ເຈົ້າຢາກຫາຍດີບໍ?
ເພາະການຊົດໃຊ້ຂອງພຣະເຢຊູຄຣິດ, ຖ້າຫາກເຮົາເລືອກທີ່ຈະກັບໃຈ ແລະ ຫັນຫົວໃຈມາຫາພຣະຜູ້ຊ່ວຍໃຫ້ລອດຢ່າງເຕັມທີ່, ແລ້ວພຣະອົງຈະປິ່ນປົວເຮົາທາງວິນຍານ.
ຫລັງຈາກສອງສາມເດືອນທີ່ໄດ້ໄປສອນສາດສະໜາ, ຂະນະທີ່ລູກຊາຍຫລ້າຂອງພວກເຮົາ ແລະ ຄູ່ສອນສາດສະໜາຂອງລາວໃກ້ສຳເລັດການສຶກສາຂອງເຂົາເຈົ້າ, ລູກຊາຍຂອງພວກເຮົາໄດ້ຮູ້ສຶກເຈັບຫົວເລັກນ້ອຍ. ລາວຮູ້ສຶກແປກໃຈ, ທີ່ໃນຕອນທຳອິດແຂນຂອງລາວຊາ, ແລ້ວລີ້ນກໍມຶນ. ໜ້າເບື້ອງຊ້າຍຂອງລາວເລີ່ມຢ່ອນລົງ. ລາວເວົ້າຍາກ. ລາວຮູ້ວ່າ ມີສິ່ງຜິດປົກກະຕິ. ສິ່ງທີ່ລາວບໍ່ຮູ້ຄື ລາວມີເສັ້ນເລືອດແຕກຢູ່ສາມບ່ອນໃນສະໝອງ. ລາວເກີດຢ້ານກົວ ເມື່ອຮ່າງກາຍບາງສ່ວນຂອງລາວລ່ອຍໄປ. ຖ້າໄດ້ຮັບການປິ່ນປົວໄວຂຶ້ນເທົ່າໃດ ມັນຈະເປັນຜົນດີຕໍ່ການຫາຍດີຂອງລາວໄວ້ຂຶ້ນເທົ່ານັ້ນ. ຄູ່ສອນສາດສະໜາທີ່ຊື່ສັດຂອງລາວ ກໍບໍ່ລໍຊ້າ. ຫລັງຈາກໄດ້ໂທຫາໜ່ວຍສຸກເສີນແລ້ວ, ລາວກໍໄດ້ໃຫ້ພອນແກ່ລາວ. ໂຊກດີຫລາຍທີ່ໜ່ວຍສຸກເສີນຢູ່ໄກພຽງຫ້ານາທີເທົ່ານັ້ນ.
ຫລັງຈາກລູກຊາຍຂອງພວກເຮົາ ໄດ້ຖືກພາໄປໂຮງໝໍຢ່າງໄວ, ໜ່ວຍແພດໝໍກໍໄດ້ພິຈາລະນາເບິ່ງອາການ ແລະ ຄິດວ່າເຂົາເຈົ້າຕ້ອງໃສ່ຢາ ທີ່ຈະຊ່ວຍປິ່ນປົວໂຣກອຳມະພາດຂອງລາວ.1 ແຕ່ຖ້າຫາກລູກຊາຍຂອງພວກເຮົາ ບໍ່ມີເສັ້ນເລືອດແຕກໃນສະໝອງ, ຢານັ້ນຈະເປັນຜົນຮ້າຍ, ດັ່ງເຊັ່ນ ເລືອດໄຫລໃນສະໝອງ. ລູກຊາຍຂອງພວກເຮົາຕ້ອງເລືອກ. ລາວໄດ້ເລືອກໃຊ້ຢາ. ຫລັງຈາກລາວໄດ້ຮັບການຜ່າຕັດຫລາຍເທື່ອ ແລະ ຕ້ອງໄດ້ພັກຟື້ນເປັນເວລາຫລາຍເດືອນ, ໃນທີ່ສຸດ ລູກຊາຍຂອງພວກເຮົາກໍໄດ້ກັບຄືນໄປສອນສາດສະໜາຈົນຈົບ, ຫລັງຈາກທີ່ສຸຂະພາບໄດ້ດີຂຶ້ນຫລາຍເຕີບ.
