ຕາແຫ່ງສັດທາ
ຖ້າເຮົາເລືອກເຮັດຕາມພຽງແຕ່ສ່ວນໃດສ່ວນໜຶ່ງ ຢູ່ໃນໃບປະກາດເທົ່ານັ້ນ, ເຮົາຈະເຫັນພາບນິລັນດອນ ແບບບໍ່ແຈ້ງຊັດ, ທີ່ໃຫ້ຄວາມສຳຄັນແກ່ປະສົບການຂອງເຮົາໃນທີ່ນີ້ ແລະ ໃນເວລານີ້ ຫລາຍເກີນໄປ.
ບໍ່ດົນກ່ອນການຄຶງຂອງພຣະອົງ, ພຣະເຢຊູໄດ້ຖືກພາໄປຫາປີລາດ ຢູ່ສານ. “ເຈົ້າເປັນກະສັດຂອງຊາວຢິວບໍ?” ປີລາດໄດ້ຖາມ ແບບຜູ້ມີອຳນາດ. ພຣະເຢຊູໄດ້ຕອບວ່າ: “ອານາຈັກຂອງເຮົາບໍ່ເປັນຂອງໂລກ. … ເຮົາ [ໄດ້ມາ] ສູ່ໂລກນີ້, ກໍເພື່ອເປັນພະຍານ [ເຖິງ] ຄວາມຈິງ. ທຸກຄົນທີ່ຢູ່ຝ່າຍຄວາມຈິງ ກໍຍ່ອມຟັງສຽງຂອງເຮົາ.”
ປີລາດໄດ້ຖາມແບບເຍາະເຍີ້ຍວ່າ, “ຄວາມຈິງນັ້ນແມ່ນຫຍັງ?”1
ໃນໂລກປະຈຸບັນ, ຄຳຖາມທີ່ວ່າ “ຄວາມຈິງນັ້ນແມ່ນຫຍັງ?” ອາດສັບສົນຫລາຍສຳລັບຜູ້ທີ່ບໍ່ເຊື່ອເລື່ອງສາດສະໜາ.
ເມື່ອຄົ້ນຫາ “ຄວາມຈິງນັ້ນແມ່ນຫຍັງ?” ຢູ່ໃນ ກູເກິນ, ມັນມີຢູ່ຢ່າງຫລວງຫລາຍ. ເຮົາມີຂໍ້ມູນຢ່າງຫລວງຫລາຍຢູ່ໃນມືຖື ຫລາຍກວ່າປຶ້ມທັງໝົດທີ່ຢູ່ໃນຫໍສະໝຸດຊ້ຳອີກ. ເຮົາໃຊ້ຊີວິດຢູ່ກັບຂໍ້ມູນ ແລະ ຄວາມຄິດຄວາມເຫັນ ທີ່ລົ້ນເຫລືອ. ສຽງທີ່ຊັກຊວນ ແລະ ດຶງດູດໃຈ ກໍດັງສະນັ່ນຢູ່ອ້ອມຮອບຕົວເຮົາ.
ເມື່ອເຕັມໄປດ້ວຍຄວາມສັບສົນໃນປະຈຸບັນ, ຈຶ່ງບໍ່ແປກໃຈເລີຍ ທີ່ຫລາຍຄົນໄດ້ເຊື່ອຖ້ອຍຄຳທີ່ ໂປຼຕາໂກຣາສ໌ ໄດ້ກ່າວກັບ ໂຊກະເຣ ຫລາຍກວ່າ 2,500 ປີ ມາແລ້ວ ທີ່ວ່າ: “ຄວາມຈິງນັ້ນແມ່ນຫຍັງ ສຳລັບທ່ານ,” ເພິ່ນເວົ້າວ່າ, “ສິ່ງໃດທີ່ເປັນຄວາມຈິງສຳລັບທ່ານ, ສິ່ງນັ້ນກໍເປັນຄວາມຈິງ, ແລະ ສິ່ງໃດທີ່ເປັນຄວາມຈິງສຳລັບຂ້າພະເຈົ້າ, ສິ່ງນັ້ນກໍເປັນຄວາມຈິງ.”2
ຄວາມຈິງຜ່ານທາງພຣະກິດຕິຄຸນຂອງພຣະເຢຊູຄຣິດທີ່ຖືກຟື້ນຟູ
ໂດຍທີ່ໄດ້ຮັບພອນດ້ວຍພຣະກິດຕິຄຸນທີ່ຟື້ນຟູຂອງພຣະເຢຊູຄຣິດ, ເຮົາຖ່ອມຕົວຫລາຍທີ່ມີຫລາຍສິ່ງ ທີ່ເປັນຄວາມຈິງແທ້ໆ. ຄວາມຈິງນິລັນດອນ ແມ່ນຄືກັນໝົດສຳລັບບຸດ ແລະ ທິດາທຸກຄົນຂອງພຣະເຈົ້າ.
