ພຣະບິດາ

ໂດຍ ບຣາຍແອນ ເຄ ອັສຕັນ

ທີ່ປຶກສາທີສອງໃນຝ່າຍປະທານໂຮງຮຽນວັນອາທິດສາມັນ

ເຮົາແຕ່ລະຄົນມີສັກກະຍະພາບ ທີ່ຈະກາຍເປັນເໝືອນດັ່ງພຣະບິດາໄດ້. ໃນການເຮັດແນວນັ້ນ, ເຮົາຕ້ອງນະມັດສະການພຣະບິດາ ໃນພຣະນາມຂອງພຣະບຸດຂອງພຣະອົງ.

ຕະຫລອດຊີວິດຂອງນາງ ເມລິນດາ, ພັນລະຍາຂອງຂ້າພະເຈົ້າ ໄດ້ພະຍາຍາມເປັນສານຸສິດທີ່ຊື່ສັດຂອງພຣະເຢຊູຄຣິດ. ແຕ່, ຕອນນາງເປັນໄວລຸ້ນ, ນາງໄດ້ຮູ້ສຶກວ່ານາງບໍ່ມີຄ່າຄວນສຳລັບຄວາມຮັກ ແລະ ພອນຂອງພຣະບິດາເທິງສະຫວັນ ເພາະນາງບໍ່ເຂົ້າໃຈທຳມະຊາດຂອງພຣະອົງ. ໂຊກດີທີ່ ເມລິນດາ ໄດ້ສືບຕໍ່ຮັກສາພຣະບັນຍັດ ເຖິງແມ່ນວ່າ ນາງຮູ້ສຶກໂສກເສົ້າກໍຕາມ. ສອງສາມປີກ່ອນ, ນາງໄດ້ມີປະສົບການຫລາຍຢ່າງ ທີ່ຊ່ວຍນາງໃຫ້ເຂົ້າໃຈທຳມະຊາດຂອງພຣະເຈົ້າໄດ້ດີກວ່າເກົ່າ, ຮ່ວມທັງຄວາມຮັກຂອງພຣະອົງທີ່ມີຕໍ່ລູກໆຂອງພຣະອົງ ແລະ ພຣະອົງປາບປື້ມທີ່ເຮົາພະຍາຍາມ, ເຖິງແມ່ນຈະບໍ່ດີພ້ອມ, ເພື່ອເຮັດວຽກງານຂອງພຣະອົງ.

ນາງອະທິບາຍເຖິງສິ່ງທີ່ມີອິດທິພົນຕໍ່ນາງຫລາຍ ດັ່ງນີ້: “ຕອນນີ້ ນ້ອງເຊື່ອແທ້ໆວ່າ ແຜນຂອງພຣະບິດາໄດ້ຜົນອີ່ຫລີ, ວ່າພຣະອົງທຸ້ມເທໃສ່ກັບຄວາມສຳເລັດຜົນຂອງເຮົາ, ແລະ ວ່າພຣະອົງຈັດຕຽມບົດຮຽນ ແລະ ປະສົບການທີ່ຈຳເປັນໄວ້ໃຫ້ເຮົາ ເພື່ອເຮົາຈະສາມາດກັບຄືນໄປຫາທີ່ປະທັບຂອງພຣະອົງ. ນ້ອງເຫັນຕົວເອງ ແລະ ເຫັນຄົນອື່ນ ຫລາຍກວ່າເກົ່າ ຄືກັນກັບທີ່ພຣະເຈົ້າເຫັນເຮົາ. ນ້ອງສາມາດເປັນແມ່, ສິດສອນ, ແລະ ຮັບໃຊ້ດ້ວຍຄວາມຮັກຫລາຍຂຶ້ນ ແລະ ຢ້ານກົວໜ້ອຍລົງ. ນ້ອງຮູ້ສຶກສະຫງົບ ແລະ ໝັ້ນໃຈ ແທນທີ່ຈະກັງວົນ ແລະ ບໍ່ແນ່ນອນໃຈ. ແທນທີ່ຈະຮູ້ສຶກວ່າຕົວເອງຖືກຕັດສິນ, ແຕ່ນ້ອງຮູ້ສຶກໄດ້ຮັບການສະໜັບສະໜູນ. ນ້ອງມີສັດທາທີ່ແນ່ນອນກວ່າເກົ່າ. ນ້ອງຮູ້ສຶກເຖິງຄວາມຮັກຂອງພຣະບິດາເລື້ອຍໆ ແລະ ເລິກຊຶ້ງຫລາຍຂຶ້ນ.”¹

