“Ginahigugma Mo Bala Ako Sing Labi Pa Sini sa Ila?”
Ano nga mga butang ang inyo mahimo sa inyo kaugalingon nga kabuhi agud mapakita nga palangga ninyo ang Dios sing una sa tanan?
Sang Nobyembre 2019, ako kag ang akon abyan nagbisita sa Duta nga Balaan. Samtang ato didto, ginrebyu kag gintun-an namon ang balaan nga mga kasulatan parte sa kabuhi ni Jesucristo. Isa ka aga, nagtindog kami sa aminhan-nakatundan nga baybayon sang Dagat sang Galilea sa duog kon sa diin mahimo nga nagkitaay sanday Jesus kag ang Iya mga disipulo pagkatapos sang Iya Pagkabanhaw.
Pagkatapos sang Pagkabanhaw si Jesus, kon basahon naton sa Juan kapitulo 21, si Pedro kag ang iban nga mga disipulo nangisda bilog nga gab-i nga wala sing nakuha.1 Pagkaaga, nakakita sila sang isa ka tawo nga nagatindog sa baybayon nga nagsiling sa ila nga ihaboy ang ila pukot sa pihak nga kilid sang bangka. Sa ila kakibot, milagro nga napuno ang ila nga pukot.2
Gilayon nila nga nahibal-an nga ang tawo amo ang Ginuo, kag nagdalidali sila agud tamyawon Sia.
Samtang ila ginaguyod ang pukot pakadto sa baybayon, nga puno sang isda, si Jesus nagsiling, “Dali kamo kag magpamahaw.”3 Si Juan nagsugid nga “sang nakapamahaw na sila, nagsiling si Jesus kay Simon Pedro, “Simon, anak ni Juan, ginahigugma mo bala ako sing labi pa sini sa ila?”4
Samtang nagatindog ako sa didto mismo nga baybayon, akon narealisar nga ang pamangkot sang Manluluwas isa sa pinakaimportante nga pamangkot nga Iya ipamangkot sa akon sa pila ka adlaw. Daw halos mabatian ko ang Iya tingug nga nagapamangkot, “Russell, ginahigugma mo bala ako sing labi pa sini sa ila?”
Nagapamensar bala kamo kon ano ang ginatumod ni Jesus sang pamangkuton Niya si Pedro, “Ginahigugma mo bala ako sing labi pa sini sa ila?”
Sa pag-angot sining pamangkot sa aton mga kaugalingon sa aton panahon, ang Ginuo mahimo nga nagapamangkot sa aton kon ano kita kasako kag parte sa madamo nga mga positibo kag negatibo nga mga impluwensya nga nagapaindisanay para sa aton atensyon kag aton oras. Mahimo nga nagapamangkot Sia sa tagsa sa aton kon aton Sia ginahigugma sing labi pa sangsa mga butang sining kalibutan. Mahimo nga isa ini ka pamangkot parte sa kon ano gid ang aton ginapakamahal sa kabuhi, kon sin-o ang aton ginasunod, kag kon paano naton ginatan-aw ang aton mga relasyon sa mga miyembro sang aton pamilya kag mga kaingod. Ukon basi nagapamangkot Sia kon ano gid bala ang nagadala sa aton sing kasadya kag kalipayan.
Ang mga butang bala sining kalibutan nagahatag sa aton sang kasadya, kalipayan, kag paghidaet nga gintanyag sang Manluluwas sa Iya mga disipulo kag Iya ginatanyag sa aton? Sia lamang ang makahatag sa aton sang matuodtuod nga kasadya, kalipay, kag paghidaet paagi sa aton pagpalangga sa Iya kag pagsunod sang Iya mga pinanudlo.
Paano naton sabton ang pamangkot nga “Ginahigugma mo bala ako sing labi pa sini sa ila?”
Kon aton matukiban ang bug-os nga kahulugan sining pamangkot, mangin mas maayo kita nga mga miyembro sang pamilya, mga kaingod, mga pumuluyo, mga miyembro sang Simbahan, kag mga anak sang Dios.
