1 Kag natabo ini sa pagsugod sang ika-lima nga tuig sang ila pagginahum may nagsugod nga pagbinaisay sa tunga sang katawhan; kay isa ka lalaki, nga ginatawag nga Amlici, sia nga isa ka tuman katuso nga tawo, huo, isa ka maalam nga tawo suno sa kaalam sang kalibutan, sia nga miyembro sang katilingban sang lalaki nga nagpatay kay Gideon paagi sa espada, nga ginsentensyahan sang kamatayon suno sa layi—

2 Karon ining si Amlici, paagi sa iya pagkatuso, nakaganyat sing madamo nga katawhan nga magsunod sa iya; bisan sa pagkadamo nga nagsugod sila nga mangin tuman kagamhanan; kag nagsugod sila sa paghimakas sa pagpapungko kay Amlici nga mangin hari sang katawhan.

3 Karon ginkabalak-an ini sang katawhan sang simbahan, kag sang tanan man sinang mga wala naganyat sa pagsunod sa mga pagpanghaylo ni Amlici; kay nahibal-an nila nga suno sa ila layi ang amo sina nga mga butang kinahanglan nga ipahamtang suno sa tingug sang katawhan.

4 Gani, kon mahimo lang nga makuha ni Amlici ang suporta sang katawhan, sia, nga isa ka malain nga tawo, magakuha sa ila sang ila mga kinamatarong kag mga pribilihiyo sa simbahan; kay tuyo niya nga gub-on ang simbahan sang Dios.

5 Kag natabo ini nga ang katawhan nagtililipon sang ila mga kaugalingon sa bilog nga duta, ang tagsa ka tawo suno sa iya kaisipan, kon ini para ukon batok kay Amlici, sa nagkalain-lain nga mga grupo, nga may madamo nga mga pagbinaisay kag makatilingala nga mga pag-ilinaway sang isa kag isa.

6 Kag gani nagtililipon sila sang ila mga kaugalingon agud ipahayag ang ila mga tingug parte sa sina nga butang; kag ginpahamtang ang mga ini sa atubang sang mga hukom.

7 Kag natabo ini nga ang tingug sang katawhan nagpahayag batok kay Amlici, nga wala sia paghimoa nga hari sang katawhan.

8 Karon nagtuga ini sing tuman nga kalipay sa mga tagipusuon sinang mga batok sa iya; apang ginsugyot ni Amlici inang mga nagasuporta sa iya nga maakig batok sinang mga wala nagasuporta sa iya.

9 Kag natabo ini nga nagtililipon sila sang ila mga kaugalingon, kag ginkonsagrar si Amlici nga mangin hari nila.

10 Karon sang si Amlici nangin hari na nila ginsugo niya sila nga magkapot sila sang mga armas batok sa ila mga kauturan; kag ini iya ginhimo agud mapaidalom sila sa iya.

11 Karon ang katawhan ni Amlici ginkilala sa ngalan ni Amlici, nga ginatawag nga mga Amlicianhon; kag ang nabilin gintawag nga mga Nefinhon, ukon ang katawhan sang Dios.

12 Gani ang katawhan sang mga Nefinhon nakahibalo sang tinutuyo sang mga Amlicianhon, kag gani naghanda sila sa pagsugata sa ila; huo, gin-armasan nila ang ila mga kaugalingon sang mga espada, kag sang mga sundang, kag sang mga pana, kag sang mga baslay, kag sang mga bato, kag sang mga tirador, kag sang tanan nga sari sang mga armas sa giyera, sang tagsa ka sahi.

13 Kag gani nakahanda sila sa pagsugata sang mga Amlicianhon sa tion sang ila pag-abot. Kag may pinili nga mga kapitan, kag mas mataas nga mga kapitan, kag puno nga mga kapitan, suno sa ila kadamuon.