ພຣະຄຳພີສອນວ່າ ຄວາມຈິງຄືຄວາມຮູ້ແຈ້ງເຖິງສິ່ງທີ່ເປັນຢູ່, ແລະ ດັ່ງທີ່ໄດ້ເປັນມາ, ແລະ ດັ່ງທີ່ຈະເປັນ.”3 ຄວາມຈິງມີທັງສິ່ງທີ່ໄດ້ເກີດຂຶ້ນແລ້ວ ແລະ ຍັງບໍ່ທັນເກີດຂຶ້ນເທື່ອ, ຂະຫຍາຍມຸມມອງ ໃນປະຈຸບັນຂອງເຮົາ ອອກຢ່າງກວ້າງຂວາງ.
ພຣະເຢຊູໄດ້ກ່າວວ່າ, “ເຮົານີ້ແຫລະເປັນທາງນັ້ນ, ເປັນຄວາມຈິງ, ແລະ ເປັນຊີວິດ.”4 ຄວາມຈິງສະແດງໃຫ້ເຮົາເຫັນເສັ້ນທາງທີ່ພາໄປສູ່ຊີວິດນິລັນດອນ, ແລະ ມັນມາເຖິງພຽງແຕ່ໂດຍ ແລະ ຜ່ານທາງພຣະຜູ້ຊ່ວຍໃຫ້ລອດຂອງເຮົາ, ພຣະເຢຊູຄຣິດ, ເທົ່ານັ້ນ. ມັນບໍ່ມີທາງອື່ນເລີຍ.
ພຣະເຢຊູຄຣິດສິດສອນເຮົາ ເຖິງວິທີທີ່ຈະດຳລົງຊີວິດ ແລະ, ຜ່ານທາງການຊົດໃຊ້ ແລະ ການຟື້ນຄືນພຣະຊົນຂອງພຣະອົງ, ພຣະອົງໄດ້ສະເໜີໃຫ້ອະໄພແກ່ເຮົາ ຈາກບາບຂອງເຮົາ ແລະ ໄດ້ສະເໜີມອບຄວາມອະມະຕະ ຫລັງຈາກຊີວິດນີ້ໃຫ້ແກ່ເຮົາ. ສິ່ງນີ້ເປັນຄວາມຈິງອີ່ຫລີ.
ພຣະອົງສິດສອນເຮົາວ່າ ມັນບໍ່ສຳຄັນ ວ່າເຮົາຮັ່ງມີ ຫລື ຍາກຈົນ, ມີຊື່ສຽງ ຫລື ບໍ່ມີໃຜຮູ້ຈັກ, ມີປະສົບການຫລາຍ ຫລື ທຳມະດາກໍຕາມ. ແຕ່ສິ່ງທີ່ເຮົາສະແຫວງຫາໃນຊີວິດນີ້ແມ່ນ ການເພີ່ມຄວາມເຂັ້ມແຂງໃຫ້ແກ່ສັດທາຂອງເຮົາ ໃນອົງພຣະເຢຊູຄຣິດເຈົ້າ, ເລືອກສິ່ງທີ່ດີ ແທນສິ່ງທີ່ຊົ່ວຮ້າຍ, ແລະ ຮັກສາພຣະບັນຍັດຂອງພຣະອົງ. ຂະນະທີ່ເຮົາສະເຫລີມສະຫລອງວິທີການໃໝ່ເລື່ອງວິທະຍາສາດ ແລະ ການແພດ, ແຕ່ຄວາມຈິງເລື່ອງພຣະເຈົ້າ ແມ່ນຍິ່ງໃຫຍ່ກວ່າການຄົ້ນພົບເຫລົ່ານັ້ນ.
ກົງກັນຂ້າມກັບຄວາມຈິງນິລັນດອນ, ມັນມີການຫລອກລວງສະເໝີມາ ເພື່ອກີດກັນລູກໆຂອງພຣະເຈົ້າຈາກຄວາມຈິງ. ການໂຕ້ຖຽງຂອງຜູ້ປໍລະປັກແມ່ນເໝືອນເດີມສະເໝີໄປ. ໃຫ້ເຮົາມາຟັງຖ້ອຍຄຳຈາກ 2,000 ປີກ່ອນ ທີ່ວ່າ:
“[ເຈົ້າ] ບໍ່ສາມາດຮູ້ຈັກສິ່ງທີ່ [ເຈົ້າ] ບໍ່ເຫັນ. … [ແມ່ນຫຍັງກໍຕາມທີ່ຜູ້ຄົນເຮັດໄປນັ້ນ] ຈະບໍ່ມີຄວາມຜິດເລີຍ.”
