1 Kag natabo ini nga ang tanan nga indi magpamati sa mga pulong ni Helaman kag sang iya mga kauturan nagtililipon batok sa ila mga kauturan.

2 Kag karon tan-awa, tuman sila kaakig sa bagay nga determinado sila sa pagpatay sa ila.

3 Karon ang lider sinang mga naakig batok sa ila mga kauturan isa ka dako kag isa ka mabukod nga lalaki; kag ang iya ngalan amo si Amalikia.

4 Kag si Amalikia nagahandum nga mangin hari; kag inang mga tawo nga naakig nagahandum man nga sia ang ila mangin hari; kag sila amo ang mas dako nga bahin sinang mas manubo nga mga hukom sa duta, kag nagahangad sila sang gahum.

5 Kag nadala sila sa mga pagpang-into ni Amalikia, nga kon magsakdag sila sa iya kag ipahamtang sia nga mangin hari nila nga himuon niya sila nga mga tagdumala sang katawhan.

6 Gani nadala sila ni Amalikia sa pagsipak, sa pihak sang pagpangwali ni Helaman kag sang iya mga kauturan, huo, sa pihak sang ila tuman nga paghalong sang simbahan, kay mataas sila nga mga pari sa simbahan.

7 Kag may madamo sa simbahan nga nagpati sa nagapang-into nga mga pulong ni Amalikia, gani nagsipak sila bisan halin sa simbahan; kag gani ang mga kahimtangan sang katawhan ni Nefi nangin tuman kapeligroso kag kadelikado, sa pihak sang ila dako nga kadalag-an nga ila naangkon batok sa mga Lamanhon, kag sang ila dako nga mga pagkinasadya nga ila naangkon tungod sang ila pagkahilway paagi sa kamot sang Ginuo.

8 Gani makita naton kon ano kadasig ang mga anak sang katawhan malipat sa Ginuo nga ila Dios, huo, kon ano kadasig maghimo sang kalainan, kag madala sing isa nga malain.

9 Huo, kag makita man naton ang dako nga kalainan nga mahimo sing isa ka tuman kalain nga tawo sa mga anak sang katawhan.

10 Huo, makita naton nga si Amalikia, tungod isa sia ka tawo nga may tuso nga padihot kag isa ka tawo nga may madamo nga nagapang-into nga mga pulong, sa bagay nga nadala niya ang mga tagipusuon sang madamo nga tawo sa paghimo sang kalainan; huo, kag sa pagtinguha nga gub-on ang simbahan sang Dios, kag gub-on ang pundasyon sang kahilwayan nga ginhatag sang Dios sa ila, ukon inang bugay nga ginpadala sang Dios sa ibabaw sang duta para sa kaayohan sang mga matarong.

11 Kag karon natabo ini nga sang nabatian ni Moroni, nga amo ang puno nga komandante sang mga kasoldadohan sang mga Nefinhon, ang parte sining mga pagsipak, naakig sia kay Amalikia.

12 Kag natabo ini nga gingisi niya ang iya kunop; kag nagkuha sia sang bahin sini, kag ginsulatan ini—Sa handumanan sang aton Dios, sang aton relihiyon, kag kahilwayan, kag sang aton paghidaet, sang aton mga asawa, kag sang aton mga anak—kag ginhigot niya ini sa punta sing isa ka tukon.

13 Kag ginsuksok niya ang iya panaming sa ulo, kag ang iya taming sa dughan, kag ang iya mga taming sa butkon, kag ginwagkos ang iya hinganib palibot sa iya balikawang; kag ginkuha niya ang tukon, nga yara sa punta sini ang iya gingisi nga kunop, (kag gintawag niya ini nga bandera sang kahilwayan) kag nagluhod kag nagduko sia sa duta, kag nagpangamuyo sing hugot sa iya Dios agud nga ang mga bugay sang kahilwayan magluntad sa iya mga kauturan, samtang nga may grupo pa sang mga Cristohanon nga nagapabilin agud magpuyo sa kadutaan—

14 Kay amo sina ang tawag sa tanan nga matuod nga mga tumuluo kay Cristo, nga mga miyembro sang simbahan sang Dios, sinang mga indi miyembro sang simbahan.

15 Kag ang mga miyembro sang simbahan mga tampad; huo, ang tanan nga matuod nga mga tumuluo kay Cristo nagdala sa ila kaugalingon, sing malipayon, sang ngalan ni Cristo, ukon mga Cristohanon pareho sang pagtawag sa ila, tungod sang ila pagpati kay Cristo nga magaabot.

16 Kag gani, sa sini nga tion, nagpangamuyo si Moroni nga ang kawsa sang mga Cristohanon, kag ang kahilwayan sang duta mahimo nga masakdag.

