Pagpabaskog sang Aton Pagkahaylo kay Jesucristo
Ang balaan nga mga kasulatan kag ang aton ihibalo parte sa Dios mga dulot—mga dulot nga masami naton ginapasapayan. Pasalamatan naton ining mga bugay.
Salamat gid, Elder Nielson sa imo manami nga menshae. Kinahanglan naton ina.
Pinalangga kong mga kauturan, si Pangulong Russell M. Nelson nagtudlo sa aton sang sini lang: “Ang maghimo sing maayo nagakinahanglan sang pagpaninguha. Ang mangin matuod nga disipulo ni Jesucristo wala sing kinalain diri. Ang pagpadako sang inyo pagtuo kag pagsalig sa Iya nagakinahanglan sang pagpaninguha.” Isa sang mga ginrekomendar niya sa aton agud padakuon ang aton pagtuo kay Jesucristo amo nga mangin aktibo kita nga mga manugtuon, nga mangin matutum kita sa balaan nga mga kasulatan agud mahangpan sing mas maayo ang misyon kag pag-alagad ni Cristo. (Tan-awa sa “Christ Is Risen; Faith in Him Will Move Mountains,” Liahona, May 2021, 103.)
Matun-an naton sa Libro ni Mormon nga ang balaan nga mga kasulatan importante nga bahin sang pamilya ni Lehi—sa bagay nga si Nefi kag iya mga utod nagbalik sa Jerusalem agud kuhaon ang mga lamina nga saway (tan-awa sa 1 Nefi 3-4).
Ang balaan nga mga kasulatan nagapahayag sang pagbuot sang Dios para sa aton, pareho gid sang Liahona para kay Nefi kag iya amay. Pagkatapos nga mabali ang iya pana, kinahanglan mahibal-an ni Nefi kon diin sia dapat magkadto agud makakuha sang pagkaon. Ang iya amay nga si Lehi nagtulok sa Liahona kag nakita ang mga butang nga nasulat diri. Nakita ni Nefi nga ang mga dagom naggiho suno sa pagtuo, katutum, kag atensyon nga ginahatag diri. Nakita man niya ang pagsulat nga mahapos basahon kag naghatag sa ila sing paghangop parte sa mga banas sang Ginuo. Nahibal-an niya nga ang Ginuo makapahanabo sing dalagko nga mga butang paagi sa magagmay nga mga paagi. Matinumanon sia sa mga direksion nga ginahatag sang Liahona. Nagsaka sia sa bukid kag nakakuha sang pagkaon para sa iya pamilya nga nag-antos gid tungod nga kulang sila sa pagkaon. (Tan-awa sa 1 Nefi 16:23–31
Para sa akon si Nefi isa ka estudyante nga dedikado sa balaan nga mga kasulatan. Mabasa naton nga si Nefi nagkalipay sa balaan nga mga kasulatan, nagbinagbinag sini sa iya tagipusuon, kag nagsulat sini para tun-an kag para sa kaayohan sang iya mga anak (tan-awa sa 2 Nefi 4:15–16).
Si Pangulong Russell M. Nelson nagpanudlo:
“Kon kita ‘magadutdot pasulong, nga nagapaayaw sa pulong ni Cristo, kag magapadayon tubtob sa katapusan, … [kita] makaangkon sang kabuhi nga wala sing katapusan’ [2 Nefi 31:20].
“Ang pagpaayaw nagakahulugan sing labi pa sa tilawan. Ang pagpaayaw nagakahulugan nga saboran. Ginasaboran naton ang balaan nga mga kasulatan paagi sa pagtuon sang mga ini sa espiritu sang masinadyahon nga pagdiskubre kag matinuohon nga pagtuman. Kon nagapaayaw kita sa mga pulong ni Cristo, madulot sila sa ‘mga tapi-tapi nga unod sang mga tagipusuon’ [2 Mga Taga-Corinto 3:3]. Mahimo ang mga ini nga importante nga bahin sang aton kinaugali” (“Living by Scriptural Guidance,” Liahona, Jan. 2001, 21).
