1 Kag natabo ini nga ang mga Amaleknon kag ang mga Amulonhon kag ang mga Lamanhon nga yara sa duta sang Amulon, kag amo man sa duta sang Helam, kag yara sa duta sang Jerusalem, kag sa malip-ot nga pulong, sa bug-os nga kadutaan sa palibot, nga wala nahaylo kag wala nagdala sa ila mga kaugalingon sang ngalan nga Anti-Nefi-Lehi, ginsugyot sang mga Amaleknon kag sang mga Amulonhon nga maakig batok sa ila mga kauturan.

2 Kag ang ila dumot nangin tuman kadako batok sa ila, bisan tubtob nga nagsugod sila sa pagrebelde batok sa ila hari, sa bagay nga indi na nila luyag nga mangin hari pa nila sia; gani, nagkapot sila sang mga armas batok sa katawhan sang Anti-Nefi-Lehi.

3 Karon ginhatag sang hari ang ginharian sa iya anak, kag gintawag niya ang iya ngalan nga Anti-Nefi-Lehi.

4 Kag ang hari napatay sa sinang amo man nga tuig nga ang mga Lamanhon nagsugod sa paghimo sang mga pagpanghanda para sa giyera batok sa katawhan sang Dios.

5 Karon sang nakita nanday Amon kag sang iya mga kauturan kag sang tanan sadtong mga nag-upod sa iya ang mga pagpanghanda sang mga Lamanhon sa pagpamatay sang ila mga kauturan, nagkadto sila sa duta sang Midian, kag didto nakigkita si Amon sa tanan niya nga mga kauturan; kag halin didto nagkadto sila sa duta sang Ismael agud makahiwat sila sing isa ka konseho upod kay Lamoni kag amo man sa iya utod nga si Anti-Nefi-Lehi, kon ano ang ila himuon agud pangapinan ang ila mga kaugalingon batok sa mga Lamanhon.

6 Karon wala sing bisan isa ka tawo sa tanan nga katawhan nga nahaylo sa Ginuo nga maluyag magkapot sang mga armas batok sa ila mga kauturan; indi, indi gani sila bisan maghimo sang kon ano nga pagpanghanda para sa giyera; huo, kag amo man, ang ila hari nagsugo sa ila nga indi nila ini dapat himuon.

7 Karon, amo ini ang mga pulong nga iya ginsiling sa katawhan parte sa amo nga bagay: Ginapasalamatan ko ang akon Dios, pinalangga kong katawhan, nga ang aton dakong Dios sa kaayo nagpadala sining aton mga kauturan, ang mga Nefinhon, sa aton agud magwali sa aton, kag agud magkumbinsi sa aton sang mga tradisyon sang aton malain nga mga amay.

8 Kag tan-awa, ginapasalamatan ko ang akon dakong Dios nga ginhatagan niya kita sing isa ka bahin sang iya Espiritu agud pahumokon ang aton mga tagipusuon, nga nasugdan naton ang pagpakig-angot sa sining mga kauturan, ang mga Nefinhon.

9 Kag tan-awa, ginapasalamatan ko man ang akon Dios, nga paagi sa pagpasugod sining pagpakig-angot nakumbinsi kita sang aton mga sala, kag sang madamo nga pagpamatay nga aton nahimo.

10 Kag ginapasalamatan ko man ang akon Dios, huo, ang akon dakong Dios, nga gintugotan niya kita nga hinulsulan ining mga butang, kag ginpatawad man niya kita sang madamo naton nga sala kag mga pagpamatay nga aton nahimo, kag ginkakas ang kabasulanan halin sa aton mga tagipusuon, paagi sa mga merito sang iya Anak.

