ຄວາມເຫລື້ອມໃສທີ່ເລິກຊຶ້ງ ແລະ ຍາວນານ ຕໍ່ພຣະບິດາເທິງສະຫວັນ ແລະ ອົງພຣະເຢຊູຄຣິດເຈົ້າ

ໂດຍ ແອວເດີ ຄວິນຕິນ ແອວ ຄຸກ

ແຫ່ງກຸ່ມອັກຄະສາວົກສິບສອງ

ຈຸດປະສົງຂອງພວກເຮົາ ຄືໃຫ້ປະສົບການຢູ່ທີ່ໂບດ ແລະ ຢູ່ທີ່ບ້ານເທົ່າທຽມກັນ ໃນວິທີທີ່ຈະເພີ່ມສັດທາ ແລະ ເພີ່ມທາງວິນຍານ ແລະ ຄວາມເຫລື້ອມໃສຢ່າງເລິກຊຶ້ງ.

ດັ່ງທີ່ປະທານຣະໂຊ ເອັມ ແນວສັນ ຫາກໍໄດ້ກ່າວຢ່າງງົດງາມ ແລະ ໂວຫານ, ຜູ້ນຳຂອງສາດສະໜາຈັກ ໄດ້ທຳງານເປັນເວລານານ ເລື່ອງແຜນການ ທີ່ຈະໃຫ້ “ບ້ານເຮືອນເປັນສູນກາງ ແລະ ສາດສະໜາຈັກສະໜັບສະໜູນ ເພື່ອຮຽນຄຳສອນ, ເພີ່ມຄວາມເຂັ້ມແຂງໃຫ້ແກ່ສັດທາ, ແລະ ສົ່ງເສີມການນະມັດສະການເປັນສ່ວນຕົວ ທີ່ດີກວ່າເກົ່າ.” ແລ້ວປະທານແນວສັນ ໄດ້ປະກາດການປ່ຽນແປງ ເພື່ອບັນລຸ “ຄວາມດຸນດ່ຽງ ແລະ ການເຊື່ອມໂຍງໃໝ່ ລະຫວ່າງຄຳແນະນຳເລື່ອງພຣະກິດຕິຄຸນ ຢູ່ໃນບ້ານເຮືອນ ແລະ ຢູ່ທີ່ໂບດ.”¹

ເພື່ອບັນລຸຈຸດປະສົງເຫລົ່ານີ້—ທີ່ປະທານຣະໂຊ ເອັມ ແນວສັນ ໄດ້ບັນຍາຍ ແລະ ພາຍໃຕ້ການຊີ້ນຳຂອງເພິ່ນ ແລະ ເພື່ອໃຫ້ເປັນໄປຕາມການຕັດສິນໃຈຂອງສະພາຂອງຝ່າຍປະທານສູງສຸດ ແລະ ກຸ່ມອັກຄະສາວົກສິບສອງ—ຕາຕະລາງຂອງການປະຊຸມໂບດ ຈະຖືກປ່ຽນແປງໃນວິທີດັ່ງຕໍ່ໄປນີ້, ເລີ່ມຕົ້ນໃນເດືອນມັງກອນ ປີ 2019.

ຕາຕະລາງການປະຊຸມໃນວັນອາທິດ

ການປະຊຸມໂບດໃນວັນອາທິດ ຈະຮ່ວມດ້ວຍ ກອງປະຊຸມສິນລະລຶກ 60 ນາທີ ໃນແຕ່ລະອາທິດ, ເຈາະຈົງໃສ່ພຣະຜູ້ຊ່ວຍໃຫ້ລອດ, ພິທີການຂອງສິນລະລຶກ, ແລະ ຂ່າວສານທາງວິນຍານ. ຫລັງຈາກປ່ຽນໄປຫ້ອງຮຽນ, ສະມາຊິກຂອງສາດສະໜາຈັກ ຈະໃຊ້ເວລາຮຽນ 50 ນາທີ ຊຶ່ງບົດຮຽນຈະສັບປ່ຽນໃນແຕ່ລະອາທິດ:

ໂຮງຮຽນວັນອາທິດ ຈະຖືກຈັດຂຶ້ນໃນວັນອາທິດທີໜຶ່ງ ແລະ ທີສາມ ຂອງເດືອນ.
ການປະຊຸມຂອງກຸ່ມຖານະປະໂລຫິດ, ສະມາຄົມສະຕີສົງເຄາະ, ກຸ່ມຍິງໜຸ່ມ ຈະຖືກຈັດຂຶ້ນໃນວັນອາທິດທີສອງ ແລະ ທີສີ່.
ການປະຊຸມໃນວັນອາທິດທີຫ້າ ຈະຢູ່ພາຍໃຕ້ການຊີ້ນຳຂອງອະທິການ.

ຊັ້ນປະຖົມໄວ ຈະຖືກຈັດຂຶ້ນທຸກອາທິດ ລະຫວ່າງເວລາ 50 ນາທີນີ້ ແລະ ຈະຮ່ວມດ້ວຍເວລາຮ້ອງເພງເປັນກຸ່ມ ແລະ ຫ້ອງຮຽນ.

