1 Karon magabalik kita sa aton kasulatan kay Amalikia kag yadtong mga nagpalalagyo upod sa iya padulong sa kamingawan; kay, tan-awa, gindala niya yadtong mga nag-ulopod sa iya, kag nagtaklad sa duta sang Nefi sa mga Lamanhon, kag ginsugyot ang mga Lamanhon nga maakig batok sa katawhan ni Nefi, sa bagay nga ang hari sang mga Lamanhon nagpadala sing pabantala sa bug-os niya nga kadutaan, sa tanan niya nga katawhan, nga magtililipon sila sang ila mga kaugalingon liwat agud magpakig-away batok sa mga Nefinhon.

2 Kag natabo ini nga sang naglapnag ang pabantala sa ila nahadlok sila sing tuman; huo, nahadlok sila nga paakigon ang hari, kag nahadlok man sila nga magpakig-away batok sa mga Nefinhon kay basi madulaan sila sang ila mga kabuhi. Kag natabo ini nga indi sila, ukon ang kalabanan sa ila indi, magtuman sang mga kasugoan sang hari.

3 Kag karon natabo ini nga ang hari naakig tungod sang ila di-pagtuman; gani ginhatag niya kay Amalikia ang pinakamataas nga awtoridad sa sinang bahin sang iya kasoldadohan nga matinumanon sa iya mga sugo, kag ginsugo sia nga magpadayon sia kag piliton sila nga magkapot sang mga armas.

4 Karon tan-awa, amo ini ang luyag ni Amalikia; kay sia nga isa ka tuman katuso nga tawo sa paghimo sang kalainan gani nagpadihot sia sang plano sa iya tagipusuon nga papanaugon sa trono ang hari sang mga Lamanhon.

5 Kag karon naangkon niya ang pinakamataas nga awtoridad sa sinang mga bahin sang mga Lamanhon nga nagasakdag sa hari; kag nagtinguha sia nga maangkon ang pagsakdag sinang mga indi matinumanon; gani nagkadto sia sa lugar nga ginatawag nga Onidas, kay diri sini ang tanan nga Lamanhon nagpalagyo; kay nalantawan nila ang kasoldadohan nga nagapadulong, kag, sa paghunahuna nga nagapakadto sila agud pamatyon sila, gani nagpalagyo sila padulong sa Onidas, sa lugar sang mga armas.

6 Kag nagpili sila sing isa ka lalaki nga mangin hari kag lider nila, nga nakapamat-od sa ila mga kaisipan sing malig-on nga desisyon nga indi sila magpapilit nga magpakig-away sa mga Nefinhon.

7 Kag natabo ini nga nagtililipon sila sang ila mga kaugalingon sa ibabaw sang bukid nga ginatawag nga Antipas, bilang pagpanghanda sa pagpakig-away.

8 Karon indi tinutuyo ni Amalikia ang magpakig-away sa ila suno sa mga kasugoan sang hari; kundi tan-awa, ang iya tinutuyo amo ang pag-angkon sang pabor sang mga kasoldadohan sang mga Lamanhon, agud mabutang niya ang iya kaugalingon nga magpanguna sa ila kag papanaugon sa trono ang hari kag angkonon ang ginharian.

9 Kag tan-awa, natabo ini nga ginsugo niya ang iya kasoldadohan nga ipatindog ang ila mga tolda sa kapatagan nga malapit sa bukid sang Antipas.

10 Kag natabo ini nga pagkagab-i nagpadala sia sing isa ka sekreto nga emisaryo sa bukid sang Antipas, nga nagapangabay nga ang lider sinang mga yara sa bukid, nga ang ngalan amo si Lehonti, magdulhog sia sa tiilan sang bukid, kay luyag niya nga makighambal sa iya.

11 Kag natabo ini nga sang nabaton ni Lehonti ang mensahe wala sia nangisog nga magdulhog sa tiilan sang bukid. Kag natabo ini nga si Amalikia nagpadala liwat sa ika-duha nga tion, nga nagapangabay sa iya nga magdulhog. Kag natabo ini nga nagbalibad si Lehonti; kag nagpadala sia liwat sa ika-tatlo nga tion.