11 Kag karon tan-awa, mga kauturan ko, tungod amo lamang ini ang aton mahimo (bangod kita ang labing nagtalang sa tanan nga katawhan) sa paghinulsol sang tanan naton nga sala kag sang madamo nga pagpamatay nga aton nahimo, kag sa pagkumbinsi sa Dios nga kakason ang mga ini halin sa aton mga tagipusuon, kay amo lamang ini ang aton mahimo nga maghinulsol sing tuman sa atubang sang Dios agud kakason niya ang aton mantsa—

12 Karon, labing pinalangga kong mga kauturan, tungod ginkakas na sang Dios ang aton mga mantsa, kag ang aton mga espada nagaidlak na, gani indi na naton pagmantsahan pa ang aton mga espada sang dugo sang aton mga kauturan.

13 Tan-awa, ginasiling ko sa inyo, Indi, ipahigad naton ang aton mga espada agud nga indi mamantsahan ang mga ini sang dugo sang aton mga kauturan; kay basi, kon mantsahan naton liwat ang aton mga espada indi na mahugasan ang mga ini nga mag-idlak paagi sa dugo sang Anak sang aton dakong Dios, nga ipaagay para sa pagbayad sang aton mga sala.

14 Kag ang dakong Dios nangin maluluy-on sa aton, kag ginpahibalo ining mga butang sa aton agud nga indi kita madula; huo, kag ginpahibalo na niya ngadaan ining mga butang sa aton, tungod palangga niya ang aton mga kalag pareho sang iya pagpalangga sa aton mga anak; gani, sa iya kaluoy ginabisitahan niya kita paagi sa iya mga anghel, agud ang plano sang kaluwasan mapahibalo sa aton kag sa palaabuton nga mga henerasyon.

15 O, daw ano kamaluluy-on sang aton Dios! Kag karon tan-awa, tungod amo lamang ini ang aton mahimo agud makakas ang aton mga mantsa halin sa aton, kag ang aton mga espada ginpaidlak, taguon naton ang mga ini agud matipigan ang mga ini nga nagaidlak, bilang testimonya sa aton Dios sa katapusan nga adlaw, ukon sa adlaw nga dal-on na kita nga magtindog sa iya atubang agud hukman, nga wala naton mamantsahi ang aton mga espada sa dugo sang aton mga kauturan sugod sang ginpahayag niya ang iya pulong sa aton kag ginhimo kita nga matinlo paagi sa sini.

16 Kag karon, mga kauturan ko, kon ang aton mga kauturan magtinguha nga pamatyon kita, tan-awa, taguon naton ang aton mga espada, huo, bisan pa nga ilubong naton ang mga ini sing madalom sa duta, agud matipigan ang mga ini nga nagaidlak, bilang testimonya nga wala gid naton paggamita ang mga ini, sa katapusan nga adlaw; kag kon pamatyon kita sang aton mga kauturan, tan-awa, magakadto kita sa aton Dios kag maluwas.

17 Kag karon natabo ini nga sang nakatapos ang hari sining mga hambalanon, kag ang tanan nga katawhan nagatililipon, ginpanguha nila ang ila mga espada, kag ang tanan nga mga armas nga gingamit para sa pagpaagay sang dugo sang tawo, kag ginpanglubong nila ang mga ini sing madalom sa duta.

18 Kag ini ila ginhimo, tungod ini sa ila panan-aw isa ka testimonya sa Dios, kag amo man sa mga tawo, nga indi na gid sila maggamit liwat sang mga armas sa pagpaagay sang dugo sang tawo; kag ini ila ginhimo, nga nagapamatuod kag nagapakighisugot sa Dios, nga imbes nga magpaagay sang dugo sang ila mga kauturan itugyan nila ang ila mga kabuhi; kag imbes nga kuhaan nila ang isa ka utod hatagan nila sia; kag imbes nga maghinguyang sang ila mga inadlaw sa katamaron magapangabudlay sila sing todo paagi sa ila mga kamot.

19 Kag gani makita naton nga, sang nadala ang mga Lamanhon sa pagpati kag sa paghibalo sang kamatuoran, nangin malig-on sila, kag handa nga mag-antos bisan tubtob sa kamatayon imbes nga maghimo sang sala; kag gani makita naton nga ginpanglubong nila ang ila mga armas sang paghidaet, ukon ginpanglubong nila ang mga armas sa giyera, para sa paghidaet.