ກ່ຽວກັບຕາຕະລາງຂອງການປະຊຸມໃນວັນອາທິດ, ຜູ້ນຳອາວຸໂສຂອງສາດສະໜາຈັກ ກໍຮູ້ເປັນເວລາດົນນານແລ້ວວ່າ ສະມາຊິກທີ່ດີເລີດຫລາຍຄົນຂອງພວກເຮົາ, ເຫັນວ່າການໄປໂບດສາມຊົ່ວໂມງໃນວັນອາທິດ ແມ່ນຫຍຸ້ງຍາກຫລາຍ. ສິ່ງນີ້ເປັນຄວາມຈິງສຳລັບພໍ່ແມ່ທີ່ມີລູກນ້ອຍ, ເດັກໃນຊັ້ນປະຖົມໄວ, ສະມາຊິກຜູ້ອາວຸໂສ, ສະມາຊິກໃໝ່, ແລະ ອື່ນໆ.²

ແຕ່ມີສິ່ງອື່ນອີກ ໃນການປ່ຽນແປງນີ້ ຊຶ່ງນອກເໜືອໄປກວ່າ ການຕັດເວລາໄປໂບດໃນວັນອາທິດ ໃຫ້ສັ້ນລົງ. ປະທານແນວສັນ ໄດ້ຮັບຮູ້ດ້ວຍຄວາມກະຕັນຍູ ເຖິງຄວາມສຳເລັດຜົນ ທີ່ກຳລັງເກີດຂຶ້ນຢູ່ ເພາະການຕອບຮັບຂອງທ່ານຢ່າງຊື່ສັດ ທີ່ຈະເຮັດຕາມການເຊື້ອເຊີນເທື່ອແລ້ວນີ້ຂອງເພິ່ນ. ເພິ່ນ ແລະ ຜູ້ນຳຂອງສາດສະໜາຈັກທັງໝົດ ປາດຖະໜາທີ່ຈະນຳຄວາມສຸກຂອງພຣະກິດຕິຄຸນ—ມາສູ່ພໍ່ແມ່, ເດັກນ້ອຍ, ຊາວໜຸ່ມ, ຄົນໂສດ, ຜູ້ອາວຸໂສ, ຜູ້ປ່ຽນໃຈເຫລື້ອມໃສໃໝ່, ແລະ ຜູ້ທີ່ກຳລັງຖືກສິດສອນໂດຍຜູ້ສອນສາດສະໜາ—ຜ່ານທາງຄວາມພະຍາຍາມດຸນດ່ຽງເລື່ອງການເຮັດໃຫ້ບ້ານເຮືອນເປັນສູນກາງ, ໂດຍມີສາດສະໜາຈັກສະໜັບສະໜູນ. ຈຸດປະສົງ ແລະ ພອນທີ່ກ່ຽວພັນກັບການປ່ຽນແປງນີ້ ແລະ ການປ່ຽນແປງເມື່ອບໍ່ດົນມານີ້ ແມ່ນຮ່ວມດ້ວຍ ສິ່ງດັ່ງຕໍ່ໄປນີ້:

ການເຫລື້ອມໃສຕໍ່ພຣະບິດາເທິງສະຫວັນ ແລະ ອົງພຣະເຢຊູຄຣິດເຈົ້າຢ່າງເລິກຊຶ້ງ ແລະ ມີສັດທາຫລາຍຂຶ້ນໃນພວກພຣະອົງ.
ການເພີ່ມຄວາມເຂັ້ມແຂງໃຫ້ແກ່ບຸກຄົນ ແລະ ຄອບຄົວ ຜ່ານທາງການເຮັດໃຫ້ຄອບຄົວເປັນສູນກາງການຮຽນຮູ້, ໂດຍມີສາດສະໜາຈັກສະໜັບສະໜູນ ທີ່ມີສ່ວນໃຫ້ດຳລົງຊີວິດຕາມພຣະກິດຕິຄຸນດ້ວຍຄວາມຊື່ນຊົມ.
ການໃຫ້ກຽດແກ່ວັນຊະບາໂຕ, ດ້ວຍການເອົາໃຈໃສ່ຕໍ່ພິທີການສິນລະລຶກ.
ການຊ່ວຍລູກໆຂອງພຣະບິດາເທິງສະຫວັນທຸກຄົນ ຢູ່ສອງຟາກມ່ານ ຜ່ານທາງວຽກງານເຜີຍແຜ່ ແລະ ການຮັບເອົາພິທີການ ແລະ ພັນທະສັນຍາ ແລະ ພອນຂອງພຣະວິຫານ.

ບ້ານເຮືອນເປັນສູນກາງການຮຽນຮູ້, ໂດຍມີສາດສະໜາຈັກສະໜັບສະໜູນ

ຕາຕະລາງໃໝ່ໃນວັນອາທິດນີ້ ຈະໃຫ້ເວລາສຳລັບການສັງສັນໃນຕອນແລງ ແລະ ການສຶກສາພຣະກິດຕິຄຸນຢູ່ທີ່ບ້ານ ໃນວັນອາທິດ ຫລື ໃນເວລາອື່ນ ຕາມທີ່ບຸກຄົນ ແລະ ຄອບຄົວເລືອກເຮັດ. ກິດກະຈຳຂອງຄອບຄົວທີ່ເຮັດໃນຕອນຄ່ຳ ຄວນຖືກຈັດຂຶ້ນໃນວັນຈັນ ຫລື ໃນເວລາອື່ນ. ເພາະດ້ວຍເຫດນີ້, ຜູ້ນຳຄວນຍົກເວັ້ນຕອນແລງວັນຈັນ ຈາກການປະຊຸມໂບດ ແລະ ກິດຈະກຳຕ່າງໆ. ເຖິງຢ່າງໃດກໍຕາມ, ເວລາທີ່ໃຊ້ໃນການສັງສັນໃນຕອນແລງ, ການສຶກສາພຣະກິດຕິຄຸນ ແລະ ການເຮັດກິດຈະກຳ ສຳລັບບຸກຄົນ ແລະ ຄອບຄົວ ຄວນຖືກຈັດຂຶ້ນ ຕາມສະຖານະການຂອງບຸກຄົນນັ້ນ.

