ຮວບຮວມສິ່ງສາລະພັດໄວ້ໃນພຣະຄຣິດ
ພະລັງຂອງພຣະກິດຕິຄຸນຂອງພຣະຜູ້ຊ່ວຍໃຫ້ລອດ ທີ່ຈະປ່ຽນແປງ ແລະ ເປັນພອນແກ່ເຮົາ ຈະມາຈາກການຫລິງເຫັນ ແລະ ການນຳໃຊ້ຄຳສອນ, ຫລັກທຳ, ແລະ ການປະຕິບັດທີ່ກ່ຽວພັນກັນເຫລົ່ານັ້ນ.
ເຊືອກເປັນເຄື່ອງມືທີ່ສຳຄັນ ຊຶ່ງເຮົາທຸກຄົນຮູ້ຈັກດີ. ເຊືອກຖືກສ້າງຂຶ້ນຈາກເສັ້ນດ້າຍ, ພືດ, ເຫລັກ, ຫລື ວັດຖຸຢ່າງອື່ນ ທີ່ແຕ່ລະເສັ້ນຖືກກ້ຽວພັນ ຫລື ຖັກເປັຍເຂົ້າກັນ. ສິ່ງທີ່ໜ້າສົນໃຈກໍຄື, ວັດຖຸທຳມະດາ ສາມາດຖືກສານຕໍ່ເຂົ້າກັນ ແລະ ກາຍເປັນສິ່ງທີ່ໝັ້ນໜຽວແບບພິເສດໄດ້. ດັ່ງນັ້ນ, ການເຊື່ອມຕໍ່ ແລະ ການຜູກມັດວັດຖຸທຳມະດາເຂົ້າກັນ ສາມາດຜະລິດເປັນເຄື່ອງມືທີ່ຍອດຍ້ຽມໄດ້.
ດັ່ງທີ່ເຊືອກໄດ້ຮັບພະລັງຂອງມັນຈາກເສັ້ນດ້າຍຫລາຍໆເສັ້ນທີ່ກ້ຽວພັນເຂົ້າກັນ, ພຣະກິດຕິຄຸນຂອງພຣະເຢຊູຄຣິດ ກໍໃຫ້ມຸມມອງທີ່ຍິ່ງໃຫຍ່ທີ່ສຸດ ເຖິງຄວາມຈິງ ແລະ ໃຫ້ພອນທີ່ດີເລີດທີ່ສຸດ ເມື່ອເຮົາເອົາໃຈໃສ່ຕໍ່ຄຳແນະນຳຂອງໂປໂລ ທີ່ຈະ “ຮວບຮວມສິ່ງສາລະພັດເຂົ້າກັນ ທັງມີຢູ່ໃນຟ້າສະຫວັນ ແລະ ແຜ່ນດິນໂລກໄວ້ໃນພຣະຄຣິດ.”1 ສິ່ງທີ່ສຳຄັນກໍຄື, ການຮວບຮວມຄວາມຈິງທີ່ສຳຄັນນີ້ ແມ່ນສຸມໃສ່ ແລະ ເຈາະຈົງໃສ່ອົງພຣະເຢຊູຄຣິດເຈົ້າ ເພາະພຣະອົງ “ເປັນທາງນັ້ນ, ເປັນຄວາມຈິງ, ແລະ ເປັນຊີວິດ.”2
ຂ້າພະເຈົ້າອະທິຖານວ່າ ພຣະວິນຍານບໍລິສຸດ ຈະໃຫ້ຄວາມຮູ້ແກ່ເຮົາແຕ່ລະຄົນ ຂະນະທີ່ເຮົາພິຈາລະນາຫລັກທຳແຫ່ງ ການຮວບຮວມສິ່ງສາລະພັດໄວ້ໃນພຣະຄຣິດ ວ່າມັນກ່ຽວຂ້ອງກັບເຮົາແນວໃດ ເພື່ອຈະຮຽນຮູ້ ແລະ ດຳລົງຊີວິດຕາມພຣະກິດຕິຄຸນທີ່ຖືກຟື້ນຟູ ໃນຊີວິດປະຈຳວັນຂອງເຮົາ.
