1 Kag natabo ini, sa ika-onse nga tuig sang pagginahum sang mga hukom sa katawhan ni Nefi, sa ika-lima nga adlaw sang ika-duha nga bulan, pagkatapos nga may nangin dako nga paghidaet sa duta sang Zarahemla, nga wala sing nangin mga giyera ukon mga pag-ilinaway sa sulod sing pila ka tuig, bisan tubtob sa ika-lima nga adlaw sang ika-duha nga bulan sa ika-onse nga tuig, may sininggit sang inaway nga nabatian sa bug-os nga kadutaan.

2 Kay tan-awa, ang mga kasoldadohan sang mga Lamanhon nakasulod sa bahin sang duta ayon sa kamingawan, padulong sa mga dulonan sang duta, bisan padulong sa siyudad sang Amonihas, kag nagsugod sa pagpamatay sang katawhan kag paglaglag sang siyudad.

3 Kag karon natabo ini, antes pa makatipon ang mga Nefinhon sing bastante nga kasoldadohan agud tabugon sila pagwa sa duta, nalaglag na nila ang katawhan nga yara sa siyudad sang Amonihas, kag ang pila man nga yara sa palibot sang mga dulonan sang Noe, kag gindala nga bihag ang iban sa kamingawan.

4 Karon natabo ini nga ang mga Nefinhon nagahandum nga mabawi inang mga gindala nga bihag sa kamingawan.

5 Gani, sia nga ginpili nga puno nga kapitan sa mga kasoldadohan sang mga Nefinhon, (kag ang iya ngalan amo si Zoram, kag may duha sia ka anak nga lalaki nga sanday Lehi kag Aca)—karon si Zoram kag ang iya duha ka anak nga lalaki, nga nakahibalo nga si Alma isa ka mataas nga pari sang simbahan, kag bangod nakabati nga may espiritu sia sang propesiya, gani nagkadto sila sa iya kag nagpangabay sa iya nga hibaluon kon diin luyag sang Ginuo nga ila kadtoan sa kamingawan agud pangitaon ang ila mga kauturan, nga ginpangdala nga bihag sang mga Lamanhon.

6 Kag natabo ini nga si Alma namangkot sa Ginuo parte sini nga bagay. Kag si Alma nagbalik kag nagsiling sa ila: Tan-awa, magatabok ang mga Lamanhon sa suba sang Sidon sa sur sang kamingawan, paibabaw sa unhan sang mga dulonan sang duta sang Manti. Kag tan-awa didto masugat-an ninyo sila, sa este sang suba sang Sidon, kag didto ihatag sa imo sang Ginuo ang imo mga kauturan nga ginpangdala nga bihag sang mga Lamanhon.

7 Kag natabo ini nga si Zoram kag ang iya mga anak nga lalaki nagtabok sa suba sang Sidon, upod ang ila mga kasoldadohan, kag nagpanglakaton sa unhan sang mga dulonan sang Manti sa sur sang kamingawan nga yara sa este nga bahin sang suba sang Sidon.

8 Kag ginsalakay nila ang mga kasoldadohan sang mga Lamanhon, kag ang mga Lamanhon napalapta kag napanabog padulong sa kamingawan; kag nabawi nila ang ila mga kauturan nga ginpangdala nga bihag sang mga Lamanhon, kag wala ni isa sa ila nga ginpangdala nga bihag ang nadula. Kag gindala sila sang ila mga kauturan agud panag-iyahan ang ila kaugalingon nga mga duta.

9 Kag gani natapos ang ika-onse nga tuig sang mga hukom, ang mga Lamanhon nga napanabog pagwa sa duta, kag ang katawhan sang Amonihas nalaglag; huo, ang tagsa ka buhi nga kalag sang mga Amonihasnon nalaglag, kag amo man ang ila dako nga siyudad nga ila ginasiling nga indi maguba sang Dios tungod sang iya sini pagkagamhanan.

10 Apang tan-awa, sa isa ka adlaw ginbayaan ini nga mamingaw; kag ang mga bangkay ginpanggusnit sang mga ido kag mabangis nga mga sapat sang kamingawan.

