ບົດບາດຂອງພຣະຄຳພີມໍມອນໃນການປ່ຽນໃຈເຫລື້ອມໃສ

ແອວເດີ ເຊນ ເອັມ ໂບເວັນ

ແຫ່ງສາວົກເຈັດສິບ

ເຮົາກຳລັງເຕົ້າໂຮມອິດສະຣາເອນ ເປັນເທື່ອສຸດທ້າຍ ແລະ ກຳລັງເຮັດດ້ວຍພຣະຄຳພີມໍມອນ, ຊຶ່ງເປັນເຄື່ອງມືຢ່າງໜຶ່ງແຫ່ງການປ່ຽນໃຈເຫລື້ອມໃສ ທີ່ມີພະລັງທີ່ສຸດ.

ຫລາຍຄົນໃນທຸກວັນນີ້ສົງໄສກ່ຽວກັບຄວາມເປັນຈິງຂອງພຣະເຈົ້າ ແລະ ຄວາມສຳພັນຂອງເຮົາກັບພຣະອົງ. ຫລາຍຄົນຮູ້ເລັກນ້ອຍ ຫລື ບໍ່ຮູ້ເລີຍກ່ຽວກັບແຜນແຫ່ງຄວາມສຸກຂອງພຣະອົງ. ຫລາຍກວ່າ 30 ປີ ຜ່ານມາແລ້ວ, ປະທານເອສະຣາ ແທັບ ເບັນສັນ ໄດ້ສັງເກດເຫັນວ່າ “ຄົນສ່ວນຫລາຍ … ຢູ່ໃນໂລກ ໃນປະຈຸບັນ ປະຕິເສດຄວາມເປັນພຣະເຈົ້າຂອງພຣະຜູ້ຊ່ວຍໃຫ້ລອດ. ພວກເຂົາສົງໄສກ່ຽວກັບການກຳເນີດທີ່ໜ້າອັດສະຈັນໃຈຂອງພຣະອົງ, ຊີວິດທີ່ບໍ່ມີບາບຂອງພຣະອົງ, ແລະ ຄວາມຈິງແທ້ຂອງການຟື້ນຄືນພຣະຊົນທີ່ຮຸ່ງເຫລື້ອມຂອງພຣະອົງ.”¹

ໃນວັນເວລາຂອງເຮົາ, ຄຳຖາມບໍ່ພຽງແຕ່ເຈາະຈົງໃສ່ພຣະຜູ້ຊ່ວຍໃຫ້ລອດຂອງເຮົາເທົ່ານັ້ນ ແຕ່ຍັງເຈາະຈົງໃສ່ສາດສະໜາຈັກຂອງພຣະອົງນຳອີກ—ນັ້ນຄື ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ—ຊຶ່ງພຣະອົງໄດ້ຟື້ນຟູ ຜ່ານທາງສາດສະດາ ໂຈເຊັບ ສະມິດ. ຄຳຖາມເຫລົ່ານັ້ນ ສ່ວນຫລາຍຈະເຈາະຈົງໃສ່ປະຫວັດສາດ, ຄຳສອນ, ຫລື ການປະຕິບັດ ໃນສາດສະໜາຈັກຂອງພຣະຜູ້ຊ່ວຍໃຫ້ລອດ.

ພຣະຄຳພີມໍມອນຊ່ວຍເຮົາໃຫ້ເຕີບໂຕຂຶ້ນໃນປະຈັກພະຍານ

ຈາກປຶ້ມ ຈົ່ງສອນພຣະກິດຕິຄຸນຂອງເຮົາ, ເຮົາອ່ານວ່າ: “ຈົ່ງຈື່ຈຳວ່າ ຄວາມເຂົ້າໃຈຂອງເຮົາ [ກ່ຽວກັບພຣະບິດາເທິງສະຫວັນ ແລະ ແຜນແຫ່ງຄວາມສຸກຂອງພຣະອົງ] ມາຈາກສາດສະດາໃນສະໄໝໃໝ່—ໂຈເຊັບ ສະມິດ ແລະ ຜູ້ຮັບຕຳແໜ່ງແທນເພິ່ນຕໍ່ໆມາ—ຜູ້ໄດ້ຮັບການເປີດເຜີຍໂດຍກົງຈາກພຣະເຈົ້າ. ສະນັ້ນ, ຄຳຖາມຂໍ້ທຳອິດທີ່ບາງຄົນຄວນຕອບ ແມ່ນວ່າ ໂຈເຊັບ ສະມິດ ເປັນສາດສະດາ ຫລື ບໍ່ໄດ້ເປັນ, ແລະ ບຸກຄົນນັ້ນສາມາດຕອບຄຳຖາມນີ້ ໂດຍການອ່ານ ແລະ ອະທິຖານກ່ຽວກັບພຣະຄຳພີມໍມອນ.”²