Ano ang pila ka mga butang nga himuon naton kon ang aton mga kalag nalipay sa balaan nga mga kasulatan?
Magadugang ang aton kaluyag nga mangin bahin sang pagtipon sang Israel sa duha ka bahin sang belo. Mangin normal kag natural para sa aton nga agdahon ang aton pamilya kag mga abyan nga mamati sa mga misyonero. Mangin takos kita, kag makaangkon kita sang current temple recommend agud pirme makakadto sa templo. Magatinguha kita nga makakita, makahanda, kag makahatag sang mga ngalan sang aton mga katigulangan sa templo. Mangin matutum kita sa pagtipig sang Adlaw nga inugpahuway, nga nagakadto sa simbahan kada Domingo agud bag-uhon ang aton mga kasugtanan sa Ginuo samtang nagapartisipar kita sa pag-ambit sang sakramento. Magapangako kita nga magpabilin sa dalan sang kasugtanan, nga nagakabuhi sa tagsa ka pulong nga nagagwa sa baba sang Dios (tan-awa sa Doktrina kag mga Kasugtanan 84:44).
Ano ang kahulugan sa imo nga magkalipay sa mga butang sang Ginuo?
Ang pagkalipay sa balaan nga mga kasulatan labaw pa sa kagutom kag kauhaw sa ihibalo. Si Nefi nakaeksperiyensia sing dako nga kalipay durante sang iya kabuhi. Apang, nag-atubang man sia sing mga kabudlayan kag kasubo (tan-awa sa 2 Nefi 4:12–13). “Apang,” siling niya, “nahibal-an ko kon kay sin-o ako nagasalig” (2 Nefi 4:19). Kon magtuon kita sang balaan nga mga kasulatan, mas mahangpan naton ang plano sang kaluwasan kag pangkahitaasan sang Dios, kag magasalig kita sa mga promisa nga Iya ginhimo sa aton sa balaan nga mga kasulatan, kag sa mga promisa kag mga pagpakamaayo sang moderno nga mga propeta.
Isa ka hapon, gin-imbitar kami sang akon asawa sa balay sang akon abyan. Ang ila pito ka tuig nga bata nga si David wala pa gid nakabati sang istorya ni David kag Goliat, kag luyag niya ini mabatian. Sang nagsugod ako sa pag-istorya, natandog sia sa paagi nga si David, upod sang iya pagtuo kag sa ngalan sang Dios sang Israel, nagpilas kag nagpatay sa Filistinhon paagi sa tirador kag bato, nga wala sang espada sa iya kamot (tan-awa sa 1 Samuel 17).
Sang ginatulok niya ako sang iya dalagko kag maitom nga mga mata, namangkot sia sa akon, “Sin-o ang Dios?” Ginpaathag ko sa iya nga ang Dios ang aton Amay nga Langitnon kag nagatuon kita parte sa Iya sa balaan nga mga kasulatan.
Dayon namangkot sia sa akon, “Ano ang balaan nga mga kasulatan?” Ginsugiran ko sia nga ang balaan nga mga kasulatan mga pulong sang Dios kag mabasa niya diri ang matahum nga mga istorya nga makabulig sa iya nga makilala pa gid ang Dios. Ginpangabay ko ang iya iloy nga gamiton ang Biblia sa ila balay kag indi pagpatulogon si David nga indi niya mabasa ang bilog nga istorya sa iya. Nalipay sia samtang nagapamati sia sini. Ang balaan nga mga kasulatan kag ang aton ihibalo parte sa Dios mga dulot—mga dulot nga masami naton ginapasapayan. Pasalamatan naton ining mga bugay.