ການສຶກສາພຣະກິດຕິຄຸນເປັນສ່ວນຕົວ ແລະ ເປັນຄອບຄົວ ຢູ່ທີ່ບ້ານ ຈະເພີ່ມພູນຫລາຍຂຶ້ນ ໂດຍຄວາມກົມກຽວຂອງຫລັກສູດ ແລະ ແຫລ່ງຊ່ວຍເຫລືອໃໝ່ ຊື່ວ່າ ຈົ່ງຕາມເຮົາມາ ສຳລັບບຸກຄົນ ແລະ ຄອບຄົວ ຊຶ່ງປະສົມປະສານກັບສິ່ງທີ່ຖືກສິດສອນຢູ່ໃນໂຮງຮຽນວັນອາທິດ ແລະ ໃນຊັ້ນປະຖົມໄວ.³ ໃນເດືອນມັງກອນ, ໂຮງຮຽນວັນອາທິດສຳລັບຊາວໜຸ່ມ ແລະ ຜູ້ໃຫຍ່ ແລະ ຫ້ອງຮຽນຊັ້ນປະຖົມໄວ ຈະສຶກສາ ພຣະຄຳພີໃໝ່. ແຫລ່ງຊ່ວຍເຫລືອໃໝ່ ທີ່ໃຊ້ສຶກສາຢູ່ທີ່ບ້ານ ຊື່ ຈົ່ງຕາມເຮົາມາ ສຳລັບບຸກຄົນ ແລະ ຄອບຄົວ—ຮ່ວມທັງເລື່ອງພຣະຄຳພີໃໝ່—ຖືກກະກຽມໄວ້ເພື່ອຊ່ວຍສະມາຊິກໃຫ້ຮຽນຮູ້ພຣະກິດຕິຄຸນຢູ່ໃນບ້ານເຮືອນ. ມັນອະທິບາຍວ່າ: “ແຫລ່ງນີ້ແມ່ນສຳລັບທຸກຄົນ ແລະ ທຸກຄອບຄົວໃນສາດສະໜາຈັກ. ມັນຖືກກະກຽມໄວ້ເພື່ອຊ່ວຍເຮົາ ໃຫ້ຮຽນຮູ້ພຣະກິດຕິຄຸນ [ໃຫ້ດີກວ່າເກົ່າ]—ບໍ່ວ່າຈະເປັນແບບສ່ວນຕົວ ຫລື ກັບຄອບຄົວ. … ໂຄງຮ່າງຢູ່ໃນແຫລ່ງຊ່ວຍເຫລືອ [ໃໝ່] ນີ້ ໄດ້ຖືກຈັດລຽງ ອີງຕາມຕາຕະລາງ … ໃນແຕ່ລະອາທິດ.”⁴

ບົດຮຽນໃໝ່ຂອງຊັ້ນປະຖົມໄວ ຊື່ ຈົ່ງຕາມເຮົາມາ ທີ່ສອນຢູ່ໂບດ ຈະເຮັດຕາມຕາຕະລາງເດີມ ຂອງແຕ່ລະອາທິດ. ໂຮງຮຽນວັນອາທິດສຳລັບຜູ້ໃຫຍ່ ແລະ ຊາວໜຸ່ມ ໃນວັນອາທິດທີໜຶ່ງ ແລະ ທີສາມ ຈະຖືກປະສົມປະສານ ໃນທາງທີ່ສົ່ງເສີມແຫລ່ງຊ່ວຍເຫລືອໃໝ່ສຳລັບບ້ານເຮືອນ ຊື່ ຈົ່ງຕາມເຮົາມາ. ໃນວັນອາທິດທີສອງ ແລະ ທີສີ່, ຜູ້ໃຫຍ່ໃນກຸ່ມຖານະປະໂລຫິດ ແລະ ສະມາຄົມສະຕີສົງເຄາະ ຈະສືບຕໍ່ສຶກສາຄຳສອນຈາກຜູ້ນຳຂອງສາດສະໜາຈັກ, ຊຶ່ງເນັ້ນຂ່າວສານໃນປະຈຸບັນຂອງສາດສະດາໃນສະໄໝໃໝ່.⁵ ກຸ່ມຍິງໜຸ່ມ ແລະ ຊາຍໜຸ່ມໃນຖານະປະໂລຫິດແຫ່ງອາໂຣນ ຈະສຶກສາຫົວຂໍ້ພຣະກິດຕິຄຸນ ໃນວັນອາທິດເຫລົ່ານັ້ນ.

