Ang Mangin Sumulunod ni Cristo
Ang mangin sumulunod ni Cristo amo ang pagtinguha nga ipabagay ang aton mga buhat, pamatasan kag kabuhi sa iya sang Manluluwas.
Sa akon personal nga pagtuon sang balaan nga mga kasulatan, nainspirar ako sang pagbag-o ni Saul sang Tarsus, nga sang ulihi nakilal-an nga si Pablo, suno sa ginasaysay sa Biblia.
Si Pablo mabakas sa paghingabot sang Simbahan kag mga Kristiyano. Apang bangud sang gahum sang langit kag sang Pagbayad-Sala ni Jesucristo, lubos sia nga nabag-o, kag nangin isa sang pinakadalayawon nga alagad sang Dios. Ang iya ehemplo sa kabuhi amo ang Manluluwas nga si Jesucristo.
Sa isa sang mga panudlo ni Pablo sa mga Taga-Corinto, gin-agda niya sila nga mangin iya mga sumulunod kay sia mismo sumulunod ni Cristo. (tan-awa sa 1 Taga-Corinto 11:1 Sinsero ini kag balido nga pangagda humalin sang panahon ni Pablo asta subong: ang mangin sumulunod ni Cristo.
Nagsugod ako sa pagpamalandong kon ano ang kahulugan sang mangin isa ka sumulunod ni Cristo. Kag mas importante, nagsugod ako sa pagpamangkot, “Paano ko Sia sundon?”
Ang mangin sumulunod ni Cristo amo ang pagtinguha nga ipabagay ang aton mga buhat, pamatasan kag kabuhi sa iya sang Manluluwas. Ini amo ang pag-angkon sang maayong mga kinaiya. Ini amo ang mangin matuod nga disipulo ni Jesucristo.
Natun-an ko ang pila ka aspeto sang kabuhi sang Manluluwas, kag ginpili ko bilang bahin sang akon mensahe subong, ang apat sang Iya mga kinaiya nga ginatinguhaan ko nga sundon kag ginapaambit sa inyo.
Ang una nga kinaiya sang Manluluwas amo ang pagkamapainubuson. Si Jesucristo mapainubuson gid halin pa sa kabuhi antes sa duta. Sa Konseho sa Langit, ginkilala Niya kag gintugotan ang pagbuot sang Dios nga mangibabaw sa plano sang kaluwasan para sa katawhan. Siling Niya, “Amay, ang imo pagbuot matuman, kag ang himaya mangin imo tubtob sa wala’y katapusan” (Moises 4:2).
Nakahibalo kita nga si Jesucristo nagtudlo sang pagkamapainubuson kag nagpaubos sang Iya kaugalingon agud himayaon ang Iya Amay.
Magmangin mapainubuson kita tungod nagadala ini sang paghidaet (tan-awa sa Doktrina kag mga Kasugtanan 19:23). Ang pagkamapainubuson ginasundan sang himaya, kag nagadala ini sang pabor sang Dios sa aton: “Sa amo man nga bagay, tanan kamo dapat magpanampi sang pagpaubos, sa pag-alagad sa isa kag isa: kay ginasumpo sang Dios ang bugalon, pero iya ginabuligan ang mapainuboson.” (1 Pedro 5:5). Ang pagkamapainubuson nagadala sing malulo nga mga sabat. Ini ang ginahalinan sang matarong nga pamatasan.
Si Elder Dale G. Renlund nagtudlo:
“Ang mga tawo nga nagalakat sing mapainubuson upod sa Dios nagadumdum sang nahimo sa ila sang Amay nga Langitnon kag ni Jesucristo.
“Nagagawi kita sing honorable upod sa Dios paagi sa pagkabuhi sing mapainubuson upod sa Iya” (“Do Justly, Love Mercy, and Walk Humbly with God,” Liahona, Nov. 2020, 111, 109).
