1 Kag karon natabo ini nga ang mga anak nga lalaki ni Alma naglibot sa katawhan agud ipahayag ang pulong sa ila. Kag si Alma man mismo indi makapahuway, kag naglibot man sia.

2 Karon indi na kami maghambal pa parte sa ila pagpangwali, luwas lang nga nagwali sila sang pulong, kag sang kamatuoran, suno sa espiritu sang propesiya kag rebelasyon; kag nagwali sila suno sa balaan nga paagi sang Dios nga paagi sini sila gintawag.

3 Kag karon magabalik ako sa isa ka kasaysayan sang mga giyera sa tunga sang mga Nefinhon kag mga Lamanhon, sa ika-disiotso nga tuig sang pagginahum sang mga hukom.

4 Kay tan-awa, natabo ini nga ang mga Zoramnon nangin mga Lamanhon; gani, sa pagsugod sang ika-disiotso nga tuig nahibal-an sang katawhan sang mga Nefinhon nga ang mga Lamanhon magasalakay sa ila; gani naghimo sila sang pagpanghanda para sa giyera; huo, ginpanipon nila ang ila mga kasoldadohan sa duta sang Jerson.

5 Kag natabo ini nga nag-abot ang mga Lamanhon upod ang ila mga linibo; kag nag-abot sila sa duta sang Antionum, nga amo ang duta sang mga Zoramnon; kag isa ka lalaki nga ginahingalanan kay Zerahemna ang ila lider.

6 Kag karon, tungod ang mga Amaleknon may mas malain kag mas dako nga huyog sa pagpamatay sangsa mga Lamanhon, sa ila mismo mga kaugalingon, gani, nagpili si Zerahemna sang puno nga mga kapitan nga magpanguna sa mga Lamanhon, kag sila tanan mga Amaleknon kag mga Zoramnon.

7 Karon ini iya ginhimo agud nga mapapabilin niya ang ila pagdumot tuhoy sa mga Nefinhon, agud mapaidalom niya sila para sa katumanan sang iya mga plano.

8 Kay tan-awa, ang iya mga plano amo ang pagsugyot sa mga Lamanhon nga maakig batok sa mga Nefinhon; ini iya ginhimo agud maagaw niya ang dako nga gahum agud magpangibabaw sa ila, kag agud maangkon man niya ang gahum agud magpangibabaw sa mga Nefinhon paagi sa pagdala sa ila sa pagkaulipon.

9 Kag karon ang plano sang mga Nefinhon amo nga sakdagon ang ila mga kadutaan, kag ang ila mga balay, kag ang ila mga asawa, kag ang ila mga anak, agud maamligan nila ang mga ini halin sa mga kamot sang ila mga kaaway; kag agud man nga maamligan nila ang ila mga kinamatarong kag ang ila mga pribilihiyo, huo, kag amo man ang ila kahilwayan, agud nga makasimba sila sa Dios suno sa ila luyag.

10 Kay nakahibalo sila nga kon mahulog sila sa mga kamot sang mga Lamanhon, nga kon sin-o man ang magsimba sa Dios sa espiritu kag sa kamatuoran, sa matuod kag sa buhi nga Dios, pamatyon sang mga Lamanhon.

11 Huo, kag nahibal-an man nila ang dako nga pagdumot sang mga Lamanhon tuhoy sa ila mga kauturan, nga mga katawhan sang Anti-Nefi-Lehi, nga ginatawag nga katawhan ni Amon—kag indi sila magkapot sang mga armas, huo, nakasulod sila sa isa ka kasugtanan kag indi sila maglapas sini—gani, kon mahulog sila sa mga kamot sang mga Lamanhon magakalamatay sila.

12 Kag ang mga Nefinhon indi magtugot nga magakalamatay sila; gani ginhatagan nila sila sing mga duta bilang ila palanublion.

13 Kag ang katawhan ni Amon naghatag sa mga Nefinhon sing dako nga bahin sang ila manggad agud sakdagon ang ila mga kasoldadohan; kag sa sini ang mga Nefinhon napilitan, nga isahanon, nga magbato sa mga Lamanhon, nga salamo nga kaliwat nanday Laman kag Lemuel, kag sang mga anak nga lalaki ni Ismael, kag sang tanan sadtong mga nagsilipak halin sa mga Nefinhon, nga mga Amaleknon kag mga Zoramnon, kag sang mga kaliwat sang mga pari ni Noe.

14 Karon inang mga kaliwat nangin pareho kadamo, halos, sa mga Nefinhon; kag gani ang mga Nefinhon napilitan nga magpakig-away sa ila mga kauturan, bisan tubtob sa pagpaagay sang dugo.