ວັນເວລາແຫ່ງການເປີດເຜີຍ
ເຮົາມີຊີວິດຢູ່ໃນວັນເວລາແຫ່ງການເປີດເຜີຍທີ່ໜ້າອັດສະຈັນໃຈ ຂອງສາດສະໜາຈັກຂອງພຣະເຢຊູຄຣິດທີ່ຖືກຟື້ນຟູ. ການປະກາດໃນມື້ນີ້ ເຖິງການດັດແປງແຫ່ງປະຫວັດສາດ ມີພຽງຄວາມມຸ້ງໝາຍດຽວທີ່ກວມທັງໝົດ: ຄືການເສີມສັດທາໃນພຣະບິດາເທິງສະຫວັນ ແລະ ແຜນຂອງພຣະອົງ ແລະ ໃນພຣະບຸດຂອງພຣະອົງ ພຣະເຢຊູຄຣິດ ແລະ ການຊົດໃຊ້ຂອງພຣະອົງ. ຕາຕະລາງການປະຊຸມໃນວັນອາທິດ ບໍ່ແມ່ນຖືກຕັດໃຫ້ສັ້ນລົງຊື່ໆ. ແຕ່ບັດນີ້ ພວກເຮົາໄດ້ເພີ່ມໂອກາດ ແລະ ໜ້າທີ່ຮັບຜິດຊອບ ໃຫ້ແກ່ບຸກຄົນ ແລະ ຄອບຄົວ ເພື່ອໃຊ້ເວລາໃນການສົ່ງເສີມວັນຊະບາໂຕ ໃຫ້ມີຄວາມສຸກ ຢູ່ທີ່ບ້ານ ແລະ ຢູ່ທີ່ໂບດ.
ເດືອນເມສາຜ່ານມານີ້, ການຈັດຕັ້ງໃນກຸ່ມຖານະປະໂລຫິດ ບໍ່ແມ່ນພຽງແຕ່ເປັນການປ່ຽນແປງເທົ່ານັ້ນ. ແຕ່ການເນັ້ນໜັກ ແລະ ພະລັງໄດ້ຖືກມອບໃຫ້ ໃນວິທີທີ່ສູງກວ່າ ແລະ ສັກສິດກວ່າ ເຖິງການປະຕິບັດສາດສະໜາກິດຕໍ່ອ້າຍເອື້ອຍນ້ອງຂອງເຮົາ.
ຄືກັນກັບເສັ້ນດ້າຍທີ່ຖືກຖັກເປຍເຂົ້າກັນເປັນເຊືອກ ໄດ້ກາຍເປັນເຄື່ອງມືທີ່ມີພະລັງ ແລະ ທົນທານ, ການກະທຳທັງໝົດທີ່ກ່ຽວພັນກັນນີ້ ກໍເປັນພາກສ່ວນຂອງຄວາມພະຍາຍາມອັນເປັນໜຶ່ງ ເພື່ອຈັດຄວາມເອົາໃຈໃສ່, ແຫລ່ງຊ່ວຍເຫລືອ, ແລະ ວຽກງານຂອງສາດສະໜາຈັກຂອງພຣະຜູ້ຊ່ວຍໃຫ້ລອດ ທີ່ຖືກຟື້ນຟູ ພ້ອມດ້ວຍພາລະກິດຕົ້ນຕໍ ໃຫ້ດີກວ່າເກົ່າ: ທີ່ຈະຊ່ວຍເຫລືອພຣະເຈົ້າໃນວຽກງານຂອງພຣະອົງ ເພື່ອນຳຄວາມລອດ ແລະ ຄວາມສູງສົ່ງມາສູ່ລູກໆຂອງພຣະອົງ. ກະລຸນາຢ່າເອົາໃຈໃສ່ພຽງແຕ່ຄິດຫາທາງເພື່ອລົງມືປະຕິບັດເທົ່ານັ້ນ ຕາມທີ່ໄດ້ປະກາດ. ເຮົາບໍ່ຄວນປ່ອຍໃຫ້ປີກຍ່ອຍເລື່ອງການປະຕິບັດ ມາປິດບັງເຫດຜົນທາງວິນຍານ ທີ່ຕ້ອງມີການປ່ຽນແປງດັ່ງກ່າວ.
ຄວາມປາດຖະໜາຂອງພວກເຮົາ ແມ່ນເພື່ອໃຫ້ສັດທາໃນແຜນຂອງພຣະບິດາ ແລະ ພາລະກິດແຫ່ງການໄຖ່ຂອງພຣະຜູ້ຊ່ວຍໃຫ້ລອດ ມີເພີ່ມຫລາຍຂຶ້ນຢູ່ໃນໂລກ ແລະ ວ່າພັນທະສັນຍາອັນເປັນນິດຂອງພຣະເຈົ້າ ຈະຖືກສະຖາປະນາຂຶ້ນ.3 ຈຸດປະສົງຢ່າງດຽວຂອງພວກເຮົາ ແມ່ນເພື່ອຊ່ວຍໃຫ້ມີການສືບຕໍ່ເຫລື້ອມໃສໃນພຣະຜູ້ເປັນເຈົ້າງ່າຍຂຶ້ນ ແລະ ເພື່ອຈະໄດ້ຮັກ ແລະ ຮັບໃຊ້ອ້າຍເອື້ອຍນ້ອງຂອງເຮົາ ຢ່າງມີປະສິດທິພາບແທ້ໆ.