ພຣະບິດາເທິງສະຫວັນຂອງເຮົາ ມີອຳນາດທັງໝົດ ແລະ ຮູ້ຈັກທຸກສິ່ງ. ພຣະອົງຮູ້ຈັກການດີ້ນລົນທາງຮ່າງກາຍຂອງເຮົາ. ພຣະອົງຮູ້ຈັກຄວາມເຈັບປວດທາງຮ່າງກາຍຂອງເຮົາ ເນື່ອງດ້ວຍຄວາມປ່ວຍໄຂ້, ພະຍາດ, ອາຍຸໄຂ, ອຸປະຕິເຫດ, ຫລື ການເກີດທີ່ບໍ່ສົມປະກອບ. ພຣະອົງຮູ້ຈັກການດີ້ນລົນທາງຄວາມຮູ້ສຶກ ທີ່ກ່ຽວພັນກັບຄວາມກັງວົນ, ຄວາມເປົ່າປ່ຽວ, ຄວາມເສົ້າໃຈ, ຫລື ການເປັນໂຣກຈິດ. ພຣະອົງຮູ້ແຕ່ລະຄົນ ຜູ້ໄດ້ຮັບທຸກທໍລະມານແບບບໍ່ຍຸດຕິທຳ ຫລື ຜູ້ທີ່ໄດ້ຖືກຂົ່ມເຫັງ. ພຣະອົງຮູ້ເຖິງຄວາມອ່ອນແອຂອງເຮົາ ແລະ ຄວາມໂນ້ມອຽງ ແລະ ສິ່ງລໍ້ໃຈ ທີ່ເຮົາຍັງມີບັນຫາຢູ່.
ລະຫວ່າງຊ່ວງມະຕະ ເຮົາຈະຖືກທົດລອງ ເພື່ອເບິ່ງວ່າ ເຮົາຈະເລືອກເຮັດສິ່ງທີ່ດີ ແທນສິ່ງທີ່ຊົ່ວຮ້າຍຫລືບໍ່. ສຳລັບຜູ້ທີ່ຮັກສາພຣະບັນຍັດຂອງພຣະອົງ, ເຂົາເຈົ້າຈະໄດ້ຢູ່ກັບພຣະອົງ ໃນ “ສະພາບແຫ່ງຄວາມສຸກທີ່ບໍ່ມີວັນສິ້ນສຸດ.”2 ເພື່ອຊ່ວຍເຮົາໃນຄວາມກ້າວໜ້າ ເພື່ອກາຍເປັນເໝືອນດັ່ງພຣະອົງ, ພຣະບິດາເທິງສະຫວັນໄດ້ມອບອຳນາດ ແລະ ຄວາມຮູ້ທັງໝົດ ໃຫ້ພຣະບຸດຂອງພຣະອົງ, ພຣະເຢຊູຄຣິດ. ບໍ່ມີຄວາມເຈັບປ່ວຍໃດທາງຮ່າງກາຍ, ຄວາມຮູ້ສຶກໃດ, ຫລື ທາງວິນຍານໃດ ທີ່ພຣະຄຣິດບໍ່ສາມາດປິ່ນປົວ.3
ຈາກການປະຕິບັດສາດສະໜາກິດໃນຊ່ວງມະຕະຂອງພຣະຜູ້ຊ່ວຍໃຫ້ລອດ, ພຣະຄຳພີໄດ້ບັນທຶກການມະຫັດສະຈັນຫລາຍຢ່າງ ຕອນທີ່ພຣະເຢຊູຄຣິດໄດ້ໃຊ້ອຳນາດແຫ່ງສະຫວັນຂອງພຣະອົງ ເພື່ອປິ່ນປົວຜູ້ທີ່ໄດ້ຮັບທຸກທໍລະມານທາງຮ່າງກາຍ.
ພຣະທຳໂຢຮັນມີເລື່ອງລາວກ່ຽວກັບຊາຍຄົນໜຶ່ງ ຜູ້ໄດ້ທົນກັບຄວາມປ່ວຍໂຊ ເປັນເວລາ 38 ປີ.
