ປຶ້ມຍຸດທະວິທີຂອງຖານະປະໂລຫິດຂອງພວກເຈົ້າ
ສ້າງປຶ້ມຍຸດທະວິທີຂອງພວກເຈົ້າ ເຖິງວິທີທີ່ພວກເຈົ້າຈະພິສູດຕົວເອງ ວ່າເປັນສານຸສິດຂອງພຣະຄຣິດ.
ເດືອນທັນວາປີກາຍນີ້, ຝ່າຍປະທານສູງສຸດ ໄດ້ອະນຸມັດເອກະສານ ທີ່ປະກາດວ່າ ເດັກນ້ອຍຜູ້ຊາຍອາຍຸ 11 ປີ ສາມາດ “ເລີ່ມຕົ້ນໄປຮ່ວມ … ກຸ່ມຖານະປະໂລຫິດແຫ່ງອາໂຣນ … ເລີ່ມຕົ້ນໃນເດືອນມັງກອນ ຂອງປີທີ່ເຂົາຈະເຖິງອາຍຸ 12 ປີ.”1
ຜົນປະກົດວ່າ ລະຫວ່າງຕົ້ນປີນີ້, ມີເດັກຜູ້ຊາຍອາຍຸ 11 ປີ ຕົກຕະລຶງ ຄິດວ່າ ພວກເຂົາຊິໄດ້ຢູ່ຊັ້ນປະຖົມໄວຕໍ່ໄປ ຈົນເຖິງວັນເກີດປີໜ້າຂອງພວກເຂົາ ແຕ່ບັດນີ້ ພວກເຂົາໄດ້ຢາຍສິນລະລຶກ ໃນວັນອາທິດ ໃນຖານະມັກຄະນາຍົກໃໝ່ຂອງສາດສະໜາຈັກ.
ຂ້າພະເຈົ້າກໍຢາກຮູ້ວ່າ ແມ່ນໃຜທີ່ຕົກຕະລຶງຫລາຍທີ່ສຸດ—ມັກຄະນາຍົກ ຫລື ພໍ່ແມ່ຂອງພວກເຂົາ. ໃນຈຳນວນມັກຄະນາຍົກໃໝ່ ເກືອບເຖິງ 80,000 ຄົນເຫລົ່ານີ້, ຫລາຍຄົນໄດ້ຢູ່ກັບພວກເຮົາ ໃນຄ່ຳຄືນນີ້ ຢູ່ໃນສູນກາງປະຊຸມໃຫຍ່ທີ່ກວ້າງຂວາງນີ້ ຫລື ຮ່ວມກັບພວກເຮົາ ຜ່ານທາງເທັກໂນໂລຈີ. ຂໍຕ້ອນຮັບສູ່ກຸ່ມອ້າຍນ້ອງຢ່າງຫລວງຫລາຍຂອງຖານະປະໂລຫິດ!
ການປ່ຽນແປງນີ້ ເຮັດໃຫ້ກອງປະຊຸມເທື່ອນີ້ເປັນຄັ້ງປະຫວັດສາດ—ມັນຄົງເປັນກຸ່ມດຳລົງຖານະປະໂລຫິດແຫ່ງອາໂຣນທີ່ໃຫຍ່ໂຕທີ່ສຸດ ທີ່ເຄີຍ ໄປຮ່ວມກອງປະຊຸມຖານະປະໂລຫິດສາມັນ ຂອງກອງປະຊຸມໃຫຍ່ສາມັນ. ກ່ຽວກັບໂອກາດພິເສດນີ້, ຂ້າພະເຈົ້າຂໍກ່າວກັບຊາຍໜຸ່ມ ຂອງຖານະປະໂລຫິດແຫ່ງອາໂຣນໂດຍສະເພາະ.
ບົດຮຽນທີ່ຮຽນຈາກກິລາ
ໂດຍທີ່ເປັນນັກຮຽນ, ຫລາຍຄົນພວກເຈົ້າກໍຍັງພັດທະນາພອນສະຫວັນ, ຄວາມສົນໃຈ, ແລະ ງານອະດິເລກ ຜ່ານທາງກິດຈະກຳທີ່ນອກຫລັກສູດ ຢູ່ໂຮງຮຽນ ຫລື ຮຽນພິເສດ, ເປັນທີມ, ແລະ ເປັນກຸ່ມ ຢູ່ນອກໂຮງຮຽນ, ຮ່ວມທັງກິລາ.
ໂດຍທີ່ຂ້າພະເຈົ້າມັກກິລາມາຕະຫລອດຊີວິດ, ຂ້າພະເຈົ້າຊົມເຊີຍຜູ້ມີຄວາມສາມາດດ້ານການຫລິ້ນກິລາ ຈົນສາມາດຫລິ້ນເຖິງລະດັບສູງ. ກ່ອນຄົນໃດຈະເກັ່ງໃນສິ່ງໃດສິ່ງໜຶ່ງ ແທ້ໆ ທີ່ນອກເໜືອໄປຈາກພອນສະຫວັນແລ້ວ, ຄົນນັ້ນຈະຕ້ອງມີລະບຽບວິໄນ, ເສຍສະລະ, ແລະ ໃຊ້ເວລາເຝິກຝົນຫລາຍສົມຄວນ. ນັກກິລາເຊັ່ນນັ້ນ ສ່ວນຫລາຍຈະໄດ້ຍິນຄຳເວົ້າທີ່ຮຸນແຮງຈາກຫົວໜ້າທີມ ແລະ ຈະສະລະສິ່ງທີ່ເຂົາຕ້ອງການໃນເວລານີ້ ເພື່ອອະນາຄົດທີ່ດີກວ່າ.
