13:7

Simple ang Pagkatahum—Matahum ang Pagkasimple

Ni Elder Gary E. Stevenson

Sang Korum sang Dose ka Apostoles

Kabay nga tipigan naton ang ebanghelyo nga simple samtang ginadala naton sa aton kaugalingon ang aton mga responsibilidad nga diosnon nga gintulin sa aton.

Pauna

Mainit ko nga ginaabiabi ang kada isa sa inyo nga nagapakigbahin sa sining komperensya.

Karon nga adlaw luyag ko nga maglaragway sang duha ka aspeto sang ginpanumbalik nga ebanghelyo ni Jesucristo, nga ginasundan sang apat ka makapapagsik nga mga istorya halin sa mga Santos sa Ulihing mga Adlaw sa bug-os nga kalibutan nga nagapakita sang pagpangabuhi sining mga prinsipyo. Ang una nga aspeto sang ginpanumbalik nga ebanghelyo—ang buluhaton sang Dios para sa kaluwasan kag pangkahitaasan—nagatutok sa mga responsibilidad nga diosnon nga gintulin sa aton. Ang ikaduha nga aspeto nagapahanumdom sa aton nga ang ebanghelyo maathag, malahalon, kag simple.

Mga Responsibilidad nga Diosnon nga Gintulin

Agud makabaton sang kabuhi nga wala katapusan, kinahanglan naton nga “magkari kay Cristo, kag magmangin himpit sa iya.”¹ Kon magpalapit kita kay Cristo kag buligan ang iban nga himuon man ini, nagapakigbahin kita sa buluhaton sang Dios para sa kaluwasan kag pangkahitaasan, nga nagatutok sa mga responsibilidad nga diosnon nga gintulin sa aton.² Ining diosnon nga mga responsibilidad nagasanto sa mga yabi sang priesthood nga ginpanumbalik nanday Moises, Elias, kag Elias, nga nasulat sa ika-110 nga seksyon sang Doktrina kag mga Kasugtanan,³ kag ang ika-duha nga dakong sugo nga ginhatag sa aton ni Jesucristo nga higugmaon ang aton mga kaingod subong sang aton kaugalingon.⁴ Makita ang mga ini sa una nga duha ka pahina sang gin-update nga General Handbook, nga pwede magamit sang tanan nga miyembro.

Kon ang pagpamati sang mga tinaga “General Handbook” ukon “mga responsibilidad nga diosnon nga gintulin” nagapakurog sa inyo sa kahadlok sang kabudlay sini hangpon, palihog, indi kamo magkahadlok. Ining mga responsibilidad simple lang, makainspirar, makapagiho, kag sarang mahimo. Ari ang mga ini:

Pagpangabuhi sang ebanghelyo ni Jesucristo
Pag-atipan sinang mga nagakinahanglan
Pag-agda sa tanan nga batonon ang ebanghelyo
Pag-isa sang mga pamilya para sa wala katapusan

Ayhan makita mo ang mga ini pareho sa pagkakita ko: bilang isa ka mapa pabalik sa aton mapinalanggaon nga Amay nga Langitnon.

Mga elemento sang buluhaton para sa kaluwasan kag pangkahitaasan

Ang Ebanghelyo Maathag, Malahalon, kag Simple

Ginsiling nga ang ebanghelyo ni Jesucristo “simple ang pagkatahum kag matahum ang pagkasimple.”⁵ Ang kalibutan indi amo sina. Komplikado ini, mabudlay, kag puno sang kagamo kag ilinaway. Ginabugayan kita kon indi naton pagtugotan ang pagkakomplikado, nga tama ka kinaandan sa kalibutan, nga mag-impluwensya sa paagi nga ginabaton kag ginapangabuhi naton ang ebanghelyo.

Si Pangulong Dallin H. Oaks nagkomento: “Gintudloan kita sing madamo nga magagmay kag simple nga mga butang sa ebanghelyo ni Jesucristo. Kinahanglan kita pahanumdumon nga sa kabilogan kag sa pagligad sang panahon, inang daw magagmay nga mga butang nagapahanabo sing dalagko nga mga butang.”⁶ Si Jesucristo Mismo naglaragway nga ang Iya gota mahulas, kag ang Iya lulan mamag-an.⁷ Dapat tinguhaan naton tanan nga matipigan ang ebanghelyo nga simple—sa aton mga kabuhi, sa aton mga pamilya, sa aton mga klase kag mga korum, kag sa aton mga ward kag stake.