14 Kag natabo ini nga gin-armasan ni Amlici ang iya mga tinawo sang tanan nga sari sang mga armas sa giyera sang tagsa ka sahi; kag nagpili man sia sang mga tagdumala kag mga lider sa iya katawhan nga magpanguna sa ila sa pagpakig-away batok sa ila mga kauturan.

15 Kag natabo ini nga ang mga Amlicianhon nagtaklad sa bungyod sang Amnahu, nga yara sa este sang suba sang Sidon, nga nagailig malapit sa duta sang Zarahemla, kag didto nagsugod sila sa pagpakig-away sa mga Nefinhon.

16 Karon si Alma, nga amo ang puno nga hukom kag ang gobernador sang katawhan ni Nefi, gani nagtaklad sia upod ang iya katawhan, huo, upod ang iya mga kapitan, kag puno nga mga kapitan, huo, sa unahan sang iya mga kasoldadohan, batok sa mga Amlicianhon agud magpakig-away.

17 Kag nagsugod sila sa pagpamatay sang mga Amlicianhon sa bungyod sa este sang Sidon. Kag ang mga Amlicianhon nakig-away sa mga Nefinhon sa dako nga kusog, sa bagay nga madamo sang mga Nefinhon ang nagkalatumba sa atubang sang mga Amlicianhon.

18 Apang ginpabakod sang Ginuo ang kamot sang mga Nefinhon, sa bagay nga ginpamatay nila ang mga Amlicianhon sa dako nga pagpamatay, sa bagay nga nagsugod sila sa pagpalagyo sa ila atubang.

19 Kag natabo ini nga ginpanglagas sang mga Nefinhon ang mga Amlicianhon sa bilog sina nga adlaw, kag ginpamatay sila sa dako nga pagpamatay, sa bagay nga may nagkalamatay sa mga Amlicianhon nga dose ka libo lima ka gatos kag treinta’y dos ka mga tawo; kag may nagkalamatay sa mga Nefinhon nga anum ka libo lima ka gatos kag sisenta’y dos ka mga tawo.

20 Kag natabo ini nga sang indi na malagas ni Alma ang mga Amlicianhon, ginsugo niya ang iya katawhan nga magpatindog sang ila mga tolda sa patag sang Gideon, ang patag nga ginatawag sunod sinang Gideon nga ginpatay sang kamot ni Nehor paagi sa espada, kag sa sini nga patag ang mga Nefinhon nagpatindog sang ila mga tolda para sa sina nga gab-i.

21 Kag si Alma nagpadala sang mga espiya agud sundon ang nagkalabilin sang mga Amlicianhon, agud mahibal-an niya ang ila mga plano kag ang ila mga padihot, nga sa sini mabantayan niya ang iya kaugalingon batok sa ila, agud maamligan niya ang iya katawhan halin sa pagkalaglag.

22 Karon inang iya mga ginpadala agud magpanilag sa kampo sang mga Amlicianhon ginatawag nga sanday Zeram, kag Amnor, kag Manti, kag Limher; amo ini sila ang mga naggwa upod ang ila mga tinawo agud magpanilag sa kampo sang mga Amlicianhon.

23 Kag natabo ini nga pagkaaga nagbalik sila sa kampo sang mga Nefinhon nga tuman nga nagadali-dali, nga dako ang kakibot, kag nakabatyag sing tuman nga kahadlok nga nagasiling:

24 Tan-awa, ginsundan namon ang kampo sang mga Amlicianhon, kag sa amon dako nga kakibot, sa duta sang Minon, sa ibabaw sang duta sang Zarahemla, sa alagyan padulong sa duta sang Nefi, nalantawan namon ang sa pagkadamo nga kasoldadohan sang mga Lamanhon; kag tan-awa, ang mga Amlicianhon nagtingob sa ila;

25 Kag ginasalakay nila ang aton mga kauturan sa sina nga duta; kag nagapinalagyo sila sa ila atubang upod ang ila mga panong, kag ang ila mga asawa, kag ang ila mga anak, padulong sa aton siyudad; kag luwas lang nga magdali-dali kita sakupon nila ang aton siyudad, kag pamatyon ang aton mga amay, kag ang aton mga asawa, kag ang aton mga anak.