ການແບ່ງ ແລະ ການແຍກ
ບາງເທື່ອ ໃນຖານະທີ່ເປັນສະມາຊິກຂອງສາດສະໜາຈັກ ເຮົາໄດ້ແບ່ງ, ໄດ້ແຍກ, ແລະ ນຳໃຊ້ພຣະກິດຕິຄຸນໃນຊີວິດຂອງເຮົາ ໂດຍການສ້າງລາຍການຫົວຂໍ້ແຕ່ລະຢ່າງ ເພື່ອສຶກສາ ແລະ ລາຍການທີ່ຈະເຮັດ ຢ່າງຍືດຍາວ. ແຕ່ການເຂົ້າຫາແບບນັ້ນ ອາດຈຳກັດຄວາມເຂົ້າໃຈ ແລະ ວິໄສທັດຂອງເຮົາໄດ້. ເຮົາຕ້ອງລະມັດລະວັງ ເພາະການເອົາໃຈໃສ່ພຽງແຕ່ເພື່ອເຮັດຕາມລາຍການເທົ່ານັ້ນ ສາມາດປ່ຽນທິດທາງເຮົາ ຈາກການເຂົ້າໃກ້ຊິດພຣະຜູ້ເປັນເຈົ້າໄດ້.
ຄວາມຸ້ງໝາຍ ແລະ ການເຮັດໃຫ້ສະອາດ, ຄວາມຜາສຸກ ແລະ ຄວາມຊື່ນຊົມ, ແລະ ການສືບຕໍ່ເຫລື້ອມໃສ ແລະ ການປົກປ້ອງທີ່ມາຈາກ “ການຍອມຖວາຍໃຈ [ຂອງເຮົາ] ແດ່ພຣະເຈົ້າ”4 ແລະ “[ໄດ້ຮັບ] ເງົາຂອງພຣະອົງໄວ້ໃນໃບໜ້າ [ຂອງເຮົາ]”5 ບໍ່ສາມາດໄດ້ຮັບພຽງແຕ່ໂດຍການກະທຳ ແລະ ເຮັດສິ່ງທີ່ເປັນທາງວິນຍານທັງໝົດ ທີ່ເຮົາຄວນເຮັດເທົ່ານັ້ນ. ແຕ່ພະລັງຂອງພຣະກິດຕິຄຸນຂອງພຣະຜູ້ຊ່ວຍໃຫ້ລອດ ທີ່ຈະປ່ຽນແປງ ແລະ ເປັນພອນແກ່ເຮົາ ຈະມາຈາກການຫລິງເຫັນ ແລະ ການນຳໃຊ້ຄຳສອນ, ຫລັກທຳ, ແລະ ການປະຕິບັດທີ່ກ່ຽວພັນກັນເຫລົ່ານັ້ນ. ພຽງແຕ່ເມື່ອເຮົາ ຮວບຮວມສິ່ງສາລະພັດໄວ້ໃນພຣະຄຣິດ, ເທົ່ານັ້ນ ດ້ວຍຄວາມເອົາໃຈໃສ່ແທ້ໆໃນພຣະອົງ, ຄວາມຈິງຂອງພຣະກິດຕິຄຸນຈຶ່ງຈະປະສານຊ່ວຍເຮົາໃຫ້ກາຍເປັນສິ່ງທີ່ພຣະເຈົ້າປະສົງໃຫ້ເຮົາກາຍເປັນ6 ແລະ ອົດທົນຢ່າງກ້າຫານ ຈົນເຖິງທີ່ສຸດ.7
ການຮຽນຮູ້ ແລະ ການເຊື່ອມຕໍ່ຄວາມຈິງຂອງພຣະກິດຕິຄຸນ
ພຣະກິດຕິຄຸນຂອງພຣະເຢຊູຄຣິດ ເປັນຜ້າຜືນງາມແຫ່ງຄວາມຈິງ ທີ່ “ເຊື່ອມສະໜິດ”8 ແລະ ຕ່ຳເຂົ້າກັນ. ເມື່ອເຮົາຮຽນຮູ້ ແລະ ເຊື່ອມຕໍ່ຄວາມຈິງຂອງພຣະກິດຕິຄຸນ ທີ່ຖືກເປີດເຜີຍເຂົ້າກັນ, ເຮົາຈະໄດ້ຮັບພອນ ທີ່ຈະເຫັນມຸມມອງທີ່ມີຄ່າ ແລະ ເພີ່ມຄວາມສາມາດທາງວິນຍານ ຜ່ານທາງຕາທີ່ສາມາດຫລຽວເຫັນອິດທິພົນຂອງພຣະຜູ້ເປັນເຈົ້າ ໃນຊີວິດຂອງເຮົາ ແລະ ຜ່ານທາງຫູທີ່ສາມາດໄດ້ຍິນສຸລະສຽງຂອງພຣະອົງ.9 ແລະ ຫລັກທຳຂອງການ ຮວບຮວມສິ່ງສາລະພັດ—ແມ່ນແຕ່ໄວ້ໃນພຣະອົງ—ສາມາດຊ່ວຍເຮົາ ໃນການປ່ຽນລາຍການແບບທີ່ເຄີຍເຮັດມາ ໃຫ້ກາຍເປັນລາຍການທີ່ເປັນໜຶ່ງ, ປະສົມປະສານ, ແລະ ພຽງອັນດຽວເທົ່ານັ້ນ. ຂ້າພະເຈົ້າຂໍອ້າງເຖິງຄຳສອນ ແລະ ຕົວຢ່າງຂອງສາດສະໜາຈັກ ກັບສິ່ງທີ່ຂ້າພະເຈົ້າກຳລັງແນະນຳຢູ່ນີ້.