ແຫລ່ງໃໝ່ສຳລັບການສຶກສາຢູ່ທີ່ບ້ານ ກະກຽມ “ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຄອບຄົວ.”⁶ ໂຄງຮ່າງສຳລັບແຕ່ລະອາທິດ ບັນຈຸແນວຄິດຊ່ວຍສຶກສາທີ່ເປັນປະໂຫຍດ ແລະ ກິດຈະກຳສຳລັບບຸກຄົນ ແລະ ຄອບຄົວ. ແຫລ່ງຊ່ວຍເຫລືອ ຈົ່ງຕາມເຮົາມາ ສຳລັບບຸກຄົນ ແລະ ຄອບຄົວ ກໍຍັງສະແດງໃຫ້ເຫັນເຖິງຫລາຍສິ່ງ ທີ່ຈະຊ່ວຍສົ່ງເສີມບຸກຄົນ ແລະ ຄອບຄົວ ເພື່ອຮຽນຮູ້ນຳອີກ, ໂດຍສະເພາະເດັກນ້ອຍ.⁷ ແຫລ່ງຊ່ວຍເຫລືອໃໝ່ດັ່ງກ່າວ ຈະມີໃຫ້ແຕ່ລະຄອບຄົວ ກ່ອນ ຫລື ໃນເດືອນທັນວາ ຂອງປີນີ້.

ປະທານແນວສັນ, ຈາກການປາໄສ ຕໍ່ສະມາຊິກຂອງສາດສະໜາຈັກ ໃນເດືອນມັງກອນ, ເພິ່ນໄດ້ແນະນຳເຮົາໃຫ້ຕຽມສຳລັບການສະເດັດມາຄັ້ງທີສອງຂອງພຣະເຢຊູຄຣິດ ໂດຍການດຳເນີນໃນເສັ້ນທາງແຫ່ງພັນທະສັນຍາ.⁸

ອີງຕາມສະພາບການຂອງໂລກ ຈຶ່ງຮຽກຮ້ອງໃຫ້ຜູ້ຄົນເຫລື້ອມໃສຢ່າງເລິກຊຶ້ງ ແລະ ມີສັດທາທີ່ເຂັ້ມແຂງ ໃນພຣະບິດາເທິງສະຫວັນ ແລະ ພຣະເຢຊູຄຣິດ ແລະ ການຊົດໃຊ້ຂອງພຣະອົງ. ພຣະຜູ້ເປັນເຈົ້າໄດ້ຕຽມເຮົາ, ເທື່ອລະເລັກເທື່ອລະໜ້ອຍ, ສຳລັບເວລາທີ່ຫຍຸ້ງຍາກ ທີ່ເຮົາກຳລັງປະເຊີນຢູ່. ໃນສອງສາມປີທີ່ຜ່ານມາ, ພຣະຜູ້ເປັນເຈົ້າໄດ້ນຳພາພວກເຮົາ ໃຫ້ກ່າວເລື່ອງທີ່ກ່ຽວກັບສິ່ງທີ່ໜ້າເປັນຫ່ວງຫລາຍທີ່ສຸດ, ຊຶ່ງຮ່ວມທັງ:

ການໃຫ້ກຽດແກ່ວັນຊະບາໂຕ ແລະ ພິທີການສັກສິດຂອງສິນລະລຶກ ຊຶ່ງຖືກເນັ້ນ ໃນໄລຍະສາມປີຜ່ານມານີ້.
ພາຍໃຕ້ການຊີ້ນຳຂອງອະທິການ, ກຸ່ມແອວເດີ ແລະ ສະມາຄົມສະຕີສົງເຄາະທີ່ເຂັ້ມແຂງ ຈະເອົາໃຈໃສ່ກັບຈຸດປະສົງ ແລະ ໜ້າທີ່ຮັບຜິດຊອບອັນສູງສົ່ງທີ່ຖືກມອບໝາຍຂອງສາດສະໜາຈັກ⁹ ແລະ ຊ່ວຍເຫລືອສະມາຊິກໃຫ້ເຮັດ ແລະ ຮັກສາພັນທະສັນຍາທີ່ສັກສິດ.
ການປະຕິບັດສາດສະໜາກິດ ໃນວິທີທີ່ສູງກວ່າ ແລະ ສັກສິດກວ່າ ໄດ້ຖືກນຳໃຊ້ດ້ວຍຄວາມຊື່ນຊົມ.
ການເລີ່ມຕົ້ນດ້ວຍຈຸດປະສົງ, ພັນທະສັນຍາຂອງພຣະວິຫານ ແລະ ການຮັບໃຊ້ສືບປະຫວັດຄອບຄົວ ໄດ້ກາຍເປັນພາກສ່ວນທີ່ມີຄວາມໝາຍຂອງເສັ້ນທາງແຫ່ງພັນທະສັນຍາ.

ການປ່ຽນແປງທີ່ໄດ້ຖືກປະກາດໃນເຊົ້າມື້ນີ້ ເປັນອີກຕົວຢ່າງໜຶ່ງ ຂອງການຊີ້ນຳ ສຳລັບການທ້າທາຍ ໃນວັນເວລາຂອງເຮົາ.

ຫລັກສູດດັ້ງເດີມຂອງສາດສະໜາຈັກ ໄດ້ເນັ້ນເຖິງປະສົບການໃນວັນອາທິດຢູ່ທີ່ໂບດ. ເຮົາຮູ້ວ່າ ເມື່ອເຮົາມີຄຳສອນທີ່ດີກວ່າ ແລະ ໄດ້ຕຽມສະມາຊິກໃນຫ້ອງຮຽນທີ່ຕຽມພ້ອມທາງວິນຍານຫລາຍກວ່າ, ແລ້ວເຮົາຈະມີປະສົບການໃນວັນອາທິດຢູ່ທີ່ໂບດທີ່ດີກວ່າ. ເຮົາໄດ້ຮັບພອນຫລາຍ ທີ່ສ່ວນຫລາຍແລ້ວ ພຣະວິນຍານຈະເພີ່ມພູນ ແລະ ເພີ່ມພະລັງຄວາມເຫລື້ອມໃສ ຢູ່ທີ່ໂບດ.

