Ang Nagapadayon nga Kaluoy sang Manluluwas
Ang pagpakita sang kaluoy sa iban amo ang pundasyon sang ebanghelyo ni Jesucristo.
Isa sa pinakamaathag nga prinsipyo nga gintudlo sang Manluluwas sa tion sang Iya dutan-on nga pag-alagad amo ang pagtrato sa iban nga may kaluoy. Hunahunaon naton ining prinsipyo kag ang pagdapat sini sa aton kabuhi paagi sa pag-usisa sang panaysayon sang pagbisita ni Jesus sa balay ni Simon nga Fariseo.
Ang Ebanghelyo ni Lucas nagasugid nga isa ka babayi, nga ginakabig nga makasasala, ang nagsulod sa balay ni Simon sang ato didto si Jesus. Sa mapainubuson nga paghinulsol, ang babayi nagpalapit kay Jesus, ginbasa ang Iya mga tiil sang iya mga luha, ginpahiran ini sang iya buhok kag dayon ginhalokan kag ginbuboan sang agua.1 Ang bugalon nga tagbalay, nga nagakabig sa iya kaugalingon nga mas matarong sangsa babayi, nagpamensar sing may paghikay kag kahambog, “Kon matuod nga ining tawo propeta, kuntani nahibal-an niya kon sin-o kag ano ka makasasala sini nga babayi nga nagatandog sa iya.”2
Ang panimuot sang Fariseo nga mas matarong sia sangsa iban nagtulod sa iya nga maghusga sing di-husto kay Jesus kag sa babayi. Pero bangud makita Niya ang tanan, nahibal-an sang Manluluwas ang hunahuna ni Simon kag, sa dakong kaalam, ginbatoan ang paghikay ni Simon, kag ginsaway sia sa kakulang sang kortesiya sa pagbaton sang pinasahi nga bisita pareho sang Manluluwas sa iya balay. Sa matuod, ang direkta nga pagsaway ni Jesus sa Fariseo saksi nga si Jesus matuod gid nga may dulot sang propesiya kag ining babayi, nga mapainubuson kag mahinulsolon ang tagipusuon, naghinulsol kag napatawad sang iya mga sala.3
Pareho sang iban nga mga hitabo sa dutan-on nga pag-alagad ni Jesus, liwat nga ginapakita sining panaysayon nga ang Manluluwas maluluy-on sa tanan nga magakari sa Iya—wala sing pinilian—kag labi na gid sa mga pinakanagakinahanglan sang Iya bulig. Ang kalisod kag matinahuron nga gugma nga ginpakita sang babayi kay Jesus ebidensya sang iya hugot nga paghinulsol kag handum nga mapatawad sang iya mga sala. Apang, ang pagpati ni Simon nga mas maayo sia sa iban, upod ang iya matig-a nga tagipusuon,4 nagpugong sa iya nga hangpon ang balatyagon sang nagahinulsol nga kalag, kag ginkabig bisan pa gani ang Manluluwas sang kalilbutan sing pasapayan kag may paghikay. Ang iya panimuot nagpabutyag nga ang iya pangabuhi istriko kag hapaw lang nga pagtuman sang mga pagsulundan kag pagpasundayag sang iya pagpati paagi sa bugalon kag pakitakita nga pagkabalaan.5
Ang maluluy-on kag personal nga pag-alagad ni Jesus sa sining panaysayon nagapakita sang perpekto nga ehemplo kon paano kita dapat makigbagay sa aton isig-katawo. Ang balaan nga mga kasulatan may madamo nga halimbawa kon paano ang Manluluwas, nga ginapahulag sang Iya tudok kag nagapadayon nga kaluoy, nagpakig-angot sa katawhan sang Iya panahon kag nagbulig sa mga nagaantos kag “nagapalibog kag nagatalangtalang kaangay sang mga karnero nga wala sing manugbantay.”6 Gin-untay Niya ang Iya maluluy-on nga kamot sa mga kinahanglanon sang bulig sa ila mga karga, sa lawas kag sa espiritu.7
Ang maluluy-on nga kabubut-on ni Jesus nabase sa putli nga pagmahal,8 nga, sa Iya lubos kag perpekto nga gugma, pundasyon sang Iya nagabayad-sala nga sakripisyo. Ang maluluy-on nga buhat panguna nga kinaiya sang mga nagatinguha nga mangin balaan, kag naangot ini sa iban pa nga Kristohanon nga mga kinaiya pareho sang pagpangasubo upod sang mga nagapangasubo kag paghangop sa balatyagon sang iban, kaluoy, kag kaayo.9 Ang pagpakita sang kaluoy para sa iban, sa matuod, importante nga bahin sang ebanghelyo ni Jesucristo kag isa ka daku nga ebidensya sang aton espirituhanon kag emosyonal nga kasuod sa Manluluwas. Dugang pa, nagapakita ini sang kadako sang Iya impluwensya sa aton kabuhi kag nagapahayag sang sarang malab-ot sang aton mga espiritu.