17 Kag natabo ini nga sang mabubo niya ang iya kalag sa Dios, ginhingalanan niya ang bug-os nga kadutaan nga yara sa sur sang duta nga Kamingaw, huo, kag sa malip-ot nga pulong, ang bug-os nga kadutaan, sa norte kag sa sur—Isa ka pinili nga duta, kag ang duta sang kahilwayan.

18 Kag nagsiling sia: Pat-od gid nga indi pag-itugot sang Dios nga kita, nga ginyaguta tungod ginadala naton sa aton kaugalingon ang ngalan ni Cristo, pagatasakon kag laglagon, antes sang tion nga ipahanabo naton ini paagi sa aton kaugalingon nga mga kalapasan.

19 Kag sang nasiling ni Moroni ini nga mga pulong, naglibot sia sa katawhan, nga nagawagayway sang ginisi nga bahin sang iya biste sa hangin, agud makita sang tanan ang sinulat nga iya ginsulat sa ginisi nga bahin, kag nagasinggit sa mabaskog nga tingug nga nagasiling:

20 Tan-awa, kon sin-o man ang buot nga magpadayon ining bandera sa kadutaan, papalapita sila sa kusog sang Ginuo, kag pasudla sa isa ka kasugtanan nga pagatipigan nila ang ila mga kinamatarong, kag ang ila relihiyon, agud pakamaayohon sila sang Ginuong Dios.

21 Kag natabo ini nga sang nabantala ni Moroni ining mga pulong, tan-awa, ang katawhan nag-abot nga nagadinalagan nga ang ila hinganib nawagkos sa ila mga balikawang, nga nagagisi sang ila mga biste bilang tanda, ukon bilang isa ka kasugtanan, nga indi nila pag-isikway ang Ginuo nga ila Dios; ukon, sa iban nga pulong, kon maglapas sila sang mga kasugoan sang Dios, ukon mahulog sa kalapasan, kag magkahuya sa pagdala sa ila kaugalingon sang ngalan ni Cristo, pagagision sila sang Ginuo bisan pareho nga gingisi nila ang ila mga biste.

22 Karon amo ini ang kasugtanan nga ila ginhimo, kag ginhaboy nila ang ila mga biste sa tiilan ni Moroni nga nagasiling: Nagapakighisugot kami sa amon Dios, nga pagalaglagon kami, bisan pareho sang amon mga kauturan sa duta sa norte, kon mahulog kami sa kalapasan; huo, mahimo niya kami nga ihaboy sa tiilan sang amon mga kaaway, bisan pareho sang amon paghaboy sang amon mga biste sa imo tiilan agud tasakon sang tiil, kon mahulog kami sa kalapasan.

23 Si Moroni nagsiling sa ila: Tan-awa, nagkalabilin kita nga kaliwatan ni Jacob; huo, nagkalabilin kita nga kaliwatan ni Jose, nga ang iya kunop gingisi sang iya mga kauturan sa madamo nga bahin; huo, kag karon tan-awa, dumdumon naton nga magtuman sang mga kasugoan sang Dios, indi gani ang aton mga biste pagagision sang aton mga kauturan, kag ihunong kita sa bilanggoan, ukon ibaligya, ukon pamatyon.

24 Huo, amligan naton ang aton kahilwayan bilang nagkalabilin ni Jose; huo, dumdumon naton ang mga pulong ni Jacob, antes sang iya kamatayon, kay tan-awa, nakita niya nga ang isa ka bahin sang nagkalabilin sang kunop ni Jose gin-amligan kag wala nadunot. Kag nagsiling sia—Bisan pareho nga ining nagkalabilin sang biste sang akon anak naamligan, sa amo man ang nagkalabilin sang kaliwatan sang akon anak pagaamligan sang kamot sang Dios, kag dal-on sa iya kaugalingon, samtang ang nagkalabilin sang kaliwatan ni Jose madula, bisan pareho sang nagkalabilin sang iya biste.

25 Karon, tan-awa, nagahatag ini sing kasubo sa akon kalag; apang, ang akon kalag nagakalipay sa akon anak tungod sinang bahin sang iya kaliwatan nga pagadal-on sa Dios.

26 Karon tan-awa, amo ini ang ginhambal ni Jacob.

27 Kag karon sin-o ang makasiling kon ang nagkalabilin sang kaliwatan ni Jose, nga madula pareho sang iya biste, amo yadtong mga nagsipak sa aton? Huo, kag bisan ini mangin kita man kon indi kita magpabilin nga malig-on sa pagtuo kay Cristo.

