1 Kag karon natabo ini, sa pagsugod sang ika-beynte singko nga tuig sang pagginahum sang mga hukom sa katawhan ni Nefi, nga napaluntad nila ang paghidaet sa tunga sang katawhan sang Lehi kag sang katawhan sang Morianton parte sa ila mga kadutaan, kag ginsugdan ang ika-beynte singko nga tuig sa paghidaet;

2 Apang, wala nila napalawig ang lubos nga paghidaet sa duta, kay may nagsugod nga isa ka pagbinaisay sa tunga sang katawhan parte sa puno nga hukom nga si Pahoran; kay tan-awa, may isa ka bahin sang katawhan nga maluyag nga liwaton ang pila ka pat-od nga mga bahin sang layi.

3 Apang tan-awa, indi pagliwaton ni Pahoran kag indi niya pagtugotan nga liwaton ang layi; gani, wala sia nagpamati sa sinang mga nagpadala sang ila mga tingug upod ang ila mga pangabay parte sa pagliwat sang layi.

4 Gani, yadtong mga maluyag nga liwaton ang layi naakig sa iya, kag nagtinguha nga indi na sia mangin puno nga hukom sa bug-os nga kadutaan; gani may nagtuhaw nga isa ka mainit nga pagbinaisay parte sining bagay, apang indi tubtob sa pagpaagay sang dugo.

5 Kag natabo ini nga yadtong mga maluyag nga papanaugon si Pahoran halin sa hukom-lingkuranan ginatawag nga mga maki-hari kay luyag nila nga liwaton ang layi sa paagi nga laglagon ang hilway nga panggobyerno kag mapahamtang ang isa ka hari sa bug-os nga kadutaan.

6 Kag yadtong mga maluyag nga magpabilin si Pahoran bilang puno nga hukom sa bug-os nga kadutaan nagtawag sa ila mga kaugalingon nga maki-kahilwayan; kag gani may pagbahin-bahin sa tunga nila, kay ang mga maki-kahilwayan nagsumpa ukon nagpakighisugot sa pag-amlig sang ila mga kinamatarong kag sang mga pribilihiyo sang ila relihiyon paagi sa isa ka hilway nga panggobyerno.

7 Kag natabo ini nga ining bagay sang ila pagbinais ginhusay paagi sa tingug sang katawhan. Kag natabo ini nga ang tingug sang katawhan nagpahayag sang pagsakdag sa mga maki-kahilwayan, kag si Pahoran nagpabilin sa hukom-lingkuranan, nga nagtuga sang tuman nga pagkinasadya sa tunga sang mga kauturan ni Pahoran kag amo man sang madamo nga katawhan sang kahilwayan, nga nagpahipos man sang mga maki-hari, sa bagay nga wala sila nangisog sa pagsupak kundi nga napilitan sa pagsakdag sang kawsa sang kahilwayan.

8 Karon inang mga pabor sa mga hari amo ina sila ang may dungganon nga pagkabun-ag, kag nagahandum sila nga mangin mga hari; kag ginsakdag sila sinang mga nagahandum sang gahum kag awtoridad sa katawhan.

9 Apang tan-awa, mabudlay kaayo ini nga tion para sa amo nga mga pagbinaisay nga matabo sa tunga sang katawhan ni Nefi; kay tan-awa, ginsugyot liwat ni Amalikia ang mga tagipusuon sang katawhan sang mga Lamanhon batok sa katawhan sang mga Nefinhon, kag nagapanipon sia sang mga soldado halin sa tanan nga bahin sang iya kadutaan, kag ginaarmasan sila, kag ginahanda para sa giyera upod ang tanan nga katutum; kay nagsumpa sia nga imnon ang dugo ni Moroni.

10 Apang tan-awa, makita naton nga padaso-daso ang promisa nga iya ginhimo; apang, ginhanda niya ang iya kaugalingon kag ang iya mga kasoldadohan agud magpakig-away batok sa mga Nefinhon.

11 Karon ang iya mga kasoldadohan indi tuman kadako pareho sang una, tungod sang madamo nga linibo nga nagkalamatay paagi sa kamot sang mga Nefinhon; apang sa pihak sang ila dako nga pagkapierde, si Amalikia nakatipon sing isa ka makahalawhaw kadako nga kasoldadohan, sa bagay nga wala sia nahadlok magdulhog sa duta sang Zarahemla.

