1 Kag karon natabo ini nga sang nakatapos si Alma sa paghambal sa katawhan sang simbahan, nga ginpahamtang sa siyudad sang Zarahemla, nag-ordin sia sang mga pari kag mga elder, paagi sa pagtakdong sang iya mga kamot suno sa paagi sang Dios, agud magpangulo kag magbantay sang simbahan.

2 Kag natabo ini nga kon sin-o man ang indi miyembro sang simbahan nga naghinulsol sang ila mga sala ginbunyagan sa paghinulsol, kag ginbaton sa simbahan.

3 Kag natabo man ini nga kon sin-o man ang mga miyembro sang simbahan nga wala naghinulsol sang ila kalainan kag nagpaubos sang ila mga kaugalingon sa atubang sang Dios—ang buot ko silingon inang mga nag-alsa sa bugal sang ila mga tagipusuon—ang amo man ginsikway, kag ang ila mga ngalan ginpamanas, sa bagay nga ang ila mga ngalan wala pag-isipa sa sinang mga matarong.

4 Kag gani ginsugdan nila nga ipahamtang ang sistema sang simbahan sa siyudad sang Zarahemla.

5 Karon luyag ko nga mahangpan ninyo nga ang pulong sang Dios nangin bukas sa tanan, sa bagay nga wala sing gindumilian sang pribilihiyo nga magtililipon sang ila mga kaugalingon agud magpamati sang pulong sang Dios.

6 Apang ang mga anak sang Dios ginsugo nga dapat pirme sila magtililipon sang ila mga kaugalingon, kag magbuylog sa pagpuasa kag hugot nga pagpangamuyo para sa kaayohan sang mga kalag sinang mga wala nakakilala sa Dios.

7 Kag karon natabo ini nga sang mahimo ni Alma ining mga pagsulundan nagbiya sia sa ila, huo, halin sa simbahan nga yara sa siyudad sang Zarahemla, kag nagtabok sa este sang suba sang Sidon, padulong sa patag sang Gideon, nga didto may isa ka siyudad nga gintukod, nga ginatawag nga siyudad sang Gideon, nga yara sa patag nga ginatawag nga Gideon, nga gintawag sunod sa lalaki nga ginpatay sang kamot ni Nehor paagi sa espada.

8 Kag si Alma naglakat kag nagsugod sa pagpahayag sang pulong sang Dios sa simbahan nga ginpahamtang sa patag sang Gideon, suno sa pagpahayag sang kamatuoran sang pulong nga ginhambal sang iya mga amay, kag suno sa espiritu sang propesiya nga yara sa iya, suno sa testimonya parte kay Jesucristo, ang Anak sang Dios, nga magakari sa pagtubos sang iya katawhan halin sa ila mga sala, kag suno sa balaan nga paagi kon sa diin sia gintawag. Kag gani amo ini ang nasulat. Amen.