1 Kag natabo ini nga sanday Alma kag Amulek ginsugo nga maghalin sa sina nga siyudad; kag naghalin sila, kag nagkadto sa duta sang Sidom; kag tan-awa, didto nasalapoan nila ang tanan nga katawhan nga naghalin sa duta sang Amonihas, nga ginpanabog kag ginpamato, tungod nagpati sila sa mga pulong ni Alma.

2 Kag ginsaysay nila sa ila ang tanan nga natabo sa ila mga asawa kag mga kabataan, kag parte man sa ila mga kaugalingon, kag ang gahum sang ila pagkahilway.

3 Kag amo man si Zisrom nagamasakit sa Sidom, nga may mataas nga hilanat, nga gintuga sang dako nga mga pag-antos sang iya kaisipan tungod sang iya kalainan, kay naghunahuna sia nga sanday Alma kag Amulek wala na; kag naghunahuna sia nga ginpamatay sila tungod sang iya kalainan. Kag ining dako nga sala, kag madamo sang iban pa niya nga mga sala, nagtublag gid sang iya kaisipan tubtob nga ini nangin tuman ka masinulub-on, nga wala sing makatabang; gani nagsugod sia nga mapaso sang nagabaga nga kainit.

4 Karon, sang nabatian niya nga sanday Alma kag Amulek yara sa duta sang Sidom, ang iya tagipusuon nagsugod nga magpakaisog; kag nagpadala sia sing isa ka mensahe gilayon sa ila nga nagapangabay sa ila nga magkadto sa iya.

5 Kag natabo ini nga nagkadto sila gilayon, nga nagatuman sang mensahe nga ginpadala niya sa ila, kag nagsulod sila sa balay sa kay Zisrom; kag nakita nila sia sa iya hiligdaan, nga nagamasakit, nga tuman kaluya nga may mataas nga hilanat; kag ang iya man kaisipan nangin tuman ka masinulub-on tungod sang iya mga kalainan; kag sang nakita niya sila gin-untay niya ang iya kamot, kag nagpakitluoy sa ila nga paayohon nila sia.

6 Kag natabo ini nga si Alma nagsiling sa iya nga ginauyatan sia sa kamot: Nagapati ka bala sa gahum ni Cristo tuhoy sa kaluwasan?

7 Kag nagsabat sia kag nagsiling: Huo, nagapati ako sa tanan nga pulong nga imo ginpanudlo.

8 Kag si Alma nagsiling: Kon nagapati ka sa pagtubos ni Cristo mahimo ka nga mag-ayo.

9 Kag nagsiling sia: Huo, nagapati ako suno sa imo mga pulong.

10 Kag dayon si Alma matunog nga nagpangamuyo sing hugot sa Ginuo nga nagasiling: O Ginuo nga amon Dios, maluoy ka sa sini nga tawo, kag paayoha sia suno sa iya pagtuo nga yara kay Cristo.

11 Kag sang nasiling ni Alma ining mga pulong, si Zisrom gilayon nga nagtumbo sa iya mga tiil, kag nagsugod sa paglakat; kag ini nahimo sa dako nga kakibot sang tanan nga katawhan; kag naglapnag ang istorya parte sini sa bilog nga duta sang Sidom.

12 Kag ginbunyagan ni Alma si Zisrom sa Ginuo; kag nagsugod sia nga magwali sa katawhan sa sina nga tion.

13 Kag si Alma nagpahamtang sing isa ka simbahan sa duta sang Sidom, kag nagkonsagrar sang mga pari kag mga manunudlo sa duta, agud magbunyag sang kon sin-o man ang maluyag nga mabunyagan sa Ginuo.

14 Kag natabo ini nga madamo sila; kay nagpanong sila halin sa tanan nga rehiyon sa palibot sang Sidom, kag ginbunyagan.

15 Apang parte sa katawhan nga yara sa duta sang Amonihas, nagpabilin sila gihapon nga matig-a sing tagipusuon kag batinggilan nga katawhan; kag wala sila naghinulsol sang ila mga sala, nga ginapatungod ang tanan nga gahum nanday Alma kag Amulek sa yawa; kay iya sila sang pagtuluohan ni Nehor, kag wala nagapati sa paghinulsol sang ila mga sala.

16 Kag natabo ini nga sanday Alma kag Amulek, si Amulek nga gintalikdan ang tanan niya nga bulawan, kag mga pilak, kag ang iya malahalon nga mga butang, nga yara sa duta sang Amonihas, para sa pulong sang Dios, sia nga ginsikway sadtong iya anay mga abyan kag sang iya man amay kag sang iya mga paryente;

17 Gani, pagkatapos nga si Alma nagpahamtang sang simbahan sa Sidom, nga nakita ang dako nga pagpaumod, huo, nga nakita nga ang katawhan nagpaumod parte sa bugal sang ila mga tagipusuon, kag nagsugod nga magpaubos sang ila mga kaugalingon sa atubang sang Dios, kag nagsugod nga magtipon sang ila mga kaugalingon sa ila mga santuaryo agud magsimba sa Dios sa atubang sang altar, nga nagabantay kag nagapangamuyo sing dalayon, agud maluwas sila halin kay Satanas, kag halin sa kamatayon, kag halin sa kalaglagan—

18 Karon pareho sang akon nasiling, si Alma nga nakita ining tanan nga butang, gani gindala niya si Amulek kag nagkadto sa duta sang Zarahemla, kag gindala sia sa iya kaugalingon nga puluy-an, kag ginbuligan sia sa iya mga pag-antos, kag ginpabakod sia sa Ginuo.

19 Kag gani natapos ang ika-napulo nga tuig sang pagginahum sang mga hukom sa katawhan ni Nefi.