15:54

Ang Kakinahanglanon sang Simbahan

Ni Pangulong Dallin H. Oaks

Unang Manuglaygay sa Unang Pangulohan

Ang balaan nga mga kasulatan maathag nga nagatudlo sang ginhalinan kag kakinahanglanon sang simbahan nga ginadumalahan kag may awtoridad sang aton Ginuo nga si Jesucristo.

Madamo nga tinuig ang nagligad, si Elder Mark E. Petersen, isa ka miyembro sang Korum sang Dose ka Apostoles, nagsugod sang iya pagpamulong-pulong sa sining halimbawa:

“Si Kenneth kag ang iya asawa nga si Lucille, maayo nga mga tawo, tampad kag matarong. Pero, wala sila nagasimba, kag pamatyagan nila sarang sila nga mangin maayo bisan wala ini. Ginatudloan nila ang ila kabataan sang katampad kag maayo nga kinaiya kag nagapati sila nga amo man lang ina ang itudlo sang Simbahan sa ila.

“Kag, sa bagay, nagainsister sila nga kinahanglan nila ang ila Sabado kag Domingo para sa pang-pamilya nga paglingaw-lingaw … [kag] mangin sablag sa ila ang pagsimba.”¹

Karon, ang akon mensahe para gid sa sining maayo kag relihiyoso nga mga tawo nga nag-untat sa pagtambong ukon pagpartisipar sa ila mga simbahan.² Kon magsiling ako “mga simbahan,” ginalakip ko ang mga sinagoga, mga moske, ukon iban pa nga relihiyoso nga mga organisasyon. Nagakabalaka kami nga ang pagtambong sa tanan sini nagnubo gid kaayo sa bilog nga pungsod.³ Kon mag-untat kita sa paghatag sing importansya sa aton mga simbahan sa bisan ano nga rason, mangin delikado ang aton personal nga espirituwal nga kabuhi, kag ang tuman kadamo nga nagapalayo sang ila kaugalingon sa Dios nagabuhin sang Iya mga bugay sa aton mga pungsod.

Ang pagtambong kag pagkaaktibo sa isa ka simbahan nagabulig sa aton nga mangin mas maayo nga mga tawo kag mas maayo nga mga impluwensya sa kabuhi sang iban. Sa simbahan ginatudloan kita kon paano ipangabuhi ang relihiyoso nga mga prinsipyo. Nagaatuon kita sa isa kag isa. Ang makakumbinsi nga halimbawa mas gamhanan pa sangsa pamulong-pulong. Nagabakod kita paagi sa pagpakig-upod sa iban nga may amo man nga panghunahuna. Sa pagtambong kag pagpartisipar sa simbahan, ang aton mga tagipusuon, pareho sa ginasiling sa Biblia, “ginahiusa sa gugma.”⁴

I.

Ang balaan nga mga kasulatan nga ginhatag sang Dios sa mga Kristiyano sa Biblia kag sa moderno nga rebelasyon maathag nga nagatudlo sang kakinahanglanon sang simbahan. Ginapakita sang mga ini nga si Jesucristo nag-organisar sang simbahan kag nagbinagbinag nga ang simbahan ang magapadayon sang Iya buluhaton kon wala na Sia. Nagtawag sia sing Dose ka Apostoles kag ginhatagan sila sing awtoridad kag mga yabi agud dumalahan ini. Ang Biblia nagatudlo nga si Cristo “ang ulo sang simbahan”⁵ kag ang iya sini nga mga manugdumala ginhatag “sa paghimpit sang mga balaan, sa buluhaton sang pagpanghikot, sa pagpalig-on sang lawas ni Cristo.”⁶ Pat-od nga maathag ang Biblia sa ginhalinan sang simbahan kag ang kakinahanglanon sini sa karon.