Importante nga tandaan nga ang mga buhat sang kaluoy ni Jesus indi panalagsa ukon pagtuman lang sa sugo nga nabase sa lista sang mga ulobrahon nga dapat tapuson, kundi adlaw-adlaw nga pagpakita sang katunay sang Iya putli nga gugma sa Dios kag sa Iya mga anak kag sang Iya nagapadayon nga handum nga buligan sila.
Nahibal-an ni Jesus ang mga panginahanglan sang mga tawo bisan sa malayo. Gani, indi katingalahan, halimbawa, nga pagkatapos gid niya nga gin-ayo ang suluguon sang kapitan,10 si Jesus nagkadto sa siyudad nga ginatawag Nain halin sa Capernaum. Didto ginhimo ni Jesus ang isa sang pinakamaluluy-on nga milagro sang Iya dutan-on nga pag-alagad sang Iya ginmandoan ang patay nga pamatan-on, ang solo nga anak sang balo nga iloy, nga magbangon kag mabuhi. Nabatyagan ni Jesus indi lang ang tuman nga pag-antos sadtong makaluluoy nga iloy kundi pati man ang mabudlay nga sitwasyon sang iya kabuhi, kag natandog Sia sang matuod nga kaluoy para sa iya.11
Pareho sa makasasala nga babayi kag sa balo sang Nain, madamo sang mga tawo nga malab-ot sang aton impluwensya ang nagapangita sang kaumpawan, atensyon, paglakip, kag bisan ano nga bulig nga pwede naton mahatag sa ila. Tanan kita sarang mangin mga instrumento sa kamot sang Ginuo kag mangin maluluy-on sa mga nagakinahanglan pareho sang ginhimo ni Jesus.
May nakilala ako nga bata nga babayi nga natawo nga sungi kag punga. Ginkinahanglan niya ang una sa madamo nga mga operasyon sa ika-duha nga adlaw sang iya pagkatawo. Bangod natandog sang tunay nga kaluoy para sa mga nagaagi sang amo man nga hangkat, ining bata kag iya ginikanan luyag maghatag suporta, paghangop, kag emosyonal nga bulig sa iban nga nagaagi sa sining mabudlay nga sitwasyon. Sulat nila sa akon sini lang: “Paagi sa hangkat sang amon bata, may oportunidad kami nga makilala ang manami nga mga tawo nga nagakinahanglan sang kaumpawan, suporta, kag pagpaisog. Sang nagligad, ang amon bata nga 11 anyos na subong, nakigsugilanon sa ginikanan sang lapsag nga may amo man nga sablag. Sa sining pagsugilanon, makadali nga ginhukas sang amon bata ang mask nga iya ginasuksok tungod sa pandemya agud makita sang mga ginikanan nga may paglaum, bisan pa nga inang lapsag madamo pa sing maagyan sa masunod nga pila ka tuig agud masolbar ang problema. Dako ang amon pasalamat sa oportunidad nga magtanyag sang paghangop sa mga nagaantos, pareho sang ginahimo sang Manluluwas sa aton. Mabatyagan namon nga nagahaganhagan ang amon pag-antos sa tagsa nga makapaumpaw kami sa pag-antos sang iban.”