12 Kag natabo ini nga sang nahibal-an ni Amalikia nga indi niya makuha si Lehonti nga magdulhog halin sa bukid, nagtaklad sia sa bukid, halos malapit na sa kampo ni Lehonti; kag nagpadala sia liwat sa ika-apat nga tion sang iya mensahe kay Lehonti, nga nagapangabay nga magdulhog sia, kag magdala sia sang iya mga bantay.

13 Kag natabo ini nga sang nakadulhog na si Lehonti upod ang iya mga bantay sa kay Amalikia, nga ginpangabay sia ni Amalikia nga magdulhog upod ang iya kasoldadohan sa kagab-ihon, kag palibutan ang mga tawo sa ila mga kampo nga sa iya ginhatag sang hari ang pinakamataas nga awtoridad, kag itugyan niya sila sa mga kamot ni Lehonti, kon himuon niya sia (si Amalikia) nga ika-duha nga lider sang bug-os nga kasoldadohan.

14 Kag natabo ini nga nagdulhog si Lehonti upod ang iya mga tinawo kag ginpalibutan ang mga tinawo ni Amalikia, sa bagay nga antes sila nakabugtaw sa kaagahon nalibutan na sila sang mga kasoldadohan ni Lehonti.

15 Kag natabo ini nga sang nakita nila nga nalibutan na sila, nagpakitluoy sila kay Amalikia nga tugotan sila nga magbuylog sa ila mga kauturan agud nga indi sila malaglag. Karon amo gid ini mismo ang butang nga luyag ni Amalikia.

16 Kag natabo ini nga gintugyan niya ang iya mga tinawo, supak sa mga sugo sang hari. Karon amo ini ang butang nga luyag ni Amalikia, agud matuman ang iya mga plano nga papanaugon sa trono ang hari.

17 Karon nangin gawi sang mga Lamanhon, kon ang ila puno nga lider mapatay, nga pilion ang ika-duha nga lider nga mangin ila puno nga lider.

18 Kag natabo ini nga ginsugo ni Amalikia ang isa sang iya mga alagad nga hiloan sing amat-amat si Lehonti, sa bagay nga napatay sia.

19 Karon, sang patay na si Lehonti, ang mga Lamanhon nagpili kay Amalikia nga mangin ila lider kag ila puno nga komandante.

20 Kag natabo ini nga si Amalikia naglakat upod ang iya mga kasoldadohan (kay naangkon na niya ang iya mga ginahandum) padulong sa duta sang Nefi, sa siyudad sang Nefi, nga amo ang mayor nga siyudad.

21 Kag naggwa ang hari upod ang iya mga bantay agud sugataon sia, kay naghunahuna sia nga natuman ni Amalikia ang iya mga sugo, kag si Amalikia nakatipon sing dako kaayo nga kasoldadohan agud magsalakay batok sa mga Nefinhon sa pagpakig-away.

22 Apang tan-awa, sang naggwa ang hari agud sugataon sia, si Amalikia nagsugo sa iya mga alagad nga magpalapit agud sugataon ang hari. Kag nagpalapit sila kag nagduko sa atubang sang hari nga daw nagatahod sa iya tungod sang iya kabantugan.

23 Kag natabo ini nga ang hari nag-untay sang iya kamot agud patindugon sila, suno sa gawi sang mga Lamanhon, bilang tanda sang paghidaet, nga ang amo nga gawi ila nakuha sa mga Nefinhon.

24 Kag natabo ini nga sang ginpatindog niya ang una halin sa duta, tan-awa ginbuno niya ang hari sa tagipusuon; kag natumba sia sa duta.

25 Karon ang mga alagad sang hari nagpinalagyo; kag ang mga alagad ni Amalikia nagsininggit nga nagasiling:

26 Tan-awa, ginbuno sia sa tagipusuon sang mga alagad sang hari, kag natumba sia kag nagpinalagyo sila; tan-awa, dali agud makita ninyo.