“ເມື່ອພຣະເຢຊູເຫັນລາວນອນຢູ່ໃນບ່ອນນັ້ນ, ພຣະອົງກໍຮູ້ວ່າ ລາວປ່ວຍເປັນເວລາດົນນານແລ້ວ. ດັ່ງນັ້ນ ພຣະອົງຈຶ່ງຖາມວ່າ, ເຈົ້າຢາກຫາຍດີບໍ?”
ຊາຍທີ່ອ່ອນເພຍຄົນນັ້ນໄດ້ຕອບວ່າ ບໍ່ມີຜູ້ໃດຊ່ວຍລາວ ຕອນທີ່ລາວຕ້ອງການຄວາມຊ່ວຍເຫລືອຫລາຍທີ່ສຸດ.
“ພຣະເຢຊູໄດ້ບອກລາວວ່າ, ຈົ່ງລຸກຂຶ້ນ ແລະ ຍົກເອົາບ່ອນນອນຂອງເຈົ້າ ແລະ ຍ່າງໄປ.
“ແລະ ໃນ ທັນໃດ ຊາຍຄົນນັ້ນກໍຫາຍດີພະຍາດ, ລາວຈຶ່ງຍົກເອົາບ່ອນນອນຂອງຕົນ, ແລ້ວຍ່າງໄປ.”4
ໃຫ້ເຮົາພິຈາລະນາເບິ່ງສອງຢ່າງທີ່ຄຽງຄູ່ກັນໄປ ຊຶ່ງຢ່າງໜຶ່ງລາວໄດ້ຮັບທຸກທໍລະມານ ມາໄດ້—38 ປີ—ແລະ ອີກຢ່າງໜຶ່ງ ລາວໄດ້ຮັບການປິ່ນປົວຢ່າງໄວ ເມື່ອພຣະຜູ້ເປັນເຈົ້າມີສ່ວນກ່ຽວຂ້ອງ. ການປິ່ນປົວແມ່ນໃນ “ທັນທີ.”
ອີກເລື່ອງໜຶ່ງ, ມີຜູ້ຍິງຄົນໜຶ່ງທີ່ເປັນພະຍາດເລືອດຕົກໄດ້ 12 ປີ, ຜູ້ໄດ້ຈ່າຍຊັບທັງໝົດທີ່ຕົນມີໃຫ້ພວກໝໍ, … ໄດ້ຫຍັບເຂົ້າມາທາງຫລັງພຣະເຢຊູ, ແລະ ບາຍແຄມເສື້ອຄຸມຂອງພຣະອົງ: ແລ້ວພະຍາດເລືອດຕົກນັ້ນກໍ [ຢຸດ] ທັນທີ. …
“ພຣະເຢຊູໄດ້ກ່າວວ່າ, ມີຜູ້ໜຶ່ງໄດ້ບາຍເຮົາ: ດ້ວຍວ່າ ເຮົາຮູ້ສຶກວ່າ ລິດເດດໄດ້ຊວ່ານອອກຈາກເຮົາໄປ.
“ເມື່ອເຫັນວ່າ ຈະເຊື່ອງຕົວບໍ່ໄດ້ແລ້ວ ຍິງຄົນນັ້ນ … ຈຶ່ງບອກພຣະອົງ ຢູ່ຕໍ່ໜ້າຝູງຊົນ … ວ່າຕົນໄດ້ຫາຍດີພະຍາດໃນ ທັນທີ ຢ່າງໃດ”5
ຜ່ານທາງການປະຕິບັດສາດສະໜາກິດຂອງພຣະອົງ, ພຣະຄຣິດໄດ້ສິດສອນວ່າ ພຣະອົງມີອຳນາດເໜືອກວ່າຮ່າງກາຍທີ່ມີເນື້ອໜັງ. ເຮົາບໍ່ສາມາດຮູ້ໄດ້ວ່າ ພຣະຄຣິດຈະປິ່ນປົວຮ່າງກາຍທີ່ເຈັບປ່ວຍຂອງເຮົາເມື່ອໃດ. ການປິ່ນປົວຈະເກີດຂຶ້ນ ຕາມພຣະປະສົງ ແລະ ຕາມສະຕິປັນຍາຂອງພຣະອົງ. ໃນພຣະຄຳພີ, ບາງຄົນໄດ້ຮັບທຸກທໍລະມານເປັນເວລາດົນນານ, ບາງຄົນແມ່ນຕະຫລອດຊີວິດ. ຄວາມອ່ອນແອຂອງມະນຸດ ສາມາດຫລໍ່ຫລອມເຮົາ ແລະ ເຮັດໃຫ້ເຮົາເພິ່ງອາໄສພຣະເຈົ້າຫລາຍຂຶ້ນ. ແຕ່ເມື່ອເຮົາອະນຸຍາດໃຫ້ພຣະຄຣິດຊ່ວຍເຫລືອ, ພຣະອົງຈະເຮັດໃຫ້ເຮົາເຂັ້ມແຂງຂຶ້ນທາງວິນຍານ ເພື່ອວ່າເຮົາຈະມີຄວາມສາມາດຫລາຍກວ່າເກົ່າ ທີ່ຈະອົດທົນກັບພາລະຂອງເຮົາໄດ້.