Samtang nagaalagad sa misyon bilang isa ka lamharon, natalupangdan ko nga sa amon pagtudlo gamit ang balaan nga mga kasulatan, nabag-o ang kabuhi sang madamo nga tawo. Nahibal-an ko ang gahum nga ara sa mga ini kag kon paano nila mabag-o ang aton mga kabuhi. Ang tagsa ka tawo nga gintudloan namon sang ginpanumbalik nga ebanghelyo pinasahi nga indibidwal nga lainlain ang ila kinahanglanon. Ang balaan nga mga kasulatan— huo, ang mga propesiya nga sinulat sang balaan nga mga propeta— nagdala sa ila sa pagtuo sa Ginuo kag sa paghinulsol kag nagbag-o sang ila mga tagipusuon.
Ang balaan nga mga kasulatan nagpuno sa ila sing kalipay tungod nagbaton sila sing inspirasyon, direksyon, kaumpawan, kusog, kag mga sabat sa ila mga kinahanglanon. Madamo sa ila ang nagdesisyon nga maghimo sang mga pagbag-o sa ila mga kabuhi kag nagsugod sa pagtuman sang mga kasugoan sang Dios.
Si Nefi nagapadasig sa aton nga magpaayaw sa mga pulong ni Cristo, tungod ang mga pulong ni Cristo magasugid sa aton sang tanan nga butang nga dapat naton himuon (tan-awa sa 2 Nefi 32:3).
Ginaagda ko kamo nga maghimo sing permanente nga plano sa pagtuon sang balaan nga mga kasulatan. Ang Dali, Magsunod sa Akon isa ka manami nga manwal nga may ara kita para sa pagtudlo kag pagtuon sang ebanghelyo, pagpabaskog sang aton pagkahaylo kay Jesucristo, kag pagbulig sa aton nga mangin pareho sa Iya. Kon magtuon kita sang ebanghelyo, indi lang kita basta nga nagapangita sing bag-o nga impormasyon; kundi, nagatinguha kita nga mangin “bag-o na nga tinuga” (2 Mga Taga-Corinto 5:17).
Ang Balaan nga Espiritu nagagiya sa aton padulong sa kamatuoran kag nagasaksi sinang kamatuoran (tan-awa sa Juan 16:13). Ginapasanagan Niya ang aton mga kaisipan, ginapadasig ang aton pag-intiendi, kag ginatandog ang aton mga tagipusuon paagi sa rebelasyon halin sa Dios, ang ginahalinan sang tanan nga kamatuoran. Ang Balaan nga Espiritu nagatinlo sang aton mga tagipusuon. Ginainspirar Niya sa aton ang kaluyag nga magpangabuhi sa kamatuoran, kag nagahutik Sia sa aton sang mga paagi agud himuon ini. “Ang Balaan nga Espiritu … magatudlo sa inyo sang tanan nga butang” (Juan 14:26).
Parte sa mga pulong nga Iya ginpahayag sa Propetang si Joseph Smith, ang aton Manluluwas nagsiling:
“Ining mga pulong indi iya sang mga tawo ukon sing isa ka tawo, kundi akon; …
“Kay akon tingug ang nagahambal sang mga ini sa inyo, kay ini ginahatag sang akon Espiritu sa inyo; …
“Gani, makapamatuod kamo nga nabatian ninyo ang akon tingug, kag nakahibalo sang akon mga pulong” (Doktrina kag mga Kasugtanan 18:34–36).
Dapat kita magtinguha para sa pagpakig-upod sang Balaan nga Espiritu. Ini nga tuyo dapat magdumala sang aton mga desisyon kag maggiya sang aton mga hunahuna kag mga aksyon. Kinahanglan naton pangitaon inang nagaagda sang impluwensya sang Espiritu kag sikwayon inang nagapapalayo sa sini nga impluwensya.
Nagapamatuod ako nga si Jesucristo ang hinigugma nga Anak sang aton Amay nga Langitnon. Palangga ko ang akon Manluluwas. Nagapasalamat ako para sa Iya balaan nga mga kasulatan kag para sa Iya buhi nga mga propeta. Si Pangulong Nelson ang Iya propeta. Sa ngalan ni Jesucristo, amen.