1 Karon natabo ini nga sang nabaton ni Moroni ini nga sulat labi sia nga naakig, tungod nahibal-an niya nga si Ammoron may perpekto nga ihibalo parte sa iya kadaya; huo, nahibal-an niya nga nahibal-an ni Ammoron nga indi isa ka matarong nga kawsa ang nagtulod sa iya nga magpadayon sang giyera batok sa katawhan ni Nefi.

2 Kag nagsiling sia: Tan-awa, indi ako magpakigbaylo sang mga bihag kay Ammoron luwas lang nga untatan niya ang iya ginatuyo, pareho sang akon ginpahayag sa akon sulat; kay indi ko pag-itugot sa iya nga makaangkon pa sia sang dugang nga gahum sangsa iya na naangkon.

3 Tan-awa, nakahibalo ako sang lugar nga sa diin ginabantayan sang mga Lamanhon ang akon katawhan nga ila gindala nga mga bihag; kag tungod si Ammoron indi magtugot sa akon sang akon sulat, tan-awa, ihatag ko sa iya ang suno sa akon mga pulong; huo, ipatuman ko ang kamatayon sa ila tubtob nga magpakitluoy sila para sa paghidaet.

4 Karon natabo ini nga sang nasiling ni Moroni ining mga pulong, nagsugo sia nga himuon ang pagpangita sa iya mga tinawo agud nga basi pa lang makakita sia sing isa ka lalaki nga kaliwat ni Laman sa ila.

5 Kag natabo ini nga nakakita sila sing isa nga ang ngalan amo si Laman; kag isa sia sang mga alagad sang hari nga ginpatay ni Amalikia.

6 Karon si Moroni nagsugo nga si Laman kag ang diutay lang sang iya tinawo magkadto sa mga nagabantay sang mga Nefinhon.

7 Karon ang mga Nefinhon ginabantayan sa siyudad sang Gid; gani pinili ni Moroni si Laman kag nagsugo nga diutay lang sang iya tinawo ang magaupod sa iya.

8 Kag pagkagab-i si Laman nagkadto sa mga nagabantay sang mga Nefinhon, kag tan-awa, nakita nila sia nga nagapadulong kag gintawag nila sia; apang nagsiling sia sa ila: Indi magkahadlok; tan-awa, isa ako ka Lamanhon. Tan-awa, nakapalagyo kami sa mga Nefinhon, kag nagakatulog sila; kag tan-awa ginkuha namon ang ila bino kag gindala namon.

9 Karon sang nabatian sang mga Lamanhon ining mga pulong ginbaton nila sia sing malipayon; kag nagsiling sila sa iya: Hatagi kami sang inyo bino, agud makainom kami; amo gani nga nalipay kami nga nakadala kamo sang bino kay ginakapoy kami.

10 Apang si Laman nagsiling sa ila: Taguon naton ang aton bino tubtob nga magsalakay kita kag magpakig-away batok sa mga Nefinhon. Apang ang ining ginhambal niya sa ila nagpadugang pa gid sang ila handum nga mag-inom sang alak;

11 Kay, nagsiling sila: Ginakapoy kami, gani paimna kami sang bino, kag dugay-dugay magabaton kami sang bino bilang amon mga rasyon, nga magapabaskog sa amon sa pagsalakay batok sa mga Nefinhon.

12 Kag si Laman nagsiling sa ila: Mahimo ninyo nga himuon ang suno sa inyo luyag.

13 Kag natabo ini nga nagpagusto sila sa pag-inom sang alak; kag manamit ini sa ila panabor, gani nagpagusto pa gid sila sa pag-inom sini; kag maisog ini kay ginhanda ini nga maisog.

14 Kag natabo ini nga nag-inom sila kag nagkinasadya, kag dugay-dugay tanan sila nagkalahubog.

15 Kag karon sang nakita ni Laman kag sang iya mga tinawo nga nahubog na sila tanan, kag yara sa mahamuok nga pagkatulog, nagbalik sila kay Moroni kag ginsugiran sia sang tanan nga butang nga natabo.

16 Kag karon nangin suno ini sa plano ni Moroni. Kag ginhanda ni Moroni ang iya mga tinawo nga may mga armas sa giyera; kag nagkadto sia sa siyudad sang Gid, samtang ang mga Lamanhon yara sa mahamuok nga pagkatulog kag mga hubog, kag ginpang-itsahan ang mga bihag sang mga armas sa giyera, sa bagay nga tanan sila may armas;

17 Huo, bisan ang ila mga babayi, kag tanan sang ila mga anak, nga makasarang maggamit sang armas sa giyera, sang maarmasan ni Moroni ang tanan sang mga bihag; kag ang tanan sinang mga butang nahimo sa tuman nga kalinong.