ຫລັກສູດໃໝ່ ທີ່ເຮັດໃຫ້ບ້ານເຮືອນເປັນສູນກາງ ແລະ ສາດສະໜາຈັກສະໜັບສະໜູນ ຕ້ອງມີອິດທິພົນຕໍ່ການນັບຖືສາດສະໜາ ແລະ ການປະພຶດຂອງຄອບຄົວ ແລະ ການນັບຖືສາດສະໜາ ແລະ ການປະພຶດຂອງບຸກຄົນ. ພວກເຮົາຮູ້ເຖິງຜົນກະທົບທາງວິນຍານ ແລະ ເຖິງຄວາມເຫລື້ອມໃສທີ່ເລິກຊຶ້ງ ແລະ ຍາວນານ ຊຶ່ງສາມາດບັນລຸໄດ້ຢູ່ທີ່ບ້ານ. ເມື່ອຫລາຍປີກ່ອນ, ມີການສຶກສາວ່າສຳລັບຊາຍໜຸ່ມ ແລະ ຍິງໜຸ່ມ ພຣະວິນຍານບໍລິສຸດຈະມີອິດທິພົນຫລາຍທີ່ສຸດ ຕອນທີ່ເຂົາເຈົ້າສຶກສາພຣະຄຳພີ ດ້ວຍການອະທິຖານຢູ່ທີ່ບ້ານ. ຈຸດປະສົງຂອງພວກເຮົາ ຄືໃຫ້ປະສົບການຢູ່ທີ່ໂບດ ແລະ ຢູ່ທີ່ບ້ານເທົ່າທຽມກັນ ໃນວິທີທີ່ຈະເພີ່ມສັດທາ ແລະ ເພີ່ມທາງວິນຍານ ແລະ ຄວາມເຫລື້ອມໃສຢ່າງເລິກຊຶ້ງຕໍ່ພຣະບິດາເທິງສະຫວັນ ແລະ ອົງພຣະເຢຊູຄຣິດເຈົ້າ.

ໃນພາກສ່ວນຂອງການປ່ຽນແປງທີ່ໃຫ້ບ້ານເຮືອນເປັນສູນກາງ, ໂດຍມີສາດສະໜາຈັກສະໜັບສະໜູນນີ້, ຈະເປີດໂອກາດໃຫ້ແກ່ບຸກຄົນ ແລະ ຄອບຄົວ ເພື່ອພິຈາລະນາ ດ້ວຍການອະທິຖານ ວ່າຄວນໃຊ້ມັນໃນວິທີໃດ ແລະ ເມື່ອໃດ. ຍົກຕົວຢ່າງ, ຂະນະທີ່ສິ່ງນີ້ຈະເປັນພອນອັນຍິ່ງໃຫຍ່ໃຫ້ແກ່ທຸກຄອບຄົວ, ອີງຕາມຄວາມຕ້ອງການຢູ່ໃນທ້ອງຖິ່ນ, ມັນຈະເໝາະສົມຫລາຍສຳລັບຄົນໜຸ່ມໂສດ, ຜູ້ໃຫຍ່ໂສດ, ພໍ່ ຫລື ແມ່ທີ່ລ້ຽງລູກດ້ວຍຕົວຄົນດຽວ, ບຸກຄົນທີ່ເປັນສະມາຊິກພຽງຜູ້ດຽວໃນຄອບຄົວ, ສະມາຊິກໃໝ່,¹⁰ ແລະ ຄົນອື່ນໆ ເພື່ອເຕົ້າໂຮມເປັນກຸ່ມ ທີ່ນອກເໜືອໄປຈາກການນະມັດສະການ ໃນວັນອາທິດ ເພື່ອຊື່ນຊົມພຣະກິດຕິຄຸນກັບໝູ່ເພື່ອນ ແລະ ເຂັ້ມແຂງຂຶ້ນໂດຍການສຶກສາແຫລ່ງຊ່ວຍເຫລືອ ທີ່ເຮັດໃຫ້ບ້ານເຮືອນເປັນສູນກາງ, ໂດຍມີສາດສະໜາຈັກສະໜັບສະໜູນ. ສິ່ງນີ້ຈະສຳເລັດແບບເປັນກັນເອງ ຕາມແຕ່ຜູ້ໃດຕ້ອງການເຮັດ.

ໃນຫລາຍພາກສ່ວນຂອງໂລກ, ຜູ້ຄົນເລືອກຢູ່ໂບດຕໍ່ໃນວັນອາທິດ ຫລັງຈາກເລີກໂບດ ເພື່ອພົບປະສັງສັນກັບໝູ່ເພື່ອນ. ການປະກາດເລື່ອງການປ່ຽນແປງໃນມື້ນີ້ ບໍ່ກະທົບກະເທືອນກັບການປະຕິບັດທີ່ດີເລີດ ແລະ ມີຜົນດີດັ່ງກ່າວ ແຕ່ຢ່າງໃດ.