ການມີ “ແນວຄິດ ທີ່ຖືກຕ້ອງ ກ່ຽວກັບລັກສະນະ, ຄວາມດີພ້ອມ, ແລະ ຄຸນສົມບັດ [ຂອງພຣະບິດາເທິງສະຫວັນ],” ເປັນສິ່ງສຳຄັນຕໍ່ການໃຊ້ສັດທາທີ່ພຽງພໍ ທີ່ຈະຮັບເອົາຄວາມສູງສົ່ງ.² ຄວາມເຂົ້າໃຈທີ່ຖືກຕ້ອງກ່ຽວກັບລັກສະນະຂອງພຣະບິດາເທິງສະຫວັນ ສາມາດປ່ຽນວິທີທີ່ເຮົາເຫັນຕົວເອງ ແລະ ເຫັນຄົນອື່ນ ແລະ ຊ່ວຍເຮົາໃຫ້ເຂົ້າໃຈຄວາມຮັກອັນລົ້ນເຫລືອຂອງພຣະເຈົ້າ ທີ່ມີຕໍ່ລູກໆຂອງພຣະອົງ ແລະ ພຣະປະສົງທີ່ຍິ່ງໃຫຍ່ຂອງພຣະອົງຄື ທີ່ຈະຊ່ວຍເຮົາໃຫ້ກາຍເປັນເໝືອນດັ່ງພຣະອົງ. ການເບິ່ງໃນທາງທີ່ຜິດ ກ່ຽວກັບທຳມະຊາດຂອງພຣະອົງ ສາມາດເຮັດໃຫ້ເຮົາຮູ້ສຶກວ່າ ເຮົາບໍ່ສາມາດກັບຄືນໄປຫາທີ່ປະທັບຂອງພຣະອົງໄດ້.

ຈຸດປະສົງຂອງຂ້າພະເຈົ້າໃນມື້ນີ້ ແມ່ນທີ່ຈະສອນຫລັກທຳຂໍ້ສຳຄັນ ກ່ຽວກັບພຣະບິດາ ທີ່ຈະຊ່ວຍເຮົາແຕ່ລະຄົນ, ໂດຍສະເພາະຜູ້ທີ່ສົງໄສວ່າ ພຣະອົງຮັກເຂົາເຈົ້າຫລືບໍ່, ໃຫ້ເຂົ້າໃຈຫລາຍຂຶ້ນເຖິງລັກສະນະທີ່ແທ້ຈິງຂອງພຣະອົງ ແລະ ໃຊ້ສັດທາຫລາຍຂຶ້ນໃນພຣະອົງ, ໃນພຣະບຸດຂອງພຣະອົງ, ແລະ ໃນແຜນທີ່ພຣະອົງມີໄວ້ເພື່ອເຮົາ.

ຊີວິດກ່ອນມະຕະ

ໃນໂລກກ່ອນມະຕະ, ເຮົາໄດ້ເກີດມາເປັນວິນຍານນຳ ພຣະບິດາມານດາ ໃນສະຫວັນ ແລະ ໄດ້ຢູ່ກັບພວກພຣະອົງ ເປັນຄອບຄົວ.³ ພວກພຣະອົງຮູ້ຈັກເຮົາ, ໄດ້ສິດສອນເຮົາ, ແລະ ຮັກເຮົາ.⁴ ພວກເຮົາຢາກເປັນເໝືອນດັ່ງພຣະບິດາເທິງສະຫວັນຂອງເຮົາຫລາຍທີ່ສຸດ. ແຕ່ກ່ອນຈະເປັນໄດ້, ເຮົາຕ້ອງຮັບຮູ້ວ່າ ເຮົາຈະຕ້ອງ:

ມີຮ່າງກາຍທີ່ເປັນເນື້ອໜັງ, ມີລັດສະໝີ, ແລະ ອະມະຕະ;⁵
ໄດ້ແຕ່ງງານ ແລະ ມີຄອບຄົວ ໂດຍອຳນາດແຫ່ງການຜະນຶກຂອງຖານະປະໂລຫິດ;⁶ ແລະ
ມີຄວາມຮູ້, ອຳນາດ, ແລະ ລັກສະນະທີ່ສູງສົ່ງທັງໝົດ.⁷

ໃນທີ່ສຸດ, ພຣະບິດາໄດ້ສ້າງແຜນ ທີ່ອະນຸຍາດໃຫ້ເຮົາຮັບເອົາເງື່ອນໄຂບາງຢ່າງ⁸ ເພື່ອຈະໄດ້ຮັບຮ່າງກາຍທີ່ມີເນື້ອໜັງ ທີ່ຈະກາຍເປັນອະມະຕະ ແລະ ມີລັດສະໝີພາບ ໃນການຟື້ນຄືນຊີວິດ; ແຕ່ງງານ ແລະ ມີຄອບຄົວ ຢູ່ໃນຊ່ວງມະຕະ ຫລື, ສຳລັບຜູ້ຊື່ສັດ ທີ່ບໍ່ໄດ້ມີໂອກາດນີ້, ຫລັງຈາກຄວາມເປັນມະຕະ;⁹ ຈະກ້າວໜ້າໄປສູ່ຄວາມດີພ້ອມ; ແລະ ໃນທີ່ສຸດ ກັບຄືນໄປຫາພຣະບິດາມານດາແຫ່ງສະຫວັນຂອງເຮົາ ແລະ ຢູ່ກັບພວກພຣະອົງ ແລະ ຄອບຄົວຂອງເຮົາ ໃນສະພາບທີ່ສູງສົ່ງ ແລະ ມີຄວາມສຸກຊົ່ວນິລັນດອນ.¹⁰

ພຣະຄຳພີເອີ້ນສິ່ງນີ້ວ່າ ແຜນແຫ່ງຄວາມລອດ.¹¹ ເຮົາມີຄວາມກະຕັນຍູຫລາຍ ສຳລັບແຜນນີ້ ທີ່ເມື່ອຖືກນຳສະເໜີຕໍ່ເຮົາ, ເຮົາໄດ້ຮ້ອງຂຶ້ນດ້ວຍຄວາມຊື່ນຊົມ.¹² ເຮົາແຕ່ລະຄົນໄດ້ຮັບເອົາເງື່ອນໄຂທີ່ຢູ່ໃນແຜນ, ຮ່ວມທັງປະສົບການ ແລະ ການທ້າທາຍຂອງຄວາມເປັນມະຕະ ທີ່ຈະຊ່ວຍເຮົາພັດທະນາຄຸນສົມບັດທີ່ສູງສົ່ງໄດ້.¹³