ປະຈັກພະຍານຂອງຂ້າພະເຈົ້າ ເຖິງການເອີ້ນທີ່ສູງສົ່ງຂອງສາດສະດາ ໂຈເຊັບ ສະມິດ ໄດ້ເຂັ້ມແຂງຂຶ້ນ ໂດຍການສຶກສາພຣະຄຳພີມໍມອນ: ປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ ດ້ວຍການອະທິຖານ. ຂ້າພະເຈົ້າໄດ້ເຮັດຕາມຄຳເຊື້ອເຊີນຂອງໂມໂຣໄນ ທີ່ວ່າ “ໃຫ້ທູນຖາມພຣະເຈົ້າ, ພຣະບິດາຜູ້ສະຖິດນິລັນດອນໃນພຣະນາມຂອງພຣະຄຣິດ,” ເພື່ອຈະໄດ້ຮູ້ເຖິງຄວາມຈິງແທ້ຂອງພຣະຄຳພີມໍມອນ.³ ຂ້າພະເຈົ້າເປັນພະຍານວ່າ ຂ້າພະເຈົ້າຮູ້ວ່າ ມັນຈິງແທ້. ຄວາມຮູ້ນັ້ນໄດ້ມາສູ່ຂ້າພະເຈົ້າ, ຊຶ່ງມັນສາມາດມາສູ່ທ່ານໄດ້, “ໂດຍອຳນາດຂອງພຣະວິນຍານບໍລິສຸດ.”⁴

ຄຳນຳຕໍ່ພຣະຄຳພີມໍມອນ ກ່າວວ່າ: “ຜູ້ທີ່ໄດ້ຮັບພະຍານອັນສັກສິດ [ເຖິງພຣະຄຳພີມໍມອນ] ຈາກພຣະວິນຍານສັກສິດນີ້ຈະໄດ້ຮູ້ຈັກດ້ວຍອຳນາດດຽວກັນວ່າ ພຣະເຢຊູຄຣິດຄືພຣະຜູ້ຊ່ວຍໃຫ້ລອດຂອງໂລກ, ວ່າໂຈເຊັບ ສະມິດ ເປັນຜູ້ເປີດເຜີຍ ແລະ ເປັນສາດສະດາຂອງພຣະອົງໃນຍຸກສຸດທ້າຍນີ້ ແລະ ວ່າສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍເປັນອານາຈັກຂອງພຣະຜູ້ເປັນເຈົ້າ ຊຶ່ງໄດ້ຖືກສະຖາປະນາຂຶ້ນອີກ ຢູ່ເທິງແຜ່ນດິນໂລກ, ຕຽມພ້ອມໄວ້ເພື່ອການສະເດັດມາຄັ້ງທີສອງຂອງພຣະເມຊີອາ.”⁵

ຕອນເປັນຜູ້ສອນສາດສະໜາໜຸ່ມ ເພື່ອໄປປະເທດຈີເລ, ຂ້າພະເຈົ້າໄດ້ຮຽນບົດຮຽນໜຶ່ງທີ່ ປ່ຽນແປງຊີວິດ ກ່ຽວກັບອຳນາດແຫ່ງການປ່ຽນໃຈເຫລື້ອມໃສຂອງພຣະຄຳພີມໍມອນ. ທ່ານກອນຊາເລສ໌ ໄດ້ຮັບໃຊ້ ໃນຕຳແໜ່ງທີ່ໜ້ານັບຖື ຢູ່ໃນໂບດ ເປັນເວລາຫລາຍປີ. ເພິ່ນໄດ້ຮັບການເຝິກຝົນເລື່ອງສາດສະໜາຢ່າງຫລວງຫລາຍ, ຮ່ວມທັງມີປະລິນຍາຝ່າຍວິຊາການສາດສະໜາ. ເພິ່ນມີຄວາມພູມໃຈຫລາຍກັບຄວາມເກັ່ງກ້າເລື່ອງພຣະຄຣິສຕະທຳຄຳພີ. ເຫັນໄດ້ຢ່າງແຈ່ມແຈ້ງວ່າ ເພິ່ນເປັນນັກປາດອາຈານຝ່າຍສາດສະໜາ.