ຕົວຢ່າງທີ 1. ຫລັກແຫ່ງຄວາມເຊື່ອຂໍ້ທີສີ່ ເປັນການສະແດງຢ່າງໜຶ່ງທີ່ຍິ່ງໃຫຍ່ທີ່ສຸດ ຂອງການຮວບຮວມສິ່ງສາລະພັດໄວ້ໃນພຣະຄຣິດ ທີ່ວ່າ: “ພວກເຮົາເຊື່ອວ່າ ຫລັກທຳ ແລະ ພິທີການເບື້ອງຕົ້ນແຫ່ງພຣະກິດຕິຄຸນຄື: ໜຶ່ງ ສັດທາໃນອົງພຣະເຢຊູຄຣິດເຈົ້າ; ສອງ ການກັບໃຈ; ສາມ ບັບຕິສະມາໂດຍລົງໄປໃນນ້ຳໝົດທັງຕົວ ເພື່ອການປົດບາບ; ສີ່ ການວາງມື ເພື່ອຮັບຂອງປະທານແຫ່ງພຣະວິນຍານບໍລິສຸດ.”10
ສັດທາທີ່ແທ້ຈິງ ແມ່ນການເອົາໃຈໃສ່ໃນ ແລະ ຕໍ່ອົງພຣະເຢຊູຄຣິດເຈົ້າ—ໃນພຣະອົງ ໃນຖານະທີ່ເປັນພຣະບຸດອົງດຽວທີ່ຖືກຳເນີດ ແລະ ສູງສົ່ງ ຂອງພຣະບິດາ ແລະ ຕໍ່ພຣະອົງ ແລະ ພາລະກິດແຫ່ງການໄຖ່ ທີ່ພຣະອົງໄດ້ບັນລຸຄວາມສຳເລັດ. “ເພາະວ່າພຣະອົງໄດ້ຕອບທີ່ສຸດຂອງກົດແລ້ວ, ແລະ ພຣະອົງຂໍຮັບເອົາຄົນທັງປວງທີ່ມີສັດທາໃນພຣະອົງ; ແລະ ຄົນທີ່ມີສັດທາໃນພຣະອົງຈະແນບສະໜິດໃນທຸກສິ່ງທີ່ດີ; ດັ່ງນັ້ນ ພຣະອົງຈຶ່ງວິງວອນແທນລູກຫລານມະນຸດ.”11 ການໃຊ້ສັດທາໃນພຣະຄຣິດ ຄື ການໄວ້ວາງໃຈ ແລະ ການເຊື່ອໝັ້ນໃນພຣະອົງ ວ່າເປັນພຣະຜູ້ຊ່ວຍໃຫ້ລອດຂອງເຮົາ, ໃນພຣະນາມຂອງພຣະອົງ, ແລະ ໃນຄຳສັນຍາຂອງພຣະອົງ.
ຜົນສະທ້ອນທຳອິດ ແລະ ຕາມທຳມະຊາດຂອງການໄວ້ວາງໃຈໃນພຣະຜູ້ຊ່ວຍໃຫ້ລອດ ຄືການກັບໃຈ ແລະ ການຫັນໜີຈາກຄວາມຊົ່ວຮ້າຍ. ເມື່ອເຮົາໃຊ້ສັດທາໃນ ແລະ ຕໍ່ພຣະຜູ້ເປັນເຈົ້າ, ຕາມທຳມະດາແລ້ວເຮົາຈະຫັນມາຫາ, ເຂົ້າຫາ, ແລະ ເພິ່ງອາໄສພຣະອົງ. ດັ່ງນັ້ນ, ການກັບໃຈ ຈຶ່ງເປັນ ການໄວ້ວາງໃຈ ໃນ ແລະ ການເພິ່ງອາໄສ ທີ່ການໄຖ່ ໃຫ້ເຮັດສິ່ງທີ່ເຮົາບໍ່ສາມາດເຮັດເພື່ອຕົວເອງ. ເຮົາແຕ່ລະຄົນຕ້ອງ “[ເພິ່ງອາໄສ] ຢ່າງເຕັມທີ່ໃນພຣະຄຸນຄວາມດີຂອງພຣະອົງ ຜູ້ຊົງອານຸພາບເພື່ອຊ່ວຍໃຫ້ລອດ”12 ເພາະພຽງແຕ່ “ຜ່ານທາງພຣະຄຸນຄວາມດີ, ແລະ ພຣະເມດຕາ, ແລະ ພຣະຄຸນຂອງພຣະເມຊີອາຜູ້ບໍລິສຸດ”13 ເທົ່ານັ້ນ ທີ່ເຮົາຈະສາມາດຖືກສ້າງຂຶ້ນໃໝ່ໃນພຣະຄຣິດ14 ແລະ ໃນທີ່ສຸດ ກັບຄືນໄປຢູ່ໃນທີ່ປະທັບຂອງພຣະເຈົ້າ.