12 Huo, bisan si Amalikia mismo nagdulhog sa pagpanguna sang mga Lamanhon. Kag natabo ini sa ika-beynte singko nga tuig sang pagginahum sang mga hukom; kag sa amo man sini nga tion nga nagsugod sila sa paghusay sang ila mga pagbinaisay parte sa puno nga hukom nga si Pahoran.

13 Kag natabo ini nga sang nabatian sang mga tawo nga ginatawag nga mga maki-hari nga ang mga Lamanhon nagapadulhog agud magpakig-away batok sa ila, nalipay sila sa ila mga tagipusuon; kag nagpamalibad sila sa pagkapot sing mga armas, kay naakig sila sing tuman sa puno nga hukom, kag amo man sa katawhan sang kahilwayan, sa bagay nga indi sila magkapot sing mga armas agud pangapinan ang ila pungsod.

14 Kag natabo ini nga sang nakita ini ni Moroni, kag nakita man niya nga ang mga Lamanhon nagapadulong sa mga dulonan sang duta, naakig sia sing tuman tungod sang pagkabatinggilan sinang katawhan nga iya ginpangabudlayan sing tuman agud maamligan; huo, naakig sia sing tuman; ang iya kalag napuno sing kaakig batok sa ila.

15 Kag natabo ini nga nagpadala sia sing isa ka petisyon, upod ang tingug sang katawhan, sa gobernador sang duta, nga nagapangabay nga basahon niya ini, kag hatagan sia (si Moroni) sing gahum agud piliton ang mga nagsilipak nga pangapinan ang ila pungsod ukon pamatyon sila.

16 Kay amo ini ang iya una nga alatipanon nga tapuson ang amo nga mga pagbinaisay kag mga pagrebelde sa tunga sang katawhan; kay tan-awa, amo ini ang nangin kabangdanan halin sadto sang tanan nila nga kalaglagan. Kag natabo ini nga gintugotan ini suno sa tingug sang katawhan.

17 Kag natabo ini nga nagsugo si Moroni nga salakayon sang iya kasoldadohan yadtong mga maki-hari, agud butongon paidalom ang ila bugal kag ang ila pagpakadungganon kag itupong sila sa duta, ukon magakapot sila sang mga armas kag sakdagon ang kawsa sang kahilwayan.

18 Kag natabo ini nga ang mga kasoldadohan nagsalakay batok sa ila; kag ginbutong nila paidalom ang ila bugal kag ang ila pagpakadungganon, sa bagay nga sang nagbayaw sila sang ila mga armas sa giyera agud magpakig-away batok sa mga tinawo ni Moroni ginpanglabo sila kag ginpanghamyang sa duta.

19 Kag natabo ini nga may apat ka libo sadtong mga nagsilipak nga ginpanglabo sang espada; kag yadtong ila mga lider nga wala mapatay sa inaway ginpangdakop kag ginhunong sa bilanggoan, kay wala na sing tion para sa pagbista sa ila sa sini nga tion.

20 Kag ang nagkalabilin sadtong mga nagsilipak, sangsa panglab-on sila sa duta paagi sa espada, nag-ampo sa bandera sang kahilwayan, kag napilitan sa pagpataas sang bandera sang kahilwayan sa ila mga tore, kag sa ila mga siyudad, kag sa pagkapot sang mga armas sa pagpangapin sang ila pungsod.

21 Kag gani gintapos ni Moroni yadtong mga maki-hari, sa bagay nga wala na sing nakilala pa sa ngalan nga maki-hari; kag gani gintapos niya ang pagkabatinggilan kag ang bugal sinang katawhan nga nagapangangkon sang dugo sang pagkadungganon; sa baylo gindala sila sa pagpaubos sang ila mga kaugalingon pareho sang ila mga kauturan, kag sa pagpakig-away sing maisog para sa ila kahilwayan halin sa pagkaulipon.

22 Tan-awa, natabo ini nga samtang si Moroni yara sa amo nga pagpauntat sang mga giyera kag mga pagbinaisay sa tunga sang iya kaugalingon nga katawhan, kag pagpaidalom sa ila sa paghidaet kag sibilisasyon, kag paghimo sing mga pagsulundan agud maghanda para sa giyera batok sa mga Lamanhon, tan-awa, ang mga Lamanhon nakaabot na sa duta sang Moroni, nga yara sa mga dulonan sa tupad sang baybayon.