ເພິ່ນຮູ້ຈັກກ່ຽວກັບຜູ້ສອນສາດສະໜາຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍເປັນຢ່າງດີ ຂະນະທີ່ເຂົາເຈົ້າທຳງານຢູ່ໃນເມືອງລີມາ, ປະເທດເປຣູ ຂອງເພິ່ນ. ເພິ່ນຢາກພົບກັບເຂົາເຈົ້າ ເພື່ອວ່າເພິ່ນຈະໄດ້ສິດສອນເຂົາເຈົ້າເລື່ອງພຣະຄຣິສຕະທຳຄຳພີ.

ມື້ໜຶ່ງ, ເກືອບເປັນຂອງປະທານຈາກສະຫວັນ, ເພິ່ນຄິດ, ຜູ້ສອນສາດສະໜາສອງຄົນໄດ້ເວົ້າລົມກັບເພິ່ນຢູ່ຂ້າງຖະໜົນ ແລະ ຖາມເພິ່ນວ່າ ໃຫ້ເຂົາເຈົ້າໄປຫາເພິ່ນຢູ່ບ້ານຂອງເພິ່ນຊິໄດ້ບໍ ເພື່ອແບ່ງປັນຂໍ້ພຣະຄຳພີກັບເພິ່ນ. ນີ້ແມ່ນຄວາມຝັນທີ່ເກີດເປັນຈິງສຳລັບເພິ່ນ! ຄຳອະທິຖານຂອງເພິ່ນໄດ້ຮັບຄຳຕອບແລ້ວ. ໃນທີ່ສຸດ, ເພິ່ນຈະໄດ້ສິດສອນຊາຍໜຸ່ມສອງຄົນນີ້ໃຫ້ຮູ້ເຖິງຄວາມຈິງ. ເພິ່ນໄດ້ບອກເຂົາເຈົ້າວ່າ ເພິ່ນຍິນດີໃຫ້ເຂົາເຈົ້າໄປເຮືອນເພິ່ນ ແລະ ສົນທະນາກັນເລື່ອງພຣະຄຳພີ.

ເພິ່ນຕື່ນເຕັ້ນຢາກໃຫ້ຮອດວັນນັດໝາຍໄວໆ. ເພິ່ນພ້ອມແລ້ວທີ່ຈະໃຊ້ພຣະຄຣິສຕະທຳຄຳພີ ເພື່ອພິສູດໃຫ້ເຫັນວ່າຄວາມເຊື່ອຂອງເຂົາເຈົ້າບໍ່ຈິງ. ເພິ່ນແນ່ໃຈວ່າ ພຣະຄຣິສຕະທຳຄຳພີ ຈະຊີ້ບອກຢ່າງແຈ່ມແຈ້ງ ແລະ ຢ່າງຄ່ອງແຄ້ວ ເຖິງການສອນທີ່ຜິດຂອງເຂົາເຈົ້າ. ຄ່ຳຄືນທີ່ນັດໝາຍໄດ້ມາເຖິງ, ແລະ ຜູ້ສອນສາດສະໜາກໍໄດ້ໄປເຄາະປະຕູບ້ານ. ເພິ່ນຮູ້ສຶກຕື່ນເຕັ້ນ. ໃນທີ່ສຸດ ເວລາພິສູດຂອງເພິ່ນກໍໄດ້ມາເຖິງ.

ເພິ່ນໄດ້ເປີດປະຕູ ແລະ ໄດ້ເຊື້ອເຊີນຜູ້ສອນສາດສະໜາ ເຂົ້າໄປໃນບ້ານຂອງເພິ່ນ. ຜູ້ສອນສາດສະໜາຄົນໜຶ່ງ ໄດ້ຍື່ນປຶ້ມຫົວສີຟ້າໃຫ້ເພິ່ນ ແລະ ສະແດງປະຈັກພະຍານວ່າ ລາວຮູ້ວ່າສິ່ງທີ່ຢູ່ໃນປຶ້ມຫົວນັ້ນ ແມ່ນພຣະຄຳຂອງພຣະເຈົ້າ. ຜູ້ສອນສາດສະໜາຄົນທີສອງ ໄດ້ກ່າວປະຈັກພະຍານຂອງລາວເຖິງປຶ້ມນັ້ນຕື່ມອີກ, ເປັນພະຍານວ່າ ມັນໄດ້ຖືກແປໂດຍສາດສະດາໃນສະໄໝໃໝ່ຂອງພຣະເຈົ້າ ຊື່ ໂຈເຊັບ ສະມິດ, ແລະ ວ່າມັນສິດສອນເຖິງພຣະຄຣິດ. ຜູ້ສອນສາດສະໜາໄດ້ຂໍລາເມືອ ແລະ ກໍໄດ້ອອກຈາກບ້ານຂອງເພິ່ນໄປ.