15 Kag natabo ini, samtang ang mga kasoldadohan sang mga Lamanhon nagatililipon sa duta sang Antionum, tan-awa, ang mga kasoldadohan sang mga Nefinhon nakahanda sa pagsugata sa ila sa duta sang Jerson.

16 Karon, ang lider sang mga Nefinhon, ukon ang lalaki nga pinili nga mangin puno nga kapitan sang mga Nefinhon—karon ang puno nga kapitan amo ang nagakapot sang pinakamataas nga awtoridad sa tanan nga kasoldadohan sang mga Nefinhon—kag ang iya ngalan amo si Moroni;

17 Kag ginkaptan ni Moroni ang pinakamataas nga awtoridad, kag ang pagdumala sang ila mga giyera. Kag beynte-singko anyos pa lamang ang iya pangidaron sang ginpili sia nga puno nga kapitan sang mga kasoldadohan sang mga Nefinhon.

18 Kag natabo ini nga ginsugata niya ang mga Lamanhon sa mga dulonan sang Jerson, kag ang iya katawhan naarmasan sang mga espada, kag sang mga sundang, kag tanan nga sari sang mga armas sa giyera.

19 Kag sang nakita sang mga kasoldadohan sang mga Lamanhon nga ang katawhan ni Nefi, ukon nga si Moroni, naghanda sang iya katawhan nga may mga taming sa dughan kag mga taming sa butkon, huo, kag mga taming man agud ipanagang sa ila mga ulo, kag nakasoksok man sila sang madamol nga panapton—

20 Karon ang kasoldadohan ni Zerahemna wala nakahanda sing bisan ano nga pareho sina nga butang; may ila lamang mga espada kag ila mga sundang, ila mga pana kag ila mga baslay, ila mga bato kag ila mga tirador; kag nagauba sila, luwas sa panit nga nawagkos palibot sa ila mga balikawang; huo, ang tanan nagauba, luwas sa mga Zoramnon kag mga Amaleknon;

21 Apang wala sila naarmasan sang mga panaming—gani, tuman ang ila kahadlok sa mga kasoldadohan sang mga Nefinhon tungod sang ila hinganib, bisan pa nga ang ila kadamuon dako kaayo sangsa mga Nefinhon.

22 Tan-awa, karon natabo ini nga wala sila nangisog nga magsalakay batok sa mga Nefinhon sa mga dulonan sang Jerson; gani naggwa sila sa duta sang Antionum padulong sa kamingawan, kag nagsugod sang ila pagpanglakaton palibot sa kamingawan, palayo sa ulo sang suba sang Sidon, agud makasulod sila sa duta sang Manti kag maagaw ang duta; kay wala sila nagapati nga mahibal-an sang mga kasoldadohan ni Moroni kon diin sila nagkadto.

23 Apang natabo ini nga pagkagwa gid nila padulong sa kamingawan nagpadala si Moroni sang mga espiya sa kamingawan agud bantayan ang ila kampo; kag si Moroni man, nga nakahibalo sang mga propesiya ni Alma, nagpadala sing pila ka mga tawo sa iya, nga nagapangabay sa iya nga mamangkot sia sa Ginuo kon diin ang mga kasoldadohan sang mga Nefinhon makadto agud pangapinan ang ila mga kaugalingon batok sa mga Lamanhon.

24 Kag natabo ini nga ang pulong sang Ginuo nag-abot kay Alma, kag ginpahibalo ni Alma ang mga mensahero ni Moroni, nga ang mga kasoldadohan sang mga Lamanhon nagalakat palibot sa kamingawan, agud makaabot sila sa duta sang Manti, agud masugdan nila ang pagsalakay sa mas mahuyang nga bahin sang katawhan. Kag yadtong mga mensahero naglakat kag gindala ang mensahe kay Moroni.

25 Karon si Moroni, nga nagbilin sing isa ka bahin sang iya kasoldadohan sa duta sang Jerson, kay basi sa ano man nga paagi isa ka bahin sang mga Lamanhon ang mag-abot sa sina nga duta kag mag-agaw sang siyudad, nagdala sang nabilin nga bahin sang iya kasoldadohan kag naglakat padulong sa duta sang Manti.

26 Kag nagsugo sia nga ang tanan nga katawhan sa sina nga bahin sang duta magtililipon sang ila mga kaugalingon agud magpakig-away batok sa mga Lamanhon, agud pangapinan ang ila mga duta kag ang ila pungsod, ang ila mga kinamatarong kag ang ila mga kahilwayan; gani handa sila sa tion sang pag-abot sang mga Lamanhon.