20 Kag natabo ini nga ang ila mga kauturan, ang mga Lamanhon, naghimo sang mga pagpanghanda para sa giyera, kag nagtaklad sa duta sang Nefi para sa katuyoan nga patyon ang hari, kag magbutang sang lain nga magbulos sa iya, kag pamatyon man ang katawhan sang Anti-Nefi-Lehi sa kadutaan.

21 Karon sang nakita sang katawhan nga nagapadulong sila batok sa ila nagguluwa sila agud sugataon sila, kag naghalapa mismo sa duta sa ila atubang, kag nagsugod sa pagtawag sang ngalan sang Ginuo; kag gani yara sila sa amo nga kahimtangan sang nagsugod ang mga Lamanhon sa pagsalakay sa ila, kag nagsugod sa pagpamatay sa ila paagi sa espada.

22 Kag gani nga wala sing may nagbato, ginpamatay nila ang isa ka libo kag lima sa ila; kag nahibal-an naton nga bulahan sila kay nagtaliwan sila agud magpuyo upod sa ila Dios.

23 Karon sang nakita sang mga Lamanhon nga ang ila mga kauturan indi magpalagyo sa espada, kag indi man sila maglikaw sa tuo nayon ukon sa wala, kundi nga mahigda sila kag mapatay, kag gindayaw ang Dios bisan sa mismo nga pagkapatay sa idalom sang espada—

24 Karon sang nakita ini sang mga Lamanhon nagpugong sila sa pagpamatay sa ila; kag may madamo nga ang ila mga tagipusuon napuno sang balatyagon para sinang ila mga kauturan nga nagkalamatay sa idalom sang espada, kay naghinulsol sila sang mga butang nga ila nahimo.

25 Kag natabo ini nga ginpanghaboy nila ang ila mga armas sa giyera, kag indi na sila maluyag nga kuhaon pa ang mga ini liwat, kay nasakitan sila tungod sang mga pagpamatay nga ila nahimo; kag naghalapa sila pareho sang ila mga kauturan, nga nagasalig sa mga kaluoy sinang ang mga butkon naalsa agud patyon sila.

26 Kag natabo ini nga ang katawhan sang Dios ginbuylogan sa sina nga adlaw sing masobra pa sa kadamuon sang nagkalamatay; kag yadtong mga nagkalamatay mga matarong nga katawhan, gani wala kita sing rason sa pagduhaduha nga naluwas sila.

27 Kag wala sing malain nga tawo nga napatay sa ila; apang may masobra sa isa ka libo nga nadala sa ihibalo parte sa kamatuoran; gani makita naton nga ang Ginuo nagahikot sa madamo nga paagi tuhoy sa kaluwasan sang iya katawhan.

28 Karon ang pinakadako nga kadamuon sadtong mga Lamanhon nga nagpamatay sing madamo kaayo sang ila mga kauturan amo ang mga Amaleknon kag mga Amulonhon, ang pinakadako nga kadamuon sa ila nagasunod sa paagi sang mga Nehor.

29 Karon, sa sadtong mga nagbuylog sa katawhan sang Ginuo, wala sing mga Amaleknon ukon mga Amulonhon, ukon mga nagasunod sa paagi ni Nehor, kundi nga sila amo ang tunay nga mga kaliwat nanday Laman kag Lemuel.

30 Kag gani maathag naton nga makita, nga pagkatapos nga ang isa ka katawhan sadto nga nasanagan sang Espiritu sang Dios, kag nakaangkon sing dako nga ihibalo sang mga butang nga naangot sa pagkamatarong, kag dayon nahulog sa sala kag kalapasan, labi sila nga magpatig-a, kag gani ang ila kahimtangan mangin mas malain pa sangsa kon wala sila makahibalo sining mga butang.