1 Karon, samtang si Amon nagapanudlo sing dalayon sa katawhan ni Lamoni sa amo nga paagi, magabalik kita sa kasaysayan ni Aaron kag sang iya mga kauturan; kay pagkatapos nga naghalin sia sa duta sang Midoni gintuytuyan sia sang Espiritu pakadto sa duta sang Nefi, bisan sa balay sang hari sang bug-os nga kadutaan luwas lamang nga ini duta sang Ismael; kag sia ang amay ni Lamoni.

2 Kag natabo ini nga nagkadto sia sa iya sa sulod sang palasyo sang hari, upod ang iya mga kauturan, kag nagduko sia sa atubang sang hari, kag nagsiling sa iya: Tan-awa, O hari, mga kauturan kami ni Amon, nga imo ginhilway halin sa bilanggoan.

3 Kag karon, O hari, kon pabayaan mo nga mabuhi kami, mangin imo kami mga alagad. Kag ang hari nagsiling sa ila: Tindog, kay ihatag ko sa inyo ang inyo mga kabuhi, kag indi ko pag-itugot nga mangin mga alagad ko kamo; kundi nga ipamilit ko nga tudloan ninyo ako; kay natublag ako sa kaisipan tungod sang kaalwan kag sang pagkaimportante sang mga pulong sang inyo utod nga si Amon; kag luyag ko nga mahibal-an ang kabangdanan kon ngaa wala sia naghalin sa Midoni upod sa inyo.

4 Kag si Aaron nagsiling sa hari: Tan-awa, ang Espiritu sang Ginuo nagtawag sa iya sa iban nga lugar; nagkadto sia sa duta sang Ismael agud tudloan ang katawhan ni Lamoni.

5 Karon ang hari nagsiling sa ila: Ano ining inyo ginsiling parte sa Espiritu sang Ginuo? Tan-awa, amo ini ang butang nga nagatublag sa akon.

6 Kag, ano ining ginsiling ni Amon—Kon maghinulsol kamo maluwas kamo, kag kon indi kamo maghinulsol, isikway kamo sa katapusan nga adlaw?

7 Kag si Aaron nagsabat sa iya kag nagsiling sa iya: Nagapati ka bala nga may Dios? Kag ang hari nagsiling: Nahibal-an ko nga ang mga Amaleknon nagasiling nga may Dios, kag gintugotan ko sila nga magpatindog sila sang mga santuaryo agud matipon nila ang ila mga kaugalingon agud simbahon sia. Kag kon karon masiling kamo nga may Dios, tan-awa magapati ako.

8 Kag karon sang nabatian ini ni Aaron, nagsugod sa pagkasadya ang iya tagipusuon, kag nagsiling sia: Tan-awa, pat-od gid nga pareho nga nagakabuhi ka, O hari, may yara sang Dios.

9 Kag ang hari nagsiling: Ang Dios bala amo inang Dakong Espiritu nga nagdala sang aton mga amay halin sa duta sang Jerusalem?

10 Kag si Aaron nagsiling sa iya: Huo, sia inang Dakong Espiritu, kag gintuga niya ang tanan nga butang sa langit kag sa duta. Nagapati ka bala sini?

11 Kag nagsiling sia: Huo, nagapati ako nga gintuga sang Dako nga Espiritu ang tanan nga butang, kag ginapangabay ko nga sugiran mo ako parte sining tanan nga butang, kag magapati ako sa imo mga pulong.

12 Kag natabo ini nga sang nakita ni Aaron nga ang hari magapati sa iya mga pulong, nagsugod sia halin sa pagtuga kay Adan, nga ginabasa ang balaan nga mga kasulatan sa hari—kon paano gintuga sang Dios ang tawo sa iya kaugalingon nga dagway, nga ginhatagan sia sang Dios sang mga kasugoan, kag tungod sang paglapas, ang tawo nahulog.

13 Kag ginpaathag ni Aaron sa iya ang balaan nga mga kasulatan halin sa pagtuga kay Adan, nga ginapaathag ang pagkahulog sang tawo sa iya atubang, kag ang ila dutan-on nga kahimtangan kag amo man ang plano sang pagtubos, nga ginhanda halin pa sa pagtuga sang kalibutan, paagi kay Cristo, para sa tanan nga sin-o man nga magpati sa iya ngalan.

14 Kag tungod ang tawo nahulog indi sia makaagom sang merito sa bisan ano nga butang nga sia lang sa iya kaugalingon; apang ang mga pag-antos kag kamatayon ni Cristo nagabayad para sa ila mga sala, paagi sa pagtuo kag paghinulsol, kag iban pa; kag ginabugto niya ang mga gapos sang kamatayon, agud ang lulubngan mangin wala sing kadalag-an, kag ang kasakit sang kamatayon pagadaugon paagi sa mga paglaum sa himaya; kag ginpaathag ni Aaron ining tanan nga butang sa hari.