“[ພຣະເຈົ້າບໍ່ໄດ້ອວຍພອນເຈົ້າດອກ, ແຕ່] ທຸກຄົນ [ທຸກໆຄົນຮຸ່ງເຮືອງ] ຕາມຄວາມສະຫລາດ [ຂອງຕົນເອງ].”5
“ມັນບໍ່ມີເຫດຜົນທີ່ຄົນຢ່າງ … ພຣະຄຣິດ … [ຈະ] ເປັນພຣະບຸດຂອງພຣະເຈົ້າ.”6
“[ສິ່ງທີ່ເຈົ້າເຊື່ອຖື ຄືວັດທະນະທຳທີ່ໂງ່ຈ້າ ແລະ ເປັນ] ຄວາມຜິດປົກກະຕິຂອງ [ຈິດໃຈ]ເຈົ້າ.”7 ຟັງແລ້ວກໍຄືເວລານີ້ນໍ?
ດ້ວຍພຣະກິດຕິຄຸນທີ່ຖືກຟື້ນຟູ, ພຣະເຈົ້າໄດ້ມອບວິທີທາງໃຫ້ເຮົາ ເພື່ອຮຽນ ແລະ ຮູ້ເຖິງຄວາມຈິງທາງວິນຍານທີ່ສຳຄັນ: ເຮົາຮຽນຮູ້ເຖິງຄວາມຈິງຜ່ານທາງພຣະຄຳພີສັກສິດ, ການອະທິຖານສ່ວນຕົວ, ປະສົບການຂອງເຮົາເອງ, ຜ່ານຄຳແນະນຳຂອງສາດສະດາ ແລະ ອັກຄະສາວົກທີ່ມີຊີວິດຢູ່, ແລະ ຜ່ານທາງການນຳພາຂອງພຣະວິນຍານບໍລິສຸດ, ຜູ້ສາມາດຊ່ວຍເຮົາໃຫ້ “ຮູ້ຄວາມຈິງຂອງທຸກເລື່ອງ.”8
ຄວາມຈິງເປັນການຫລິງເຫັນທາງວິນຍານ
ເຮົາສາມາດຮູ້ຈັກສິ່ງທີ່ເປັນຂອງພຣະເຈົ້າ ເມື່ອເຮົາສະແຫວງຫາສິ່ງເຫລົ່ານັ້ນທາງວິນຍານ. ໂປໂລໄດ້ກ່າວວ່າ, “ບໍ່ມີຜູ້ໃດຮູ້ພຣະໄທຂອງພຣະເຈົ້າ, ມີແຕ່ພຣະວິນຍານຂອງພຣະເຈົ້າເທົ່ານັ້ນທີ່ຮູ້ຈັກ. … [ເພາະ] ພວກເຂົາອາໄສວິນຍານ.”9
ໃຫ້ເຮົາມາເບິ່ງຮູບພາບນີ້ ທີ່ແຕ້ມໂດຍ ໄມໂກ ເມີຟີ. ຈາກມຸມມອງນີ້, ທ່ານອາດບໍ່ຢາກເຊື່ອວ່າ ມັນເປັນຮູບຕາຂອງມະນຸດ. ແຕ່ເມື່ອທ່ານເບິ່ງແຕ່ລະຈຸດໆ ຢູ່ໃນຮູບນັ້ນ, ທ່ານຈະເຫັນຄວາມສວຍງາມ ທີ່ນັກແຕ້ມໄດ້ສ້າງຂຶ້ນ.
ເຊັ່ນດຽວກັນ, ເຮົາເຫັນຄວາມຈິງທາງວິນຍານຂອງພຣະເຈົ້າ ຜ່ານທາງມຸມມອງຂອງຕາແຫ່ງສັດທາ. ໂປໂລໄດ້ກ່າວວ່າ: “ມະນຸດທີ່ມີຈິດໃຈທຳມະດາຈະຮັບສິ່ງເຫລົ່ານັ້ນ ຊຶ່ງເປັນຂອງພຣະວິນຍານຂອງພຣະເຈົ້າກໍບໍ່ໄດ້ ເພາະພວກເຂົາເຫັນວ່າ ສິ່ງເຫລົ່ານີ້ເປັນເລື່ອງໂງ່ສຳລັບຕົນ ແລະ ບໍ່ສາມາດເຂົ້າໃຈເພາະວ່າ ທີ່ຈະເຂົ້າໃຈສິ່ງເຫລົ່ານັ້ນໄດ້ ກໍຕ້ອງອາໄສພຣະວິນຍານ.”10
ພຣະຄຳພີ, ຄຳອະທິຖານຂອງເຮົາ, ປະສົບການສ່ວນຕົວຂອງເຮົາ, ສາດສະດາໃນປະຈຸບັນ, ແລະ ຂອງປະທານແຫ່ງພຣະວິນຍານບໍລິສຸດ ຈະຊ່ວຍເຮົາໃຫ້ເຫັນມຸມມອງຂອງຄວາມຈິງທາງວິນຍານ ທີ່ຈຳເປັນສຳລັບການເດີນທາງຢູ່ເທິງໂລກຂອງເຮົາ.