Ang ika-duha nga kinaiya sang Manluluwas amo ang kaisog. Kon panumdumon ko si Jesucristo sa edad nga 12, nga nagapungko sa templo sang Dios upod ang mga manunudlo kag ginatudloan sila sang diosnon nga mga butang, makita ko nga sa bata nga edad, may tuman na sia nga kaisog, pinasahi nga kaisog. Samtang ang kalabanan nagapaabot nga makita ang bata nga ginatudloan sang mga manunudlo, Sia ang nagatudlo sa ila kay “nagapamati sila sa iya, kag ginapamangkot nila sia” (Joseph Smith Translation, Luke 2:46 [sa Luke 2:46, footnote c]).
Nag-alagad kami sang full-time mission sa Democratic Republic of the Congo Mbuji-Mayi Mission halin sang 2016 asta 2019. Ang pagbiyahe sa mission halin sa isa ka zone pakadto sa isa paagi lang sa karsada. May sitwasyon nga nagluntad sa sina nga lugar nga ang mga tulisan nagapang-atake sa mga tawo sa dalanon kag nagatublag sang biyahe nila gamit ang mga sundang kag iban pa nga matalom nga mga armas.
Lima ka misyonero nga nagabiyahe pag-transfer sa ila sa isa ka zone ang nangin biktima sining mga kinagamo. Kami mismo bilang biktima sining sitwasyon sang nagligad, nagsugod nga mahadlok para sa kabuhi kag ikaayo namon tanan nga nagaala-ala nga mag-agi sa sining mga karsada sa pagbisita sa mga misyonero kag paghiwat sang mga zone conference. Wala kami nakahibalo kon asta san-o nga amo sini. Nagpadala ako sang report sa Area Presidency, kag nagpautwas sang balatyagon sang kahadlok parte sa pagsige biyahe kay ang karsada amo lang gid ang paagi nga malab-ot ang amon mga misyonero.
Sa iya sabat, si Elder Kevin Hamilton, nga amon pangulo sa Africa Southeast Area, nagsulat sa akon: “Laygay ko nga himuon ang tanan mo nga masarangan. Mangin maalam kag mapangamuyuon. Indi pag-ibutang sing hungod ang inyo mga kaugalingon ukon ang inyo mga misyonero sa peligro pero sa amo man, magsulong nga may pagtuo. ‘Kay ang Dios wala maghatag sa aton sang espiritu sang katalaw; kundi sang gahum, kag gugma, kag kabut-anan’ (2 Timoteo 1:7).”
Ining laygay nagpabakod sa amon sing tuman kag nagtugot sa amon nga magsige sa pagbiyahe kag maisog nga mag-alagad asta matapos ang amon misyon tungod nabatian namon ang direksyon sang Amay sa Langit paagi sinang balaan nga pulong.
Sa moderno nga balaan nga kasulatan, mabasa naton ang inspirado nga pulong sang Propetang Joseph Smith nga ginatalupangod ang pagpaisog sang Ginuo sa aton: “Mga kauturan, indi bala kita magpadayon sa amo kadako nga kawsa? Mag-abante kag indi mag-atras. Kaisog, mga kauturan; kag abante, abante sa kadalag-an!” (Doktrina kag mga Kasugtanan 128:22).
Magpakaisog kita sa paghimo sang husto, bisan pa indi ini popular— kaisog sa pagpangapin sang aton pagtuluohan kag pag-akto nga may pagtuo. Magpakaisog kita sa paghinulsol adlaw-adlaw, kaisog sa pagbaton sang pagbuot sang Ginuo kag pagtuman sang Iya mga kasugoan. Magpakaisog kita sa pagpangabuhi sing matarong kag paghimo sang ginapaabot sa aton sa nagkalainlain naton nga mga responsibilidad kag mga posisyon.
Ang ika-tatlo nga kinaiya sang Manluluwas amo ang pagpatawad. Sa tion sang iya mortal nga pag-alagad, ginpunggan sang Manluluwas ang pagbato sa babayi nga nadakpan sa pagpanglahi. Ginsugo Niya sia nga “[mag]lakat, kag kutob karon indi ka na magpakasala” (Juan 8:11). Nagdala ini sa iya sa paghinulsol kag dayon sa kapatawaran, kay pareho sa nasulat sa balaan nga mga kasulatan, “ang babayi naghimaya sa Dios sugod sina nga tion kag nagpati sa iya ngalan” (Joseph Smith Translation, John 8:11 [sa John 8:11, footnote c]).