ພວກເຮົາກໍຮູ້ຈັກສະມາຊິກ ແລະ ຜູ້ດຳລົງຖານະປະໂລຫິດຂອງສາດສະໜາຈັກບາງຄົນ ຜູ້ທີ່ປະສົບກັບຄວາມສຳເລັດ ລະດັບສູງສຸດຂອງການເປັນນັກກິລາມືອາຊີບ. ມີຫລາຍຄົນທີ່ເປັນຕົວຢ່າງທີ່ດີ, ແຕ່ຂ້າພະເຈົ້າສາມາດກ່າວເຖິງພຽງແຕ່ຈຳນວນໜ້ອຍໜຶ່ງເທົ່ານັ້ນ ເພາະເວລາຈຳກັດ. ພວກເຈົ້າອາດຮູ້ຈັກນັກກິລາບາງຄົນເຫລົ່ານີ້: ຫລິ້ນເບດສະບອນ, ແຈຣະມີ ກຸທຼີ ແລະ ບຣາຍສ໌ ຮາບເປີ; ຫລິ້ນບານບ້ວງ, ຈາບາຣີ ພາກເກີ ແລະ ຈິມເມີ ເຟຼເດັດ; ຫລິ້ນເຕະບານ, ຣິຄາໂດ ໂຣຫາສ໌; ໃນທີມ ຣຸກບີ, ວິວລຽມ ໂຮໂປອາເຕ; ແລະ ຫລິ້ນຟຸດບອນ, ເທຊຳ ຮຽວ ແລະ ແດນໂຍ ຊໍເຣັນເຊັນ. ແຕ່ລະຄົນກໍເປັນພາກສ່ວນທີ່ສຳຄັນຫລາຍ ໃນກິລາຂອງຕົນ.
ຂະນະທີ່ເຂົາເຈົ້າມີຄວາມສຳເລັດຫລາຍໃນການຫລິ້ນກິລາຂອງເຂົາເຈົ້າ, ນັກກິລາເຫລົ່ານີ້ ຈະເປັນຄົນທຳອິດ ທີ່ສາລະພາບວ່າ ເຂົາເຈົ້າບໍ່ໄດ້ເປັນນັກກິລາທີ່ດີພ້ອມ ຫລື ເປັນບຸກຄົນທີ່ດີພ້ອມ. ເຂົາເຈົ້າໄດ້ໃຊ້ຄວາມພະຍາຍາມຢ່າງໜັກ ຈົນສຸດຄວາມສາມາດ ໃນການຫລິ້ນກິລາ—ແລະ ໃນການດຳລົງຊີວິດຕາມພຣະກິດຕິຄຸນ. ເຂົາເຈົ້າລຸກຂຶ້ນໃໝ່ ຖ້າຫາກເຂົາເຈົ້າສະດຸດລົ້ມ ແລະ ເຂົາເຈົ້າພະຍາຍາມອົດທົນຈົນເຖິງທີ່ສຸດ.
ສຶກສາປຶ້ມຍຸດທະວິທີ
ໃນການຫລິ້ນກິລາເປັນທີມ, ຍຸດທະວິທີໄດ້ຖືກອອກແບບສຳລັບສະຖານະການໃດໜຶ່ງໂດຍສະເພາະ ຂອງເກມ ແລະ ໄດ້ຖືກລວມເຂົ້າເປັນ ປຶ້ມຍຸດທະວິທີ. ນັກກິລາຈະຮຽນໜ້າທີ່ມອບໝາຍຂອງຕົນ ສຳລັບແຕ່ລະຍຸດທະວິທີ. ນັກກິລາທີ່ປະສົບຄວາມສຳເລັດ ຈະສຶກສາປຶ້ມຍຸດທະວິທີຢ່າງລະອຽດ ຈົນວ່າ ເມື່ອກ່າວເຖິງຍຸດທະວິທີໃດ, ເຂົາເຈົ້າກໍຮູ້ຈັກທັນທີວ່າ ເຂົາເຈົ້າຈະໄປໃສ ແລະ ເຮັດຫຍັງ.
ຮູບພາບ ຖ່າຍໂດຍ ເດບ ຄາບ/REUTERS/stock.adobe.com
ໃນວິທີທີ່ຄ້າຍຄືກັນນີ້, ເຮົາຜູ້ດຳລົງຖານະປະໂລຫິດແຫ່ງອາໂຣນ ກໍມີທີມ (ກຸ່ມ) ແລະ ມີປຶ້ມຍຸດທະວິທີ (ພຣະຄຳພີສັກສິດ ແລະ ຖ້ອຍຄຳຂອງສາດສະດາໃນປະຈຸບັນ).
ພວກເຈົ້າໄດ້ຊ່ວຍເຫລືອເພື່ອນໃນທີມຢູ່ບໍ?
ພວກເຈົ້າສຶກສາປຶ້ມຍຸດທະວິທີເຖິງຂັ້ນໃດແລ້ວ?
ພວກເຈົ້າເຂົ້າໃຈໜ້າທີ່ມອບໝາຍຂອງພວກເຈົ້າຄັກແນ່ແລ້ວບໍ?
ການປະເຊີນໜ້າກັບຝ່າຍກົງກັນຂ້າມ
ໃນການກ່າວປຽບທຽບຕື່ມອີກ, ຫົວໜ້າທີມທີ່ດີເດັ່ນ ຮູ້ຈັກຈຸດເດັ່ນ ແລະ ຈຸດອ່ອນຂອງທີມລາວ ເທົ່າໆກັບຝ່າຍກົງກັນຂ້າມ. ເຂົາເຈົ້າໄດ້ສ້າງແຜນການຫລິ້ນເກມ ທີ່ຈະຊ່ວຍເຂົາເຈົ້າໃຫ້ໄດ້ຮັບໄຊຊະນະ. ພວກເຈົ້າເດ?