ພິທີການບັບຕິສະມາ ໂດຍລົງໄປໃນນ້ຳໝົດທັງຕົວ ເພື່ອການປົດບາບ ຮຽກຮ້ອງໃຫ້ເຮົາ ໄວ້ວາງໃຈ ໃນພຣະອົງ, ເພິ່ງອາໄສ ທີ່ພຣະອົງ, ແລະ ຕິດຕາມ ພຣະອົງ. ນີໄຟໄດ້ປະກາດວ່າ, “ຂ້າພະເຈົ້າຮູ້ວ່າ ຖ້າຫາກພວກທ່ານຈະ ຕິດຕາມພຣະບຸດ, ດ້ວຍຄວາມມຸ້ງໝາຍເຕັມທີ່ແຫ່ງໃຈ, ໂດຍບໍ່ເປັນຄົນໜ້າຊື່ໃຈຄົດ ແລະ ບໍ່ມີການຫລອກລວງຕໍ່ພຣະພັກຂອງພຣະເຈົ້າ, ແຕ່ດ້ວຍເຈດຕະນາອັນແທ້ຈິງ, ໂດຍການກັບໃຈຈາກບາບຂອງພວກທ່ານ, ໂດຍການເປັນພະຍານຕໍ່ພຣະບິດາວ່າ ພວກທ່ານເຕັມໃຈຮັບພຣະນາມຂອງພຣະຄຣິດໂດຍການບັບຕິສະມາ—ແທ້ຈິງແລ້ວ, ໂດຍ ການຕິດຕາມພຣະຜູ້ເປັນເຈົ້າ ແລະ ພຣະຜູ້ຊ່ວຍໃຫ້ລອດຂອງທ່ານ ລົງໄປໃນນ້ຳຕາມພຣະຄຳຂອງພຣະອົງ, ຈົ່ງເບິ່ງ, ເມື່ອນັ້ນທ່ານຈະໄດ້ຮັບພຣະວິນຍານບໍລິສຸດ; ເມື່ອນັ້ນການບັບຕິສະມາດ້ວຍໄຟ ແລະ ດ້ວຍພຣະວິນຍານບໍລິສຸດຈະມາເຖິງ.”15
ພິທີການວາງມືສຳລັບຂອງປະທານແຫ່ງພຣະວິນຍານບໍລິສຸດ ຮຽກຮ້ອງເຮົາໃຫ້ ໄວ້ວາງໃຈ ໃນພຣະອົງ ເພິ່ງອາໄສ ທີ່ພຣະອົງ, ຕິດຕາມ ພຣະອົງ, ແລະ ດຳເນີນໄປໜ້າ ໃນພຣະອົງ ດ້ວຍຄວາມຊ່ວຍເຫລືອຂອງພຣະວິນຍານສັກສິດຂອງພຣະອົງ. ດັ່ງທີ່ນີໄຟໄດ້ປະກາດວ່າ, “ແລະ ບັດນີ້, ພີ່ນ້ອງທີ່ຮັກແພງຂອງຂ້າພະເຈົ້າ, ຂ້າພະເຈົ້າຮູ້ດ້ວຍສິ່ງນີ້ວ່າ ນອກຈາກມະນຸດຈະອົດທົນຈົນເຖິງທີ່ສຸດໃນການທຳຕາມຕົວຢ່າງຂອງພຣະບຸດຂອງພຣະເຈົ້າຜູ້ຊົງພຣະຊົນຢູ່, ເຂົາຈະລອດບໍ່ໄດ້.”16
ຫລັກແຫ່ງຄວາມເຊື່ອຂໍ້ທີຫ້າ ບໍ່ພຽງແຕ່ຊີ້ບອກຫລັກທຳຂັ້ນພື້ນຖານ ແລະ ພິທີການຂອງພຣະກິດຕິຄຸນທີ່ຖືກຟື້ນຟູເທົ່ານັ້ນ. ແຕ່ຂໍ້ຄວາມທີ່ດົນໃຈນີ້ ຂອງຄວາມເຊື່ອ ໄດ້ຮວບຮວມສິ່ງສາລະພັດໄວ້ໃນພຣະຄຣິດ ຄື: ການໄວ້ວາງໃຈ ໃນ ແລະ ທີ່ພຣະອົງ, ການເພິ່ງອາໄສ ທີ່ພຣະອົງ, ການຕິດຕາມ ພຣະອົງ, ແລະ ການດຳເນີນໄປໜ້າ ກັບພຣະອົງ—ແມ່ນແຕ່ໃນພຣະອົງ.