23 Kag natabo ini nga ang mga Nefinhon indi tuman nga mabakod sa siyudad sang Moroni; gani ginpanabog sila ni Amalikia, nga madamo ang ginpamatay. Kag natabo ini nga naangkon ni Amalikia ang siyudad, huo, naangkon ang tanan nila nga pamakod.

24 Kag yadtong mga nagpinalagyo halin sa siyudad sang Moroni nagkadto sa siyudad sang Nefias; kag amo man ang katawhan sang siyudad sang Lehi nagtililipon sang ila mga kaugalingon, kag naghimo sing mga pagpanghanda kag nakahanda sa pag-atubang sang mga Lamanhon sa inaway.

25 Apang natabo ini nga si Amalikia indi magtugot sa mga Lamanhon nga magsalakay batok sa siyudad sang Nefias agud magpakig-away, kundi nga ginpapabilin sila sa ubos malapit sa baybayon, nga nagabilin sang mga tinawo sa tagsa ka siyudad agud amligan kag pangapinan ini.

26 Kag gani nagpadayon sia, nga ginaagaw ang madamo nga siyudad, ang siyudad sang Nefias, kag ang siyudad sang Lehi, kag ang siyudad sang Morianton, kag ang siyudad sang Omner, kag ang siyudad sang Gid, kag ang siyudad sang Mulek, nga ang tanan sini yara sa este nga mga dulonan sa tupad sang baybayon.

27 Kag gani naangkon sang mga Lamanhon, paagi sa katusohan ni Amalikia, ang sa pagkadamo nga siyudad, paagi sa ila di-maisip nga mga kasoldadohan, nga ang tanan sini malig-on nga napamakuran suno sa paagi sang mga pagpamakod ni Moroni; nga ang tanan sini naghatag sing mga kuta para sa mga Lamanhon.

28 Kag natabo ini nga nagpanglakaton sila padulong sa mga dulonan sang duta nga Bugana nga nagapanabog sang mga Nefinhon sa ila atubang kag nagapamatay sang madamo.

29 Apang natabo ini nga ginsugata sila ni Teancum, nga amo ang nagpatay sadto kay Morianton kag gin-unahan ang iya katawhan sa iya pagpalagyo.

30 Kag natabo ini nga gin-unahan man niya si Amalikia, samtang nagapanglakaton sia upod ang iya madamo nga kasoldadohan agud maangkon niya ang duta nga Bugana, kag amo man ang duta pa-norte.

31 Apang tan-awa napaslawan sia tungod napaisol sia ni Teancum kag sang iya mga tinawo, kay bantug sila nga mga kasoldadohan; kay ang tagsa ka tawo ni Teancum naglabaw sa mga Lamanhon sa ila kusog kag sa ila kasagad sa giyera, sa bagay nga nakaagom sila sing bentaha batok sa mga Lamanhon.

32 Kag natabo ini nga gintublag nila sila, sa bagay nga ginpamatay nila sila bisan tubtob nga madulom na. Kag natabo ini nga si Teancum kag ang iya mga tinawo nagpatindog sang ila mga tolda sa mga dulonan sang duta nga Bugana; kag si Amalikia nagpatindog sang iya mga tolda sa mga dulonan sa baybay malapit sa baybayon, kag sa amo nga paagi sila napanabog.

33 Kag natabo ini nga pag-abot sang kagab-ihon, si Teancum kag ang iya alagad sekreto nga nagtiid kag naggwa sa kagab-ihon, kag nagkadto sa kampo ni Amalikia; kag tan-awa, dinaug sila sang katulugon tungod sang ila tuman nga kakapoy nga gintuga sang mga ginpanghikot kag kainit sang adlaw.

34 Kag natabo ini nga si Teancum sekreto nga nagtiid pasulod sa tolda sang hari, kag gintuhog sang sibat ang iya tagipusuon; kag gilayon niya nga napatay ang hari sa bagay nga wala sia makapamukaw sa iya mga alagad.

35 Kag nagbalik sia liwat sing patago sa iya kaugalingon nga kampo, kag tan-awa, ang iya mga tinawo nagakatulog, kag ginpamukaw niya sila kag ginsugiran sila sang tanan nga butang nga iya ginhimo.

36 Kag nagsugo sia nga maghanda ang iya mga kasoldadohan kay basi ang mga Lamanhon nakabugtaw na kag magsalakay sa ila.

37 Kag gani natapos ang ika-beynte singko nga tuig sang pagginahum sang mga hukom sa katawhan ni Nefi; kag gani natapos ang mga adlaw ni Amalikia.