ທ່ານກອນຊາເລສ໌ ຮູ້ສຶກຜິດຫວັງຫລາຍ. ແຕ່ເພິ່ນໄດ້ເປີດປຶ້ມ ແລະ ເລີ່ມຕົ້ນອ່ານມັນ. ເພິ່ນໄດ້ອ່ານໜ້າທຳອິດ. ເພິ່ນໄດ້ອ່ານໜ້າຕໍ່ໄປ ແລະ ບໍ່ໄດ້ຢຸດ ຈົນເຖິງຕອນບ່າຍຂອງມື້ຕໍ່ມາ. ເພິ່ນໄດ້ອ່ານປຶ້ມນັ້ນ ໝົດທັງເຫລັ້ມ ແລະ ຮູ້ວ່າມັນເປັນຄວາມຈິງ. ເພິ່ນຮູ້ວ່າ ເພິ່ນຄວນເຮັດແນວໃດ. ເພິ່ນໄດ້ໂທໄປຫາຜູ້ສອນສາດສະໜາ, ໄດ້ຮັບບົດຮຽນ, ແລະ ໄດ້ປະຊີວິດທີ່ເພິ່ນຮູ້ຈັກ ເພື່ອກາຍເປັນສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.

ຊາຍທີ່ດີຄົນນັ້ນ ເປັນຄູຂອງຂ້າພະເຈົ້າຢູ່ສູນອົບລົມຜູ້ສອນສາດສະໜາ ໃນເມືອງໂພຼໂວ, ລັດຢູທາ. ເລື່ອງລາວກ່ຽວກັບການປ່ຽນໃຈເຫລື້ອມໃສຂອງ ບຣາເດີ ກອນຊາເລສ໌ ແລະ ພະລັງຂອງພຣະຄຳພີມໍມອນ ໄດ້ປະທັບໃຈຂ້າພະເຈົ້າຫລາຍ.

ຕອນຂ້າພະເຈົ້າໄປເຖິງປະເທດເຈລີ, ປະທານເຜີຍແຜ່ຂອງຂ້າພະເຈົ້າ ປະທານຣອຍເດັນ ເຈ ກະເລດ ໄດ້ເຊື້ອເຊີນພວກເຮົາໃຫ້ອ່ານປະຈັກພະຍານຂອງສາດສະດາ ໂຈເຊັບ ສະມິດ ທີ່ມີບັນທຶກໄວ້ ຢູ່ໃນ ໂຈເຊັບ ສະມິດ—ປະຫວັດສາດ ທຸກອາທິດ. ເພິ່ນໄດ້ສິດສອນພວກເຮົາວ່າ ປະຈັກພະຍານເຖິງພາບທີ່ມາໃຫ້ເຫັນຄັ້ງທຳອິດ ມີອິດທິພົນໂດຍກົງຕໍ່ປະຈັກພະຍານຂອງເຮົາ ເຖິງພຣະກິດຕິຄຸນ ແລະ ປະຈັກພະຍານຂອງເຮົາ ເຖິງພຣະຄຳພີມໍມອນ.

ຂ້າພະເຈົ້າໄດ້ຮັບເອົາຄຳເຊື້ອເຊີນນີ້ຢ່າງຈິງຈັງ. ຂ້າພະເຈົ້າໄດ້ອ່ານເລື່ອງລາວຢູ່ໃນພາບທີ່ມາໃຫ້ເຫັນຄັ້ງທຳອິດ, ຂ້າພະເຈົ້າໄດ້ອ່ານພຣະຄຳພີມໍມອນ. ຂ້າພະເຈົ້າໄດ້ອະທິຖານຕາມຄຳແນະນຳຂອງໂມໂຣໄນ ແລະ ໄດ້ທູນຖາມ “ພຣະເຈົ້າ, ພຣະບິດາຜູ້ສະຖິດນິລັນດອນ, ໃນພຣະນາມຂອງພຣະເຢຊູຄຣິດ”⁶ ວ່າພຣະຄຳພີມໍມອນຈິງແທ້ຫລືບໍ່. ຂ້າພະເຈົ້າເປັນພະຍານໃນມື້ນີ້ວ່າ ຂ້າພະເຈົ້າຮູ້ດັ່ງທີ່ສາດສະດາ ໂຈເຊັບ ສະມິດ ໄດ້ກ່າວວ່າ ພະຄຳພີມໍມອນ “ເປັນໜັງສືທີ່ຖືກຕ້ອງທີ່ສຸດ ຢູ່ໃນໂລກນີ້, ແລະ ເປັນຫີນສຳຄັນຂອງສາດສະໜາຂອງເຮົາ, ແລະ ມະນຸດຈະເຂົ້າໃກ້ຊິດກັບພຣະເຈົ້າຫລາຍຂຶ້ນ ໂດຍການປະຕິບັດຕາມຫລັກຄຳສອນ ທີ່ຢູ່ໃນນັ້ນ ຫລາຍກວ່າໜັງສືເຫລັ້ມອື່ນໆ.”⁷ ສາດສະດາ ໂຈເຊັບ ໄດ້ປະກາດອີກວ່າ: “ຖ້າເອົາພຣະຄຳພີມໍມອນ ແລະ ການເປີດເຜີຍອອກໄປ ແລ້ວຈະມີຫຍັງເຫລືອໃນສາດສະໜາຂອງເຮົາ? ບໍ່ເຫລືອຫຍັງເລີຍ.”⁸

