Kon kaisa nagapamangkot ka bala kon pwede gid ayhan magbag-o ang tawo? Basi nagakabalaka ka kon bala masarangan mo nga malampuwasan ang pigaw nga mga pagpili nga imo nahimo ukon malain nga mga pamatasan nga imo ginpatubo, ukon basi may pareho ka man nga mga pagkabalaka parte sa imo mga pinalangga. Kon amo, ang istorya sang mga Anti-Nefi-Lehi makabulig sa imo. Ini nga mga tawo amo ang mortal nga kontra sang mga Nefinhon. Sang nagdesisyon ang mga anak ni Mosias nga magwali sang ebanghelyo sa ila, ang mga Nefinhon “nag-utoy-utoy kadlaw para yagutaon [sila].” Daw mas makatarungan pa nga solusyon ang pamatyon ang mga Lamanhon sangsa hayluhon sila. (Tan-awa sa Alma 26:23–25.)
Pero nagbag-o matuod ang mga Lamanhon—paagi sa nagapanghaylo nga gahum ni Jesucristo. Nakilala sila sadto nga “ginpatig-a kag mabangis nga katawhan” (Alma 17:14), pero nangin “[kilala] tungod sang ila kasidla tuhoy sa Dios” (Alma 27:27). Ang matuod, sila “wala gid bisan kaisa magtalikod” (Alma 23:6
Basi may ara ka sang mga panghunahuna ukon mga aksyon nga kinahanghan bag-uhon ukon mga “hinganiban sang … rebelyon” nga kinahanglan buy-an (Alma 23:7). Ukon basi kinahanglan mo lang nga mangin mas dedikado tuhoy sa Dios. Kon ano man nga pagbag-o ang imo kinahanglan, ang Alma 23–29 makahatag sa imo sang paglaum nga paagi sa nagabayad-sala nga gahum ni Jesucristo, posible ang dalayon nga pagbag-o.
Ang akon pagkahaylo kay Jesucristo kag sa Iya ebanghelyo magabag-o sang akon kabuhi.
Ang mga Lamanhon daw indi mo paabuton nga mangin mga kandidato sa pagkahaylo, pero madamo sa ila ang nakaeksperiyensya sang milagroso nga mga pagbag-o tungod kay Jesucristo. Ining nahaylo nga mga Lamanhon nagtawag sang ila mga kaugalingon nga mga Anti-Nefi-Lehi.
Ang pagbasa sang Alma 23–25; 27 mahimo nga makapukaw sa imo nga binagbinagon ang imo kaugalingon nga pagbag-o. Pangitaa kon paano nagbag-o ang mga Anti-Nefi-Lehi—kon paano sila nahaylo “sa Ginuo” (Alma 23:6). Ang masunod nga mga bersikulo makabulig sa imo nga magsugod:
Sa ano nga mga paagi ka ginbag-o ni Jesucristo kag sang Iya ebanghelyo? Sang san-o ka nakabatyag nga malapit sa Iya? Paano mo mahibal-an kon nagakahaylo ka na kay Jesucristo? Ano ang ginatulod sa imo sang Espiritu nga himuon dason?
Tungod maluluy-on ang Dios, ginapatawad Niya ako kon maghinulsol ako.
Ang pagbag-o nga naeksperiyensyahan sang mga Anti-Nefi-Lehi masobra pa sangsa pagbag-o sang pamatasan—isa ato ka pagbag-o sang tagipusuon nga bunga sang pagtuo kay Jesucristo kag sang sinsero nga paghinulsol. Basi may makita ka nga kamatuoran parte sa paghinulsol sa tagsa ka bersikulo sa Alma 24:7–19. Ano ang ginatudlo sining mga bersikulo sa aton parte sa kaluoy sang Dios sa mga nagahinulsol? Ano ang dugang nga mga kamatuoran ang imo matun-an sa Alma 26:17–22?
Binagbinaga kon paano ginpakita sang Dios ang Iya kaluoy sa imo kabuhi. Paano mo ipakita ang imo pagpasalamat sa Iya?
Ang pagpaambit sang ebanghelyo nagahatag sa akon sang kalipay.
Ang tinaga nga kalipay makita sing 24 ka beses sa Alma 23–29, rason nga ining mga kapitulo maayo nga lugar para tun-an kon paano magbaton sang kalipay sa pagpangabuhi—kag pagpaambit—sang ebanghelyo sang Manluluwas. Pamensara nga tun-an ang Alma 26:12–22, 35–37; kag 29:1–17, nga ginapangita ang mga rason kon ngaa si Amon, ang mga anak ni Mosias, kag si Alma nagakalipay. Ano ang imo matun-an sa sining mga dinalan nga magaresulta sa mas madamo nga kalipay sa imo kabuhi?
Si Elder Marcus B. Nash nagtudlo: “Ang pagpaambit sang ebanghelyo nagadala sang kalipay kag paglaum sa kabuhi sang nagahatag kag sang nagabaton. … Ang pagpaambit sang ebanghelyo amo ang kalipay sa kalipay, paglaum sa paglaum” (“Ipataas ang Inyo mga Suga,” Liahona, Nob. 2021, 71). Hambali ang mga eksperiyensya mo sa pagpaambit sang ebanghelyo sa iban. Ano nga mga kabudlayan ang imo ginaatubang kon ginatinguhaan mo nga ipaambit ang ebanghelyo? Paano ka mabuligan sang Amay nga Langitnon nga malampuwasan ining mga kabudlayan?