Ang iban nagasiling nga ang pagtambong sa mga miting sa simbahan wala nagabulig sa ila. Ang iban nagasiling, “Wala ako sing may natun-an karon nga adlaw” ukon “Wala sing may nagtamyaw sa akon” ukon “Naglain ang akon buot.” Ang personal nga mga kapaslawan indi dapat magpaluya sa aton sa doktrina ni Cristo, nga amo ang nagtudlo sa aton nga mag-alagad, indi nga alagaran.⁷ Samtang ginahunahuna ini, isa pa ka miyembro ang naglaragway sang sentro sang iya pagtambong sa Simbahan:

“Pila ka tuig na ang nagligad, ginliwat ko ang akon batasan sa pagkadto sa simbahan. Wala na ako nagakadto sa simbahan para sa akon kaugalingon, kundi agud pensaron ang iban. Ginasiguro ko nga matamyaw ako ang mga tawo nga nagapungko sing isahanon, nga mag-abiabi sang mga bisita, … nga magboluntaryo para sa asaynment. …

“Sa malip-ot, nagakadto ako sa simbahan kada semana agud mangin aktibo, indi nga magpabaya, kag magdala sang kinalain sa mga kabuhi sang mga tawo.”⁸

Si Pangulong Spencer W. Kimball nagtudlo nga “wala kita nagakadto sa simbahan kon Domingo agud malingaw ukon para matudloan lamang. Nagakadto kita agud magsimba sa Ginuo. Indibidwal ini nga responsibilidad. … Kon ang mga hilikuton sa simbahan nangin kapaslawan sa imo, ikaw ang napaslawan. Wala sing iban nga makasimba para sa imo; ikaw mismo ang dapat magsimba sa Ginuo.”⁹

Ang pagtambong sa simbahan magabukas sang aton mga tagipusuon kag magapabalaan sang aton mga kalag.

Sa simbahan wala kita nagaserbisyo nga isahanon lamang ukon sa aton lamang luyag ukon kon san-o lang naton gusto. Nagaserbisyo kita bilang grupo. Sa pagserbisyo makasalapo kita sing mapuslanon nga mga oportunidad agud mapakigbatuan ang pagkamaiyaiyahon sa aton panahon. Ang pagserbisyo nga ginadumalahan sang Simbahan nagabulig sa aton nga malampuwasan ang personal nga pagkamaiyaiyahon nga sarang magpaluya sang aton espirituwal nga pagtubo.

May iban pa nga importante nga bentaha nga dapat sambiton, bisan sing makadali lang. Sa simbahan upod naton ang manami nga mga tawo nga nagatinguha sa pag-alagad sa Dios. Nagapahanumdum ini sa aton nga wala kita nagaisahanon sa aton relihiyoso nga mga kahiwatan. Kita tanan nagakinahanglan sang pagpakig-upod sa iban, kag ang pag-inupdanay sa simbahan ang pila sa pinakamanami nga aton maeksperiyensyahan, para sa aton kag sa aton mga kaupod kag sang kabataan. Kon wala inang pag-inupdanay, ilabi na sang kabataan kag matutom nga mga ginikanan, ang research nagapakita sang dugang nga kabudlayan sang mga ginikanan sa pagpadako sang ila kabataan sa ila pagtuluohan.¹⁰

II.

Nakahambal na ako parte sa mga simbahan sa kabilogan. Karon ihambal ko ang espesyal nga mga rason sang pagkamiyembro, pagtambong, kag pagpartisipar sa ginpanumbalik nga Simbahan ni Jesucristo sang mga Santos sa Ulihing mga Adlaw sang Manluluwas.

Siyempre, nagapamatuod kita nga ang balaan nga mga kasulatan, sang una kag sa karon, maathag nga nagatudlo sang ginhalinan kag kakinahanglanon sang simbahan nga ginadumalahan kag may awtoridad sang aton Ginuo nga si Jesucristo. Nagapamatuod man kita nga ang ginpanumbalik nga Simbahan ni Jesucristo ginpahamtang agud magtudlo sang kabug-osan sang Iya doktrina kag magpanguha gamit ang Iya awtoridad sa priesthood agud maghikot sang mga ordinansa nga kinahanglanon sa pagsulod sa ginharian sang Dios.¹¹ Ang mga miyembro nga wala nagatambong sa Simbahan kag nagasalig lamang sa indibidwal nga espirituwalidad nagaseparar sang ila kaugalingon sa sining mga prinsipyo sang ebanghelyo: ang gahum kag mga bugay sang priesthood, ang kabug-osan sang ginpanumbalik nga doktrina, kag ang mga pagpahulag kag mga oportunidad sa pagpangabuhi sinang doktrina. Ginadula nila ang ila oportunidad nga mangin kaangay-angay para padayunon ang ila pamilya sa wala katapusan.