ພວກເຈົ້າຮູ້ວ່າ ພວກເຈົ້າຕ້ອງລະວັງກັບການລໍ້ລວງແບບໃດ, ແລະ ພວກເຈົ້າສາມາດບອກລ່ວງໜ້າໄດ້ວ່າ ຝ່າຍກົງກັນຂ້າມຈະພະຍາຍາມຢຸດຢັ້ງ ແລະ ເຮັດໃຫ້ພວກເຈົ້າທໍ້ຖອຍໃຈ ໃນວິທີໃດ. ພວກເຈົ້າເຄີຍໄດ້ວາງແຜນ ແລະ ໄດ້ສ້າງປຶ້ມຍຸດທະວິທີດ້ວຍຕົວເອງແລ້ວບໍ ເພື່ອວ່າພວກເຈົ້າຈະຮູ້ຈັກວິທີ ທີ່ຈະຕອບຮັບ ເວລາພວກເຈົ້າປະເຊີນກັບຝ່າຍກົງກັນຂ້າມ?
ເມື່ອພວກເຈົ້າປະເຊີນກັບການລໍ້ລວງທາງສິນທຳຕ່າງໆນາໆ—ບໍ່ວ່າຈະເປັນຕອນຢູ່ກັບໝູ່ເພື່ອນ ຫລື ຕອນຢູ່ຄົນດຽວ ຈ້ອງຢູ່ໜ້າຈໍ—ພວກເຈົ້າຮູ້ຈັກຍຸດທະວິທີຂອງເກມຂອງພວກເຈົ້າ. ຖ້າຫາກໝູ່ເພື່ອນຄົນໃດຊວນພວກເຈົ້າດື່ມຂອງມຶນເມົາ ຫລື ລອງໃຊ້ຢາເສບຕິດ, ພວກເຈົ້າຮູ້ຈັກຍຸດທະວິທີ. ພວກເຈົ້າເຄີຍເຝິກຝົນມາແລ້ວ ແລະ ຮູ້ຈັກວິທີທີ່ຈະໂຕ້ຕອບ ລ່ວງໜ້າແລ້ວ.
ພ້ອມດ້ວຍແຜນຫລິ້ນເກມ, ປຶ້ມຍຸດທະວິທີ, ແລະ ຄວາມຕັ້ງໃຈທີ່ໜັກແໜ້ນ ເພື່ອເຮັດບົດບາດຂອງພວກເຈົ້າ, ພວກເຈົ້າຈະພົບວ່າ ການລໍ້ລວງບໍ່ສາມາດຄອບງຳພວກເຈົ້າໄດ້. ພວກເຈົ້າໄດ້ຕັດສິນໃຈແລ້ວ ວ່າຈະເຮັດແນວໃດ ແລະ ເຮັດສິ່ງໃດກັບການລໍ້ລວງ. ພວກເຈົ້າບໍ່ຈຳເປັນຕ້ອງຕັດສິນໃຈໃນນາທີນັ້ນ ເມື່ອພວກເຈົ້າປະເຊີນໜ້າກັບການລໍ້ລວງ.
ເມື່ອບໍ່ດົນມານີ້ ຜູ້ໜຶ່ງໃນກຸ່ມອັກຄະສາວົກພວກເຮົາ ໄດ້ເລົ່າເລື່ອງ ທີ່ສະແດງເຖິງຄຳສອນນີ້. ຕອນເພິ່ນເປັນປະໂລຫິດ ແລະ ເຂົ້າຢູ່ໂຮງຮຽນມັດທະຍົມ, ເພິ່ນໄດ້ໄປຫລິ້ນມ່ວນກັບໝູ່ເພື່ອນ. ຫລັງຈາກພວກເພິ່ນໄດ້ກິນເຂົ້າແລ້ວ, ກໍໄດ້ໄປຂີ່ລົດຫລິ້ນ ແລະ ເພື່ອນຄົນໜຶ່ງຊວນໄປເບິ່ງໜັງ. ບັນຫາກໍຄື ເພິ່ນຮູ້ວ່າ ມັນເປັນໜັງເລື່ອງທີ່ເພິ່ນບໍ່ຄວນເບິ່ງ. ເຖິງແມ່ນວ່າ ເພິ່ນຮູ້ສຶກຖືກກົດດັນ ແລະ ເປັນຫ່ວງກ່ຽວກັບສະຖານະການ, ແຕ່ເພິ່ນໄດ້ວາງແຜນໄວ້ແລ້ວສຳລັບເລື່ອງນີ້. ສິ່ງນີ້ຄືສະຖານະການໜຶ່ງ ຢູ່ໃນປຶ້ມຍຸດທະວິທີຂອງຖານະປະໂລຫິດຂອງເພິ່ນ.
ໂດຍການຫາຍໃຈເລິກໆ ແລະ ຮວບຮວມຄວາມກ້າຫານ, ເພິ່ນໄດ້ເວົ້າວ່າ, “ຂ້ອຍບໍ່ຢາກໄປເບິ່ງໜັງເລື່ອງນີ້. ໃຫ້ເອົາຂ້ອຍໄປສົ່ງຢູ່ບ້ານສາ,” ຊຶ່ງໝູ່ເພື່ອນກໍໄດ້ເຮັດ. ມັນເປັນຍຸດທະວິທີງ່າຍໆ ແຕ່ໄດ້ຮັບໄຊຊະນະ! ຫລາຍປີຕໍ່ມາ, ເພື່ອນຄົນໜຶ່ງທີ່ໄດ້ຢູ່ນຳເພິ່ນໃນຄືນນັ້ນ ໄດ້ບັນຍາຍເຖິງຕົວຢ່າງຂອງເພິ່ນ ວ່າເປັນພະລັງທີ່ຍິ່ງໃຫຍ່ໃຫ້ແກ່ລາວ ເມື່ອລາວປະເຊີນກັບສະຖານະການທີ່ຄ້າຍຄືກັນນັ້ນ ໃນຊີວິດຂອງລາວເອງ.