ຊີວິດມະຕະ

ລະຫວ່າງຊ່ວງມະຕະ, ພຣະບິດາເທິງສະຫວັນໄດ້ຈັດຕຽມເງື່ອນໄຂທີ່ເຮົາຕ້ອງການ ສຳລັບຄວາມກ້າວໜ້າ ໄວ້ໃນແຜນຂອງພຣະອົງ. ພຣະອົງມີພຣະເຢຊູຄຣິດໃນເນື້ອໜັງ¹⁴ ແລະ ໄດ້ຈັດຕຽມຄວາມຊ່ວຍເຫລືອຈາກສະຫວັນໃຫ້ພຣະອົງ ເພື່ອຊ່ວຍພຣະອົງບັນລຸພາລະກິດຂອງພຣະອົງຢູ່ໃນຊ່ວງມະຕະ. ພຣະບິດາເທິງສະຫວັນກໍຈະຊ່ວຍເຮົາແຕ່ລະຄົນຄືກັນ ຖ້າຫາກເຮົາຈະພະຍາຍາມຮັກສາພຣະບັນຍັດຂອງພຣະອົງ.¹⁵ ພຣະບິດາປະທານອຳເພີໃຈໃຫ້ເຮົາ.¹⁶ ຊີວິດຂອງເຮົາຢູ່ໃນພຣະຫັດຂອງພຣະອົງ, ແລະ ວັນເວລາຂອງເຮົາໄດ້ຖືກຮັບຮູ້ ແລະ ຈະບໍ່ຖືກນັບໃຫ້ໜ້ອຍລົງ.¹⁷ ແລະ ພຣະອົງໃຫ້ເຮົາແນ່ໃຈໄດ້ວ່າ ໃນທີ່ສຸດທຸກສິ່ງຈະທຳງານດ້ວຍກັນ ເພື່ອຄວາມດີສຳລັບຜູ້ທີ່ຮັກພຣະອົງ.¹⁸

ແມ່ນພຣະບິດາເທິງສະຫວັນ ທີ່ລ້ຽງດູເຮົາທຸກວັນ,¹⁹ ຮ່ວມທັງອາຫານທີ່ເຮົາກິນ ແລະ ກຳລັງທີ່ເຮົາຕ້ອງການ ເພື່ອຮັກສາພຣະບັນຍັດຂອງພຣະອົງ.²⁰ ພຣະບິດາມອບຂອງປະທານທີ່ດີໃຫ້ເຮົາ.²¹ ພຣະອົງຮັບຟັງ ແລະ ຕອບຄຳອະທິຖານຂອງເຮົາ.²² ພຣະບິດາເທິງສະຫວັນປົດປ່ອຍເຮົາຈາກຄວາມຊົ່ວຮ້າຍ ເມື່ອເຮົາໃຫ້ພຣະອົງຊ່ວຍເຫລືອ.²³ ພຣະອົງກັນແສງແທນເຮົາ ຕອນເຮົາຮັບທຸກທໍລະມານ.²⁴ ໃນທີ່ສຸດ, ພອນຂອງເຮົາທັງໝົດຈະມາຈາກພຣະບິດາ.²⁵

ພຣະບິດາເທິງສະຫວັນນຳພາເຮົາ ແລະ ມອບປະສົບການ ທີ່ເຮົາຕ້ອງການໃຫ້ເຮົາ ອີງຕາມກຳລັງ, ຄວາມອ່ອນແອ, ແລະ ການເລືອກຂອງເຮົາ ເພື່ອວ່າເຮົາຈະເກີດຜົນດີ.²⁶ ພຣະບິດາຕີສອນເຮົາ ເມື່ອຈຳເປັນ ເພາະພຣະອົງຮັກເຮົາ.²⁷ ພຣະອົງເປັນ ພຣະຜູ້ປຶກສາ,²⁸ ຜູ້ຈະປຶກສາຫາລືກັບເຮົາ ຖ້າເຮົາສະແຫວງຫາ.²⁹