Isa pa ka dako nga bentaha sang ginpanumbalik nga Simbahan amo nga nagabulig ini sa aton nga magtubo sa espirituwal. Ang pagtubo nagakahulugan sang pagbag-o. Sa espirituwal nga pulong nagakahulugan ini sang paghinulsol kag paghandum nga magpalapit pa gid sa Ginuo. Sa ginpanumbalik nga Simbahan may ara kita sang doktrina, mga proseso, kag inspirado nga mga kabulig nga nagabulig sa aton nga maghinulsol. Ang ila tuyo, bisan sa mga konseho sang pagkamiyembro, indi sa pagsilot, pareho sang resulta sa kriminal nga hukmanan. Ang mga konseho sang pagkamiyembro sa Simbahan mapinalanggaon nga nagabulig sa aton nga mangin kaangay-angay sa maluluy-on nga pagpatawad nga nangin posible paagi sa Pagbayad-Sala ni Jesucristo.

Ang indibidwal nga espirituwalidad sa panalagsa makahatag sang motibasyon kag istruktura para sa di-maiyaiyahon nga pagserbisyo nga ginahatag sang ginpanumbalik nga Simbahan. Ang maayo nga mga halimbawa sini amo ang mga pamatan-on kag mga tigulang nga nagapahigad sang ila mga hilikuton sa eskwelahan ukon pagretiro agud magbaton sang mga tawag sa misyon. Nagahikot sila bilang mga misyonero sa mga indi nila kilala sa indi-pamilyar nga mga lugar nga gin-asaynan sa ila. Matuod man ini para sa matutom nga mga miyembro nga nagapartisipar sa di-maiyaiyahon nga pagserbisyo nga ginatawag naton nga “buluhaton sa templo.” Wala sang amo sini nga serbisyo nga mangin posible kon wala sang Simbahan nga nagasakdag sini, naga-organisar sini, kag nagadumala sini.

Ang pagtuo sang aton mga miyembro kag ang pagserbisyo sa Simbahan nagtudlo sa ila kon paano maghikot sing may pagbinuligay agud mabenepisyohan ang komunidad. Ang ina nga klase sang eksperiyensya kag kaayohan wala nagakatabo sa pagkamaiyaiyahon nga nagapangibabaw sa kinabatasan sang aton sosyedad sa karon. Sa pisikal nga pag-organisar sang aton lokal nga mga ward, nagaupod kita kag nagahikot upod sa mga tawo nga wala man naton ginapili, mga tawo nga nagatudlo sa aton kag nagatilaw sa aton.

Dugang pa sa pagbulig sa aton nga matun-an ang espirituhanon nga mga kinaiya pareho sang gugma, kaluoy, kapatawaran, kag pagpaumod, nagahatag ini sa aton sang mga oportunidad nga makatrabaho ang mga tawo nga lain-lain ang mga ginhalinan kag mga gusto. Ini nga bentaha nakabulig sa madamo nga miyembro naton, kag madamo nga mga organisasyon ang nabugayan sang ila partisipasyon. Ang mga Santos sa Ulihing mga Adlaw kilala tungod sa ila ikasarang nga magpanguna kag mag-isa paagi sa pagbinuligay. Ina nga tradisyon nagsugod sa aton maisog nga mga pionero nga nagsakop sang Intermountain West kag nagpahamtang sang aton ginpakamahal nga tradisyon sang di-maiyaiyahon nga pagkooperar para sa kaayohan sang kadam-an.

Kalabanan sang tawhanon kag maluluy-on nga mga bulig kinahanglan mapatuman paagi sa pagtingob kag pagdumala sang indibidwal nga mga ikasarang sa tigdamo. Ang ginpanumbalik nga Simbahan nagahimo sini sa iya sini dako kaayo nga tawhanon nga mga bulig sa bilog kalibutan. Nagalakip ini sang pagpanagtag sang mga suplay para sa edukasyon kag medisina, pagpakaon sa ginagutom, pag-atipan sang mga bakwit, pagbulig sa pagpahagan-hagan sang epekto sang mga adiksyon, kag madamo pa. Ang aton mga miyembro sang Simbahan kilala sa ila Helping Hands nga mga proyekto sa tion sang mga kalamidad. Ang aton pagkamiyembro sa Simbahan nagatugot sa aton nga mangin bahin sining dalagko nga mga pagpanikasog. Ang mga miyembro nagabayad man sang mga halad-puasa agud buligan ang mga imol sa ila palibot.