Samtang nagapamati kamo sa masunod nga mga istorya nga ipaambit ko sa inyo, tandai nga ang mga ini mahinalungon nga ginpili sa pagpahibalo kag pag-inspirar sa inyo. Ang mga ginabuhat sining tagsa ka Santos sa Ulihing mga Adlaw mangin mga ehemplo para sa tagsa sa aton sa pagdapat sang ebanghelyo sa maathag, malahalon, simple nga mga paagi samtang ginatuman ang isa sang sini-lang-ginpahayag nga mga responsibilidad nga diosnon nga gintangdo.

Pagpangabuhi sang Ebanghelyo ni Jesucristo

Una, pagpangabuhi sang ebanghelyo ni Jesucristo Si Jens sang Denmark nagapangamuyo adlaw-adlaw nga mapangabuhi ang ebanghelo kag mahibal-an ang mga pagpabatyag halin sa Balaan nga Espiritu. Nakatuon sia sa pag-akto sing madasig kon iya nabatyagan nga ginagiyahan sia sang Espiritu.

Si Jens nagpaambit sang masunod:

“Nagapuyo kami sa matawhay, gamay nga balay, nga ang gwa human sa kahoy kag naatopan sang kogon sa sentro sang gamay nga baryo, malapit sa punong

“Sa sining gab-i nga pinakanami nga tig-ilinit sa Denmark nga sarang mahunahuna, nakabukas ang mga pwertahan kag mga bintana, kag ang tanan matawhay kag malinong. Tungod sang amon masanag kag malawig nga mga gab-i sa tig-ilinit, wala ko gid madalikyati nga islan ang napunder nga bombilya sa amon bodega [utility room].

“Gulpi lang, akon nabatyagan nga kinahanglan ko ato islan gilayon! Sa amo man nga tion, nabatian ko ang akon asawa nga si Mariann, nga nagapanawag sa akon kag sa kabataan nga manghinaw sang mga kamot kay handa na ang panihapon!

“Malawig-lawig na ako nga kasado agud mahibal-an nga indi ini ang tion nga magsugod ako sa paghimo sang kon ano dira kundi manghinaw sang akon mga kamot, pero nabatian ko ang akon kaugalingon nga nagasiling kay Mariann nga mahingagaw ako anay kadto sa tindahan agud magbakal sang bag-o nga bombilya. Nabatyagan ko nga kinahanglan ko gid nga maglakat gilayon.

“Ang groserya ara lang sa pihak nga bahin sang punong. Sa masami nagalakat lang kami, pero karon nga adlaw gindala ko ang akon bisikleta. Samtang nagalabay sa punong, nasiplatan ko ang isa ka gamay nga bata, mga duha ka tuig ang pangidaron, nga nagalakat sing isahanon, malapit sa bibi sang punong, malapit kaayo sa tubig—kag gulpi lang nahulog! Primero nakita ko pa sia—kag gulpi lang nadula!

“Ako lang ang nakakita sining natabo. Ginpahigad ko ang akon bisikleta, nagdalagan, kag naglumpat sa taga-hawak nga punong. Ang ibabaw sang tubig gilayon nga gintabonan sang mga tanom sa tubig, gani nangin imposible nga makita ang idalom sang tubig. Dayon may namutikan ako nga naggiho sa isa ka parte. Ginlab-ot ko ang akon kamot sa tubig, may nahawiran ako nga T-shirt, kag ginbutong ang bata paibabaw. Nagpungapunga sia, nag-ubo, kag naghibi. Wala madugay pagkatapos sadto ang bata nga lalaki nauli sa iya mga ginikanan.”

Sa pagpangamuyo ni Brother Jens sang bulig kada adlaw nga maintiendihan ang mga pagpabatyag halin sa Balaan nga Espiritu, bisan sa bagay nga di-kinaandan pareho sang insigida nga pag-ilis sang bombilya sang suga, nagapangamuyo man sia nga gamiton sia sa pagpakamaayo sang kabataan sang Dios. Ginapangabuhi ni Jens ang ebanghelyo paagi sa pagpangita sang diosnon nga paggiya kada adlaw, pagtinguha nga mangin takos, dayon paghimo sang iya pinakamaayo agud sundon inang paggiya kon mag-abot.