ການປະກາດຜ່ານທາງຕາແຫ່ງສັດທາ
ບັດນີ້ ໃຫ້ເຮົາມາເບິ່ງການປະກາດກ່ຽວກັບຄອບຄົວ ຜ່ານທາງຕາແຫ່ງສັດທາ.
ປະທານກໍດອນ ບີ ຮິງລີ ໄດ້ນຳສະເໜີໃບ “ຄອບຄົວ: ການປະກາດຕໍ່ໂລກ” ດ້ວຍຂໍ້ຄວາມນີ້: “ໂດຍທີ່ມີການເວົ້າໂຕ້ແຍ້ງກັນຫລາຍ ເລື່ອງຄວາມຈິງ, ໂດຍທີ່ມີການຫລອກລວງຫລາຍ ເລື່ອງມາດຕະຖານ ແລະ ຄຸນຄ່າ, ໂດຍທີ່ມີສິ່ງດຶງດູດໃຈ ແລະ ລໍ້ໃຈຢ່າງຫລວງຫລາຍ ເພື່ອໃຫ້ຮັບເອົາຄວາມດ່າງພ້ອຍຂອງໂລກ ຢ່າງຊ້າໆ, ພວກເຮົາຈຶ່ງຮູ້ສຶກວ່າ ຕ້ອງໄດ້ເຕືອນ [ພວກທ່ານ].”11
ໃບປະກາດເລີ່ມຕົ້ນດ້ວຍ: “ມະນຸດທຸກຄົນ—ຊາຍ ແລະ ຍິງ—ໄດ້ຖືກສ້າງຂຶ້ນຕາມຮູບຮ່າງລັກສະນະຂອງພຣະເຈົ້າ. ແຕ່ລະຄົນກໍເປັນບຸດ ຫລື ທິດາທາງວິນຍານ ທີ່ຮັກຫອມຂອງພຣະບິດາມານດາເທິງສະຫວັນ ແລະ ເມື່ອເປັນເຊັ່ນນັ້ນ, ເຮົາແຕ່ລະຄົນຈຶ່ງມີທຳມະຊາດແຫ່ງສະຫວັນ ແລະ ມີຈຸດໝາຍປາຍທາງ.”
ນີ້ຄືຄວາມຈິງນິລັນດອນ. ທ່ານ ແລະ ຂ້າພະເຈົ້າ ບໍ່ແມ່ນອຸປະຕິເຫດຈາກທຳມະຊາດ.
ຂ້າພະເຈົ້າມັກຖ້ອຍຄຳເຫລົ່ານີ້: “ຢູ່ໃນໂລກກ່ອນໂລກມະຕະ, ບຸດ ແລະ ທິດາທາງວິນຍານ ຮູ້ ແລະ ນະມັດສະການພຣະເຈົ້າ ວ່າເປັນພຣະບິດານິລັນດອນຂອງເຂົາເຈົ້າ ແລະ ໄດ້ຮັບເອົາແຜນຂອງພຣະອົງ.”12
ເຮົາມີຊິວິດຢູ່ກ່ອນໄດ້ມາເກີດ. ເອກະລັກສະເພາະຂອງເຮົາໄດ້ຖືກເອົາໃສ່ໄວ້ ໃນຕົວເຮົາແລ້ວຕະຫລອດການ. ໃນທາງທີ່ເຮົາບໍ່ເຂົ້າໃຈຢ່າງຄັກແນ່, ວິນຍານຂອງເຮົາທີ່ເຕີບໂຕຢູ່ທີ່ນັ້ນ ເປັນອິດທິພົນຕໍ່ເຮົາຢູ່ໃນໂລກນີ້.13 ເຮົາໄດ້ຮັບເອົາແຜນຂອງພຣະເຈົ້າ. ເຮົາຮູ້ວ່າເຮົາຈະປະສົບກັບຄວາມຫຍຸ້ງຍາກ, ເຈັບປວດ, ແລະ ໂສກເສົ້າ ຢູ່ໃນໂລກນີ້.14 ເຮົາກໍຍັງຮູ້ອີກວ່າ ພຣະຜູ້ຊ່ວຍໃຫ້ລອດຈະສະເດັດມາ ແລະ ເມື່ອເຮົາພິສູດຕົວເອງວ່າ ເຮົາມີຄຸນຄ່າພໍ, ແລ້ວເຮົາຈະໄດ້ຟື້ນຄືນຊີວິດ, ມີ “ລັດສະໝີພາບເພີ່ມເຕີມໃສ່ເທິງຫົວຂອງ [ເຮົາ] ຕະຫລອດການ ແລະ ຕະຫລອດໄປ.”15
ການປະກາດນັ້ນບອກວ່າ: “ພວກເຮົາຂໍປະກາດວ່າ ມະນຸດຖືກສ້າງຂຶ້ນມາຕາມທີ່ພຣະເຈົ້າໄດ້ຈັດແຕ່ງໄວ້. ພວກເຮົາຂໍຢືນຢັນເຖິງຄວາມສັກສິດຂອງຊີວິດ ແລະ ເຖິງຄວາມສຳຄັນຂອງແຜນນິລັນດອນຂອງພຣະເຈົ້າ.”