ໃນການຊ່ວຍຕຽມສະມາຊິກ ກະກຽມສຳລັບວັນຊາບະໂຕ, ບາງຫວອດກໍໄດ້ສົ່ງຂ່າວສານແຈ້ງບອກລ່ວງໜ້າແລ້ວ ທາງອີເມວ, ທາງມືຖື, ຫລື ທາງສື່ສານມວນຊົນ ໃນລະຫວ່າງກາງອາທິດ. ໃນເລື່ອງການປ່ຽນແປງນີ້, ພວກເຮົາຂໍແນະນຳຢ່າງຈິງຈັງ ໃຫ້ໃຊ້ວິທີສື່ສານແບບນີ້. ການເຊື້ອເຊີນເຫລົ່ານີ້ ຈະເຕືອນສະມາຊິກ ກ່ຽວກັບຕາຕະລາງຂອງການປະຊຸມໃນວັນອາທິດ ສຳລັບອາທິດນັ້ນ, ຮ່ວມທັງຫົວຂໍ້ຂອງບົດຮຽນ, ແລະ ພຣະກິດຕິຄຸນທີ່ຈະເອົາໄປສົນທະນາຕໍ່ຢູ່ທີ່ບ້ານ. ນອກເໜືອຈາກນີ້, ການປະຊຸມຂອງຜູ້ໃຫຍ່ໃນວັນອາທິດ ຈະມີຂໍ້ມູນ ທີ່ເຊື່ອມໂຍງການສຶກສາຢູ່ທີ່ໂບດ ແລະ ຢູ່ທີ່ບ້ານເຂົ້າກັນ ໃນແຕ່ລະອາທິດ.

ໃນກອງປະຊຸມສິນລະລຶກ ແລະ ເວລາທີ່ຢູ່ໃນຫ້ອງຮຽນ ຮຽກຮ້ອງການພິຈາລະນາ ດ້ວຍການອະທິຖານ ເພື່ອໃຫ້ແນ່ໃຈວ່າ ສິ່ງທີ່ສຳຄັນທີ່ສຸດທາງວິນຍານ ຖືກເນັ້ນໜັກ ເໜືອກວ່າພາລະໜ້າທີ່ຂອງການບໍລິຫານ. ຍົກຕົວຢ່າງ, ການປະກາດຕ່າງໆ ສາມາດເຮັດໄດ້ໃນລະຫວ່າງກາງອາທິດ ຫລື ມີຢູ່ໃນເຈ້ຍແຈ້ງບອກລາຍການ. ຂະນະທີ່ກອງປະຊຸມສິນລະລຶກ ຄວນມີການອະທິຖານເປີດ ແລະ ປິດ, ແຕ່ການປະຊຸມຊົ່ວໂມງທີສອງ ພຽງແຕ່ຄວນມີການອະທິຖານປິດເທົ່ານັ້ນ.¹¹

ດັ່ງທີ່ໄດ້ກ່າວຜ່ານມານັ້ນ, ຕາຕະລາງໃໝ່ສຳລັບວັນອາທິດ ຈະເລີ່ມຕົ້ນໃນເດືອນມັງກອນ ປີ 2019. ມັນມີຫລາຍເຫດຜົນ ກ່ຽວກັບສິ່ງນີ້. ເຫດຜົນທີ່ສຳຄັນສອງຢ່າງແມ່ນ, ຢ່າງທີໜຶ່ງ, ເພື່ອໃຫ້ເວລາ ໃນການແຈກຢາຍແຫລ່ງຊ່ວຍເຫລືອ ຊື່ ຈົ່ງຕາມເຮົາມາ ສຳລັບບຸກຄົນ ແລະ ຄອບຄົວ ແລະ, ຢ່າງທີສອງ, ເພື່ອໃຫ້ເວລາແກ່ປະທານສະເຕກ ແລະ ອະທິການ ປັບຕາຕະລາງ ດ້ວຍເປົ້າໝາຍ ທີ່ໃຫ້ຫລາຍຫວອດ ໄດ້ໄປໂບດ ໄວກວ່າທີ່ຜ່ານມາ.

ຂະນະທີ່ຜູ້ນຳໄດ້ສະແຫວງຫາການເປີດເຜີຍ, ການຊີ້ນຳທີ່ໄດ້ຮັບໃນໄລຍະສອງສາມປີກ່ອນ ຄືການເພີ່ມຄວາມເຂັ້ມແຂງໃຫ້ແກ່ກອງປະຊຸມສິນລະລຶກ, ໃຫ້ກຽດແກ່ວັນຊະບາໂຕ, ແລະ ຊຸກຍູ້ ແລະ ຊ່ວຍເຫລືອພໍ່ແມ່ ແລະ ບຸກຄົນ ເຮັດໃຫ້ບ້ານເຮືອນຂອງເຂົາເຈົ້າ ເປັນແຫລ່ງໃຫ້ພະລັງທາງວິນຍານ ແລະ ເພີ່ມພູນສັດທາ—ເປັນສະຖານທີ່ ທີ່ຊື່ນຊົມ ແລະ ມີຄວາມສຸກ.

