1 Karon natabo ini, sa ika-anum nga tuig sang pagginahum sang mga hukom sa katawhan ni Nefi, wala sing mga pagbinaisay ukon mga giyera sa duta sang Zarahemla;

2 Apang ang katawhan nag-antos, huo, nag-antos sing tuman tungod sang pagkadula sang ila mga kauturan, kag amo man tungod sang pagkadula sang ila mga panong kag mga baka, kag amo man tungod sang pagkadula sang ila mga kaumhan sang uyas nga gintasak sang mga tiil kag ginhalitan sang mga Lamanhon.

3 Kag sa pagkadako sang ila mga pag-antos nga ang tagsa ka kalag may kabangdanan sa pagpangalisud; kag nagpati sila nga mga paghukom ini sang Dios nga ginpadala sa ila tungod sang ila kalainan kag sang ila mga kangil-aran; gani napukaw sila sa panumduman sang ila tulumanon.

4 Kag nagsugod sila sa pagpahamtang sang simbahan sing mas lubos; huo, kag madamo ang ginbunyagan sa mga tubig sang Sidon kag nagbuylog sa simbahan sang Dios; huo, ginbunyagan sila sang kamot ni Alma, nga ginkonsagrar nga mataas nga pari sa katawhan sang simbahan, paagi sa kamot sang iya amay nga si Alma.

5 Kag natabo ini, sa ika-pito nga tuig sang pagginahum sang mga hukom may mga tatlo ka libo kag lima ka gatos ka mga tawo ang nagtingob sang ila mga kaugalingon sa simbahan sang Dios kag ginbunyagan. Kag gani natapos ang ika-pito nga tuig sang pagginahum sang mga hukom sa katawhan ni Nefi; kag may dalayon nga paghidaet sa bug-os sina nga panahon.

6 Kag natabo ini sa ika-walo nga tuig sang pagginahum sang mga hukom nga ang katawhan sang simbahan nagsugod nga mangin bugalon tungod sang ila tuman nga manggad, kag sang ila de-kalidad nga mga sida, kag sang ila lino nga manipis, kag tungod sang ila madamo nga panong kag baka, kag sang ila bulawan kag sang ila pilak, kag tanan nga sari sang malahalon nga mga butang nga naangkon nila paagi sa ila kapisan; kag sa sining tanan nga butang naalsa sila sa bugal sang ila mga mata kay nagsugod sila sa pagsul-ob sing tuman kamalahalon nga panapton.

7 Karon amo ini ang kabangdanan sang tuman nga pagpangasubo ni Alma, huo, kag sa madamo sang katawhan nga ginkonsagrar ni Alma nga mangin mga manunudlo, kag mga pari, kag mga elder sa simbahan; huo, madamo sa ila ang nagpangasubo sing tuman tungod sa kalainan nga nakita nila nga nagsugod sa ila katawhan.

8 Kay nakita nila kag natamdan upod ang dako nga kasubo nga ang katawhan sang simbahan nagsugod nga maalsa sa bugal sang ila mga mata, kag sa pagpahamtang sang ila mga tagipusuon sa mga manggad kag sa wala’y pulos nga mga butang sang kalibutan, sa bagay nga nagsugod sila nga mangin matinamayon, ang isa tuhoy sa isa, kag nagsugod sila sa paghingabot sinang mga wala nagapati suno sa ila kaugalingon nga kabubut-on kag ikalipay.

9 Kag gani, sa sining ika-walo nga tuig sang pagginahum sang mga hukom, nagsugod nga may dako nga mga pagbinaisay sa tunga sang katawhan sang simbahan; huo, may mga paghinisaay, kag pag-ilinaway, kag pagtuyo sing malain, kag mga paghingabot, kag bugal, bisan tubtob nga nalabawan pa ang bugal sinang mga indi miyembro sang simbahan sang Dios.

10 Kag gani natapos ang ika-walo nga tuig sang pagginahum sang mga hukom; kag ang kalainan sang simbahan nangin isa ka dako nga kasandaran sa sinang mga indi miyembro sang simbahan; kag gani nagsugod nga napunggan ang simbahan sa iya sini pag-uswag.