ແຜນຂອງພຣະບິດາຂອງເຮົາ ຊຸກຍູ້ສາມີພັນລະຍາໃຫ້ນຳລູກໆມາສູ່ໂລກ ແລະ ມີໜ້າທີ່ ທີ່ຈະກ່າວປົກປ້ອງເດັກແດງທາລົກທີ່ບໍ່ທັນເກີດ.
ຫລັກທຳຂອງການປະກາດກ່ຽວພັນກັນຢ່າງສວຍງາມ
ຖ້າເຮົາເລືອກເຮັດຕາມພຽງແຕ່ສ່ວນໃດສ່ວນໜຶ່ງ ຢູ່ໃນໃບປະກາດເທົ່ານັ້ນ, ເຮົາຈະເຫັນພາບນິລັນດອນ ແບບບໍ່ແຈ້ງຊັດ, ທີ່ໃຫ້ຄວາມສຳຄັນແກ່ປະສົບການຂອງເຮົາໃນທີ່ນີ້ ແລະ ໃນເວລານີ້ ຫລາຍເກີນໄປ. ໂດຍການໄຕ່ຕອງກ່ຽວກັບການປະກາດດ້ວຍການອະທິຖານ ຜ່ານທາງຕາແຫ່ງສັດທາ, ເຮົາຈະເຂົ້າໃຈຫລາຍກວ່າເກົ່າ ເຖິງວິທີທີ່ຫລັກທຳຕິດຕໍ່ເຂົ້າກັນຢ່າງສວຍງາມ, ສົ່ງເສີມກັນແລະກັນ, ເປີດເຜີຍແຜນຂອງພຣະບິດາຂອງເຮົາ ສຳລັບລູກໆຂອງພຣະອົງ.16
ເຮົາຈະແປກໃຈແທ້ບໍ ເມື່ອສາດສະດາຂອງພຣະຜູ້ເປັນເຈົ້າ ປະກາດພຣະປະສົງຂອງພຣະອົງ ກ່ຽວກັບຫລັກທຳທີ່ສຳຄັນເລື່ອງຄວາມຈິງ ແລະ ຄຳຖາມທີ່ຄ້າງຄາຢູ່? ແນ່ນອນ, ບາງຄົນປະຕິເສດສຽງຂອງສາດສະດາທັນທີ,17 ແຕ່ບາງຄົນໄຕ່ຕອງຄຳຖາມທີ່ຊື່ສັດຂອງເຂົາເຈົ້າ ດ້ວຍການອະທິຖານ—ຄຳຖາມທີ່ຈະສະຫງົບໃຈດ້ວຍຄວາມອົດທົນ ແລະ ດ້ວຍຕາແຫ່ງສັດທາ. ຖ້າຫາກການປະກາດໄດ້ເປີດເຜີຍໃນສັດຕະວັດຕ່າງໆ, ແລ້ວຄົງຍັງມີຄຳຖາມຢູ່, ພຽງແຕ່ເປັນຄຳຖາມທີ່ແຕກຕ່າງຈາກທຸກວັນນີ້. ຈຸດປະສົງໜຶ່ງຂອງສາດສະດາ ແມ່ນເພື່ອຊ່ວຍເຮົາແກ້ໄຂຄຳຖາມທີ່ຈິງໃຈ.18
ກ່ອນໄດ້ກາຍເປັນປະທານຂອງສາດສະໜາຈັກ, ປະທານຣະໂຊ ເອັມ ແນວສັນ ໄດ້ກ່າວວ່າ: “ສາດສະດາເຫັນລ່ວງໜ້າ. ພວກເພິ່ນເຫັນສິ່ງອັນຕະລາຍທີ່ໜ້າໂສກເສົ້າ ທີ່ຜູ້ປໍລະປັກໄດ້ນຳມາໄວ້, ຫລື ຈະນຳມາໄວ້ໃນເສັ້ນທາງຂອງເຮົາ. ສາດສະດາກໍຍັງເຫັນລ່ວງໜ້າ ເຖິງຄວາມເປັນໄປໄດ້ ແລະ ສິດທິພິເສດທີ່ສຳຄັນ ຊຶ່ງລໍຄອຍຜູ້ທີ່ເຊື່ອຟັງ ດ້ວຍຄວາມຕັ້ງໃຈຢ່າງເຕັມທີ່.”19
ຂ້າພະເຈົ້າເປັນພະຍານເຖິງຄວາມຈິງ ແລະ ອຳນາດທາງວິນຍານຂອງສຽງທີ່ເປັນເອກະສັນຂອງຝ່າຍປະທານສູງສຸດ ແລະ ກຸ່ມອັກຄະສາວົກ.