26 Kag natabo ini nga gindala sang katawhan ni Nefi ang ila mga tolda, kag naggwa sa patag sang Gideon padulong sa ila siyudad, nga amo ang siyudad sang Zarahemla.

27 Kag tan-awa, samtang nagatabok sila sa suba sang Sidon, ang mga Lamanhon kag ang mga Amlicianhon, nga daw halos pareho ang kadamuon sa mga balas sang dagat, nagsalakay sa ila agud laglagon sila.

28 Apang, ang mga Nefinhon tungod ginpabakod sang kamot sang Ginuo, kag nagpangamuyo sing hugot sa iya nga luwason niya sila halin sa mga kamot sang ila mga kaaway, gani ginpamatian sang Ginuo ang ila mga pagpakitluoy, kag ginpabakod sila, kag ang mga Lamanhon kag ang mga Amlicianhon nagkalatumba sa ila atubang.

29 Kag natabo ini nga si Alma nakig-away batok kay Amlici paagi sa espada, sing atubangay; kag nag-inaway sila sa lubos nga kusog, sa isa kag isa.

30 Kag natabo ini nga si Alma, nga isa ka tawo sang Dios, nga ginapahulag sing tuman nga pagtuo, nagpakitluoy nga nagasiling: O Ginuo, maluoy ka kag luwasa ang akon kabuhi, agud nga mangin instrumento ako sa imo mga kamot sa pagluwas kag pag-amlig sining katawhan.

31 Karon sang nasiling ni Alma ining mga pulong nakig-away sia liwat batok kay Amlici; kag napabakod sia, sa bagay nga napatay niya si Amlici paagi sa espada.

32 Kag nakig-away man sia sa hari sang mga Lamanhon; apang ang hari sang mga Lamanhon nalagyo halin sa atubang ni Alma kag ginpadala ang iya mga bantay agud magpakig-away kay Alma.

33 Apang si Alma, upod ang iya mga bantay, nakig-away batok sa mga bantay sang hari sang mga Lamanhon tubtob nga napamatay niya kag napanabog sila pabalik.

34 Kag gani nahawanan niya ang duta, ukon sa mas maathag ang pangpang, nga yara sa weste nga bahin sang suba sang Sidon, nga ginapanghaboy ang mga lawas sang mga Lamanhon nga nagkalamatay sa mga tubig sang Sidon, agud nga sa sini ang iya katawhan may lugar sa pagtabok kag pagpakig-away batok sa mga Lamanhon kag sa mga Amlicianhon sa weste nga bahin sang suba sang Sidon.

35 Kag natabo ini nga sang nakatabok na sila tanan sa suba sang Sidon nga ang mga Lamanhon kag ang mga Amlicianhon nagsugod sa pagpalagyo sa ila atubang, bisan pa nga tuman sila kadamo nga indi sila maisip.

36 Kag nalagyo sila sa atubang sang mga Nefinhon padulong sa kamingawan sa weste kag norte, palayo sa unhan sang mga dulonan sang duta; kag ginlagas sila sang mga Nefinhon sa tanan nila nga kusog, kag ginpamatay sila.

37 Huo, ginsugata sila sa bisan diin nayon, kag ginpamatay kag ginpanabog, tubtob nga naglinapta sila sa weste, kag sa norte, tubtob nga nakalab-ot sila sa kamingawan, nga ginatawag nga Hermon; kag amo yadto inang bahin sang kamingawan nga may madamo sang maila kag manunukob nga mga sapat.

38 Kag natabo ini nga madamo ang nagkalamatay sa kamingawan tungod sang ila mga pilas, kag ginpanukob sinang mga sapat kag amo man sang mga buwitre sang kahanginan; kag ang ila mga tul-an nakit-an, kag ginpanumpok sa duta.