Sa akon katigulangon, madamo na nga lubong ang akon natambongan. Sigurado ako nga madamo sa inyo ang nakapanilag sang akon napanilagan. Kon nagasaulog sang kabuhi sang napatay nga miyembro sang pamilya o abyan, malaka mabatian nga ang manughambal nagasugid parte sa kadakuon sang balay, kadamuon sang salakyan, ukon mga pundo sa bangko. Masami nga indi sila maghambal parte sa mga post sa social media. Sa kalabanan nga lubong, nagatutok sila sa mga relasyon sang ila pinalangga, pag-alagad sa iban, mga leksyon sa kabuhi kag mga inagihan, kag sa ila paghigugma kay Jesucristo.
Indi ako paghangpa sing sayop. Wala ako nagasiling nga ang pag-angkon sang matahum nga balay ukon salakyan ukon ang paggamit sang social media malain. Ang akon ginasiling amo nga sa ulihi, inang mga butang indi na masyado kaimportante ikomparar sa paghigugma sa Manluluwas.
Kon aton Sia ginahigugma kag ginasunod, may pagtuo kita sa Iya. Nagahinulsol kita. Ginasunod naton ang Iya halimbawa kag ginbunyagan kag ginabaton ang Balaan nga Espiritu. Nagabatas kita tubtob sa katapusan kag nagatiner sa dalan sang kasugtanan. Ginapatawad naton ang mga miyembro sang pamilya kag mga kaingod paagi sa pagbuya sang mga pagdumot nga ayhan aton ginahuptan. Sinsero kita nga nagatinguha sa pagtuman sang mga kasugoan sang Dios. Nagapaninguha kita nga mangin matinumanon. Nagahimo kita kag nagatuman sang mga kasugtanan. Ginatahod naton ang aton mga amay kag iloy. Ginapahigad naton ang negatibo nga dutan-on nga mga impluwensya. Ginahanda naton ang aton mga kaugalingon para sa Iya Ika-duhang Pagkari.
Sa “Ang Buhi nga Cristo: Ang Panaksihon sang mga Apostoles,” mabasa naton: “Si [Jesus] sa pila ka adlaw magabalik sa duta. … Magadumala Sia bilang Hari sang mga Hari kag magagahum bilang Ginuo sang mga Ginuo, kag ang tagsa ka tuhod magaluhod kag ang tagsa ka dila magadayaw sa pagsimba sa atubang Niya. Ang tagsa sa aton magatindong agud hukman Niya suno sa aton mga binuhatan kag sa mga handum sang aton mga tagipusuon.”5
Bilang isa sa mga Apostoles nga nagpirma sang dokumento nga “Ang Buhi nga Cristo”, makasiling ako nga ang mahibal-an nga si Jesus “ang kasanag, ang kabuhi, kag ang paglaum sang kalibutan”6 nagahatag sa akon sang mas dako nga handum nga higugmaon Sia sing labi pa adlaw-adlaw.
Nagapamatuod ako nga ang Amay nga Langitnon kag si Jesucristo buhi. Nagapamatuod ako nga palangga Nila kita. Ang balaan nga mga kasulatan nagatudlo nga “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang [bisan sin-o] nga nagatuo sa iya indi na mapatay, kundi may kabuhi nga wala sing katapusan.”7 Ang balaan nga mga kasulatan nagatudlo man nga si Jesus “naghigugma gid sang kalibutan sa bagay nga ginhatag niya ang iya kaugalingon nga kabuhi, agud nga ang tanan nga magpati sa iya mangin mga anak sang Dios.”8
Ang Amay nga Langitnon naghigugma gid sa aton nga Iya ginhanda ang Iya plano sang kaluwasan nga may Manluluwas nga amo ang pinakaimportante nga persona. Kag si Jesus naghigugma gid sa aton nga sa dakong Konseho sa Langit, sang ang Amay nga Langitnon nagpamangkot, “Sin-o ang akon ipadala?” Si Jesus nga among Panganay sa tanan nga anak nga espiritu sang Amay nagsabat, “Yari ako, ipadala ako.”9 Sia nagsiling sa Amay, “Amay, ang imo pagbuot matuman, kag ang himaya mangin imo tubtob sa wala’y katapusan.”10 Si Jesus nagboluntaryo nga mangin aton Manluluwas kag Manunubos agud mahimo kita nga mangin kaangay Nila kag makabalik sa Ila presensya.
