Ipataas ang Inyo mga Suga
Ang akon pangagda sa karon simple lang: ipaambit ang ebanghelyo. Mangin ikaw kag ipataas ang suga.
Samtang nagasakay sa eroplano pakadto sa Peru pila ka tuig ang nagligad, nakapungko ako sa tupad sang isa nga nagakabig-sang-kaugalingon nga ateista. Nagpamangkot sia sa akon kon ngaa nagapati ako sa Dios. Sa manami namon nga sugilanon nga nagresulta, ginsugiran ko sia nga nagapati ako sa Dios tungod nakita Sia ni Joseph Smith—kag dayon ginsugponan ko nga ang akon ihibalo parte sa Dios naghalin man sa personal, matuodtuod nga espirituhanon nga eksperiyensya. Ginpaambit ko ang akon ginapatihan nga “ang tanan nga mga butang nagapatimaan nga may Dios”1 kag ginpamangkot sia kon paano sa iya pagpati ining kalibutan —nga tuburan sang kabuhi sa mahawan nga kahawaan—nagluntad. Nagsabat sia, sa iya mga pulong, “ang aksidente” mahimo nga natabo sang madugay na gid kaayo nga panahon. Sang akon ginpaathag kon ano kaimposible nga ang isa ka “aksidente” magresulta sang tuman nga katahom kag kahusay, naghipos sia sing makadali kag dayon naglahog pa sia, “Napuntosan mo ko ah.” Ginpamangkot ko sia kon luyag niya magbasa sang Libro ni Mormon. Nagsiling sia nga mabasa sia, gani ginpadal-an ko sia sang kopya.
Pagligad pila katuig may nakilala ako nga bag-o nga abyan sa airport sang Lagos, Nigeria. Nagkilalahay kami sang iya gin-usisa ang akon pasaporte. Namangkot ako parte sa iya relihiyuso nga pagtuluohan , kag nagpabutyag sia sing mabaskog nga pagtuo sa Dios. Nagpamatuod ako parte sang kalipayan kag kaimportante sang ginpanumbalik nga ebanghelyo ni Jesucristo kag namangkot kon luyag niya nga makatuon pa gid halin sa mga misyonero. Nagsiling sia nga huo, kag gintudloan [sia], kag ginbunyagan. Pagkaligad sang isa ukon duha ka tuig, samtang nagalakat ako sa airport sang Liberia, may nabatian ako nga tingog nga nagatawag sang akon ngalan. Nagbalikid ako, kag sia man gihapon nga pamatan-on ang nagpalapit sa akon nga may dako nga yuhum. Malipayon kami nga naghaksanay kag iya ako ginsugiran nga aktibo sia sa Simbahan kag ginabuligan ang mga misyonero nga tudloan ang iya nobya.
Wala ako nakahibalo kon ang akon ateista nga abyan nagbasa gid man sang Libro ni Mormon ukon nagbuylog sa Simbahan. Ang akon ikaduha nga abyan nagbuylog sa Simbahan. Para sa ila nga duha, ang akon responsibilidad2—ang akon oportunidad—pareho lang: ipataas ang suga sang ebanghelyo—sa paghigugma, pagpaambit, kag pag-agda sa tagsa sa ila sa kinaandan, natural nga paagi.3
Mga kauturan, akon naeksperiyensyahan ang mga bugay sang pagpaambit sang ebanghelyo, kag halangdon ang mga ini. Ari ang pila sang mga ini:
Ang Pagpaambit sang Ebanghelyo Nagadala sang Kalipay kag Pag-asa
Ikaw kag ako nakahibalo nga nagkabuhi kita bilang mga anak sang aton Langitnon nga Amay antes kita nabun-ag sa sining duta4 kag ang kalibutan gintuga sa tuyo nga hatagan ang tagsa ka tawo sang kahigayunan nga makaangkon sang lawas, makaeksperiyensya, makatuon, kag magtubo agud makabaton sang walay katapusan nga kabuhi—nga kabuhi sang Dios5 Nahibal-an sang Langitnon nga Amay nga magaantos kita kag makasala sa duta, gani Iya ginpadala ang Iya Anak, nga ang [Iya} “di-matupongan nga kabuhi”6 kag wala katapusan nga pag-antos7 nagahimo nga posible nga mapatawad, mapaayo, kag maperpekto kita.8
Ang mahibal-an ining mga kamatuoran makabag-o sang kabuhi! Kon ang isa ka tawo makahibalo sang mahimayaon nga katuyuan sang kabuhi, makahangop nga si Cristo magatabang sa ila nga nagasunod sa Iya, kag dayon magpili nga sundon si Cristo kag magpabunyag, ang kabuhi magabag-o—bisan pa nga ang mga sirkumstansya sang kabuhi indi [magbag-o].