Pag-atipan Sinang mga Nagakinahanglan

Ari ang isa ka halimbawa sang pagtatap sa mga nagakinahanglan. Isa ka adlaw ang pangulo sang estaka sang Cúcuta sa Colombia nag-upod sa pangulo sang Young Women sa stake agud bisitahan ang duha ka young women—kag ang ila magulang nga tin-edyer nga lalaki—nga nagaeksperiyensya sang grabe nga mga kabudlayan. Sining karon lang, ang ila amay napatay, kag ang ila iloy napatay man isa ka tuig ang nagligad. Ang tatlo ka mag-utod karon nabilin nga sila lang sa ila gamay, kubos nga puluy-an. Ang mga dingding himo sa baraghal nga mga kahoy nga gintrapalan sang mga puyo nga plastik, kag ang atop nga sin nagatabon lamang sang bahin nga ila ginatulogan.

Pagkatapos sang ila pagbisita, nahibal-an sining mga lider nga kinahanglan nila nga magbulig. Paagi sa konseho sang ward, isa ka plano sa pagbulig ang ginsugdan. Ang mga lider sang ward kag stake—sa Relief Society, korum sang mga elder, Young Men, Young Women—kag madamo nga pamilya tanan nagbaton sang buluhaton nga bugayan ining pamilya.

Ang mga organisasyon nagpanawagan sa pila ka mga miyembro nga nagaobra sa konstruksyon. Ang iban nagbulig sa disenyo, ang iban nagdonar sang oras kag pagpangabudlay, ang iban naghanda sing mga pagkaon, kag ang iban pa gid nagdonar sang mga kinahanglanon nga mga materyales.

Sang mahuman na ang gamay nga balay, nangin malipayon ato nga adlaw para sa mga nagbinulig kag sa tatlo ka lamharon nga mga miyembro sang ward. Nabatyagan sining nailo nga kabataan ang mapinalanggaon kag nagapasalig nga kaangtanan sa ila pamilya sa ward agud mahibal-an nga wala sila nagaisahanon kag nga ang Dios ara pirme para sa ila. Nabatyagan sang mga nagbulig ang pagpalangga sang Manluluwas para sa sining pamilya kag naggiho bilang Iya mga kamot sa pagserbisyo sa ila.

Pag-agda sa Tanan nga Batonon ang Ebanghelyo

Pamatyag ko manamian kamo sa sining halimbawa sa pag-agda sang tanan nga batonon ang ebanghelyo. Ang disisiete-anyos nga si Cleiton sang Cape Verde wala gid sing ideya sang mangin resulta sang iya pagkadto sa klase sa seminary sang ward. Pero ang iya kabuhi kag ang kabuhi sang iban mabag-o sa katubtoban tungod ginhimo niya ato.

Si Cleiton, upod ang iya iloy kag magulang nga lalaki, ginbunyagan sa Simbahan sing madugay-dugay na, pero nag-untat na sa pagsimba ang pamilya. Ang iya lamang pagtambong sa seminary ang nangin dako nga impluwensya sa pagbag-o sang iya pamilya.

Ang iban nga lamharon sa klase sa seminary nangin mainabyanon kag maabiabihon. Ginpabatyag nila si Cleiton sing pagkahamtang kag ginpaisog sia nga magtambong sa isa pa ka kahiwatan. Nagtambong sia kag sang ulihi nagsugod sa pagtambong sa iban pa niya nga mga miting sa Simbahan. Nakita sang maalamon nga bishop ang espirituhanon nga potensyal ni Cleiton kag gin-agda sia nga mangin iya kabulig. “Sumugod sina nga tion,” siling ni Bishop Cruz, “si Cleiton nangin isa ka ehemplo kag impluwensya sa iban nga mga lamharon.”

Ang una nga gin-agda ni Cleiton pabalik sa simbahan amo ang iya iloy, dayon ang iya magulang nga lalaki. Dayon ginpang-agda pa gid niya sa Simbahan ang iya mga kaabyanan Isa sinang kaabyanan amo ang pamatan-on nga kaedad niya, si Wilson. Sa una pa lang niya nga pagpakigkita sa mga misyonero, si Wilson nagpabutyag sang iya handum nga magpabunyag. Ang mga misyonero nakadayaw gid kag nakibot kon ano na kadamo ang napaambit ni Cleiton kay Wilson.