Ining duha ka balaan nga mga kasulatan nagatudlo nga agud makabalik sa Ila presensya kinahanglan naton nga magpati. Kinahanglan naton magpati kay Jesus kag sa plano sang kalipayan sang Dios. Ang magpati amo ang higugmaon kag sundon ang Manluluwas kag tumanon ang mga kasugoan, bisan sa tunga sang mga pagtilaw kag kinagamo.
Ang kalibutan sa karon magamo. May mga kapaslawan, pagbinaisay, kalisdanan, kag mga pagtublag.
Si Pangulong Dallin H. Oaks, nga naghambal sang tuig 2017, nagsiling sang masunod: “Makahalangkat ini nga panahon, puno sang mga kabalak-an: mga inaway kag mga hinuring-huring sang mga inaway, posible nga mga epidemya sang makalaton nga mga balatian, mga tig-ilinit, mga pagbaha, kag pag-init sang kalibutan.”11
Indi mahimo nga madula ang aton gugma kag paglaum kay Jesus, bisan nga nagaatubang kita sang daw nagapalanglapaw nga mga hangkat. Ang Amay nga Langitnon kag si Jesucristo indi gid malipat sa aton. Palangga Nila kita.
Sang nagligad nga Oktubre, si Pangulong Russell M. Nelson nagtudlo sa aton sang kaimportante sang pagbutang sang Amay nga Langitnon kag kay Jesucristo nga una sa aton mga kabuhi. Si Pangulong Nelson nagtudlo sa aton nga isa sa kahulugan sang tinaga nga Israel amo ang “tugoti ang Dios nga magpangibabaw.”12
Ginpamangkot Niya sa tagsa sa aton ang mga ini: “Handa ka bala nga tugotan ang Dios nga magpangibabaw sa imo kabuhi? Handa ka bala nga tugotan ang Dios nga mangin pinakaimportante nga impluwensya sa imo kabuhi? Tugotan mo bala ang Iya mga pulong, ang Iya mga kasugoan, kag ang Iya mga kasugtanan nga mag-impluwensya sang imo ginahimo sa kada adlaw? Tugotan mo bala ang Iya tingug nga magpanguna sangsa bisan ano nga iban pa? Ikaw bala handa nga unahon ang bisan ano nga kinahanglan Niya ipahimo sa imo sangsa iban mo pa nga mga ambisyon? Ikaw bala handa nga ipaidalom ang imo pagbuot sa Iya?13
Pirme naton panumdumon nga ang aton matuodtuod nga kalipay magadepende sa aton relasyon sa Dios, kay Jesucristo, kag sa isa kag isa.
Isa ka paagi nga mapakita ang aton pagpalangga amo ang pagpakig-upod sa pamilya, kaabyanan, kag mga kaingod sa paghimo sang pila ka magagmay nga butang agud makaserbisyo sing mas maayo sa kada isa. Himoa ang mga butang nga maghimo sining kalibutan nga mas maayo.
Ano nga mga butang ang inyo mahimo sa inyo kaugalingon nga kabuhi agud mapakita nga palangga ninyo ang Dios sing una sa tanan?
Kon magtutok kita sa pagpalangga sa aton mga kaingod subong nga Sia nagapalangga sa ila, nagaumpisa kita sa matuodtuod nga pagpalangga sa ila nga ara sa aton palibot.14
Mamangkot ako liwat, paano ninyo sabton ang pamangkot sang Manluluwas “Ginahigugma mo bala ako sing labi pa sini sa ila?”
Samtang inyo ginabinagbinag ining pamangkot pareho sang akon ginhimo, ginapangamuyo ko nga makasabat kamo pareho kay Pedro madugay na kaayo sadto, “Huo, Ginoo, nakahibalo gid ikaw nga ako nagahigugma sa imo”15 kag dayon ipakita ini paagi sa paghigugma kag pag-alagad sa Dios kag sa ila nga ara sa inyo palibot.
Nagapamatuod ako nga ginbugayan kita nga may ara kita sang ebanghelyo ni Jesucristo nga magagiya sa aton sa kon paano kita magpangabuhi kag magtamdanay. Sa Iya, aton matukiban nga ang tagsa ka anak nga babayi kag lalaki malahalon sa Iya.
Nagapamatuod ako nga si Jesucristo amo ang aton pinalangga nga Manluluwas. Sia ang Bugtong nga Inanak sang Dios. Kag ginapaambit ko ining testimonya sing mapainubuson sa ngalan ni Jesucristo, amen.