ໃນທີ່ສຸດ, ເຮົາຈະຮູ້ວ່າ ຄວາມເຈັບປ່ວຍ, ພະຍາດໂລຄາ, ຫລື ຄວາມບໍ່ດີພ້ອມທາງຮ່າງກາຍ ຈະໄດ້ຮັບການປິ່ນປົວ ໃນການຟື້ນຄືນຊີວິດ. ນັ້ນຄືຂອງປະທານສຳລັບມວນມະນຸດທັງປວງ ຜ່ານທາງການຊົດໃຊ້ຂອງພຣະເຢຊູຄຣິດ.6
ພຣະເຢຊູຄຣິດສາມາດປິ່ນປົວຫລາຍກວ່າພຽງແຕ່ປິ່ນປົວຮ່າງກາຍທີ່ມີເນື້ອໜັງຂອງເຮົາເທົ່ານັ້ນ. ພຣະອົງກໍຍັງສາມາດປິ່ນປົວວິນຍານຂອງເຮົານຳອີກ. ຜ່ານທາງພຣະຄຳພີ ເຮົາຮຽນຮູ້ເຖິງວິທີທີ່ພຣະຄຣິດໄດ້ຊ່ວຍຜູ້ທີ່ອ່ອນແອທາງວິນຍານ ແລະ ໄດ້ໂຜດເຂົາເຈົ້າໃຫ້ຫາຍດີ.7 ເມື່ອເຮົາໄຕ່ຕອງເຖິງປະສົບການເຫລົ່ານີ້, ເຮົາຈະມີຄວາມຫວັງ ແລະ ມີສັດທາຫລາຍຂຶ້ນ ໃນອຳນາດຂອງພຣະຜູ້ຊ່ວຍໃຫ້ລອດ ທີ່ຈະເປັນພອນໃຫ້ແກ່ຊີວິດຂອງເຮົາ. ພຣະເຢຊູຄຣິດສາມາດປ່ຽນໃຈເຮົາ, ປິ່ນປົວເຮົາຈາກຜົນສະທ້ອນຂອງຄວາມບໍ່ຍຸດຕິທຳ ຫລື ການຂົ່ມເຫັງ ທີ່ເຮົາເຄີຍປະເຊີນ, ແລະ ເພີ່ມຄວາມເຂັ້ມແຂງໃຫ້ແກ່ຄວາມສາມາດຂອງເຮົາ ທີ່ຈະອົດທົດກັບການສູນເສຍ ແລະ ຄວາມເຈັບປວດໃຈ, ນຳຄວາມສະຫງົບມາ ເພື່ອຊ່ວຍເຮົາໃຫ້ສາມາດອົດທົນກັບການທົດລອງ ໃນຊີວິດຂອງເຮົາໄດ້, ປິ່ນປົວເຮົາທາງຄວາມຮູ້ສຶກ.