Mahal kong mga abyan, kon hungod kita nga nagatinguha nga updan sang maluluy-on nga kabubut-on ang aton pagpangabuhi, pareho sang ginpakita sang Manluluwas, mangin mas sensitibo kita sa mga panginahanglan sang mga tawo. Sa sinang dugang nga pagkasensitibo, ang balatyagon sang tunay nga pag-ulikid kag gugma magaimpluwensya sang tagsa naton ka ginahimo. Kilalahon sang Ginuo ang aton mga pagtinguha, kag piho gid nga bugayan kita sang mga oportunidad nga mangin mga instrumento sa Iya mga kamot sa pagpahumok sang mga tagipusuon kag pagdala sang kaumpawan sa mga “ginakapoy nga mga kamot.”12
Ang laygay ni Jesus kay Simon nga Fariseo nag-athag man nga indi gid kita dapat maghusga sing masakit ukon mapintas sa aton isig-katawo, bangod tanan kita nagakinahanglan sang paghangop kag kaluoy sang aton mahigugmaon nga Amay nga Langitnon para sa aton mga depekto. Indi bala amo gid ini ang gintudlo sang Manluluwas sa isa pa ka okasyon sang nagsiling Sia, “Kay ngaa bala ginahimutaran mo gid ang diutay nga puling sa mata sang imo utod, pero wala mo ginasapak ang puling nga daw troso kadako sa imo kaugalingon nga mata?”13
Dapat naton hunahunaon nga indi mahapos maghangop sang tanan nga sirkumstanya nga nagaapekto sang balatyagon ukon reaksyon sang isa ka tawo. Ang hitsura sarang magdaya kag sa masami wala nagahatag sang husto nga takos sang pamatasan sang isa ka tawo. Indi pareho sa aton, si Cristo makakita sang tanan nga aspeto sang isa ka sitwasyon.14 Bisan pa nakahibalo Sia sang aton mga kahuyang, ang Manluluwas wala nagakondenar sa aton sing padasudaso kundi padayon nga nagahikot upod sa aton sing maluluy-on sa malawig nga tion, nga ginabuligan kita nga hukson ang puling sa aton mata. Si Jesus pirme nagatulok sa tagipusuon kag indi sa hitsura.15 Sia mismo nagpahayag, “Indi kamo maghukom sa inyo makita sa gwa.”16
Karon, hunahunaa ang maalam nga laygay sang Manluluwas sa dose ka disipulo nga Nefinhon parte sining pamangkot:
“Kag hibal-a ninyo nga mangin mga hukom kamo sining katawhan, suno sa paghukom nga akon igahatag sa inyo, nga mangin matarong. Gani, ano nga sari sang mga tawo kamo mangin dapat? Sa pagkamatuod ginasiling ko sa inyo, bisan subong man sa akon.”17
“Gani luyag ko nga kamo magmangin himpit bisan nga ako, ukon ang inyo Amay nga yara sa langit himpit.”18
Sa sini nga konteksto, ang Ginuo magahukom sinang nagahusga sang ginapensar nga mga kakulangan sang iban sing di-matarong. Agud mangin kalipikado sa paghimo sang matarong nga mga paghukom, dapat magtinguha kita nga mangin pareho sa Manluluwas kag tulokon ang mga depekto sang kada tawo sing maluluy-on, bisan pareho sang iya pagtulok. Bangod malayo pa kita sa pagkaperpekto, ayhan mas maayo kon magpungko kita sa tiilan ni Jesus kag magpangayo sang kaluoy para sa aton mismo mga depekto, pareho sang mahinulsolon nga babayi sa balay sang Fariseo, kag indi mag-usik sang dako nga tiempo kag kusog sa pagtutok sa ginakabig nga depekto sang iban.
Mahal kong mga abyan, nagasaksi ako nga sa aton pagtinguha nga ilakip ang maluluy-on nga ehemplo sang Manluluwas sa aton mga kabuhi, ang aton ikasarang nga dayawon ang maayong mga kinaiya sang aton mga isigkatawo magadugang kag ang aton huyog nga husgahan ang ila mga depekto magabuhin. Ang aton kasuod sa Dios magadugang, kag piho gid nga ang aton mga kabuhi mangin mas malipayon, ang aton mga balatyagon mas mahigugmaon, kag makasalapo kita sang wala untat nga tuburan sang kalipay. Makilala kita nga mga makigdaeton,19 nga ang mga pulong pareho kamag-an sang tun-og sa kaagahon.
Nagapangamuyo ako nga mangin mas mapasensyahon kag mahinangpanon kita sa iban kag ang kaluoy sang Ginuo, sa iya perpekto nga kaayo, magapakalma sang aton pag-ugtas sa mga depekto sang iban. Amo ini ang pangagda sang Manluluwas. Nagasaksi ako nga buhi Sia. Sia ang perpekto nga ehemplo sang maluluy-on kag mapasensyahon nga pagkadisipulo. Nagapamatuod ako sa sining mga kamatuoran sa balaan nga ngalan sang Manluluwas nga si Jesucristo, amen.