ການປ່ຽນໃຈເຫລື້ອມໃສເປັນສ່ວນຕົວ

ເມື່ອເຮົາເຂົ້າໃຈຫລາຍຂຶ້ນ ວ່າເຮົາເປັນໃຜ ແລະ ຈຸດປະສົງຂອງພຣະຄຳພີມໍມອນ, ແລ້ວການປ່ຽນໃຈເຫລື້ອມໃສຂອງເຮົາຈະເລິກຊຶ້ງ ແລະ ແນ່ນອນຫລາຍກວ່າເກົ່າ. ເຮົາຈະມີຄວາມຕັ້ງໃຈຫລາຍຂຶ້ນ ໃນການຮັກສາພັນທະສັນຍາ ທີ່ເຮົາໄດ້ເຮັດໄວ້ນຳພຣະເຈົ້າ.

ຈຸດປະສົງທີ່ສຳຄັນທີ່ສຸດຂອງພຣະຄຳພີມໍມອນ ແມ່ນເພື່ອໃຫ້ເຕົ້າໂຮມອິດສະຣາເອນ. ການເຕົ້າໂຮມນີ້ໃຫ້ໂອກາດແກ່ລູກໆທຸກຄົນຂອງພຣະເຈົ້າ ເພື່ອຈະໄດ້ເຂົ້າໄປໃນເສັ້ນທາງແຫ່ງພັນທະສັນຍາ ແລະ, ໂດຍການໃຫ້ກຽດແກ່ພັນທະສັນຍາເຫລົ່ານັ້ນ, ກັບຄືນໄປຫາທີ່ປະທັບຂອງພຣະບິດາ. ເມື່ອເຮົາສອນເຖິງການກັບໃຈ ແລະ ໃຫ້ບັບຕິສະມາແກ່ຜູ້ປ່ຽນໃຈເຫລື້ອມໃສ, ເຮົາໄດ້ເຕົ້າໂຮມອິດສະຣາເອນ.

ພຣະຄຳພີມໍມອນ ມີຂໍ້ອ້າງອີງຢູ່ດ້ວຍກັນ 108 ເທື່ອ ກ່ຽວກັບເຊື້ອສາຍອິດສະຣາເອນ. ຢູ່ທາງໜ້າຂອງພຣະຄຳພີມໍມອນ, ນີໄຟໄດ້ສອນວ່າ, “ເພາະຄວາມຕັ້ງໃຈອັນເຕັມປ່ຽມຂອງຂ້າພະເຈົ້າກໍເພື່ອຈະຊັກຊວນມະນຸດໃຫ້ເຂົ້າມາຫາພຣະເຈົ້າຂອງອັບຣາຮາມ, ແລະ ພຣະເຈົ້າຂອງອີຊາກ, ແລະ ພຣະເຈົ້າຂອງຢາໂຄບ, ແລະ ຮັບຄວາມລອດ.”⁹ ພຣະເຈົ້າແຫ່ງອັບຣາຮາມ, ອີຊາກ, ແລະ ຢາໂຄບ ຄືພຣະເຢຊູຄຣິດ, ພຣະເຈົ້າຂອງພຣະຄຳພີເດີມ. ເຮົາຖືກຊ່ວຍໃຫ້ລອດ ເມື່ອເຮົາມາຫາພຣະຄຣິດ ຜ່ານທາງການດຳລົງຊີວິດຕາມພຣະກິດຕິຄຸນຂອງພຣະອົງ.