ຊາວໂລກໄດ້ຍ່າງໜີ
ໃນຕະຫລອດຊີວິດຂອງຂ້າພະເຈົ້າ, ເຮົາເຫັນການປ່ຽນແປງຢ່າງໄວ ໃນຄວາມເຊື່ອຂອງໂລກ ກ່ຽວກັບຫລັກທຳຫລາຍຢ່າງທີ່ສອນຢູ່ໃນການປະກາດນັ້ນ. ຄາວເປັນໄວລຸ້ນ ແລະ ໄລຍະແຕ່ງງານໃໝ່, ຫລາຍຄົນຢູ່ໃນໂລກ ໄດ້ໜີໄປຈາກມາດຕະຖານຂອງພຣະຜູ້ເປັນເຈົ້າ ທີ່ເຮົາເອີ້ນວ່າກົດພົມມະຈັນ, ຊຶ່ງຄວາມສຳພັນທາງເພດ ຄວນເກີດຂຶ້ນລະຫວ່າງຊາຍ ແລະ ຍິງ ຜູ້ທີ່ແຕ່ງງານກັນຢ່າງຖືກຕ້ອງ ຕາມກົດໝາຍເທົ່ານັ້ນ. ຕອນຂ້າພະເຈົ້າຢູ່ໃນໄວ 20 ປີ ແລະ 30 ປີ, ຫລາຍຄົນໄດ້ເດີນໜີຈາກການປົກປ້ອງ ເດັກແດງທາລົກທີ່ຍັງບໍ່ທັນເກີດ, ເພາະເວລານັ້ນ ການແທ້ງລູກເລີ່ມຖືກຍອມຮັບ. ບໍ່ເທົ່າໃດປີມານີ້, ຫລາຍຄົນໄດ້ເດີນໜີຈາກກົດຂອງພຣະເຈົ້າ ທີ່ວ່າການແຕ່ງງານ ເປັນການສົມລົດທີ່ສັກສິດ ລະຫວ່າງຊາຍ ແລະ ຍິງ.20
ເມື່ອເຫັນຫລາຍຄົນເດີນໜີຈາກຂອບເຂດທີ່ພຣະຜູ້ເປັນເຈົ້າໄດ້ຕັ້ງໄວ້ ມັນເຕືອນໃຈເຮົາເຖິງມື້ນັ້ນ ໃນເມືອງກາເປນາອູມ ຕອນທີ່ພຣະຜູ້ຊ່ວຍໃຫ້ລອດໄດ້ປະກາດເຖິງຄວາມເປັນພຣະເຈົ້າຂອງພຣະອົງ ແລະ ໜ້າເສຍໃຈທີ່ “ພວກທີ່ຕິດຕາມພຣະອົງຫລາຍຄົນ … ບໍ່ໄປກັບພຣະອົງອີກ.”
ພຣະຜູ້ຊ່ວຍໃຫ້ລອດ ຈຶ່ງໄດ້ຫັນໄປຖາມພວກສາວົກສິບສອງຄົນວ່າ: “ພວກເຈົ້າເດ ກໍຢາກໜີໄປຄືກັນບໍ?“
ເປໂຕໄດ້ຕອບວ່າ:
“ພຣະອົງເອີຍ ພວກຂ້ານ້ອຍຈະໜີໄປຫາຜູ້ໃດ? ພຣະອົງເປັນຜູ້ມີຖ້ອຍຄຳແຫ່ງຊີວິດນິລັນດອນ.