ຕົວຢ່າງທີ 2. ບັດນີ້ ຂ້າພະເຈົ້າຢາກບັນຍາຍເຖິງວິທີທີ່ໂຄງການ ແລະ ການລິເລີ່ມທັງໝົດຂອງສາດສະໜາຈັກ ເປັນການຮວບຮວມສິ່ງສາລະພັດໄວ້ໃນພຣະຄຣິດ. ການສະແດງເພີ່ມເຕີມຫລາຍຢ່າງ ສາມາດຖືກນຳສະເໜີໄດ້, ແຕ່ຂ້າພະເຈົ້າຈະກ່າວພຽງສອງສາມຢ່າງທີ່ເລືອກມາເທົ່ານັ້ນ.
ໃນປີ 1978, ປະທານສະເປັນເຊີ ດັບເບິນຢູ ຄິມໂບ ໄດ້ແນະນຳສະມາຊິກຂອງສາດສະໜາຈັກ ໃຫ້ເສີມພະລັງໃຫ້ຊີໂອນ ຕະຫລອດທົ່ວໂລກ. ເພິ່ນໄດ້ແນະນຳໄພ່ພົນໃຫ້ອາໄສຢູ່ປະເທດຂອງຕົນ ແລະ ສະຖາປະນາສະເຕກທີ່ເຂັ້ມແຂງຂຶ້ນ ໂດຍການຮວບຮວມຄອບຄົວຂອງພຣະເຈົ້າ ແລະ ສິດສອນເຂົາເຈົ້າເຖິງວິທີຂອງພຣະຜູ້ເປັນເຈົ້າ. ເພິ່ນຍັງໄດ້ແຈ້ງບອກຕື່ມວ່າ ພຣະວິຫານຫລາຍແຫ່ງຕື່ມອີກຈະຖືກສ້າງຂຶ້ນ ແລະ ພອນທີ່ສັນຍາໄວ້ສຳລັບໄພ່ພົນ ບໍ່ວ່າເຂົາເຈົ້າຈະອາໄສຢູ່ບ່ອນໃດກໍຕາມ ຢູ່ໃນໂລກ.17
ເມື່ອຈຳນວນຂອງສະເຕກມີຫລາຍຂຶ້ນ, ຈຶ່ງມີຄວາມຈຳເປັນຫລາຍສຳລັບບ້ານເຮືອນຂອງສະມາຊິກ ທີ່ຈະ “ກາຍເປັນ [ບ່ອນ] ທີ່ສະມາຊິກຄອບຄົວ [ມັກ] ອາໄສຢູ່, ບ່ອນທີ່ເຂົາເຈົ້າ [ສາມາດ] ສົ່ງເສີມຊີວິດຂອງເຂົາເຈົ້າ ແລະ ພົບເຫັນຄວາມຮັກ, ການສະໜັບສະໜູນ, ການຮູ້ຄຸນຄ່າ, ແລະ ການຊຸກຍູ້ ນຳກັນ.”18 ຜົນທີ່ຕາມມາກໍຄື, ໃນປີ 1980, ການປະຊຸມໃນວັນອາທິດ ຈຶ່ງຖືກລວມເຂົ້າກັນເປັນສາມຊົ່ວໂມງ ເພື່ອ “ເນັ້ນໜັກເຖິງໜ້າທີ່ຮັບຜິດຊອບສ່ວນຕົວ ແລະ ຂອງຄອບຄົວຕື່ມອີກ ສຳລັບການຮຽນຮູ້, ການດຳລົງຊີວິດ, ແລະ ການສິດສອນພຣະກິດຕິຄຸນ.”19 ການເນັ້ນໜັກນີ້ເລື່ອງຄອບຄົວ ແລະ ບ້ານເຮືອນ ໄດ້ຖືກຮັບຮອງ ໃນ “ຄອບຄົວ: ການປະກາດຕໍ່ໂລກ,” ທີ່ໄດ້ນຳສະເໜີໂດຍປະທານກໍດອນ ບີ ຮິງລີ ໃນປີ 1995.20