27 Kag natabo ini nga nagsugo si Moroni nga ang iya kasoldadohan magpanago sa patag nga malapit sa pangpang sang suba sang Sidon, nga yara sa weste sang suba sang Sidon sa kamingawan.

28 Kag si Moroni nagbutang sing mga espiya sa palibot agud mahibal-an niya kon san-o magaabot ang grupo sang mga Lamanhon.

29 Kag karon, tungod nahibal-an ni Moroni ang tinutuyo sang mga Lamanhon, nga tinutuyo nila nga pamatyon ang ila mga kauturan, ukon sakupon sila kag dal-on sila sa pagkaulipon agud makapahamtang sila sing isa ka ginharian para sa ila mga kaugalingon sa bug-os nga kadutaan;

30 Kag nakahibalo man sia nga ang luyag lamang sang mga Nefinhon amo ang pag-amlig sang ila mga kadutaan, kag sang ila kahilwayan, kag sang ila simbahan, gani naghunahuna sia nga indi sala nga pangapinan niya sila paagi sa taktika; gani, natukiban niya paagi sa iya mga espiya kon diin nga alagyan magaagi ang mga Lamanhon.

31 Gani, ginbahin niya ang iya kasoldadohan kag gindala ang isa ka bahin sa kapatagan, kag ginpapanago sila sa este, kag sa sur sang bungyod sang Ripla;

32 Kag ang nabilin ginpapanago niya sa weste sang kapatagan, sa weste sang suba sang Sidon, kag padulhog sa mga dulonan sang duta sang Manti.

33 Kag sa amo nga paagi nga napahamtang ang iya kasoldadohan suno sa iya luyag, nakahanda sia sa pagsugata sa ila.

34 Kag natabo ini nga ang mga Lamanhon nagtaklad sa norte sang bungyod nga sa diin isa ka bahin sang kasoldadohan ni Moroni ang nagapanago.

35 Kag sang nakalabay ang mga Lamanhon sa bungyod sang Ripla, kag nakaabot sa kapatagan, kag nagsugod sa pagtabok sa suba sang Sidon, ang kasoldadohan nga nagapanago sa sur sang bungyod, nga ginapangunahan sing isa ka lalaki nga ang ngalan amo si Lehi, kag ginpangunahan niya ang iya kasoldadohan pasulong kag ginlikupan ang mga Lamanhon sa este sa ila likuran.

36 Kag natabo ini nga ang mga Lamanhon, sang nakita nila ang mga Nefinhon nga nagasalakay sa ila sa ila likuran, nag-atubang sa ila kag nagsugod sa pagpakig-away sa kasoldadohan ni Lehi.

37 Kag ang buhat sang kamatayon nagsugod sa magtimbang nga bahin, apang nangin mas makahaladlok ang sa bahin sang mga Lamanhon, kay ang ila pagkahublas nakataya sa makusog nga mga labo sang mga Nefinhon gamit ang ila mga espada kag ila mga sundang, nga nagdala sing kamatayon halos sa tagsa ka tupa.

38 Samtang sa pihak nga bahin, kon kis-a may tawo nga nagakatumba sa tunga sang mga Nefinhon, paagi sa ila mga espada kag sa pagkaubos sang dugo, sila nga natamingan sa mas delikado nga mga bahin sang lawas, ukon ang mas delikado nga mga bahin sang lawas nga natamingan sa mga labo sang mga Lamanhon, paagi sa ila mga taming sa dughan, kag sa ila mga taming sa butkon, kag sa ila mga panaming sa ulo; kag sa amo nga paagi ang mga Nefinhon nagpadayon sa buhat sang kamatayon sa tunga sang mga Lamanhon.

39 Kag natabo ini nga nahadlok ang mga Lamanhon, tungod sang dako nga kalaglagan sa ila, bisan tubtob nga nagsugod sila sa pagpalagyo padulong sa suba sang Sidon.

40 Kag ginlagas sila nanday Lehi kag sang iya mga tinawo; kag ginpanabog sila nanday Lehi padulong sa mga tubig sang Sidon, kag nagtabok sila sa mga tubig sang Sidon. Kag ginpunggan ni Lehi ang iya mga kasoldadohan sa pangpang sang suba sang Sidon nga indi sila magtabok.

41 Kag natabo ini nga ginsugata ni Moroni kag sang iya kasoldadohan ang mga Lamanhon sa kapatagan, sa tabok sang suba sang Sidon, kag ginsugdan ang pagsalakay sa ila kag pagpamatay sa ila.