ພຣະຄຣິດກໍຍັງສາມາດປິ່ນປົວເຮົາ ເມື່ອເຮົາໄດ້ເຮັດບາບ. ເຮົາໄດ້ເຮັດບາບເມື່ອເຮົາລະເມີດກົດບາງຂໍ້ຂອງພຣະເຈົ້າ.8 ເມື່ອເຮົາເຮັດບາບ, ຈິດວິນຍານຂອງເຮົາຈະບໍ່ສະອາດ. ສິ່ງທີ່ບໍ່ສະອາດຈະເຂົ້າໄປໃນທີ່ປະທັບຂອງພຣະເຈົ້າບໍ່ໄດ້.9 “ການສະອາດຈາກບາບ ຄືການທີ່ [ຈະ] ຖືກປິ່ນປົວທາງວິນຍານ.”10
ພຣະເຈົ້າອົງເປັນພຣະບິດາ ຮູ້ວ່າເຮົາຈະເຮັດບາບ, ແຕ່ພຣະອົງໄດ້ຕຽມທາງໄວ້ໃຫ້ເຮົາ ເພື່ອຮັບການໄຖ່. ແອວເດີ ລິນ ຈີ ຣອບບິນສ໌ ໄດ້ສອນວ່າ: “ການກັບໃຈບໍ່ແມ່ນແຜນສຳລອງ [ຂອງພຣະເຈົ້າ] ທີ່ໄດ້ຕຽມໄວ້ບາດເທື່ອເຮົາເຮັດຄວາມຜິດພາດ. ການກັບໃຈ ແມ່ນ ແຜນຂອງພຣະອົງ, ໂດຍທີ່ຮູ້ວ່າ ເຮົາຈະເຮັດຄວາມຜິດພາດ.”11 ເມື່ອເຮົາເຮັດບາບ, ເຮົາມີໂອກາດທີ່ຈະເລືອກເຮັດສິ່ງທີ່ດີ ແທນສິ່ງທີ່ຊົ່ວຮ້າຍ. ເຮົາເລືອກເຮັດສິ່ງທີ່ດີ ເມື່ອເຮົາກັບໃຈ ຫລັງຈາກເຮົາໄດ້ເຮັດບາບ. ຜ່ານທາງພຣະເຢຊູຄຣິດ ແລະ ການເສຍສະລະຊົດໃຊ້ຂອງພຣະອົງ, ເຮົາສາມາດໄດ້ຮັບການໄຖ່ຈາກບາບຂອງເຮົາ ແລະ ນຳເຮົາກັບຄືນສູ່ທີ່ປະທັບຂອງພຣະເຈົ້າອົງເປັນພຣະບິດາ ຖ້າຫາກເຮົາກັບໃຈ. ການປິ່ນປົວທາງວິນຍານບໍ່ແມ່ນເປັນແຕ່ຝ່າຍດຽວ—ມັນຮຽກຮ້ອງອຳນາດແຫ່ງການໄຖ່ຂອງພຣະຜູ້ຊ່ວຍໃຫ້ລອດ ແລະ ການກັບໃຈທີ່ແທ້ຈິງຂອງຜູ້ທີ່ໄດ້ເຮັດບາບ. ສຳລັບຜູ້ທີ່ເລືອກບໍ່ກັບໃຈ, ເຂົາເຈົ້າໄດ້ປະຕິເສດການປິ່ນປົວທີ່ພຣະຄຣິດໄດ້ສະເໜີມອບໃຫ້. ສຳລັບເຂົາເຈົ້າ, ມັນຄືກັນກັບບໍ່ມີການໄຖ່.12
