Pagtuo nga Mag-akto kag Mangin
Paagi sa pangamuyo, pagtuon sang balaan nga mga kasulatan, kag aksyon, mabuksan naton ang mga bugay sang langit kag mangin mas maayo nga mga sumulunod sang Manluluwas nga si Jesucristo.
Wala madugayi pagkatapos nga gintawag ako sa pag-alagad bilang General Authority Seventy, nasugilanon ko si Pangulong Russell M. Nelson sing pila ka minutos. Wala ginpaabot nga magkit-anay kami sa kalan-an, kag kanami sa iya nga ginhagad niya kami ni Elder S. Mark Palmer nga magpungko kag magdungan panyaga sa iya.
“Ano ang nami hambalan samtang nagapanyaga upod ang propeta?” amo ini ang nagsulod sa akon kaisipan. Gani namat-od ako nga pamangkuton si Pangulong Nelson kon may laygay ukon giya sia sa akon nga nagasugod pa lang sa akon calling. Simple kaayo kag diretso ang iya sabat; gintulok niya ako kag nagsiling, “Elder Schmeil, gintawag ka tungod sa potensyal mo kon mangin ano ka.” Naglakat ako nga nagapanghunahuna kon ano ang luyag sang Ginuo nga mangin ako. Samtang ginapamensar ko ini, narealisar ko nga gusto Niya ako nga mangin mas maayo nga bana, amay, anak kag mas maayo nga alagad. Dayon nahunahuna ko nga sarang ini tanan matuman samtang ginatinguhaan ko nga mangin mas maayo nga disipulo ni Jesucristo.
Sang nagligad nga pangkabilogan nga komperensya, si Pangulong Nelson nagsiling: “Ang paghimo sing maayo sang bisan ano nga bagay nagakinahanglan sang pagtinguha. Ang mangin matuod nga disipulo ni Jesucristo wala sing kinalain.”1 Ginaagda kita ni Pangulong Nelson nga magpangabudlay agud mangin mas maayo nga mga disipulo ni Jesucristo. Ginsilingan niya kita nga agud mangin mas pareho sa Manluluwas, kinahanglan naton nga pabakuron ang aton pagtuo paagi sa pagpamangkot, pag-akto, kag pagtuon, lakip na ang iban nga mga butang.
1. Magpamangkot
Siling Niya, “Magpangayo sa inyo Amay nga Langitnon, sa ngalan ni Jesucristo, sang bulig.”2 Ang pagpangayo paagi sa pangamuyo isa sa mga yabi agud mahibal-an kon paano mangin mas maayo nga disipulo ni Jesucristo.
Sa hingapusan sang Iya pag-alagad sa mga Nefinhon sa kadutaan sang Amerika, nagkayab si Jesucristo pa-langit. Sang ulihi, nagtililipon ang Iya mga disipulo, “nagkaisa sa hugot nga pagpangamuyo kag pagpuasa. Kag si Jesus nagpakita liwat sang iya kaugalingon sa ila, kay nagapangamuyo sila sa Amay sa iya ngalan.”3 Ngaa nga ginpakita liwat ni Jesus ang Iya Kaugalingon sa Iya mga disipulo? Tungod nagapangamuyo sila; nagapangabay sila.
Dayon nagpadayon Sia:
“Karon makadto ako sa Amay. Kag sa pagkamatuod ginasiling ko sa inyo, bisan ano nga mga butang ang inyo pangayuon sa Amay sa akon ngalan igahatag sa inyo.
“Gani, magpangayo, kag kamo magabaton; magpanuktok, kag ini pagabuksan sa inyo; kay sia nga nagapangayo, nagabaton; kag sa iya nga nagapanuktok, ini pagabuksan.”4
Kinahanglan naton nga magpangayo nga may pagtuo agud mahibal-an ang pagbuot sang Ginuo kag batunon nga ang Ginuo nakahibalo sang mas makapaayo para sa aton.