ໃນເດືອນເມສາ ຂອງປີ 1998, ປະທານຮິງລີ ໄດ້ປະກາດການສ້າງພຣະວິຫານຂະໜາດນ້ອຍຫລາຍແຫ່ງ, ດ້ວຍວິທີນີ້ ຈຶ່ງສາມາດນຳພິທີການທີ່ສັກສິດໃນບ້ານຂອງພຣະຜູ້ເປັນເຈົ້າ ໄປຢູ່ໃກ້ໄພ່ພົນຍຸກສຸດທ້າຍ ເປັນສ່ວນບຸກຄົນ ແລະ ເປັນຄອບຄົວ ຕະຫລອດທົ່ວໂລກ.21 ແລະ ໂອກາດທີ່ຈະຍົກລະດັບເຫລົ່ານີ້ ສຳລັບຄວາມເຕີບໂຕ ແລະ ການພັດທະນາທາງວິນຍານ ໄດ້ຖືກເຮັດໃຫ້ມີປະສິດທິພາບຫລາຍຂຶ້ນ ໂດຍການເພິ່ງຕົນເອງທາງໂລກ ຜ່ານທາງການນຳສະເໜີເລື່ອງເງິນທຶນການສຶກສາທີ່ຕໍ່ເນື່ອງ ໃນປີ 2001.22
ລະຫວ່າງການບໍລິຫານງານຂອງເພິ່ນ, ປະທານທອມມັສ ແອັສ ມອນສັນ ໄດ້ແນະນຳໄພ່ພົນຕະຫລອດເວລາ ໃຫ້ໄປ “ຊ່ວຍກູ້” ແລະ ໄດ້ເນັ້ນເລື່ອງການດູແລຄົນຍາກຈົນ ແລະ ຄົນຂັດສົນ ວ່າເປັນໜ້າທີ່ຮັບຜິດຊອບຈາກສະຫວັນຢ່າງໜຶ່ງຂອງສາດສະໜາຈັກ. ໃນການສືບຕໍ່ເນັ້ນເລື່ອງການຕຽມທາງໂລກ, ການຊ່ວຍເຫລືອໃຫ້ເພິ່ງຕົນເອງ ໄດ້ລິເລີ່ມ ໃນປີ 2012.
ເປັນເວລາຫລາຍປີຜ່ານມາ, ຫລັກທຳທີ່ສຳຄັນກ່ຽວກັບການເຮັດໃຫ້ວັນຊະບາໂຕ ເປັນວັນທີ່ມີຄວາມສຸກ ຢູ່ທີ່ບ້ານ ແລະ ຢູ່ທີ່ໂບດ ໄດ້ຖືກເນັ້ນໜັກ ແລະ ຖືກສົ່ງເສີມ,23 ຊຶ່ງຕຽມເຮົາສຳລັບການປ່ຽນແປງຕາຕະລາງ ຂອງການປະຊຸມໃນວັນອາທິດ ທີ່ຖືກນຳສະເໜີໃນພາກນີ້ ຂອງກອງປະຊຸມໃຫຍ່ສາມັນ.
ແລະ ຫົກເດືອນຜ່ານມານີ້, ກຸ່ມຖານະປະໂລຫິດແຫ່ງເມນຄີເສເດັກ ໄດ້ຖືກເຮັດໃຫ້ເຂັ້ມແຂງຂຶ້ນ ແລະ ຖືກຈັດໃຫ້ສອດຄ່ອງຢ່າງມີປະສິດທິພາບຫລາຍກວ່າເກົ່າ ກັບອົງການຊ່ວຍເຫລືອ ເພື່ອບັນລຸການປະຕິບັດສາດສະໜາກິດ ໃນວິທີທີ່ສູງກວ່າ ແລະ ສັກສິດກວ່າ.