ຂະນະທີ່ຂ້າພະເຈົ້າໄດ້ເວົ້າລົມກັບບາງຄົນທີ່ສະແຫວງຫາການກັບໃຈ, ຂ້າພະເຈົ້າປະຫລາດໃຈທີ່ຜູ້ດຳລົງຊີວິດໃນຄວາມບາບ ມີຄວາມຫຍຸ້ງຍາກທີ່ຈະຕັດສິນໃຈເຮັດສິ່ງທີ່ຖືກຕ້ອງ. ພຣະວິນຍານບໍລິສຸດຈະບໍ່ຢູ່ກັບບຸກຄົນນັ້ນ, ແລະ ເຂົາເຈົ້າຈະມີບັນຫາສະເໝີກັບການເລືອກທີ່ຈະເຂົ້າໃກ້ຊິດກັບພຣະເຈົ້າ. ເຂົາເຈົ້າຈະຕໍ່ສູ້ເປັນເວລາຫລາຍເດືອນ ຫລື ແມ່ນແຕ່ຫລາຍປີ, ອັບອາຍ ຫລື ຢ້ານກົວກັບຜົນສະທ້ອນຂອງບາບ ທີ່ເຂົາເຈົ້າໄດ້ເຮັດ. ສ່ວນຫລາຍເຂົາເຈົ້າຈະຮູ້ສຶກວ່າ ເຂົາເຈົ້າບໍ່ສາມາດປ່ຽນ ແລະ ບໍ່ສາມາດໄດ້ຮັບການໃຫ້ອະໄພ. ຂ້າພະເຈົ້າໄດ້ຍິນເລື້ອຍໆວ່າ ເຂົາເຈົ້າຢ້ານຄົນທີ່ເຂົາເຈົ້າຮັກ ຮູ້ຈັກເຖິງສິ່ງທີ່ເຂົາເຈົ້າໄດ້ເຮັດ, ແລ້ວຈະເຊົາຮັກເຂົາເຈົ້າ ຫລື ປະຖິ້ມເຂົາເຈົ້າ. ເມື່ອເຂົາເຈົ້າເຮັດຕາມຄວາມຄິດນີ້, ເຂົາເຈົ້າຈະມິດງຽບຢູ່ ແລະ ລ່າຊ້າໃນການກັບໃຈ. ເຂົາເຈົ້າຈະຄິດໄປໃນທາງທີ່ຜິດ ວ່າມັນຈະດີກວ່າຖ້າບໍ່ກັບໃຈ ເພື່ອວ່າເຂົາເຈົ້າຈະບໍ່ໄດ້ເຮັດໃຫ້ຄົນທີ່ເຂົາເຈົ້າຮັກ ຕ້ອງເຈັບປວດຫລາຍກວ່ານັ້ນ. ໃນຄວາມຄິດຂອງເຂົາເຈົ້າ, ເຂົາເຈົ້າຄິດວ່າ ມັນຈະດີກວ່າ ທີ່ເຂົາເຈົ້າຈະຮັບທຸກທໍລະມານຫລັງຈາກຊີວິດນີ້ ແທນທີ່ຈະຮັບເອົາຂັ້ນຕອນການກັບໃຈ ໃນເວລາຢູ່ໃນໂລກ. ອ້າຍເອື້ອຍນ້ອງທັງຫລາຍ, ມັນ ບໍ່ເຄີຍ ເປັນແນວຄິດທີ່ດີຈັກເທື່ອ ທີ່ຈະຊັກຊ້າໃນການກັບໃຈຂອງທ່ານ. ຜູ້ປໍລະຈັກມັກໃຊ້ຄວາມຢ້ານກົວ ເພື່ອກີດກັນເຮົາຈາກການເຮັດທັນທີ ຕາມສັດທາຂອງເຮົາໃນພຣະເຢຊູຄຣິດ.