27 Kag natabo ini nga si Amalikia nagsugo sa iya mga kasoldadohan nga kadtoan kag tan-awon kon ano ang natabo sa hari; kag sang makakadto sila sa lugar, kag nakita ang hari nga nagahigda sa iya kaugalingon nga dugo, si Amalikia nagpakunokuno nga akig, kag nagsiling: Kon sin-o man ang nagapalangga sa hari, palakta sia, kag lagson ang iya mga alagad agud pamatyon sila.

28 Kag natabo ini nga tanan sila nga nagapalangga sa hari, sang nabatian nila ining mga pulong, naglakat kag ginlagas ang mga alagad sang hari.

29 Karon sang nakita sang mga alagad sang hari ang isa ka kasoldadohan nga nagalagas sa ila, nahadlok sila liwat, kag nagpalagyo padulong sa kamingawan, kag nagkadto sa duta sang Zarahemla kag nagbuylog sa katawhan ni Amon.

30 Kag ang kasoldadohan nga naglagas sa ila nagbalik, nga napaslawan sa paglagas sa ila; kag gani si Amalikia, paagi sa iya pagkadaya, nagbihag sang mga tagipusuon sang katawhan.

31 Kag natabo ini, pagkaaga nagsulod sia sa siyudad sang Nefi upod ang iya mga kasoldadohan, kag ginpanag-iyahan ang siyudad.

32 Kag karon natabo ini nga ang reyna, sang nabatian niya nga ginpatay ang hari—kay si Amalikia nagpadala sing isa ka emisaryo sa reyna nga nagpahibalo sa iya nga ang hari ginpatay sang iya mga alagad, nga ginpalagas niya sila sa iya kasoldadohan, apang wala ini sing kapuslanan, kag nahimo nila ang ila pagpalagyo—

33 Gani, sang nabaton sang reyna ini nga mensahe nagpadala sia sang mensahe kay Amalikia, nga nagapangabay sa iya nga kaluoyan niya ang katawhan sang siyudad; kag ginpangabay man niya sia nga magkadto sia sa iya; kag ginpangabay man niya sia nga magdala sia sang mga saksi agud magpamatuod parte sa kamatayon sang hari.

34 Kag natabo ini nga gindala ni Amalikia ang amo man nga alagad nga nagpatay sa hari, kag tanan sila nga kaupod niya, kag nagkadto sa reyna, sa lugar nga sa diin sia nagapungko; kag sila tanan nagpamatuod sa iya nga ang hari ginpatay sang iya kaugalingon nga mga alagad; kag nagsiling man sila: Nagpalagyo sila; wala bala ini nagapamatuod batok sa ila? Kag gani napapati nila ang reyna parte sa kamatayon sang hari.

35 Kag natabo ini nga nagtinguha si Amalikia nga maangkon ang pabor sang reyna, kag ginpangasawa niya sia; kag gani paagi sa iya pagpangdaya, kag paagi sa ayuda sang iya tuso nga mga alagad, naangkon niya ang ginharian; huo, ginkilala sia nga hari sa bug-os nga kadutaan, sa tanan nga katawhan sang mga Lamanhon, nga nalakipan sang mga Lamanhon kag sang mga Lemuelnon kag sang mga Ismaelnon, kag sang tanan nga nagsilipak nga mga Nefinhon, halin sa pagginahum ni Nefi tubtob sa subong nga panahon.

36 Karon ining mga nagsilipak, nga nakaangkon sang amo man nga panudlo kag sang amo man nga kasayuran halin sa mga Nefinhon, huo, nga natudloan sa amo man nga ihibalo parte sa Ginuo, apang, indi kinaandan nga isaysay, nga wala madugayi pagkatapos sang ila pagsipak nangin mas matig-a sila kag di-mahinulsulon, kag mas mabangis, malain kag mapintas sangsa mga Lamanhon—nga nagainom sang mga tradisyon sang mga Lamanhon; nga nagapadala sa katamad, kag tanan nga sari sang imoralidad; huo, lubos nga nagakalipat sa Ginuo nga ila Dios.