Hulyo 22–28: “Itanom Ining Pulong sa Inyo mga Tagipusuon”

Alma 32–35

Para sa mga Zoramnon, ang pangamuyo ginahimo paagi sa pagtindog sa kon diin makita sila sang tanan kag sa pagsulit-sulit sang wala kahulugan kag hinambog nga mga pulong. Ang mga Zoramnon nagkulang sa pagtuo kay Jesucristo—nagpanghiwala pa gani sa Iya—kag nagpanghingabot sang mga imol (tan-awa sa Alma 31:9–25). Sa kabaliskaran, gintudlo ni Alma kag Amulek nga ang pangamuyo mas may koneksyon sa nagakatabo sa aton mga tagipusuon sangsa aton ginapakita sa publiko. Kon wala kita nagapakita sang kaluoy sa mga nagakinahanglan, ang aton pangamuyo “wala sing kapuslanan, kag wala kamo sing … makuha” (Alma 34:28). Pinakaimportante, nagapangamuyo kita tungod may pagtuo kita kay Jesucristo, nga nagatanyag sang pagtubos paagi sa Iya “wala’y dulonan kag wala’y katapusan nga halad” (Alma 34:10). Ang ini nga pagtuo, paathag ni Alma, nagasugod sa pagpaubos kag “handum nga magpati” (Alma 32:27). Sa kadugayan, sa sige-sige nga sagod, ang pulong sang Dios magagamot sa aton mga tagipusuon tubtob ini mangin “kahoy nga nagatubo padulong sa kabuhi nga dayon” (Alma 32:41).

Mga Ideya sa Pagtuon sa Puluy-an kag sa Simbahan

Alma 32:17–43

Ginapakita ko ang pagtuo kay Jesucristo paagi sa pagtanom kag pagsagod sang Iya pulong sa akon tagipusuon.

Samtang imo ginabasa ang Alma 32:17–43, tandai ang mga tinaga kag mga dinalan nga nagabulig sa imo nga maintiendihan kon paano magpakita sang pagtuo kay Jesucristo. Ano ang imo matun-an parte sa kon ano ang pagtuo kag kon ano ang indi?

Isa pa ka paagi para tun-an ang Alma 32 amo ang pagdrowing sang mga litrato nga nagarepresentar sang lainlain nga bahin sang pagdako sang liso. Dayon sulati ang tagsa ka litrato sang mga tinaga sa Alma 32:28–43 nga nagabulig sa imo nga maintiendihan kon paano magtanom kag magsagod sang pulong sang Dios sa imo tagipusuon.

Tan-awa man sa Russell M. Nelson, “Si Jesus Nabanhaw; Ang Pagtuo sa Iya Magasaylo sang mga Bukid,” Liahona, Mayo 2021, 101–4.

Alma 32:26–43

Sarang ako makahibalo para sa akon kaugalingon.

Sa mga Zoramnon nga nagaduhaduha pa sa testimonya ni Alma kay Cristo, nagpanugyan si Alma sang isa ka “pag-eksperimento” (tan-awa sa Alma 32:27). Ang mga eksperimento nagapangayo sang handum, interes, aksyon, kag bisan gamay nga pagtuo—kag nagaresulta ini sa matahum nga pagdiskubre! Panumduma ang mga eksperimento nga imo nakita ukon naentrahan. Suno sa Alma 32:26–36, ano nga klase sang eksperimento ang nagaresulta sa pagtuo kay Jesucristo?

Paano ka “nag-eksperimento” sa pulong sang Dios kag natukiban nga ang “pulong maayo”? (Alma 32:28).

Alma 33:2–11; 34:17–29

Pwede ko simbahon ang Dios sa pangamuyo, bisan ano nga oras kag sa bisan diin.

Ang laygay ni Alma kag Amulek parte sa pagsimba kag pangamuyo gintuyo para tadlungon ang sala nga mga pag-intiendi sang mga Zoramnon. Pamensara nga ilista ang mga ini (tan-awa sa Alma 31:13–23). Sa tupad sina nga listahan, pwede mo ilista ang mga kamatuoran parte sa pangamuyo sa Alma 33:2–11 kag 34:17–29. Paano maapektuhan sang imo mga natun-an sa sining mga bersikulo ang imo pagpangamuyo kag pagsimba?

Alma 34:9–16

Kinahanglan ko si Jesucristo kag ang Iya Pagbayad-Sala.

Tandai kon kapila gingamit ni Amulek ang mga tinaga nga wala’y dulonan kag wala’y katapusan sa paglaragway sang nagabayad-sala nga sakripisyo sang Manluluwas sa Alma 34:9–14. Ngaa importante nga mahibal-an nga ang Pagbayad-Sala sang Manluluwas wala’y dulonan kag wala’y katapusan? Magpangita sang mga tinaga kag dinalan sa sining mga bersikulo nga nagalaragway man sang Pagbayad-Sala sang Manluluwas: Mga Hebreo 10:10; 2 Nefi 9:21; Mosias 3:13.

Bisan pa nga nahibal-an naton nga ang gahum ni Jesus sa pagluwas wala sing dulonan kag wala katapusan, kon kaisa nagaduda kita gihapon kon magamit ini sa aton—ukon sa tawo nga nakasala sa aton. Si Elder David A. Bednar sadto naghambal parte sa mga tawo nga “daw may pagtuo man sa Manluluwas, pero wala nagapati nga ang Iya ginpromisa nga mga bugay para man sa ila” (“If Ye Had Known Me,” Liahona, Nob. 2016, 104). Ano ayhan ang nagapugong sa aton nga mabaton sing lubos sang gahum sang Manluluwas? Binagbinaga kon paano mo mahibal-an nga ang Pagbayad-Sala sang Manluluwas wala’y dulonan kag wala’y katapusan.