ຕໍ່ມາ, ນີໄຟໄດ້ຂຽນວ່າ:

“ແທ້ຈິງແລ້ວ, ບິດາຂອງຂ້າພະເຈົ້າໄດ້ເວົ້າຢ່າງຍືດຍາວກ່ຽວກັບຄົນຕ່າງຊາດ, ແລະ ກ່ຽວກັບເຊື້ອສາຍອິດສະຣາເອນອີກວ່າພວກເຂົາປຽບເໝືອນຕົ້ນໝາກກອກເທດທີ່ກິ່ງງ່າຈະຫັກ ແລະ ກະຈັດກະຈາຍໄປທົ່ວຜືນແຜ່ນດິນໂລກ. …

“ແລະ ຫລັງຈາກທີ່ເຊື້ອສາຍອິດສະຣາເອນກະຈັດກະຈາຍໄປ, ພວກເຂົາຈະມາເຕົ້າໂຮມກັນອີກ; ຫລື ຫລັງຈາກທີ່ຄົນຕ່າງຊາດໄດ້ຮັບຄວາມສົມບູນຂອງພຣະກິດຕິຄຸນແລ້ວ, ກິ່ງງ່າເດີມຂອງຕົ້ນໝາກກອກເທດ, ຫລື ເຊື້ອສາຍອິດສະຣາເອນທີ່ເຫລືອຢູ່ນັ້ນຈະຖືກຕໍ່ເຂົ້າກັນຄືນ, ຫລື ມີຄວາມຮູ້ເຖິງພຣະເມຊີອາທີ່ແທ້ຈິງ ພຣະຜູ້ເປັນເຈົ້າຂອງພວກເຂົາ ແລະ ພຣະຜູ້ໄຖ່ຂອງພວກເຂົາ.”¹⁰

ເຊັ່ນດຽວກັນ, ໃນທ້າຍຂອງພຣະຄຳພີມໍມອນ, ສາດສະດາ ໂມໂຣໄນ ເຕືອນເຮົາເຖິງພັນທະສັນຍາຂອງເຮົາ, ໂດຍກ່າວວ່າ, “ເພື່ອທ່ານຈະບໍ່ສັບສົນອີກຕໍ່ໄປ, ເພື່ອພັນທະສັນຍາຂອງພຣະບິດາຜູ້ສະຖິດນິລັນດອນ ຊຶ່ງໄດ້ເຮັດໄວ້ກັບທ່ານຈະສຳເລັດ, ໂອ້ ເຊື້ອສາຍອິດສະຣາເອນ.”¹¹

ພັນທະສັນຍາຂອງພຣະບິດາຜູ້ສະຖິດນິລັນດອນ

“ພັນທະສັນຍາຂອງພຣະບິດາຜູ້ສະຖິດນິລັນດອນ” ທີ່ໂມໂຣໄນ ໄດ້ກ່າວເຖິງ ມີຫຍັງແດ່? ເຮົາອ່ານຢູ່ໃນໜັງສືອັບຣາຮາມວ່າ,

ພຣະນາມຂອງພຣະອົງຄື ພຣະເຢໂຮວາ, ແລະ ພຣະອົງຮູ້ຈັກທີ່ສຸດຕັ້ງແຕ່ຕົ້ນ; ສະນັ້ນພຣະຫັດຂອງພຣະອົງຈະຢູ່ເທິງເຮົາ.

ແລະ ພຣະອົງຈະເຮັດໃຫ້ມີປະຊາຊາດທີ່ຍິ່ງໃຫຍ່ຈາກເຮົາ, ແລະ ພຣະອົງຈະອວຍພອນເຮົາເກີນກວ່າຈະວັດແທກໄດ້, ແລະ ເຮັດໃຫ້ຊື່ຂອງເຮົາຍິ່ງໃຫຍ່ໃນບັນດາປະຊາຊາດທັງປວງ, ແລະ ເຮົາຈະເປັນພອນໃຫ້ແກ່ລູກຫລານຂອງເຮົາຕໍ່ຈາກເຮົາ, ເພື່ອວ່າໃນມືຂອງພວກເຂົາ, ພວກເຂົາຈະນຳການປະຕິບັດສາດສະໜາກິດ ແລະ ຖານະປະໂລຫິດນີ້ໄປສູ່ປະຊາຊາດທັງປວງ.¹²