ພອນທີ່ພິເສດ

ການປ່ຽນແປງເຫລົ່ານີ້ມີຄວາມໝາຍແນວໃດ ສຳລັບສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ? ພວກເຮົາເຊື່ອວ່າ ສະມາຊິກຈະໄດ້ຮັບພອນ ໃນວິທີທາງທີ່ໜ້າອັດສະຈັນໃຈທີ່ສຸດ. ວັນອາທິດສາມາດເປັນວັນຮຽນຮູ້ ແລະ ສອນພຣະກິດຕິຄຸນຢູ່ທີ່ໂບດ ແລະ ໃນບ້ານເຮືອນ. ເມື່ອບຸກຄົນ ແລະ ຄອບຄົວມີສ່ວນຮ່ວມໃນສະພາຄອບຄົວ, ປະຫວັດຄອບຄົວ, ການປະຕິບັດສາດສະໜາກິດ, ການຮັບໃຊ້, ການນະມັດສະການເປັນສ່ວນຕົວ, ແລະ ມ່ວນຊື່ນກັບເວລາຢູ່ນຳຄອບຄົວ, ແລ້ວວັນຊະບາໂຕ ຈະເປັນວັນທີ່ມີຄວາມສຸກແທ້ໆ.

ຄອບຄົວໜຶ່ງຢູ່ປະເທດ ບຣາຊິນ ທີ່ເປັນສະມາຊິກຢູ່ໃນສະເຕກ ແຫ່ງທີ່ແຫລ່ງຊ່ວຍເຫລືອ ຈົ່ງຕາມເຮົາມາ ໄດ້ຖືກທົດສອບ. ຜູ້ເປັນພໍ່ຊື່ ເຟີນານໂດ, ອະດີດຜູ້ສອນສາດສະໜາ, ພ້ອມດ້ວຍພັນລະຍາຊື່ ແນນຊີ ທີ່ເປັນພໍ່ແມ່ຂອງລູກນ້ອຍສີ່ຄົນ ໄດ້ລາຍງານວ່າ: “ເມື່ອໂຄງການຊ່ວຍເຫລືອ ຈົ່ງຕາມເຮົາມາ ຖືກນຳສະເໜີ ຢູ່ໃນສະເຕກຂອງພວກເຮົາ, ຂ້າພະເຈົ້າກໍຕື່ນເຕັ້ນຫລາຍ, ແລະ ຂ້າພະເຈົ້າຄິດວ່າ ‘ວິທີທີ່ພວກເຮົາສຶກສາພຣະຄຳພີຢູ່ທີ່ບ້ານ ຈະປ່ຽນໄປ.’ ມັນເປັນແນວນັ້ນແທ້ໆ ຢູ່ໃນບ້ານເຮືອນຂອງຂ້າພະເຈົ້າ, ແລະ ໃນຖານະຜູ້ນຳໃນສາດສະໜາຈັກ ຂ້າພະເຈົ້າເຫັນວ່າ ມັນໄດ້ເກີດຂຶ້ນ ໃນບ້ານເຮືອນຂອງຄົນອື່ນຄືກັນ. … ມັນຊ່ວຍພວກເຮົາໃຫ້ສົນທະນາກ່ຽວກັບພຣະຄຳພີແທ້ໆ ຢູ່ໃນບ້ານເຮືອນຂອງພວກເຮົາ. ພັນລະຍາ ກັບຂ້າພະເຈົ້າ ມີຄວາມເຂົ້າໃຈທີ່ເລິກຊຶ້ງຫລາຍກວ່າເກົ່າກ່ຽວກັບຫົວຂໍ້ສຶກສາ. … ມັນຊ່ວຍພວກເຮົາ … ຂະຫຍາຍຄວາມຮູ້ເລື່ອງພຣະກິດຕິຄຸນ ແລະ ເພີ່ມສັດທາ ແລະ ປະຈັກພະຍານຂອງພວກເຮົາ. … ຂ້າພະເຈົ້າເປັນພະຍານ … ວ່າ ຂ້າພະເຈົ້າຮູ້ວ່າ ສິ່ງນີ້ໄດ້ຖືກດົນໃຈ ໂດຍພຣະຜູ້ເປັນເຈົ້າ ເພື່ອວ່າການສຶກສາເປັນປະຈຳ ແລະ ມີປະສິດທິພາບ ເຖິງຫລັກທຳ ແລະ ຄຳສອນ ໃນພຣະຄຳພີ ຈະນຳສັດທາ, ປະຈັກພະຍານ, ແລະ ຄວາມສະຫວ່າງ ມາສູ່ຄອບຄົວ … ຢູ່ໃນໂລກທີ່ເສື່ອມໂຊມນີ້.”¹²

ໃນການທົດສອບຢູ່ໃນສະເຕກຕ່າງໆຕະຫລອດທົ່ວໂລກ, ພວກເຮົາໄດ້ຮັບຄຳຕອບທີ່ໜ້າເພິ່ງພໍໃຈ ກັບແຫລ່ງຊ່ວຍເຫລືອ ຈົ່ງຕາມເຮົາມາ. ຫລາຍຄົນໄດ້ລາຍງານວ່າ ເຂົາເຈົ້າເລື່ອນຈາກການອ່ານພຣະຄຳພີ ໄປສູ່ການສຶກສາພຣະຄຳພີ. ແລະ ຫລາຍຄົນກໍຮູ້ສຶກຄືກັນວ່າ ມັນເປັນປະສົບການທີ່ສົ່ງເສີມສັດທາ ແລະ ມີຜົນດີຫລາຍຕໍ່ຫວອດຂອງເຂົາເຈົ້າ.¹³