Isa ka malipayon nga sister nga akon nakilala sa Onitsha, Nigeria, nagsiling sa akon nga sang matun-an niya ang ebanghelyo kag nabunyagan (kag subong ginagamit ko ang iya pulong)), “Ang tanan maayo para sa akon. Malipayon ako. Ara ako sa langit.”9 Ang pagpaambit sang ebanghelyo nagadala sang kalipay kag paglaum sa kabuhi sang nagahatag kag sang nagabaton. Matuod, “daw ano kadako ang inyo kalipay”10 kon nagapaambit kamo sang ebanghelyo! Ang pagpaambit sang ebanghelyo amo ang kalipay sa kalipay, paglaum sa paglaum.11
Ang Pagpaambit sang Ebanghelyo Nagadala sang Gahum sang Dios sa Aton Kabuhi
Sang ginbunyagan kita, ang tagsa sa aton nagsulod sa walay katapusan12 nga kasugtanan upod sa Dios nga “mag-alagad sa iya kag magtuman sang iya mga kasugoan,”13 nga nagalakip sa “pagtindog bilang saksi sa [Iya] sa tanan nga mga tinion kag sa tanan nga mga butang, kag sa tanan nga mga duog.”14 Kon kita “magpabilin sa” Iya paagi sa pagtipig sining kasugtanan, ang gahum nga nagapapagsik, nagasakdag kag nagapakabalaan nagaagay sa aton kabuhi halin kay Cristo, pareho sang isa ka sanga nga nagabaton sang nutrisyon halin sa balagon.15
Ang Pagpaambit sang Ebanghelyo Nagaprotekta sa Aton Gikan sa Tentasyon
Ang Ginuo nagamando:
“Gani, ipataas ang inyo mga suga agud mag-iwag ini sa kalibutan. Yari karon ako ang suga nga inyo igapataas—inang inyo nakita nga akon ginahimo. …
“… nagsugo Ako nga … magpalapit kamo sa akon, agud inyo mahikap kag makita; ang amo man inyo himuon sa kalibutan; kag kon sin-o man ang magalapas sining kasuguan nagatugot sang iya kaugalingon nga maganoy sa pagsulay.”16
Ang magpili nga indi magpataas sang suga sang ebanghelyo nagaidog sa aton pakadto sa kadulom, sa diin madali kita nga masulay. Importante, ang kabaliskaran matuod: ang magpili nga magpataas sang suga sang ebanghelyo nagapapalapit sa aton sing mas lubos sa sinang kasanag kag pag-amlig nga ginahatag sini batok sa tentasyon. Kadaku gid nga bugay kag responsibilidad.
Ang Pagpaambit sang Ebanghelyo Nagadala sang Pag-ayo
Ginbaton ni Sister Tiffany Myloan ang imbitasyon nga magsuporta sa mga misyonero sa pihak sang iya personal nga mga kabudlayan, lakip na ang iya mga pamangkotanon parte sa iya pagtuo. Ang pagsuporta sa mga misyonero nagpabakod sang iya pagtuo kag nagpalipay sa iya. Sa iya mga pulong, “Ang pang-misyonaryo nga buluhaton makapaayo gid.”17
Kalipayan. Paglaum. Nagasakdag nga gahum halin sa Dios. Proteksyon sa tentasyon. Pag-ayo. Ini tanan—kag madamo pa (lakip ang kapatawaran sang mga sala)18—nagatulo sa aton bilang mga bugay halin sa langit kon nagapaambit kita sang ebanghelyo.