ປະທານຣະໂຊ ເອັມ ແນວສັນ ໄດ້ສິດສອນຢູ່ໃນການຖ່າຍທອດທົ່ວໂລກ ເມື່ອບໍ່ດົນມານີ້ວ່າ “ເວລານີ້ ເປັນ ຍຸກສຸດທ້າຍແທ້ໆ, ແລະ ພຣະຜູ້ເປັນເຈົ້າກໍເລັ່ງວຽກງານຂອງພຣະອົງ ໃນການເຕົ້າໂຮມອິດສະຣາເອນ. ການເຕົ້າໂຮມນັ້ນ ເປັນສິ່ງສຳຄັນທີ່ສຸດ ທີ່ກຳລັງເກີດຂຶ້ນ ຢູ່ໃນໂລກ ທຸກວັນນີ້. ບໍ່ມີສິ່ງອື່ນໃດທີ່ໃຫຍ່ໂຕໄປກວ່ານີ້, ບໍ່ມີສິ່ງໃດທີ່ສຳຄັນໄປກວ່ານີ້, ບໍ່ມີສິ່ງໃດທີ່ສະຫງ່າງາມໄປກວ່ານີ້. ແລະ ຖ້າຫາກທ່ານເລືອກທີ່ຈະເຮັດ, ຖ້າຫາກທ່ານຢາກເຮັດ, ທ່ານສາມາດເປັນພາກສ່ວນໃນການເຕົ້າໂຮມທີ່ຍິ່ງໃຫຍ່ນີ້ໄດ້. ທ່ານສາມາດເປັນພາກສ່ວນໃນບາງສິ່ງທີ່ຍິ່ງໃຫຍ່, ບາງສິ່ງທີ່ສຳຄັນ, ແລະ ບາງສິ່ງທີ່ສະຫງ່າງາມ!

“ເມື່ອເຮົາກ່າວເຖິງ ການເຕົ້າໂຮມ, ເຮົາພຽງກ່າວເຖິງຄວາມຈິງຂັ້ນພື້ນຖານນີ້: ລູກໆທຸກຄົນຂອງພຣະບິດາເທິງສະຫວັນຂອງເຮົາ, ຢູ່ທັງສອງຟາກມ່ານ, ມີສິດທີ່ຈະໄດ້ຍິນຂ່າວສານຂອງພຣະກິດຕິຄຸນຂອງພຣະເຢຊູຄຣິດທີ່ຖືກຟື້ນຟູ. ເຂົາເຈົ້າຈະຕັດສິນໃຈເອງ ວ່າເຂົາເຈົ້າຢາກຮູ້ຕື່ມອີກຫລືບໍ່.”¹³

ນີ້ຄືສິ່ງທີ່ເຮົາກຳລັງເຮັດຢູ່ ໃນຖານະສະມາຊິກຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ: ເຮົາສະແຫວງຫາທີ່ຈະນຳຄວາມເຂົ້າໃຈ—ແລະ ການປ່ຽນໃຈເຫລື້ອມໃສ—ພຣະກິດຕິຄຸນຂອງພຣະເຢຊູຄຣິດ ໄປໃຫ້ຊາວໂລກ. ເຮົາເປັນ “ຜູ້ເຕົ້າໂຮມໃນຍຸກສຸດທ້າຍ.”¹⁴ ພາລະກິດຂອງເຮົາແມ່ນແຈ່ມແຈ້ງ. ອ້າຍເອື້ອຍນ້ອງທັງຫລາຍ, ຂໍໃຫ້ເຮົາເປັນທີ່ຮູ້ຈັກ ຄືກັນກັບຜູ້ທີ່ໄດ້ຮັບເອົາຄຳສັນຍາຂອງໂມໂຣໄນ, ໃຫ້ອະທິຖານ ແລະ ຮັບເອົາຄຳຕອບ ເພື່ອຈະໄດ້ຮູ້ວ່າ ພຣະຄຳພີມໍມອນ ແມ່ນຈິງແທ້ຫລືບໍ່, ແລະ ແລ້ວໃຫ້ແບ່ງປັນຄວາມຮູ້ນັ້ນກັບຄົນອື່ນ ໃນຖ້ອຍຄຳ ແລະ, ສຳຄັນທີ່ສຸດ, ໃນການກະທຳ.

ບົດບາດຂອງພຣະຄຳພີມໍມອນໃນການປ່ຽນໃຈເຫລື້ອມໃສ

ພຣະຄຳພີມໍມອນບັນຈຸຄວາມສົມບູນຂອງພຣະກິດຕິຄຸນຂອງພຣະເຢຊູຄຣິດ.¹⁵ ມັນນຳພາເຮົາໄປສູ່ພັນທະສັນຍາຂອງພຣະບິດາ, ຊຶ່ງຖ້າຫາກຮັກສາ ຈະໄດ້ຮັບຂອງປະທານທີ່ຍິ່ງໃຫຍ່ທີ່ສຸດ—ນັ້ນຄື ຊີວິດນິລັນດອນ.¹⁶ ພຣະຄຳພີມໍມອນ ເປັນຫີນສຳຄັນຂອງການປ່ຽນໃຈເຫລື້ອມໃສ ຂອງບຸດ ແລະ ທິດາທັງໝົດຂອງພຣະບິດາເທິງສະຫວັນ.