“ບັດນີ້ພວກຂ້ານ້ອຍເຊື່ອ ແລະ ຮູ້ແລ້ວວ່າ ພຣະອົງເປັນພຣະຄຣິດ, ເປັນພຣະບຸດຂອງພຣະເຈົ້າທີ່ຊົງພຣະຊົນຢູ່.”21
ບໍ່ແມ່ນທຸກຄົນທີ່ເປັນດັ່ງຢູ່ໃນການປະກາດ
ມີຫລາຍຄົນ, ທັງໜຸ່ມ ແລະ ແກ່, ຜູ້ຈົງຮັກພັກດີ ແລະ ຈິງໃຈ ຕໍ່ພຣະກິດຕິຄຸນຂອງພຣະເຢຊູຄຣິດ, ເຖິງແມ່ນປະສົບການໃນປະຈຸບັນຂອງເຂົາເຈົ້າ ບໍ່ໃກ້ຄຽງກັບສິ່ງທີ່ກ່າວຢູ່ໃນການປະກາດກ່ຽວກັບຄອບຄົວນັ້ນເລີຍ ດັ່ງເຊັ່ນ: ລູກຜູ້ທີ່ຊີວິດຖືກສັ່ນຄອນດ້ວຍການຢ່າຮ້າງ; ຊາວໜຸ່ມຜູ້ຖືກໝູ່ເພື່ອນຫົວເຍາະເຍີ້ຍເລື່ອງພົມມະຈັນ; ແມ່ຮ້າງ ແລະ ພໍ່ຮ້າງຜູ້ໄດ້ຮັບບາດເຈັບຢ່າງໜັກຈາກຄູ່ຄອງທີ່ບໍ່ຊື່ສັດ; ສາມີພັນລະຍາທີ່ບໍ່ສາມາດມີລູກ; ຍິງ ແລະ ຊາຍທີ່ແຕ່ງງານກັບຄູ່ຄອງ ຜູ້ທີ່ບໍ່ເຊື່ອຖືພຣະກິດຕິຄຸນທີ່ຟື້ນຟູນຳເຂົາເຈົ້າ; ຍິງໂສດ ແລະ ຊາຍໂສດ ຜູ້ທີ່ບໍ່ຮູ້ວ່າດ້ວຍເຫດໃດ ຈຶ່ງບໍ່ໄດ້ແຕ່ງງານນຳເຂົາ.
ເພື່ອນຄົນໜຶ່ງທີ່ຮູ້ຈັກກັນມາເກືອບເຖິງ 20 ປີແລ້ວ, ຜູ້ທີ່ຂ້າພະເຈົ້ານັບຖື, ບໍ່ໄດ້ແຕ່ງງານ ເພາະລາວມັກຊອບຄົນເພດດຽວກັນ. ລາວຕັ້ງໃຈຮັກສາພັນທະສັນຍາພຣະວິຫານຂອງລາວ, ໄດ້ຂະຫຍາຍຄວາມສາມາດ ແລະ ພອນສະຫວັນໃນການງານຂອງລາວ, ແລະ ກໍໄດ້ຮັບໃຊ້ໃນໂບດ ແລະ ໃນຊຸມຊົນ. ເມື່ອບໍ່ດົນມານີ້ ລາວໄດ້ບອກຂ້າພະເຈົ້າວ່າ, “ຂ້ານ້ອຍກໍເຫັນໃຈຜູ້ທີ່ຮູ້ສຶກແບບຂ້ານ້ອຍ ແຕ່ເລືອກບໍ່ຮັກສາກົດພົມມະຈັນ ຢູ່ໃນໂລກທີ່ເຮົາອາໄສຢູ່ນີ້. ພຣະຄຣິດໄດ້ຂໍໃຫ້ເຮົາ ‘ບໍ່ໃຫ້ເປັນດັ່ງໂລກ ບໍ່ແມ່ນບໍ’? ເຫັນໄດ້ຢ່າງແຈ່ມແຈ້ງວ່າ ມາດຕະຖານຂອງພຣະເຈົ້າ ແມ່ນແຕກຕ່າງຈາກຂອງໂລກ.”
ກົດຂອງມະນຸດສ່ວນຫລາຍຈະອອກນອກຂອບເຂດຂອງ ກົດຂອງພຣະເຈົ້າ. ສຳລັບຜູ້ທີ່ຢາກເຮັດໃຫ້ພຣະເຈົ້າພໍພຣະໄທ, ເຂົາເຈົ້າຕ້ອງມີສັດທາ, ມີຄວາມອົດທົນ, ແລະ ມີຄວາມພາກພຽນ.22
ແຄຕີ ພັນລະຍາຂອງຂ້າພະເຈົ້າ ແລະ ຂ້າພະເຈົ້າ ຮູ້ຈັກເອື້ອຍນ້ອງໂສດຄົນໜຶ່ງ, ຕອນນີ້ຢູ່ໃນໄວ 40 ປາຍປີແລ້ວ, ຜູ້ມີພອນສະຫວັນຫລາຍໃນການງານ ແລະ ຮັບໃຊ້ຢ່າງກ້າຫານຢູ່ໃນຫວອດຂອງນາງ. ນາງກໍໄດ້ຮັກສາກົດຂອງພຣະເຈົ້າຄືກັນ. ນາງໄດ້ຂຽນວ່າ:
“ຂ້ານ້ອຍຢາກໄດ້ຮັບພອນ ໂດຍມີສາມີ ແລະ ລູກເຕົ້າ. ຂ້ານ້ອຍຍັງລໍຖ້າມື້ນັ້ນຢູ່. ບາງເທື່ອສະຖານະການຂອງຂ້ານ້ອຍ ກໍເຮັດໃຫ້ຂ້ານ້ອຍຮູ້ສຶກຖືກລືມໄລ ແລະ ໂດດດ່ຽວ, ແຕ່ຂ້ານ້ອຍພະຍາຍາມບໍ່ຄິດຫລາຍກ່ຽວກັບສິ່ງທີ່ຂ້ານ້ອຍບໍ່ມີ, ແລະ ຫັນແນວຄິດໄປຫາສິ່ງທີ່ຂ້ານ້ອຍມີ ແລະ ວິທີທີ່ຂ້ານ້ອຍສາມາດຊ່ວຍເຫລືອຄົນອື່ນ.