Dugang pa sa pagbatyag sing paghidaet kag kalipay paagi sa pag-upod sang Espiritu, ang aton mga miyembro nga nagatambong sa Simbahan makaagom sang mga bunga sang pagpangabuhi sang ebanghelyo, pareho sang mga bugay sang pagtuman sang Pulong sang Kaalam kag materyal kag espirituwal nga kabuganaan nga ginapromisa sa pagtuman sang layi sang ika-pulo. Makaangkon man kita sang bugay sang paggiya sang inspirado nga mga lider.

Ang pinakalabi sini tanan amo ang may awtoridad nga mga ordinansa sang priesthood nga kinahanglanon para sa wala katapusan, lakip ang sakramento nga ginabaton naton kada Adlaw nga Inugpahuway. Ang katapusan nga ordinansa sa ginpanumbalik nga Simbahan amo ang wala katapusan nga kasugtanan sang pag-asawahay, nga nagapatigayon sang pagpadayon sang mahimayaon nga mga kaangtanan sang pamilya. Si Pangulong Russell M. Nelson nagtudlo sining prinsipyo sa indi malimtan nga paagi. Siling niya: “Indi mahimo nga maghandum lamang kita tubtob nga makasulod sa presensya sang Dios. Kinahanglan kita nga magtuman sang mga layi kon sa diin [ina nga bugay] napasad.”¹²

Ang isa sinang mga layi amo ang magsimba kada Adlaw nga Inugpahuway.¹³ Ang aton pagsimba kag pagpangabuhi sang wala katapusan nga mga prinsipyo nagapapalapit sa aton sa Dios kag nagapadako sang aton ikasarang sa pagpalangga. Si Parley P. Pratt, isa sang orihinal nga mga Apostoles sa sining dispensasyon, naglaragway sang iya nabatyagan sang ang Propetang Joseph Smith nagpaathag sining mga prinsipyo: “Nabatyagan ko nga matuod gid nga ang Dios ang akon Amay nga langitnon; nga si Jesus akon utod, kag ang akon pinalangga nga asawa isa ka wala kamatayon kag wala katapusan nga kaupod: isa ka mabuot nga nagaalagad nga anghel nga ginhatag sa akon bilang kalipayan, kag korona sang himaya tubtob sa katubtuban. Sa malip-ot, sarang na ako magpalangga upod sang espiritu kag sang paghangop.”¹⁴

Sa pagtakop, ginapahanumdum ko ang tanan nga wala kita nagapati nga ang kaayo mahimo lamang paagi sa simbahan. Bisan wala sang simbahan, makita naton ang minilyon nga mga tawo nga nagasuporta kag nagahimo sing indi maisip nga maayong binuhatan. Sa indibidwal nga paagi, ang mga Santos sa Ulihing mga Adlaw nagapartisipar sa madamo sini. Makita naton ining mga binuhatan bilang pagpahayag sang wala katapusan nga kamatuoran nga “ang Espiritu nagahatag sang kasanag sa tagsa ka tawo nga mabun-ag sa kalibutan.”¹⁵

Wala sapayan sang maayong mga binuhatan nga mahimo nga wala sang simbahan, ang kabug-osan sang doktrina kag iya sini nagaluwas kag nagapahitaas nga mga ordinansa matigayon lamang sa ginpanumbalik nga Simbahan. Dugang pa, ang pagtambong sa Simbahan nagahatag sa aton sang kusog kag dugang nga pagtuo nga nagahalin sa pagpakig-upod sa iban nga tumuluo kag pagsimba upod sinang mga nagatinguha man nga magpabilin sa dalan sang kasugtanan kag mangin mas maayo nga mga disipulo ni Cristo. Ginapangamuyo ko nga tanan kita mangin malig-on sa sining mga eksperiyensya sa Simbahan samtang nagatinguha kita sang kabuhi nga wala sing katapusan, ang pinakadako sa tanan nga dulot sang Dios, sa ngalan ni Jesucristo, amen.