2. Mag-akto
Ang pag-akto isa man ka kinahanglanon nga yabi agud mangin mas maayo nga disipulo ni Jesucristo. Samtang kita nagaakto, Iya kita giyahan kag tudloan sa aton himuon. Sigurado ako nga si Nefi nagapangayo sang giya sa Ginuo agud mahibal-an kon paano makuha ang mga lamina nga saway kay Laban, ugaling napaslawan sila sang iya mga utod sing makaduha ka beses. Pero nagaakto sila, kag gingiyahan sila sang Ginuo samtang nagagiho. Sang katapusan, nagmadinalag-on si Nefi sa ikatatlo nga tion. Siling niya, “Gin-ubayan ako sang Espiritu, sanglit wala mahibal-i nga daan ang mga butang nga dapat ko himuon.”5
Amo sini maghikot ang Ginuo samtang nagatinguha kita kag nagaakto, bisan nga indi pa maathag sa aton kon ano ang kinahanglan himuon. Ginhambalan sang Ginuo si Nefi kon ano ang himuon: maglakat kag kuhaon ang mga lamina. Pero wala Niya ginsiling kay Nefi kon paano ini himuon. Gintugtan Niya si Nefi nga magpamensar kag magpangayo sang bulig sa Ginuo—kag masami amo sini ang paagi nga nagahikot ang Ginuo sa aton mga kabuhi. Kon nagaakto kita nga may pagtuo, ginagiyahan kag ginatudloan kita sang Ginuo.
3. Magtuon
Sa 3 Nefi, ginmuno sang mga disipulo sa Manluluwas nga may mga pagbinais-bais sa tunga sang katawhan parte sa ngalan sang Simbahan. Bilang sabat, nagtudlo ang Manluluwas sang isa ka importante nga prinsipyo sang Sia mamangkot, “Wala bala sila makabasa sang balaan nga mga kasulatan?”6 Ang pagtuon isa man ka kinahanglanon nga yabi agud mangin mas maayo nga disipulo ni Jesucristo. Ang pangamuyo kag pagtuon sang balaan nga mga kasulatan magkaupod. Nagabuligay ang mga ini para sa aton kaayohan. Amo ini ang proseso nga ginpahamtang sang Ginuo. “Magpaayaw kamo sa mga pulong ni Cristo; kay yari karon, ang mga pulong ni Cristo magasugid sa inyo sang tanan nga mga butang nga inyo dapat himuon.”7
Nagtudlo man ang Manluluwas nga indi lang naton dapat tun-an ang balaan nga mga kasulatan kundi magtudlo man halin sa sini, pareho sa Iya ginpakita sa mga Nefinhon: “Kag karon natabo ini nga sang matalastas ni Jesus ang tanan nga balaan nga mga kasulatan sa kabilugan, nga ila nasulat, ginsugo niya sila nga ila itudlo ang mga butang nga iya gintalastas sa ila.”8
Isa ini sa mga rason kon ngaa importante kaayo kay Nefi nga magbalik kag kuhaon ang mga lamina nga saway: kinahanglan sang iya pamilya ang balaan nga mga kasulatan indi lamang agud magbulig sa ila pagpanglakaton pakadto sa duta nga ginpanaad kundi para buligan man sila nga magtudlo sa ila kabataan. Kinahanglan man naton nga magpangayo sang giya halin sa balaan nga mga kasulatan para sa aton pagpanglakaton, kag kinahanglan naton ini itudlo sa aton mga puluy-an kag mga calling sa Simbahan.