ປະທານແນວສັນ ໄດ້ກ່າວອີກວ່າ: “ເມື່ອທ່ານ … ອ່ານພຣະຄຳພີມໍມອນທຸກວັນ, ທ່ານຈະຮຽນຮູ້ຄຳສອນຂອງການເຕົ້າໂຮມ, ຄວາມຈິງກ່ຽວກັບພຣະເຢຊູຄຣິດ, ການຊົດໃຊ້ຂອງພຣະອົງ, ແລະ ຄວາມສົມບູນຂອງພຣະກິດຕິຄຸນຂອງພຣະອົງ ຊຶ່ງບໍ່ພົບເຫັນຢູ່ໃນພຣະຄຣິສຕະທຳຄຳພີ. ພຣະຄຳພີມໍມອນເປັນຈຸດໃຫຍ່ໃຈກາງຂອງການເຕົ້າໂຮມອິດສະຣາເອນ. ຕາມຈິງແລ້ວ, ຖ້າບໍ່ມີພຣະຄຳພີມໍມອນ, ຄຳສັນຍາແຫ່ງການເຕົ້າໂຮມອິດສະຣາເອນ ຄົງບໍ່ເກີດຂຶ້ນ.”¹⁷

ຂ້າພະເຈົ້າຂໍສະຫລຸບດ້ວຍພຣະຄຳຂອງພຣະຜູ້ຊ່ວຍໃຫ້ລອດ ດັ່ງທີ່ພຣະອົງໄດ້ສິດສອນຊາວນີໄຟ ເຖິງພອນທີ່ໄດ້ສັນຍາໄວ້ ດັ່ງນີ້: “ເຈົ້າເປັນລູກຫລານຂອງສາດສະດາ; ແລະ ເຈົ້າເປັນເຊື້ອສາຍອິດສະຣາເອນ; ແລະ ເຈົ້າຢູ່ໃນພັນທະສັນຍາ ຊຶ່ງພຣະບິດາໄດ້ເຮັດໄວ້ກັບບັນພະບຸລຸດຂອງເຈົ້າ, ເມື່ອພຣະອົງກ່າວກັບອັບຣາຮາມວ່າ: ແລະ ໃນລູກຫລານຂອງເຈົ້າ ທຸກຕະກຸນຂອງແຜ່ນດິນໂລກຈະໄດ້ຮັບພອນ.”¹⁸

ຂ້າພະເຈົ້າເປັນພະຍານວ່າ ເຮົາເປັນບຸດ ແລະ ທິດາຂອງພຣະເຈົ້າ, ເປັນລູກຫລານຂອງອັບຣາຮາມ, ເປັນເຊື້ອສາຍອິດສະຣາເອນ. ເຮົາກຳລັງເຕົ້າໂຮມອິດສະຣາເອນ ເປັນເທື່ອສຸດທ້າຍ ແລະ ກຳລັງເຮັດດ້ວຍພຣະຄຳພີມໍມອນ—ໜັງສືທີ່ສົມທົບເຂົ້າກັບພຣະວິນຍານຂອງພຣະຜູ້ເປັນເຈົ້າ, ເປັນເຄື່ອງມືແຫ່ງການປ່ຽນໃຈເຫລື້ອມໃສ ທີ່ມີພະລັງທີ່ສຸດ. ເຮົາຖືກນຳພາໂດຍສາດສະດາຂອງພຣະເຈົ້າ, ປະທານຣະໂຊ ເອັມ ແນວສັນ, ຜູ້ທີ່ຊີ້ນຳການເຕົ້າໂຮມອິດສະຣາເອນ ໃນວັນເວລາຂອງເຮົາ. ພຣະຄຳພີມໍມອນແມ່ນຈິງແທ້. ມັນໄດ້ປ່ຽນແປງຊີວິດຂອງຂ້າພະເຈົ້າ. ຂ້າພະເຈົ້າສັນຍາກັບທ່ານ, ດັ່ງທີ່ໂມໂຣໄນ ແລະ ສາດສະດາຫລາຍທ່ານໄດ້ສັນຍາ, ວ່າມັນສາມາດປ່ຽນແປງຊີວິດຂອງທ່ານໄດ້.¹⁹ ໃນພຣະນາມຂອງພຣະເຢຊູຄຣິດ, ອາແມນ.