ຂ້າພະເຈົ້າເຊື່ອວ່າ ຂັ້ນຕອນ ແລະ ເວລາຂອງການກະທຳເຫລົ່ານີ້ ເປັນເວລາຫລາຍທົດສະວັດ ຈະຊ່ວຍເຮົາໃຫ້ເຫັນວຽກງານທີ່ເປັນນ້ຳໜຶ່ງໃຈດຽວກັນ ແລະ ກວ້າງຂວາງ ແລະ ບໍ່ພຽງແຕ່ເປັນການລິເລີ່ມ ດ້ວຍຕົວຄົນດຽວ ແລະ ຕ່າງຫາກ. “ພຣະເຈົ້າໄດ້ເປີດເຜີຍແບບແຜນຂອງຄວາມກ້າວໜ້າທາງວິນຍານ ສຳລັບບຸກຄົນ ແລະ ຄອບຄົວ ຜ່ານທາງພິທີການ, ຄຳສອນ, ໂຄງການ, ແລະ ກິດຈະກຳ ທີ່ໃຫ້ ບ້ານເຮືອນເປັນສູນກາງ ແລະ ສາດສະໜາຈັກສະໜັບສະໜູນ. ອົງການຂອງສາດສະໜາຈັກ ແລະ ໂຄງການຕ່າງໆ ມີຢູ່ເພື່ອເປັນພອນໃຫ້ແກ່ບຸກຄົນ ແລະ ຄອບຄົວ ແລະ ບໍ່ແມ່ນມີຢູ່ເພື່ອຕົວເອງ.”24
ຂ້າພະເຈົ້າອະທິຖານວ່າ ເຮົາຈະສາມາດຮັບຮູ້ວຽກງານຂອງພຣະຜູ້ເປັນເຈົ້າ ວ່າເປັນວຽກງານທົ່ວໂລກທີ່ຍິ່ງໃຫຍ່ ທີ່ຈະໃຫ້ບ້ານເຮືອນເປັນສູນກາງ ແລະ ສາດສະໜາຈັກສະໜັບສະໜູນຫລາຍກວ່າທີ່ຜ່ານມາ. ຂ້າພະເຈົ້າຮູ້ ແລະ ເປັນພະຍານວ່າ ພຣະຜູ້ເປັນເຈົ້າກຳລັງເປີດເຜີຍ ແລະ ຈະເປີດເຜີຍເລື່ອງສຳຄັນ ແລະ ຍິ່ງໃຫຍ່ອີກຫລາຍເລື່ອງກ່ຽວກັບອານາຈັກຂອງພຣະເຈົ້າ.25
ຄຳສັນຍາ ແລະ ປະຈັກພະຍານ
ຂ້າພະເຈົ້າໄດ້ເລີ່ມຕົ້ນຂ່າວສານຂອງຂ້າພະເຈົ້າ ໂດຍອ້າງເຖິງຄວາມເຂັ້ມແຂງ ທີ່ໄດ້ຖືກສ້າງຂຶ້ນຈາກວັດຖຸທີ່ເປັນເສັ້ນດ້າຍ ຊຶ່ງກ້ຽວພັນເຂົ້າກັນເປັນເຊືອກ. ໃນວິທີທີ່ຄ້າຍຄືກັນນັ້ນ, ຂ້າພະເຈົ້າສັນຍາວ່າ ມຸມມອງ, ຄວາມມຸ້ງໝາຍ, ແລະ ພະລັງເພີ່ມເຕີມ ຈະປະກົດຢູ່ໃນການຮຽນຮູ້ ແລະ ການດຳລົງຊີວິດຕາມພຣະກິດຕິຄຸນທີ່ຖືກຟື້ນຟູ ເມື່ອເຮົາພະຍາຍາມຮວບຮວມສິ່ງສາລະພັດໄວ້ຢູ່ໃນພຣະຄຣິດ—ແມ່ນແຕ່ຢູ່ໃນພຣະອົງ.
ທຸກໂອກາດ ແລະ ພອນຂອງຜົນທີ່ຕາມມາຊົ່ວນິລັນດອນ ຊຶ່ງເລີ່ມຕົ້ນໃນ ແລະ ຍືນຍົງ ຜ່ານທາງອົງພຣະເຢຊູຄຣິດເຈົ້າ, ຈະເປັນໄປໄດ້ ແລະ ມີຄວາມມຸ້ງໝາຍ ເພາະການນີ້. ດັ່ງທີ່ແອວມາໄດ້ເປັນພະຍານວ່າ: “ບໍ່ມີທາງອື່ນ ຫລື ວິທີອື່ນໃດທີ່ມະນຸດຈະລອດໄດ້, ມີແຕ່ໃນ ແລະ ໂດຍທາງພຣະຄຣິດເທົ່ານັ້ນ. ຈົ່ງເບິ່ງ, ພຣະອົງເປັນຊີວິດ ແລະ ຄວາມສະຫວ່າງຂອງໂລກ.”26
ຂ້າພະເຈົ້າຂໍປະກາດດ້ວຍຄວາມປິຕິຍິນດີ ເຖິງຄວາມຈິງແທ້ ແລະ ແນ່ນອນຂອງພຣະບິດານິລັນດອນ ແລະ ພຣະບຸດທີ່ຮັກຂອງພຣະອົງ, ພຣະເຢຊູຄຣິດ. ເຮົາພົບຄວາມສຸກໃນພຣະຜູ້ຊ່ວຍໃຫ້ລອດຂອງເຮົາ. ແລະ ໃນພຣະອົງ ເຮົາມີຄວາມໝັ້ນໃຈ ທີ່ຈະມີ ສັນຕິສຸກໃນໂລກນີ້, ແລະ ຊີວິດນິລັນດອນໃນໂລກທີ່ຈະມາເຖິງ.27 ໃນພຣະນາມອັນສັກສິດຂອງອົງພຣະເຢຊູຄຣິດເຈົ້າ, ອາແມນ.