ແມ່ນພຣະບິດາເທິງສະຫວັນ ຜູ້ສົ່ງທັງອິດທິພົນ ແລະ ຂອງປະທານແຫ່ງພຣະວິນຍານບໍລິສຸດ ມາສູ່ຊີວິດເຮົາ.³⁰ ຜ່ານທາງຂອງປະທານແຫ່ງພຣະວິນຍານບໍລິສຸດ, ລັດສະໝີພາບ—ຫລື ຄວາມຮູ້ແຈ້ງ, ຄວາມສະຫວ່າງ, ແລະ ອຳນາດ—ຂອງພຣະບິດາສາມາດສະຖິດຢູ່ໃນເຮົາ.³¹ ຖ້າຫາກເຮົາຈະພະຍາຍາມມີຄວາມສະຫວ່າງ ແລະ ຄວາມຈິງຫລາຍຂຶ້ນ ຈົນກວ່າດວງຕາຂອງເຮົາເຫັນແກ່ລັດສະໝີພາບຂອງພຣະເຈົ້າແຕ່ຢ່າງດຽວ, ແລ້ວພຣະບິດາເທິງສະຫວັນ ຈະສົ່ງພຣະວິນຍານສັກສິດແຫ່ງຄຳສັນຍາມາຜະນຶກເຮົາ ເຂົ້າໃນຊີວິດນິລັນດອນ ແລະ ເປີດເຜີຍພຣະພັກຂອງພຣະອົງໃຫ້ເຮົາເຫັນ—ຖ້າບໍ່ແມ່ນໃນຊີວິດນີ້ ກໍຈະເປັນໃນຊີວິດໜ້າ.³²

ຊີວິດຫລັງຈາກມະຕະ

ໃນໂລກວິນຍານຫລັງຈາກມະຕະ, ພຣະບິດາເທິງສະຫວັນໄດ້ສືບຕໍ່ສົ່ງພຣະວິນຍານບໍລິສຸດໄປ ແລະ ສົ່ງຜູ້ສອນສາດສະໜາໄປຫາຜູ້ທີ່ຕ້ອງການພຣະກິດຕິຄຸນ. ພຣະອົງຕອບຄຳອະທິຖານ ແລະ ຊ່ວຍເຫລືອຜູ້ທີ່ຍັງບໍ່ໄດ້ຮັບພິທີການ ໃຫ້ໄດ້ຮັບເອົາພິທີການ ກະທຳແທນທີ່ຊ່ວຍໃຫ້ລອດ.³³

ພຣະບິດາໄດ້ຍົກພຣະເຢຊູຄຣິດຂຶ້ນ ແລະ ມອບອຳນາດໃຫ້ພຣະອົງ ເພື່ອເຮັດໃຫ້ເກີດການຟື້ນຄືນຊີວິດ,³⁴ ຊຶ່ງເປັນວິທີທີ່ເຮົາຈະໄດ້ຮັບຮ່າງກາຍທີ່ເປັນອະມະຕະ. ການໄຖ່ ແລະ ການຟື້ນຄືນພຣະຊົນຂອງພຣະຜູ້ຊ່ວຍໃຫ້ລອດ ຈະພາເຮົາກັບຄືນສູ່ທີ່ປະທັບຂອງພຣະບິດາ, ບ່ອນທີ່ເຮົາຈະໄດ້ຖືກຕັດສິນໂດຍພຣະເຢຊູຄຣິດ.³⁵

ຜູ້ທີ່ເພິ່ງອາໄສ “ພຣະຄຸນຄວາມດີ, ແລະ ພຣະເມດຕາ, ແລະ ພຣະຄຸນຂອງພຣະເມຊີອາຜູ້ບໍລິສຸດ”³⁶ ຈະໄດ້ຮັບຮ່າງກາຍທີ່ມີລັດສະໝີພາບ ຄືກັນກັບພຣະບິດາ³⁷ ແລະ ຢູ່ກັບພຣະອົງ “ໃນສະພາບແຫ່ງຄວາມສຸກທີ່ບໍ່ມີວັນສິ້ນສຸດ.”³⁸ ຢູ່ທີ່ນັ້ນ, ພຣະບິດາຈະເຊັດນ້ຳຕາທຸກຢົດຂອງເຮົາ³⁹ ແລະ ຊ່ວຍເຮົາໃຫ້ສືບຕໍ່ໃນການເດີນທາງຂອງເຮົາ ທີ່ຈະກາຍເປັນເໝືອນດັ່ງພຣະອົງ.