11 Kag natabo ini sa pagsugod sang ika-siyam nga tuig, nakita ni Alma ang kalainan sang simbahan, kag nakita man niya nga ang ehemplo sang simbahan nagsugod sa pagdala sinang mga indi tumuluo sa paghimo sing isa ka kalainan sa isa pa gid, gani nagadala sang kalaglagan sang katawhan.

12 Huo, nakita niya ang dako nga indi pagpalareho sang katawhan, ang pila nagaalsa sang ila mga kaugalingon sa ila bugal, nga nagatamay sang iban, nagatalikod sa nagakinahanglan kag sa hublas kag sa sinang mga ginagutom, kag sa sinang mga ginauhaw, kag sa sinang mga nagamasakit kag nagaantos.

13 Karon isa ini ka dako nga kabangdanan sang mga pagpanalambiton sang katawhan, samtang ang iban nagapaubos sang ila mga kaugalingon, nga nagabulig sinang mga nagakinahanglan sang ila bulig, pareho sang paghatag sang ila manggad sa mga imol kag sa nagakinahanglan, pagpakaon sang ginagutom, kag pagbatas sang tanan nga sari sang pag-antos, tungod kay Cristo, nga magakari suno sa espiritu sang propesiya;

14 Nga nagapaabot sa sina nga adlaw, gani nagahupot sing kapatawaran sang ila mga sala; nga napuno sing dako nga kalipay tungod sang pagkabanhaw sang mga minatay, suno sa kabubut-on kag gahum kag paghilway ni Jesucristo halin sa mga gapos sang kamatayon.

15 Kag karon natabo ini nga si Alma, nga nakakita sang mga pag-antos sang mapainubuson nga mga sumulunod sang Dios, kag sang mga paghingabot nga gintumpok sa ila sang nagkalabilin sang iya katawhan, kag tungod nakita niya ang tanan nila nga indi pagpalareho, nagsugod sia nga mangin tuman kamasinulub-on; apang ang Espiritu sang Ginuo wala nagpaslaw sa iya.

16 Kag nagpili sia sing isa ka maalam nga lalaki sa mga elder sang simbahan, kag ginhatagan sia sing gahum suno sa tingug sang katawhan, agud nga may gahum sia sa paghimo sang mga layi suno sa mga layi nga nahatag na, kag sa pagpatuman sang mga ini suno sa kalainan kag mga krimen sang katawhan.

17 Karon ang ngalan sini nga lalaki amo si Nefias, kag ginpili sia nga puno nga hukom; kag nagpungko sia sa hukom-lingkuranan agud hukman kag dumalahan ang katawhan.

18 Karon si Alma wala naghatag sa iya sang palangakoan sang pagkamataas nga pari sa simbahan, kundi nga ginbilin niya ang palangakoan sang mataas nga pari sa iya kaugalingon; apang gintugyan niya ang hukom-lingkuranan kay Nefias.

19 Kag ini iya ginhimo agud sia mismo makalibot sa iya katawhan, ukon sa katawhan ni Nefi, agud mawali niya ang pulong sang Dios sa ila, agud pukawon sila sa pagpanumdum sang ila tulumanon, kag mabutong niya papanaog, paagi sa pulong sang Dios, ang tanan nga bugal kag pagpatalang kag tanan nga pagbinaisay nga nagaluntad sa iya katawhan, tungod wala sia sang makita nga paagi agud mabawi niya sila luwas lang sa pagpahayag sang lubos nga testimonya batok sa ila.

20 Kag gani sa pagsugod sang ika-siyam nga tuig sang pagginahum sang mga hukom sa katawhan ni Nefi, gintugyan ni Alma ang hukom-lingkuranan kay Nefias, kag nagdedikar sang iya kaugalingon sing lubos sa mataas nga pagkapari sang balaan nga paagi sang Dios, sa pagpamatuod parte sa pulong, suno sa espiritu sang rebelasyon kag propesiya.