Para sa instruksyon halin sa propeta kon paano magpaambit sang ebanghelyo—kag pagpangita sang kalipay sa paghimo sini—pamensara nga tun-an ang mensahe ni Pangulong Dallin H. Oak nga “Pagpaambit sang Ginpanumbalik nga Ebanghelyo,” (Liahona, Nob. 2016, 57–60). Ano ang mga panugyan nga makita mo sa iya mensahe?
Pamensara ang paghimo sang lista sang mga butang nga gusto mo ipaambit sa isa ka abyan parte sa Libro ni Mormon. Tilawi ang pagpaambit sang Libro ni Mormon gamit ang Libro ni Mormon nga app.
Magpangita sang mga sulundan kag mga tema. Samtang nagatuon sang balaan nga mga kasulatan, makakita kita sang malahalon nga mga kamatuoran paagi sa pagpangita sang ginasulit-sulit nga mga tinaga, dinalan, ukon mga ideya. Inang ginasulit-sulit nga mga ideya pwede ma-cross reference ukon ma-link sa imo balaan nga mga kasulatan para mas madali ini makita.
Makakita ako sang palasilungan kay Jesucristo kag sa Iya ebanghelyo.
Sa tiyempo sang ani, ang humay masami ginatipon sa binugkos nga ginatawag tugday kag ginabutang sa mga kamalig, nga kon kaisa ginatawag nga mga tambubo. Sa Alma 26:5–7 binagbinaga kon ano ang ginasimbolo sang mga tugday (sheaves), tambubo (garners), kag dalimuos sa imo kabuhi. Paano ka makakita sang palasilungan kay Jesucristo?
Ginabugayan ako sang Ginuo kon tinguhaan ko nga tumanon ang akon mga promisa sa Iya.
Basi masadyahan ang imo kabataan sa paglubong sang ila mga “hinganiban” (armas) pareho sang mga Anti-Nefi-Lehi. Pwede kamo magbasa sang pila ka mga bersikulo sa Alma 24:6–24 para tudloan ang kabataan parte sa mga promisa nga ginhimo sang mga Anti-Nefi-Lehi nga sundon ang Manluluwas. Dayon pwede sila magpanumdom sang butang nga bag-uhon nila para sundon Sia, isulat ini sa pahina para sa kahiwatan sining semana, kag magpakuno abi nga nagakutkot sang buho kag ilubong ang ila hinganiban.
Pwede nga basahon sang imo kabataan ang Alma 24:15–19, nga ginapangita kon ano ang ginhimo sang mga Anti-Nefi-Lehi bilang “isa ka panaksihon sa Dios.” Dayon pwede ninyo hambalan upoid sa ila kon paano ang aton mga kasugtanan mangin “isa ka panaksihon sa Dios” (bersikulo 18). Tugoti ang imo kabataan nga hambalan kon paano nila ipakita sa Dios nga gusto niya Sia nga sundon.
Para buligan ang imo kabataan nga makita mon paano kita mabuligan ni Jesucristo nga magbag-o kon maghinulsol kita, pwede mo sila tudloan parte sa mga Anti-Nefi-Lehi. Para mahimo ini, pwede mo markahan ang duha ka yahong sang “antes” kag “pagkatapos.” Dayon pwede nga basahon sang imo kabataan ang Alma 17:14–15 kag 27:27–30, isulat kon daw ano ang mga Lamanhon antes kag pagkatapos maghinulsol, kag isulod ini sa insakto nga yahong. Suno sa Alma 24:7–10, ano ang nakabulig sa ila nga magbag-o? Paano naton ipakita ang aton pagpasalamat sa Dios sa Iya nga kaluoy?
Si Jesucristo nagadala sa akon sang kalipay, kag pwede ko ipaambit ining kalipay.
Basi masadyahan kamo sang imo kabataan sa pagdrowing sang mga bagay sa ebanghelyo ni Jesucristo nga nagadala sa inyo sang kalipay. Ipakita ang imo litrato sa imo kabataan, kag papagsika sila nga ihatag ang ila litrato sa isa ka tawo para buligan ina nga tawo nga makabatyag man sang kalipay.
Buligi ang imo kabataan nga pangitaon ang mga tinaga nga kalipay kag pagkasadya sa Alma 26 kag 29. Ano ang nagdala kay Amon kag Alma sang kalipay ukon nagtulod sa ila nga magkasadya? Ang ini nga pamangkot pwede nga magresulta sa paghinambalanay parte sa kalipay nga nagahalin sa pagpangabuhi ukon pagpaambit sang ebanghelyo ni Jesucristo.
Mabuligan ko ang akon mga abyan nga ipangabuhi ang ebanghelyo ni Jesucristo.
Pwede nga basahon sang imo kabataan ang Alma 27:22–23, nga ginapangita kon ano ang ginhimo sang mga Nefinhon para buligan ang mga Anti-Nefi-Lehi nga tumanon ang ila promisa nga indi na magpakig-away liwat. Paano naton buligan ang aton mga abyan nga tumanon ang ila mga promisa? Pwede nga i-role-play sang imo kabataan ang mga sitwasyon. Halimbawa, ano ang ihambal naton sa isa ka abyan nga gusto magbinutig ukon mapamintas?
Para sa dugang nga mga ideya, tan-awa sa isyu sang Abyan nga magasin sini nga bulan.
Litrato
Ang mga Anti-Nefi-Lehi nga nagalubong sang ila mga armas
Illustration of the Anti-Nephi-Lehies burying their weapons [Larawan sang mga Anti-Nefi-Lehi nga nagalubong sang ila mga armas], ni Dan Burr