1 Karon natabo ini, sa ika-treinta nga tuig sang pagginahum sang mga hukom sa katawhan ni Nefi, pagkatapos nga nabaton kag nabasa ni Moroni ang sulat ni Helaman, tuman sia nga nagkasadya tungod sang kaayohan, huo, sang tuman nga kadalag-an nga naangkon ni Helaman, sa pagbawi sang mga kadutaan nga naagaw.

2 Huo, kag ginpahibalo niya ini sa tanan niya nga katawhan, sa bug-os nga kadutaan sa palibot sa sinang bahin kon diin sia, agud nga magkasadya man sila.

3 Kag natabo ini nga gilayon sia nga nagpadala sing isa ka sulat kay Pahoran, nga nagapangabay sa iya nga dapat sia magsugo sa pagpanipon sang mga lalaki agud pabakuron si Helaman, ukon mga kasoldadohan ni Helaman, agud nga madumalahan niya sing mahapos inang bahin sang duta nga milagroso kag madinalag-on niya nga nabawi.

4 Kag natabo ini nga sang napadala ni Moroni ining sulat sa duta sang Zarahemla, nagsugod sia liwat sa pagpahamtang sang plano nga maangkon niya ang nabilin sang mga kadutaan kag mga siyudad nga naagaw sang mga Lamanhon sa ila.

5 Kag natabo ini nga samtang si Moroni nagahimo sang mga pagpanghanda sa pagsulong batok sa mga Lamanhon sa pagpakig-away, tan-awa, ang katawhan sang Nefias, nga nagtililipon halin sa siyudad sang Moroni kag sa siyudad sang Lehi kag sa siyudad sang Morianton, ginsalakay sang mga Lamanhon.

6 Huo, bisan inang mga napilitan nga magpalagyo halin sa duta sang Manti, kag halin sa kadutaan sa palibot, nag-abot kag nagbuylog sa mga Lamanhon sa sini nga bahin sang duta.

7 Kag gani tungod nga tuman kadamo, huo, kag nakabaton sing kusog adlaw-adlaw, paagi sa sugo ni Ammoron nagsulong sila batok sa katawhan sang Nefias, kag nagsugod sila sa pagpamatay sa ila sing tuman kadako nga pagpamatay.

8 Kag ang ila mga kasoldadohan tuman kadamo sa bagay nga ang nagkalabilin sang katawhan sang Nefias napilitan sa pagpalagyo sa ila atubang; kag nagkadto pa gani sila kag nagbuylog sa kasoldadohan ni Moroni.

9 Kag karon tungod naghunahuna si Moroni nga dapat may mga tinawo nga ipadala sa siyudad sang Nefias, agud buligan ang katawhan sa pagdumala sina nga siyudad, kag tungod nakahibalo nga mas mahapos nga pangapinan ang siyudad halin sa pagkahulog sa mga kamot sang mga Lamanhon sangsa magbawi sini sa ila, naghunahuna sia nga mas mahapos nila madumalahan ina nga siyudad.

10 Gani ginpapabilin niya ang tanan niya nga puwersa agud dumalahan ang mga lugar nga iya nabawi.

11 Kag karon, sang nakita ni Moroni nga ang siyudad sang Nefias nadula tuman sia nga nagkasubo, kag nagsugod sa pagpangduhaduha, tungod sang kalainan sang katawhan, kon bala indi sila mahulog sa mga kamot sang ila mga kauturan.

12 Karon amo man ini ang natabo sa tanan niya nga puno nga mga kapitan. Nagpangduhaduha sila kag nahalawhaw man tungod sang kalainan sang katawhan, kag ini tungod sang kadalag-an sang mga Lamanhon batok sa ila.

13 Kag natabo ini nga si Moroni naakig sa gobyerno tungod sang ila pagpasapayan sa kahilwayan sang ila pungsod.