4. Mag-akto agud Mangin
Sa madamo nga beses ang mga sabat sa pangamuyo wala nagaabot gilayon. Pero kinahanglan may pagtuo kita nga magpadayon, mag-akto sa pagkamatarong, kag mangin pursigido pareho kay Nefi sang ginatinguhaan niya nga kuhaon ang mga lamina nga saway. Ipakita sa aton sang Ginuo sing amat-amat; kon nagatuon kita sang balaan nga mga kasulatan, hatagan kita sang Ginuo sang mga sabat ukon sang kinahanglanon naton nga kusog para makalampuwas sang isa pa ka adlaw, isa pa ka semana, kag magtinguha pa gid sing isa ka beses. Si Elder Richard G. Scott nagsiling: “Magpasalamat ka nga kon kaisa ginatugotan ka sang Dios nga maghimud-os sing malawig antes mag-abot inang sabat. Ginatugtan sina nga magtubo ang imo pagtuo kag mag-uswag ang imo karakter.”9
Paagi sa pangamuyo kag pagtuon sang balaan nga mga kasulatan, pirme ako ginahatagan sang Ginuo sang kusog nga mag-akto kag magbatas sang isa pa ka adlaw, isa pa ka semana, kag sa liwat magtinguha sang isa pa gid ka kahigayonan. Sa madamo nga beses ang mga sabat wala gilayon nagaabot. May mga pamangkot pa ako nga wala pa masabat, pero padayon ako nga nagapamangkot kag nagatuon, kag malipayon ako nga padayon ako nga ginahatagan sang Ginuo sang kusog nga mag-akto samtang nagahulat ako sang mga sabat.
Siling man ni Elder Scott, “Samtang nagalakat kamo padulong sa malab-utan sang inyo paghangop tubtob sa wala kasigurohan, nga nagagamit sang pagtuo, pagatuytoyan kamo sa pagpangita sang mga solusyon nga indi ninyo masalapuan sa iban nga paagi.”10
Ang mangin mas maayo nga sumulunod sang Manluluwas nga si Jesucristo isa ka bug-os-kabuhi nga pagpanglakaton, kag ara kita tanan sa lainlain nga halintang, nga nagagiho sa lainlain nga kadasigon. Kinahanglan naton tandaan nga indi ini paindis-indis, kag ari kita agud palanggaon kag buligan ang kada isa. Kinahanglan naton nga mag-akto agud tugtan ang Manluluwas nga maghikot upod sa aton sa aton mga kabuhi.
Nga nagahambal kay Sidney Rigdon, ang Ginuo nagsiling sang masunod: “Nakita ko ikaw kag ang imo mga buhat. Nabatian ko ang imo mga pangamuyo, kag ginhanda ka para sa mas dako nga buluhaton.”11 Nagapamatuod ako nga ang Ginuo nagapamati kag nagasabat sa aton mga pangamuyo; kilala Niya kita; kag may dako Sia nga buluhaton para sa kada isa sa aton. Paagi sa pangamuyo, pagtuon sang balaan nga mga kasulatan, kag aksyon, mabuksan naton ang mga bugay sang langit kag mangin mas maayo nga mga sumulunod sang Manluluwas nga si Jesucristo.
Si Pangulong Dallin H. Oaks nagtudlo nga “Ang Katapusan nga Paghukom indi lamang isa ka pagtakos sang kabug-osan sang maayo kag malain nga mga binuhatan—sang aton ginhimo. Ini amo ang pagkilala sang katapusan nga epekto sang aton mga binuhatan kag panghunahuna—kon ano kita nangin.”12
Nagapasalamat ako sa mga propeta, manugpanan-aw, kag manugpahayag sang rebelasyon; sila amo ang mga manugbantay sa tore. Makita nila ang mga butang nga indi naton makita. Nagapamatuod ako nga paagi sa ila mga pulong, sarang kita nga mangin mas maayo nga mga sumulunod sang Manluluwas nga si Jesucristo kag malab-ot ang aton potensyal. Nagapamatuod ako nga si Cristo buhi kag nakakilala sa kada isa sa aton sing indibidwal. Iya ini Simbahan. Sa sagrado nga ngalan ni Jesucristo, amen.