາ ກໍໄດ້ອອກມາແລ້ວ. ແຜນການສຳລັບການປັບປຸງພຣະວິຫານເຊົາເລັກ, ບໍລິເວນພຣະວິຫານ, ແລະ ສູນການຄ້າໃກ້ຕຶກຫ້ອງການໃຫຍ່ຂອງສາດສະໜາຈັກ ກໍຈະຖືກປະກາດໃນວັນສຸກ ວັນທີ 19 ເດືອນເມສາ, 2019.

ພຣະວິຫານແມນທາຍ ແລະ ພຣະວິຫານໂລກັນ ຢູທາ ກໍຈະໄດ້ຮັບການປັບປຸງໃໝ່ໃນປີຂ້າງໜ້າທີ່ຈະມາເຖິງນີ້. ເມື່ອແຜນການເຫລົ່ານັ້ນຖືກກະກຽມຮຽບຮ້ອຍແລ້ວ, ມັນກໍຈະຖືກປະກາດໃຫ້ຮູ້.

ໃນການເຮັດວຽກງານນີ້ ພຣະວິຫານແຕ່ລະແຫ່ງຈະຕ້ອງປິດຊົ່ວໄລຍະໜຶ່ງ. ສະມາຊິກຂອງສາດສະໜາຈັກ ສາມາດໄປນະມັດສະການ ແລະ ຮັບໃຊ້ຕໍ່ໄປ ຢູ່ໃນພຣະວິຫານແຫ່ງອື່ນໆທີ່ຕັ້ງຢູ່ໃກ້. ເມື່ອແຕ່ລະໂຄງການສຳເລັດລົງແລ້ວ, ພຣະວິຫານແຫ່ງປະຫວັດສາດແຕ່ລະແຫ່ງ ກໍຈະຖືກອຸທິດຄືນໃໝ່.

ອ້າຍເອື້ອຍນ້ອງທັງຫລາຍ, ເຮົາຖືວ່າພຣະວິຫານເປັນອາຄານທີ່ສັກສິດທີ່ສຸດ ໃນສາດສະໜາຈັກ. ເມື່ອເຮົາປະກາດແຜນການທີ່ຈະກໍ່ສ້າງພຣະວິຫານແຫ່ງ ໃໝ່ ມັນກໍກາຍເປັນພາກສ່ວນຂອງປະຫວັດສາດທີ່ສັກສິດຂອງເຮົາ. ບັດນີ້, ຂໍຈົ່ງຮັບຟັງຢ່າງລະມັດລະວັງ ແລະ ດ້ວຍຄວາມຄາລະວະ. ຖ້າຫາກຂ້າພະເຈົ້າປະກາດຊື່ພຣະວິຫານ ໃນສະຖານທີ່ພິເສດສຳລັບທ່ານ, ຂ້າພະເຈົ້າຂໍແນະນຳໃຫ້ທ່ານກົ້ມຫົວດ້ວຍຄຳອະທິຖານຂອງຄວາມກະຕັນຍູ ຢ່າງງຽບໆຢູ່ໃນໃຈທ່ານ. ເຮົາບໍ່ຢາກໃຫ້ມີສຽງຮ້ອງໂຮໃດລົບກວນຄວາມສັກສິດຂອງກອງປະຊຸມ ແລະ ພຣະວິຫານສັກສິດຂອງພຣະຜູ້ເປັນເຈົ້າ.

ມື້ນີ້ ພວກເຮົາດີໃຈທີ່ຈະປະກາດແຜນການສ້າງພຣະວິຫານອີກຫລາຍແຫ່ງ, ທີ່ຈະສ້າງຂຶ້ນຢູ່ໃນສະຖານທີ່ ດັ່ງຕໍ່ໄປນີ້:

ປາໂກ ປາໂກ, ອາເມຣິກັນ ຊາມົວ; ໂອກິນາວາ ຊີທີ, ໂອກິນາວາ; ນຽບຟູ, ຕົງກາ; ທະວີລາ ວາລີ, ຢູທາ; ໂມເຊ ເຫລກ, ວໍຊິງຕັນ; ແຊນ ເປໂດຼ ຊູລາ, ຮົງດູຣັດ; ອານໂຕຟາກັສຕາ, ຈີເລ; ບູດາແພັດ, ຮຸ່ງກາຣີ.

ຂໍຂອບໃຈ, ອ້າຍເອື້ອຍນ້ອງທີ່ຮັກແພງຂອງຂ້າພະເຈົ້າ.

ເມື່ອເຮົາກ່າວເຖິງພຣະວິຫານເກົ່າ ແລະ ໃໝ່ຂອງເຮົາ, ຂໍໃຫ້ເຮົາແຕ່ລະຄົນໃຫ້ສັນຍາໂດຍການກະທຳຂອງເຮົາ ວ່າເຮົາເປັນສານຸສິດທີ່ແທ້ຈິງຂອງອົງພຣະເຢຊູຄຣິດເຈົ້າ. ຂໍໃຫ້ເຮົາຈົ່ງປັບປຸງຊີວິດຂອງເຮົາຄືນໃໝ່ ຜ່ານທາງສັດທາຂອງເຮົາ ແລະ ໄວ້ວາງໃຈໃນພຣະອົງ. ຂໍໃຫ້ເຮົາຈົ່ງເຂົ້າເຖິງອຳນາດແຫ່ງການຊົດໃຊ້ຂອງພຣະອົງ ໂດຍການກັບໃຈແຕ່ລະວັນ. ແລະ ຂໍໃຫ້ເຮົາຈົ່ງອຸທິດຊີວິດ ແລະ ອຸທິດຊີວິດຄືນໃໝ່ ທີ່ຈະຮັບໃຊ້ພຣະເຈົ້າ ແລະ ລູກໆຂອງພຣະອົງ—ຢູ່ທັງສອງຟາກມ່ານ.

ຂ້າພະເຈົ້າຂໍມອບຄວາມຮັກ ແລະ ພອນໄວ້ກັບທ່ານ, ໃຫ້ທ່ານແນ່ໃຈວ່າ ການເປີດເຜີຍຍັງມີຢູ່ຕໍ່ໄປ, ຢູ່ໃນສາດສະໜາຈັກຂອງພຣະຜູ້ເປັນເຈົ້າ. ມັນຈະສືບຕໍ່ ຈົນກວ່າ “ຈຸດປະສົງຂອງພຣະເຈົ້າຈະສຳເລັດ, ແລະ ພຣະເຢໂຮວາອົງຍິ່ງໃຫຍ່ ຈະກ່າວວ່າ ວຽກງານສຳເລັດຄົບຖ້ວນແລ້ວ.”¹

ຂ້າພະເຈົ້າຂໍອວຍພອນທ່ານ ແລະ ສະແດງປະຈັກພະຍານວ່າ ພຣະເຈົ້າຊົງພຣະຊົນຢູ່! ພຣະເຢຊູຄື ພຣະຄຣິດ! ນີ້ແມ່ນສາດສະໜາຈັກຂອງພຣະອົງ. ພວກເຮົາແມ່ນຜູ້ຄົນຂອງພຣະອົງ. ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.