Sa Christmas devotional sang Disyembre 2018, ang mahal naton nga Pangulong Russell M. Nelson naghambal parte sa apat ka dulot nga nabaton naton halin sa Manluluwas. Nagsiling sia nga isa ka dulot nga ginatanyag sang Manluluwas amo ang ikasarang nga magpatawad:
“Paagi sa Iya wala’y dulonan nga Pagbayad-Sala, sarang mo mapatawad inang nakasakit sa imo kag inang ayhan indi gid mag-ako sang ila pagpanakit sa imo.
“Sa kinaandan mas mahapos magpatawad sa isa nga sinsero kag mapainubuson nga nagapangayo sang imo kapatawaran. Apang ang Manluluwas magahatag sa imo sang ikasarang nga magpatawad sang bisan sin-o nga nagmaltrato sa imo sa bisan ano nga paagi” (“Four Gifts That Jesus Christ Offers to You” [First Presidency Christmas devotional, Dec. 2, 2018], broadcasts.ChurchofJesusChrist.org).
Sinsero naton nga patawaron ang isa kag isa agud maagom ang pagpatawad sang Amay. Ang pagpatawad nagahilway sa aton kag nagahimo sa aton nga takos agud mag-ambit sang sakramento kada Domingo. Ang pagpatawad kinahanglanon agud mangin matuod-tuod kita nga mga disipulo ni Jesucristo.
Ang ika-apat nga kinaiya sang Manluluwas amo ang pagsakripisyo. Kabahin ini sang ebanghelyo ni Jesucristo. Ang Manluluwas naghatag sang pinakamataas nga halad sang Iya kabuhi para sa aton agud nga matubos kita. Nga nabatyagan ang sakit sang pagsakripisyo, ginpangabay Niya ang Iya Amay nga ipahilayo ang tagayan, apang ginhimo Niya ang tanan agud kumpletohon ang wala katapusan nga sakripisyo. Ini ang Pagbayad-Sala ni Jesucristo.
Si Pangulong Russell M. Ballard nagtudlo sini: “Ang sakripisyo pagpakita sang tunay nga gugma. Ang kadakuon sang aton gugma para sa Ginuo, sa ebanghelyo, kag sa aton isigkatawo matakos paagi sa kon ano ang handa naton isakripisyo para sa ila” (“The Blessings of Sacrifice,” Ensign, May 1992, 76).
Makasakripisyo kita sang aton tiempo sa pagministering, sa pag-alagad sa iban, sa paghimo sang maayo, sa paghikot sang family history, kag sa pagmagnify sang aton mga calling sa Simbahan.
Makahatag kita sang aton pinansyal nga ikasarang paagi sa pagbayad sang ika-pulo, tanyag-puasa, kag iban pa nga mga amot agud ipatukod ang ginharian sang Dios sa duta. Kinahanglan naton ang sakripisyo agud magtuman sang mga kasugtanan nga nahimo naton upod sa Manluluwas.
Pangamuyo ko nga sa pagsunod kay Jesucristo kag paggamit sang mga bugay sang Iya Pagbayad-Sala, mangin mas mapainubuson kita, mas maisog, mas magpatawad, kag mas magsakripisyo para sa Iya ginharian.
Nagasaksi ako nga ang aton Amay nga Langitnon buhi kag kilala Niya ang tagsa sa aton, si Jesus ang Cristo, si Pangulong Russell M. Nelson propeta sang Dios sa karon nga panahon. Nagasaksi ako nga Ang Simbahan ni Jesucristo sang mga Santos sa Ulihing mga Adlaw ang ginharian sang Dios sa duta kag ang Libro ni Mormon matuod. Sa ngalan ni Jesucristo, ang aton Manunubos, amen.