Paghagad sa iban nga mag-upod sa pagsimba

Nagadako nga grupo sang aktibo nga mga lamharon

Ang mga pagpaninguha ni Cleiton wala nag-untat didto. Ginbuligan niya ang iban nga di-gawa-aktibo nga mga miyembro nga magbalik, dugang pa sa pagpaambit sang ebanghelyo sa mga kaabyanan sa iban nga pagtuluohan. Karon, ang ward may 35 na ka aktibo nga mga lamharon, nga may mauswagon nga programa sa seminary, salamat sa dako nga bahin sa pagpaninguha ni Cleiton nga magpalangga, magpaambit, kag mag-agda. Si Cleiton kag ang iya magulang nga si Cléber, pareho nga nagahanda nga magserbe sang full-time nga misyon.

Pag-isa sang mga Pamilya para sa Wala Katapusan

Sa katapusan, tugoti ninyo ako nga magpaambit sang matahum nga halimbawa sang pag-isa sang mga pamilya sa wala katapusan. Si Lydia sang Kharkiv, Ukraine, una nga nakahibalo parte sa templo sa mga misyonero. Insigida, nabatyagan ni Lydia ang hanuot nga handum nga magtambong sa templo, kag pagkatapos sang iya bunyag, nagsugod sia sa paghanda sa pagbaton sang temple recommend.

Si Lydia nagtambong sa Templo sang Freiberg Germany agud batunon ang iya endowment kag dayon nagtiner sang pila ka adlaw sa paghikot didto bilang tal-os nga tiglawas (proxy). Pagkatapos sang dedikasyon sang Templo sang Kyiv Ukraine, si Lydia nagtambong sa templo sing mas masunson. Sia kag ang iya bana nga si Anatoly, nabugkos didto sa walay katapusan kag sang ulihi gintawag nga magserbe bilang mga misyonero sa templo. Nga magkaupod, nakakita sila sing 15,000 ka mga ngalan sang mga katigulangan kag naghikot sang mga ordinansa sa templo para sa ila.

Sang ginpamangkot sang iya balatyagon parte sa buluhaton sa templo, si Lydia nagsiling, “Ano ang akon nabaton sa templo? Nakahimo ako sang bag-o nga mga kasugtanan upod sa Dios. Ang akon testimonya napabakod. Nakatuon ako magbaton sang personal nga rebelasyon. Nakahikot ako sang nagaluwas nga mga ordinansa para sa akon nagtaliwan na nga mga katigulangan. Kag pwede ako makapalangga kag magserbisyo sa iban nga tawo.” Naghingapos sia sa sining matuodtuod kaayo nga pahayag: “Luyag sang Ginuo nga makita kita pirme sa templo.”

Konklusyon

Nainspirar ako sa kaayo sining mga Santos sa Ulihing mga Adlaw, nga ang kada isa may lainlain kag magkatuhay nga nagliligad, ang gintalupangod sa sining apat ka istorya. Madamo ang sarang matun-an halin sa milagroso nga mga resulta dala sang simple nga pagdapat sang mga prinsipyo sang ebanghelyo. Ang tanan nila nga ginpanghimo masarangan man naton.

Kabay nga tipigan naton ang ebanghelyo nga simple samtang ginadala naton sa aton kaugalingon ang aton mga responsibilidad nga diosnon nga gintulin sa aton: Sa pagpangabuhi sang ebanghelyo ni Jesucristo agud mangin sensitibo sa mga pagpabatyag, kasubong sa ginhimo ni Jens sa Denmark. Sa pagtatap sa ila nga nagakihanglan, subong sang ginpakita sang mga miyembro sang estaka sang Cúcuta sa Colombia sa pagtigana sang puluy-an para sa mga ilo nga mga miyembro sang ward. Sa pag-agda sa tanan nga batonon ang ebanghelyo, sa paagi nga ginhimo ni Cleiton nga halin sa Aprikano nga isla sang Cape Verde upod ang iya pamilya kag mga kaabyanan . Ang katapusan, sa pag-isa sang mga pamilya para sa wala katapusan, pareho sa ginpakita ni Sister Lydia nga taga-Ukraine, paagi sa iya kaugalingon nga pagpanikasog sa family history, kag pag-alagad sa templo.

Ang paghimo sini pat-od nga magadala sang kalipay kag paghidaet. Sa sini ako nagapromisa kag nagapamatuod—kag kay Jesucristo bilang aton Manluluwas kag aton Manunubos—sa ngalan ni Jesucristo, amen.