ເຈ້ຍປຶ້ມຍຸດທະວິທີ
ຂ້າພະເຈົ້າໄດ້ຂໍໃຫ້ເຈົ້າໜ້າທີ່ຊັ້ນຜູ້ໃຫຍ່ສອງສາມຄົນ ແນະນຳຍຸດທະວິທີບາງຢ່າງ ເພື່ອພວກເຈົ້າຈະໄດ້ຕື່ມມັນໃສ່ໃນປຶ້ມຍຸດທະວິທີຂອງພວກເຈົ້າ. ຕໍ່ໄປນີ້ແມ່ນຄຳແນະນຳທີ່ດົນໃຈຂອງພວກເພິ່ນ:
-
ອະທິຖານທຸກວັນສຳລັບຄວາມສະຫວ່າງທີ່ສ່ອງໃສກວ່າ ແລະ ມີປະຈັກພະຍານເຖິງພຣະເຢຊູຄຣິດ.
-
ໃຫ້ຕັ້ງໃຈຟັງຄຳສິດສອນຂອງພໍ່ແມ່, ອະທິການ, ຜູ້ນຳຊາຍໜຸ່ມ ແລະ ຜູ້ນຳກຸ່ມຂອງພວກເຈົ້າ.
-
ຫລີກເວັ້ນຈາກສິ່ງລາມົກ ແລະ ເນື້ອຫາຂອງສື່ສານມວນຊົນທີ່ອະທຳ.
-
ຈື່ຈຳຄຳສັນຍາທີ່ພວກເຈົ້າໄດ້ເຮັດນຳພຣະເຈົ້າ, ແລະ ພະຍາຍາມຮັກສາມັນ.
-
ສຶກສາເລື່ອງລາວຂອງພຣະຄຳພີ ກ່ຽວກັບສາດສະດາທີ່ຍິ່ງໃຫຍ່, ແລະ ເຮັດຕາມແບບຢ່າງທີ່ດີຂອງພວກເພິ່ນ.
-
ເປັນພອນໃຫ້ແກ່ລູກໆຂອງພຣະບິດາເທິງສະຫວັນ ຜ່ານທາງການຮັບໃຊ້.
-
ໃຫ້ຊອກມີໝູ່ເພື່ອນທີ່ດີ ເພື່ອຊ່ວຍພວກເຈົ້າໃຫ້ກາຍເປັນບຸກຄົນທີ່ພວກເຈົ້າຢາກເປັນ.
-
ກາຍເປັນຜູ້ຊຳນານເລື່ອງ ແອພ FamilySearch, ແລະ ຄົ້ນຫາປະຫວັດຄອບຄົວຂອງພວກເຈົ້າເອງ.
-
ວາງແຜນໄປທ່ຽວບ່ອນທີ່ພວກເຈົ້າສາມາດໜີຈາກອິດທິພົນທີ່ຊົ່ວຮ້າຍ.
-
ຮັກ ແລະ ຊ່ວຍເພີ່ມຄວາມເຂັ້ມແຂງໃຫ້ແກ່ສະມາຊິກ ໃນກຸ່ມຖານະປະໂລຫິດຂອງພວກເຈົ້າ.
ຂ້າພະເຈົ້າກໍໄດ້ເວົ້າລົມນຳນັກກິລາ ຜູ້ທີ່ພວກເຮົາຫາກໍເຫັນຮູບມື້ກີ້ນີ້. ຂ້າພະເຈົ້າແປກໃຈທີ່ ເຂົາເຈົ້າບໍ່ໄດ້ແນະນຳຕົວເອງ ພຽງແຕ່ຕາມສິ່ງທີ່ເຂົາເຈົ້າ ເຮັດ, ໃນຖານະນັກກິລາມືອາຊີບ, ແຕ່ໄດ້ແນະນຳຕົວເອງຕາມທີ່ເຂົາເຈົ້າ ເປັນ, ນຳອີກ ໃນຖານະບຸດຂອງພຣະບິດາເທິງສະຫວັນ ທີ່ຊົງຮັກ ແລະ ເປັນຜູ້ດຳລົງຖານະປະໂລຫິດຂອງພຣະເຈົ້າ.
ບັດນີ້ ໃຫ້ເຮົາມາຟັງຄວາມຄິດຂອງເຂົາເຈົ້າ ດັ່ງຕໍ່ໄປນີ້:
-
ຈິມເມີ ເຟຼເດັດ, ຕອນເປັນມັກຄະນາຍົກ ທີ່ພວມຮຽນມັດກາລະວັດ, ກ່າວວ່າ “ຂ້ານ້ອຍໄດ້ຮຽນເພິ່ງຄວາມຮູ້ ແລະ ສັດທາຂອງຕົວເອງ ເຖິງຄວາມຈິງຂອງພຣະກິດຕິຄຸນ. ສິ່ງນີ້ໄດ້ນຳພາຂ້ານ້ອຍ … ໃຫ້ເປັນຜູ້ດຳລົງຖານະປະໂລຫິດທີ່ມີຄ່າຄວນ ແລະ ຍິ່ງໄປກວ່ານັ້ນ—ໃຫ້ເປັນຕົວຢ່າງໃນທາງດີ.”
ຮູບພາບຈິມເມີ ເຟຼເດັດ ຕອນເປັນມັກຄະນາຍົກ -
ບຣາຍສ໌ ຮາບເປີ, ຖານະສາມີ, ຂຽນວ່າ: “ຂ້ານ້ອຍຄິດວ່າ ຄວາມໂດ່ງດັງ, ຄວາມລ້ຳລວຍ, ແລະ ລາງວັນລະດັບປະເທດ ຊິເຮັດໃຫ້ຂ້ານ້ອຍມີຄວາມສຸກ. ແຕ່ກໍຍັງຮູ້ສຶກຂາດເຫລືອບາງສິ່ງຢູ່. ສະນັ້ນ, ຂ້ານ້ອຍ … ຈຶ່ງໄດ້ກະກຽມ ແລະ [ໄດ້ໄປ] ພຣະວິຫານ. ບັດນີ້ ຂ້ານ້ອຍຢູ່ໃນເສັ້ນທາງ [ກັບຄືນ] ໄປຫາພຣະບິດາເທິງສະຫວັນ ແລະ ມີຄອບຄົວນິລັນດອນ—ຊຶ່ງເປັນຄວາມຊື່ນຊົມທີ່ຍິ່ງໃຫຍ່ທີ່ສຸດ ຢູ່ໃນໂລກ!”