15 Kag natabo ini nga pagkatapos nga mapaathag ni Aaron ining mga butang sa iya, ang hari nagsiling: Ano ang akon himuon agud maangkon ko ining kabuhi nga wala’y katapusan nga imo ginahambal? Huo, ano ang akon himuon agud mabun-ag ako sa Dios, nga ining malain nga espiritu magabot halin sa akon dughan, kag mabaton ang iya Espiritu, agud mapuno ako sang kalipay, agud indi ako pag-isikway sa katapusan nga adlaw? Tan-awa, siling niya, ihatag ko ang tanan nga yari sa akon, huo, talikdan ko ang akon ginharian agud mabaton ko ining dako nga kalipay.

16 Apang si Aaron nagsiling sa iya: Kon ginahandum mo ini nga butang, kon magduko ka sa atubang sang Dios, huo, kon hinulsulan mo ang tanan mo nga sala, kag magduko sa atubang sang Dios, kag manawag sa iya ngalan sa pagtuo, nga nagapati nga makabaton ka, gani mabaton mo ang paglaum nga imo ginahandum.

17 Kag natabo ini nga sang nahambal ni Aaron ining mga pulong, ang hari nagduko sa atubang sang Ginuo, sa iya mga tuhod; huo, bisan nga naghapa sia mismo sa duta, kag nagsinggit sing mabaskog nga nagasiling:

18 O Dios, ginhambalan ako ni Aaron nga may Dios; kag kon may Dios, kag kon ikaw ang Dios, mahimo bala nga ipakilala mo ang imo kaugalingon sa akon, kag talikdan ko ang tanan ko nga sala agud makilala ka, kag agud magbangon ako halin sa kamatayon, kag maluwas sa katapusan nga adlaw. Kag karon sang nasiling sang hari ining mga pulong, natumba sia nga daw patay na sia.

19 Kag natabo ini nga ang iya mga alagad nagdinalagan kag ginsugiran ang reyna sang tanan nga natabo sa hari. Kag ginkadtoan niya ang hari; kag sang nakita niya sia nga nagahigda nga daw patay na sia, kag amo man si Aaron kag ang iya mga kauturan nga nagatindog nga daw sila ang kabangdanan sang iya pagkatumba, naakig sia sa ila, kag nagsugo nga pangdakpon sila sang iya mga alagad, ukon sang mga alagad sang hari, kag pamatyon sila.

20 Karon nakita sang mga alagad ang kabangdanan sang pagkatumba sang hari, gani wala sila nangisog nga ipadapat ang ila mga kamot kanday Aaron kag sa iya mga kauturan; kag nagpakitluoy sila sa reyna nga nagasiling: Ngaa nagasugo ka nga pamatyon namon ining mga tawo, samtang tan-awa ang isa sa ila mas makusog pa sangsa amon tanan? Gani makalatumba kami sa ila atubang.

21 Karon sang nakita sang reyna ang kahadlok sang mga alagad nagsugod man sia nga mahadlok sing tuman kay basi may malain nga matabo sa iya. Kag ginsugo niya ang iya mga alagad nga maglakat sila kag panawgon ang katawhan agud pamatyon nila sanday Aaron kag ang iya mga kauturan.

22 Karon sang nakita ni Aaron ang determinasyon sang reyna, sia, nga nakahibalo man sang katig-a sang mga tagipusuon sang katawhan, nagkahadlok nga basi ang kadam-an magtililipon sang ila mga kaugalingon, kag may matabo nga isa ka dako nga pagbinaisay kag kinagamo sa tunga nila; gani gin-untay niya ang iya kamot kag ginpabangon ang hari halin sa duta, kag nagsiling sa iya: Tindog. Kag nagtindog sia sa iya mga tiil nga nagabaton sang iya kusog.

23 Karon nahimo ini sa atubang sang reyna kag sang madamo nga alagad. Kag sang nakita nila ini natingala gid sila, kag nagsugod nga mahadlok. Kag ang hari nagtindog, kag nagsugod nga magtudlo sa ila. Kag gintudloan niya sila sa bagay nga ang iya bug-os nga panimalay nahaylo sa Ginuo.

24 Karon may kadam-an nga nagtililipon tungod sang sugo sang reyna, kag may nagsugod nga dako nga mga pagkumod sa tunga nila tungod kay Aaron kag sa iya mga kauturan.

25 Apang nagtindog ang hari sa tunga nila kag nagtudlo sa ila. Kag napakalma sila tuhoy kay Aaron kag sa mga kaupod niya.