28 Kag karon natabo ini nga sang nasiling ni Moroni ining mga pulong naglibot sia, kag nagpadala man sang mensahe sa tanan nga bahin sang kadutaan nga sa diin may mga pagsipak, kag ginpanipon ang tanan nga katawhan nga maluyag magpadayon sang ila kahilwayan, nga magtindog batok kay Amalikia kag sa sinang mga nagsilipak, nga ginatawag nga mga Amalikianhon.

29 Kag natabo ini nga sang nakita ni Amalikia nga ang katawhan ni Moroni mas madamo sangsa mga Amalikianhon—kag nakita man niya nga ang iya katawhan nagaduhaduha parte sa katarongan sang kawsa sang grupo nga ila ginsugdan—gani, sa kahadlok nga indi niya malab-ot ang iya tinutuyo, gindala niya ang pila sang iya katawhan nga maluyag kag nagkadto sa duta sang Nefi.

30 Karon si Moroni naghunahuna nga indi dapat nga ang mga Lamanhon magaangkon pa sing dugang nga kusog; gani naghunahuna sia sa paglambat sang katawhan ni Amalikia, ukon dakpon sila kag pabalikon sila, kag patyon si Amalikia; huo, kay nakahibalo sia nga pagasugyoton niya ang mga Lamanhon nga maakig batok sa ila, kag ipahanabo nga magpakig-away sila batok sa ila; kag ini nahibal-an niya nga pagahimuon ni Amalikia agud malab-ot niya ang iya mga tinutuyo.

31 Gani si Moroni naghunahuna nga dapat nga dal-on niya ang iya mga kasoldadohan, nga nagtililipon sang ila mga kaugalingon, kag gin-armasan ang ila mga kaugalingon, kag nagsulod sa isa ka kasugtanan nga tipigan ang paghidaet—kag natabo ini nga gindala niya ang iya kasoldadohan kag naglakat pagwa dala ang iya mga tolda padulong sa kamingawan, agud lambatan ang alagyan ni Amalikia sa kamingawan.

32 Kag natabo ini nga ginhimo niya ang suno sa iya mga luyag, kag naglakat padulong sa kamingawan, kag gin-unahan ang mga kasoldadohan ni Amalikia.

33 Kag natabo ini nga nalagyo si Amalikia upod ang diutay nga grupo sang iya mga tinawo, kag ang nagkalabilin gintugyan sa mga kamot ni Moroni kag ginpangdala pabalik sa duta sang Zarahemla.

34 Karon, si Moroni nga isa ka tawo nga pinili sang puno nga mga hukom kag sang tingug sang katawhan, gani may gahum sia suno sa iya kabubut-on sa mga kasoldadohan sang mga Nefinhon sa pagpahamtang kag paggamit sang awtoridad sa ila.

35 Kag natabo ini nga kon sin-o man sa mga Amalikianhon ang indi magsulod sa kasugtanan nga magsakdag sang kawsa sang kahilwayan, agud nga makapadayon sila sing hilway nga gobyerno, ginpapatay niya; kag diutay gid lamang ang nagbalibad sa kasugtanan sang kahilwayan.

36 Kag natabo man ini, nga ginpasaka niya ang bandera sang kahilwayan sa tagsa ka tore nga yara sa bug-os nga kadutaan, nga ginapuy-an sang mga Nefinhon; kag gani ginpahamtang ni Moroni ang bandera sang kahilwayan sa mga Nefinhon.

37 Kag nagsugod sila nga makaangkon liwat sing paghidaet sa kadutaan; kag gani napaluntad nila ang paghidaet sa kadutaan tubtob sa malapit na lang matapos ang ika-disenuebe nga tuig sang pagginahum sang mga hukom.

38 Kag si Helaman kag ang mga mataas nga pari nagpaluntad man sang kahusayan sa simbahan; huo, bisan sa sulod sang apat ka tuig nakaangkon sila sing dako nga paghidaet kag pagkinasadya sa simbahan.

39 Kag natabo ini nga madamo ang nagkalamatay, nga malig-on nga nagapati nga ang ila mga kalag natubos na sang Ginuong Jesucristo; gani nagtaliwan sila sa kalibutan nga nagakasadya.

40 Kag may pila nga nagkalamatay sa mga hilanat, nga sa pila ka tinion sa sulod sang tuig nangin tuman kasunson sa duta—apang indi gid tuman sa mga hilanat, tungod sang labing maayo nga mga kalidad sang madamo nga mga tanom kag mga gamot nga ginhanda sang Dios agud makakas ang kabangdanan sang mga balatian, nga sa sini ang mga tawo napaidalom tungod sa kinaiya sang klima—

41 Apang madamo ang nagkalamatay sa katigulangon; kag yadtong mga nagkalamatay sa pagtuo kay Cristo malipayon sa iya, nga dapat naton nga patihan.