Para pamalandungan kon ano mo kakinahanglan ang Pagbayad-Sala sang Manluluwas, basi makabulig ang pagpanumdom sang butang nga kinahanglan mo adlaw-adlaw. Pamangkuta ang imo kaugalingon, “Daw ano ayhan ang akon kabuhi kon wala ini?” Dayon, samtang ginatun-an mo ang Alma 34:9–16, binagbinaga kon daw ano ayhan ang imo kabuhi kon wala si Jesucristo. Makakita ka man sang iban pa nga ideya sa 2 Nefi 9:7–9. Paano mo palip-uton ang Alma 34:9–10 sa isa ka dinalan?

Alma 34:30–41

“Karon amo ang tion kag ang adlaw sang inyo kaluwasan.”

Hunahunaa nga gusto mo mag-entra sa isa ka palumba dalagan ukon sa pasundayag sa musika. Ano ang matabo kon maghulat ka tubtob sa adlaw sang kahiwatan antes maghanda? Paano maangot ining halimbawa sa mga paandam ni Amulek sa Alma 34:32–35? Ano ang peligro sang pagpadugay-dugay sang aton paghinulsol kag pagbag-o?

Ang bersikulo 31 may mensahe man sa mga tawo nga mahimo nagakabalaka nga tama na sila kaulihi kag subol na kaayo para maghinulsol. Ano sa banta mo ina nga mensahe?

Para sa dugang nga mga ideya, tan-awa sa mga isyu sini nga bulan sang mga magasin nga Liahona kag Para sa Kusog sang mga Lamharon.

Mga Ideya para sa Pagtudlo sang mga Kabataan

Alma 32:1–16

Sarang ako tudloan sang Ginuo mientras ginapili ko nga mangin mapainubuson.

• Nangin madinalag-on sanday Alma kag Amulek sa pagtudlo sang mga Zoramnon nga mapainubuson. Ano ang buot silingon sang mangin mapainubuson?   Ano pa nga mga tanda parte sa kahulugan sining mga tinaga ang makita naton sa Alma 32:13–16? Hagara ang imo kabataan nga kompletuhon ang dinalan pareho sang “Mapainubuson ako kon .”

Alma 32:28–43

Nagatubo ang akon testimonya kay Jesucristo kon saguron ko ini.

• Ang mga liso, mga kahoy, kag prutas pamilyar nga mga butang nga makabulig sa mga kabataan nga maintiendihan ang mga prinsipyo pareho sang pagtuo kag testimonya. Pakapta ang imo kabataan sang liso samtang imo ginabasa ang Alma 32:28. Dayon pangabaya sila nga buligan ka sa pagpanumdom sang mga paagi nga ang pagtubo sang testimonya kay Jesucristo daw pareho sang pagtanom kag pagsagod sang liso. Basi pwede ninyo itanom ang liso kag hambalan kon ano ang kinahanglanon para buligan ang liso—ukon testimonya—nga magtubo.

• May litrato sang kahoy upod sa sining outline; pwede mo ini gamiton para ilaragway ang mga pulong ni Alma sa Alma 32:28–43. Ukon pwede kamo maggwa sa pagpangita sang mga tanom sa lainlain nga bahin sang pagtubo kag magbasa sang mga bersikulo sa Alma 32 nga nagakumparar sang nagatubo nga tanom sa aton testimonya. Ukon basi pwede magdrowing ang imo kabataan sang kahoy sa board kag magdugang sang dahon ukon prutas tagsa nga may madumduman sila nga makabulig sang ila testimonya kay Jesucristo nga magtubo.

• Pwede mo tugotan ang imo kabataan nga itibsok ang liso (nga nagasimbolo sang pulong sang Dios) sa bato (nga nagasimbolo sang bugalon nga tagipusuon) kag sa mahumok nga duta (nga nagasimbolo sang mapainubuson nga tagipusuon). Basaha sing ululupod ang Alma 32:27–28. Hambali kon ano ang buot silingon sang “paghatag sing duog” (bersikulo 27) para sa pulong sang Dios sa aton mga tagipusuon.

Magdrowing sang mga litrato. Ang iban nga tawo mas makatuon kon idrowing nila ang ila ginatun-an. Basi masadyahan ang imo kabataan sa pagdrowing sang liso nga nangin kahoy samtang ila ginatun-an ang Alma 32.

Alma 33:2–11; 34:17–27

Sarang ako magpangamuyo sa Amay nga Langitnon sa bisan ano nga oras, parte sa bisan ano nga butang.

• Buligi ang imo kabataan nga magpangita sang mga dinalan nga nagalaragway sang mga lugar nga pwede kita magpangamuyo (sa Alma 33:4–11) kag sang mga butang nga pwede naton pangamuyoan (sa Alma 34:17–27). Basi pwede nila idrowing ang ila mga kaugalingon nga nagapangamuyo sa sining mga lugar. Iistorya sa kada isa ang mga eksperiyensya sang ginpamatian sang Amay nga Langitnon ang inyo mga pangamuyo.  

Para sa dugang nga mga ideya, tan-awa sa isyu sang Abyan nga magasin sini nga bulan.

“Kag tungod sang inyo kaukod kag sang inyo pagtuo kag sang inyo pagpaumod sa pulong sa pagsagod sini, … yari karon, dugay-dugay magapamuksi kamo sang bunga sini, nga labing malahalon” (Alma 32:42).