26 Kag natabo ini nga sang nakita sang hari nga ang katawhan napakalma, ginpatindog niya sanday Aaron kag ang iya mga kauturan sa tunga sang kadam-an, kag agud nga iwali nila ang pulong sa ila.

27 Kag natabo ini nga ang hari nagpadala sing pabantala sa bug-os nga kadutaan, sa tanan niya nga katawhan nga yara sa tanan niya nga kadutaan, nga yara sa tanan nga rehiyon sa palibot, nga ang dulonan nagalab-ot bisan pa sa dagat, sa este kag sa weste, kag napain halin sa duta sang Zarahemla sing isa ka makitid nga kamingawan, nga nagalab-ot halin sa dagat sa este bisan tubtob sa dagat sa weste, kag palibot sa mga dulonan sang baybayon, kag sa mga dulonan sang kamingawan nga yara sa norte sa tupad sang duta sang Zarahemla, lapos sa mga dulonan sang Manti, sa tupad sang ulo sang suba sang Sidon, nga nagailig halin sa este padulong sa weste—kag gani ang mga Lamanhon kag ang mga Nefinhon napain.

28 Karon, ang mas matamad nga bahin sang mga Lamanhon nagpuyo sa kamingawan, kag nag-istar sa mga tolda; kag naglinapta sila sa bug-os nga kamingawan sa weste, sa duta sang Nefi; huo, kag amo man sa weste sang duta sang Zarahemla, sa mga dulonan sa tupad sang baybayon, kag sa weste sa duta sang Nefi, sa lugar sang una nga ginpanubli sang ila mga amay, kag gani nagatambi sa tupad sang baybayon.

29 Kag amo man may madamo nga Lamanhon sa este sa tupad sang baybayon nga sa diin sila ginpanabog sang mga Nefinhon. Kag gani ang mga Nefinhon halos nalibutan sang mga Lamanhon; apang ang mga Nefinhon nagpanag-iya na sang tanan nga norte nga bahin sang kadutaan tubtob sa dulonan sang kamingawan, sa ulo sang suba sang Sidon, halin sa este padulong sa weste, palibot sa kilid sang kamingawan; sa norte, bisan tubtob nga nakaabot sila sa duta nga ila ginatawag nga Bugana.

30 Kag nagatambi ini sa duta nga ila ginatawag nga Kamingaw, tungod malayo ini katama pa-norte nga nagalab-ot ini sa duta nga may mga tawo sadto kag nalaglag, nga ang ila mga tul-an amo ang amon ginasiling, nga nasalapoan sang katawhan ni Zarahemla, tungod ini amo ang lugar nga una nila nga gindungkaan.

31 Kag nag-abot sila halin didto padulong sa kamingawan sa sur. Gani ang duta pa-norte ginatawag nga Kamingaw, kag ang duta pa-sur ginatawag nga Bugana, ini nga isa ka kamingawan nga napuno sang tanan nga sari sang maila nga sapat sang tagsa ka sahi, isa ka bahin sini naghalin sa duta pa-norte para sa pagkaon.

32 Kag karon, ang kalayuon sini isa lamang ka adlaw kag tunga nga pagpanglakaton para sa isa ka Nefinhon, sa dulonan sang Bugana kag sang duta nga Kamingaw, halin sa este padulong sa dagat sa weste; kag gani ang duta sang Nefi kag ang duta sang Zarahemla halos nalibutan sang tubig, nga didto may isa ka gamay nga makitid nga duta sa ulot sang duta pa-norte kag sa duta pa-sur.

33 Kag natabo ini nga ang mga Nefinhon nagpuyo sa duta nga Bugana, bisan halin sa este padulong sa weste nga dagat, kag gani ang mga Nefinhon sa ila kaalam, upod ang ila mga bantay kag ang ila mga kasoldadohan, nagbalabag sa mga Lamanhon sa sur, agud sa sini nga paagi wala na sila sing maangkon pa sa norte, agud indi nila masalakay ang duta pa-norte.

34 Gani ang mga Lamanhon wala na sing maangkon pa luwas sa duta sang Nefi, kag ang kamingawan sa palibot. Karon kaalam ini sa mga Nefinhon—tungod ang mga Lamanhon ila mga kaaway, indi nila pag-itugot nga mag-antos sila sa tagsa ka bahin, kag amo man agud makaangkon sila sing isa ka pungsod nga sa diin sila makapalagyo, suno sa ila luyag.

35 Kag karon ako, pagkatapos nga nasiling ini, magabalik liwat sa kasaysayan nanday Amon kag Aaron, Omner kag Himni, kag sang ila mga kauturan.