“ການຮັບໃຊ້ຍາດພີ່ນ້ອງ, ຮັບໃຊ້ຢູ່ໃນຫວອດ ແລະ ໃນພຣະວິຫານ ກໍຊ່ວຍຂ້ານ້ອຍໄດ້ຫລາຍ. ຂ້ານ້ອຍບໍ່ໄດ້ຖືກລືມໄລ ຫລື ປະໃຫ້ຢູ່ຜູ້ດຽວ ເພາະຂ້ານ້ອຍເປັນພາກສ່ວນ ແລະ ເຮົາທຸກຄົນກໍເປັນພາກສ່ວນຂອງຄອບຄົວໃຫຍ່ນັ້ນ.”
ມີຜູ້ໜຶ່ງທີ່ເຂົ້າໃຈ
ບາງຄົນອາດເວົ້າວ່າ, “ເຈົ້າບໍ່ເຂົ້າໃຈສະພາບການຂອງຂ້ອຍ.” ຂ້າພະເຈົ້າອາດບໍ່ເຂົ້າໃຈ, ແຕ່ຂ້າພະເຈົ້າເປັນພະຍານວ່າ ມີພຣະເຈົ້າອົງໜຶ່ງທີ່ເຂົ້າໃຈເຮົາ.23 ມີຜູ້ໜຶ່ງທີ່ຮູ້ຈັກພາລະໜັກໜ່ວງຂອງທ່ານ ເພາະການເສຍສະລະທີ່ພຣະອົງໄດ້ເຮັດ ຢູ່ໃນສວນ ແລະ ຢູ່ເທິງໄມ້ກາງແຂນ. ເມື່ອທ່ານສະແຫວງຫາພຣະອົງ ແລະ ຮັກສາພຣະບັນຍັດຂອງພຣະອົງ, ຂ້າພະເຈົ້າສັນຍາກັບທ່ານວ່າ ພຣະອົງຈະອວຍພອນທ່ານ ແລະ ຈະຍົກພາລະໜັກໜ່ວງອອກຈາກທ່ານ. ພຣະອົງຈະມອບເພື່ອນນິລັນດອນ ແລະ ຈະມອບໂອກາດທີ່ຈະຮັບໃຊ້ໃຫ້ທ່ານ. ສຳຄັນກວ່ານັ້ນ, ພຣະອົງຈະເຮັດໃຫ້ທ່ານເຕັມໄປດ້ວຍພຣະວິນຍານ ທີ່ມີພະລັງຂອງພຣະວິນຍານບໍລິສຸດ ແລະ ຈະເຮັດໃຫ້ທ່ານຮູ້ວ່າ ພຣະອົງໂປດປານທ່ານ. ບໍ່ມີການເລືອກໃດ, ບໍ່ມີທາງເລືອກໃດ ທີ່ປະຕິເສດການເປັນເພື່ອນຂອງພຣະວິນຍານບໍລິສຸດ ຫລື ພອນນິລັນດອນ ຈະມີຄ່າພໍ ໃຫ້ເຮົາພິຈາລະນາ.
ຂ້າພະເຈົ້າຮູ້ວ່າ ພຣະຜູ້ຊ່ວຍໃຫ້ລອດຊົງພຣະຊົນຢູ່. ຂ້າພະເຈົ້າເປັນພະຍານວ່າ ພຣະອົງເປັນແຫລ່ງແຫ່ງຄວາມຈິງທັງໝົດ ທີ່ສຳຄັນແທ້ໆ ແລະ ວ່າພຣະອົງຈະປະທານພອນທຸກປະການ ຕາມທີ່ພຣະອົງໄດ້ສັນຍາໄວ້ ກັບຜູ້ທີ່ຮັກສາພຣະບັນຍັດຂອງພຣະອົງ. ໃນພຣະນາມຂອງພຣະເຢຊູຄຣິດ, ອາແມນ.