42 Kag nagpalagyo liwat ang mga Lamanhon sa ila atubang, padulong sa duta sang Manti; kag ginsugata sila liwat sang mga kasoldadohan ni Moroni.

43 Karon sa sini nga hitabo ang mga Lamanhon nakig-away sing tuman; huo, wala pa gid nahibal-i nga ang mga Lamanhon nakig-away sa amo nga labi kadako nga kusog kag kaisog, wala, wala gid bisan halin pa sa ginsuguran.

44 Kag ginpaisog sila sang mga Zoramnon kag sang mga Amaleknon, nga amo ang ila puno nga mga kapitan kag mga lider, kag ni Zerahemna, nga amo ang ila puno nga kapitan, ukon ang ila puno nga lider kag komandante; huo, nakig-away sila pareho sang mga dragon, kag madamo sa mga Nefinhon ang nagkalamatay sa ila mga kamot, huo, kay ginpamihak nila sa labo ang madamo sang ila mga panaming sa ulo, kag ginpanuhog nila ang madamo sang ila mga taming sa dughan, kag ginpang-utod nila ang madamo sang ila mga butkon; kag sa amo nga paagi ang mga Lamanhon nanglabo sa ila mabangis nga kaakig.

45 Apang, ang mga Nefinhon ginpaisog sing mas maayo nga kawsa, kay wala sila nagapakig-away para sa monarkiya ukon gahum kundi nga nagapakig-away sila para sa ila mga puluy-an kag sa ila mga kahilwayan, sa ila mga asawa kag mga anak, kag sa tanan nga ila, huo, para sa ila mga seremonya sang pagsimba kag sa ila simbahan.

46 Kag ginahimo nila inang sa ila pagpati amo ang tulumanon nga utang nila sa ila Dios; kay ang Ginuo nagsiling sa ila, kag sa ila man mga amay, nga: Tungod nga wala kamo kabasulanan sang una nga pagsalakay, ukon man sang ika-duha, indi ninyo pagtugotan ang inyo mga kaugalingon nga pamatyon sang mga kamot sang inyo mga kaaway.

47 Kag sa liwat, ang Ginuo nagsiling nga: Pangapinan ninyo ang inyo mga panimalay bisan tubtob sa pagpaagay sang dugo. Gani sa sini nga kabangdanan ang mga Nefinhon nagapakig-away batok sa mga Lamanhon, sa pagpangapin sang ila mga kaugalingon, kag sang ila mga panimalay, kag sang ila mga kadutaan, sang ila pungsod, kag sang ila mga kinamatarong, kag sang ila relihiyon.

48 Kag natabo ini nga sang nakita sang mga tinawo ni Moroni ang kabangis kag ang kaakig sang mga Lamanhon, mapalangupos na tani sila sa kahadlok kag malagyo halin sa ila. Kag si Moroni, nga nahangpan ang ila tinutuyo, nagpadala sang mensahe kag ginpaisog ang ila mga tagipusuon sa sining mga panghunahuna—huo, sang mga panghunahuna parte sa ila mga kadutaan, ila kahilwayan, huo, ila kahilwayan halin sa pagkaulipon.

49 Kag natabo ini nga gin-atubang nila ang mga Lamanhon, kag nagsinggit sila sa isa ka tingug sa Ginuo nga ila Dios, para sa ila kahilwayan kag sa ila kahilwayan halin sa pagkaulipon.

50 Kag nagsugod sila sa pagbato sa mga Lamanhon sa bug-os nga kusog; kag sa sinang amo man nga takna nga nagsinggit sila sa Ginuo para sa ila kahilwayan, ang mga Lamanhon nagsugod nga magpalagyo sa ila atubang; kag nagpalagyo sila bisan tubtob sa mga tubig sang Sidon.

51 Karon, ang mga Lamanhon mas madamo, huo, sing kapin sa pilo sang kadamuon sang mga Nefinhon; apang, napanabog sila sa bagay nga nagtililipon sila sa isa ka grupo sa kapatagan, sa pangpang malapit sa suba sang Sidon.

52 Gani ginlikupan sila sang mga kasoldadohan ni Moroni, huo, bisan sa magtimbang nga bahin sang suba, kay tan-awa, sa este yara ang mga tinawo ni Lehi.

53 Gani sang nakita ni Zerahemna ang mga tinawo ni Lehi sa este sang suba sang Sidon, kag ang mga kasoldadohan ni Moroni sa weste sang suba sang Sidon, nga nalikupan sila sang mga Nefinhon, nagbatyag sila sang kahadlok.

54 Karon si Moroni, sang nakita niya ang ila kahadlok, nagsugo sa iya mga tinawo nga untatan nila ang pagpaagay sang ila dugo.