1 Karon anak ko, yari ang dugang pa nga luyag ko nga ihambal sa imo; kay nahangpan ko nga ang imo kaisipan ginatublag parte sa pagkabanhaw sang mga minatay.

2 Tan-awa, ginasiling ko sa imo, nga wala sing pagkabanhaw—ukon, masiling ko, sa iban nga pulong, nga ining dutan-on indi makasul-ob sang pagkawala’y kamatayon, ining madunot indi makasul-ob sang wala’y pagkadunot—tubtob pagkatapos sang pagkari ni Cristo.

3 Tan-awa, ginapahanabo niya ang pagkabanhaw sang mga minatay. Apang tan-awa, anak ko, ang pagkabanhaw wala pa. Karon, ginapahayag ko sa imo ang isa ka misteryo; apang, may madamo nga mga misteryo nga natago, sa bagay nga wala sing bisan sin-o nga nakahibalo sang mga ini luwas ang Dios mismo. Apang ipakita ko sa imo ang isa ka butang nga ginpamangkot ko sing matutum sa Dios agud nga mahibal-an ko—nga amo ang parte sa pagkabanhaw.

4 Tan-awa, may tion nga natalana nga ang tanan magabangon halin sa mga minatay. Karon kon san-o ini nga tion mag-abot wala sing bisan sin-o nga nakahibalo; apang ang Dios nakahibalo sang tion nga gintalana.

5 Karon, kon may isa man ka tion, ukon ika-duha nga tion, ukon ika-tatlo nga tion, kon san-o ang mga tawo magabangon halin sa mga minatay, indi na ini importante; kay ang Dios nakahibalo sining tanan nga butang; kag tama na sa akon nga mahibal-an nga amo sini ang matabo—nga may tion nga gintalana nga ang tanan magabangon halin sa mga minatay.

6 Karon kinahanglanon gid nga may lang-at sa ulot sang tion sang kamatayon kag sa tion sang pagkabanhaw.

7 Kag karon mamangkot ako kon ano ang matabo sa mga kalag sang mga tawo halin sa sini nga tion sang kamatayon tubtob sa tion nga gintalana para sa pagkabanhaw?

8 Karon kon may kapin pa sa isa ka tion nga gintalana para sa mga tawo nga magbangon indi na ini importante; kay ang tanan wala nagakapatay sing dulungan, kag indi na ini importante; ang tanan pareho nga isa ka adlaw sa Dios, kag ang tion tawo lamang ang nagatakos.

9 Gani, may tion nga gintalana sa tawo nga magabangon sila halin sa mga minatay; kag may lang-at sa ulot sang tion sang kamatayon kag sang pagkabanhaw. Kag karon, parte sining lang-at sang tion, kon ano ang matabo sa mga kalag sang mga tawo amo ang butang nga ginpamangkot ko sing matutum sa Ginuo agud mahibal-an; kag amo ini ang butang nga akon nahibal-an.

10 Kag kon mag-abot ang tion nga ang tanan magabangon, dayon mahibal-an nila nga ang Dios nakahibalo sang tanan nga tinion nga gintalana sa tawo.

11 Karon, parte sa kahimtangan sang kalag sa ulot sang kamatayon kag sang pagkabanhaw—Tan-awa, ginpahibalo sa akon sing isa ka anghel, nga ang mga espiritu sang tanan nga tawo, pagkatapos gid nga maggwa sila sa sining mortal nga lawas, huo, ang mga espiritu sang tanan nga tawo, bisan kon sila maayo ukon malain, ginadala pauli sa sinang Dios nga naghatag sa ila sing kabuhi.

12 Kag dayon matabo ini, nga ang mga espiritu sinang mga matarong pagabatonon sa isa ka kahimtangan sang kalipayan, nga ginatawag nga paraiso, isa ka kahimtangan sang kapahuwayan, isa ka kahimtangan sang paghidaet, nga sa diin magapahuway sila halin sa tanan nila nga kabudlayan kag halin sa tanan nga kabalaka, kag kasubo.

13 Kag dayon matabo ini, nga ang mga espiritu sang mga malain, huo, nga mga makasasala—kay tan-awa, wala sila sing parte ukon bahin sang Espiritu sang Ginuo; kay tan-awa, ginpili nila ang malain nga mga buluhaton sangsa maayo; gani ang espiritu sang yawa nagsulod sa ila, kag nagpanag-iya sang ila balay—kag ang mga ini pagatabugon sa gwa nga kadudulman; mangin may paghibi, kag pagnguyngoy, kag pagbagrot sang mga ngipon, kag ini tungod sang ila kaugalingon nga kalainan, nga nadala nga bihag suno sa kabubut-on sang yawa.