11 Apang, pagkatapos sang madamo nga inadlaw ang ila patay nga mga lawas napanumpok sa ibabaw sang duta, kag natabunan ang mga ini sing manabaw nga pagkatabon. Kag karon sa pagkaisog sang baho sini amo gani nga ang katawhan wala nagpadayon agud panag-iyahan ang duta sang Amonihas sa sulod sing madamo nga tinuig. Kag gintawag ini nga Kahalitan sang mga Nehor; kay iya sila sang pagtuluohan ni Nehor, nga mga nagkalamatay; kag ang ila mga duta nagpabilin nga mamingaw.

12 Kag ang mga Lamanhon wala na nagsalakay liwat sa pagpakig-away batok sa mga Nefinhon tubtob sa ika-katorse nga tuig sang pagginahum sang mga hukom sa katawhan ni Nefi. Kag gani sa sulod sang tatlo ka tuig ang katawhan ni Nefi nakaangkon sing dalayon nga paghidaet sa bug-os nga kadutaan.

13 Kag sanday Alma kag Amulek naglibot nga nagawali sang paghinulsol sa katawhan sa ila mga templo, kag sa ila mga santuaryo, kag amo man sa ila mga sinagoga, nga ginpatindog suno sa paagi sang mga Judio.

14 Kag sa tanan nga magpamati sa ila mga pulong, sa ila padayon sila nga nagpahayag sang pulong sang Dios nga wala sing ginapasulabi nga mga tawo.

15 Kag gani sanday Alma kag Amulek naglibot, kag amo man ang madamo pa gid nga ginpamili para sa buluhaton agud magwali sang pulong sa bug-os nga kadutaan. Kag ang pagpahamtang sang simbahan nangin malapnagon sa bug-os nga kadutaan, sa tanan nga rehiyon sa palibot, sa tanan nga katawhan sang mga Nefinhon.

16 Kag wala sing indi pagpalareho sa ila; ang Ginuo nagbubo sang iya Espiritu sa bug-os nga ibabaw sang duta agud ihanda ang mga kaisipan sang mga anak sang katawhan, ukon agud ihanda ang ila mga tagipusuon sa pagbaton sang pulong nga dapat itudlo sa ila sa tion sang iya pagkari—

17 Agud nga indi sila magpatig-a batok sa pulong, agud indi sila mangin wala’y pagtuo, kag magpadayon sa kalaglagan, kundi agud makabaton sila sang pulong sing may kalipay, kag bilang isa ka sanga masugpon sa matuod nga puno sang ubas, agud makasulod sila sa palahuwayan sang Ginuo nga ila Dios.

18 Karon yadtong mga pari nga naglibot sa katawhan nagwali batok sa tanan nga pagbinutig, kag mga pagpatalang, kag mga paghinisaay, kag mga pag-ilinaway, kag pagtuyo sing malain, kag mga pagpasipala, kag mga pagpangawat, pagpangagaw, pagpamatay, pagpanglahi, kag tanan nga sari sang imoralidad, nga nagabantala nga ining mga butang indi dapat himuon—

19 Nga nagawali sang mga butang nga pat-od gid nga madali na lang mag-abot; huo, nga nagawali sang pagkari sang Anak sang Dios, sang iya mga pag-antos kag kamatayon, kag amo man sang pagkabanhaw sang mga minatay.

20 Kag madamo sang katawhan ang nagpamangkot parte sa lugar nga sa diin ang Anak sang Dios magakari; kag gintudloan sila nga magapakita sia sa ila pagkatapos sang iya pagkabanhaw; kag ini ginpamatian sang katawhan sing may dako nga kalipay kag kasadya.

21 Kag karon pagkatapos nga mapahamtang ang simbahan sa bug-os nga kadutaan—nga nakaangkon sing kadalag-an batok sa yawa, kag ang pulong sang Dios nga nawali sa iya sini kaputli sa bug-os nga kadutaan, kag ang Ginuo nga nagabubo sang iya mga pagpakamaayo sa katawhan—gani natapos ang ika-katorse nga tuig sang pagginahum sang mga hukom sa katawhan ni Nefi.