Karon, sa Aton Dako nga Oportunidad
Mga kauturan, “madamo … sa aton tanan … nga mga grupo, [mga sekta,] kag mga denominasyon … nga wala lang nakahibalo sang kamatuoran bangod wala sila kahibalo kon diin ini pangitaon.”19 Ang kakinahanglanon nga ipataas ang aton suga mas labing dako sa karon sangsa bisan san-o pa man sa kasaysayan sang katawhan. Kag ang kamatuoran mas madasig na nga mabaton sangsa bisan san-o pa man.
Si Jimmy Ton, nga nagdako nga Budhista, nagdayaw sa isa ka pamilya nga nagpaambit sang ila kabuhi sa YouTube. Sang iya mahibal-an nga mga miyembro sila sang Ang Simbahan ni Jesucristo sang mga Santos sa Ulihing mga Adlaw, nagtuon sia sang ebanghelyo sa online, nagbasa sang Libro ni Mormon gamit ang app, kag ginbunyagan pagkatapos nga makapakigkita sa mga misyonero sa kolehiyo.20 Si Elder Ton isa na mismo karon ka full-time nga misyonero.
Sia kag ang iya kaupod nga mga misyonero sa bilog nga kalibutan amo ang batalyon sang Ginuo—sa pagsambit sa aton propeta .21 Ining mga misyonero wala nagasunod sang uso sa kalibutan: kon ang survey nagareport nga ang hererasyon Z nagatalikod sa Dios,22 ang aton lamharon nga soldado23 nga mga elder kag mga sister nagaliso sang mga tawo sa Dios. Kag nagadamo ang mga miyembro sang Simbahan nga nagaisa sa mga misyonero sa pagpaambit sang ebanghelyo, nga nagabulig sa mas nagadamo pa gid nga mga kaabyanan nga magpalapit kay Cristo kag sa Iya Simbahan.
Ang aton mga Santos sa Ulihing mga Adlaw sa Liberia nagbulig nga mabunyagan ang 507 nila ka mga abyan sa sulod sang 10 ka bulan nga wala sing full-time nga mga misyonero nga nagaserbe sa ila pungsod. Sang mabatian sang isa sang aton manami nga mga pangulo sang stake didto nga mahimo nga magbalik na ang full-time nga mga misyonero, nagsiling sia: “Ay maayo, karon mabuligan na nila kami sa amon buluhaton.”
Husto sia: ang pagtipon sang Israel—ang pinakadako nga kawsa sa duta24amo ang aton responsibilidad sa kasugtanan. Kag ini ang aton tiempo! Ang akon pangagda sa karon simple lang: ipaambit ang ebanghelyo. Mangin ikaw kag ipataas ang suga. Magpangamuyo para sa bulig sang langit kag sunda ang mga espirituhanon nga mga pagpabatyag. Ipaambit ang imo kabuhi sing normal kag sing natural, kag agdaha ang isa pa ka tawo nga magkari kag magtan-aw, nga magkari kag magbulig, kag magkari kag magbuylog.22 Kag dayon magkalipay samtang ikaw kag ang imo ginapalangga nagabaton sang ginsaad nga mga bugay.
Nakahibalo ako nga kay Cristo ining maayo nga mga balita ginwali sa mga mapainubuson; kay Cristo ginbugkos ang buong sing tagipusuon; kay Cristo ginbantala ang kahilwayan sa mga bihag; kag kay Cristo, kay Cristo lamang, sila nga mga nagakasakit hatagan sang purungpurung sa baylo sang mga abo.26 Gani, daw ano kadako ang pagkakinahanglanon sa pagpahibalo sining mga butang!27
Nagapamatuod ako nga si Jesucristo amo ang pangulo kag manughimpit sang aton pagtuo.28 Tapuson Niya, kompletuhon Niya, ang aton pagpakita sang pagtuo—bisan pa nga di-perpekto—sa pagpataas sang suga sang ebanghelyo. Magahimo Sia sing mga milagro sa aton mga kabuhi kag sa mga kabuhi sang tanan nga Iya ginatipon, kay Sia isa ka Dios sang mga milagro.29 Sa dalayawon nga ngalan ni Jesucristo, amen.