18 Apang kon napukaw nila ang mga Lamanhon, tan-awa mga hubog sila kag mahimo nga ginpamatay sila sang mga Nefinhon.

19 Apang tan-awa, indi amo sini ang luyag ni Moroni; wala sia nagakalipay sa pagpamatay ukon sa pagpaagay sang dugo, kundi nga nagakalipay sia sa pagluwas sang iya katawhan halin sa kalaglagan; kag sa sini nga kabangdanan indi sia makadala sa iya kaugalingon sang indi matarong, indi niya pagsalakayon ang mga Lamanhon kag pamatyon sila sa ila kahubog.

20 Apang naangkon niya ang iya mga tinutuyo; kay naarmasan niya ang mga bihag nga mga Nefinhon nga yara sa sulod sang pader sang siyudad, kag nahatagan sila sing gahum sa pag-angkon sang sinang mga bahin nga yara sa sulod sang mga pader.

21 Kag dayon ginsugo niya ang mga tinawo nga kaupod niya nga mag-isol diutay halin sa ila, kag palibutan ang mga kasoldadohan sang mga Lamanhon.

22 Karon tan-awa nahimo ini sa kagab-ihon, sa bagay nga sang makabugtaw ang mga Lamanhon pagkaaga nakita nila nga napalibutan na sila sang mga Nefinhon sa gwa, kag ang ila mga bihag may mga armas sa sulod.

23 Kag tungod sini nakita nila nga ang mga Nefinhon may gahum sa pagpangibabaw sa ila; kag sa sini nga mga sirkumstansya nahibal-an nila nga wala pulos nga magpakig-away sila batok sa mga Nefinhon; gani ginpangayo sang ila puno nga mga kapitan ang ila mga armas sa giyera, kag gindala ang mga ini kag ginpanghaboy sa tiilan sang mga Nefinhon, nga nagapakitluoy.

24 Karon tan-awa, amo ini ang luyag ni Moroni. Ginpangdakop niya sila bilang mga bihag sa giyera, kag ginpanag-iyahan ang siyudad, kag nagsugo nga hilwayon ang tanan nga bihag, nga mga Nefinhon; kag nagbuylog sila sa kasoldadohan ni Moroni, kag nangin dako nga kusog sa iya kasoldadohan.

25 Kag natabo ini nga ginsugo niya ang mga Lamanhon, nga iya ginpangdakop nga bihag, nga magsugod sila sa pag-obra sa pagpalig-on sang mga pamakod sa palibot sang siyudad sang Gid.

26 Kag natabo ini nga sang napamakuran na niya ang siyudad sang Gid, suno sa iya mga tinutuyo, nagsugo sia nga dal-on ang iya mga bihag sa siyudad nga Bugana; kag ginpabantayan man niya ina nga siyudad sa tuman kabakod nga puwersa.

27 Kag natabo ini nga, sa pihak sang tanan nga padihot sang mga Lamanhon, ginhuptan nila kag gin-amligan ang tanan nga bihag nga ila ginpangdakop, kag gintipigan man ang tanan nga lugar kag ang bentaha nga ila nabawi.

28 Kag natabo ini nga ang mga Nefinhon nagsugod liwat nga mangin madinalag-on, kag sa pag-angkon liwat sang ila mga kinamatarong kag sang ila mga pribilihiyo.

29 Sa madamo nga beses ang mga Lamanhon nagtilaw nga palibutan sila sa kagab-ihon, apang sa sining mga pagtinguha nadulaan sila sing madamo nga bihag.

30 Kag sa madamo nga beses nagtilaw sila sa paghatag sang ila bino sa mga Nefinhon agud mapatay nila sila sa hilo ukon sa kahubog.

31 Apang tan-awa, ang mga Nefinhon indi mahinay sa pagdumdum sang Ginuo nga ila Dios sa sining ila tion sang pag-antos. Indi sila madakpan sa ila mga siod; huo, indi sila mag-inom sang ila alak, luwas lang nga ila anay ihatag sa pila ka mga bihag nga mga Lamanhon.

32 Kag gani mainandamon sila nga wala sing hilo nga mapainom sa ila; kay kon ang ila bino maghilo sing isa ka Lamanhon magahilo man ini sang isa ka Nefinhon; kag gani gintilawan nila ang tanan nila nga mga ilimnon.

33 Kag karon natabo ini nga kinahanglan ni Moroni nga maghimo sang mga pagpanghanda sa pagsalakay sang siyudad sang Morianton; kay tan-awa, ang mga Lamanhon, paagi sa ila pag-obra, nagpamakod sang siyudad sang Morianton tubtob nga ini nangin tuman kalig-on nga pamakod.

34 Kag dalayon sila nga nagadala sang bag-o nga mga puwersa sa sina nga siyudad, kag bag-o man nga mga reserba sang mga panigana.

35 Kag gani natapos ang ika-beynte nuebe nga tuig sang pagginahum sang mga hukom sa katawhan ni Nefi.