ດັ່ງທີ່ທ່ານສາມາດເຫັນ, ພຣະບິດາເທິງສະຫວັນ ຈະຊ່ວຍເຫລືອເຮົາສະເໝີ.⁴⁰

ລັກສະນະຂອງພຣະບິດາ

ກ່ອນຈະກາຍເປັນເໝືອນດັ່ງພຣະບິດາໄດ້ນັ້ນ, ເຮົາຕ້ອງພັດທະນາໃຫ້ມີລັກສະນະເໝືອນພຣະອົງເສຍກ່ອນ. ຄວາມດີພ້ອມ ແລະ ຄຸນສົມບັດຂອງພຣະບິດາເທິງສະຫວັນ ແມ່ນຮ່ວມທັງ ສິ່ງດັ່ງຕໍ່ໄປນີ້:

ພຣະບິດາ “ບໍ່ມີທີ່ສຸດ ແລະ ເປັນນິລັນດອນ.”⁴¹
ພຣະອົງທ່ຽງທຳ, ເມດຕາ, ກະລຸນາ, ອົດທົນໄດ້ດົນນານທີ່ສຸດ, ແລະ ປະສົງໃຫ້ເຮົາໄດ້ຮັບແຕ່ສິ່ງທີ່ດີທີ່ສຸດເທົ່ານັ້ນ.⁴²
ພຣະບິດາເທິງສະຫວັນຄືຄວາມຮັກ.⁴³
ພຣະອົງຮັກສາພັນທະສັນຍາຂອງພຣະອົງ.⁴⁴
ພຣະອົງບໍ່ປ່ຽນແປງ.⁴⁵
ພຣະອົງບໍ່ສາມາດຕົວະ.⁴⁶
ພຣະບິດາບໍ່ເລືອກໜ້າຜູ້ໃດ.⁴⁷
ພຣະອົງຮູ້ທຸກສິ່ງ—ໃນອະດີດ, ປະຈຸບັນ, ແລະ ອະນາຄົດ—ຈາກການເລີ່ມຕົ້ນ.⁴⁸
ພຣະບິດາເທິງສະຫວັນມີຄວາມຮູ້ແຈ້ງຫລາຍກວ່າ⁴⁹ ເຮົາທຸກຄົນ.⁵⁰
ພຣະບິດາມີອຳນາດທັງໝົດ⁵¹ ແລະ ກະທຳທຸກສິ່ງທີ່ພຣະອົງຕັ້ງພຣະໄທທີ່ຈະກະທຳ.⁵²

ອ້າຍເອື້ອຍນ້ອງທັງຫລາຍ, ເຮົາສາມາດໄວ້ວາງໃຈໃນພຣະອົງ ແລະ ເພິ່ງອາໄສພຣະອົງ. ເພາະພຣະອົງມີມຸມມອງແຫ່ງນິລັນດອນ, ພຣະບິດາເທິງສະຫວັນສາມາດເຫັນສິ່ງທີ່ເຮົາບໍ່ສາມາດເຫັນ. ຄວາມສຸກ, ວຽກງານ, ແລະ ລັດສະໝີພາບຂອງພຣະອົງ ຄືການເຮັດໃຫ້ເກີດຄວາມເປັນອະມະຕະ ແລະ ຄວາມສູງສົ່ງ.⁵³ ທຸກສິ່ງທີ່ພຣະອົງກະທຳແມ່ນເພື່ອຜົນປະໂຫຍດຂອງເຮົາ. ພຣະອົງ “ປະສົງໃຫ້ [ເຮົາ] ມີຄວາມສຸກ ຫລາຍກວ່າທີ່ [ເຮົາ] ປາດຖະໜາ.”⁵⁴ ແລະ ພຣະອົງ “ຈະບໍ່ຮຽກຮ້ອງ [ເຮົາ] ໃຫ້ປະສົບກັບເວລາທີ່ຫຍຸ້ງຍາກຫລາຍເກີນກວ່າ ທີ່ [ເຮົາ] ຕ້ອງການ ສຳລັບຜົນປະໂຫຍດຂອງເຮົາ ຫລື ສຳລັບຜູ້ທີ່ [ເຮົາ] ຮັກ.”⁵⁵ ຜົນກໍຄື, ພຣະອົງເອົາໃຈໃສ່ກັບການຊ່ວຍເຮົາໃຫ້ກ້າວໜ້າ, ບໍ່ແມ່ນພຽງແຕ່ຕັດສິນ ແລະ ກ່າວໂທດເຮົາເທົ່ານັ້ນ.⁵⁶