ຮູບພາບບຣາຍສ໌ ຮາບເປີ ແລະ ພັນລະຍາຂອງລາວ -
ແດນໂຍ ຊໍເຣັນເຊັນ, ຕອນເປັນຜູ້ສອນສາດສະໜາ, ເວົ້າວ່າ: “ປຶ້ມຍຸດທະວິທີທີ່ດີ ເປັນແຜນທີ່ໃຊ້ພອນສະຫວັນ ແລະ ພະລັງຂອງສະມາຊິກທຸກຄົນຢູ່ໃນທີມ. … ເມື່ອຂ້ານ້ອຍສຶກສາ ແລະ ເຝິກຝົນຄຳສອນຂອງພຣະກິດຕິຄຸນຂອງພຣະເຢຊູຄຣິດ, ຂ້ານ້ອຍສາມາດຮູ້ເຖິງວິທີທີ່ຈະໃຊ້ພະລັງຂອງຂ້ານ້ອຍ ເພື່ອຮັບໃຊ້ໃນຖານະປະໂລຫິດ.”
ຮູບພາບແດນໂຍ ຊໍເຣັນເຊັນ ຕອນເປັນຜູ້ສອນສາດສະໜາ -
ແຈຣະມີ ກຸຕຼີ, ຕອນເປັນປະທານເຜີຍແຜ່, ໄດ້ເວົ້າວ່າ: “ຕອນມີອາຍຸໄດ້ 12 ປີ ແລະ ເປັນມັກຄະນາຍົກ … [ຂ້ານ້ອຍໄດ້ຮູ້ສຶກ] ເຖິງພຣະວິນຍານເປັນພະຍານຕໍ່ຂ້ານ້ອຍ [ວ່າ] ‘ຊີວິດນີ້ ເປັນເວລາ … ທີ່ຕຽມພ້ອມທີ່ຈະພົບພຣະເຈົ້າ.’2 ແຜນການຫລິ້ນເກມ ຄືສັດທາໃນພຣະເຈົ້າ ໄປສູ່ການກະທຳ [ແລະ] ການກັບໃຈ ຜ່ານທາງພຣະຜູ້ຊ່ວຍໃຫ້ລອດ. … ປຶ້ມຍຸດທະວິທີ ແມ່ນມີຢູ່ໃນພຣະຄຳພີທີ່ສັກສິດ ແລະ ຜ່ານທາງສາດສະດາທີ່ມີຊີວິດຢູ່.”
ຮູບພາບແຈຣະມີ ກຸຕຼີ, ຕອນເປັນປະທານເຜີຍແຜ່ -
ຈາບາຣີ ພາກເກີ, ຕອນຮັບຕຳແໜ່ງແອວເດີ, ເວົ້າວ່າ, “ຂ້ານ້ອຍບໍ່ຄິດວ່າ ຂ້ານ້ອຍຈະກາຍເປັນຄົນດັ່ງທີ່ເປັນຢູ່ໃນເວລານີ້ ຖ້າຫາກຂ້ານ້ອຍບໍ່ໄດ້ຕັດສິນໃຈຮັບບັບຕິສະມາ. … ຂ້ານ້ອຍມີຄວາມກະຕັນຍູຫລາຍ ທີ່ມີພຣະເຈົ້າໃນຊີວິດຂອງຂ້ານ້ອຍ ເພື່ອນຳພາຂ້ານ້ອຍໃນທຸກວັນ.”
ຮູບພາບຈາບາຣີ ພາກເກີ ຕອນຮັບການແຕ່ງຕັ້ງຕໍ່ຖານະປະໂລຫິດ -
ຣິຄາໂດ ໂຣຫາສ໌, ຕອນເປັນປະທານສາຂາ, ໄດ້ເວົ້າວ່າ: “ຜ່ານທາງຖານະປະໂລຫິດ [ຂອງພຣະເຈົ້າ] [ເຮົາ] ສາມາດຊ່ວຍໃນວຽກງານຂອງພຣະອົງ. ເຮົາຖືກເອີ້ນໃຫ້ ‘ເປັນຄົນເຂັ້ມແຂງ ແລະ ມີຄວາມກ້າຫານ’3 ໃນການປົກປ້ອງຄວາມຈິງ.” ສິ່ງນີ້ໄດ້ຊ່ວຍລາວໃຫ້ປະສົບຄວາມສຳເລັດ ທັງຢູ່ໃນສະໜາມກິລາ ແລະ ໃນຖານະຜູ້ດຳລົງຖານະປະໂລຫິດ.
ຮູບພາບຣິຄາໂດ ໂຣຫາສ໌ ຕອນເປັນປະທານສາຂາ -
ເທຊຳ ຮຽວ, ຕອນເປັນຜູ້ສອນສາດສະໜາ, ຮູ້ສຶກວ່າ ພຣະກິດຕິຄຸນຂອງພຣະເຢຊູຄຣິດ ໄດ້ເປັນປຶ້ມຍຸດທະວິທີສຳລັບລາວ ໃນຊີວິດຂອງລາວ. ລາວໄດ້ບອກວ່າ, “ການເຊື່ອໃນແຜນ [ຂອງພຣະເຈົ້າ] ແລະ ການເຮັດບົດບາດຂອງຂ້ານ້ອຍໃຫ້ດີທີ່ສຸດ ໄດ້ຊ່ວຍຂ້ານ້ອຍໃຫ້ຮູ້ສຶກສະຫງົບ ແລະ ມີຄວາມສຸກ ໃນຊີວິດ, ໂດຍທີ່ຮູ້ວ່າ ພຣະເຈົ້າພໍພຣະໄທກັບຄວາມພະຍາຍາມຂອງຂ້ານ້ອຍ.”