14 Karon amo ini ang kahimtangan sang mga kalag sang mga malain, huo, sa kadudulman, kag isa ka kahimtangan sang malain, makahaladlok nga pagpaabot sang nagakalayo nga kasingkal sang kaakig sang Dios nga igabubo sa ila; gani magapabilin sila sa sining kahimtangan, amo man ang mga matarong sa paraiso, tubtob sa tion sang ila pagkabanhaw.

15 Karon, may pila nga nakahangop nga ining kahimtangan sang kalipayan kag ining kahimtangan sang kalisud sang kalag, sa wala pa ang pagkabanhaw, amo ang una nga pagkabanhaw. Huo, ginabaton ko nga mahimo ini nga matawag nga pagkabanhaw, ang pagpabangon sang espiritu ukon sang kalag kag ang pagkatalana sa ila sa kalipayan ukon kalisud, suno sa mga pulong nga ginpahayag.

16 Kag tan-awa, sa liwat nahambal ini, nga may una nga pagkabanhaw, ang pagkabanhaw sang tanan nga nagkabuhi sadto, ukon subong, ukon sa palaabuton, tubtob sa pagkabanhaw ni Cristo halin sa mga minatay.

17 Karon, wala kita nagahunahuna nga ining una nga pagkabanhaw, nga nasambit sa sini nga paagi, mahimo nga mangin ang pagkabanhaw sang mga kalag kag ang pagtalana sa ila sa kalipayan ukon kalisud. Indi ka makahunahuna nga amo ini ang buot silingon sini.

18 Tan-awa, ginasiling ko sa imo, Indi; kundi nga nagakahulugan ini sang pagtingob liwat sang kalag kag sang lawas sadtong mga halin pa sa mga adlaw ni Adan tubtob sa pagkabanhaw ni Cristo.

19 Karon, kon ang mga kalag kag mga lawas sadtong mga ginatumod magatingob liwat sing dulungan, ang mga malain kag amo man ang mga matarong, indi ako makasiling; husto na, nga ginasiling ko nga tanan sila magabangon, ukon sa iban nga pulong, ang ila pagkabanhaw mahanabo antes sang pagkabanhaw sadtong mga nagkalamatay pagkatapos sang pagkabanhaw ni Cristo.

20 Karon, anak ko, wala ako nagasiling nga ang ila pagkabanhaw magadungan sa tion sang pagkabanhaw ni Cristo; kundi tan-awa, ginahatag ko ini bilang akon opinyon, nga ang mga kalag kag mga lawas magatingob liwat, sang mga matarong, sa pagkabanhaw ni Cristo, kag sa iya pagkayab sa langit.

21 Apang kon bala sa tion ini sang iya pagkabanhaw ukon pagkatapos, indi ako makasiling; apang ini lamang ang akon masiling, nga may lang-at sa ulot sang kamatayon kag sang pagkabanhaw sang lawas, kag isa ka kahimtangan sang kalag sa kalipayan ukon sa kalisud tubtob sa tion nga gintalana sang Dios nga ang mga minatay magabangon, kag magatingob liwat, pareho nga kalag kag lawas, kag pagadal-on sa pagtindog sa atubang sang Dios, kag hukman suno sa ila mga binuhatan.

22 Huo, ini ang magapahanabo sang pagpanumbalik sadtong mga butang nga ginpahayag paagi sa mga baba sang mga propeta.

23 Ang kalag igapanumbalik sa lawas, kag ang lawas sa kalag; huo, kag ang tagsa ka butkon kag tiil kag lutalutahan igapanumbalik sa iya lawas; huo, bisan isa ka buhok sang ulo indi madula; kundi ang tanan nga butang igapanumbalik sa ila kinaandan kag perpekto nga lawas.

24 Kag karon, anak ko, amo ini ang pagpanumbalik nga ginpahayag paagi sa mga baba sang mga propeta—

25 Kag dayon ang mga matarong magasilak sa ginharian sang Dios.

26 Apang tan-awa, isa ka makahaladlok nga kamatayon ang matabo sa mga malain; kay mapatay sila suno sa mga butang nga angot sa pagkamatarong; kay mahigko sila, kag wala sing mahigko nga butang nga makapanubli sang ginharian sang Dios; kundi nga ginasikway sila, kag ginatalana sa pag-ambit sang mga bunga sang ila mga pinangabudlayan ukon sang ila mga binuhatan, nga nangin malain; kag magainom sila sang mga lagdo sing isa ka mapait nga ilimnan.