ການກາຍເປັນເໝືອນດັ່ງພຣະບິດາຂອງເຮົາ

ໃນຖານະບຸດ ແລະ ທິດາທາງວິນຍານຂອງພຣະເຈົ້າ, ເຮົາແຕ່ລະຄົນມີສັກກະຍະພາບ ທີ່ຈະກາຍເປັນເໝືອນດັ່ງພຣະບິດາໄດ້. ໃນການເຮັດແນວນັ້ນ, ເຮົາຕ້ອງນະມັດສະການພຣະບິດາ ໃນພຣະນາມຂອງພຣະບຸດຂອງພຣະອົງ.⁵⁷ ເຮົາເຮັດສິ່ງນີ້ໂດຍການພະຍາຍາມທີ່ຈະເຊື່ອຟັງຕາມພຣະປະສົງຂອງພຣະບິດາ, ຄືກັນກັບພຣະຜູ້ຊ່ວຍໃຫ້ລອດ,⁵⁸ ແລະ ໂດຍການສືບຕໍ່ທີ່ຈະກັບໃຈ.⁵⁹ ເມື່ອເຮົາເຮັດສິ່ງເຫລົ່ານີ້, ເຮົາ “ຈະຮັບເອົາພຣະຄຸນເພື່ອພຣະຄຸນ⁶⁰ ແລະ ໄດ້ຮັບ “ລັກສະນະ, ຄວາມດີພ້ອມ, ແລະ ຄຸນສົມບັດຂອງພຣະອົງ.”⁶¹

ຄວາມຫ່າງໄກລະຫວ່າງສິ່ງທີ່ເຮົາເປັນໃນຖານະມະຕະ ແລະ ສິ່ງທີ່ພຣະບິດາເທິງສະຫວັນໄດ້ກາຍເປັນ, ບໍ່ແປກໃຈເລີຍທີ່ບາງຄົນຮູ້ສຶກວ່າ ການກາຍເປັນເໝືອນດັ່ງພຣະບິດາ ແມ່ນເອື້ອມບໍ່ເຖິງ. ເຖິງຢ່າງໃດກໍຕາມ, ພຣະຄຳພີບອກຢ່າງແຈ່ມແຈ້ງ. ຖ້າຫາກເຮົາຍຶດໝັ້ນຢູ່ໃນສັດທາຕໍ່ພຣະຄຣິດ, ກັບໃຈ, ແລະ ສະແຫວງຫາພຣະຄຸນຂອງພຣະເຈົ້າ ຜ່ານທາງການເຊື່ອຟັງ, ໃນທີ່ສຸດເຮົາຈະກາຍເປັນເໝືອດັ່ງພຣະບິດາໄດ້. ຂ້າພະເຈົ້າອົບອຸ່ນໃຈ ໃນຄວາມຈິງທີ່ວ່າ ຜູ້ທີ່ພະຍາຍາມເຊື່ອຟັງ ຈະ “ໄດ້ຮັບ ພຣະຄຸນເພື່ອພຣະຄຸນ” ແລະ ໃນທີ່ສຸດ “ໄດ້ຮັບ ຄວາມບໍລິບູນຂອງພຣະອົງ.”⁶² ໃນອີກຄຳໜຶ່ງ, ເຮົາຈະບໍ່ກາຍເປັນເໝືອນດັ່ງພຣະບິດາ ດ້ວຍຕົວເຮົາເອງ.⁶³ ແຕ່ມັນຈະມາເຖິງຜ່ານທາງຂອງປະທານແຫ່ງພຣະຄຸນ, ບາງເທື່ອກໍໃຫຍ່ ແຕ່ສ່ວນຫລາຍ ຈະນ້ອຍໆ, ທີ່ຈະສ້າງຕໍ່ໆກັນຂຶ້ນ ຈົນເຮົາມີຄົບບໍລິບູນ. ແຕ່, ອ້າຍເອື້ອຍນ້ອງທັງຫລາຍ, ມັນຈະມາເຖິງ!