ຮູບພາບເທຊຳ ຮຽວ ຕອນເປັນຜູ້ສອນສາດສະໜາ -
ວິວລຽມ ໂຮໂປອາເຕ, ຕອນໃຫ້ພອນແກ່ລູກຊາຍນ້ອຍ ໂດຍສີ່ລຸ້ນຄົນ, ເວົ້າວ່າ ພຣະກິດຕິຄຸນຊ່ວຍລາວ “ໃຫ້ເຫັນແຜນການຂອງຝ່າຍກົງກັນຂ້າມ ແລະ ຊ່ວຍລາວທາງວິນຍານ ເພື່ອຈະສາມາດຕ້ານທານກັບລູກສອນໄຟ ແລະ ຮັບໃຊ້ຄົນອື່ນໄດ້ດີກວ່າເກົ່າ.”
ຮູບພາບວິວລຽມ ໂຮໂປອາເຕ ຕອນໃຫ້ພອນແກ່ລູກນ້ອຍ
ພວກເຈົ້າເດ? ພວກເຈົ້າເຫັນເອກະລັກທີ່ ສູງກວ່າ ແລະ ສັກສິດກວ່າ ຂອງພວກເຈົ້າບໍ ໃນຖານະບຸດຂອງພຣະເຈົ້າ ແລະ ເປັນຜູ້ດຳລົງຖານະປະໂລຫິດທີ່ສັກສິດຂອງພຣະອົງ? ໂດຍມີເອກະລັກນິລັນດອນນີ້ຢູ່ໃນຄວາມຄິດ, ໃຫ້ພວກເຈົ້າສ້າງແຜນຫລິ້ນເກມ ແລະ ສ້າງປຶ້ມຍຸດທະວິທີ ທີ່ນຳພາພວກເຈົ້າໃນເວລາທີ່ຖືກລໍ້ລວງ ແລະ ຍາມຍາກລຳບາກ. ໃຫ້ເຮົາມາພິຈະລະນາຍຸດທະສາດ ຂອງການບຸກໂຈມຕີ ແລະ ການປ້ອງກັນຕົວ.
ຍຸດທະສາດຂອງການບຸກໂຈມຕີ ຊ່ວຍເພີ່ມຄວາມເຂັ້ມແຂງໃຫ້ແກ່ປະຈັກພະຍານ ແລະ ເພິ່ມຄວາມຕັ້ງໃຈທີ່ຈະຢູ່ໃນເສັ້ນທາງທີ່ຄັບ ແລະ ແຄບ. ຕົວຢ່າງແມ່ນຮ່ວມດ້ວຍການອະທິຖານ, ການສຶກສາພຣະຄຳພີ, ການໄປໂບດ ແລະ ໄປພຣະວິຫານ, ການຈ່າຍເງິນສ່ວນສິບ, ແລະ ການເຮັດຕາມຄຳແນະນຳ ຢູ່ໃນປຶ້ມນ້ອຍ ສຳລັບຄວາມເຂັ້ມແຂງຂອບຊາວໜຸ່ມ ຢ່າງສະໝ່ຳສະເໝີ.
ຍຸດທະສາດຂອງການປ້ອງກັນຕົວ ຮ່ວມທັງການວາງແຜນໄວ້ລ່ວງໜ້າ ວ່າພວກເຈົ້າຈະປະເຊີນກັບການລໍ້ລວງດ້ວຍວິທີໃດ. ເມື່ອຖືກຍົວະໃຫ້ລົດມາດຕະຖານຂອງພວກເຈົ້າລົງ, ພວກເຈົ້າຈະຮູ້ລ່ວງໜ້າວ່າ ພວກເຈົ້າຈະເຮັດສິ່ງໃດ.
ພວກເຈົ້າຕ້ອງການປຶ້ມຍຸດທະວິທີສຳລັບເລື່ອງນີ້.
ຮູ້ສຶກວ່າ ບໍ່ຢາກອະທິຖານມື້ນີ້ບໍ? ເຖິງເວລາໃຊ້ຍຸດທະວິທີ ທີ່ພວກເຈົ້າໄດ້ວາງແຜນໄວ້ແລ້ວ.
ຮູ້ສຶກວ່າ ປະຈັກພະຍານບໍ່ເຂັ້ມແຂງບໍ? ພວກເຈົ້າມີຍຸດທະວິທີສຳລັບເລື່ອງນີ້ແລ້ວ. ພວກເຈົ້າຮູ້ຈັກວ່າຈະເຮັດສິ່ງໃດ.
ດີເດັ່ນທີ່ສຸດ ໃນສາຍພຣະເນດຂອງພຣະເຈົ້າ
ພວກເຈົ້າເປັນຜູ້ດຳລົງຖານະປະໂລຫິດທີ່ສັກສິດຂອງພຣະເຈົ້າ. ຄວາມຕັ້ງໃຈຂອງພວກເຈົ້າທີ່ຈະຍຶດໝັ້ນຮາວເຫລັກໄວ້ໃຫ້ແໜ້ນ ຈະປ່ຽນແປງພວກເຈົ້າ ໃຫ້ເປັນບຸກຄົນນິລັນດອນ ຊຶ່ງພວກເຈົ້າໄດ້ຖືກສ້າງໃຫ້ເປັນແນວນັ້ນ.
ພຣະເຈົ້າຮູ້ຈັກ ແລະ ຮັກພວກເຈົ້າ. ພຣະອົງຈະອວຍພອນພວກເຈົ້າ ແລະ ນຳພາພວກເຈົ້າໄປທຸກບາດກ້າວ.
