1 O kon isa kuntani ako ka anghel, kag maangkon ko ang handum sang akon tagipusuon, nga makahambal ako nga may trumpeta sang Dios, nga may tingug agud mag-uyog sang duta, kag magwali sang paghinulsol sa tagsa ka katawhan!

2 Huo, igapahayag ko sa tagsa ka kalag, pareho sang tunog sang daguob, ang paghinulsol kag ang plano sang pagtubos, nga maghinulsol kag magpalapit sila sa aton Dios, agud nga wala na sang kasubo sa bug-os nga ibabaw sang duta.

3 Apang tan-awa, isa ako ka tawo, kag nagasala sa akon handum; kay dapat nga makontento na ako sa mga butang nga ginhatag sang Ginuo sa akon.

4 Indi ko dapat pagliwaton bangod sa akon mga handum ang malig-on nga mando sing isa ka matarong nga Dios, kay nakahibalo ako nga ginahatag niya sa mga tawo inang suno sa ila mga handum, kon ini mangin sa kamatayon ukon sa kabuhi; huo, nakahibalo ako nga ginahatag niya sa mga tawo, huo, ginamando sa ila ang mga mando nga di-maliwat, suno sa ila mga kabubut-on, kon ang mga ini mangin sa kaluwasan ukon sa kalaglagan.

5 Huo, kag nakahibalo ako nga ang maayo kag malain nagaabot sa tanan nga tawo; sia nga wala nakahibalo sang maayo sa malain wala’y kabasulanan; apang sia nga nakahibalo sang maayo kag malain, sa iya ginahatag ang suno sa iya mga handum, kon luyag niya ang maayo ukon malain, kabuhi ukon kamatayon, kalipay ukon pagbasol sang konsiyensya.

6 Karon, kay nakahibalo ako sining mga butang, ngaa maghandum pa ako sing labaw sangsa maghikot sang buluhaton nga sa diin ginatawag ako?

7 Ngaa maghandum ako nga isa ako ka anghel, agud makahambal ako sa tanan nga yara sa mga punta sang kalibutan?

8 Kay tan-awa, ang Ginuo nagatugot sa tanan nga nasyon, sa ila kaugalingon nga nasyon kag lengguahe, sa pagtudlo sang iya pulong, huo, sa kaalam, sang tanan nga ginatan-aw niya nga nagakabagay nga maangkon nila; gani makita naton nga ang Ginuo nagalaygay sa kaalam, suno sa sinang matarong kag matuod.

9 Nahibal-an ko inang ginsugo sa akon sang Ginuo, kag nagakalipay ako sa sini. Wala ako nagapabugal sang akon kaugalingon, kundi nagakalipay ako sa sinang ginsugo sa akon sang Ginuo; huo, kag amo ini ang akon kalipay, nga basi pa lang mangin instrumento ako sa mga kamot sang Dios sa pagdala sang pila ka kalag sa paghinulsol; kag amo ini ang akon kalipay.

10 Kag tan-awa, kon makita ko ang madamo sang akon mga kauturan nga matuod-tuod nga nagahinulsol, kag nagapalapit sa Ginuo nga ila Dios, gani ang akon kalag nagakapuno sang kalipay; dayon madumduman ko kon ano ang ginhimo sang Ginuo para sa akon, huo, bisan pa nga ginpamatian niya ang akon pangamuyo; huo, dayon madumduman ko ang iya maluluy-on nga butkon nga gin-untay niya sa akon.

11 Huo, kag madumduman ko man ang pagkabihag sang akon mga amay; kay pat-od gid nga nahibal-an ko nga ginluwas sila sang Ginuo halin sa pagkaulipon, kag paagi sa sini ginpahamtang ang iya simbahan; huo, ang Ginuong Dios, ang Dios ni Abraham, ang Dios ni Isaac, kag ang Dios ni Jacob, nagluwas sa ila halin sa pagkaulipon.

12 Huo, pirme ko madumduman ang pagkabihag sang akon mga amay; kag ang amo man nga Dios nga nagluwas sa ila halin sa mga kamot sang mga Egiptohanon ang nagluwas sa ila halin sa pagkaulipon.

13 Huo, kag ang amo man nga Dios nagpahamtang sang iya simbahan sa ila; huo, kag ang amo man nga Dios nagtawag sa akon paagi sa isa ka balaan nga tawag, sa pagwali sang pulong sa sining katawhan, kag naghatag sa akon sing dako nga kadalag-an, nga sa sini lubos ang akon kalipay.

14 Apang wala ako nagakalipay sa akon lamang kaugalingon nga kadalag-an, kundi labi nga lubos ang akon kalipay tungod sang kadalag-an sang akon mga kauturan, nga nagtaklad sa duta sang Nefi.

15 Tan-awa, nagpangabudlay sila sing tuman, kag nagdala sing madamo nga bunga; kag daw ano kadako ang ila mangin padya!

16 Karon, kon mahunahunaan ko ang kadalag-an sining akon mga kauturan ang akon kalag nagakadala, bisan tubtob sa paghamulag sini sa lawas, halos nga daw amo sini, sa pagkadako sang akon kalipay.

17 Kag karon kabay nga itugot sang Dios sa mga ini, sa akon mga kauturan, nga makapungko sila sa ginharian sang Dios; huo, kag ang tanan man nga mga bunga sang ila mga pagpangabudlay agud indi na sila maggwa pa, kundi nga magdayaw sila sa iya sa wala’y katapusan. Kag kabay nga itugot sang Dios nga mahimo ini suno sa akon mga pulong, bisan pareho sa akon ginhambal. Amen.