ຂ້າພະເຈົ້າເຊື້ອເຊີນທ່ານໃຫ້ໄວ້ວາງໃຈວ່າ ພຣະບິດາເທິງສະຫວັນຮູ້ວິທີທີ່ຈະຊ່ວຍເຮົາໃຫ້ໄດ້ຮັບຄວາມສູງສົ່ງ; ຈົ່ງສະແຫວງຫາພຣະອົງທຸກວັນ, ຂໍຄວາມຊ່ວຍເຫລືອ, ແລະ ດຳເນີນໄປໜ້າ ດ້ວຍສັດທາໃນພຣະຄຣິດ ແມ່ນແຕ່ຕອນທີ່ທ່ານບໍ່ສາມາດຮູ້ສຶກເຖິງຄວາມຮັກຂອງພຣະເຈົ້າກໍຕາມ.

ມີຫລາຍສິ່ງທີ່ເຮົາບໍ່ເຂົ້າໃຈ ກ່ຽວກັບການກາຍເປັນເໝືອນດັ່ງພຣະບິດາ.⁶⁴ ແຕ່ຂ້າພະເຈົ້າສາມາດເປັນພະຍານໄດ້ ດ້ວຍຄວາມແນ່ນອນໃຈວ່າ ການພະຍາຍາມທີ່ຈະກາຍເປັນເໝືອນດັ່ງພຣະບິດາ ແມ່ນກຸ້ມຄ່າທີ່ຈະເສຍສະລະທຸກສິ່ງ.⁶⁵ ການເສຍສະລະທີ່ເຮົາເຮັດຢູ່ນີ້ ໃນຊ່ວງມະຕະ, ບໍ່ສຳຄັນວ່າມັນໃຫຍ່ໂຕພຽງໃດ, ແຕ່ມັນຈະເປັນຄວາມຊື່ນຊົມ, ຄວາມສຸກ, ແລະ ຄວາມຮັກທີ່ຫາອັນປຽບບໍ່ໄດ້, ທີ່ເຮົາຈະຮູ້ສຶກຢູ່ໃນທີ່ປະທັບຂອງພຣະເຈົ້າ.⁶⁶ ຖ້າຫາກທ່ານຍາກທີ່ຈະເຊື່ອ ມັນກຸ້ມຄ່າທີ່ຈະເສຍສະລະ ຕາມທີ່ທ່ານຖືກຂໍຮ້ອງໃຫ້ເຮັດ, ພຣະຜູ້ຊ່ວຍໃຫ້ລອດກ່າວວ່າ, ທ່ານຍັງບໍ່ເຂົ້າໃຈພອນອັນຍິ່ງໃຫຍ່ທີ່ພຣະບິດາມີໃນພຣະຫັດຂອງພຣະອົງ ແລະ … ຕຽມໄວ້ໃຫ້ທ່ານເທື່ອ; … ທ່ານບໍ່ສາມາດທົນກັບທຸກສິ່ງທັງປວງໄດ້ໃນຕອນນີ້; ເຖິງຢ່າງໃດກໍຕາມ, ຈົ່ງເບີກບານເຖີດ, ເພາະພຣະອົງຈະນຳພາທ່ານໄປ.⁶⁷

ຂ້າພະເຈົ້າເປັນພະຍານວ່າ ພຣະບິດາເທິງສະຫວັນຂອງທ່ານຮັກ ທ່ານ ແລະ ປະສົງໃຫ້ທ່ານ ກັບຄືນໄປຢູ່ກັບພຣະອົງອີກ. ໃນພຣະນາມຂອງພຣະເຢຊູຄຣິດ, ອາແມນ.