ພວກເຈົ້າອາດຄິດວ່າ ພວກເຈົ້າບໍ່ໄດ້ເປັນຄົນພິເສດ, ວ່າພວກເຈົ້າບໍ່ໂດ່ງດັງລະດັບໂລກ. ນັ້ນບໍ່ແມ່ນຄວາມຈິງ. ພວກເຈົ້າບໍ່ຮູ້ບໍວ່າ ພຣະເຈົ້າໄດ້ປະກາດວ່າ ສິ່ງອ່ອນແອຂອງໂລກຈະອອກມາ ແລະ ປາບຄົນມີພະລັງ ແລະ ຄົນແຂງແຮງ?4
ສະນັ້ນ, ພວກເຈົ້າຮູ້ສຶກອ່ອນແອບໍ? ບໍ່ສຳຄັນບໍ? ຂໍສະແດງຄວາມຍິນດີນຳເດີ, ພວກເຈົ້າກໍຢູ່ໃນແຖວ!
ພວກເຈົ້າຮູ້ສຶກບໍ່ສຳຄັນບໍ? ຕ່ຳຕ້ອຍກວ່າບໍ? ພວກເຈົ້າອາດເປັນຜູ້ທີ່ພຣະເຈົ້າຕ້ອງການ.
ມີຕົວຢ່າງໃດບໍ ທີ່ຍິ່ງໃຫຍ່ໄປກວ່າຕົວຢ່າງຂອງດາວິດ ທີ່ໄດ້ກ້າວອອກໄປຕໍ່ສູ້ກັບໂກລີອາດ ຢູ່ໃນສະໜາມຮົບ? ໂດຍການເພິ່ງອາໄສພຣະຜູ້ເປັນເຈົ້າ, ດາວິດໄດ້ຊ່ວຍຕົວເອງ ແລະ ກອງທັບຂອງອິດສະຣາເອນໄວ້ໄດ້ດ້ວຍແຜນ!5 ໃຫ້ຮູ້ວ່າພຣະຜູ້ເປັນເຈົ້າຈະຢູ່ກັບພວກເຈົ້າ ໃນເວລາທີ່ພວກເຈົ້າຮວບຮວມຄວາມກ້າຫານ ທີ່ຈະຢູ່ຝ່າຍຂອງພຣະອົງ. “ຖ້າພຣະເຈົ້າຢູ່ຝ່າຍພວກເຮົາ, ຜູ້ໃດຈະຕໍ່ສູ້ພວກເຮົາໄດ້?”6
ພຣະອົງຈະເປີດປະຕູ ແລະ ຊ່ວຍເຮົາພົບພະລັງ ແລະ ຄວາມສາມາດ ທີ່ເຮົາບໍ່ຮູ້ວ່າຕົວເອງມີ.7
ໃຫ້ເຊື່ອຟັງຫົວໜ້າທີມທີ່ໄວ້ວາງໃຈໄດ້ຂອງພວກເຈົ້າ, ດັ່ງເຊັ່ນ ພໍ່ແມ່, ອະທິການ, ແລະ ຜູ້ນຳຊາຍໜຸ່ມຂອງພວກເຈົ້າ. ຮຽນຮູ້ຈາກປຶ້ມຍຸດທະວິທີ. ອ່ານພຣະຄຳພີ. ສຶກສາຖ້ອຍຄຳຂອງສາດສະດາໃນປະຈຸບັນ. ສ້າງແຜນຫລິ້ນເກມຂອງພວກເຈົ້າ ເຖິງວິທີທີ່ພວກເຈົ້າຈະພິສູດຕົວເອງ ວ່າເປັນສານຸສິດຂອງພຣະຄຣິດ.
ຮູ້ລ່ວງໜ້າວ່າພວກເຈົ້າຈະໃຊ້ຍຸດທະວິທີໃດ ເພື່ອເພີ່ມຄວາມເຂັ້ມແຂງໃຫ້ແກ່ວິນຍານຂອງພວກເຈົ້າ ແລະ ຫລີກເວັ້ນຈາກກັບດັກຂອງຝ່າຍກົງກັນຂ້າມ.
ໃຫ້ເຮັດສິ່ງນີ້ ແລະ ແລ້ວພຣະເຈົ້າຈະໃຊ້ພວກເຈົ້າຢ່າງແນ່ນອນ.
ບັດນີ້, ອາດມີຫລາຍຄົນທີ່ແຍກຕົວອອກຈາກພຣະກິດຕິຄຸນ ແລະ ເດີນໜີໄປ. ບາງຄົນອາດນັ່ງຢູ່ຕັ່ງ ເບິ່ງການຫລິ້ນເກມຢູ່ໄກໆ. ບາງຄົນ ອາດເລືອກນັ່ງຢູ່ຕັ່ງ, ເຖິງແມ່ນຫົວໜ້າທີມ ພະຍາຍາມສົ່ງເຂົາລົງສະໜາມ.. ຂ້າພະເຈົ້າເຊື້ອເຊີນພວກເຈົ້າໃຫ້ຊ່ວຍກູ້, ສົ່ງເສີມ, ແລະ ຮັກແພງເຂົາເຈົ້າ ຄືກັບວ່າ ເຂົາເຈົ້າເປັນໝູ່ໃນທີມຂອງພວກເຈົ້າເອງ!
ບາງຄົນກໍຢາກເຂົ້າໄປຫລິ້ນ—ແລະ ກໍເຮັດ. ສິ່ງທີ່ສຳຄັນທີ່ສຸດ ບໍ່ແມ່ນວ່າເຂົາມີພອນສະຫວັນຫລາຍປານໃດ ແຕ່ສິ່ງສຳຄັນແມ່ນຄວາມເຕັມໃຈ ທີ່ເຂົາສະແດງອອກຢູ່ໃນສະໜາມ. ເຂົາເຈົ້າບໍ່ລໍຖ້າໃຫ້ຖືກເອີ້ນຊື່ກ່ອນ ເພາະເຂົາເຈົ້າຮູ້ຈັກຂໍ້ພຣະຄຳພີທີ່ວ່າ ຖ້າເຮົາມີຄວາມປາດຖະໜາທີ່ຈະຮັບໃຊ້ພຣະເຈົ້າ ເຮົາກໍໄດ້ຖືກເອີ້ນໃຫ້ມາຫາວຽກງານ.8
ພວກເຈົ້າສາມາດໄປຢືນຢູ່ໃນແຖວໄດ້.