ຄວາມເຫລື້ອມໃສທີ່ເລິກຊຶ້ງ ແລະ ຍາວນານ

ເປົ້າໝາຍຂອງການປ່ຽນແປງເຫລົ່ານີ້ ແມ່ນເພື່ອຫວັງໃຫ້ຜູ້ໃຫຍ່ ແລະ ຄົນລຸ້ນໃໝ່ ມີຄວາມເຫລື້ອມໃສທີ່ເລິກຊຶ້ງ ແລະ ຍາວນານ. ໜ້າທຳອິດຂອງແຫລ່ງຊ່ວຍເຫລືອບຸກຄົນ ແລະ ຄອບຄົວ ຊີ້ບອກວ່າ: “ຄວາມມຸ້ງໝາຍຂອງການຮຽນຮູ້ ແລະ ການສິດສອນພຣະກິດຕິຄຸນ ຄືການເຮັດໃຫ້ຄວາມເຫລື້ອມໃສຂອງເຮົາເລິກຊຶ້ງ ແລະ ຊ່ວຍເຮົາໃຫ້ກາຍເປັນເໝືອນດັ່ງພຣະເຢຊູຄຣິດຫລາຍຂຶ້ນ. … ນີ້ໝາຍເຖິງການເພິ່ງອາໄສພຣະຄຣິດ ເພື່ອປ່ຽນໃຈເຮົາ.”¹⁴ ສິ່ງນີ້ຊ່ວຍເຫລືອ ໂດຍການເອື້ອມອອກໄປໄກກວ່າ “ຫ້ອງຮຽນ ເຂົ້າເຖິງຫົວໃຈຂອງບຸກຄົນ ແລະ ບ້ານເຮືອນ. ມັນຮຽກຮ້ອງຄວາມສະໝ່ຳສະເໝີ, ຄວາມພະຍາຍາມໃນທຸກວັນ ທີ່ຈະເຂົ້າໃຈ ແລະ ດຳລົງຊີວິດຕາມພຣະກິດຕິຄຸນ. ຄວາມເຫລື້ອມໃສທີ່ແທ້ຈິງ ຮຽກຮ້ອງອິດທິພົນຂອງພຣະວິນຍານບໍລິສຸດ.”¹⁵

ຈຸດເປົ້າໝາຍທີ່ສຳຄັນທີ່ສຸດ ແລະ ພອນອັນສູງສົ່ງທີ່ສຸດ ຂອງຄວາມເຫລື້ອມໃສທີ່ເລິກຊຶ້ງ ແລະ ຍາວນານ ແມ່ນການມີຄ່າຄວນທີ່ຈະໄດ້ຮັບພັນທະສັນຍາ ແລະ ພິທີການ ຂອງເສັ້ນທາງແຫ່ງພັນທະສັນຍາ.¹⁶

ພວກເຮົາໄວ້ວາງໃຈວ່າ ທ່ານທັງຫລາຍຈະປຶກສາຫາລືນຳກັນ ແລະ ສະແຫວງຫາການເປີດເຜີຍ ເພື່ອການນຳໃຊ້ ການປ່ຽນແປງເຫລົ່ານີ້—ຂະນະທີ່ບໍ່ເຮັດເກີນການກຳນົດ ຫລື ພະຍາຍາມບັນຊາບຸກຄົນ ຫລື ຄອບຄົວ ໃຫ້ເຮັດເພີ່ມເຕີມ. ຂໍ້ມູນເພີ່ມເຕີມ ຈະຖືກແບ່ງປັນ ໃນການສື່ສານຄັ້ງຕໍ່ໄປ, ຮ່ວມທັງ ຈົດໝາຍ ແລະ ເອກະສານປະກອບ ຈາກຝ່າຍປະທານສູງສຸດ.

ຂ້າພະເຈົ້າເປັນພະຍານຕໍ່ທ່ານວ່າ ໃນການໄຕ່ຕອງຂອງສະພາຂອງຝ່າຍປະທານສູງສຸດ ແລະ ກຸ່ມອັກຄະສາວົກສິບສອງ ຢູ່ໃນພຣະວິຫານ, ແລະ ຫລັງຈາກສາດສະດາທີ່ຮັກແພງຂອງເຮົາ ໄດ້ອ້ອນວອນຂໍການເປີດເຜີຍຈາກພຣະຜູ້ເປັນເຈົ້າ ເພື່ອຈະໄດ້ອະນຸມັດການປ່ຽນແປງເຫລົ່ານີ້, ທຸກຄົນກໍໄດ້ຮັບການຢືນຢັນທີ່ມີພະລັງ. ຣະໂຊ ເອັມ ແນວສັນ ເປັນປະທານ ແລະ ສາດສະດາ ໃນປະຈຸບັນຂອງເຮົາ. ການປະກາດໃນມື້ນີ້ ຈະນຳພອນຢ່າງຫລວງຫລາຍມາໃຫ້ຜູ້ທີ່ຮັບເອົາການປ່ຽນແປງ ດ້ວຍຄວາມກະຕືລືລົ້ນ ແລະ ສະແຫວງຫາການນຳພາຈາກພຣະວິນຍານບໍລິສຸດ. ເຮົາຈະເຂົ້າໃກ້ຊິດພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດ ແລະ ພຣະຜູ້ໄຖ່ຂອງເຮົາ, ພຣະເຢຊູຄຣິດ ຫລາຍກວ່າເກົ່າ, ຜູ້ຊຶ່ງຂ້າພະເຈົ້າໃຫ້ຄຳເປັນພະຍານ. ໃນພຣະນາມຂອງພຣະເຢຊູຄຣິດ, ອາແມນ.