ເມື່ອຄົນທີ່ເຮົາຮັກໄດ້ຖືກແຈ້ງໃຫ້ຊາບເຖິງຄວາມຈິງ ກ່ຽວກັບການປະພຶດທີ່ເປັນບາບ, ຂະນະທີ່ເຂົາເຈົ້າຮູ້ສຶກເຈັບປວດຢ່າງໜັກ, ສ່ວນຫລາຍແລ້ວເຂົາເຈົ້າຢາກຊ່ວຍເຫລືອຜູ້ໄດ້ເຮັດບາບທີ່ກັບໃຈຢ່າງແທ້ຈິງ ແລະ ທີ່ຈະຄືນດີກັບພຣະເຈົ້າ. ແນ່ນອນທີ່ການປິ່ນປົວທາງວິນຍານຈະໄວຂຶ້ນ ເມື່ອຜູ້ໄດ້ເຮັດບາບສາລະພາບ ແລະ ຖືກຫຸ້ມລ້ອມດ້ວຍຜູ້ທີ່ຮັກເຂົາເຈົ້າ ແລະ ຊ່ວຍເຂົາເຈົ້າປະຖິ້ມບາບຂອງເຂົາເຈົ້າ. ຈົ່ງຈື່ຈຳວ່າ ພຣະເຢຊູຄຣິດຍິ່ງໃຫຍ່ ເພາະພຣະອົງປິ່ນປົວ ຜູ້ຮັບເຄາະຮ້າຍຈາກການບາບຂອງຄົນອື່ນນຳອີກ ທີ່ຫັນໄປຫາພຣະອົງ.13
ປະທານບອຍ ເຄ ແພ໊ກເກີ ໄດ້ກ່າວວ່າ: “ວິນຍານຂອງເຮົາໄດ້ຮັບຄວາມເສຍຫາຍ ເມື່ອເຮົາເຮັດຄວາມຜິດບາບ. ແຕ່ບໍ່ເໝືອນຮ່າງກາຍທາງເນື້ອໜັງຂອງເຮົາ ເມື່ອເຮົາໄດ້ກັບໃຈຮຽບຮ້ອຍແລ້ວ ເຮົາຈະບໍ່ມີບາດແຜຫລົງເຫລືອຢູ່ ຍ້ອນວ່າມີການຊົດໃຊ້ຂອງພຣະເຢຊູຄຣິດ. ຄຳສັນຍານັ້ນຄື: ຖ້າຜູ້ໃດກັບໃຈຈາກບາບຂອງເຂົາ, ເຂົາຈະໄດ້ຮັບການອະໄພໂທດ, ແລະ ພຣະຜູ້ເປັນເຈົ້າ, ຈະບໍ່ຈົດຈຳບາບນັ້ນອີກຕໍ່ໄປ [ເບິ່ງ Doctrine and Covenants 58:42].”14
ເມື່ອເຮົາກັບໃຈ “ດ້ວຍຈຸດປະສົງເຕັມທີ່ແຫ່ງໃຈ,”15 ໂດຍ “ທັນທີ ແລ້ວແຜນແຫ່ງການໄຖ່ທີ່ຍິ່ງໃຫຍ່ ຈະຖືກນຳມາ” ສູ່ຊີວິດຂອງເຮົາ.16 ພຣະຜູ້ຊ່ວຍໃຫ້ລອດຈະປິ່ນປົວເຮົາ.
ຄູ່ສອນສາດສະໜາ ແລະ ຝ່າຍແພດໝໍ ໄດ້ຊ່ວຍເຫລືອລູກຊາຍຂອງພວກເຮົາ ຕອນມີເສັ້ນເລືອດແຕກໃນສະໝອງ ຢູ່ສະໜາມເຜີຍແຜ່ຢ່າງໄວ. ລູກຊາຍຂອງພວກເຮົາໄດ້ເລືອກທີ່ຈະຮັບເອົາຢາທີ່ຊ່ວຍປິ່ນປົວ. ຜົນຈາກເສັ້ນເລືອດແຕກໃນສະໝອງ ທີ່ອາດເຮັດໃຫ້ລາວເປັນອຳມະພາດຕະຫລອດຊີວິດ ກໍໄດ້ຫາຍດີ. ເຊັ່ນດຽວກັນ, ເມື່ອເຮົານຳການຊົດໃຊ້ຂອງພຣະເຢຊູຄຣິດ ມາສູ່ຊີວິດຂອງເຮົາໄວຂຶ້ນເທົ່າໃດ, ເຮົາກໍຈະສາມາດປິ່ນປົວຜົນຂອງຄວາມຜິດບາບໄວຂຶ້ນເທົ່ານັ້ນ.