ພວກເຈົ້າເຮັດແນວນັ້ນ ຂະນະທີ່ພວກເຈົ້າສຶກສາ ແລະ ປະຕິບັດຕາມປຶ້ມຍຸດທະວິທີຂອງຖານະປະໂລຫິດຂອງພວກເຈົ້າ.
ບາງເທື່ອພວກເຈົ້າຈະສະດຸດລົ້ມຢູ່ໃນເສັ້ນທາງ—ບາງທີຫລາຍເທື່ອ, ຫລາຍໆເທື່ອ. ພວກເຈົ້າບໍ່ດີພ້ອມທຸກຢ່າງ; ການສະດຸດລົ້ມເປັນພາກສ່ວນໜຶ່ງຂອງຂັ້ນຕອນຂອງການທົດສອບຄວາມເໝາະສົມ ທີ່ປ່ອຍໃຫ້ພວກເຈົ້າຫລໍ່ຫລອມ ລັກສະນະຂອງຕົວເອງ ແລະ ຮັບໃຊ້ໃນທາງທີ່ມີຄວາມເຫັນອົກເຫັນໃຈຫລາຍກວ່າເກົ່າ. ພຣະຜູ້ຊ່ວຍໃຫ້ລອດ ແລະ ການຊົດໃຊ້ອັນເປັນນິດຂອງພຣະອົງ ຊ່ວຍເຮົາໃຫ້ຮູ້ວິທີທາງ ທີ່ຈະເອົາຊະນະຄວາມຜິດພາດ ຜ່ານທາງການກັບໃຈທີ່ຈິງໃຈ.
ນັກກິລາທີ່ດີເດັ່ນ ຈະໃຊ້ເວລາຢ່າງຫລວງຫລາຍ ໃນການເຝິກຝົນພາກສ່ວນນ້ອຍໜຶ່ງຂອງເກມເຂົາເຈົ້າ. ໃນຖານະຜູ້ດຳລົງຖານະປະໂລຫິດ, ພວກເຈົ້າຕ້ອງມີແນວຄິດດຽວກັນນັ້ນ. ຖ້າຫາກພວກເຈົ້າຜິດພາດ, ໃຫ້ກັບໃຈ ແລະ ຮຽນຮູ້ຈາກມັນ. ໃຫ້ເຝິກຝົນ ເພື່ອພວກເຈົ້າຈະເຮັດໄດ້ດີກວ່າເກົ່າ ເທື່ອໜ້າ. ໃນທີ່ສຸດ, ມັນຈະຂຶ້ນຢູ່ກັບຕົວພວກເຈົ້າເອງ. ພວກເຈົ້າຈະຮຽນຮູ້ຈາກປຶ້ມຍຸດທະວິທີບໍ?
ຂ້າພະເຈົ້າຮຽກຮ້ອງພວກເຈົ້າ: ໃຫ້ໄວ້ວາງໃຈໃນພຣະຜູ້ເປັນເຈົ້າ. ຈົ່ງສວມຍຸດທະພັນຄົບຊຸດຂອງພຣະເຈົ້າ,9 ແລະ ລົງສະໜາມ.
ມີໜ້ອຍຄົນທີ່ໄດ້ເປັນນັກກິລາມືອາຊີບ ທີ່ຢູ່ໃນລະດັບສູງສຸດ, ແຕ່ເມື່ອກ່າວເຖິງການເປັນສານຸສິດ, ມີຫລາຍຄົນທີ່ເລືອກຕິດຕາມພຣະຄຣິດ.
ຕາມຈິງແລ້ວ, ນັ້ນຄືພາລະກິດຂອງພວກເຈົ້າ ຢູ່ໃນໂລກນີ້—ເພື່ອຮຽນຮູ້ວິທີຂອງພຣະຜູ້ເປັນເຈົ້າ, ເຂົ້າໄປໃນເສັ້ນທາງແຫ່ງການເປັນສານຸສິດ, ແລະ ພະຍາຍາມດຳລົງຊີວິດຕາມແຜນຂອງພຣະເຈົ້າ. ພຣະເຈົ້າຈະຄ້ຳຊູ ແລະ ອວຍພອນພວກເຈົ້າ ເມື່ອພວກເຈົ້າຫັນໄປຫາພຣະອົງ. ພວກເຈົ້າສາມາດເຮັດສິ່ງນີ້ໄດ້ ເພາະພວກເຈົ້າດີເດັ່ນທີ່ສຸດ ໃນສາຍພຣະເນດຂອງພຣະອົງ.
ຂ້າພະເຈົ້າອະທິຖານວ່າ ພວກເຈົ້າຈະຕັ້ງໃຈ ທີ່ຈະດຳລົງຊີວິດໃຫ້ມີຄ່າຄວນສຳລັບຖານະປະໂລຫິດທີ່ສັກສິດ ທີ່ພວກເຈົ້າດຳລົງຢູ່ ແລະ ພະຍາຍາມສະແດງບົດບາດທີ່ສັກສິດຂອງພວກເຈົ້າທຸກວັນ. ຂ້າພະເຈົ້າອວຍພອນພວກເຈົ້າ ດ້ວຍຄວາມສາມາດ ແລະ ຄວາມປາດຖະໜາທີ່ຈະເຮັດເຊັ່ນນັ້ນ. ຂ້າພະເຈົ້າຂໍເປັນພະຍານເຖິງອຳນາດຂອງຖານະປະໂລຫິດ ທີ່ພວກເຈົ້າດຳລົງຢູ່, ເຖິງສາດສະດາທີ່ມີຊີວິດຢູ່, ແລະ ເຖິງພຣະເຢຊູຄຣິດ ແລະ ບົດບາດຂອງພຣະອົງ ໃນການເປັນພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ. ໃນພຣະນາມຂອງພຣະເຢຊູຄຣິດ, ອາແມນ.