ປະທານຣະໂຊ ເອັມ ແນວສັນ ໄດ້ເຊື້ອເຊີນວ່າ: “ຖ້າຫາກທ່ານໄດ້ຍ່າງອອກໄປຈາກເສັ້ນທາງ, … ຂ້າພະເຈົ້າຂໍເຊື້ອເຊີນທ່ານ … ໃຫ້ທ່ານກັບມາ. ບໍ່ວ່າຄວາມເປັນຫ່ວງເປັນໃຍຂອງທ່ານ, ການທ້າທ້າຍຂອງທ່ານຈະເປັນແນວໃດກໍຕາມ, ແຕ່ຍັງມີບ່ອນສຳລັບທ່ານຢູ່, ຢູ່ໃນສາດສະໜາຈັກຂອງພຣະຜູ້ເປັນເຈົ້ານີ້. ທ່ານ ແລະ ເຊື້ອສາຍຂອງທ່ານທີ່ຍັງບໍ່ໄດ້ເກີດເທື່ອ ຈະໄດ້ຮັບພອນ ໂດຍການກະທຳຂອງທ່ານ ທີ່ຈະກັບຄືນມາຫາເສັ້ນທາງແຫ່ງພັນທະສັນຍາໃນເວລານີ້.”17
ການປິ່ນປົວທາງວິນຍານຂອງເຮົາ ຮຽກຮ້ອງເຮົາໃຫ້ຮັບເອົາເງື່ອນໄຂທີ່ພຣະຜູ້ຊ່ວຍໃຫ້ລອດໄດ້ກຳນົດໄວ້. ເຮົາບໍ່ຕ້ອງລໍຊ້າ! ເຮົາຕ້ອງເຮັດໃນມື້ນີ້! ຈົ່ງເຮັດດຽວນີ້ ເພື່ອວ່າໂຣກອຳມະພາດທາງວິນຍານຈະບໍ່ກີດກັນທ່ານ ຈາກຄວາມກ້າວໜ້ານິລັນດອນຂອງທ່ານ. ຂະນະທີ່ຂ້າພະເຈົ້າກ່າວຢູ່ນີ້, ຖ້າຫາກທ່ານຮູ້ສຶກຢາກຂໍໂທດກັບບາງຄົນ ທີ່ທ່ານໄດ້ເຮັດຜິດຕໍ່, ຂ້າພະເຈົ້າຂໍເຊື້ອເຊີນທ່ານໃຫ້ເຮັດ. ໃຫ້ບອກເຂົາເຈົ້າເຖິງສິ່ງທີ່ທ່ານໄດ້ເຮັດ. ຂໍໃຫ້ເຂົາເຈົ້າຍົກໂທດໃຫ້ທ່ານ. ຖ້າຫາກທ່ານໄດ້ເຮັດຄວາມຜິດບາບ ທີ່ກະທົບກະເທືອນຕໍ່ການມີຄ່າຄວນສຳລັບພຣະວິຫານ, ຂ້າພະເຈົ້າຂໍເຊື້ອເຊີນທ່ານໃຫ້ໄປລົມກັບອະທິການຂອງທ່ານ—ມື້ນີ້. ຢ່າລໍຊ້າ.
ອ້າຍເອື້ອຍນ້ອງຂອງຂ້າພະເຈົ້າ, ພຣະເຈົ້າເປັນພຣະບິດາຜູ້ສະຖິດຢູ່ໃນສະຫວັນທີ່ຊົງຮັກຂອງເຮົາ. ພຣະອົງໄດ້ປະທານອຳນາດ ແລະ ຄວາມຮູ້ທັງໝົດໃຫ້ບຸດທີ່ຮັກຂອງພຣະອົງ, ພຣະເຢຊູຄຣິດ. ເປັນເພາະພຣະອົງ, ມວນມະນຸດທັງປວງທີ່ມີການເຈັບປ່ວຍທາງຮ່າງກາຍໃດໆ ຈະໄດ້ຮັບການປິ່ນປົວໃຫ້ຫາຍດີຕະຫລອດການ ໃນມື້ໜຶ່ງ. ເປັນເພາະການຊົດໃຊ້ຂອງພຣະເຢຊູຄຣິດ, ຖ້າຫາກເຮົາເລືອກທີ່ຈະກັບໃຈ ແລະ ຫັນຫົວໃຈມາຫາພຣະຜູ້ຊ່ວຍໃຫ້ລອດຢ່າງເຕັມທີ່, ແລ້ວພຣະອົງຈະປິ່ນປົວເຮົາທາງວິນຍານ. ການປິ່ນປົວສາມາດເລີ່ມຕົ້ນໃນທັນທີ. ເຮົາສາມາດເລືອກໄດ້. ເຮົາຢາກຫາຍດີບໍ?
ຂ້າພະເຈົ້າເປັນພະຍານວ່າ ພຣະເຢຊູຄຣິດໄດ້ຈ່າຍຄ່າແລ້ວ ເພື່ອວ່າເຮົາຈະສາມາດຫາຍດີ. ແຕ່ເຮົາຕ້ອງເລືອກທີ່ຈະຮັບເອົາຫວ້ານຢານັ້ນທີ່ພຣະອົງໄດ້ສະເໜີມອບໃຫ້. ຈົ່ງຮັບເອົາການປິ່ນປົວໃນມື້ນີ້. ຢ່າລໍຊ້າ. ໃນພຣະນາມຂອງພຣະເຢຊູຄຣິດ, ອາແມນ.